ប្រទេសថៃ ៖ លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីថៃបាននិយាយពីគំនិតរបស់លោក ប៊ុនស៊ីន ផាកក្លាង មេបញ្ជាការយោធភូមិភាគ២ ដែលថាថៃនឹងបិទព្រំដែនជាមួយកម្ពុជាបន្តទៀតរហូតដល់លោកចូលនិវត្តន៍នៅថ្ងៃទី៣០ ខែកញ្ញា ព្រមទាំងពលរដ្ឋថៃសំណូមពរឱ្យសាងសង់របងនៅតាមបណ្តោយព្រំដែនកម្ពុជា-ថៃ គឺលោក ប៊ុនថាំ ប្រាប់ថា នឹងរង់ចាំលទ្ធផលកិច្ចប្រជុំគណៈកម្មាធិការព្រំដែនថ្នាក់យោធភូមិភាគ (RBC) និងកិច្ចប្រជុំគណៈកម្មាធិការកិច្ចការព្រំដែនទូទៅ (GBC) សិន ។

នៅថ្ងៃទី១៥ ខែសីហា ឆ្នាំ២០២៥ នៅវិមានរដ្ឋាភិបាល លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីបាននិយាយពីគោលជំហររបស់រដ្ឋាភិបាលថៃរឿងការបើកព្រំដែនកម្ពុជា-ថៃថា នឹងរង់ចាំលទ្ធផលកិច្ចប្រជុំគណៈកម្មាធិការព្រំដែនថ្នាក់យោធភូមិភាគ (RBC) និងកិច្ចប្រជុំគណៈកម្មាធិការកិច្ចការព្រំដែនទូទៅ (GBC) សិន ទើបរដ្ឋាភិបាលថៃពិចារណាពីរឿងនេះ ។ នាយករដ្ឋមន្ត្រីស្តីទីនិយាយបែបនេះ ក្រោយពីលោក ប៊ុនស៊ីន ផាកក្លាង មេបញ្ជាការយោធភូមិភាគ២ និយាយថា ថៃនឹងបិទព្រំដែនជាមួយកម្ពុជាបន្តទៀតរហូតដល់លោកចូលនិវត្តន៍ ។

ចំណែកការសំណូមពររបស់ពលរដ្ឋថៃដែលចង់ឱ្យសាងសង់របងនៅតាមបណ្តោយព្រំដែនកម្ពុជា-ថៃនោះ លោក ភូមិថាំ ប្រាប់ថា ៖ «ថៃក៏ត្រូវរង់ចាំលទ្ធផលការចរចាក្នុងកិច្ចប្រជុំ RBC និង GBC ដូចគ្នា ពីព្រោះត្រូវតែអនុវត្តតាមដំណើរការជាជំហ៊ាន ។ ហេតុនេះ របងព្រំដែននឹងសាងសង់ឬក៏អត់ នឹងនិយាយគ្នាម្តងទៀត» ។

ដោយឡែក ក្រសួងការបរទេសថៃបាននាំមន្ត្រីទូតអន្តរជាតិទៅពិនិត្យមើលកន្លែងដែលកងទ័ពថៃជាន់មីនដើម្បីឱ្យអន្តរជាតិឈប់គាំទ្រកម្ពុជា ក្រោយពីថៃចោទកងទ័ពកម្ពុជាបង្កប់មីននោះ លោក ភូមិថាំ និយាយថា ក្រសួងការបរទេសថៃអាចនាំមន្ត្រីទូតទៅពិនិត្យទីកន្លែងដោយផ្ទាល់បាន កន្លងមក ថៃក៏បានតវ៉ារួចហើយ គឺកម្ពុជាល្មើសអនុសញ្ញាអូតាវ៉ា ។ ចាប់ពីពេលនេះ នឹងគ្មានបញ្ហារឿងមីនទៀតទេ បើមានរឿងអ្វីកើតឡើង យើងនឹងចរចាក្នុងកិច្ចប្រជុំ RBC និង GBC ។

តាមការផ្សព្វផ្សាយរបស់សារព័ត៌មានថៃ Amarin News កាលពីថ្ងៃទី១៤ ខែសីហា គឺមេបញ្ជាការយោធភូមិភាគ២ លោក ប៊ុនស៊ីន ផាកក្លាង បាននិយាយពីរឿងការបើកច្រកព្រំដែនកម្ពុជា-ថៃថា ថៃពុំទាន់ត្រៀមខ្លួនបើកព្រំដែនឡើងវិញទេ ព្រំដែននឹងបិទបន្តទៀតរហូតដល់លោកចូលនិវត្តន៍ នៅថ្ងៃទី៣០ ខែកញ្ញា ។ បច្ចុប្បន្ន លោកបានកែសម្រួលការល្បាតនៅព្រំដែនកុំឱ្យកងទ័ពថៃជាន់មីនបន្តទៀត ។

រីឯការសាងសង់របងនៅតាមព្រំដែនកម្ពុជា-ថៃ គឺពលរដ្ឋថៃបានជំរុញឱ្យមានការសាងសង់របងយូរហើយ ពលរដ្ឋថៃចោទប្រកាន់ថា ដោយសារកងទ័ពកម្ពុជាល្មើសចូលទឹកដីថៃ ។ ហេតុនេះ របងព្រំដែននឹងអាចបញ្ចប់ការប៉ះទង្គិចផ្សេងៗរវាងកងទ័ពកម្ពុជា-ថៃ ក៏ដូចជាផ្តល់ភាពងាយស្រួលឱ្យកងទ័ពថៃត្រួតពិនិត្យសន្តិសុខព្រំដែន ។ ពលរដ្ឋថៃគាំទ្រការសាងសង់របងព្រំដែន និងចូលរួមផ្តល់ថវិកាសាងសង់របងប្រសិនបើរដ្ឋាភិបាលឯកភាព ៕

ប្រទេសហ្វាំងឡង់ ៖ បើទោះជាហ្វាំងឡង់ជាប្រទេសដែលពលរដ្ឋមានសេចក្តីសុខបំផុតនៅលើពិភពលោក និងជាប្រទេសប្រជាធិបតេយ្យបានអភិវឌ្ឍន៍សេដ្ឋកិច្ចរីកចម្រើនក្តី ប៉ុន្តែដោយសារមានជម្លោះព្រំដែនជាមួយរុស្ស៊ីជាប្រទេសជិតខាង ហ្វាំងឡង់បានសាងសង់របងព្រំដែនភ្លាមៗដោយគ្មានភាពស្ទាក់ស្ទើរ និងពុំចាប់អារម្មណ៍ការរិះគន់ពីអន្តរជាតិ ។

កាលពីឆ្នាំ២០២២ ប្រទេសហ្វាំងឡង់មានជម្លោះជាមួយរុស្ស៊ីជាប្រទេសជិតខាង ហើយនៅឆ្នាំដដែលនេះ រដ្ឋសភាហ្វាំងឡង់ក៏បានអនុម័តច្បាប់សាងសង់របងព្រំដែនជាបន្ទាន់ ។ ក្រោយមក នៅឆ្នាំ២០២៣ ហ្វាំងឡង់បានដំណើរការសាងសង់របងព្រំដែនជំហ៊ានដំបូងស្មើប្រវែង២០០គីឡូម៉ែត្រ ខណៈហ្វាំងឡង់មានព្រំដែនជាប់រុស្ស៊ីសរុបប្រវែង១,៣៤៤គីឡូម៉ែត្រ ក្រោមហេតុផលដើម្បីទប់ស្កាត់ជនអន្តោប្រវេសន៍ពីរុស្ស៊ីក្រោយសង្គ្រាម ។

ហ្វាំងឡង់ជឿជាក់ថា ការសាងសង់របងព្រំដែននេះកើតឡើងដោយសារការជំរុញពីរដ្ឋាភិបាលរុស្ស៊ី ។ តាមទិន្នន័យបញ្ជាក់ថា របងព្រំដែនរវាងហ្វាំងឡង់ និងរុស្ស៊ី មានកម្ពស់ប្រមាណ៤ម៉ែត្រ បំពាក់ដោយបន្លាលួសនៅផ្នែកខាងលើរបង ព្រមទាំងបំពាក់ភ្លើង និងឧបករណ៍បំពងសំឡេង ។ ក្រៅពីនេះ ក៏មានបំពាក់កាមេរ៉ាសុវត្ថិភាពប្រើប្រាស់បច្ចេកវិទ្យា AI បែងចែករវាងមនុស្ស និងសត្វ ដើម្បីការពារកុំឱ្យកាមេរ៉ាផ្តល់សញ្ញាពុំត្រឹមត្រូវ ។

ការចំណាយប្រាក់សម្រាប់សាងសង់របងព្រំដែនរបស់ហ្វាំងឡង់ គឺស្មើប្រមាណ៤២២លានដុល្លារ ។ រហូតមកដល់ឆ្នាំ២០២៥នេះ ហ្វាំងឡង់បានសាងសង់របងព្រំដែនបានចំនួន៥៣គីឡូម៉ែត្រ និងរំពឹងថា នឹងសាងសង់របងរួចរាល់នៅឆ្នាំ២០២៦ ។

ទោះជាហ្វាំងឡង់បានបញ្ជាក់ពីមូលហេតុច្បាស់លាស់នៃការសាងសង់របងព្រំដែនក្តី ប៉ុន្តែហ្វាំងឡង់នៅតែចៀសមិនផុតពីការរិះគន់ថា គម្រោងសាងសង់របងព្រំដែនផ្ទុយនឹងអនុសញ្ញាអន្តរជាតិមួយចំនួន ព្រមទាំងធ្វើឱ្យពលរដ្ឋហ្វាំងឡង់មួយចំនួនបារម្ភដោយសារមានក្រុមគ្រួសារនៅរុស្ស៊ី ។

គួរបញ្ជាក់ថា របងព្រំដែនហ្វាំងឡង់-រុស្ស៊ី ដែលមានប្រវែង២០០គីឡូម៉ែត្រនេះ គឺជិតស្មើប្រវែងរបស់ជួរភ្នំដងរ៉ែក ចំនួន៣០០គីឡូម៉ែត្រ ដែលជាព្រំដែនធម្មជាតិរវាងប្រទេសកម្ពុជា និងថៃ ៕

ប្រទេសថៃ ៖ លោក ឆ័យឆាណុក ឈិតឆប សមាជិកសភាខេត្តបុរីរាំ និងជាអគ្គលេខាធិការគណបក្សភូមិចៃថៃ បានស្នើរដ្ឋាភិបាលរបស់ខ្លួនលុបចោលកិច្ចព្រមព្រៀងឆ្នាំ២០០០ និងឆ្នាំ២០០១ ដោយសារលោកយល់ថា កិច្ចព្រមព្រៀងនេះគ្មានផលប្រយោជន៍សម្រាប់ថៃ និងបារម្ភពីទំនាស់ផលប្រយោជន៍ ។ អ្នកនយោបាយរូបនេះសំណូមពរឱ្យរដ្ឋាភិបាលស្តាប់សំឡេងពលរដ្ឋ ព្រមទាំងជំរុញធ្វើប្រជាមតិដើម្បីតម្លាភាព និងមានការទទួលយកពីពលរដ្ឋនៅទូទាំងប្រទេស ។

សារព័ត៌មានថៃ Daily News រាយការណ៍ថា នៅថ្ងៃទី១៥ ខែសីហា ឆ្នាំ២០២៥ លោក ឆ័យឆាណុក ឈិតឆប សមាជិកសភាខេត្តបុរីរាំ និងជាអគ្គលេខាធិការគណបក្សភូមិចៃថៃ បានស្នើរដ្ឋាភិបាលលុបចោលកិច្ចព្រមព្រៀងឆ្នាំ២០០០ និងឆ្នាំ២០០១ ជាមួយកម្ពុជា ដោយប្រាប់មូលហេតុថា ស្ថានការណ៍បច្ចុប្បន្ន គ្មានផលប្រយោជន៍សម្រាប់ថៃ និងមានទំនាស់ផលប្រយោជន៍ ។

ការរក្សាទុកកិច្ចព្រមព្រៀងនេះអាចធ្វើឱ្យមានបញ្ហាជម្លោះទឹកដីនាថ្ងៃអនាគត ហើយគណបក្សភូមិចៃថៃបានតាមដានកិច្ចព្រមព្រៀងនេះយ៉ាងដិតដល់ ។ លោក ឆ័យឆាណុក យល់ថា កិច្ចព្រមព្រៀងទាំង២ច្បាប់នឹងប៉ះពាល់ព្រំដែន ដោយលោកចោទប្រកាន់ថា ថៃកំពុងរងការល្មើសព្រំដែន ខណៈមតិខ្លះចង់រក្សាទុកកិច្ចព្រមព្រៀងព្រោះយល់ថា ចាំបាច់សម្រាប់ការចរចារវាងជាមួយកម្ពុជា ។ ប៉ុន្តែសម្រាប់លោកវិញ បើគ្មានកិច្ចព្រមព្រៀងនេះ កម្ពុជា-ថៃនៅតែអាចចរចាទ្វេភាគីបាន ។

លោកបន្តថា កិច្ចព្រមព្រៀងឆ្នាំ២០០០ គឺជាអនុស្សរណៈនៃការយោគយល់គ្នាស្តីពីការបង្កើតបង្គោលព្រំដែនគោកដែលជាតំបន់ជម្លោះរវាងកម្ពុជា-ថៃ ។ រីឯកិច្ចព្រមព្រៀងឆ្នាំ២០០១ គឺពាក់ព័ន្ធនឹងការបែងចែកដែនសមុទ្រដែលសម្បូរធនធាន ជាពិសេស ឧស្ម័នធម្មជាតិ ដូច្នេះ នេះជាពេលវេលាសមស្របបំផុតដែលរដ្ឋាភិបាលថៃគួរលុបចោលកិច្ចព្រមព្រៀងទាំង២ច្បាប់ ។ លោកចោទប្រកាន់ថា កម្ពុជាពុំគោរពច្បាប់ និងបំពានកិច្ចព្រមព្រៀងជាច្រើនលើក ហើយមានតែថៃទេដែលគោរព ។

បច្ចុប្បន្ន មានបញ្ហាពុំទុកចិត្តរដ្ឋាភិបាលថៃ និងបញ្ហាកិច្ចព្រមព្រៀងទាំង២ច្បាប់ ដែលពុំផ្តល់ផលប្រយោជន៍ដល់ប្រទេសថៃ ។ ហេតុនេះ លោកចង់ឱ្យបង្កើតគណៈកម្មការពិចារណាការពិត និងរកដំណោះស្រាយសមស្រប ។ បើចាំបាច់ ថៃគួរធ្វើកិច្ចព្រមព្រៀងថ្មីច្បាស់លាស់ជាងមុន ហើយរដ្ឋាភិបាលគួរស្តាប់សំឡេងពលរដ្ឋ ខណៈលោកស្នើឱ្យធ្វើប្រជាមតិរឿងនេះដើម្បីតម្លាភាព និងមានការទទួលយកពីពលរដ្ឋនៅទូទាំងប្រទេស ។ នេះបើតាមការលើកឡើងរបស់អ្នកនយោបាយថៃ ។

គួរបញ្ជាក់ថា កាលពីថ្ងៃទី៧ ខែសីហា អ្នកនាំពាក្យគណបក្សផ្លាំងប្រាឆារ៉ាត់ ក៏បានស្នើឱ្យរដ្ឋាភិបាលថៃលុបចោលកិច្ចព្រមព្រៀងឆ្នាំ២០០០ និងឆ្នាំ២០០១ ដែរ ដោយសារបារម្ភខ្លាចថៃបាត់បង់ទឹកដី និងដែនទឹកនៅកោះគុត ពីព្រោះមានអតីតអ្នកនយោបាយថៃចុះហត្ថលេខាទទួលស្គាល់ផែនទីដែលខុសគ្នាពីផែនទីថៃ ។

អ្នកនាំពាក្យគណបក្សផ្លាំងប្រាឆារ៉ាត់ លោក ពិយៈ តាវិឆៃ បាននិយាយពីគោលជំហររបស់គណបក្សចំពោះស្ថានការណ៍ព្រំដែនកម្ពុជា-ថៃថា ស្ថានការណ៍ពេលនេះ ប្រទេសថៃចាំបាច់ត្រូវសាមគ្គីគ្នា និងរក្សាទឹកដី ។ គណបក្សផ្លាំងប្រាឆារ៉ាត់គាំទ្រការលុបចោលកិច្ចព្រមព្រៀងឆ្នាំ២០០០ និងឆ្នាំ២០០១ ពីព្រោះកិច្ចព្រមព្រៀងនេះធ្វើឱ្យថៃបាត់បង់ទឹកដីបន្ថែម ។

លោកថា មានអតីតអ្នកនយោបាយថៃបានចុះហត្ថលេខាលើឯកសារទទួលស្គាល់ផែនទី ដែលខុសគ្នាពីផែនទីរបស់ថៃប្រើប្រាស់បច្ចុប្បន្ន ។ បើថៃនៅតែទទួលស្គាល់កិច្ចព្រមព្រៀងទាំង២ច្បាប់ ថៃនឹងបាត់បង់ទឹកដី លើកទី១៦ ។ ក្រៅពីនេះ កិច្ចព្រមព្រៀងឆ្នាំ២០០១ នឹងធ្វើឱ្យថៃប្រឈមការបាត់បង់ដែនទឹកនៅកោះគុត និងបាត់បង់ដែនទឹកមួយផ្នែកក្នុងឈូងសមុទ្រថៃ ៕

ប្រទេសថៃ ៖ នៅថ្ងៃទី១៥ ខែសីហា ឆ្នាំ២០២៥ សារព័ត៌មានថៃរាយការណ៍ថា លោក ទុល ប្រាសឺតស៊ីន ប្រធានអង្គការប្រឆាំងអំពើពុករលួយខេត្តខនគែន ព្រមទាំងមន្ត្រីពាក់ព័ន្ធជាច្រើននាក់បានរួមគ្នាដាក់ពាក្យប្តឹងនាយករដ្ឋមន្ត្រីស្តីទីថៃ លោក ភូមិថាំ វីឆាយ៉ាឆៃ នៅស្ថានីយប៉ូលិសខនគែន ពីបទបង្កការខូចខាតដល់ប្រទេសជាតិក្នុងជម្លោះព្រំដែនកម្ពុជា-ថៃ ។

លោក ទុល ប្រាសឺតស៊ីន ប្រធានអង្គការប្រឆាំងអំពើពុករលួយខេត្តខនគែន និយាយថា មូលហេតុដាក់ពាក្យបណ្តឹងនាយករដ្ឋមន្ត្រីស្តីទី លោក ភូមិថាំ ដោយសារបញ្ហាឯករាជ្យ និងអធិបតេយ្យជាតិ ដែលជាបញ្ហាសំខាន់បំផុត ។ ប៉ុន្តែលោក ភូមិថាំ បែរជាធ្វេសប្រហែសក្នុងការបំពេញតួនាទី គឺបណ្តោយឱ្យប្រទេសជិតខាងឈ្លានពានថៃ ធ្វើឱ្យថៃបាត់បង់ឯករាជ្យ ។ បើពិចារណាពីភារកិច្ចរបស់កងទ័ពថៃ គឺកងទ័ពបានដណ្តើមតំបន់ចំនួន១១ នេះបង្ហាញថា កន្លងមក ថៃបាត់បង់ឯករាជ្យ ។

លើសពីនេះ កងទ័ពថៃរងរបួសបាក់ជើង ពលរដ្ឋស្លាប់ និងបាត់បង់ទ្រព្យសម្បត្តិ គឺជាបញ្ហាធ្ងន់ធ្ងរដែលមេដឹកនាំថៃត្រូវការពារកុំឱ្យកើតឡើង ប៉ុន្តែមេដឹកនាំថៃបែរជាកាន់ជើងសត្រូវ ជាពិសេស កម្ពុជា ។ នេះជាកំហុសធ្ងន់ធ្ងរណាស់ ទើបយើងដាក់ពាក្យប្តឹងឱ្យសមត្ថកិច្ចចាត់វិធានការយ៉ាងតឹងរ៉ឹងពីបទល្មើសតាមមាត្រា១៥៧, ១១៩, ១២០ និង១២៤ ជាពិសេស ពេលលោក ភូមិថាំ ផ្តល់សម្ភាសន៍ពីប្រធានបទផ្សេងៗ លោកតែងតែនិយាយកាន់ជើងសត្រូវ ។ ការប្រព្រឹត្តខុសមាត្រា១១៩ មានទោសធ្ងន់រហូតដល់ប្រហារជីវិត ឬជាប់ពន្ធនាគារអស់មួយជីវិត ។

លោក ភូមិថាំ ធ្លាប់និយាយជាមួយសារព័ត៌មានថា កម្ពុជាពុំបានតាំងចិត្តបាញ់ថៃ មានន័យថា លោក ភូមិថាំ ទទួលស្គាល់ការឈ្លានពានក្រោមច្បាប់អន្តរជាតិ និងអាចក្លាយជាឧក្រិដ្ឋកម្មសង្គ្រាម ។ លោកថែមទាំងនិយាយថា កម្ពុជាពុំបានតាំងចិត្តបាញ់មន្ទីរពេទ្យថៃ ដែលរឿងនេះគួរកម្ពុជាជាអ្នកនិយាយ មិនមែនថៃនិយាយទេ លោក ភូមិថាំ និយាយបែបនេះ ដូចគ្នានឹងនិយាយជំនួសកម្ពុជា ។

លោក ភូមិថាំ គ្មានតួនាទីកាត់ក្តីថា កម្ពុជាបានតាំងចិត្ត ឬមិនតាំងចិត្តបាញ់មន្ទីរពេទ្យថៃទេ ។ លើសពីនេះ លោក ភូមិថាំ ប្រាប់កងទ័ពថា ការល្បាតនៅព្រំដែនរងរបួសដាច់ជើងជាគ្រោះថ្នាក់ប៉ុណ្ណោះ យើងក្នុងនាមជាពលរដ្ឋថៃពុំដឹងនិយាយថាម៉េចទេ ។ យើងដាក់ពាក្យប្តឹងលោក ភូមិថាំ តាមឯកសារភ្ជាប់មកជាមួយ និងជាបំណងរួមរបស់អ្នកតវ៉ាទាំងអស់ដើម្បីការពារឯករាជ្យ និងអធិបតេយ្យ ។ នេះបើតាមការលើកឡើងរបស់លោក ទុល ប្រាសឺតស៊ីន ប្រធានអង្គការប្រឆាំងអំពើពុករលួយខេត្តខនគែន ។

គួរបញ្ជាក់ថា ភាគីថៃបានចោទប្រកាន់កងទ័ពកម្ពុជាបាញ់សំដៅមកលើមន្ទីរពេទ្យនៅព្រំដែន និងតំបន់ស៊ីវិល ប៉ុន្តែភាគីថៃពុំបានលើកឡើងពីកងទ័ពរបស់ខ្លួនឈ្លានពានកម្ពុជា ដោយប្រើប្រាស់អាវុធគ្រប់ប្រភេទមានទាំងយន្តហោះទម្លាក់គ្រាប់បែក F-16, Gripen រថក្រោះ, កាំភ្លើងធំ, គ្រាប់បែកចង្កោម ដ្រូនទម្លាក់គ្រាប់បែក និងផ្សែងពុលនោះទេ ៕

សម្តេចសង្ឃ ដាឡៃ ឡាម៉ា (Dalai Lama) ទី១៤ ឈ្មោះ Tenzin Gyatso ត្រូវបានប្រទេសចិនចាត់ទុកជាអ្នកនៅពីក្រោយចលនាបំបែករដ្ឋទីបេ។

រដ្ឋាភិបាលចិន បានចាត់ទុកតំបន់ទីបេ ស្ថិតក្នុងដែនអធិតេ្យភាពរបស់ខ្លួន ដូចដែលពួកគេចាត់ទុកកោះតៃវ៉ាន់។

ចិន បានចូលគ្រប់គ្រងតំបន់ទីបេនៅឆ្នាំ១៩៥០ ដោយបានរឹតត្បិតខ្លាំងលើសិទ្ធិសេរីភាពសាសនា និងអភិរក្សវប្បធម៌។

ប្រជាជនទីបេ យល់ឃើញថាខ្លួនកំពុងក្លាយជាជនជាតិភាគតិចនៅលើទឹកដីកំណើតខ្លួន ដោយរងការឈ្លានពានពីជនជាតិហាន ដែលជាជនជាតិចិនបច្ចុប្បន្ន។

រដ្ឋាភិបាលចិន បានអភិវឌ្ឍន៍តំបន់ទីបេ ដោយប្រយោជន៍ភាគច្រើនឱ្យទៅពួកហាន ជាងពួកទីបេ ដែលជាម្ចាស់ទឹកដី។

មកទល់សពថ្ងៃនេះ ការបះបោរបំបែករដ្ឋទីបេនៅតែបន្តមាន ក៏ប៉ុន្តែហាក់មិនមានសំលេងគាំទ្រខ្លាំងដូចពីមុននោះទេ។

សម្តេចសង្ឃ ដាឡៃ ឡាម៉ា (Dalai Lama) ទី១៤ មិនជំទាស់នឹងការដាក់តំបន់ទីបេឱ្យបន្តស្ថិតជាតំបន់ស្វ័យយ័តទេ ក៏ប៉ុន្តែទាមទារឱ្យរដ្ឋាភិបាលចិនផ្តល់សិទ្ធស្វ័យភាពពិតប្រាកដ ពិសេសការគោរពសិទ្ធិសេរីភាពសាសនា និងការថែរក្សាវប្បធម៌របស់ប្រជាជនទីបេ៕

បាងកក៖ ព្រះនាង Bajrakitiyabha Narendira Debyavati របស់ប្រទេសថៃបានធ្លាក់ព្រះកាយប្រឈួនធ្ងន់ធ្ងរជាមួយនឹងជំងឺច្រើនមុខ ហើយខណៈនេះស្ថិតនៅក្រោមការតាមដានយ៉ាងយកចិត្តទុកដាក់ពីសំណាក់ក្រុមគ្រូពេទ្យ នៅមន្ទីរពេទ្យរដ្ឋ Chulalongkorn ក្នុងទីក្រុងបាងកក។ នេះបើតាមសេចក្ដីជូនដំណឹងដោយការិយាល័យរាជវាំងនៃព្រះរាជាណាចក្រថៃ។

នៅថ្ងៃសុក្រ ទី15 ខែសីហា ឆ្នាំ 2025 ការិយាល័យរាជវាំងបានចេញសេចក្ដីជូនដំណឹងទៅដល់សាធារណជនទាំងអស់ឲ្យបានជ្រាបថា ព្រះនាងម្ចាស់ Bajrakitiyabha Narendira Debyavati បុត្រីនៃព្រះមហាក្សត្រ Rajasarini Siribajra Maha Vajiralongkorn បានដួលសន្លប់ភ្លាមៗដោយសារបញ្ហាបេះដូង ហើយបានចូលសម្រាកព្យាបាលនៅមន្ទីរពេទ្យចាប់តាំងពីថ្ងៃទី 15 ខែធ្នូ ឆ្នាំ 2022។

ក្រុមគ្រូពេទ្យដែលកំពុងផ្តល់ការព្យាបាលព្រះនាងបានរាយការណ៍បន្ថែមថា បច្ចុប្បន្នគ្រូពេទ្យបាននិងកំពុងផ្តល់ឱសថ និងឧបករណ៍ជំនួយដល់ដំណើរការនៃសួត និងគ្រលានរបស់ទ្រង់។ ក្រុមគ្រូពេទ្យក៏បានប្រទះឃើញថា មានការជ្រៀតចូលយ៉ាងធ្ងន់ធ្ងរនៃមេរោគចូលទៅក្នុងប្រព័ន្ធសសៃឈាមរបស់ព្រះអង្គ ដែលតម្រូវឲ្យគ្រូពេទ្យត្រូវប្រើប្រាស់ឱសថប្រភេទអង់ទីប៊ីយោទិច ដើម្បីទប់ស្កាត់ការឆ្លងទាំងនេះ ក៏ដូចជាថ្នាំប្រឆាំងនឹងជំងឺលើសឈាមរបស់ទ្រង់ ដើម្បីធ្វើឱ្យសម្ពាធឈាមមានស្ថេរភាព ចាប់តាំងពីថ្ងៃទី 9 ខែសីហា ឆ្នាំ 2025មក។

គិតត្រឹមថ្ងៃទី15 ខែសីហា ឆ្នាំ2025 នេះក្រុមគ្រូពេទ្យកំពុងបន្តផ្តល់ការថែទាំយ៉ាងយកចិត្តទុកដាក់ និងតាមដានស្ថានភាពរបស់ព្រះអង្គយ៉ាងដិតដល់។

គួរជម្រាបថា ព្រះនាង Bajrakitiyabha Narendira Debyavati បច្ចុប្បន្នមានព្រះជន្ម 46 ព្រះវស្សា គឺជាបុត្រីច្បងរបស់ព្រះបាទ Maha Vajiralongkorn ត្រូវបានរាជវាំងប្រកាសថាបានចូលសម្រាកនៅមន្ទីរពេទ្យកាលពីខែធ្នូ ឆ្នាំ 2022 បន្ទាប់ពីសន្លប់បាត់បង់ស្មារតីដោយសារជំងឺបេះដូង ប៉ុន្តែស្ថានភាពទ្រង់ហាក់មិនទាន់មានការធូរស្បើយនៅឡើយទេរហូតមកដល់ឆ្នាំ2025នេះ៕