ក្រុងកូតាបារូ៖ ដោយសង្កេតឃើញពីបញ្ហាអសន្តិសុខនៅក្នុងប្រទេសថៃកើតមានញឹកញាប់ពេក រដ្ឋាភិបាលម៉ាឡេសុីបានណែនាំប្រជាជនខ្លួនឲ្យផ្អាក ឬពន្យាពេលការធ្វើដំណើរដែលមិនចាំបាច់ទៅកាន់ប្រទេសថៃជាបណ្ដោះអាសន្នសិន បន្ទាប់ពីការវា.យប្រហារដោយគ្រាប់បែកនៅខេត្តភាគខាងត្បូងរបស់ថៃចេះតែកើតមានជាបន្តបន្ទាប់។ នេះបើតាមការចុះផ្សាយរបស់សារព័ត៌មាន Malay Mail របស់ម៉ាឡេសុី។

នៅថ្ងៃទី២២ ខែសីហា ឆ្នាំ២០២៥ ប្រធានគណៈកម្មាធិការរដ្ឋទទួលបន្ទុកទេសចរណ៍ វប្បធម៌ សិល្បៈ និងបេតិកភណ្ឌ លោក Datuk Kamaruddin Md Nor មានប្រសាសន៍ថា សុវត្ថិភាពត្រូវតែជាអាទិភាពចម្បង សម្រាប់អ្នកដែលនៅតែត្រូវធ្វើដំណើរទៅកាន់ប្រទេសថៃ។

លោកថា៖ ឧប្បត្តិហេតុបំផ្ទុះគ្រាប់បែកនៅក្នុងប្រទេសថៃមិនមែនជារឿងថ្មីទេ។ ដូច្នេះខណៈពេលដែលស្ថានភាពនៅតែអាចប្រែប្រួល វាជាការល្អបំផុតសម្រាប់ប្រជាជនយើងក្នុងការពន្យារពេលផែនការធ្វើដំណើរទៅទីនោះ ជាពិសេសជាមួយនឹងរដូវកាលវិស្សមកាលខាងមុខនេះ។

លោក Datuk បន្តទៀតថា “វិធានការបង្ការនេះគឺមានសារៈសំខាន់ដើម្បីជៀសវាងឧប្បត្តិហេតុដែលអាចគំរាមកំហែងដល់សុវត្ថិភាពផ្ទាល់ខ្លួនរបស់ពលរដ្ឋ។ នៅពេលដែលបញ្ហាបែបនោះបានកើតឡើង វាគួរតែត្រូវបានគេយកជាឧទាហរណ៍ក្នុងការព្រមានមិនឱ្យទៅទីនោះ” ។

គួររំលឹកថា កាលពីថ្ងៃពុធកន្លងទៅ ប្រព័ន្ធផ្សព្វផ្សាយបានរាយការណ៍ថា កងកម្លាំងស្ម័គ្រចិត្តការពារជាតិថៃយ៉ាងហោចណាស់៤នាក់បានរងរបួស បន្ទាប់ពីរថយន្តបំផ្ទុះគ្រាប់បែ.កមួយ បានបើកមកបំផ្ទុះនៅជិតប៉ុស្តិ៍ត្រួតពិនិត្យមួយក្នុងឃុំកំពង់ខុកម៉ាហ្វឿង ស្រុកសាឡាម៉ៃ ក្រុងតាកបៃ ខេត្តណារ៉ាធីវ៉ាត់ ដែលជាឧបទ្ទវហេតុមួយបង្កឡើងដោយក្រុមបះបោរមកពីភាគខាងត្បូងរបស់ថៃ។

ក្រៅពីខេត្តភាគខាងត្បូងនេះ សូម្បីតែទីក្រុងបាងកកដែលជាទីប្រជុំជនដ៏ល្បីល្បាញ ក៏ប្រជាជនម៉ាឡេសុីជាច្រើនបានសម្ដែងក្ដីព្រួយបារម្ភ និងភាពខ្លាចរអារបស់ពួកគេ ក្នុងការទៅកម្សាន្តនៅទីនោះផងដែរ។ កត្តាព្រួយបារម្ភនេះ ពុំមែនកើតឡើងដោយសារតែសង្រ្គាម ឬហិង្សាប្រដាប់អាវុ.ធនៅតាមព្រំដែនប៉ុណ្ណោះទេ ប៉ុន្តែវាបណ្ដាលមកពីករណីវា.យធ្វើបាបភ្ញៀវទេសចរបរទេសពីសំណាក់ជនជាតិថៃបានកើតមានញឹកញាប់ពេក ជាហេតុជំរុញឲ្យពលរដ្ឋម៉ាឡេសុីជាច្រើនដែលមានគម្រោងមកលេងថៃ បានលុបចោ.លការធ្វើដំណើររបស់ពួកគេ ធ្វើឲ្យចំណូលដែលបានមកពីវិស័យទេសចរណ៍ថៃថយចុះគួរឲ្យកត់សម្គាល់៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ នៅថ្ងៃទី២២ ខែសីហា ឆ្នាំ២០២៥ ឱ្យដឹងថា នាយកដ្ឋានពាណិជ្ជកម្មអន្តរជាតិនៃក្រសួងពាណិជ្ជកម្មថៃគ្រោងអញ្ជើញឯកអគ្គរដ្ឋទូតមីយ៉ាន់ម៉ានៅប្រទេសថៃមកជជែកពីការបន្ធូរបន្ថយវិធានការបិទព្រំដែន ឬសម្រួលឱ្យរថយន្តដឹកទំនិញថៃឆ្លងដែន ។ វិធានការបិទព្រំដែនមេស៊ត-មៀវឌី នៅភូមិវាំងតាខៀនតាយ ឃុំថាសាយលួត ស្រុកមេស៊ត ខេត្តតាក ធ្វើឱ្យប៉ះពាល់ដល់ការនាំចេញទំនិញថៃទៅមីយ៉ាន់ម៉ា រថយន្តដឹកទំនិញថៃប្រមាណ៤០០គ្រឿងនៅកកស្ទះពុំអាចឆ្លងដែន ។

អគ្គនាយកនៃនាយកដ្ឋានពាណិជ្ជកម្មអន្តរជាតិក្រសួងពាណិជ្ជកម្ម អ្នកស្រី អារ៉ាដា ហ្វឿងថង បាននិយាយពីមីយ៉ាន់ម៉ាបិទព្រំដែនមេស៊ត-មៀវឌី នៅបរិវេណស្ពានមិត្តភាពមីយ៉ាន់ម៉ា-ថៃ ទី២ កាលពីថ្ងៃទី១៨ ខែសីហា ដើម្បីទប់ស្កាត់ការលួចនាំចូលទំនិញ ឬទំនិញគ្មានលិខិតអនុញ្ញាតនាំចូល (Import License) ថា នាយកដ្ឋានពាណិជ្ជកម្មអន្តរជាតិ និងនាយកដ្ឋានលើកកម្ពស់ពាណិជ្ជកម្មអន្តរជាតិ ធ្លាប់បានអញ្ជើញមន្ត្រីទូតមីយ៉ាន់ម៉ានៅថៃមកសួររឿងបិទព្រំដែនម្តងហើយកាលពីថ្ងៃទី១៩ ខែសីហា ។ ការសួរនាំមន្ត្រីទូតមីយ៉ាន់ម៉ា គឺធ្វើតាមបញ្ជារបស់លោក ចតុផល ប៊ុរុតផាត រដ្ឋមន្ត្រីក្រសួងពាណិជ្ជកម្ម ។

មន្ត្រីទូតមីយ៉ាន់ម៉ានិយាយថា តាំងពីដើមខែសីហា ឆ្នាំ២០២៥ រដ្ឋាភិបាលមីយ៉ាន់ម៉ាបានរឹតបន្តឹងការត្រួតពិនិត្យទំនិញនាំចូលខុសច្បាប់ ឬនាំចូលគ្មានលិខិតអនុញ្ញាត ពីព្រោះធ្វើឱ្យរដ្ឋាភិបាលមីយ៉ាន់ម៉ាបាត់បង់ចំណូល និងមានឱនភាពពាណិជ្ជកម្មកាន់តែខ្លាំង ។ ហេតុនេះ មីយ៉ាន់ម៉ាត្រូវបង្កើនការរឹតបន្តឹងព្រំដែនដើម្បីដោះស្រាយបញ្ហានេះ និងធ្វើឱ្យរថយន្តដឹកទំនិញថៃជាច្រើនគ្រឿង រួមទាំងរថយន្តដឹកទំនិញមកពីប្រទេសផ្សេងៗកកស្ទះនៅព្រំដែន ។

បើតាមសេចក្តីរាយការណ៍ចុងក្រោយពីការិយាល័យលើកកម្ពស់ពាណិជ្ជកម្មអន្តរជាតិនៅទីក្រុងយ៉ាំងហ្គន ប្រទេសមីយ៉ាន់ម៉ា គឺមានរថយន្តដឹកទំនិញថៃកកស្ទះនៅព្រំដែនមីយ៉ាន់ម៉ា ប្រមាណ៤០០គ្រឿង ហើយរថយន្តទាំងនេះរង់ចាំឆ្លងដែនចូលមីយ៉ាន់ម៉ា តាមខេត្តតាក ។ បន្ទាប់មក មន្ត្រីមីយ៉ាន់ម៉ាក៏ប្រកាសឱ្យរថយន្តដឹកទំនិញប្តូរគោលដៅទៅកំពង់ផែរ៉ាក់ណង ដើម្បីចូលទៅកោះសងរបស់មីយ៉ាន់ម៉ាវិញ ។

អ្នកស្រី អារ៉ាដា អគ្គនាយកនៃនាយកដ្ឋានពាណិជ្ជកម្មអន្តរជាតិក្រសួងពាណិជ្ជកម្មបន្តថា នាយកដ្ឋានពាណិជ្ជកម្មនឹងប្រញាប់រាយការណ៍ព័ត៌មានដែលទទួលបានពីការពិភាក្សាជាមួយមន្ត្រីទូតមីយ៉ាន់ម៉ាកន្លងមកប្រាប់រដ្ឋមន្ត្រីក្រសួងពាណិជ្ជកម្ម ដើម្បីអញ្ជើញឯកអគ្គរដ្ឋទូតមីយ៉ាន់ម៉ានៅថៃមកពិភាក្សាគ្នាបន្តទៀត និងចរចាឱ្យមីយ៉ាន់ម៉ាបន្ធូរបន្ថយវិធានការបិទព្រំដែន ។

តម្លៃពាណិជ្ជកម្មព្រំដែនមីយ៉ាន់ម៉ា-ថៃ រយៈពេល៦ខែ (ចាប់ពីមករា ដល់មិថុនា) ឆ្នាំ២០២៥ គឺស្មើ១០៥,១៤៩លានបាត ធ្លាក់ចុះ២៤.៩១% បើធៀបនឹងរយៈពេលដូចគ្នានៅឆ្នាំ២០២៤ ។ ថៃបាននាំចេញទំនិញទៅមីយ៉ាន់ម៉ា ស្មើ៦៣,៥៧២លានបាត ធ្លាក់ចុះ១៦.៣៦% និងនាំចូលទំនិញស្មើ៤១,៥៧៨លានបាត ធ្លាក់ចុះ៣៥.០៧% ៕

តាមការផ្សព្វផ្សាយរបស់សារព័ត៌មានថៃ Top News នៅថ្ងៃទី២២ ខែសីហា ឆ្នាំ២០២៥ ឱ្យដឹងថា អតីតអភិបាលរងក្រុងបាងកក លោក សាម៉ាត រ៉ាជឆាផុលឡាស៊ីត បានចោទប្រកាន់ពលរដ្ឋខ្មែរមិនដឹងគុណ ដោយសារចង្អុលមុខកងទ័ពថៃដែលយកបន្លាលួស និងកង់ឡានមកដាក់នៅភូមិព្រៃចាន់ ឃុំអូរ៣ជាន់ ស្រុកអូរជ្រៅ ខេត្តបន្ទាយមានជ័យ ។ លោកថែមទាំងនិយាយបំភ្លៃការពិតថា ពលរដ្ឋខ្មែរបានមករស់នៅភូមិណងចាន់របស់ថៃដើម្បីគេចពីសង្គ្រាម និងពុំត្រឡប់ទៅវិញ ។

នៅថ្ងៃទី២២ ខែសីហា លោក សាម៉ាត រ៉ាជឆាផុលឡាស៊ីត អតីតអភិបាលរងក្រុងបាងកក និងជាអតីតអនុប្រធានគណបក្សប្រាឆាធិប៉ាត់ បានសរសេរក្នុងហ្វេសប៊ុកថា ៖ «ស្រែកឆ្លងព្រំដែន ទាំងដែលកំពុងតែឈរលើទឹកដីថៃ តើអ្នកណាជាអ្នកឈ្លានពាន?» ។ ការលើកឡើងរបស់អតីតអភិបាលរងក្រុងបាងកក គឺក្រោយពីពលរដ្ឋខ្មែរប្រមូលគ្នាតវ៉ាជាមួយកងទ័ពឈ្លានពានថៃ ដែលបានយកបន្លាលួស និងកង់ឡានមកព័ទ្ធលំនៅឋានជាច្រើនខ្នង រហូតពលរដ្ឋខ្មែរពុំអាចចូលលំនៅឋានរបស់ខ្លួន ហើយកងទ័ពថៃថា នេះជាទឹកដីខ្លួន ។

លោក សាម៉ាត អតីតអភិបាលរងក្រុងបាងកក និយាយបំភ្លៃការពិតថា នេះជាទឹកដីថៃរហូតមក ដែលថៃមានព្រំដែន ផែនទី និងឯកសារច្បាស់លាស់ ។ បរិវេណដែលកងទ័ពថៃយកបន្លាលួសមកដាក់នេះជារបស់ថៃ១០០% គឺបន្លាលួសនេះសម្រាប់ការពារការលួចឆ្លងដែន និងផ្តល់សុវត្ថិភាពដល់ពលរដ្ឋថៃរស់នៅព្រំដែន ។

លោកនិយាយបំភ្លៃទៀតថា ពលរដ្ឋខ្មែរធ្លាប់មករស់នៅលើទឹកដីថៃពេលសង្គ្រាម ប៉ុន្តែពេលបញ្ចប់សង្គ្រាមពុំព្រមចាកចេញទៅវិញ បែរជាមកស្រែកដាក់កងទ័ពថៃ ។ លោកថា ពលរដ្ឋខ្មែរពុំដឹងគុណ បើទោះជាពេលវេលាកន្លងផុតទៅជាច្រើនឆ្នាំ ក៏ថៃនៅតែយកទឹកដីនៅខេត្តស្រះកែវរបស់ខ្លួនវិញ ដែលមានបង្គោលព្រំដែនលេខ៤៦ និង៤៧ តាំងពីសម័យរជ្ជកាលទី៥ ។

កាលពីសម័យខ្មែរក្រហម ពលរដ្ឋខ្មែរជាច្រើនបានជម្លៀសមករស់នៅទឹកដីថៃ ហើយថៃបានផ្តល់ជំរំសម្រាប់ជនភៀសសឹករស់នៅក្បែរព្រំដែនជាច្រើនកន្លែងកាលពីឆ្នាំ១៩៧៩ ។ ថៃបានផ្តល់អាហារ ទឹក និងថ្នាំពេទ្យដល់ពលរដ្ឋខ្មែរ ប៉ុន្តែពេលបញ្ចប់សង្គ្រាម ពលរដ្ឋខ្មែរនៅភូមិណងចាន់ បានត្រឡប់ទៅផ្ទះមួយចំនួន ខណៈមួយចំនួនទៀតរស់នៅទីនេះបន្ត។ ពលរដ្ឋខ្មែរមិនដឹងគុណ ដែលពួកគេធ្លាប់ភៀសសឹក ទទួលបានការជួយសង្គ្រោះពីថៃ និងពុំគោរពប្រវត្តិសាស្ត្រ ។ នេះជាការនិយាយបំភ្លៃការពិតរបស់អតីតអភិបាលរងក្រុងបាងកក ។

គួរបញ្ជាក់ថា ការលើកឡើងរបស់អតីតអភិបាលរងក្រុងបាងកក គឺជាការនិយាយបំភ្លៃប្រវត្តិសាស្ត្រទាំងស្រុងដើម្បីលាក់បាំងទង្វើឈ្លានពានរបស់ថៃដែលយកបន្លាលួស និងកង់ឡានមកព័ទ្ធយកលំនៅឋានពលរដ្ឋខ្មែរក្នុងភូមិព្រៃចាន់ ឃុំអូរ៣ជាន់ ស្រុកអូរជ្រៅ ខេត្តបន្ទាយមានជ័យ ។ ថៃនៅតែចិញ្ចឹមចិត្តចង់បានទឹកដីកម្ពុជាតាមរយៈការរាយបន្លាយលួសលើទឹកដីកម្ពុជាក្បែរព្រំដែនជាបន្តបន្ទាប់ ។

កាលពីថ្ងៃទី១៤ ខែសីហា ក្រុមអ្នកសង្កេតការណ៍អន្តរកាល (IOT) ចំនួន៧ប្រទេស ដឹកនាំដោយអនុព័ន្ធយោធាម៉ាឡេស៊ីប្រចាំកម្ពុជា និងមានអនុព័ន្ធយោធាប្រទេសផ្សេងទៀតដែលមាននិវេសនដ្ឋានក្នុង និងក្រៅប្រទេសកម្ពុជា បានអញ្ជើញចុះសង្កេតការណ៍នៅភូមិព្រៃចាន់ ឃុំអូរ៣ជាន់ ស្រុកអូរជ្រៅ ខេត្តបន្ទាយមានជ័យ ដែលយោធាថៃរាយលួសបន្លា នៅថ្ងៃទី១២-១៣ ខែសីហា ក្រោយបទឈប់បាញ់ និងសេចក្តីថ្លែងការណ៍រួមនៃកិច្ចប្រជុំវិសាមញ្ញនៃគណៈកម្មាធិការព្រំដែនទូទៅ កម្ពុជា-ថៃ (Extraordinary GBC Meeting) កាលពីថ្ងៃទី៧ ខែសីហា ឆ្នាំ២០២៥ នៅម៉ាឡេស៊ី ៕

ប្រទេសថៃ ៖ កងទ័ពភូមិភាគ២ថៃ បានចោទប្រកាន់កម្ពុជាបង្ហោះដ្រូនលើដែនអាកាសរបស់ខ្លួនចំនួន៩៣គ្រឿង ព្រមទាំងចោទកម្ពុជាបន្តចល័តកងទ័ព និងរថយន្តធំៗនៅតំបន់មួយចំនួនក្បែរព្រំដែន ហើយកងទ័ពថៃបានច្រានចោលព័ត៌មានរុះរើលំនៅឋានពលរដ្ឋខ្មែរនៅច្រកអានសេះ ខេត្តព្រះវិហារ ថាជាព័ត៌មានក្លែងក្លាយ ។ នេះបើតាមការផ្សព្វផ្សាយរបស់សារព័ត៌មានថៃ Matichon កាលពីថ្ងៃទី២១ ខែសីហា ឆ្នាំ២០២៥ ។

មជ្ឈមណ្ឌលប្រតិបត្តិការកងទ័ពភូមិភាគ២ថៃ បានសរុបស្ថានការណ៍ព្រំដែនកម្ពុជា-ថៃ នៅថ្ងៃទី២១ ខែសីហា ដោយចោទប្រកាន់ថា កម្ពុជាបង្ហោះដ្រូនលើដែនអាកាសខ្លួនចំនួន៩៣គ្រឿង ព្រមទាំងចោទកម្ពុជាបន្តចល័តកងទ័ព និងរថយន្តធំៗជាច្រើនគ្រឿងនៅតំបន់មួយចំនួនក្បែរព្រំដែន ។ កងទ័ពថៃបញ្ជាក់ថា បច្ចុប្បន្ន កងទ័ពប្រទេសទាំងពីរបានពង្រាយកម្លាំងតាមទីតាំងរៀងៗខ្លួន ហើយកងទ័ពថៃបានត្រៀមទប់ទល់បើមានស្ថានការណ៍បន្ទាន់កើតឡើង ។

កងទ័ពថៃបានច្រានចោលព័ត៌មានរុះរើលំនៅឋានពលរដ្ឋខ្មែរនៅច្រកអានសេះ ខេត្តព្រះវិហារ ថាជាព័ត៌មានក្លែងក្លាយ រីឯវីដេអូដែលបង្ហោះក្នុងបណ្តាញសង្គមជាវីដេអូនៅក្រៅប្រទេស ដោយសារការស្លៀកពាក់របស់កងទ័ពមានភាពខុសគ្នាពីកងទ័ពថៃ ។ កងទ័ពភូមិភាគ២ បានសំណូមពរទៅកាន់ពលរដ្ឋជឿជាក់លើព័ត៌មានពិតប្រាកដ និងតាមដានព័ត៌មានពីប្រភពច្បាស់លាស់របស់ស្ថាប័នរដ្ឋាភិបាលដែលទទួលខុសត្រូវស្ថានការណ៍ក្នុងតំបន់ផ្ទាល់ ។

ក្រៅពីនេះ កងទ័ពភូមិភាគ២ បានរាយការណ៍ពីការថែទាំពលរដ្ឋភៀសសឹករបស់ខ្លួនចំនួន៥៩១នាក់ ស្មើ៨ទីតាំង នៅខេត្តឧប៊ុនរ៉ាជថានី ។ ពលរដ្ឋភៀសសឹកបន្តស្នាក់នៅជម្រកបណ្តោះអាសន្នដោយសារពុំទាន់ទុកចិត្តស្ថានការណ៍ ហើយអាជ្ញាធរបានបញ្ជូនក្រុមការពារសន្តិសុខភូមិមើលការខុសត្រូវក្នុងតំបន់ និងលំនៅឋានពលរដ្ឋ ។

គួរបញ្ជាក់ថា កងទ័ពថៃតែងតែចោទប្រកាន់កម្ពុជាបង្ហោះដ្រូនជាបន្តបន្ទាប់លើដែនអាកាសខ្លួន និងច្រានចោលព័ត៌មានកងទ័ពថៃបង្ហោះដ្រូនមកស៊ើបការណ៍ពីកម្ពុជា ថាជាព័ត៌មានក្លែងក្លាយ ។ ថៃគួរតែប្រាប់ពីប្រភពដ្រូនឱ្យបានច្បាស់លាស់ តើបង្ហោះចេញពីទីតាំងណាឱ្យពិតប្រាកដ និងឈប់ចោទប្រកាន់កម្ពុជាគ្មានមូលដ្ឋានច្បាស់លាស់បែបនេះ ពីព្រោះកម្ពុជាគោរពតាមកិច្ចព្រមព្រៀងបទឈប់បាញ់ កម្ពុជាចង់បានសន្តិភាព ពុំចង់មានសង្គ្រាមទេ ៕

ក្រោយផ្សាយព័ត៌មានតែការពិត និងលាតត្រដាងពីទង្វើខ្មៅងងឹតរបស់ថៃទៅកាន់ពិភពលោក លោក Gary Franchi ប្រធានឆ្លើយឆ្លងព័ត៌មានប្រចាំនៅសេតវិមាន បានលើកឡើងថា៖ ពេលនេះលោក និង លោក Michael B Alfaro ទីប្រឹក្សាលោក Donald Trump ដែលបានចុះមកកម្ពុជានោះ ត្រូវបានថៃដាក់ក្នុងបញ្ជីខ្មៅហើយ ព្រោះពួកលោកបានផ្សាយពីព័ត៌មានពិតនៅតំបន់ព្រំដែនកម្ពុជា-ថៃ។

បើតាមការបង្ហោះនៅលើបណ្ដាញសង្គមហ្វេសប៊ុក កាលពីថ្ងៃទី២០ ខែសីហា ឆ្នាំ២០២៥ លោក Gary Franchi បានឲ្យដឹងថា ថៃដាក់ឈ្មោះពួកយើងក្នុងបញ្ជីខ្មៅ ក្រុមជ្រុលនិយមថៃជាច្រើនថែមទាំងបានវា.យប្រហារយើង ហើយកងទ័ពថៃ និងអ្នកសារព័ត៌មានឆ្វេងនិយមថៃ បានព្យាយាមលាបពណ៌យើង ដោយហៅលោក Michael ថាជា “អ្នកបញ្ចុះបញ្ចូល ឬជាអ្នកយកព័ត៌មានសុីឈ្នួលដែលកម្ពុជាជួល” ព្រមទាំងចោ.ទខ្ញុំថា “គ្រាន់តែជា YouTuber ម្នាក់តែប៉ុណ្ណោះ”។

ជាមួយគ្នានេះ លោក Gary បានគូសបញ្ជាក់ថា៖ ថៃអាចដាក់យើងក្នុងបញ្ជីខ្មៅ អាចលាបពណ៌យើងបាន ប៉ុន្តែពួកគេមិនអាចគេចពីការពិត ឬលុបចោលនូវអ្វីដែលបានកើតឡើងរួចហើយនោះទេ។ ការលើកឡើងនេះ លោក Gary ចង់សំដៅដល់កិច្ចចរចាសន្តិភាពរវាងកម្ពុជានិងថៃ ដែលមានការចូលរួមផ្ដួចផ្ដើមដោយលោក Donald Trump គឺថៃមិនអាចបំពានវាបានទេ។

ប្រធានឆ្លើយឆ្លងព័ត៌មានសេតវិមានរូបនេះបានឲ្យដឹងដែរថា៖ នៅពេលថៃបរាជ័យក្នុងការលាបពណ៌ពួកលោក ពួកគេបានដាក់លោក និង Michael TOក្នុងបញ្ជីខ្មៅទាំងស្រុង ដែលជាការប៉ុនប៉ងក្នុងការបំបិទសំឡេងរបស់ពួកលោក។ លោកបន្តថា៖ ប៉ុន្តែផ្ទុយទៅវិញ សកម្មភាពនេះបានលាតត្រដាងពីការភ័យខ្លាចរបស់ពួកគេទៅវិញទេ ព្រោះការពិតបានទៅដល់សេតវិមានរួចហើយ។

គួរបញ្ជាក់ថា លោក Gary Franchi និង លោក Michael B Alfaro ដែលសុទ្ធតែជាបុគ្គលមានឥទ្ធពលក្នុងការបញ្ចេញសំឡេង តែងជួយផ្សព្វផ្សាយពីការពិតទាក់ទងនឹងស្ថានការណ៍ជាក់ស្ដែងរវាងកម្ពុជា-ថៃប្រាប់ទៅកាន់ពិភពលោក។

សកម្មភាពរបស់ពួកលោកដែលតែងតែធ្វើបែបនេះ ទទួលបានការមិនពេញចិត្តយ៉ាងខ្លាំងពីសំណាក់រដ្ឋាភិបាល សារព័ត៌មាន និងពលរដ្ឋថៃ ជាហេតុនាំឲ្យពួកគេក្ដៅក្រហាយ បង្កើតសាច់រឿងមិនពិត ចោ.ទប្រកាន់និងលាបពណ៌ថា ពួកលោកទាំង២គ្មានតួនាទីធំដុំ និងមិនគួរឲ្យទុកចិត្តនោះទេ ប៉ុន្តែពិភពលោកមិនឆោតល្ងង់ដូចថៃយល់ឃើញឡើយ ហើយខណៈនេះអន្តរជាតិជាច្រើនចាប់ផ្ដើមដឹងពីអត្តចរិតពិតប្រាកដរបស់ប្រទេសថៃហើយ៕

(ភ្នំពេញ)៖ អតីតបេក្ខភាពឯកអគ្គរដ្ឋទូតអាមេរិកប្រចាំប្រទេសថៃកាលឆ្នាំ២០១៧ បានដាក់លិខិតមួយច្បាប់ទៅកាន់ប្រធានាធិបតីអាមេរិក លោក Donald Trump ដើម្បីស្នើសុំការអន្តរាគមន៍ឲ្យមានការដោះលែងទាហានកម្ពុជាចំនួន ១៨នាក់ ដែលថៃបានចាប់ទៅប្រគល់មកកម្ពុជាវិញ។ លោកបានលើកឡើងថា ទង្វើរបស់ថៃបានជំរុញឲ្យតម្លៃនៃបទឈប់បា.ញ់ដែលលោក Trump ខំផ្ដួចផ្ដើមបានធ្លាក់ចុះ។

នៅថ្ងៃទី២១ ខែសីហា ឆ្នាំ២០២៥ លោក Leewood Phu អតីតបេក្ខភាពឯកអគ្គរដ្ឋទូតអាមេរិកប្រចាំប្រទេសថៃកាលឆ្នាំ២០១៧ បានផ្ញើលិខិតស្នើសុំការអន្តរាគមន៍ពីលោក Donald Trump ដោយមានអត្ថន័យយ៉ាងដូច្នេះថា៖ ខ្ញុំសូមស្នើឲ្យនាក់ប្រើអំណាចជាប្រធានាធិបតីសហរដ្ឋអាមេរិក ដើម្បីបញ្ជារឲ្យមានការដោះលែងចំណាប់ខ្មាំងចំនួន ១៨នាក់ត្រូវបានដោះលែង ដោយគ្មានល័ក្ខខណ្ឌ និងជាបន្ទាន់ ដើម្បីធានាបានឲ្យបទឈប់បា.ញ់ដ៏រឹងមាំពិតប្រាកដ និងសន្តិភាពដ៏យូរអង្វែងមានសម្រាប់ប្រទេសទាំងពីរ។

នៅក្នុងលិខិតនោះ លោក Leewood ក៏បានសរសេដែរថា៖ ប្រទេសថៃបានល្មើសនឹងកិច្ចចរចាសន្តិភាព ដោយគ្រាន់តែបទឈប់បា.ញ់បានចូលជាធរមានត្រឹមតែមួយយប់ប៉ុណ្ណោះ នៅថ្ងៃបន្ទាប់ យោធាថៃបានចាប់ពង្រត់ទាហានខ្មែរចំនួន២០នាក់ ដើម្បីធ្វើជាចំណាត់ខ្មាំង។ លោកបានបន្ថែមទៀតថា ក្រោយមកថៃក៏បានដោះលែងទាហានខ្មែរចំនួន២នាក់ ជាមួយរបួសធ្ងន់ធ្ងរដែលជាភស្តុងតាងនៃការធ្វើទា.រុណ.កម្ម។

បន្ថែមពីលើលោក Leewood លោក Michael B Alfaro បានចែករំលែកពីលិខិតស្នើសុំការអន្តរាគមន៍នោះដោយសរសេថា៖ នៅអាមេរិក យើងមិនអត់ឱនចំពោះការសម្លុតគំរាមកំហែងបែបនេះទេ។ ថៃបានប្រព្រឹត្តឧក្រិដ្ឋកម្មសង្គ្រាមប្រឆាំងកម្ពុជា ដោយចាប់ទាហាន១៨នាក់ជាចំណាប់ខ្មាំង។ សកម្មភាពនេះត្រូវតែបញ្ចប់ ដល់ពេលដែលត្រូវដោះលែងទាហានទាំង១៨នាក់ហើយ។

ទន្ទឹមនឹងនេះលោក Michael បានបញ្ជាក់បន្ថែមយ៉ាងដូច្នេះថា៖ ប្រជាជនអាមេរិកជាង 50 លាននាក់ដែលគាំទ្រលោក Trump និងជាអ្នកដែលស្រឡាញ់សេរីភាព នឹងឈរជាកម្លាំងជាមួយកម្ពុជាដើម្បីសន្តិភាព។ ពួកយើងនឹងមិននៅស្ងៀមនោះទេ អាមេរិកនឹងឈរជើងជាមួយជនរងគ្រោះនៃឧក្រិដ្ឋកម្មសង្គ្រាមប្រឆាំងមនុស្សជាតិជានិច្ច៕