ប្រទេសថៃ ៖ ថៃតែងតែផ្សព្វផ្សាយព័ត៌មានពីកងទ័ពខ្លួនជាន់មីន និងចោទប្រកាន់កម្ពុជាតាមទម្លាប់ថា កងទ័ពកម្ពុជាបង្កប់មីនថ្មីក្នុងទឹកដីថៃ ។ ទោះជាកម្ពុជាបានច្រានចោលការចោទប្រកាន់នេះជាច្រើនលើក ក៏ថៃនៅតែចោទប្រកាន់ដដែលៗ ជាពិសេស ក្រោយពីប្រទេសទាំងពីរបានប្រជុំចរចាដោះស្រាយជម្លោះឈានទៅរកសន្តិភាព បែរជាថៃស្រែកថា កងទ័ពជាន់មីន ។ ហេតុអ្វីកងទ័ពថៃពុំដើរល្បាតក្នុងទឹកដីរបស់ខ្លួន ហើយចូលចិត្តដើរខុសផ្លូវបង្កបញ្ហាមិនឈប់ឈរ ចោទប្រកាន់ផ្តេសផ្តាសបែបនេះ?

កាលពីថ្ងៃទី២៧ ខែសីហា ឆ្នាំ២០២៥ សារព័ត៌មានថៃ Matichon រាយការណ៍ថា កងទ័ពថៃបានដើរល្បាតខុសផ្លូវជាន់មីនដាច់ជើងស្តាំនៅបរិវេណប្រាសាទតាក្របី ហើយនេះជាការជាន់មីនលើកទី៦ និងជាន់លើកទី៣ គិតចាប់ពីកម្ពុជា-ថៃបានធ្វើកិច្ចព្រមព្រៀងឈប់បាញ់ ។ អ្នកនាំពាក្យកងទ័ពថៃបានចោទប្រកាន់ដូចពេលកន្លងមកថា កម្ពុជាមានចេតនាបង្កប់មីនក្នុងទឹកដីរបស់ខ្លួន ហើយចាត់ទុកនេះជាការបំពានបទឈប់បា.ញ់ និងអនុសញ្ញាអូតាវ៉ាម្តងហើយម្តងទៀត ។

អ្នកនាំពាក្យកងទ័ព លោក វីនឆ័យ សុវ៉ារី បាននិយាយពីកងទ័ពថៃម្នាក់ជាន់មីន នៅថ្ងៃទី២៧ ខែសីហា ពេលល្បាតនៅបរិវេណប្រាសាទតាក្របី បណ្តាលឱ្យដាច់ជើងខាងស្តាំ ដោយលោកចោទប្រកាន់កងទ័ពកម្ពុជាបង្កប់មីនថ្មីក្នុងទឹកដីថៃ ។ លោកថា នេះជាការជាន់មីនលើកទី៦ និងជាន់លើកទី៣ គិតចាប់ពីកម្ពុជា-ថៃធ្វើកិច្ចព្រមព្រៀងឈប់បាញ់ ដែលបញ្ជាក់យ៉ាងច្បាស់ថា កម្ពុជានៅតែបំពានបទឈប់បាញ់រហូតមក និងពុំគោរពអនុសញ្ញាអូតាវ៉ាដែលហាមប្រើប្រាស់មីនប្រឆាំងមនុស្ស ។

លោក វីនឆ័យ បន្តថា ហេតុការណ៍កងទ័ពថៃជាន់មីនបានកើតឡើងជាច្រើនលើកនៅតំបន់ព្រំដែន ដែលបង្ហាញពីចេតនាអាក្រក់ គំរាមកំហែង និងល្មើសបូរណភាពទឹកដីថៃ ផ្ទុយពីកិច្ចប្រជុំគណៈកម្មាធិការកិច្ចការព្រំដែនទូទៅ (GBC) កន្លងមក ។ លោកក៏បានចោទប្រកាន់កម្ពុជាល្មើសបទឈប់បាញ់ជាបន្តបន្ទាប់ ដោយសារការបង្កប់មីនដែលថៃចាត់ទុកមីនជាអាវុធ ។

លោកជឿថា កម្ពុជាមានផែនការបង្កប់មីនជាមុននៅតាមបណ្តោយព្រំដែនដើម្បីគំរាមកំហែងថៃ ហើយការបង្កប់មីនជាឧបសគ្គដល់ការកាត់បន្ថយភាពតានតឹង និងប៉ះពាល់ការចរចាទ្វេភាគីរវាងប្រទេសទាំងពីរ ។

ជាការឆ្លើយតបនឹងការចោទប្រកាន់របស់ថៃ ក្រសួងការពារជាតិកម្ពុជាបញ្ជាក់ថា កម្ពុជាមិនបានប្រើប្រាស់ និងដាក់គ្រាប់មីនថ្មីឡើយ កម្ពុជាប្រកាន់ខ្ជាប់នូវការគោរពអនុសញ្ញាអូតាវ៉ា ដែលកម្ពុជាជារដ្ឋភាគីនៃអនុសញ្ញាហាមប្រាណការប្រើប្រាស់មីនប្រឆាំងមនុស្ស ។ កម្ពុជាធ្លាប់ជម្រាបថៃ និងសហគមន៍អន្តរជាតិជាច្រើនដងរួចមកហើយថា តាមបណ្តោយព្រំដែនក្នុងទឹកដីកម្ពុជា គឺនៅមានគ្រាប់មីនជាច្រើនដែលបន្សល់ទុកពីសម័យសង្គ្រាមស៊ីវិល ។

កម្ពុជាសូមអំពាវនាវឱ្យភាគីថៃគោរពនូវលក្ខខណ្ឌកិច្ចព្រមព្រៀងបទឈប់បាញ់ ព្រមទាំងស្មារតី និងការឯកភាពគ្នាក្នុងកិច្ចប្រជុំវិសាមញ្ញគណៈកម្មាធិការព្រំដែនទូទៅ (GBC) ដែលថា ភាគីទាំងពីរបានព្រមព្រៀងគ្នារក្សាកម្លាំងយោធារបស់ខ្លួនក្នុងទីតាំងបច្ចុប្បន្ន ដោយមិនអនុញ្ញាតឱ្យផ្លាស់ទីហួសពីទីតាំងដែលខ្លួនបានឈរជើងពេលកិច្ចព្រមព្រៀងបទឈប់បាញ់ចូលជាធរមាន នៅម៉ោង១២រំលងអធ្រាត្រ ថ្ងៃទី២៨ ខែកក្កដា ឆ្នាំ២០២៥ ឡើយ ។ ភាគីទាំងពីរមិនត្រូវចល័តកងទ័ពរបស់ខ្លួន រាប់បញ្ចូលទាំងការដើរល្បាតលើទីតាំងរបស់ភាគីម្ខាងទៀតឡើយ ៕

ប្រទេសកូរ៉េខាងត្បូង ៖ កាលពីថ្ងៃទី២៧ ខែសីហា ឆ្នាំ២០២៥ សារព័ត៌មាន BBC រាយការណ៍ថា រដ្ឋសភាកូរ៉េខាងត្បូងបានអនុម័តច្បាប់ហាមកូនសិស្សប្រើប្រាស់ទូរស័ព្ទដៃនៅសាលារៀនទូទាំងប្រទេស ដោយសារបារម្ភពីផលប៉ះពាល់ការសិក្សារបស់កូនសិស្ស និងការញៀនបណ្តាញសង្គម ។ ការអនុម័តច្បាប់នេះធ្វើឱ្យកូរ៉េខាងត្បូងក្លាយជាប្រទេសចុងក្រោយលើពិភពលោក ដែលហាមកូនសិស្ស និងយុវជនប្រើប្រាស់ទូរស័ព្ទ ។

ការអនុម័តច្បាប់ហាមប្រើប្រាស់ទូរស័ព្ទនៅសាលារៀនរបស់រដ្ឋសភាកូរ៉េខាងត្បូងបានធ្វើឡើងនៅថ្ងៃទី២៧ ខែសីហា ដែលទទួលបានការគាំទ្រ១១៥សំឡេង ក្នុងចំណោម១៦៣សំឡេង ដោយច្បាប់នេះអនុវត្តចាប់ពីខែមីនា ឆ្នាំ២០២៦ ជាពេលបើកបវសនកាលថ្មី ។ រដ្ឋសភាកូរ៉េខាងត្បូងអនុម័តច្បាប់ក្រោយពីការព្យាយាមរួមគ្នាក្នុងការបញ្ឈប់កូនសិស្សប្រើប្រាស់ទូរស័ព្ទ ដោយសារការស្រាវជ្រាវង្ហាញពីផលប៉ះពាល់កាន់តែខ្លាំងពាក់ព័ន្ធនឹងការប្រើប្រាស់ឧបករណ៍អេឡិចត្រូនិក ។ សមាជិកសភា អាណាព្យាបាលសិស្ស និងគ្រូបង្រៀននិយាយថា ការប្រើប្រាស់ស្មាតហ្វូនប៉ះពាល់ដល់ការសិក្សា និងខាតពេលវេលាសិក្សារបស់យុវជជន ។

បច្ចុប្បន្ន មិនមែនមានតែយុវជនកូរ៉េខាងត្បូងទេដែលញៀនទូរស័ព្ទ ប៉ុន្តែពលរដ្ឋកូរ៉េខាងត្បូងម្នាក់ក្នុងចំណោម៤នាក់ នៃចំនួនពលរដ្ឋនៅទូទាំងប្រទេសប្រមាណ៥១លាននាក់ បានចំណាយពេលយ៉ាងច្រើនលេងទូរស័ព្ទ ។ តាមលទ្ធផលការសិក្សារបស់រដ្ឋាភិបាលកូរ៉េខាងត្បូងកាលពីឆ្នាំ២០២៤ បង្ហាញថា ពលរដ្ឋអាយុពី១០ឆ្នាំ ទៅ១៩ឆ្នាំ លេងទូរស័ព្ទដៃបានកើនឡើងទ្វេដង ស្មើ៤៣% ហើយចំនួននេះកើនឡើងជាបន្តបន្ទាប់ ។

ការអនុម័តច្បាប់ហាមកូនសិស្សប្រើប្រាស់ទូរស័ព្ទនេះធ្វើឱ្យពលរដ្ឋមួយចំនួនមានចម្ងល់ រួមទាំងយុវជនផងដែរថា តើវានឹងទទួលបានលទ្ធផលដែរឬទេ ហើយរដ្ឋាភិបាលកូរ៉េខាងត្បូងនឹងអាចដោះស្រាយបញ្ហាការផលិតស្មាតហ្វូនបានឬអត់ ពីព្រោះកំណើនការផលិតស្មាតហ្វូនជាបញ្ហាធ្វើឱ្យយុវជនប្រើប្រាស់ស្មាតហ្វូនកាន់តែខ្លាំង ។

សាលារៀនជាច្រើននៅកូរ៉េខាងត្បូងបានអនុវត្តវិធានការហាមប្រើប្រាស់ទូរស័ព្ទដៃរួចហើយ ហើយកូរ៉េខាងត្បូងពុំមែនជាប្រទេសដំបូងគេដែលហាមប្រើប្រាស់ទូរស័ព្ទនៅសាលារៀនទេ មុននេះ ប្រទេសហ្វាំងឡង់ និងបារាំង បានហាមកុមារតូចៗប្រើប្រាស់ទូរស័ព្ទដៃ ខណៈអ៊ីតាលី ហូឡង់ និងចិន រឹតបន្តឹងការប្រើប្រាស់ទូរស័ព្ទគ្រប់សាលារៀន។

រដ្ឋាភិបាលកូរ៉េខាងត្បូងមានគោលដៅកាត់បន្ថយការញៀនបណ្តាញសង្គមរបស់យុវជន ព្រមទាំងជំរុញឱ្យយុវជនផ្តោតអារម្មណ៍លើការសិក្សា និងចូលរួមសកម្មភាពផ្សេងៗក្នុងសង្គម ។ ក្រៅពីនេះ វានឹងអាចទប់ស្កាត់ផលប៉ះពាល់ដោយសារការប្រើប្រាស់បច្ចេកវិទ្យាពុំសមរម្យក្នុងវ័យសិក្សា ជាពិសេស ប៉ះពាល់សុខភាពផ្លូវចិត្ត ៕

វ៉ាសុីនតោន៖ ប្រវត្តិសាស្រ្តកំពុងត្រូវបានចារហើយនៅពេលនេះ! ប្រធានាធិបតីអាមេរិក លោក Donald J. Trump បានថ្លែងសរសើរកម្ពុជា និងថ្នាក់ដឹកនាំកម្ពុជានៅក្នុងលិខិតផ្លូវការមួយរបស់សេតវិមាន បន្ទាប់ពីលោកត្រូវបាននាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត និងប្រជាពលរដ្ឋកម្ពុជាបានផ្ដល់ការគាំទ្រដល់រូបលោកសម្រាប់ពានរង្វាន់ណូបែលសន្តិភាព។

នៅក្នុងលិខិតរបស់សេតវិមាន ដែលបានចេញនៅថ្ងៃទី២០ ខែសីហា ឆ្នាំ២០២៥ លោក Trump បានលើកសរសើរពីប្រវត្តិសាស្ត្រដ៏យូរលង់របស់ប្រទេសកម្ពុជា និងបានសរសើរដល់លោក ហ៊ុន ម៉ាណែត ថាជាមេដឹកនាំដ៏រឹងមាំដែលផ្តល់តម្លៃដល់សន្តិភាព និងបានរំលឹកពិភពលោកថា កិច្ចព្រមព្រៀងឈប់បា.ញ់របស់គាត់បានបញ្ចប់ការបង្ហូរឈា.មរវាងកម្ពុជាជាមួយថៃ ដោយបានជួយសង្គ្រោះជីវិតមនុស្សរាប់ពាន់នាក់ និងបានបើកទ្វារឆ្ពោះទៅរកភាពរុងរឿង។

បន្ថែមពីនោះ លោក Trump បានមានប្រសាសន៍ថា៖ ខ្ញុំពិតជាមានមោទនភាព ដែលបានចូលរួមជាផ្នែកមួយនៃកិច្ចព្រមព្រៀងបទឈប់បា.ញ់ ដោយបានបញ្ចប់នូវសោ.កនាដកម្មនៃជម្លោះប្រដាប់អាវុធ និងបានសង្គ្រោះជីវិតមនុស្សរាប់ពាន់នាក់។ ចាប់ពីពេលនេះតទៅ យើងអាចផ្តោតការយកចិត្តទុកដាក់ជាមួយគ្នាលើការកសាងវិបុលភាព សម្រាប់ប្រជាជាតិដ៏អស្ចារ្យរបស់យើងទាំងពីរ។

គួររំលឹកថា ចាប់តាំងពីទទួលបានបទឈប់បា.ញ់ដើម្បីយកមកអនុវត្តមក ប្រទេសកម្ពុជាបានប្ដេជ្ញាចិត្តគោរពនូវកិច្ចព្រងព្រៀងនេះបានយ៉ាងខ្ជាប់ខ្ចួន។ ក្នុងនោះ ថ្នាក់ដឹកនាំកម្ពុជា សម្ដេចធិបតី ហ៊ុន ម៉ាណែត បានផ្ញើលិខិតជាផ្លូវការទៅគណៈកម្មការពានរង្វាន់ណូបែលសន្តិភាព ដើម្បីគាំទ្របេក្ខភាពប្រធានាធិបតីអាម៉េរិកលោក ដូណាល់ ត្រាំ(Donald Trump) សម្រាប់ពានរង្វាន់ណូបែលសន្តិភាព។

ប្រមុខរាជរដ្ឋាភិបាលកម្ពុជាបានគូសបញ្ជាក់ថា តាមរយៈការដាក់លិខិតគាំទ្រលោកត្រាំនេះ គឺស្របតាមសំណូមពររបស់ប្រជាពលរដ្ឋខ្មែរទាំងក្នុងនិងក្រៅប្រទេស និងដើម្បីជាការថ្លែងអំណរគុណចំពោះលោកប្រធានាធិបតី ដូណាល់ ត្រាំ ដែលបានយកចិត្តទុកដាក់ដោយផ្ទាល់ ក្នុងការផ្ដួចផ្ដើមនិងជំរុញឲ្យមានបទឈប់បាញ់គ្នារវាងកងទ័ពកម្ពុជានិងកងទ័ពថៃ និងបន្តតាមដានការអនុវត្តបទឈប់បាញ់រហូតដល់មានសន្តិភាពពេញលេញរវាងប្រទេសទាំងពីរ៕

ប្រទេសថៃ ៖ ពលរដ្ឋមីយ៉ាន់ម៉ាជាច្រើននាក់បានមកសុំជ្រកកោននៅថៃបណ្តោះអាសន្នក្រោយពីមានស្ថានការណ៍អសន្តិសុខកើតឡើងនៅតំបន់ព្រំដែនមីយ៉ាន់ម៉ា-ថៃ ស្របពេលថៃខ្វះខាតកម្លាំងពលកម្មខ្លាំង ។ ហេតុនេះ គណៈរដ្ឋមន្ត្រីថៃបានសម្រេចទទួលយកជនភៀសសឹកមីយ៉ាន់ម៉ាឱ្យធ្វើការនៅថៃបណ្តោះអាសន្នដើម្បីដោះស្រាយការខ្វះខាតកម្លាំងពលកម្ម ខណៈរដ្ឋាភិបាលថៃកំពុងដំណើរការនាំចូលពលករបង់ក្លាដែស ស្រីលង្ការ និងឥណ្ឌូណេស៊ី មកធ្វើការជំនួសពលករខ្មែរ ។

តាមការផ្សព្វផ្សាយរបស់សារព័ត៌មានថៃ Spring News កាលពីថ្ងៃទី២៦ ខែសីហា ឆ្នាំ២០២៥ ឱ្យដឹងថា គណៈរដ្ឋមន្ត្រីថៃបានសម្រេចទទួលយកជនភៀសសឹកមីយ៉ាន់ម៉ាធ្វើការនៅប្រទេសថៃក្នុងករណីពិសេសដើម្បីដោះស្រាយបញ្ហាខ្វះខាតកម្លាំងពលកម្មខ្លាំង ។ បច្ចុប្បន្ន វិស័យជាច្រើនរបស់ថៃប្រឈមនឹងគ្មានពលករធ្វើការ ដូចជា ៖ កសិកម្ម សំណង់ នេសាទ និងបេះផ្លែឈើ ដោយសារពលករខ្មែរត្រឡប់មកប្រទេសវិញ ។

កាលពីថ្ងៃទី២៦ ខែសីហា លោក ផុងកាវីន ជឹងរុងរឿងគិត រដ្ឋមន្ត្រីក្រសួងការងារថៃបានពីកិច្ចប្រជុំគណៈរដ្ឋមន្ត្រីអនុម័តតាមការណែនាំរបស់លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីថៃ ឱ្យទទួលយកជនភៀសសឹកមីយ៉ាន់ម៉ាធ្វើការនៅថៃបណ្តោះអាសន្ន ។ ការធ្វើការរបស់ជនភៀសសឹកមីយ៉ាន់ម៉ានឹងផ្តល់អត្ថប្រយោជន៍ដល់ប្រទេសថៃជាច្រើនផ្នែក ដូចជា ៖ ជំរុញសេដ្ឋកិច្ច, បង្កើនទំនាក់ទំនងមីយ៉ាន់ម៉ា-ថៃ, កាត់បន្ថយការលួចធ្វើការខុសច្បាប់ និងពង្រឹងសន្តិសុខនៅតំបន់ព្រំដែន ។

ក្រៅពីនេះ ការទទួលយកជនភៀសសឹកមីយ៉ាន់ម៉ាធ្វើការនៅប្រទេសថៃ នឹងជួយកាត់បន្ថយបន្ទុកចំណាយរដ្ឋាភិបាលថៃក្នុងការថែទាំជនភៀសសឹកមីយ៉ាន់ម៉ារយៈពេលយូរ ដោយឱ្យជនភៀសសឹកមីយ៉ាន់ម៉ាអាចធ្វើការរកចំណូលចិញ្ចឹមខ្លួនឯង ។ ក្រៅពីនេះ ជនភៀសសឹកមីយ៉ាន់ម៉ានឹងធ្វើការក្នុងវិស័យដែលខ្វះខាតពលករខ្លាំង ព្រមទាំងតម្រូវឱ្យជនភៀសសឹកមីយ៉ាន់ម៉ាត្រួតពិនិត្យសុខភាព និងធ្វើធានារ៉ាប់រងសុខភាពមុនពេលធ្វើការ ។

ការទទួលយកជនភៀសសឹកធ្វើការនៅថៃបណ្តោះអាសន្ននេះ គឺថៃមានគោលបំណងកសាងកេរ្តិ៍ឈ្មោះល្អក្នុងក្រសែភ្នែកអន្តរជាតិ ក៏ដូចជាសហការជាមួយអង្គការមនុស្សធម៌អន្តរជាតិនាថ្ងៃអនាគត តាមការស្នើសុំរបស់ក្រសួងការងារ ។

ជនភៀសសឹកមីយ៉ាន់ម៉ាបានមកជ្រកកោនក្នុងជម្រកចំនួន៩កន្លែង ស្ថិតនៅ៤ខេត្ត រួមមាន ៖ ខេត្តមេហុងស៊ន តាក កានចាណៈបុរី និងរាជបុរី នឹងត្រូវអនុញ្ញាតឱ្យរស់នៅក្នុងករណីពិសេសដើម្បីធ្វើការនៅថៃមិនលើសពី១ឆ្នាំ គិតចាប់ពីថ្ងៃអនុញ្ញាត ។ ប៉ុន្តែជនភៀសសឹកមីយ៉ាន់ម៉ាត្រូវស្នើសុំការអនុញ្ញាតធ្វើការនៅថៃ ដើម្បីមានសិទ្ធិធ្វើការក្នុងវិស័យជាច្រើន ដូចជា ៖ កម្មករ និងលក់អីវ៉ាន់ឱ្យថៅកែថៃ លើកលែងតែការងារហាមឃាត់ ។

គួរបញ្ជាក់ថា ការស្នើសុំធ្វើការលើកដំបូង គឺជនភៀសសឹកមីយ៉ាន់ម៉ានឹងពុំចាំបាច់បង់ប្រាក់សេវាថ្លៃធ្វើការឡើយដើម្បីកាត់បន្ថយការចំណាយផ្សេងៗក្នុងជីវភាពប្រចាំថ្ងៃ ។ តាមទិន្នន័យត្រឹមថ្ងៃទី១៥ ខែសីហា ឆ្នាំ២០២៥ គឺមានជនភៀសសឹកមីយ៉ាន់ម៉ាស្នាក់នៅក្នុងជម្រកបណ្តោះអាសន្នទាំង៩កន្លែង ស្មើ៧៧,៧១៨នាក់ ។

ការចាកចេញរបស់ពលករខ្មែរធ្វើឱ្យថៃប្រឈមនឹងការបាត់បង់កម្លាំងពលកម្មយ៉ាងខ្លាំងស្ទើរគ្រប់វិស័យ ជាពិសេស ខ្វះខាតកម្លាំងពលកម្មដើម្បីជំរុញសេដ្ឋកិច្ច ។ ពលករខ្មែរសុទ្ធតែមានជំនាញការងារ សមត្ថភាព និងអត់ធ្មត់ ប៉ុន្តែដោយសារស្ថានការណ៍ជម្លោះព្រំដែនរវាងកម្ពុជា-ថៃ ការបិទព្រំដែនរបស់កងទ័ពថៃ និងទទួលការរើសអើងពុំឱ្យតម្លៃ ទើបពលករខ្មែរសម្រេចចិត្តត្រឡប់មកកម្ពុជាវិញ ៕

ប្រទេសថៃ ៖ នៅថ្ងៃទី២៧ ខែសីហា ឆ្នាំ២០២៥ សារព័ត៌មានថៃរាយការណ៍ថា អតីតអ្នកនយោបាយថៃ លោក វីរៈ ស៊ុមក្វាមឃិត បានដាក់ពាក្យប្តឹងឱ្យចាប់មេបញ្ជាការយោធភូមិភាគ១ ពីបទពុំបណ្តេញពលរដ្ឋខ្មែរចាកចេញពីភូមិសាស្ត្រស្រុកអូរជ្រៅ ព្រមទាំងប្តឹងចាប់អភិបាលខេត្តស្រះកែវ ក្រោយពីផ្តល់សម្ភាសន៍និយាយការពិតថា តំបន់ដែលកងទ័ពថៃរាយបន្លាលួសជាទឹកដីរបស់កម្ពុជា ថៃគ្មានឯកសារកាន់កាប់ដីធ្លី ដែលធ្វើឱ្យពលរដ្ឋថៃខឹងសម្បារទូទាំងប្រទេស ។

កាលពីល្ងាចថ្ងៃទី២៦ ខែសីហា អតីតអ្នកនយោបាយថៃ លោក វីរៈ ស៊ុមក្វាមឃិត បានធ្វើដំណើរមកកាន់ភូមិបានណងចាន់ នៅខេត្តស្រះកែវ ក្រោយពីពលរដ្ឋខ្មែរតវ៉ាជាមួយកងទ័ពថៃឈ្លានពានទឹកដីកម្ពុជា ។ បន្ទាប់មក លោកក៏បានទៅស្ថានីយប៉ូលិសខេត្តស្រះកែវ ដើម្បីដាក់ពាក្យប្តឹងចាប់មេបញ្ជាការយោធភូមិភាគ១ ពីបទពុំបានបំពេញតួនាទីបណ្តេញពលរដ្ឋខ្មែរចេញពីតំបន់ជម្លោះ រហូតដល់ពលរដ្ឋថៃមកតវ៉ាបណ្តេញពលរដ្ឋខ្មែរដោយខ្លួនឯង ហើយមេបញ្ជាការយោធភូមិភាគ១ ថែមទាំងពុំបានប្តឹងពលរដ្ឋខ្មែរ ដែលតវ៉ាជាមួយកងទ័ពថៃ ។

លោកក៏បានប្តឹងអភិបាលខេត្តស្រះកែវផងដែរ ពីបទធ្វេសប្រហែសក្នុងការបំពេញតួនាទី និងផ្តល់សម្ភាសន៍ជាមួយសារព័ត៌មាននិយាយការពិតថា តំបន់ដែលកងទ័ពថៃរាយបន្លាលួសជាទឹកដីរបស់កម្ពុជា ថៃគ្មានឯកសារកាន់កាប់ដីធ្លី ដែលធ្វើឱ្យពលរដ្ឋថៃខឹងសម្បារទូទាំងប្រទេស ។ លោកចាត់ទុកការនិយាយការពិតរបស់អភិបាលខេត្តស្រះកែវ ធ្វើឱ្យថៃបាង់បង់ប្រយោជន៍ ។

លោក វីរៈ ស៊ុមក្វាមឃិត បញ្ជាក់ថា បានចំណាយពេលរហូតដល់១៥ឆ្នាំ ដើម្បីឱ្យពលរដ្ឋថៃទូទាំងប្រទេសព្រមទទួលស្គាល់ និងជឿថាតំបន់នេះជាទឹកដីថៃ ។ កន្លងមក លោក និងមិត្តភក្តិ៨នាក់ ត្រូវបានកម្ពុជាចាប់ដាក់ពន្ធនាគារចំនួន៣ឆ្នាំ ៦ខែ និង៣ថ្ងៃ ពីបទដើរចូលទឹកដីកម្ពុជាខុសច្បាប់ ដូច្នេះ លោកសូមឱ្យថៃការពារអធិបតេយ្យតំបន់នេះជារបស់ខ្លួន ១០០% ។

រដ្ឋាភិបាល និងកងទ័ពថៃពេលនោះ (នៅឆ្នាំ២០១០) ប្រាប់ឱ្យលោកយល់ព្រមទទួលទទួលកំហុសដើម្បីឱ្យកម្ពុជាដោះលែងពីពន្ធនាគារ ។ លោកពុំទទួលកំហុសទេដែលកម្ពុជាថា លោកល្មើសដើរចូលទឹកដីកម្ពុជា ព្រោះនេះជាទឹកដីថៃ ។ រហូតមកដល់ពេលនេះមានរយៈពេល១៥ឆ្នាំហើយ ដែលលោកប្រឹងប្រែងធ្វើឱ្យពលរដ្ឋថៃជឿថា លោកធ្វើរឿងមានប្រយោជន៍សម្រាប់ជាតិ ប៉ុន្តែថៃបណ្តោយឱ្យពលរដ្ឋខ្មែរចូលមករស់នៅតំបន់នេះ លោកត្រូវការបណ្តេញពលរដ្ឋខ្មែរទាំងអស់ចេញពីលំនៅឋានទុកឱ្យពលរដ្ឋថៃរស់នៅ ។ នេះបើតាមការលើកឡើងរបស់លោក វីរៈ ស៊ុមក្វាមឃិត ។

ថ្មីៗនេះ អភិបាលខេត្តស្រះកែវរងការរិះគន់យ៉ាងខ្លាំងពីពលរដ្ឋថៃ ក្រោយពីលោកនិយាយការពិតថា ថៃគ្មានឯកសារកាន់កាប់ដីធ្លីនៅភូមិសាស្ត្រស្រុកអូរជ្រៅ ដោយសារនេះជាទឹកដីរបស់កម្ពុជា ។ ក្រោយពលរដ្ឋរិះគន់មិនឈប់ឈរ នាយករដ្ឋមន្ត្រីស្តីទីថៃ លោក ភូមិថាំ វីឆាយ៉ាឆៃ បានសំណូមពរឱ្យពលរដ្ឋបញ្ឈប់ការរិះគន់អភិបាលខេត្តស្រះកែវ ដោយសារគ្រប់គ្នាតែងតែមានកំហុស ហើយអភិបាលខេត្តស្រះកែវក៏បានសូមទោសហើយដែរ ៕

ប្រទេសថៃ ៖ ថៃបានធ្វើជាម្ចាស់ផ្ទះកិច្ចប្រជុំកំពូលនៃមេបញ្ជាការកងទ័ពឥណ្ឌូប៉ាស៊ីហ្វិកនៅខេត្តពេជ្របុរី ដោយបានអញ្ជើញកងទ័ពមកពី២៩ប្រទេសចូលរួម ប៉ុន្តែគ្មានវត្តមានកម្ពុជា ។ ក្នុងកិច្ចប្រជុំនេះ អគ្គមេបញ្ជាការកងទ័ពរបស់ថៃបាននិយាយលាបពណ៌ និងទម្លាក់កំហុសមកលើកម្ពុជាជាច្រើនប្រាប់ទៅអន្តរជាតិ ហើយថា ថៃមានគោលជំហរជំរុញសន្តិភាព អភិវឌ្ឍន៍សេដ្ឋកិច្ច បញ្ចប់ជម្លោះក្នុងតំបន់ ពុំត្រូវការសង្គ្រាម និងមានគម្រោងសាងសង់របងនៅព្រំដែនខេត្តស្រះកែវ ដើម្បីការពារការល្មើសអធិបតេយ្យពីប្រទេសជិតខាង ។

ក្នុងកិច្ចប្រជុំកំពូលនៃមេបញ្ជាការកងទ័ពឥណ្ឌូប៉ាស៊ីហ្វិកនៅខេត្តពេជ្របុរី អគ្គមេបញ្ជាការកងទ័ពថៃ លោក សុងវីត ណុនភក្តី បាននិយាយពីបញ្ហាព្រំដែនកម្ពុជា-ថៃ និងនិយាយពីគម្រោងសាងសង់របងនៅព្រំដែនខេត្តស្រះកែវ រួមទាំងការកំណត់បន្ទាត់ព្រំដែនឱ្យច្បាស់លាស់។ នេះបើតាមការផ្សព្វផ្សាយរបស់សារព័ត៌មាន Thairath នៅថ្ងៃទី២៧ ខែសីហា ឆ្នាំ២០២៥ ។

លោក សុងវីត ណុនភក្តី បាននិយាយពីកិច្ចប្រជុំកំពូលនៃមេបញ្ជាការកងទ័ពឥណ្ឌូប៉ាស៊ីហ្វិក ដែលរៀបចំនៅខេត្តពេជ្របុរី នាថ្ងៃទី២៧ ខែសីហា គឺថៃបានធ្វើជាម្ចាស់ផ្ទះរួមជាមួយអាមេរិក ។ កិច្ចប្រជុំបានពិភាក្សាពីប្រធានបទសំខាន់ៗ និងសង្កត់ធ្ងន់លើការរឹតបន្តឹងសន្តិសុខក្នុងតំបន់, ប្រឆាំងនឹងការគំរាមកំហែងផ្សេងៗ និងជំរុញយន្តការអាស៊ានឱ្យមានប្រសិទ្ធភាពខ្ពស់ស្របពេលប្រទេសមហាអំណាចកំពុងប្រកួតប្រជែងគ្នា ហើយការប្រជុំនេះមាន២៩ប្រទេសចូលរួម ប៉ុន្តែអវត្តមានកម្ពុជា ។

លោក សុងវីត ណុនភក្តី សង្ឃឹមថា ការប្រជុំនេះនឹងឈានទៅរកសន្តិភាព និងការរីកចម្រើនសេដ្ឋកិច្ចក្នុងតំបន់ ខណៈថៃបង្ហាញពីគោលជំហរជំរុញសន្តិភាព អភិវឌ្ឍន៍សេដ្ឋកិច្ច បញ្ចប់ជម្លោះក្នុងតំបន់ ផ្លាស់ប្តូរបទពិសោធន៍កងទ័ព ប្រឆាំងបញ្ហាប្រឈមជាច្រើន រួមទាំងការគំរាមតាមអ៊ីនធើរណេត ។ ក្នុងកិច្ចប្រជុំនេះ ប្រទេសជាច្រើនបានសួរពីបញ្ហាព្រំដែនកម្ពុជា-ថៃ ហើយលោកឆ្លើយថា ទង្វើទាំងអស់របស់ថៃ គឺដើម្បីការពារអធិបតេយ្យ ផលប្រយោជន៍ និងការពារពលរដ្ឋ ហើយថៃពុំត្រូវការសង្គ្រាមទេ ។

លោកបាននិយាយបំភ្លៃប្រាប់អន្តរជាតិថា ថៃត្រូវបានប្រទេសជិតខាង (កម្ពុជា) ឈ្លានពាន និងលាក់បាំងព័ត៌មាន ហើយកងទ័ព និងពលរដ្ឋថៃ ត្រូវបានប្រទេសជិតខាងធ្វើបាប ដូចជា ៖ បង្កប់មីនថ្មីលើទឹកដីថៃ ហើយលោកបានសុំឱ្យប្រទេសនានាគាំទ្រការបោសសម្អាតមីននៅព្រំដែន ។ ប្រទេសថៃនឹងការពារអធិបតេយ្យរបស់ខ្លួន ពុំឱ្យប្រទេសណាឈ្លានពាន ឬធ្វើបាបពលរដ្ឋ ។

ថៃនឹងសាងសង់របងឱ្យរឹងមាំនៅព្រំដែនខេត្តស្រះកែវ ដើម្បីការពារការឈ្លានពានពីប្រទេសជិតខាង ពេលនេះ កងទ័ពជើងគោកកំពុងពិចារណាពីគម្រោងសាងសង់របង ។ ការសាងសង់របងរឹងមាំនៅព្រំដែនខេត្តស្រះកែវ នឹងអាចការពារពលរដ្ឋ និងការពារកុំឱ្យប្រទេសជិតខាងឈ្លានពាន ហើយលោកនឹងគាំទ្រគ្រប់ទង្វើរបស់កងទ័ពថៃ ។ នេះបើតាមការលើកឡើងរបស់លោក សុងវីត ណុនភក្តី អគ្គមេបញ្ជាការកងទ័ពថៃ ៕