លោក John Sey អ្នក Review ដ៏ល្បីឈ្មោះប្រចាំប្រទេសកម្ពុជាបានស្នើសុំអ្នកនិយមលេងបណ្តញសង្គមមួយចំនួនកុំយកប្រទេសទី២ ទី៣ មកថែមចូលជម្លោះស្របពេលដែលយើងកំពុងដោះស្រាយជាមួយប្រទេសថៃហើយយើងត្រូវការសន្តិភាព។ លោកស្នើសុំឱ្យបញ្ឈប់ការឌឺដងទៅប្រទេសដទៃដែលកាន់ជើងប្រទេសថៃព្រោះនាំឱ្យប្រឡាក់ភាពស្អាតស្អំរបស់ខ្មែរ។

នាពេលថ្មីៗនេះមានការចែកចាយរូបភាពដែលភាគីថៃបានជួបជាមួយនឹងភាគីប្រទេសផ្សេងហើយអ្នកលេងបណ្តាញសង្គមបានបញ្ចេញមតិប្រតិកម្មយ៉ាងច្រើន។ ឃើញអ្នកប្រើប្រាស់បណ្តាញសង្គមទាញយកប្រទេសដទៃចូលមកថែមក្នុងជម្លោះលោក John Sey ស្នើឱ្យអ្នកលេងបណ្តាញសង្គមបញ្ឈប់សកម្មភាពនេះ។

នៅថ្ងៃទី៥ សីហា លោក John Sey បានបង្ហោះសំណេរថា «សុំចិត្តបងប្អូនយើងមួយចំនួនត្រង់ៗ មេត្តាកុំយកប្រទេសទី ២ ទី ៣ មកថែមចូលជម្លោះជាមួយទៀតអីដោះស្រាយសៀមតែ ១ សិនទៅ យើងត្រូវការសន្តិភាព »។ លោកក៏បន្ថែមពាក្យពេចន៍ថា «សូមបញ្ឈប់ការទៅបញ្ចេញមតិឌឺដងឱ្យប្រទេសផ្សេងដែលកាន់ជើងសៀមទៅ! ខ្ញុំដឹងថាយើងខឹង តែធ្វើបែបនេះវាកាន់តែនាំឱ្យប្រឡាក់រូបភាពស្អាតស្អំយើងទៅវិញទេ» នៅក្នុងផ្នែកមតិយោបល់ផងដែរ។

គួរបញ្ជាក់ផងដែរថា ស្របពេលប្រទេសកម្ពុជានិងថៃមានបញ្ហាជម្លោះព្រំដែនជាមួយគ្នា មានការកើនឡើងយ៉ាងខ្លាំងអំពីព័ត៌មានក្លែងក្លាយ ដែលមានចរិតបញ្ឆេះកំហឹងប្រជាពលរដ្ឋ ហើយការចែកចាយព័ត៌មានក្លែងក្លាយកំពុងតែរួមចំណែកឱ្យប្រទេសទាំងពីរកាន់តែតានតឹងហើយធ្វើឱ្យបទឈប់បាញ់ផុយស្រួយ អាចបំផ្លាញសន្តិភាពបាន៕

គ្មានឡើយសភាពស្ងប់ស្ងាត់ក្នុងតំបន់អង្គរ ដោយសារមានជំនឿលើបារមីវត្ថុស័ក្តិសិទ្ធ អទិទេពនានា និងព្រលឹងបុព្វបុរសខ្មែរដែលថែរក្សាដែនដីមួយនេះ បច្ចុប្បន្នមានពលរដ្ឋខ្មែរកាន់តែច្រើនមកពីគ្រប់ទិសទី បាននាំគ្នាយកគ្រឿងបូជាផ្សេងៗមកបន់ស្រន់សុំសេចក្តីសុខតាមទីសក្ការៈទីទៃពីគ្នាតាមបណ្តាប្រាសាទបុរាណ។ នេះបើផ្អែកតាមការផ្សព្វផ្សាយលើគេហទំព័រហ្វេសប៊ុកផ្លូវការរបស់អាជ្ញាធរជាតិអប្សរា នាថ្ងៃទី០៥ ខែសីហា ឆ្នាំ២០២៥។

ក្រៅអំពីរូបពុទ្ធបដិមា រូបទេពនានានៅក្នុងលទ្ធិព្រហ្មមញ្ញសាសនាក៏ទទួលបានប្រជាប្រិយភាពដែរ រហូតក្លាយជាគោលដៅនៃការមកគោរពបូជាពីសំណាក់ភ្ញៀវចម្រុះជាតិសាសន៍ ពិសេសបដិមាព្រះវិស្ណុ។ ពលរដ្ឋខ្មែរច្រើនមកបួងសួងសុំពរជ័យ សេចក្តីសុខចម្រុងចម្រើនពីព្រះអង្គ ពិសេសសូមឱ្យប្រទេសជាតិកម្ពុជារួចផុតពីសង្រ្គាមឈ្លានពាន ពីជំងឺផេ្សងៗ និងសម្បូរសប្បាយជានិច្ចនិរន្ត។

តាមឯកសារបង្ហាញអំពីជំនឿខ្មែរមួយចំនួនបានបញ្ជាក់ថា ព្រះវិស្ណុ ឬព្រះនរាយណ៍ ជាអាទិទេពមួយអង្គក្នុងចំណោមអាទិទេពបីអង្គនៃលទ្ធិព្រហ្មញ្ញសាសនា ឬហិណ្ឌូសាសនា ដោយព្រះអង្គ ជាព្រះការពារលោក ជាព្រះដែលបង្កើតព្រះព្រហ្ម និងព្រះឥសូរ។ ព្រះវិស្ណុ ជាព្រះដ៏វិសេស មានសម្បុររាង្គកាយពណ៌បៃតង គ្រងសំលៀកបំពាក់ពណ៌មាស មានយាន្តជំនិះជាសត្វគ្រុឌ ឬហោះហើរដោយមានផ្កាឈូកទ្រព្រះបាតជើងរបស់ព្រះអង្គ ហើយអាចបែងភាគជាមានដៃ ៨។

ព្រះហត្ថទាំង ៨ មានកាន់សាស្ត្រាវុធដូចជា កងចក្រ ខ្យងស័ង្ខ ព្រះខ័ន ផ្កាឈូក ដំបង ដងធ្នូ គម្ពីរវេទ និងឈើច្រត់។ តាមទេវៈកថា ដោយសាទ្រង់ជាទេពរក្សាលោក ទ្រង់តែងដើរតួនាទីជាអ្នកសង្គ្រោះពិភពលោក តាមការបែងភាគ ជាអាវតារទាំង១០ ដែលចែកជា ៣ទម្រង់ គឺទម្រង់ជាមនុស្ស សត្វ និងពាក់កណ្ដាលខ្លួនជាមនុស្ស ឯពាក់កណ្ដាលទៀតជាសត្វ។ ឯរូបបដិមាព្រះវិស្ណុ ឬព្រះនរាយណ៍របស់ប្រទេសកម្ពុជា ដែលត្រូវបានគេចាត់ទុកថាជាបដិមាដែលធ្វើអំពីលោហៈដ៏ធំជាងគេនៅក្នុងតំបន់អាស៊ីអាគ្នេយ៍ និងនៅតំបន់អង្គរ គឺជាបដិមាព្រះវិស្ណុផ្ទុំដែលត្រូវបានគេតម្កល់ទុកនៅក្នុងសារមន្ទីរជាតិនារាជធានីភ្នំពេញ។

តាមរយៈកំណាយនៅឆ្នាំ១៩៣៦ ដឹកនាំដោយអ្នកអភិរក្សជនជាតិបារាំង លោក ម៉ូរីស ហ្គេស(Maurice Glaize) បានរកឃើញបដិមានេះ នៅក្នុងគំនររណ្តៅថ្មចំកណ្តាលតួប៉មប្រាសាទមេបុណ្យខាងលិច។ តាមការសន្និដ្ឋាន ជំហានដំបូងគេបានវាយកម្ទេចបដិមាព្រះនារាយណ៍ផ្ទុំនេះជាច្រើនបំណែក មុនយកទៅកប់ចោលក្នុងដី ជាមួយនឹងបំណែកបដិមាផ្សេងទៀត។ ទោះបែបណាក្តីរហូតបច្ចុប្បន្នមិនទាន់មានការបកស្រាយលម្អិតអំពីវិធីដែលនាំអោយខ្មែរអាចផលិតបានបដិមាព្រះវិស្ណុធ្វើពីលោហៈសំរឹទ្ធ ហើយស្រោបមាសមានខ្នាតយក្សបែបនេះទេ។

ប៉ុន្តែកន្លងមក រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លោក លី រស្មី ធ្លាប់បានបញ្ជាក់ថា នៅសម័យអង្គរ ខ្មែរធ្លាប់មានឡស្លលោហៈធំជាងគេនៅតំបន់អាស៊ីអាគ្នេយ៍ ដែលគ្មានប្រទេសណាមួយអាចស្លលោហៈបានល្អដូចខ្មែរឡើយ។ ទោះបែបណាក្តី បដិមាព្រះវិស្ណុដែលយកមករក្សាទុកនារាជធានីភ្នំពេញ មានត្រឹមមួយកំណាត់ខាងលើប៉ុណ្ណោះ ដោយមានព្រះហស្ថស្ដាំពីរ ព្រះសីសៈ និងដើមទ្រូង។ កំណាត់បដិមានេះមានកម្ពស់ ១២២ សង់ទីម៉ែត្រ ប្រវែង ២២២ សង់ទីម៉ែត្រ និងទទឹង៧២.៥ សង់ទីម៉ែត្រ ប្រសិនបើនៅមានរូបរាងពេញលេញបដិមាអង្គនេះអាចមានប្រវែងរហូត ៦ម៉ែត្រឯណោះ៕

ដើម្បីធានាសុវត្ថិភាព បញ្ចៀសបញ្ហានៃការផ្ទុះសង្គ្រាមតាមព្រំដែនរវាងកម្ពុជា និងថៃ ក្រសួងអប់រំ យុវជន និងកីឡា បានសម្រេចអោយបេក្ខជនដែលត្រូវប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នៅក្នុងខេត្តឧត្តរមានជ័យ ទទួលបានសិទ្ធពិសេសអាចទៅប្រឡងនៅក្នុងភូមិសាស្ត្រស្រុកពួក នៃខេត្តសៀមរាប។

ក្រសួងនឹងបង្កើតក្រុមការងារ ដើម្បីគាំទ្រលើការដឹកជញ្ជូនបេក្ខជន ផ្តល់ថវិកាសម្រាប់ការហូបចុក ការស្នាក់នៅ និងរៀបចំយន្តការផ្សេងទៀតតាមការចាំបាច់ នេះបើតាមសេចក្ដីជូនដំណឹងរបស់ក្រសួងអប់រំ យុវជន និងកីឡា កាលពីថ្ងៃទី៣១ ខែកក្កដា ឆ្នាំ២០២៥។

សម្រាប់បេក្ខជននៅខេត្តឧត្តរមានជ័យ និងខេត្តព្រះវិហារ ប្រសិនបើពួកគេបានភៀសខ្លួនចេញពីខេត្ត គេអាចសម្រេចចិត្តចូលរួមប្រឡងនៅទីតាំងក្នុងខេត្តរបស់ខ្លួនក៏បាន ឬនៅខេត្តផ្សេងទៀតក៏បាន។ ប៉ុន្តែបេក្ខជនដែលភៀសខ្លួនត្រូវដាក់ពាក្យនៅមន្ទីរអប់រំ យុវជន និងកីឡារាជធានី ខេត្ត ដែលខ្លួនបានសម្រេចចិត្តជ្រើសរើសប្រឡង។

ពួកគេអាចទៅទទួលសលាកបត្រឯកត្តជនដែលទើបបោះពុម្ពថ្មី នៅតាមបណ្តាមន្ទីរអប់រំរាជធានី ខេត្ត ដែលខ្លួនបានដាក់ពាក្យចាប់ពីថ្ងៃទី២២ ខែសីហា ឆ្នាំ២០២៥។ មន្ទីរអប់រំរាជធានី ខេត្តចំនួន២៣ ផ្សេងទៀតត្រូវចាត់ចែងទទួលពាក្យសុំចុះឈ្មោះប្រឡង និងទទួលបូកសរុបព័ត៌មានដែលទទួលបានពីបេក្ខជនភៀសខ្លួនពីខេត្តព្រះវិហារ និងខេត្តឧត្តរមានជ័យ រួចរៀបចំបញ្ជីឈ្មោះបេក្ខជនភៀសខ្លួនដែលបានដាក់ពាក្យប្រឡង ព្រមទាំងបញ្ជូនមកក្រសួងត្រឹមថ្ងៃទី១៥ ខែសីហា ឆ្នាំ២០២៥ ដើម្បីបូកសរុប និងរៀបចំបញ្ជីរាយនាមបេក្ខជន និងសលាកបត្រឯកត្តជន និងបន្តនីតិវិធីនៃដំណើការប្រឡងជាបន្តទៀត។

សូមរម្លឹកថា ដោយសារបញ្ហាសង្គ្រាមឈ្លានពាននៅតាមបណ្តោយព្រំដែនរវាងប្រទេសកម្ពុជា-ថៃ ក្រសួងអប់រំយុវជន និងកីឡាបានសម្រេចពន្យាពេលប្រឡងបាក់ឌុប ឆ្នាំសិក្សា២០២៤-២០២៥ ដែលគ្រោងនឹងរៀបចំធ្វើនៅថ្ងៃទី១៨ និងទី១៩ ខែសីហា ឆ្នាំ២០២៥ ទៅធ្វើនាថ្ងៃទី២៨ និងទី២៩ ខែសីហា ឆ្នាំ២០២៥ វិញ។

បើតាមក្រសួងអប់រំដដែល គិតត្រឹមថ្ងៃទី០៥ ខែសីហា ឆ្នាំ២០២៥ កម្ពុជាមានសាលារៀនចំនួន ៣២០ កន្លែងហើយដែលត្រូវសម្រេចបិទទ្វាបណ្តោះអាសន្ន។ សាលាទាំងនោះស្ថិតក្នុងខេត្តចំនួន៤ ដែលមានព្រំដែនជាប់នឹងប្រទេសថៃ រួមមានខេត្តព្រះវិហារ ឧត្តរមានជ័យ កោះកុង និងខេត្តពោធិ៍សាត់៕

ដោយសារមានទឹកចិត្តស្នេហាជាតិ មាតុភូមិ អង់អាចក្នុងការតស៊ូប្រយុទ្ធ ជាមួយទាហានសៀម ដោយមិនរាថយកាលពីពេលកន្លងមក រហូតទទួលបានរហ័ស្សនាមពីអ្នកនិយមលេងបណ្តាញសង្គមទាំងក្នុង និងក្រៅប្រទេស ថាជារ៉ាំបូស្រុកខ្មែររួចមកនោះ លោក ម៉ៅណុល ក៏ទទួលបានការកោតសរសើរពីអភិបាលខេត្តតាកែវផងដែរ។

ផ្អែកតាមការផ្សព្វផ្សាយរបស់ក្រសួងមហាផ្ទៃ នាថ្ងៃទី៥ ខែសីហា ឆ្នាំ២០២៥ ឯកឧត្តម វី សំណាង អភិបាលខេត្តតាកែវ មិនត្រឹមទៅសួរសុខទុក្ខលោកទាហាន ម៉ៅ ណុលរហូតដល់ផ្ទះប៉ុណ្ណោះទេ តែឯកឧត្តមក៏ថែមទាំងពោលសរសើររូបលោក ថាជាទាហានមួយរូបពោរពេញដោយសមត្ថភាព និងមានភាពអង់អាចក្លាហានទៀតផង។

ដ្បិតរស់នៅភូមិត្រពាំងឬស្សី ឃុំសូភី ស្រុកបាទី ខេត្តតាកែវ តែក្នុងអំឡុងពេលប្រទេសមានសង្គ្រាមឈ្លានពានពីសំណាក់ប្រទេសថៃ លោក ណុល ត្រូវទៅប្រចាំការនៅប្រាសាទតាក្របី។ ទាហានរូបនេះទទួលបានការកោតសរសើរខ្លាំងពីអ្នកលេងបណ្តាញសង្គមក្រោយរូបភាពវីដេអូ លោកស្លៀកតែខោខ្លី អត់ពាក់អាវបាញ់កាំភ្លើងAK និងB40 តទល់ជាមួយទាហានថៃត្រូវបានផ្សព្វផ្សាយ។

ដើម្បីបង្ហាញអំពីការលើកទឹកចិត្ត និងភាពរួបរួមគ្នាជាធ្លុងមួយដ៏រឹងមាំនៃខឿនការពារជាតិរបស់កម្ពុជា អភិបាលខេត្តតាកែវ រួមនឹងពលរដ្ឋខេត្តតាកែវផ្សេងទៀត បានធ្វើការឧបត្ថម្ភជាសម្ភារ និងថវិកាមួយចំនួន ដល់លោក ម៉ៅ ណុល ទៀតផង។

សូមបញ្ជាក់ថា នេះមិនមែនជាសកម្មភាពទទួលបានជំនួយលើកដំបូងរបស់រូបលោកឡើយ ក្រោយទទួលប្រជាប្រិយភាពតាមបណ្តាញទំនាក់ទំនងសង្គម លោក ណុល តែងទទួលបានជំនួយជារឿយៗពីសំណាក់សប្បុរសជនទាំងក្នុង និងក្រៅប្រទេស។ ក្រោយព័ត៌មានបញ្ជាក់ពីការគ្មានជម្រកស្នាក់នៅ បានត្រឹមសុំផ្ទះបងប្អូនជ្រកបណ្តោះអាសន្នត្រូវបានចែកចាយ សប្បុរសជនខ្លះថែមទាំងហ៊ានសន្យាទិញដីសង់ផ្ទះជូន រ៉ាំបូស្រុកខ្មែរ រូបនេះទៀតផង៕

ចាប់តាំងពីមានការឈ្លានពានពីកងទ័ពសៀម ក្រុមហ៊ុន ប៊ូសស្ត្រង តែងតែងដឹងគុណដល់វីរៈកងទ័ពដែលបានពលីឈាមស្រស់ សាច់ស្រស់ រងរបួសធ្ងន់-ស្រាល ឬពិការ និងខ្លះទៀតបានពលីជីវិត។

ដើម្បីជាការដឹងគុណដ៏ធំធេងរបស់វីរៈកងទ័ព ក្រុមហ៊ុន ប៊ូសស្ត្រង បានឧបត្ថម្ភជាថវិកាជាច្រើនដល់វីរៈកងទ័ព ដែលបានតតាំងកម្ចាត់ខ្មាំងសត្រូវសៀម។

ជាក់ស្តែង ក្រុមហ៊ុន ប៊ូសស្ត្រង បានឧបត្ថម្ភ១០លានរៀល ដល់លោកអនុសេនីយ៍ឯក ចឹក ឆុន អាយុ ៤៥ឆ្នាំ ដែលបានពលីក្នុងសមរភូមិ ដោយសារផ្សែងពុល របស់ទ័ពឈ្លានពានសៀម។

ថវិកានេះ នឹងជួយសម្រួលបន្ទុកដល់ក្រុមគ្រួសារលោកអនុសេនីយ៍ឯក ចឹក ឆុន ដែលភរិយារបស់លោកត្រូវចិញ្ចឹមបីបាច់កូនៗតែម្នាក់ឯង។

គួរបញ្ជាក់ថា ចាប់តាំងពី សង្គ្រាមផ្ទុះបានឡើងដោយការឈ្លានពានពីប្រទេសថៃ មកលើដែនអធិបតេយ្យកម្ពុជា ក្រុមហ៊ុនប៊ូសស្រ្តងបានបង្កើត យុទ្ធនាការ ប៊ូសស្រ្តង ១លានកំប៉ុង បរិច្ចាគ ១,០០០,០០០,០០០រៀល ជួយគ្រួសារកងទ័ពរបួស និងពលី។ ដូច្នេះបើបងប្អូនចង់ចូលរួមយុទ្ធនាការនេះ បងប្អូនគ្រាន់តែទិញប៊ូសស្រ្តង ១កំប៉ុង ដូចបានជួយកងទ័ពផ្ទាល់ ១,០០០រៀល ផងដែរ៕

ប្រមុខការពារជាតិកម្ពុជា ឯកឧត្តម ទៀ សីហា បានបង្ហោះសំណេរដ៏គួរឲ្យចាប់អារម្មណ៍មួយនៅលើទំព័រហ្វេសប៊ុក បង្ហាញពីការហួសចិត្ត ដែលធ្លាប់តែមើលរឿងភាគប្រទេសខ្លះបង្ហាញពីភាពស្រស់ស្អាតកក់ក្តៅ ទន់ភ្លន់តែបង្កប់ល្បិចកល ឈ្នានីសគ្រប់រសជាតិ ក្នុងបំណងគ្រប់គ្រងលើអ្វីដែលខ្លួនឯងប្រាថ្នា ប៉ុន្តែពេលនេះអ្វីដែលនៅក្នុងរឿងភាគ គឺកើតចេញពីរឿងពិត និងបានកើតឡើងបច្ចុប្បន្ន ហើយលោកបានឃើញពេញភ្នែកទៀត។

កាលពីយប់ថ្ងៃទី5 ខែសីហា ឆ្នាំ2025 លោក ទៀ សីហា ឧបនាយករដ្ឋមន្ត្រី និង ជារដ្ឋមន្រ្តីក្រសួងការពារជាតិកម្ពុជា បានបង្ហោះសំណេរខ្លីមួយដែលមានន័យយ៉ាងដូច្នេះថា៖ «ចេញផ្សាយមិនចេះហត់ ពូកែ ឆ្លាត ព្រមទាំងសម្រស់បាន! ចេះផ្អែម ចេះជូរ ចេះចត់ ចេះកំសត់ គ្រប់ជំនាញ។ មើលរឿងភាគតាំងពីក្មេងដល់ធំ ជក់ចិត្ត និងសរសើអ្នកនិពន្ធពូកែនឹកឃើញ ពូកែបង្ហាញភាពស្រស់ស្អាតកក់ក្តៅ ប៉ិនបង្ហាញពីភាពទន់ភ្លន់ភ្ជាប់ជាមួយល្បិចកល ឈ្នានីស ក្នុងបំណងគ្រប់គ្រង មនុស្ស ឬទ្រព្យដែលខ្លួនឯងប្រាថ្នា។ »

តាមន័យនេះ លោក ទៀ សីហា ហាក់ចង់សម្ដែងនូវការហួសចិត្ត និងមិននឹកស្មានដល់ថាទង្វើ ឬសកម្មភាពដែលធ្លាប់ឃើញក្នុងខ្សែភាពយន្ត អាចកើតមាននៅក្នុងជីវិតពិតបែបនេះសោះ ដោយលោកបានរំលេចនូវឃ្លាចុងក្រោយថា៖ «ពេលនេះដឹងហើយ មិនមែនរឿងភាគទេ តែវាចេញពីរឿងពិត និងពិតជាបានឃើញពេញភ្នែក។»

គួរបញ្ជាក់ថា ដ្បិតថាជាសំណេរខ្លីមួយ ប៉ុន្តែប្រមុខការពារជាតិកម្ពុជារូបនេះ ហាក់បង្កប់នូវអត្ថន័យជ្រាលជ្រៅខ្លាំង ដែលមហាជនទូទៅអាចទាញន័យយល់បានថា នេះទំនងជាទាក់ទងនឹងស្ថានភាពរបស់ប្រទេសជាតិ ជាពិសេសគឺពាក់ព័ន្ធនឹងទង្វើរបស់ភាគីម្ខាងទៀត ដែលតែងប្រើល្បិចកល លាបពណ៌ បង្ខូចកេរ្តិ៍ឈ្មោះ និងបំពានកម្ពុជា ប៉ុន្តែសម្ដែងធ្វើជាជនរងគ្រោះនៅចំពោះមុខអន្តរជាតិទៅវិញ៕