បើគិតមកដល់ថ្ងៃទី ២៨​ ​ខែ​កក្កដា ​នេះស្ថានការណ៍នៅតាមព្រំដែនកម្ពុជា-ថៃ នៅមិនទាន់បានធូរស្រាលនៅឡើយទេ ដោយភាគីថៃនៅតែបន្តប្រើប្រាស់អាវុធធន់ធ្ងន់វាយប្រហារមកកាន់កម្ពុជាឥតឈប់ឈរ បើទោះបីជាការចូលតុចរចានៅម៉ាឡេស៊ី នៅថ្ងៃជាមួយគ្នាក៏ដោយ។

ជាមួយគ្នានេះផងដែរ គេឃើញថាមានបងប្អូនប្រជាពលរដ្ឋខ្មែរជាច្រើន មិនបន្ថយដៃនោះឡើយ ក្នុងការពាំនាំយកជំនួយជួយដល់បងៗកងទ័ពជួរមុខ ដែលកំពុងតែតស៊ូយ៉ាងអង់អាចក្លាហានការពារបូរណភាពទឹកដីពីចោរឈ្លានពាន ព្រមទាំងជួយប្រជាជនភៀសសឹករាប់ម៉ឺននាក់នៅជំរំភៀសខ្លួន មិនថាជាថវិកា ស្បៀងអាហារ ថ្នាំសង្កូវ សម្ភារៈចាំបាច់មួយចំនួន និងអ្វីដែលខ្វះមិនបានគឺកម្លាំងចិត្ត។

ដោយឡែក នៅក្នុងស្ថានការណ៍ប្រទេសកំពុងតែជួបទុក្ខបែបនេះ បងប្អូនជនរួមជាតិខ្មែរគ្រប់រូបគូរតែបញ្ឈប់ ឬផ្អាកសកម្មភាពខាងក្រោមនេះសិន ដើម្បីជាការផ្ដល់កម្លាំងចិត្តដល់បងៗកងទ័ពជួរមុខ ក៏ដូចជាទុកជាការចូលរួមកាន់ទុក្ខដល់កងវីរៈជនកម្ពុជាដែលបានពលីជីវិតជូនជាតិមាតុភូមិ ការពារទឹកដីពីការឈ្លានពានយ៉ាងគឃ្លើនរបស់ថៃ:

១.ផ្អាកការជួបជុំផឹកស៉ីសប្បាយទាំងឡាយ: ស្របពេលដែលបងៗកងទ័ពជួរមុខកំពុងតែតស៊ូការពារអធិបតេយ្យភាពទឹកដី ព្រោះវាប្រៀបដូចជាមិនផ្ដល់តម្លៃដល់ការលះបង់របស់វីរៈជនកម្ពុជាឡើយ។

២.ផ្អាកបង្ហាញរូបភាព ឬវីឌីអូពីម្ហូបអាហារសម្បូរហូរហារក្នុងបណ្ដាញសង្គមសិន: មិនហាមឃាត់ទេប្រសិនបងប្អូនបរិភោគឆ្ងាញ់ គេងស្រួល តែក្នុងកាលៈទេសៈនេះ ងាកទៅកាន់បងៗកងទ័ព និងពលរដ្ឋភៀសសឹកវិញ ពួកគាត់ស្ទើរតែគ្មានពេលទទួលទានអាហារឲ្យបានសមរម្យឡើយ ឬមួយចំនួនមិនមានសូម្បីទីជម្រកស្នាក់នៅ​ និងអាហារហូបចុកគ្រប់គ្រាន់ឡើយ។

៣.ផ្អាកការបង្ហាញរូបភាពសើចសប្បាយរីករាយខុសកាលៈទេសៈ ស្របពេលដែលប្រជាជនខ្លះ​ត្រូវបាត់បង់ផ្ទះសម្បែង បាត់បង់សមជិកគ្រួសារ និងខ្វះខាតស្បៀងអាហារ ប៉ុន្តែងាកទៅកាន់បងប្អូនឈាមខ្មែរមួយចំនួន បែរជាមានទឹកមុខរីករាយពោរពេញទៅដោយស្នាមញញឹមទៅវិញ នេះស្ដែងឱ្យឃើញថាដូចជាគ្មានមនុស្សធម៌ក្នុងខ្លួនបន្តិចសោះឡើយ។

យ៉ាងណាមិញ សកម្មភាពខាងលើមិនមែនជាការបំបិទសិទ្ធិក្នុងការប្រើប្រាស់សកម្មភាពប្រចាំថ្ងៃឡើយ គ្រាន់តែជាការក្រើនរំលឹកថា ពេលប្រទេសជាតិជួបការលំបាក ប្រជាជនខ្មែរគួរចេះសាមគ្គីគ្នា ទាំងកម្លាំងកាយ និងកម្លាំងចិត្ត មិនមែនជាពេលដែលត្រូវសប្បាយសារទេនឹងសង្រ្គាមឡើយ។ ម៉្យាងវិញទៀត វាគ្រាន់តែតែជាសកម្មភាពដែរគួរផ្អាកសិន មិនមែនជាការបិទទាំងស្រុងឡើយ ដូច្នេះបងប្អូនអាចបន្តសកម្មភាពទាំងនេះវិញជាធម្មតា នៅពេលណាដែលប្រទេសជាតិមានសុខសន្តិភាពឡើងវិញ៕

ថ្មីៗនេះបន្ទាប់ពីមានការវាយប្រហារតាមបែបចិត្តសាស្ត្ររបស់ថៃក្នុងប្រព័ន្ធឌីជីថល មានទាំងការលួចចូលអាខោនរបស់ពលរដ្ឋខ្មែរ និងការបង្កើតអាខោនក្លែងបន្លំធ្វើជាពលរដ្ឋខ្មែរ ដើម្បីផ្សព្វផ្សាយព័ត៌មានមិនពិត ដើម្បីបំបាក់ទឹកចិត្តប្រជាជន រួមទាំងកងទ័ពជួរមុខដែលកំពុងបំពេញភារកិច្ចការពារជាតិនោះ ពេលនេះក្រុមអ្នកជំនាញ IT កម្ពុជាចេញមកប្រាប់ពីរបៀបដាក់ 2FA លើ Account ដើម្បីការពារ Account Facebook ពីការវាយប្រហារតាមប្រព័ន្ធឌីជីថលរបស់ថៃ។

តាមរយៈអាខោនហ្វេសប៊ុករបស់អ្នកជំនាញ IT ឈ្មោះ Heng Makara ដើម្បីការពារអាខោនរបស់អ្នកពីការ Hacked របស់ជនខិលខូចថៃសូមអនុវត្តតាមជំហានដូចខាងក្រោម

-ជាដំបូងចូលទៅក្នុងអាខោន Facebook របស់អ្នក
-បន្ទាប់មកចុចលើពាក្យ Setting
-រួចហើយចុចលើពាក្យ Password and Security
-ចុចយកពាក្យ Two-factor authentication
– ចុចលើឈ្មោះ Facebook របស់អ្នក
– បន្ទាប់មកដាក់លេខទូរសព្ទ័ ឬ email ហើយបញ្ចូលលេខសម្ងាត់ដែលបានផ្ញើរទៅលេខទូរសព្ទ័ ឬ email របស់អ្នក និងជាចុងក្រោយគ្រាន់តែចុចពាក្យ Confim ជាការស្រេច។ ធ្វើដូចនេះ ពេលដែលមានអ្នកណាព្យាយាមចូលក្នុង Account Facebook របស់អ្នក វានឹងតម្រូវអោយយើងបញ្ចូលលេខកូដសម្ងាត់ដែលផ្ញើរមកតាមសារ ឬ email របស់អ្នក ហើយពួកជនខិលខូចទាំងនោះនឹងមិនអាចទទួលបានលេខសម្ងាត់នោះបានទេ។

យ៉ាណាមិញ មិនត្រឹមតែប្រាប់ពីគន្លឹះដើម្បីការពារអាខោនអ្នកពីការហេករបស់ក្រុមជនខិលខូចថៃប៉ុណ្ណោះទេ អ្នកជំនាញ IT ខាងលើ បានចេញមកធានាផងដែរ សម្រាប់ Account ឬ Page ដែលកំពុងវាយប្រហារបែប Digital និងចិត្តសាស្ត្រទៅកាន់ថៃ ហើយត្រូវបានពួកគេវាយប្រហារមកវិញ លោកនឹងផ្តល់ជូននូវការរៀបចំ Verified Blue Tick ជូនដោយឥតគិតថ្លៃ ។

លើសពីនេះ លោកបានបន្តថាប្រសិនបើត្រូវបានភាគីថៃ Hacked Page លោកនឹងធានាជួយទាញយកមកវិញជាមួយនឹងការរៀបចំប្រព័ន្ធសុវត្ថិភាពជូនដោយមិនគិតថ្លៃអ្វីទាំងអស់ទៀតផង ។ ដូចនេះ សម្រាប់បងប្អូនដែលជាអ្នកផលិតមាតិកា Videos វាយប្រហារតាមឌីជីថលទៅកាន់ថៃហើយបារម្ភខ្លាចភាគីថៃ Report ឬយកទៅ Claim Copyright ហើយមិនមាន RM ដើម្បីការពារ អាចទាក់ទងទៅលោកភ្លាមៗ លោកនឹងផ្តល់ជូនការការពារចេញពី RM របស់លោកដោយឥតគិតថ្លៃ
ហើយមិនចាំបាច់បារម្ភពីបញ្ហាភាគីថៃ Report នឹងវាយប្រហារវិញទៀតឡើយ។

ហេតុដូចនេះ ដើម្បីជៀសវាងការហេក ពីសំណាក់ភាគីជនខិលខូចថៃ លោកអ្នកអាចអនុវត្តតាមជំហានដូចខាងលើ ឬប្រសិនបើអាខោនត្រូវបានភាគីថៃហេកបានហើយ សូមទាក់ទងទៅកាន់អ្នកជំនាញខាងលើភ្លាមៗ ដើម្បីទទួលបានដំណោះស្រាយ ជៀសវាងបាត់បង់អាខោនដោយសារទង្វើរដ៏ស្មោគគ្រោករបស់ភាគីថៃ៕

ប្រទេសថៃ ៖ កាលពីថ្ងៃទី២៧ ខែកក្កដា ឆ្នាំ២០២៥ លោកស្រី ផេងថងថាន ស៊ីណាវ៉ាត់ នាយករដ្ឋមន្ត្រីថៃព្យួរតំណែងបានចុះសួរសុខទុក្ខពលរដ្ឋនៅខេត្តសុរិន្ទ ដែលរងគ្រោះដោយសារសង្គ្រាមនៅព្រំដែនកម្ពុជា-ថៃ ដែលបង្កឡើងដោយសារកងទ័ពឈ្លានពានថៃ ស្រាប់តែស្ត្រីថៃម្នាក់បានមកសុំនិយាយជាមួយលោកស្រី ផេថងថាន ដោយផ្ទាល់ ប៉ុន្តែលោកស្រីពុំឆ្លើយតប ទើបស្ត្រីរូបនេះស្រែកខ្លាំងៗថា «លោកស្រីចិត្តអាក្រក់ខ្លាំងណាស់» ។

ស្ត្រីរូបនេះបានឈរប្រជ្រៀតគ្នាជាមួយមនុស្សជាច្រើនទៀតព្រោះតែចង់និយាយជាមួយលោកស្រី ផេថងថាន ប៉ុន្តែលោកស្រី ផេថងថាន ពុំឆ្លើយតប ។ អ្នកស្រីក៏និយាយជាមួយសារព័ត៌មានថា អ្នកស្រីរំភើបពេលឃើញលោកស្រី ផេថងថាន ចុះសួរសុខទុក្ខពលរដ្ឋរងគ្រោះដោយសារសង្គ្រាម ប៉ុន្តែពលរដ្ឋនៅព្រំដែនឈឺចាប់ខ្លាំងណាស់នឹងពាក្យសម្តីរបស់លោកស្រី ផេថងថាន ។

លោកស្រី ផេថងថាន ដោះស្រាយបញ្ហាយឺតយ៉ាវខ្លាំងណាស់ ពលរដ្ឋថៃនៅតាមព្រំដែនប្រឈមនឹងការស្លាប់ដោយសារសង្គ្រាម ហើយទង្វើលោកស្រីធ្វើឱ្យពលរដ្ឋឈឺចាប់ទូទាំងប្រទេស ពុំមែនឈឺចាប់តែអ្នករស់នៅព្រំដែនទេ ពលរដ្ឋទាំងអស់ឈឺចាប់នឹងទង្វើលោកស្រីយ៉ាងខ្លាំង ។

ហេតុនេះ សូមលោកស្រីគិតឱ្យបានគ្រប់ជ្រុងជ្រោយថា ទង្វើរបស់លោកស្រីធ្វើឱ្យប៉ះពាល់ដល់ប្រទេសជាតិ និងពលរដ្ឋទូទាំងប្រទេស ។ តើអ្នកទាំងអស់គ្នាដឹងទេថា លោកស្រី ផេថងថាន បានធ្វើអ្វីខ្លះ? ពលរដ្ឋគ្រប់រូបសូមប្រាប់ទៅលោកស្រីថា ពួកយើងឈឺចាប់ ប៉ុន្តែពុំដឹងធ្វើដូចម្តេច ដូច្នេះ សូមមេដឹកនាំទាំងអស់ស្តាប់សំឡេងរបស់ពលរដ្ឋផង ។

លោកស្រីសំណូមពរទៅលោកស្រី ផេថងថាន សូមកុំធ្វើបែបនេះ ពួកយើងយល់ពីផលប្រយោជន៍ជាតិ ប៉ុន្តែសូមលោកស្រីគិតពីពលរដ្ឋរងគ្រោះ ។ ពលរដ្ឋសូមអង្វរឱ្យលោកស្រីគិតឡើងវិញពីរឿងជម្លោះព្រំដែនដើម្បីប្រទេសជាតិ ពីព្រោះលោកស្រីបានធ្វើអ្វីកន្លងមក គឺលោកស្រីបានដឹងខ្លួនឯងច្បាស់ ។

គួរបញ្ជាក់ថា បើទោះជាពលរដ្ឋថៃនៅទូទាំងប្រទេសបណ្តេញលោកស្រី ផេថងថាន ឱ្យលាលែងពីតំណែងក្តី ក៏លោកស្រីនៅតែក្រាញននៀលពុំចុះចេញពីតំណែងឡើយ ។ លោកស្រីជឿជាក់ថា នឹងអាចត្រឡប់មកកាន់តំណែងជានាយករដ្ឋមន្ត្រីឡើងវិញ ដោយព្យាយាមយកចិត្តពលរដ្ឋ ព្យាយាមយកចិត្តព្រះមហាក្សត្រ និងអំពាវនាវឱ្យពលរដ្ឋសហការជាមួយរដ្ឋាភិបាលតស៊ូធ្វើសង្គ្រាមជាមួយកម្ពុជា និងលាបពណ៌កម្ពុជាប្រាប់ពិភពលោក ៕

ប្រទេសថៃ ៖ សារព័ត៌មាន Khaosod រាយការណ៍ថា នៅថ្ងៃទី២៨ ខែកក្កដា ឆ្នាំ២០២៥ បុរសជ.នជាតិថៃម្នាក់បានបា.ញ់រះក្នុងផ្សារនៅតំបន់ចាក់តុចាក់ ទីក្រុងបាងកក បណ្តាលឱ្យសន្តិសុខស្លា.ប់ជាច្រើននាក់ រួមទាំងអាជីវករផងដែរ បន្ទាប់មក ខ្មាន់កាំភ្លើង.ក៏បានបា.ញ់សម្លាប់ខ្លួនឯងតាមក្រោយដើម្បីគេចពីការចាប់ខ្លួន ។ ក្រោយកើតហេតុ សមត្ថកិច្ចក៏បានមកកាន់កន្លែងបា.ញ់រះដើម្បីប្រមូលភស្តុតាង និងស្រាវជ្រាវមូលហេតុពិតប្រាកដ ។

ខ្មាន់កាំភ្លើងបានពាក់អាវពណ៌ខ្មៅ ស្លៀកខោខ្លី និងស្ពាយកាបូបដើរចូលទៅកន្លែងកើតហេតុ និងបាញ់រះតែម្តង ក្រោយពីបង្កសកម្មភាពរួច ខ្មាន់កាំភ្លើងក៏បានបញ្ចប់ជីវិតរបស់ខ្លួនក្នុងផ្សារ ។ ហេតុការណ៍នេះបណ្តាលឱ្យសន្តិសុខស្លាប់ ចំនួន៤នាក់, អាជីវករស្លាប់ម្នាក់ សរុបចំនួន៦នាក់ (បូករួមទាំងខ្មាន់កាំភ្លើង) ព្រមទាំងមានស្ត្រី២នាក់រងរបួស ហើយសមត្ថកិច្ចបានបញ្ជូនស្ត្រីទាំង២ទៅព្យាបាលនៅមន្ទីរពេទ្យ ។

តាមការត្រួតពិនិត្យបឋមឃើញថា ខ្មាន់កាំភ្លើងបានដាក់អត្តសញ្ញាណប័ណ្ណសញ្ជាតិថៃជាប់ខ្លួន ឈ្មោះ ណយ អាយុ៦១ឆ្នាំ មានស្រុកកំណើតនៅខេត្តនគរាជសីម៉ា ។ ខ្មាន់កាំភ្លើងធ្លាប់ធ្វើការជាសន្តិសុខក្នុងក្រុមហ៊ុនជាមួយសន្តិសុខ៤នាក់ដែលស្លាប់ ។

សមត្ថកិច្ចពុំទាន់ប្រាប់ពីមូលហេតុពិតប្រាកដនៃការបាញ់រះទេ ប៉ុន្តែហេតុការណ៍នេះបានបង្កការភ័យស្លន់ស្លោយ៉ាងខ្លាំងដល់អាជីវករ និងពលរដ្ឋថៃ ហើយមានការសន្និដ្ឋានថា ខ្មាន់កាំភ្លើងជាសន្តិសុខអាចមានទំនាស់ជាមួយសន្តិសុខទាំង៤នាក់ដែលធ្វើការក្នុងក្រុមហ៊ុនជាមួយគ្នា ទើបឈានទៅបង្កហេតុបែបនេះ ។

បច្ចុប្បន្ន ប្រទេសថៃសម្បូរក្រុមស្ទាវ និងក្រុមជ្រុលនិយមដើរបង្ករឿងកាប់ចាក់ធ្វើបាបពលករខ្មែរស្លូតត្រង់ រហូតដល់មានការអំពាវនាវពីរដ្ឋាភិបាលថៃឱ្យក្រុមជ្រុលនិយមបញ្ឈប់សកម្មភាពជាបន្ទាន់ ។ ប៉ុន្តែហេតុការណ៍នេះ គឺជនជាតិថៃបាញ់សម្លាប់ជនជាតិថៃគ្នាឯងដោយគ្មានខ្លាចញញើតច្បាប់ និងសមត្ថកិច្ច ៕

ប្រទេសថៃ ៖ ថ្មីៗនេះ សារព័ត៌មានថៃបានផ្សព្វផ្សាយពីសព្វាវុធ PHL-03 របស់កម្ពុជា ដែលអាចបា.ញ់បានចម្ងាយជាង១០០គីឡូម៉ែត្រ ហើយបើកម្ពុជាប្រើប្រាស់អាវុធនេះដើម្បីទប់ទល់នឹងការឈ្លានពានរបស់ថៃមែននោះ គឺវានឹងប៉ះពាល់ដល់ខេត្តជាច្រើនរបស់ថៃ ។ ក្រោយការផ្សព្វផ្សាយបែបនេះធ្វើឱ្យអាជ្ញាធរខេត្តមួយចំនួនរបស់ថៃនៅជាប់ព្រំដែនកម្ពុជាបារម្ភ និងជម្លៀសពលរដ្ឋខ្លួនទៅកន្លែងមានសុវត្ថិភាព ។

កាលពីថ្ងៃទី២៧ ខែកក្កដា ឆ្នាំ២០២៥ លោក រុណាក់កន រតនៈផន សមត្ថកិច្ចថៃបានជូនដំណឹងឱ្យពលរដ្ឋថៃរកកន្លែងជម្លៀសខ្លួន និងប្រុងប្រយ័ត្នសុវត្ថិភាព ពីព្រោះកម្ពុជាអាចប្រើប្រាស់សព្វាវុធ PHL-03 បាញ់បានចម្ងាយរហូតដល់១៣០គីឡូម៉ែត្រ ។ បើកម្ពុជាប្រើប្រាស់សព្វាវុធនេះមែន វានឹងមានគ្រោះថ្នាក់ដល់ខេត្តជាច្រើនរបស់ថៃ ដូចជា ៖ ខេត្តឧប៊ុនរ៉ាជថានី សុរិន្ទ ស៊ីសាកេត បុរីរាំ និងតំបន់ខ្លះក្នុងស្រុកមហាឆាណៈឆ័យ និងស្រុកខរវាំង ខេត្តយៈសូថន ។

វានឹងមានគ្រោះថ្នាក់ដល់ស្រុកមឿងសួង ស្រុកសុវណ្ណភូមិ ស្រុកផូនសាយ ស្រុកផានុមព្រៃ ស្រុកណងហ៊ី ស្រុកក្សេតវិស័យ និងសរុកប៉ាធុមរ៉ាត់ ខេត្តរ៉យអេត ។ ក្រៅពីនេះ ស្រុកផាយ៉ាក ខេត្តមហាសារ៉ាខាម និងស្រុកជាច្រើនទៀតក្នុងខេត្តនគរាជសីម៉ា ក៏មានគ្រោះថ្នាក់ដោយសារសព្វាវុធនេះដែរ ។

សមត្ថកិច្ចថៃរូបនេះបានបង្ហោះរូបយន្តហោះចម្បាំង F-16 និងយន្តហោះចម្បាំង Gripen ដើម្បីគំរាមកំហែងកម្ពុជា ហើយសរសេរថា ៖ «ប្រសិនបើសព្វាវុធ PHL-03 បាញ់ត្រូវពលរដ្ឋថៃពេលណា រាជធានីភ្នំពេញនឹងខ្ទេចពេលនោះ ។ ដូច្នេះ ចូរគិតឱ្យបានច្បាស់លាស់ ពីព្រោះជនជាតិថៃស្រឡាញ់សន្តិភាព ប៉ុន្តែមិនកំសាកក្នុងការប្រយុទ្ធទេ» ។

គួរបញ្ជាក់ថា អ្នកនាំពាក្យក្រសួងការពារជាតិកម្ពុជាបានបញ្ជាក់ម្តងហើយម្តងទៀតថា មកទល់ពេលនេះ កម្ពុជាមិនទាន់មានភាពចាំបាច់ណាមួយត្រូវប្រើប្រាស់សព្វាវុធ PHL-03 ឡើយ ពីព្រោះអាវុធនេះបានកំពុងបង្កភាពភ័យខ្លាច និងបង្កើតការស្លន់ស្លោទាំងកងទ័ព និងពលរដ្ឋថៃ ៕

(ភ្នំពេញ)៖ អ្នកនាំពាក្យក្រសួងការពារជាតិកម្ពុជាបានប្រកាសច្រានចោលការចោ.ទប្រកាន់ពីសំណាក់ភាគីថៃ ថាកម្ពុជាបានប្រើប្រាស់ប្រព័ន្ធបា.ញ់មីសុីលចម្ងាយឆ្ងាយ PHL 03 បា.ញ់ចូលទឹកដីថៃ ដោយក្រសួងបញ្ជាក់ថា គិតមកត្រឹមថ្ងៃនេះ កម្ពុជា មិនទាន់បញ្ចេញ និងប្រើអាវុធដ៏មានសក្តានុពល PHL 03 របស់ខ្លួននៅឡើយទេ។

លោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិបានបញ្ជាក់ថា “ក្រសួងការពារជាតិ នៃព្រះរាជាណាចក្រកម្ពុជា សូមប្រកាសថ្កោលទោស និងច្រាលចោលចំពោះការចោ.ទប្រកាន់ខុសពីការពិត និងមានចេតនាទុច្ចរិត របស់ភាគីថៃ ដែលបានចោ.ទប្រកាន់ថាកម្ពុជាបានប្រើប្រាស់ម៉ីស៊ីលរយៈចម្ងាយឆ្ងាយ PHL 03 បា.ញ់ចូលទឹកដីថៃ”។

ស្របពេលជាមួយនឹងការប្រកាសបដិសេធចំពោះការចោ.ទប្រកាន់នេះ ក្រសួងក៏បានបញ្ជាក់ជាថ្មីថា គិតមកដល់ថ្ងៃទី២៨ ខែកក្កដានេះ កម្ពុជានៅមិនទាន់បានប្រើប្រាស់ និងមិនទាន់ដល់ពេលប្រើ ម៉ីស៊ីលរយៈចម្ងាយឆ្ងាយ PHL 03 នៅឡើយទេ។

គួរជម្រាបថា ការចោ.ទប្រកាន់ដោយគ្មានមូលដ្ឋានរបស់ភាគីថៃ ដើម្បីខ្លួនអាចតម្លើងកម្រិតនៃការប្រើប្រាស់អាវុធកាន់តែសាហាវព្រៃផ្សៃជាងមុន ឃោរឃៅជាងមុន អមនុស្សធម៌ជាងមុន ក្នុងការវា.យប្រហារមកលើដែនអធិបតេយ្យភាពកម្ពុជា ដែលការផ្សព្វផ្សាយព័ត៌មានមិនពិតទាំងនេះ គឺដើម្បីបំភ័ន្តប្រជាជនខ្លួនឯងផង និងសហគមន៍អន្តរជាតិផងដែរ៕