(ភ្នំពេញ)៖ ឯកអគ្គរដ្ឋទូតចិនប្រចាំនៅកម្ពុជា ឯកឧត្តម វ៉ាង វិនពីន (Wang Wenbin) បានថ្លែងការកោតសរសើកម្ពុជាលើការចូលរួមក្នុងការបញ្ជូនកងទ័ពរក្សាសន្តិភាព ក្រោមឆ័ត្រអង្គការសហប្រជាជាតិ (UN) ធ្វើឲ្យកម្ពុជាទទួលបានការវា.យតម្លៃល្អនៅទូទាំងពិភពលោក និងជាប់ចំណាត់ថ្នាក់លេខ3 នៅតំបន់អាស៊ាន។

បើតាមការបង្ហោះនៅលើទំព័រហ្វេសប៊ុករបស់លោក វ៉ាន វិនពីន កាលពីយប់ថ្ងៃទី18 ខែសីហា ឆ្នាំ2025 បានថ្លែងថា៖ លោកសូមសម្ដែងគារវកិច្ចដល់កម្ពុជា ដែលបានបញ្ជូនកងទ័ពរក្សាសន្តិភាពសរុប 9,199 នាក់ ទៅកាន់ប្រទេសផ្សេងៗ ដើម្បីចូលរួមក្នុងការរក្សាសន្តិភាពជាមួយយុទ្ធនាការរបស់អង្គការសហប្រជាជាតិ (UN)។

ជាមួយគ្នានេះ លោក វិនពីន បានគូសបញ្ជាក់ឲ្យឃើញពីសមត្ថភាពកម្ពុជា និង កិត្តិយសដែលកម្ពុជាទទួលបានលើឆាកអន្តរជាតិយ៉ាងដូច្នេះថា៖ កម្ពុជាជាប់ចំណាត់ថ្នាក់ទី 27 ក្នុងចំណោមប្រទេសចំនួន 119ទូទាំងពិភពលោក ដែលបានបញ្ជូនកងទ័ពទៅបំពេញបេសកកម្មនៅក្រៅប្រទេស និងជាប់ចំណាត់ថ្នាក់លេខ 3 ក្នុងចំណោមបណ្ដារប្រទេសអាស៊ានផងដែរ។

គួរឲ្យដឹងផងដែរថា ក្រៅពីការលើកសរសើ កន្លងមកចិនក៏ធ្លាប់ផ្ដល់ជំនួយជាថវិការសម្រាប់គាំទ្រកម្ពុជាក្នុងសកម្មភាពលុបបំបាត់មីនផងដែរ។ ជាមួយគ្នានេះ លោក ហេង រតនា ប្រធានមជ្ឈមណ្ឌលសកម្មភាពកំចាត់មីនកម្ពុជាបានឲ្យដឹងថា ក្រោមការផ្តល់ជំនួយដោយចិន ដីចម្ការមីនទំហំ 150 គីឡូម៉ែត្រក្រឡាត្រូ វបានបោសសម្អាតឲ្យមានសុវត្ថិភាព ដោយគ្រាប់មីនចំនួន 82,844 គ្រាប់ត្រូវបានបំផ្លាញចន្លោះឆ្នាំ 2018 ដល់ 2024។

លើសពីនេះ បើតាមគម្រោងរបស់អង្គភាពសុីម៉ាក់បានបញ្ជាក់ថា កម្ពុជាមានគោលដៅលុបបំបាត់គ្រាប់មីន និងសំណល់ជាតិផ្ទុះចេញពីដីឱ្យបានអស់ពេញលេញនៅឆ្នាំ2030ខាងមុខ បន្ទាប់ពីជម្លោះជាច្រើនទសវត្សរ៍បានបន្សល់ទុកនូវគ្រឿងផ្ទុះរាប់លានគ្រាប់នៅទូទាំងប្រទេស។

ចំណុចដែលបានលើកឡើងទាំងអស់ខាងលើនេះ គឺជាឧទាហរណ៍ដែលមានស្រាប់ក្នុងការបញ្ជាក់បានថា កម្ពុជាគឺជាប្រទេសស្រលាញ់សន្តិភាព គាំទ្រជានិច្ចរាល់សកម្មភាពនានាក្នុងការដោះស្រាយវិបត្តិជាតិផ្ទុះដែលសល់ពីសម័យសង្រ្កា.ម និងបេជ្ញាចិត្តមុតមាំក្នុងការមិនប្រើប្រាស់គ្រាប់មីនប្រឆាំងមនុស្សថ្មីៗជាដាច់ខាត៕

ប្រទេសថៃ ៖ អនុរដ្ឋមន្ត្រីក្រសួងការពារជាតិថៃ លោក ណាត់ថាផុង ណាកផានិច និយាយថា គ្មានការរុះរើបន្លាលួសនៅព្រំដែនកម្ពុជា-ថៃទេ ប្រសិនបើប្រទេសទាំងពីរនៅតែចរចាគ្នាបន្តទៀត ។ រីឯការពន្យារពេលកិច្ចប្រជុំគណៈកម្មាធិការព្រំដែនថ្នាក់យោធភូមិភាគ (RBC) គឺគ្មានបញ្ហាអ្វីទេសម្រាប់ប្រទេសថៃ ។ នេះបើតាមការផ្សព្វផ្សាយរបស់សារព័ត៌មានថៃ នៅថ្ងៃទី១៨ ខែសីហា ឆ្នាំ២០២៥ ។

អនុរដ្ឋមន្ត្រីក្រសួងការពារជាតិថៃ លោក ណាត់ថាផុង ណាកផានិច បាននិយាយមុនកិច្ចប្រជុំក្រុមប្រឹក្សាសន្តិសុខជាតិពាក់ព័ន្ធនឹងបណ្តាញសង្គមផ្សព្វផ្សាយព័ត៌មានថា ប្រទេសថៃនឹងរុះរើបន្លាលួសដែលកងទ័ពថៃពង្រាយនៅតាមព្រំដែនកម្ពុជា-ថៃ ដើម្បីសន្តិភាព កាត់បន្ថយភាពតានតឹងថា សូមពលរដ្ឋរង់ចាំស្តាប់ព័ត៌មានពិតប្រាកដពីលោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទី ។

ចំណែកកិច្ចប្រជុំគណៈកម្មាធិការព្រំដែនថ្នាក់យោធភូមិភាគ (RBC) នៅបញ្ជាការដ្ឋានការពារព្រំដែនខេត្តចាន់បុរី និងត្រាត ដែលកម្ពុជាពុំឯកភាពតាមសំណើររបស់ថៃនោះ លោក ណាត់ថាផុង និយាយថា គ្រប់យ៉ាងនឹងដំណើរការតាមលទ្ធផលនៃគណៈកម្មការព្រំដែនទូទៅ ។ រីឯការពន្យារពេលកិច្ចប្រជុំ RBC ទៅធ្វើនៅថ្ងៃទី២៧ ខែសីហានេះ គឺប្រទេសថៃគ្មានបញ្ហាអ្វីទេ ។

ដោយឡែក កិច្ចប្រជុំក្រុមប្រឹក្សាសន្តិសុខជាតិនៅថ្ងៃទី១៨ ខែសីហានេះ ដែលលោកបានចូលរួមប្រជុំ គឺពុំបានពិភាក្សាពីការរុះរើបន្លាលួសដែលកងទ័ពថៃពង្រាយនៅលើទឹកដីកម្ពុជាឡើយ ។

ថៃមិនត្រឹមតែមិនព្រមរុះរើបន្លាលួសដែលកងទ័ពរបស់ខ្លួនដាក់ពង្រាយបិទផ្លូវ បិទផ្ទះពលរដ្ឋកម្ពុជាប៉ុណ្ណោះទេ ប៉ុន្តែថៃថែមទាំងអះអាងថា «ច្រកណងចាន់» ដែលជាទឹកដីកម្ពុជា រួមទាំងមានផ្ទះពលរដ្ឋកម្ពុជាផងនោះ ថាជាជំរំស្នាក់អាស្រ័យដែលថៃធ្លាប់ផ្ដល់ឱ្យជនភៀសខ្លួនកាលពីរបបខ្មែរក្រហម ដែលស្ថិតក្នុងដែនអធិបតេយ្យថៃ ពុំមែនជាទឹកដីរបស់កម្ពុជា ។

ពេលកងទ័ពថៃពង្រាយបន្លាលួសបិទផ្លូវ បិទផ្ទះពលរដ្ឋកម្ពុជាបែបនេះ បែរជាពលរដ្ឋពលរដ្ឋថៃអរគុណកងទ័ពរបស់ខ្លួនទៅវិញ និងប្រាប់ឱ្យកងទ័ពបណ្តេញពលរដ្ឋកម្ពុជាចេញពីផ្ទះ ។ ពលរដ្ឋថៃស្រែកថា នេះជាទឹកដីថៃដែលពលរដ្ឋកម្ពុជាបានយកមកគ្រប់គ្រងអស់រយៈពេលជាង៤០ឆ្នាំមកនេះ ៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ The Better News កាលពីថ្ងៃទី១៦ ខែសីហា ឆ្នាំ២០២៥ ឱ្យដឹងថា ប្រធានទីប្រឹក្សាគោលនយោបាយរបស់នាយករដ្ឋមន្ត្រីថៃ លោក ផាន់សាក់ វិញ្ញារ៉ាត់ បានស្នើរដ្ឋាភិបាលរបស់ខ្លួនបញ្ចប់ជម្លោះព្រំដែនជាមួយកម្ពុជា និងងាកមកប្រកួតប្រជែងផ្នែកសេដ្ឋកិច្ច ដោយលោកស្នើឱ្យប្រកាន់យកសន្តិភាព ពីព្រោះសន្តិភាពជាដំណោះស្រាយដ៏មានប្រសិទ្ធភាពបំផុតដើម្បីរក្សាជីវិតពលរដ្ឋ និងកងទ័ព សន្សំសំចៃការចំណាយថវិកាលើការទិញអាវុ.ធ និងកាត់បន្ថយការខាតបង់ ។

ប្រធានទីប្រឹក្សាគោលនយោបាយនាយករដ្ឋមន្ត្រីថៃ លោក ផាន់សាក់ វិញ្ញារ៉ាត់ បានស្នើទៅរដ្ឋាភិបាលរបស់ខ្លួនបែបនេះ ក្រោយពីលោកបានជជែកជាមួយក្រុមពិភាក្សា ស្តីពី «អនាគតទំនាក់ទំនងរវាងកម្ពុជា-ថៃ» ស្របពេលមានស្ថានការណ៍តានតឹងនៅតាមព្រំដែនរវាងប្រទេសទាំងពីរ ។ លោកថា ៖ «សន្តិភាព គឺជាដំណោះស្រាយដ៏ល្អបំផុតដើម្បីរក្សាជីវិតពលរដ្ឋ និងកងទ័ព ព្រមទាំងកាត់បន្ថយការចំណាយថវិកាជាតិ» ។

លោកនិយាយថា សន្តិភាពជាវិធីស្ងប់ស្ងាត់បំផុត, អាចកាត់បន្ថយការខូចខាតតាំងពីដើមទី និងពុំចាំបាច់ចំណាយប្រាក់យ៉ាងច្រើនទិញអាវុធសម្លាប់មនុស្ស និងបំផ្លាញទ្រព្យសម្បត្តិទៅវិញទៅមក ។ បើកម្ពុជា និងថៃងាកមករកសន្តិភាព វាជាដំណោះស្រាយបញ្ហាសំខាន់ផ្នែកសន្តិសុខ និងជម្លោះព្រំដែន ពីព្រោះសន្តិភាពជាជោគជ័យ និងផលប្រយោជន៍របស់ប្រទេសទាំងពីរ ។ លោកបានលើកឡើងពីជម្លោះព្រំដែននៅអឺរ៉ុបខាងលិច ក៏បានជ្រើសរើសវិធីរួមរស់ជាមួយគ្នា ខណៈប្រទេសខ្លះនៅអឺរ៉ុបពុំទាន់មានភាពច្បាស់លាស់រឿងបន្ទាត់ព្រំដែន ។

ហេតុនេះ សន្តិភាពរវាងកម្ពុជា-ថៃ គឺពុំត្រឹមតែជួយសន្សំសំចៃថវិកាជាតិប៉ុណ្ណោះទេ ប៉ុន្តែសន្តិភាពនឹងជួយរក្សាជីវិតពលរដ្ឋ និងកងទ័ព ដែលជាធនធានមនុស្សរបស់ប្រទេសនីមួយៗ ។ ក្រៅពីនេះ លោកបានស្នើឱ្យមានការប្រកួតប្រជែងសេដ្ឋកិច្ចរវាងប្រទេសជិតខាង ដោយផ្លាស់ប្តូរពីការប្រើប្រាស់អាវុធទៅជាការអភិវឌ្ឍតំបន់រួមគ្នា, លើកកម្ពស់ពាណិជ្ជកម្ម, អភិវឌ្ឍន៍សេដ្ឋកិច្ច និងកែលម្អគុណភាពជីវិតពលរដ្ឋ ។

រដ្ឋាភិបាលថៃគួរតែគាំទ្រកងទ័ពឱ្យសម្រេចការងារមានប្រសិទ្ធភាព និងធ្វើឱ្យប្រទេសជិតខាងមើលឃើញថា ការបង្កើតសន្តិភាពរួមគ្នាជាមួយថៃ ក៏មានសារៈប្រយោជន៍ខ្លាំងបំផុតសម្រាប់ប្រទេសខ្លួន ។ ទាំងនេះឆ្លុះបញ្ចាំងពីគោលជំហររបស់ថៃទៅលើសន្តិភាពយូរអង្វែងពុំមែនកើតឡើងដោយសារសង្គ្រាមធ្វើឱ្យភាគីម្ខាងទៀតចុះចាញ់នោះទេ ប៉ុន្តែសន្តិភាពកើតឡើងដោយសារគ្មានភាគីណាមួយកាន់អាវុធប្រយុទ្ធគ្នា សន្តិភាពបានពីភាគីទាំងពីរត្រឡប់មករួមរស់ជាមួយគ្នាវិញ ដោយពុំចាំបាច់មានអ្នកលះបង់ជីវិត ដែលនេះជាការអភិវឌ្ឍសេដ្ឋកិច្ច និងសង្គមរួមគ្នា ។

ចំណែកពលរដ្ឋកម្ពុជាចង់បានសន្តិភាព ពុំត្រូវការសង្គ្រាមទេ និងស្នើឱ្យពិភពលោកមើលឃើញពីទង្វើឈ្លានពានរបស់ថៃ ។ កម្ពុជាអំពាវនាវឱ្យភាគីថៃគោរពនូវលក្ខខណ្ឌកិច្ចព្រមព្រៀងបទឈប់បាញ់ ព្រមទាំងស្មារតី និងការឯកភាពគ្នាក្នុងកិច្ចប្រជុំវិសាមញ្ញគណៈកម្មាធិការព្រំដែនទូទៅ (GBC) ដែលថា ភាគីទាំងពីរបានព្រមព្រៀងរក្សាកម្លាំងយោធារបស់ខ្លួននៅក្នុងទីតាំងបច្ចុប្បន្ន ដោយមិនអនុញ្ញាតឱ្យផ្លាស់ទីហួសពីទីតាំងដែលខ្លួនបានឈរជើងក្នុងពេលកិច្ចព្រមព្រៀងបទឈប់បាញ់បានចូលជាធរមាន នាម៉ោង១២អធ្រាត្រ កាលពីថ្ងៃទី២៨ ខែកក្កដា ឆ្នាំ២០២៥ ឡើយ ។ ភាគីទាំងពីរមិនត្រូវចល័តកងទ័ពរបស់ខ្លួន រាប់បញ្ចូលទាំងការដើរល្បាតទៅលើទីតាំងរបស់ភាគីម្ខាងទៀតឡើយ ។

យោងតាមក្រសួងការពារជាតិកម្ពុជា គិតត្រឹមថ្ងៃទី១៨ ខែសីហា ឆ្នាំ២០២៥ គឺរយៈពេល២០ថ្ងៃហើយដែលកងកម្លាំងកម្ពុជាត្រូវបានទាហានថៃចាប់ខ្លួនដោយខុសច្បាប់ មិនទាន់ដោះលែង ។ ទាហានថៃបានចាប់ខ្លួនកងកម្លាំងកម្ពុជាដោយខុសច្បាប់ ក្រោយបទឈប់បាញ់ចូលជាធរមានភ្លាមៗកាលពីព្រឹកថ្ងៃទី២៩ ខែកក្កដា ឆ្នាំ២០២៥ ៕

ប្រទេសថៃ ៖ ក្រោយពីចោទប្រកាន់លោក Michel Alfaro ជាបុគ្គលដែលកម្ពុជាជួលឱ្យផ្សាយព័ត៌មានមិនពិតពីថៃ អ្នកនាំពាក្យរដ្ឋាភិបាលថៃ លោក ជិរ៉ាយុ ហួងសាប់ បានប្រកាសហៅលោក Alfaro ឱ្យមកផ្សាយពីថៃម្តង ។ ប៉ុន្តែការប្រកាសនេះមិនបាន១ថ្ងៃផង បន្ទាប់ពីលោក Alfaro យល់ព្រមទៅថៃតាមសំណើ បែរជាអ្នកនាំពាក្យរដ្ឋាភិបាលថៃរូបនេះមិនឱ្យលោក Alfaro ទៅជាន់ដីថៃទៅវិញ ហើយថា នឹងហៅសារព័ត៌មានលំដាប់ពិភពលោកផ្សេងៗទៅមើលកន្លែងខូចខាតនៅខេត្តសុរិន្ទ ។

កាលពីថ្ងៃទី១៧ ខែសីហា ឆ្នាំ២០២៥ សារព័ត៌មានថៃ Khaosod រាយការណ៍ថា អ្នកនាំពាក្យរដ្ឋាភិបាលថៃ លោក ជិរ៉ាយុ ហួងសាប់ នឹងពុំហៅលោក Michel Alfaro មកផ្សាយពីថៃ និងពុំចាំបាច់មកជាន់ទឹកដីថៃទេ ព្រមទាំងចោទប្រកាន់លោក Michel Alfaro ជាបុគ្គលដែលកម្ពុជាជួលឱ្យផ្សាយព័ត៌មានមិនពិតពីថៃ ។ រដ្ឋាភិបាលថៃនឹងហៅសារព័ត៌មានលំដាប់ពិភពលោកផ្សេងៗទៅមើលកន្លែងខូចខាតនៅខេត្តសុរិន្ទ ។

អ្នកនាំពាក្យរដ្ឋាភិបាលថៃ និងជាគណៈកម្មការមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ លោក ជិរ៉ាយុ ហួងសាប់ បាននិយាយនៅថ្ងៃទី១៧ ខែសីហា ថា រដ្ឋាភិបាលថៃនឹងហៅសារព័ត៌មានលំដាប់ពិភពលោកផ្សេងៗទៅមើលកន្លែងរបស់កងកម្លាំងស៊ុណារី ខេត្តសុរិន្ទ នៅសប្តាហ៍ទី៣ ខែសីហា ហើយកងទ័ពថៃនឹងនាំសារព័ត៌មានពិភពលោកទៅមើលកន្លែងខូចខាតដោយសារអាវុធកម្ពុជា ដូចជា ៖ មន្ទីរពេទ្យ សាលារៀន និងតំបន់ស៊ីវិល ។ រួចហើយ កងទ័ពថៃនឹងនាំសារព័ត៌មានពិភពលោកទៅមើលកន្លែងផ្ទុះមីន និងការបោសសម្អាតមីនដោយក្រុម TMAC ដែលថៃចោទប្រកាន់ថា កងទ័ពកម្ពុជាបង្កប់មីនថ្មីលើទឹកដីខ្លួន ។

លោក ជីរ៉ាយុ និយាយបំភ្លៃការពិតថា កម្ពុជាបានរៀបចំឆាកល្ខោនឱ្យលោក Michel Alfaro ជនជាតិអាមេរិក ដែលហៅខ្លួនឯងជាអ្នកសារព័ត៌មានរបស់សេតវិមានសហរដ្ឋអាមេរិក មកពីផ្សាយព័ត៌មានផ្ទាល់ពីតំបន់រងគ្រោះនៅកម្ពុជា និងចោទប្រកាន់ថៃប្រើប្រាស់អំពើហិង្សា ។ ថ្មីៗនេះ លោកបានអញ្ជើញលោក Michel Alfaro អ្នកសារព័ត៌មានអាមេរិកមកផ្សាយពីថៃម្តងដើម្បីឱ្យឃើញកន្លែងរងគ្រោះ ។

លោក ជីរ៉ាយុ ចោទប្រកាន់ថា លោក Alfaro ផ្សាយព័ត៌មានផ្ទាល់ពីតំបន់រងគ្រោះនៅកម្ពុជា គឺជាការកុហកលាពណ៌ថៃទៅកាន់ពិភពលោក និងរាយការណ៍ទៅប្រធានាធិបតីអាមេរិក លោក Donald Trump ។ ហេតុនេះ ទើបលោក ជីរ៉ាយុ ចង់ហៅអ្នកសារព័ត៌មានអាមេរិករូបនេះមកផ្សាយពីថៃ និងនាំលោកទៅមើលសាលារៀន មន្ទីរពេទ្យដែលថៃចោទកងទ័ពកម្ពុជាធ្វើឱ្យខូចខាត ។

អ្នកនាំពាក្យរដ្ឋាភិបាលថៃចោទប្រកាន់ទៀតថា លោក Alfaro គ្រាន់តែជាអ្នកសារព័ត៌មានអាមេរិកដែលកម្ពុជាជួលមកផ្សាយប៉ុណ្ណោះ ហើយលោកថា លោក Alfaro ពុំមែនជាអ្នកសារព័ត៌មានរបស់សេតវិមានសហរដ្ឋអាមេរិកទេ ទើបថៃពុំហៅលោក Alfaro មកជាន់ទឹកដីថៃ ។

គួរបញ្ជាក់ថា លោក Michel Alfaro ជាអ្នកសារព័ត៌មានរបស់សេតវិមានសហរដ្ឋអាមេរិក បានអញ្ជើញទៅដល់ទីតាំងជាក់ស្តែងនៅព្រំដែនកម្ពុជា-ថៃ ខេត្តបន្ទាយមានជ័យ ដើម្បីឈ្វេងយល់ពីការពិតជាក់ស្តែងផ្សព្វផ្សាយទៅកាន់ពិភពលោក ។ លោកបានផ្សាយបន្តផ្ទាល់ពីតំបន់រងគ្រោះនៅកម្ពុជាទាំងភ្លៀងថា ពលរដ្ឋកម្ពុជាត្រូវការសន្តិភាព ក្មេងត្រូវការជម្រក និងការសិក្សា ហើយលោកនឹងបង្ហាញរូបភាព រួមទាំងវីដេអូការពិតពីអ្វីដែលកើតមានប្រាប់ទៅប្រធានាធិបតីអាមេរិក ។

លោក Alfaro និយាយថា ថៃជ្រើសរើសសង្គ្រាម ហើយលោកចង់បញ្ជាក់ទៅមិត្តភក្តិទាំងអស់មកឈ្វេងយល់ការពិត និងត្រូវធ្វើអ្វីម្យ៉ាង ជាពិសេស ប្រឆាំងនឹងអំពើអាក្រក់របស់ថៃ ។ លំនៅឋានរបស់ពលរដ្ឋកម្ពុជាត្រូវបានថៃរំលោភយក ហើយលោកនឹងស្នើឱ្យលោក Elon Musk បើកប្រព័ន្ធ Settle lite ដើម្បីមើលការពិត ពីព្រោះថៃជាអ្នកបង្កើតបញ្ហាទាំងអស់ និងបំពានកម្ពុជា ៕