(ភ្នំពេញ)៖ នាយករដ្ឋមន្រ្តីកម្ពុជា សម្ដេចធិបតីហ៊ុន ម៉ាណែត បានផ្ញើលិខិតជាផ្លូវការ ទៅគណៈកម្មការពានរង្វាន់ណូបែលសន្តិភាព ដើម្បីគាំទ្របេក្ខភាពលោក Donald Trump សម្រាប់ពានរង្វាន់ណូបែលសន្តិភាព បន្ទាប់ពីលោកប្រធានាធិបតីរូបនេះបានជួយជ្រោមជ្រែងឲ្យមានបទឈប់បា.ញ់រវាងកម្ពុជានិងថៃ ដើម្បីសុខសន្តិភាព។

នៅថ្ងៃទី7 ខែសីហា ឆ្នាំ2025 សម្ដេចធិបតី ហ៊ុន ម៉ាណែត បានបង្ហាញពីបំណងចង់ឲ្យប្រធានាធិបតីអាមេរិក លោក Donald Trump ទទួលបាននូវពានរង្វាន់ណូបែលសន្តិភាព ក្រោយលោកបានផ្ដួចផ្ដើមឲ្យមានបទឈព់បា.ញ់បន្ទាន់ និងគ្មានលក្ខខណ្ឌរវាងកម្ពុជា និង ថៃ ព្រមទាំងនៅបន្តផ្ដល់ការយកចិត្តទុកដាក់តាមដានស្ថានការណ៍នៃការអនុវត្តបទឈប់បា.ញ់រហូតមានសន្តិភាពពេញលេញរវាងប្រទេសទាំងពីរ។

សម្ដេចធិបតីបានមានប្រសាសន៍នៅលើទំព័រហ្វេសប៊ុកលោកយ៉ាងដូច្នេះថា៖ ស្របតាមសំណូមពររបស់ប្រជាពលរដ្ឋខ្មែរទាំងក្នុងនិងក្រៅប្រទេស និងដើម្បីជាការថ្លែងអំណរគុណចំពោះឯកឧត្តមប្រធានាធិបតី Donald Trump ដែលឯកឧត្តមបានយកចិត្តទុកដាក់ដោយផ្ទាល់ ក្នុងការផ្ដួចផ្ដើមនិងជំរុញឲ្យមានបទឈប់បាញ់គ្នារវាងកងទ័ពកម្ពុជានិងកងទ័ពថៃ និងបន្តតាមដានការអនុវត្តបទឈប់បាញ់រហូតដល់មានសន្តិភាពពេញលេញរវាងប្រទេសទាំងពីរ។

សម្ដេចបានឲ្យដឹងបន្ថែមថា៖ ក្នុងនាមជានាយករដ្ឋមន្ត្រីនៃព្រះរាជាណាចក្រកម្ពុជា សម្ដេចបានផ្ញើលិខិតជាផ្លូវការទៅគណៈកម្មការពានរង្វាន់ណូបែលសន្តិភាព ដើម្បីគាំទ្របេក្ខភាពឯកឧត្តមប្រធានាធិបតី Donald Trump សម្រាប់ពានរង្វាន់ណូបែលសន្តិភាព។

នេះបានបង្ហាញឲ្យឃើញយ៉ាងច្បាស់ថា ការគាំទ្របេក្ខភាពលោក Trump ក្នុងការទទួលបានពានរង្វាន់ណូបែលសន្តិភាពនេះ ពុំមែនជាការចង់បានរបស់សម្ដេចធិបតីតែម្នាក់ប៉ុណ្ណោះទេ ប៉ុន្តែក៏ជាការគាំទ្រពីសំណាក់ប្រជាជនកម្ពុជាគ្រប់រូបដែលស្រលាញ់សន្តិភាព។

គួរជម្រាបថា ពានរង្វាន់ណូបែលសន្តិភាព គឺជាពានរង្វាន់ពិសេសសម្រាប់ផ្ដល់ឱ្យបុគ្គល ឬអង្គការណាដែលមានស្នាដៃលើការគាំទ្រនិងបង្កើតឲ្យមានសន្តិភាព ស្ថិរភាព លើកកម្ពស់មនុស្សធម៌ និងការចរចាបញ្ចប់ជម្លោះនានាជារៀងរាល់ឆ្នាំ។ វាជាពានរង្វាន់មហាកិត្តិយសអន្តរជាតិមួយ ដែលមិនងាយនឹងធ្លាក់ដល់ដៃជនសាមញ្ញគ្មានការតស៊ូឡើយ។ អ្នកទទួលបានជ័យលាភីនេះ ត្រូវបានចាត់ទុកថាជាបុគ្គលឆ្នើមបំផុត ដែលមានស្នាដៃធំធេងរួមចំណែកជួយជាតិ និងនាំសន្តិភាពជូនដល់ពិភពលោកទាំងមូល៕

កុមារីម្នាក់ មានអាយុ ៦ឆ្នាំ រស់នៅក្នុងភូមិព្រៃមោក ឃុំស្រែរនោង ស្រុកត្រាំកក់ ខេត្តតាកែវ ត្រូវបានវិទ្យាស្ថានជាតិសុខភាពសាធារណៈពិនិត្យរកឃើញវិជ្ជមានវិរុសផ្តាសាយបក្សី(H5N1) កាលពីថ្ងៃទី៥ ខែសីហា ឆ្នាំ២០២៥។ ផ្អែកតាមសេចក្តីប្រកាសព័ត៌មានរបស់ក្រសួងសុខាភិបាលនាថ្ងៃទី៦ ខែសីហា ឆ្នាំ២០២៥ បច្ចុប្បន្នអ្នកជំងឺកំពុងស្ថិតក្រោមការខិតខំព្យាយាមជួយសង្គ្រោះពីសំណាក់ក្រុមគ្រូពេទ្យនៅឡើយទេ។

រោគសញ្ញាមួយចំនួនរបស់កុមារីដែលត្រូវបានរកឃើញមានវិជ្ជមានជំងឺផ្តាសាយបក្សី គឺនាងមានអាការគ្រុនក្តៅ ក្អក ហត់ និងពិបាកដកដង្ហើម។ បើតាមសេចក្តីប្រកាសព័ត៌មានដដែល អំឡុងមួយខែកន្លងមកនេះ នៅក្នុងភូមិព្រៃមោក ឃុំស្រែរនោង បានកើតបញ្ហាមាន់ឈឺ និងងាប់ ប្រមាណ ១០០០ក្បាល។

ជាមួយគ្នានេះដែរក្នុងរយៈពេលពេល ២០ថ្ងៃ ចុងក្រោយ នៅផ្ទះរបស់កុមារីរងគ្រោះក៏មានបញ្ហាមាន់ឈឺ ហើយងាប់ចំនួន ៣០ក្បាល ផងដែរ។ មួយថ្ងៃមុនក្មេងចាប់ផ្តើមឈឺ ស្ត្រីជាម្តាយបានយកមាន់ដែលឈឺទាំងនោះមកធ្វើម្ហូបសម្រាប់គ្រួសារ។ ដោះស្រាយបញ្ហានេះ បច្ចុប្បន្នក្រសួងបានសហការជាមួយអាជ្ញាធរគ្រប់លំដាប់ថ្នាក់ ស្វែងរកប្រភពចម្លងទាំងលើសត្វ និងមនុស្ស។

បន្ថែមលើនេះមន្ត្រីជំនាញក៏បានស្វែងរកករណីសង្ស័យ និងអ្នកប៉ះពាល់ ដើម្បីទប់ស្កាត់ការឆ្លងបន្តក្នុងសហគមន៍ ព្រមទាំងចែកជូនឱសថតាមីហ្គូ (Tamiflu) ដល់ពលរដ្ឋប៉ះពាល់ជិតស្និទ្ធ និងធ្វើយុទ្ធនាការអប់រំសុខភាពដល់ប្រជាពលរដ្ឋនៅក្នុងភូមិដែលកើតហេតុផងដែរ។ ក្រសួងសុខាភិបាលស្នើឲ្យប្រជាពលរដ្ឋទាំងអស់បង្កើនការប្រុងប្រយ័ត្នចំពោះជំងឺផ្តាសាយបក្សីជានិច្ច ព្រោះជំងឺនេះនៅតែបន្តគំរាមកំហែងដល់សុខភាព ពលរដ្ឋគ្រប់រូប។

ក្នុងករណីមានអាការៈក្តៅខ្លួន ក្អក ហូរសំបោរ ឬ ពិបាកដកដង្ហើម និងមានប្រវត្តិធ្លាប់បានប៉ះពាល់ជាមួយមាន់ឬទាឈឺ ឬងាប់ក្នុងអំឡុង១៤ថ្ងៃមុនថ្ងៃចាប់ផ្តើម មានរោគសញ្ញា សូមកុំទៅទីប្រជុំជនដែលមានមនុស្សច្រើន ត្រូវស្វែងរកការពិនិត្យព្យាបាល និងពិគ្រោះយោបល់នៅមណ្ឌលសុខភាព ឬមន្ទីរពេទ្យដែលនៅជិតជាបន្ទាន់ កុំពន្យារពេល ព្រោះវាអាចមានហានិភ័យខ្ពស់ឈានទៅរកការស្លាប់ជាយថាហេតុ៕

(ភ្នំពេញ)៖ ក្រោយកិច្ចប្រជុំវិសាមញ្ញនៃគណៈកម្មាធិការព្រំដែនទូទៅ (GBC) កម្ពុជា-ថៃ បានបញ្ចប់ទៅដោយជោគជ័យ ភាគីទាំងពីរបានពិភាក្សា និងឯកភាពគ្នាលើលក្ខខណ្ឌចំនួន 13ចំណុច ដែលក្នុងនោះផ្ដោតសំខាន់ជាងគេទៅលើការបញ្ឈប់សកម្មភាពប្រយុទ្ធ ការក្សាទីតាំងឈរជើងរបស់កងទ័ព ហាមប្រើប្រាស់កម្លាំងទ័ពគ្រប់ប្រភេទប្រឆាំងនឹងជនសុីវិល និងបញ្ឈប់ការផ្សព្វផ្សាយព័ត៌មានមិនពិត។ លើសពីនេះ កម្ពុជាក៏បានស្នើសុំឲ្យភាគីថៃធ្វើមាតុភូមិនិវត្តន៍ទាហានខ្មែរទាំង18នាក់មកកម្ពុជាវិញ ឲ្យបានឆាប់រហ័សបំផុត។

កិច្ចប្រជុំវិសាមញ្ញនៃគណៈកម្មាធិការព្រំដែនទូទៅ (GBC) ថ្ងៃចុងក្រោយ ដែលបានធ្វើឡើងនាថ្ងៃព្រហស្បត្តិ៍ទី7 ខែសីហា ឆ្នាំ2025 នេះ បានបិទបញ្ចប់ទៅជាមួយនឹងលទ្ធផលជាវិជ្ជមាន ដោយទាំងកម្ពុជា និង ថៃ បានឯកភាពគ្នាលើចំណុចចំនួន13 រួមមាន៖
1. បញ្ឈប់ការប្រយុទ្ធគ្នា និងជនសុិវិល តាមរយៈអាវុធគ្រប់ប្រភេទ
2. ត្រូវរក្សាទុកស្ថានភាពកម្លាំងយោធានាពេលបច្ចុប្បន្ន ដោយហាមផ្លាស់ទីបន្ថែម ចាប់ពីម៉ោង ២៤:០០ នៅថ្ងៃទី ២៨ ខែកក្កដា ឆ្នាំ ២០២៥ និងមិនអនុញ្ញាតឱ្យមានចលនានៃកងទ័ពដាច់ខាត។
3. ហាមបង្កើនកម្លាំងយោធាគ្រប់តំបន់ទាំងអស់តាមបណ្តោយព្រំដែនកម្ពុជា-ថៃ។
4. មិនអនុញ្ញាតឱ្យមានសកម្មភាពខុសប្រក្រតីដូចជា៖ ការបញ្ជូនយន្តហោះ ឬកងទ័ពតាមរយៈដែនអាកាស ឬដែនដីគោក ចូកដែនអធិបតេយ្យរបស់ភាគីមួយទៀតដាច់ខាត។
5. ហាមវា.យប្រហារពលរដ្ឋ ឬគោលដៅស៊ីវិល ក្នុងគ្រប់ករណីទាំងអស់។
6. ត្រូវអនុវត្តច្បាប់អន្តរជាតិមនុស្សធម៌ក្នុងការព្យាបាល និងសង្រ្គោះទាហាន ឬជនសុីវិលដែលរងរបួស និងត្រូវរៀបចំទទួលយកសពទាហានពលីឲ្យបានសមស្របតាមច្បាប់សិទ្ធិមនុស្ស
7. បើមានសង្គ្រាមកើតឡើង ដោយចេតនា ឬអចេតនា ភាគីទាំងពីរត្រូវពិភាក្សានៅកម្រិតក្នុងតំបន់ ដើម្បីបញ្ឈប់ស្ថានការណ៍ឲ្យបានឆាប់បំផុត កុំឱ្យរីករាលដាល។
8. ភាគីយល់ព្រម៖ មានការទំនាក់ទំនងទៀងទាត់រវាងផ្នែកយោធា, រៀបចំកិច្ចប្រជុំគណៈកម្មាធិការព្រំដែនតំបន់ (RBC) និងបង្កើតខ្សែទំនាក់ទំនងផ្ទាល់រវាងរដ្ឋមន្ត្រី និងមេដឹកនាំយោធារវាងប្រទេសទាំងពីរ
9. ហាមផ្សព្វផ្សាយព័ត៌មានមិនពិត ឬព័ត៌មានក្លែងក្លាយ ដើម្បីជៀសវាងភាពតានតឹងជាថ្មី
10. ទាំងពីរភាគីត្រូវពិចារណារក្សាកិច្ចព្រមព្រៀងថ្ងៃទី ២៨ ខែកក្កដា ២០២៥ ស្ដីពីបទឈប់បា.ញ់ និងមានក្រុមតំណាងសង្កេតការណ៍របស់អាស៊ានដឹកនាំដោយម៉ាឡេស៊ី។
11. ត្រូវអនុវត្តបទឈប់បា.ញ់ដោយមានគណៈកម្មាធិការព្រំដែនតំបន់ RBC ដោយមានសមាជិកអាស៊ានចូលរួមជាអ្នកសង្កេតការណ៍។
12. មុនពេលក្រុមសង្កេតការណ៍អាស៊ានចូលមក ក្រុមក្រុមអ្នកសង្កេតការណ៍ផ្ទៃក្នុងបណ្តោះអាសន្ន (IOT) រវាងកម្ពុជានិងថៃនឹងត្រូវបានបង្កើត ដោយអនុព័ន្ធយោធាអាស៊ាន ដែលដឹកនាំដោយអនុព័ន្ធម៉ាឡេស៊ី ហើយនឹងសង្កេតមើលបទឈប់បាញ់តែនៅក្នុងប្រទេសរបស់ពួកគេប៉ុណ្ណោះ។
13. ភាគីទាំងពីរត្រូវយល់ព្រមរៀបចំកិច្ចប្រជុំ GBC ម្ដងទៀតក្នុងរយៈពេលមួយខែបន្ទាប់ គិតពីថ្ងៃទី ៧ សីហា ២០២៥។ បើមិនដូច្នេះ ពួកគេនឹងបើកកិច្ចប្រជុំ GBC បន្ទាន់មួយផ្សេងទៀត ដូចជាកិច្ចប្រជុំនេះ ដើម្បីពិភាក្សាអំពីបទឈប់បា.ញ់ម្ដងទៀត។

ជាមួយនឹងការឯកភាពគ្នា ទាំង13ចំណុចខាងលើ សម្ដេចធិបតី ហ៊ុន ម៉ាណែត បានសម្ដែងក្ដីសាទរចំពោះការសម្រេចបាននេះ។ ទោះជាយ៉ាងណា សម្ដេចបានបញ្ជាក់ថា ភាគីកម្ពុជាក៏បានស្នើសុំឲ្យមានការដោះលែងយោធិនកម្ពុជាទាំង ១៨រូប ដែលស្ថិតនៅក្រោមការឃុំគ្រងរបស់កងទ័ពថៃឲ្យបានឆាប់រហ័សផងដែរ៕

(ភ្នំពេញ)៖ កម្ពុជា-ម៉ាឡេស៊ី បានបញ្ជាក់ពីការបេជ្ញារួមគ្នា ស្វាគមន៍កិច្ចសហប្រតិបត្តិការជាដៃគូល្អ ក្នុងការពង្រឹងពង្រីកភាពជិតស្និទ្ធរវាងវិស័យសុខាភិបាលនៃប្រទេសទាំងពីរ ដើម្បីលើកកម្ពស់សុខុមាលភាពរបស់ប្រជាជនកម្ពុជា ដោយលើកទឹកចិត្តពលរដ្ឋកម្ពុជាងាកទៅព្យាបាលនៅមន្ទីរពេទ្យនៅម៉ាឡេសុី ប្រសិនបើចង់ស្វែងរកការព្យាបាលនៅក្រៅប្រទេស។

យោងតាមក្រសួងសុខាភិបាល នាព្រឹកថ្ងៃពុធ ទី៦ ខែសីហា ឆ្នាំ២០២៥ នៅទីស្តីការក្រសួងសុខាភិបាល ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានទទួលស្វាគមន៍ ឯកអគ្គរាជទូតម៉ាឡេស៊ី ប្រចាំព្រះនៅកម្ពុជា ឯកឧត្តម ស្យាហារ៉ូឌីន អ៊ន (HE Mr. Shaharuddin Onn) និងគណៈប្រតិភូជួបសម្តែងការគួរសម និងពិភាក្សាការងារលើកិច្ចសហប្រតិបត្តិការរវាងកម្ពុជា-ម៉ាឡេស៊ី។

តាមរយៈជំនួបនេះ កម្ពុជា-ម៉ាឡេស៊ី បានបញ្ជាក់ជាថ្មីម្តងទៀតពីការបេជ្ញារួមគ្នា ស្វាគមន៍កិច្ចសហប្រតិបត្តិការជាដៃគូល្អ មិត្តល្អ ពង្រឹង និងពង្រីក ភាពជិតស្និទ្ធរវាងវិស័យសុខាភិបាលនៃប្រទេសទាំងពីរ ដើម្បីលើកកម្ពស់សុខុមាលភាពរបស់ប្រជាជនកម្ពុជា ស្របតាមយុទ្ធសាស្រ្តបញ្ចកោណដំណាក់កាលទី១ នៃរាជរដ្ឋាភិបាលអាណត្តិទី៧ ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋ មន្ត្រីនៃព្រះរាជាណាចក្រកម្ពុជា។

គួរជម្រាបថា កន្លងមក ម៉ាឡេសុីធ្លាប់បានប្រកាសថា មន្ទីរពេទ្យនៅម៉ាឡេសុីស្វាគមន៍យ៉ាងកក់ក្ដីចំពោះពលរដ្ឋកម្ពុជា ដែលមានបំណងចង់មកព្យាបាលជំងឺនៅមន្ទីរពេទ្យម៉ាឡេសុី។ តួរយ៉ាងដូចជា មន្ទីរពេទ្យ Sunway Penang បានលើកទឹកចិត្តទៅកាន់អ្នកជំងឺកម្ពុជា ដែលមានបំណងចង់ស្វែងរកសេវាព្យាបាលក្រៅប្រទេស ងាកមកព្យាបាលនៅមន្ទីរពេទ្យរបស់ខ្លួនវិញ ខណៈតម្លៃព្យាបាល និងសេវាកម្មផ្សេងៗទាបជាងនៅប្រទេសថៃប្រមាណ 30%។

បើតាមការបញញជាក់របស់លោកស្រីវេជ្ជបណ្ឌិត Christine Lee គឺខាងមន្ទីរពេទ្យនឹងទទួលស្វាគមន៍យ៉ាងកក់ក្ដៅចំពោះពលរដ្ឋកម្ពុជា ដោយផ្ដល់ការយកចិត្តទុកដាក់ដូចជា៖ យកឡានទៅទទួលដល់ព្រលានយន្តហោះ ផ្ដល់សណ្ឋាគារ ហើយស្នាក់នៅដោយឥតគិតថ្លៃ។ លើសពីនេះ ចំពោះអ្នកជំងឺដែលមិនចេះភាសាអង់គ្លេស សូមកុំបារម្ភ ព្រោះនៅទីនេះ (Sunway Penang) ខាងមន្ទីរពេទ្យក៏នឹងផ្ដល់ជូនសេវាបកប្រែភាសាខ្មែររវាងអ្នកជំងឺ និងគ្រូពេទ្យ ដោយឥតគិតថ្លៃផងដែរ»៕