ថៃ៖ បើយោងតាមសារព័ត៌មាន Khoasod កងយោធពលភូមិន្ទថៃបានបដិសេធលើការលើកឡើងរបស់លោក ហេង រតនា អគ្គនាយកសុីម៉ាក់កម្ពុជា ទាក់ទងនឹងការរកឃើញគ្រាប់មីនថ្មីៗរបស់ថៃថាជាការរៀបចំ ក្នុងចេតនាទម្លាក់កំហុសលើកម្ពុជា។ ជាមួយគ្នានោះថៃបានធ្វើការបកស្រាយពន្យល់ដូចខាងក្រោម ដើម្បីធានាឲ្យសាធារណៈជនមានការយល់ដឹងដ៏ត្រឹមត្រូវ និងដើម្បីបញ្ជាក់ថាថៃមិនបានសម្ដែងឡើយ។

ឧត្តមសេនីយឯក វិថៃ ឡៃថមយ៉ា អ្នកនាំពាក្យទីបញ្ជាការកងយោធពលភូមិន្ទថៃ នាថ្ងៃទី17 ខែសីហា ឆ្នាំ2025 បានឲ្យដឹងថា គ្រាប់មីនដែលទាហានថៃចំនួន៥នាក់បានដើរជាន់នៅតាមតំបន់ព្រំដែន បណ្ដាលឲ្យរងបួសធ្ងន់ធ្ងរកាលពីពេលថ្មីៗនេះ គឺជាប្រភេទមីន PMN-2 ប្រឆាំងមនុស្ស និងជាគ្រាប់មីនថ្មីដែលទើបផលិតយ៉ាងពិតប្រាកដ។ នេះបើតាមការបញ្ជាក់ដោយមជ្ឈមណ្ឌលសកម្មភាពកំចាត់មីនរបស់ប្រទេសថៃ (TMAC)។

ដោយឡែក ការលើកឡើងរបស់លោក ហេង រតនា អគ្គនាយកសុីម៉ាក់ដែលនិយាយថា គ្រាប់មីនPMN-2 ដែលថៃបានរកឃើញទាំងអស់ គឺជាគ្រាប់មីនសម្ដែង ព្រោះមីនទាំងនោះមិនទាន់ដកគន្លឹះសុវត្ថិភាពដេីម្បីបង្កផ្ទុះ ដែលខុសពីបច្ចេកទេសទូទៅក្នុងការដាក់មីនមេនទែននោះ លោក វិថៃ បានបញ្ជាក់ថា តាមពិតគន្លឹះសុវត្ថិភាពត្រូវបានដកចេញហើយ ប៉ុន្តែពេលរុះរើចេញពីដីអ្នកជំនាញបានធ្វើការដាក់វាឡើងវិញដើម្បីធានាសុវត្ថិភាព។ លើសពីនេះ ថៃបាននិយាយបង្វែងដានថា គ្រាប់មីនទាំងអស់ស្ថិតក្នុងស្ថានភាពថ្មីស្រាប់ មានស្លាកសញ្ញាច្បាស់លាស់ថាទើបផលិត ដែលផ្ទុយពីការអះអាងមិនពិតរបស់កម្ពុជា ដែលថាវាជាមីនចាស់។

អ្នកនាំពាក្យទីបញ្ជាការកងយោធពលភូមិន្ទថៃរូបនេះបានអះអាងថា ប្រទេសថៃគ្មានគ្រាប់មីនប្រឆាំងមនុស្សប្រភេទ PMN-2 នេះ សម្រាប់យកមកសម្ដែងនោះទេ ដោយសារចាប់តាំងពីឆ្នាំ 2003 ដល់ឆ្នាំ 2019 ថៃបានបើកយុទ្ធនាការកំចាត់ចោលមីនប្រភេទនេះបានអស់ទាំងស្រុងទៅហើយ។ ឧប្បត្តិហេតុនេះ ជាភស្តុតាងច្បាស់លាស់នៃការបំពានរបស់កម្ពុជាលើអនុសញ្ញាអូតាវ៉ា និងការរំលោភលើអធិបតេយ្យភាពរបស់ប្រទេសថៃ។

យ៉ាងណាក៏ដោយ បើទោះជាថៃបានខំបដិសេធថាប្រទេសខ្លួនមិនបានសំដែងពិតមែនក្ដី ប៉ុន្តែថៃនៅតែគ្មានភស្តុតាងច្បាស់លាស់ ក្នុងការបញ្ជាក់ឲ្យច្បាស់ថាតើមីនទាំងនេះជាមីនរបស់កម្ពុជាដោយរបៀបណា? តើទាហានកម្ពុជាអាចចូលទៅដាក់មីនថ្មីទាំងនេះក្នុងទឹកដីថៃបានយ៉ាងដូចម្ដេច? ពោលគឺថៃចេះតែចោ.ទប្រកាន់កម្ពុជាតាមចិត្តនឹកឃើញប៉ុណ្ណោះ។

ជាមួយគ្នានេះផងដែរ អាជ្ញាធរមីនកម្ពុជាបានបញ្ជាក់ថា កម្ពុជានៅតែបន្ដបើកទ្វារ ដើម្បីកិច្ចសហប្រតិបត្ដិការ លើការងារបោសសំអាតមីននៅតាមបន្ទាត់ព្រំដែនរវាងប្រទេសទាំងពីរ ព្រមទាំងអំពាវនាវដល់ភាគីថៃ ឲ្យបញ្ចប់នូវមហិច្ឆិតាបំពានកម្ពុជា ដើម្បីផ្ដើមកកសាងសន្តិភាពសារជាថ្មី៕

ឃើញទុក្ខលំបាករបស់ប្រជាជនភៀសសឹក ក្រុមគ្រួសារពលីផ្ទាល់ខ្លួនបុគ្គលល្បីឈ្មោះ ប៉ីប៉ី ឌី បាននិយាយថាលោកមិនក្បត់មនសិការដើម្បីលុយហើយហាងរបស់លោកគឺមិនឱ្យមានផលិតផលថៃជាដាច់ខាតលើកលែងតែមាននៅក្នុងស្តុក។ ប៉ីប៉ី ឌី ក៏បានបញ្ជាក់ថាទោះទំនិញថ្មីដឹកចូលតាមច្រកណា កែបាកូដ យ៉ាងណាក៏លោកមិនប្រើប្រាស់ដែរ ហើយមិនធ្វើឱ្យលុយចូលទៅប្រទេសថៃ។

ប្រិយមិត្តជ្រាបមកហើយថា ប៉ីប៉ី ឌី គឺជាបុគ្គលមានឥទ្ធិពលខ្លាំងនៅលើបណ្តាញសង្គមនិងជាអ្នកជំនួញម្នាក់ហើយពូកែខាងធ្វើទីផ្សារយ៉ាងខ្លាំង។ ថ្មីៗនេះលោកក៏បានបង្កើតភេសជ្ជៈថ្មីជាមួយនឹងការលើកស្ទួយនឹងកសិកម្មក្នុងស្រុកដូចជាល្ពៅនិងដំឡូងមកច្នៃធ្វើជាភេសជ្ជៈ។ ក្នុងរយៈពេលចុងក្រោយនេះ ប៉ីប៉ី ឌី ក៏បានធ្វើឱ្យប្រជាជនកម្ពុជាមានមោទនភាពដោយលោកបានជួយជនភៀសសឹកនិងគ្រួសារដែលបានពលីក្នុងពេលដែលថៃឈ្លានពានមកកាន់កម្ពុជា។

រយៈពេលជាច្រើនថ្ងៃដែលជួយដល់ជនភៀសសឹកនិងទៅជួបគ្រួសារពលីជាច្រើននាក់រិតតែធ្វើឱ្យលោកឈឺចាប់ហើយមិនអាចក្បត់មនសិការរបស់ខ្លួនឯងដើម្បីតែលុយ។ ជាក់ស្តែងកន្លងមកនេះលោកបានសម្រេចចិត្តមិនយកកុនរបស់ខ្លួនទៅបញ្ចាំងនៅក្នុងរោងកុនដែលមានដើមកំណើតមកពីប្រទេសថៃហើយឥឡូវនេះគឺលោកប្រកាសជាសាធារណៈទៅកាន់អ្នកផ្គត់ផ្គង់ផលិតផលមកហាងរបស់លោកកុំឱ្យមានការចចារតទៅទៀតព្រោះដាច់ខាតលោកមិនឱ្យមានផលិតផលថៃនៅក្នុងហាងរបស់លោកឡើយ។

នៅថ្ងៃទី១៧ ខែសីហា ប៉ីប៉ី ឌី បានប្រកាសថា «ខ្ញុំពិតជាហត់នឿយ នឹងការឆ្លើយតបណាស់ ខ្ញុំសូមជម្រាបទៅsupplierទាំងអស់ថាផលិតផលសៀម គឺដាច់ខាតមិនអាចឱ្យមាននៅក្នុងហាងខ្ញុំទេ លើកលែងតែសល់ក្នុងស្តុកចាស់របស់ខ្ញុំ។ ទំនិញថ្មីទោះជានាំចូលតាមច្រកណា កែបាកូដយ៉ាងណាក៏វានៅតែជារបស់សៀម»។

លោកបន្តទៀតថា «ខ្ញុំស្អប់ណាស់ ខ្ញុំអត់ក្បត់សមសិការដើម្បីលុយ រឹតតែមិនអាចឱ្យចំណូលចូលសៀមឡើយខ្ញុំឃើញពីការឈឺចាប់ ឃើញទឹកភ្នែកបងប្អូនភៀសសឹក និងគ្រួសារពលីផ្ទាល់ភ្នែក ខ្ញុំមិនអាចរួមគំនិតធ្វើរឿងមិនគប្បីបានទេ បើសិនជានៅតែព្យាយាមចរចាររឿងផលិតផលសៀមជាមួយខ្ញុំ ឬក្រុមការងារខ្ញុំទៀត ខ្ញុំនឹងផុសបង្ហាញជាសាធារណៈអរគុណ»។

ការប្រកាសរបស់ ប៉ីប៉ី ឌី បានធ្វើឱ្យទស្សនិកជនជាច្រើនសម្តែងការកោតសរសើរចំពោះការសម្រេចចិត្តរបស់លោកព្រមទាំងមានការគាំទ្រក្នុងការលែងប្រើប្រាស់ផលិតផលតទៅទៀត៕

លោក ចន ជាអ្នកបង្កើតមាតិកាដែលជាជនបរទេសមួយរូបមកពីចក្រភពអង់គ្លេស និងរស់នៅប្រទេសកម្ពុជាបានខ្នះខ្នែងយ៉ាងសកម្មភាពនិងមិនបង្អង់ដៃឡើយដើម្បីជួយដល់ជនភៀសសឹកដែលរងគ្រោះពីការឈ្លានពានរបស់ថៃ។ មិនត្រឹមតែជនបរទេសរូបនេះប៉ុណ្ណោះទេប៉ុន្តែជនបរទេសជាច្រើនទៀតគឺបានជួយផ្តល់ស្បៀងដល់ប្រជាជនកម្ពុជាក្នុងគ្រាជម្លោះព្រំដែននេះ។

លោក ចន ដែលមានឈ្មោះពិតថា «Jonathon Holdsworth» មានហ្វេកប៊ុកផេក «Areyouhomeyet» មិនត្រឹមតែជួយផ្សព្វផ្សាយលើកស្ទូយវប្បធម៌ វិស័យទេសចរណ៍ខ្មែរប៉ុណ្ណោះទេតែលោកគឺមានមនោសញ្ចេតនាជ្រាលជ្រៅជាមួយនឹងប្រជាជនកម្ពុជាយ៉ាងខ្លាំង។ ជារឿយៗនិងញឹកញាប់លោកបានបង្ហាញមុខម្ហូបខ្មែរ តំបន់ទេសចរណ៍ជាច្រើនចែករំលែកនៅលើបណ្តាញសង្គមហើយអ្វីដែលពលរដ្ឋខ្មែរចាំមិនភ្លេចគឺនៅឆ្នាំ២០២៣ ចន គឺបានចេញមុខតបតទៅកាន់តារាកំប្លែងនិងជា Youtuber ជនជាតិម៉ាឡេស៊ីម្នាក់ដែលប្រើសម្តីមិនសមរម្យមកលើមុខម្ហូបរបស់ប្រទេសកម្ពុជា។

ជាក់ស្តែង ស្របពេលប្រទេសកម្ពុជារងការឈ្លានពានពីប្រទេសថៃលោកក៏មិនឱបដៃឈរមើលដូចគ្នាហើយប្រឹងប្រែងជួយយ៉ាងសកម្ម។ ជនបរទេសដែលអាចនិយាយភាសាខ្មែរបានយ៉ាងល្អរូបនេះ បានចូលរួមជាមួយមិត្តភក្តិ តារាសម្តែង មាន សូនីតា និងតាមរយៈអង្គការផ្សេងៗធ្វើការយ៉ាងខ្នះខ្នែងជួយដល់កុមារនិងជនភៀសសឹកដទៃទៀត មិនខ្លាចនឹងភាពនឿយហត់ឡើយ។

ការជួយយ៉ាងសកម្មរបស់ ចន ដែលបង្ហាញទំហឹងចិត្តស្រលាញ់ចំពោះប្រជាជនកម្ពុជាគឺពិតជាធ្វើឱ្យបលរដ្ឋមានការស្ញើចសរសើរយ៉ាងនូវទង្វើសប្បុរសធម៌ មនុស្សធម៌ របស់លោក។ ជាងនេះទៅទៀត ចាប់តាំងពីកម្ពុជារងការឈ្លានពានដំបូងៗ មកទល់ពេលនេះ ចន នៅតែបន្តជួយទៅដល់ជនភៀសសឹក៕

រដ្ឋាភិបាលជប៉ុននឹងផ្តល់ប្រាក់សរុបប្រមាណ ១,៨លានដុល្លារអាមេរិក ទៅអោយស្ថាប័នអង្គការចំនួនពីរ ដើម្បីផ្តល់សម្ភារៈប្រើប្រាស់ចាំបាច់ប្រចាំថ្ងៃ និងជម្រកស្នាក់នៅបណ្តោះអាសន្នដល់ប្រជាពលរដ្ឋភៀសសឹកខ្មែរ ដែលរងគ្រោះដោយសារជម្លោះប្រដាប់អាវុធរវាងប្រទេសកម្ពុជា និងថៃ។

ផ្អែកតាមសេចក្តីប្រកាសព័ត៌មានរបស់ស្ថានទូតជប៉ុននៅកម្ពុជានាថ្ងៃទី១៥ ខែសីហា ឆ្នាំ២០២៥ ឯកអគ្គរាជទូត អ៊ូអិណុ បានប្រកាសផ្តល់ជំនួយសង្គ្រោះបន្ទាន់សម្រាប់ពលរដ្ឋខ្មែររស់តាមតំបន់ព្រំដែនកម្ពុជា-ថៃ តាមរយៈអង្គការចំនួនពីរ គឺអង្គការអន្តរជាតិទេសន្តរប្រវេសន៍ (IOM) និងមូលនិធិអង្គការសហប្រជាជាតិដើម្បីកុមារ (យូនីសេហ្វ)។

ការផ្តល់នូវកញ្ចប់ជំនួយនេះ គឺដើម្បីឆ្លើយតបទៅនឹងតម្រូវការមនុស្សធម៌ជាបន្ទាន់នៅតាមតំបន់ព្រំដែនកម្ពុជា-ថៃ។ ឯកអគ្គរាជទូតជប៉ុនប្រចាំកម្ពុជាបានរៀបរាប់បញ្ជាក់ថា៖ «ខ្លួនខ្ញុំផ្ទាល់ និងវរសេនីយឯក ហារ៉ា តាកាស៊ី អនុព័ន្ធយោធានៃស្ថានទូតជប៉ុនបានចូលរួមដំណើរទស្សនកិច្ចទៅកាន់តំបន់ព្រំដែន ហើយមានការគ្រាំគ្រាចិត្តជាពន់ពេក ចំពោះទំហំនៃការខូចខាត។

ស្ថានទូតជប៉ុនប្រចាំនៅកម្ពុជា ក៏នឹងបន្តខិតខំប្រឹងប្រែងដើម្បីជួយស្តារសន្តិភាព និងផ្តល់ជំនួយដល់ប្រជាពលរដ្ឋដែលរងគ្រោះនៅក្នុងប្រទេសកម្ពុជា»។ រដ្ឋាភិបាលជប៉ុនគាំទ្រពេញទំហឹង ចំពោះកិច្ចព្រមព្រៀងឈប់បាញ់បន្ទាន់ និងឥតលក្ខខណ្ឌរវាងកម្ពុជា និងថៃ។ ជប៉ុនសង្ឃឹមថាកម្ពុជានឹងមានសន្តិភាពឡើងវិញយ៉ាងឆាប់រហ័ស ហើយប្រទេសជប៉ុននឹងបន្តខិតខំប្រឹងប្រែង ដើម្បីកាត់បន្ថយការលំបាករបស់ពលរដ្ឋដែលរងគ្រោះ។

តាមរយៈសេចក្តីប្រកាសព័ត៌មានរបស់ខ្លួនកាលពីពេលថ្មីៗកន្លងមកនេះ អង្គការយូនីសេហ្វ បានបង្ហាញអំពីបញ្ហាមួយចំនួនដែលជនភៀសសឹកខ្មែរជាច្រើនកំពុងជួបប្រទះ ដោយរំលេចអំពីករណីសិក្សារបស់គ្រួសារមួយ ដែលមានផ្ទះនៅឯខេត្តឧត្តរមានជ័យ។ យូនីសេហ្វ បានលើកឡើងអំពីបញ្ហារបស់គ្រួសារ លោក ខុន អួត ជាកសិករម្នាក់នៅក្នុងខេត្តឧត្តរមានជ័យ។

លោក អួតមានផ្ទះស្ថិតនៅចម្ងាយប្រមាណ ២គីឡូម៉ែត្រប៉ុណ្ណោះពីព្រំដែនថៃ។ កំពុងអង្គុយជាមួយកូនប្រុស ២នាក់ និងក្មួយប្រុសម្នាក់ទៀត លោក អួត ថា គ្រួសាររបស់គាត់បានរត់ភៀសខ្លួនពីផ្ទះទាំងបង្ខំអស់រយៈពេលជាច្រើនសប្ដាហ៍កន្លងមកហើយ។ បុរសអ្នកខេត្តឧត្តរមានជ័យម្នាក់នេះ បានបញ្ជាក់ថា គ្រួសាររបស់លោក មានសមាជិកសរុបចំនួន ៧នាក់ ឯសមាជិកដែលតូចជាងគេ មានអាយុត្រឹម ៨ខែ ប៉ុណ្ណោះ។ ចាប់តាំងពីក្រុមគ្រួសាររបស់លោកបានរត់មកស្នាក់នៅក្នុងវត្តមួយកន្លែងឯខេត្តសៀមរាប ដំណាំកសិកម្មដែលជាប្រភពចំណូលតែមួយគត់របស់គាត់ និងសត្វចិញ្ចឹមផ្សេងទៀតកំពុងអត់ចំណី ហើយខ្វះការថែទាំ។

ទោះបែបនេះក្តី គ្រួសាររបស់លោកតែងទន្ទឹងរង់ចាំការវិលត្រឡប់ទៅផ្ទះវិញ ហើយរស់ក្នុងក្តីព្រួយបារម្ភជាប្រចាំចំពោះភាពមិនប្រាកដប្រជានៃអនាគត។ តាមរយៈករណីសិក្សានេះ យូនីសេហ្វ បានបញ្ជាក់ថា ក្រុមគ្រួសារ និងកុមារកម្ពុជាជាច្រើន កំពុងតែប្រឈមនឹងហានិភ័យ។ វិបត្តិថ្មីៗនេះ បានធ្វើឱ្យគ្រួសារខ្មែររាប់ម៉ឺននាក់ជួបនឹងការខ្វះខាត។ តម្រូវការបន្ទាន់នាពេលនេះ គឺទឹកស្អាត អនាម័យ និងការអប់រំ។ លើសពីនេះ ពួកគេក៏ប្រឈមនឹងហានិភ័យខ្ពស់នៃអំពើហិង្សា និងការកេងប្រវ័ញ្ចផងដែរ៕

(ភ្នំពេញ)៖ សម្ដេចតេជោហ៊ុន សែន ស្នើឲ្យពលរដ្ឋគិតគូរឲ្យបានដិតដល់រឿងពហិការឈប់គាំទ្រក្រុមហ៊ុន កូកា-កូឡា ដោយសារក្រុមហ៊ុននេះបានផ្ដាច់កុងត្រាជាមួយ វណ្ណដា។ សម្ដេចបញ្ជាក់ថា ចលនាពហិការដែលខ្វះការពិចារណា អាចនាំឲ្យកម្ពុជាយើងខ្លួនឯងជាអ្នកខាតបង់សេដ្ខកិច្ច ដ្បិតក្រុមហ៊ុននេះជារបស់អាមេរិក តែមានរោងចក្រផលិតនៅកម្ពុជា មានបុគ្គលិកធ្វើការជាជនជាតិខ្មែរ ដូច្នេះប្រយ័ត្នចា.ញ់ល្បិចសត្រូវ ព្រោះការខាតបង់និងភាពទន់ខ្សោយរបស់យើង គឺជាអ្វីដែលគេចង់ឃើញ។

នៅយប់ថ្ងៃទី17 ខែសីហា ឆ្នាំ2025 សម្ដេចតេជោបានបញ្ចេញសំណេរមួយនៅលើទំព័រហ្វេសប៊ុក ពាក់ព័ន្ធនឹងករណីប្រជាពលរដ្ឋខ្មែរ ប្រមូលគ្នាឈប់ផឹកផលិតផលរបស់ក្រុមហ៊ុនកូកា កូឡា បន្ទាប់ពីទទួលបានព័ត៌មានថា ក្រុមហ៊ុននេះបានបញ្ចប់កុងត្រាជាមួយ វណ្ណដា ក្នុងនាមជាទូតសុឆន្ទៈ ដោយសារ វណ្ណដា បានបង្ហាញពីស្មារតីការពារជាតិនៅលើបណ្ដាញសង្គម។ ឆ្លើយតបទៅនឹងការប្រកាសបែបនេះរបស់ពលរដ្ឋខ្មែរ សម្ដេចតេជោបានមានប្រសាសន៍ថា៖ សូមបងប្អូនជនរួមជាតិមេត្តារក្សាភាពស្ងប់ស្ងាត់សិននិងពិចារណាឲ្យបានដឹតដល់។ ដំបូងយើងត្រូវដឹងថាតើក្រុមហ៊ុនផ្តាច់កុងត្រាជាមួយវណ្ណដាដោយសារវណ្ណដាស្រឡាញ់ជាតិឬយ៉ាងណា? បន្ទាប់មកយើងត្រូវដឹងថា ទោះជាកូកាជាផលិតផលអាមេរិកតែវាក៏ជាផលិតផលរបស់ខ្មែរ ព្រោះផលិតនៅក្នុងកម្ពុជាដែលកម្មករខ្មែរជាអ្នកធ្វើការនិងទទួលផល។ការបង់ពន្ធក៏បានមកកម្ពុជាដែលជាការរួមចំណែកដល់កំណើនសេដ្ឋកិច្ចរបស់កម្ពុជា។

សម្ដេចបានបញ្ជាក់ថា៖ សិនក្រុមហ៊ុនដកខ្លួនចេញពីកម្ពុជានោះកម្ពុជាគឺជាអ្នកខាតបង់ដែលសត្រូវរបស់យើងជាអ្នកទទួលផល។ សត្រូវរបស់យើងចង់វាយខាងសេដ្ឋកិច្ចយើងតាំងពីដំបូងដូចជាគំរាមកាត់ផ្តាច់អគ្គីសនី ផ្តាច់អុីនធើណែតឈប់លក់ប្រេងតែយើងបានម្ចាស់ការកាត់ផ្តាច់ និងឈប់ទិញជាមុនដើម្បីកុំឲ្យគេគំរាមយើងបានទៀត។ ខ្ញុំមិនជំទាស់ទេប្រសិនបើកូកានេះផលិតនៅថៃបងប្អូនអាចឈប់ប្រើបានតែបើកូកានេះផលិតនៅកម្ពុជាបងប្អូនពហិការមិនប្រើកម្ពុជាគឺជាអ្នកខាតបង់ទាំងការងារទាំងប្រាក់ចំណូលដោយផ្ទាល់និងដោយប្រយោលរបស់ប្រជាជននិងចំណូលរដ្ឋ។

ជាមួយគ្នានេះ សម្ដេចបានសង្កត់ធ្ងន់ថា៖ ក្រៅពីរឿងសេដ្ឋកិច្ចនៅមានរឿងសំខាន់មួយទៀត គឺគេរុញយើងឲ្យធ្វើជាសត្រូវជាមួយអាមេរិកតែម្តង ដែលរឿងនេះវាបង្កើតនូវបញ្ហាខាងការទូតសេដ្ឋកិច្ច ពាណិជ្ជកម្ម វិនិយោគរវាងកម្ពុជាជាមួយអាមេរិកតែម្តង។ សូមកុំចូលអន្ទាក់របស់សត្រូវយើងឲ្យសោះ។ សូម្បីតែក្រុមហ៊ុនថៃដែលកំពុងវិនិយោគនៅកម្ពុជាក៏យើងត្រូវខិតខំរក្សា ដើម្បីជាប្រយោជន៍របស់យើងដែរ។

ជាងនេះទៅទៀត សម្ដេចតេជោបានផ្ដាំផ្ញើជាពិសេសទៅកាន់វណ្ណដាថា៖ ពុកសង្ឃឹមថាវណ្ណដានឹងយល់ ទោះគេបញ្ឈប់កូនដោយមូលហេតុណាក៏ដោយ កូនគប្បីស៊ូទ្រាំដើម្បីប្រយោជន៍ជាតិ។ វណ្ណដាតំណាងឲ្យស្មារតីលះបង់ដើម្បីប្រយោជន៍ជាតិ៕