ប្រទេសថៃ ៖ កងទ័ពភូមិភាគ២ថៃ បានចោទប្រកាន់កម្ពុជាបង្ហោះដ្រូនលើដែនអាកាសរបស់ខ្លួនចំនួន៩៣គ្រឿង ព្រមទាំងចោទកម្ពុជាបន្តចល័តកងទ័ព និងរថយន្តធំៗនៅតំបន់មួយចំនួនក្បែរព្រំដែន ហើយកងទ័ពថៃបានច្រានចោលព័ត៌មានរុះរើលំនៅឋានពលរដ្ឋខ្មែរនៅច្រកអានសេះ ខេត្តព្រះវិហារ ថាជាព័ត៌មានក្លែងក្លាយ ។ នេះបើតាមការផ្សព្វផ្សាយរបស់សារព័ត៌មានថៃ Matichon កាលពីថ្ងៃទី២១ ខែសីហា ឆ្នាំ២០២៥ ។

មជ្ឈមណ្ឌលប្រតិបត្តិការកងទ័ពភូមិភាគ២ថៃ បានសរុបស្ថានការណ៍ព្រំដែនកម្ពុជា-ថៃ នៅថ្ងៃទី២១ ខែសីហា ដោយចោទប្រកាន់ថា កម្ពុជាបង្ហោះដ្រូនលើដែនអាកាសខ្លួនចំនួន៩៣គ្រឿង ព្រមទាំងចោទកម្ពុជាបន្តចល័តកងទ័ព និងរថយន្តធំៗជាច្រើនគ្រឿងនៅតំបន់មួយចំនួនក្បែរព្រំដែន ។ កងទ័ពថៃបញ្ជាក់ថា បច្ចុប្បន្ន កងទ័ពប្រទេសទាំងពីរបានពង្រាយកម្លាំងតាមទីតាំងរៀងៗខ្លួន ហើយកងទ័ពថៃបានត្រៀមទប់ទល់បើមានស្ថានការណ៍បន្ទាន់កើតឡើង ។

កងទ័ពថៃបានច្រានចោលព័ត៌មានរុះរើលំនៅឋានពលរដ្ឋខ្មែរនៅច្រកអានសេះ ខេត្តព្រះវិហារ ថាជាព័ត៌មានក្លែងក្លាយ រីឯវីដេអូដែលបង្ហោះក្នុងបណ្តាញសង្គមជាវីដេអូនៅក្រៅប្រទេស ដោយសារការស្លៀកពាក់របស់កងទ័ពមានភាពខុសគ្នាពីកងទ័ពថៃ ។ កងទ័ពភូមិភាគ២ បានសំណូមពរទៅកាន់ពលរដ្ឋជឿជាក់លើព័ត៌មានពិតប្រាកដ និងតាមដានព័ត៌មានពីប្រភពច្បាស់លាស់របស់ស្ថាប័នរដ្ឋាភិបាលដែលទទួលខុសត្រូវស្ថានការណ៍ក្នុងតំបន់ផ្ទាល់ ។

ក្រៅពីនេះ កងទ័ពភូមិភាគ២ បានរាយការណ៍ពីការថែទាំពលរដ្ឋភៀសសឹករបស់ខ្លួនចំនួន៥៩១នាក់ ស្មើ៨ទីតាំង នៅខេត្តឧប៊ុនរ៉ាជថានី ។ ពលរដ្ឋភៀសសឹកបន្តស្នាក់នៅជម្រកបណ្តោះអាសន្នដោយសារពុំទាន់ទុកចិត្តស្ថានការណ៍ ហើយអាជ្ញាធរបានបញ្ជូនក្រុមការពារសន្តិសុខភូមិមើលការខុសត្រូវក្នុងតំបន់ និងលំនៅឋានពលរដ្ឋ ។

គួរបញ្ជាក់ថា កងទ័ពថៃតែងតែចោទប្រកាន់កម្ពុជាបង្ហោះដ្រូនជាបន្តបន្ទាប់លើដែនអាកាសខ្លួន និងច្រានចោលព័ត៌មានកងទ័ពថៃបង្ហោះដ្រូនមកស៊ើបការណ៍ពីកម្ពុជា ថាជាព័ត៌មានក្លែងក្លាយ ។ ថៃគួរតែប្រាប់ពីប្រភពដ្រូនឱ្យបានច្បាស់លាស់ តើបង្ហោះចេញពីទីតាំងណាឱ្យពិតប្រាកដ និងឈប់ចោទប្រកាន់កម្ពុជាគ្មានមូលដ្ឋានច្បាស់លាស់បែបនេះ ពីព្រោះកម្ពុជាគោរពតាមកិច្ចព្រមព្រៀងបទឈប់បាញ់ កម្ពុជាចង់បានសន្តិភាព ពុំចង់មានសង្គ្រាមទេ ៕

ក្រោយផ្សាយព័ត៌មានតែការពិត និងលាតត្រដាងពីទង្វើខ្មៅងងឹតរបស់ថៃទៅកាន់ពិភពលោក លោក Gary Franchi ប្រធានឆ្លើយឆ្លងព័ត៌មានប្រចាំនៅសេតវិមាន បានលើកឡើងថា៖ ពេលនេះលោក និង លោក Michael B Alfaro ទីប្រឹក្សាលោក Donald Trump ដែលបានចុះមកកម្ពុជានោះ ត្រូវបានថៃដាក់ក្នុងបញ្ជីខ្មៅហើយ ព្រោះពួកលោកបានផ្សាយពីព័ត៌មានពិតនៅតំបន់ព្រំដែនកម្ពុជា-ថៃ។

បើតាមការបង្ហោះនៅលើបណ្ដាញសង្គមហ្វេសប៊ុក កាលពីថ្ងៃទី២០ ខែសីហា ឆ្នាំ២០២៥ លោក Gary Franchi បានឲ្យដឹងថា ថៃដាក់ឈ្មោះពួកយើងក្នុងបញ្ជីខ្មៅ ក្រុមជ្រុលនិយមថៃជាច្រើនថែមទាំងបានវា.យប្រហារយើង ហើយកងទ័ពថៃ និងអ្នកសារព័ត៌មានឆ្វេងនិយមថៃ បានព្យាយាមលាបពណ៌យើង ដោយហៅលោក Michael ថាជា “អ្នកបញ្ចុះបញ្ចូល ឬជាអ្នកយកព័ត៌មានសុីឈ្នួលដែលកម្ពុជាជួល” ព្រមទាំងចោ.ទខ្ញុំថា “គ្រាន់តែជា YouTuber ម្នាក់តែប៉ុណ្ណោះ”។

ជាមួយគ្នានេះ លោក Gary បានគូសបញ្ជាក់ថា៖ ថៃអាចដាក់យើងក្នុងបញ្ជីខ្មៅ អាចលាបពណ៌យើងបាន ប៉ុន្តែពួកគេមិនអាចគេចពីការពិត ឬលុបចោលនូវអ្វីដែលបានកើតឡើងរួចហើយនោះទេ។ ការលើកឡើងនេះ លោក Gary ចង់សំដៅដល់កិច្ចចរចាសន្តិភាពរវាងកម្ពុជានិងថៃ ដែលមានការចូលរួមផ្ដួចផ្ដើមដោយលោក Donald Trump គឺថៃមិនអាចបំពានវាបានទេ។

ប្រធានឆ្លើយឆ្លងព័ត៌មានសេតវិមានរូបនេះបានឲ្យដឹងដែរថា៖ នៅពេលថៃបរាជ័យក្នុងការលាបពណ៌ពួកលោក ពួកគេបានដាក់លោក និង Michael TOក្នុងបញ្ជីខ្មៅទាំងស្រុង ដែលជាការប៉ុនប៉ងក្នុងការបំបិទសំឡេងរបស់ពួកលោក។ លោកបន្តថា៖ ប៉ុន្តែផ្ទុយទៅវិញ សកម្មភាពនេះបានលាតត្រដាងពីការភ័យខ្លាចរបស់ពួកគេទៅវិញទេ ព្រោះការពិតបានទៅដល់សេតវិមានរួចហើយ។

គួរបញ្ជាក់ថា លោក Gary Franchi និង លោក Michael B Alfaro ដែលសុទ្ធតែជាបុគ្គលមានឥទ្ធពលក្នុងការបញ្ចេញសំឡេង តែងជួយផ្សព្វផ្សាយពីការពិតទាក់ទងនឹងស្ថានការណ៍ជាក់ស្ដែងរវាងកម្ពុជា-ថៃប្រាប់ទៅកាន់ពិភពលោក។

សកម្មភាពរបស់ពួកលោកដែលតែងតែធ្វើបែបនេះ ទទួលបានការមិនពេញចិត្តយ៉ាងខ្លាំងពីសំណាក់រដ្ឋាភិបាល សារព័ត៌មាន និងពលរដ្ឋថៃ ជាហេតុនាំឲ្យពួកគេក្ដៅក្រហាយ បង្កើតសាច់រឿងមិនពិត ចោ.ទប្រកាន់និងលាបពណ៌ថា ពួកលោកទាំង២គ្មានតួនាទីធំដុំ និងមិនគួរឲ្យទុកចិត្តនោះទេ ប៉ុន្តែពិភពលោកមិនឆោតល្ងង់ដូចថៃយល់ឃើញឡើយ ហើយខណៈនេះអន្តរជាតិជាច្រើនចាប់ផ្ដើមដឹងពីអត្តចរិតពិតប្រាកដរបស់ប្រទេសថៃហើយ៕

(ភ្នំពេញ)៖ អតីតបេក្ខភាពឯកអគ្គរដ្ឋទូតអាមេរិកប្រចាំប្រទេសថៃកាលឆ្នាំ២០១៧ បានដាក់លិខិតមួយច្បាប់ទៅកាន់ប្រធានាធិបតីអាមេរិក លោក Donald Trump ដើម្បីស្នើសុំការអន្តរាគមន៍ឲ្យមានការដោះលែងទាហានកម្ពុជាចំនួន ១៨នាក់ ដែលថៃបានចាប់ទៅប្រគល់មកកម្ពុជាវិញ។ លោកបានលើកឡើងថា ទង្វើរបស់ថៃបានជំរុញឲ្យតម្លៃនៃបទឈប់បា.ញ់ដែលលោក Trump ខំផ្ដួចផ្ដើមបានធ្លាក់ចុះ។

នៅថ្ងៃទី២១ ខែសីហា ឆ្នាំ២០២៥ លោក Leewood Phu អតីតបេក្ខភាពឯកអគ្គរដ្ឋទូតអាមេរិកប្រចាំប្រទេសថៃកាលឆ្នាំ២០១៧ បានផ្ញើលិខិតស្នើសុំការអន្តរាគមន៍ពីលោក Donald Trump ដោយមានអត្ថន័យយ៉ាងដូច្នេះថា៖ ខ្ញុំសូមស្នើឲ្យនាក់ប្រើអំណាចជាប្រធានាធិបតីសហរដ្ឋអាមេរិក ដើម្បីបញ្ជារឲ្យមានការដោះលែងចំណាប់ខ្មាំងចំនួន ១៨នាក់ត្រូវបានដោះលែង ដោយគ្មានល័ក្ខខណ្ឌ និងជាបន្ទាន់ ដើម្បីធានាបានឲ្យបទឈប់បា.ញ់ដ៏រឹងមាំពិតប្រាកដ និងសន្តិភាពដ៏យូរអង្វែងមានសម្រាប់ប្រទេសទាំងពីរ។

នៅក្នុងលិខិតនោះ លោក Leewood ក៏បានសរសេដែរថា៖ ប្រទេសថៃបានល្មើសនឹងកិច្ចចរចាសន្តិភាព ដោយគ្រាន់តែបទឈប់បា.ញ់បានចូលជាធរមានត្រឹមតែមួយយប់ប៉ុណ្ណោះ នៅថ្ងៃបន្ទាប់ យោធាថៃបានចាប់ពង្រត់ទាហានខ្មែរចំនួន២០នាក់ ដើម្បីធ្វើជាចំណាត់ខ្មាំង។ លោកបានបន្ថែមទៀតថា ក្រោយមកថៃក៏បានដោះលែងទាហានខ្មែរចំនួន២នាក់ ជាមួយរបួសធ្ងន់ធ្ងរដែលជាភស្តុងតាងនៃការធ្វើទា.រុណ.កម្ម។

បន្ថែមពីលើលោក Leewood លោក Michael B Alfaro បានចែករំលែកពីលិខិតស្នើសុំការអន្តរាគមន៍នោះដោយសរសេថា៖ នៅអាមេរិក យើងមិនអត់ឱនចំពោះការសម្លុតគំរាមកំហែងបែបនេះទេ។ ថៃបានប្រព្រឹត្តឧក្រិដ្ឋកម្មសង្គ្រាមប្រឆាំងកម្ពុជា ដោយចាប់ទាហាន១៨នាក់ជាចំណាប់ខ្មាំង។ សកម្មភាពនេះត្រូវតែបញ្ចប់ ដល់ពេលដែលត្រូវដោះលែងទាហានទាំង១៨នាក់ហើយ។

ទន្ទឹមនឹងនេះលោក Michael បានបញ្ជាក់បន្ថែមយ៉ាងដូច្នេះថា៖ ប្រជាជនអាមេរិកជាង 50 លាននាក់ដែលគាំទ្រលោក Trump និងជាអ្នកដែលស្រឡាញ់សេរីភាព នឹងឈរជាកម្លាំងជាមួយកម្ពុជាដើម្បីសន្តិភាព។ ពួកយើងនឹងមិននៅស្ងៀមនោះទេ អាមេរិកនឹងឈរជើងជាមួយជនរងគ្រោះនៃឧក្រិដ្ឋកម្មសង្គ្រាមប្រឆាំងមនុស្សជាតិជានិច្ច៕

ហាណូយ៖ ប្រទេសវៀតណាមបើកបង្ហាញផែនការថ្មី គឺសាងសង់ស្ពានឆ្លងសមុទ្រដ៏វែងបំផុត ដែលមានចម្ងាយ ១៨ គីឡូម៉ែត្រ តភ្ជាប់ពីខេត្ត Ca Mau ទៅកោះ Hon Khoai ដែលជាច្រកដ៏រឹងមាំមួយនៅចុងភាគខាងត្បូងរបស់ប្រទេស ដែលត្រូវបានបិទជាតំបន់យោធាជាយូរមកហើយ។ នេះបើយោងតាមសារព័ត៌មានក្នុងស្រុក VnExpess ។

គម្រោងនេះចាប់ផ្ដើមបើកដំណើរការកាលពីថ្ងៃទី ១៩ ខែសីហា ឆ្នាំ ២០២៥ នឹងសាងសង់តាមស្តង់ដារអន្តរជាតិឆ្លងកាត់សមុទ្រ ដែលទំនើប និងវែងជាងគេនៅអាស៊ីអាគ្នេយ៍ ជាមួយផ្លូវទៅមកចំនួន ៤ និងមានល្បឿនចរាចរណ៍ ៨០ គីឡូម៉ែត្រក្នុងមួយម៉ោង។ ក្នុងតម្លៃប្រមាណជាង ២៥.៧ ពាន់ពាន់លានដុង (ឬ​ ១ ពាន់លានដុល្លារ) ស្ពាននេះនឹងចាប់ផ្ដើមពីផ្លូវល្បឿនលឿន Ca Mau-Dat Mui ហើយលាតសន្ធឹងឆ្លងកាត់សមុទ្រ មុនពេលបញ្ចប់នៅជម្រាលភ្នំថ្មក្រានីតនៃកោះ Hon Khoai ។ ការបញ្ចប់ត្រូវបានរំពឹងទុកថានៅចុងឆ្នាំ ២០២៨ ។

ទោះជាយ៉ាងណា មិនត្រឹមតែគម្រោង Hon Khoai ប៉ុណ្ណោះទេ កំពង់ផែទឹកជ្រៅដ៏ធំក៏កំពុងត្រូវបានសាងសង់នៅលើកោះនេះផងដែរ រាប់បញ្ចូលទាំងចំណតប្រវែង ១,១០០ ម៉ែត្រ ដែលមានសមត្ថភាពទទួលនាវារហូតដល់ ២៥០,០០០ DWT និងអាចផ្ទុកទំនិញបាន ២០ លានតោនក្នុងមួយឆ្នាំ។ ទន្ទឹមនឹងនោះ ផ្លូវល្បឿនលឿន Ca Mau-Dat Mui ប្រវែង ៨០ គីឡូម៉ែត្រ ដែលមានល្បឿនចរាចរណ៍ ១០០ គីឡូម៉ែត្រក្នុងមួយម៉ោង ក៏គ្រោងនឹងបញ្ចប់នៅឆ្នាំ ២០២៨ ផងដែរ។

នៅពេលបញ្ចប់ គម្រោងធំ ៗទាំងបីខាងលើនេះ (ស្ពាន កំពង់ផែ និងផ្លូវល្បឿនលឿន) វានឹងបង្កើតការតភ្ជាប់ដោយគ្មានថ្នេរពីព្រំដែនភាគខាងជើង រហូតដល់ភាគខាងត្បូងបំផុតនៃប្រទេសវៀតណាម។ ការអភិវឌ្ឍន៍នឹងមិនត្រឹមតែជំរុញកំណើនសេដ្ឋកិច្ចតាមរយៈពាណិជ្ជកម្ម និងទេសចរណ៍ប៉ុណ្ណោះទេ ប៉ុន្តែថែមទាំងពង្រឹងការការពារ និងសន្តិសុខ នៅក្នុងតំបន់ដែលស្ថិតនៅជិតផ្លូវដឹកជញ្ជូនអន្តរជាតិសំខាន់ៗផងដែរ។

ជាមួយប្រវែង ១៨ គីឡូម៉ែត្រ វានឹងក្លាយជាស្ពានឆ្លងសមុទ្រវែងជាងគេក្នុងប្រទេសវៀតណាម និងវែងជាងគេទីបីនៅអាស៊ីអាគ្នេយ៍ បន្ទាប់ពីស្ពាន Sultan Haji Omar Ali Saifuddien របស់ប្រទេសប្រ៊ុយណេ (៣០ គីឡូម៉ែត្រ) និងស្ពាន Sultan Abdul Halim Muadzam Shah របស់ប្រទេសម៉ាឡេស៊ី (២៤ គីឡូម៉ែត្រ)។ នេះបើយោងតាមវិទ្យាស្ថានជាតិដែក និងដែកថែបអាស៊ីអាគ្នេយ៍។

គួរបញ្ជាក់ថា Hon Khoai គឺជាកោះតូចមួយ ប៉ុន្តែមានភាពទាក់ទាញខ្លាំង ហើយមានចម្ងាយត្រឹមតែ ២៨ គីឡូម៉ែត្រប៉ុណ្ណោះពីឆ្នេរសមុទ្រ ជាមួយនឹងកំពូលភ្នំខ្ពស់បំផុតរបស់វាឡើងដល់ទៅ ៣១៨ ម៉ែត្រពីលើនីវ៉ូទឹកសមុទ្រ។ គ្របដណ្តប់លើផ្ទៃដីប្រហែល ៤ គីឡូម៉ែត្រការ៉េ កោះនេះនៅតែគ្មានមនុស្សរស់នៅឡើយ លើកលែងតែយោធាប៉ុណ្ណោះ។

លោក Pham Thanh Ngai ប្រធានគណៈកម្មាធិការប្រជាជន Ca Mau បានឲ្យដឹងថា ខេត្តនេះគឺជាខេត្តតែមួយគត់ដែលនៅជាប់សមុទ្រទាំងបីជ្រុង។ ជាពិសេស វាស្ថិតនៅក្នុងទីទាំងយុទ្ធសាស្ត្រយ៉ាងសំខាន់ សម្រាប់ផ្លូវដឹកជញ្ជូនអន្តរជាតិ។ បន្ថែមពីនេះ លោក Ngai ជឿថាវាជាបេះដូងនៃផ្លូវសមុទ្រនៅអាស៊ីអាគ្នេយ៍ ដែលនឹងក្លាយជាទីតាំងដ៏ល្អសម្រាប់កំពង់ផែទឹកជ្រៅ និងជាច្រកទ្វារសេដ្ឋកិច្ចថ្មីរបស់ប្រទេសវៀតណាមនៅព្រំដែនភាគខាងត្បូងផងដែរ៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ Matichon ឱ្យដឹងថា កាលពីថ្ងៃទី២១ ខែសីហា ឆ្នាំ២០២៥ គណបក្សភូមិចៃថៃបានចេញសេចក្កីថ្លែងការណ៍អំពាវនាវឱ្យគណបក្សនយោបាយទាំងអស់គាំទ្រការលុបចោលកិច្ចព្រមព្រៀង (MOU) ឆ្នាំ២០០០ និងឆ្នាំ២០០១ ជាមួយកម្ពុជា ដើម្បីកុំឱ្យប៉ះពាល់ដល់ព្រំដែនថៃ ។ នាថ្ងៃអនាគត ថៃនៅតែអាចចរចាទ្វេភាគីជាមួយកម្ពុជា បើទោះជាគ្មានកិច្ចព្រមព្រៀងទាំង២ច្បាប់ក្តី ។

កាលពីថ្ងៃទី២១ ខែសីហា គណបក្សភូមិចៃថៃបានចេញសេចក្តីថ្លែងការណ៍ពាក់ព័ន្ធនឹងព្រំដែនកម្ពុជា-ថៃ ដែលមានខ្លឹមសារថា ដោយសារអសន្តិសុខនៅតំបន់ព្រំដែនកម្ពុជា-ថៃ និងការប៉ះទង្គិចគ្នាកន្លងមក ធ្វើឱ្យពលរដ្ឋថៃលើកឡើងពីការលុបចោលកិច្ចព្រមព្រៀងឆ្នាំ២០០០ និងឆ្នាំ២០០០១ ជាមួយកម្ពុជាកាន់តែច្រើន ។ ភាគីថៃបានចោទប្រកាន់កម្ពុជាល្មើសកិច្ចព្រមព្រៀង MOU រហូតដល់ជាង៦០០លើក ។

ទោះជាពេលនេះ សមាជិកសភាតំណាងរាស្ត្ររបស់គណបក្សភូមិចៃថៃបានចូលរួមថែទាំពលរដ្ឋភៀសសឹកនៅជម្រកបណ្តោះអាសន្នក្នុង៤ខេត្ត រួមមាន ៖ ខេត្តបុរីរាំ សុរិន្ទ ស៊ីសាកេត និងឧប៊ុនរ៉ាជថានី ប៉ុន្តែគណបក្សភូមិចៃថៃបានតាមដានរឿងកិច្ចព្រមព្រៀងនេះរហូតមក ។ មតិយល់ស្របឱ្យលុបចោលកិច្ចព្រមទាំង២ច្បាប់ គឺបានលើកឡើងពីផលប៉ះពាល់នៅព្រំដែន ហើយចោទប្រកាន់កម្ពុជាល្មើសអធិបតេយ្យថៃ ខណៈមតិពុំយល់ស្របផ្តល់ហេតុផលថា ចាំបាច់ត្រូវរក្សាទុកកិច្ចព្រមព្រៀងនេះសម្រាប់ចរចាជាមួយកម្ពុជា ។

កិច្ចព្រមព្រៀងឆ្នាំ២០០០ គឺជាអនុស្សរណៈនៃការយោគយល់គ្នាស្តីពីការបង្កើតបង្គោលព្រំដែនគោក គឺជាតំបន់ដែលកម្ពុជា-ថៃនៅមានជម្លោះពុំទាន់ដាច់ស្រេច ។ រីឯកិច្ចព្រមព្រៀងឆ្នាំ២០០១ ពាក់ព័ន្ធនឹងការបែងចែកដែនសមុទ្រដែលសម្បូរដោយភោគទ្រព្យធម្មជាតិយ៉ាងច្រើន ជាពិសេស ឧស្ម័នធម្មជាតិ ។

គណបក្សភូមិចៃថៃយល់ថា ប្រសិនបើលុបចោលកិច្ចព្រមព្រៀងឆ្នាំ២០០០ និងឆ្នាំ២០០១ នាថ្ងៃអនាគត ក៏កម្ពុជា-ថៃនៅតែចរចាទ្វេភាគីបាន ។ ដូច្នេះ ស្ថានការណ៍បច្ចុប្បន្ន សមស្របបំផុតដែលសភាតំណាងរាស្ត្រថៃគួរពិចារណាពីការលុបចោលកិច្ចព្រមព្រៀងទាំង២ច្បាប់នេះ ។

គណបក្សភូមិចៃថៃបានដាក់សំណើបន្ទាន់មួយទៅសភាតំណាងរាស្ត្រឱ្យបង្កើតគណៈកម្មការសិក្សាពីការលុបកិច្ចព្រមព្រៀងឱ្យមានផលប៉ះពាល់តិចតួចបំផុត ។ ពេលគណៈកម្មការនេះពិចារណាពីទិន្នន័យគ្រប់ជ្រុងជ្រោយរួចហើយសម្រាប់បង្ហាញសាធារណជន ចុងក្រោយ គួរស្តាប់សំឡេងពលរដ្ឋក្នុងការធ្វើប្រជាមតិដើម្បីតម្លាភាព និងមានការទទួលស្គាល់ពីពលរដ្ឋនៅទូទាំងប្រទេស ។

ហេតុនេះ គណបក្សភូមិចៃថៃសូមអំពាវនាវឱ្យគណបក្សនយោបាយទាំងអស់គាំទ្រការលុបចោលកិច្ចព្រមព្រៀងទាំង២ច្បាប់ ដើម្បីដោះស្រាយបញ្ហាសន្តិសុខនៅព្រំដែនកម្ពុជា-ថៃ ពីព្រោះគណបក្សនយោបាយត្រូវសាមគ្គីគ្នាការពារជាតិ និងដោះស្រាយបញ្ហាជាតិ ៕

ប្រធានធិបតីប្រទេសអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskyy) បានត្រៀមខ្លួនជាស្រេច ក្នុងការជួបចរចាជាមួយលោក ពូទីន ដើម្បីបញ្ចប់សង្រ្គាម ដែលកើតឡើងតាំងពីខែកុម្ភៈ ឆ្នាំ២០២២។

មុននឹងឈានដល់កិច្ចប្រជុំនេះ រុស្សុី បានដាក់សំណើ២ទៅកាន់អ៊ុយក្រែន ដោយត្រូវបោះបង់គំនិតចង់យកឧបទ្វីបគ្រីមៀ និងគោលបំណងចូលជាសមាជិកអង្គការ NATO។ជុំវិញបញ្ហានេះ លោក វ៉ូឡូឌីមៀ ហ្សេលេនស្គី បានប្រកាសយ៉ាងដាច់អហង្ការថា៖” អ៊ុយក្រែន នឹងមិនឱ្យបាត់ទឹកដី ដើម្បីប្តូរយកសន្តិភាព ពីប្រទេសរុស្សុីដែលកំពុងឈ្លានពានខ្លួននោះទេ”។

ជំនួបរវាងលោកពូទីន និងលោក ហ្សេលេនស្គី ទំនងជាធ្វើឡើងនៅសប្តាហ៍ខាងមុខទៀត ដោយមានការធានាសន្តិសុខពីលោកដូណាល់ត្រាំ។

គួរបញ្ជាក់ថា ឧបទ្វីបគ្រីមៀ គឺជាដែនដីរបស់អ៊ុយក្រែននៅមុនឆ្នាំ ២០១៤ តែក្រោយមកត្រូវបានកាន់កាប់ដោយរុស្ស៊ីជំនួសវិញ៕