ប្រទេសថៃ ៖ មេបញ្ជាការយោធភូមិភាគ២ថៃ លោក ប៊ុនស៊ីន ផាកក្លាង បញ្ជាក់ថា សង្គ្រា.មរវាងកម្ពុជា-ថៃពុំទាន់បញ្ចប់ទេ គ្រាន់តែឈប់បា.ញ់បណ្តោះអាសន្ន ។ រីឯការសាងសង់របងនៅព្រំដែនកម្ពុជា-ថៃ អាចធ្វើទៅបានអាស្រ័យលើគោលនយោបាយរបស់រដ្ឋាភិបាលថៃ និងការឯកភាពរបស់ប្រទេសទាំងពីរ ។ នេះបើតាមការផ្សព្វផ្សាយរបស់សារព័ត៌មាន Thairath នៅថ្ងៃទី៤ ខែកញ្ញា ឆ្នាំ២០២៥ ។

នាវេលាម៉ោង៩ព្រឹក ថ្ងៃទី៤ ខែកញ្ញា មេបញ្ជាការយោធភូមិភាគ២ លោក ប៊ុនស៊ីន ផាកក្លាង បានធ្វើដំណើរទៅចូលរួមកម្មវិធីមួយឈ្មោះ «អ្នកស្ម័គ្រចិត្តវិជ្ជាជីវៈ និងពង្រឹងអធិបតេយ្យភាពប្រទេសថៃ» នៅវិទ្យាល័យ Nakhonratchasima Vocational College ដោយមានការចូលរួមពីសាស្ត្រាចារ្យ និងសិស្ស-និស្សិតមកពីស្ថាប័នអប់រំ ចំនួន២៦កន្លែង សរុបជាង៨០០នាក់ ។

ក្នុងឱកាសនេះ លោក ប៊ុនស៊ីន បាននិយាយទៅកាន់អ្នកចូលរួមកម្មវិធីថា បច្ចុប្បន្ន សង្គ្រាមរវាងកម្ពុជា-ថៃពុំទាន់បញ្ចប់ទេ គ្រាន់តែឈប់បាញ់បណ្តោះអាសន្នប៉ុណ្ណោះ ។ លោកថា ពលរដ្ឋខ្មែរហៅថៃថា «សៀម» ហើយថៃហៅពួកគេថា «ខ្មែរ» រីឯពាក្យ «សៀម» ភាសាថៃនៅភាគឦសានមានន័យថា «បន្លាមុតស្រួច» អរគុណហើយ ដែលពលរដ្ឋខ្មែរហៅថៃថា «សៀម» ដើម្បីឱ្យថៃយកបន្លាស្រួចទៅចាក់ពួកគេ តើដឹងឬអត់ថា បន្លានៅថៃមុតខ្លាំងណាស់ ។

ក្រោយបញ្ចប់កម្មវិធី លោក ប៊ុនស៊ីន ក៏បានផ្តល់សម្ភាសន៍ជាមួយសារព័ត៌មានថា ពេលនេះ លោកតែងតែទៅចូលរួមកម្មវិធីផ្សេងៗរបស់ស្ថាប័នអប់រំ ដោយសារពេលនេះ គឺជាពេលដែលកម្ពុជា-ថៃឈប់បាញ់បណ្តោះអាសន្ន និងជាដែលលោកឱ្យកងទ័ពសម្រាក ក៏ដូចជាត្រៀមខ្លួន ។ ប្រទេសទាំងពីរស្ថិតក្នុងដំណាក់កាលចរចា ទើបលោកមានពេលទំនេរមកជួបជាមួយប្អូនៗសិស្ស និស្សិត ដើម្បីឆ្លើយតបសំណួរផ្សេងៗ ។

ចំណែកការសាងសង់របងនៅព្រំដែនកម្ពុជា-ថៃ គឺអាចធ្វើទៅបានអាស្រ័យលើគោលនយោបាយរបស់រដ្ឋាភិបាលថៃ ហើយក៏ត្រូវមានការឯកភាពពីប្រទេសទាំងពីរផងដែរក្នុងការត្រួតពិនិត្យទីតាំងច្បាស់លាស់ ។

ទោះជាថៃប្រាប់ពិភពលោកថា ខ្លួនគោរពបទឈប់បាញ់ និងត្រៀមចូលរួមក្នុងកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) នាថ្ងៃទី៧-១០ ខែកញ្ញា ប៉ុន្តែទង្វើរបស់កងទ័ពថៃពុំបានគោរពបទឈប់បាញ់នោះឡើយ ។ កងទ័ពថៃនៅតែបន្តឈ្លានពានកម្ពុជា តាមរយៈការរាយបន្លាលួស និងយកសំណាញ់មកព័ទ្ធដីភូមិ បិទផ្លូវ និងលំនៅឋានរបស់ពលរដ្ឋខ្មែរ ដោយមិនគោរពកិច្ចព្រមព្រៀងក្នុងកិច្ចប្រជុំ RBC ស្ដីពីការមិនពង្រីកជម្លោះ និងមិនខ្លាចច្បាប់អន្តរជាតិ ។

កងទ័ពថៃបានចាប់ខ្លួនកងកម្លាំងកម្ពុជាដោយខុសច្បាប់ក្រោយបទឈប់បាញ់ចូលជាធរមានភ្លាមៗកាលពីថ្ងៃទី២៩ ខែកក្កដា ឆ្នាំ២០២៥ ដែលមកដល់ពេលនេះ គឺមានរយៈពេល ៣៧ថ្ងៃហើយ គិតត្រឹមថ្ងៃទី៤ ខែកញ្ញា ឆ្នាំ២០២៥ ៕

ប្រទេសថៃ ៖ លោក អនុថីន ឆាន់វីរៈគូន ប្រធានគណបក្សភូមិចៃថៃទទួលបានសំឡេងគាំទ្រពីគណបក្សប្រជាជនឱ្យកាន់តំណែងជានាយករដ្ឋមន្ត្រីថ្មីរបស់ថៃ បើទោះជាគណបក្សកាន់អំណាចភឿថៃព្យាយាមរារាំងក្តី ។ បន្ទាប់ពីគណបក្សប្រជាជនបដិសេធពុំគាំទ្រលោក ឆ័យក្សេម និទិស៊ិរិ បេក្ខជនរបស់គណបក្សភឿថៃ លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីពីបានដាក់ញត្តិទៅព្រះមហាក្សត្រសុំរំលាយសភា ដើម្បីរៀបចំការបោះឆ្នោតឡើងវិញប្រគល់អំណាចឱ្យពលរដ្ឋសម្រេចចិត្តជ្រើសរើសនាយករដ្ឋមន្ត្រី ប៉ុន្តែបរាជ័យ ។

នៅថ្ងៃទី៥ ខែកញ្ញា ឆ្នាំ២០២៥ សភាថៃនឹងរៀបចំការបោះឆ្នោតជាផ្លូវការជ្រើសរើសនាយករដ្ឋមន្ត្រីថ្មី ក្រោយពីការប៉ុនប៉ងរំលាយសភារបស់គណបក្សកាន់អំណាចភឿថៃបរាជ័យ ។ រីឯគណបក្សភឿថៃនៅតែពុំព្រមចុះចាញ់គណបក្សភូមិចៃថៃ ដោយនៅថ្ងៃទី៤ ខែកញ្ញានេះ គណបក្សភឿថៃសន្យារំលាយសភាភ្លាមៗ បើការបោះឆ្នោតរបស់សភានៅថ្ងៃទី៥ ខែកញ្ញា គាំទ្រលោក ឆ័យក្សេម ឱ្យកាន់តំណែងជានាយករដ្ឋមន្ត្រី ខណៈលោក អនុថីន នឹងរំលាយសភារយៈពេល៤ខែទៀត ។

គណបក្សកាន់អំណាចភឿថៃបានបង្ហោះក្នុងហ្វេសប៊ុកផេកផ្លូវការនៅថ្ងៃទី៤ ខែកញ្ញា បញ្ជាក់ពីគោលជំហររបស់គណបក្សគាំទ្រលោក ឆ័យក្សេម ធ្វើជានាយករដ្ឋមន្ត្រីថ្មី ។ គណបក្សភឿថៃប្រកាសថា បើលោក ឆ័យក្សេម ទទួលបានការគាំទ្រ គឺបន្ទាប់ពីសេចក្តីថ្លែងការណ៍គោលនយោបាយទៅសភា គណបក្សនឹងរំលាយសភាភ្លាមដើម្បីប្រគល់អំណាចឱ្យពលរដ្ឋ ។

នៅថ្ងៃដដែល លោក សូរ៉ាវង្ស ថៀនថង លេខាធិការគណបក្សភឿថៃបានបង្ហោះក្នុងហ្វេសប៊ុករបស់ខ្លួនថា នេះជាសំណើចុងក្រោយរបស់គណបក្សភឿថៃឱ្យសភាបោះឆ្នោតគាំទ្រលោក ឆ័យក្សេម ជានាយករដ្ឋមន្ត្រី ហើយគណបក្សភឿថៃនឹងរំលាយសភាភ្លាមក្រោយធ្វើសេចក្តីថ្លែងការណ៍គោលនយោបាយទៅសភា ។

ចំណែកលោកស្រី ផេថងថាន ស៊ីណាវ៉ាត់ អតីតនាយករដ្ឋមន្ត្រី និងជាប្រធានគណបក្សភឿថៃ ក៏បានគាំទ្រគោលជំហររបស់គណបក្សភឿថៃដែរ ដែលជំរុញឱ្យលោក ឆ័យក្សេម កាន់តំណែងនាយករដ្ឋមន្ត្រីថ្មី ។ លោកស្រីនិយាយថា ការរំលាយសភាភ្លាមៗ គឺជាការប្រគល់អំណាចឱ្យពលរដ្ឋជ្រើសរើសនាយករដ្ឋមន្ត្រីតាមរយៈការបោះឆ្នោត ។

ដូចគ្នានេះ លោក ជិរ៉ាយុ ហួងសាប់ អ្នកនាំពាក្យរដ្ឋាភិបាលនិយាយថា គណបក្សភឿថៃបានជំរុញឱ្យលោក ឆ័យក្សេម ធ្វើជានាយករដ្ឋមន្ត្រីថ្មី បើគណបក្សប្រជាជន (គណបក្សប្រឆាំង) មានចក្ខុវិស័យ និងគិតពីប្រទេសជាតិ គឺអាចបោះឆ្នោតគាំទ្រលោក ឆ័យក្សេម ។ បើលោក ឆ័យក្សេម ទទួលបានសំឡេងគាំទ្រច្រើន លោកនឹងប្រើប្រាស់អំណាចរំលាយសភាភ្លាម ពុំចាំបាច់រង់ចាំរហូតដល់៤ខែទេ ។

តំណែងនាយករដ្ឋមន្ត្រីថ្មីរបស់ថៃពុំទាន់ច្បាស់លាស់នៅឡើយរវាងលោក អនុថីន និងលោក ឆ័យក្សេម តើអ្នកណានឹងទទួលបានសំឡេងគាំទ្រច្រើនឈានទៅកាន់តំណែងនាយករដ្ឋមន្ត្រី? នៅថ្ងៃទី៥ ខែកញ្ញា សភាថៃនឹងបោះឆ្នោតជ្រើសរើសនាយករដ្ឋមន្ត្រី ទើបដឹងលទ្ធផលច្បាស់លាស់។ រីឯគណបក្សប្រជាជនអាចផ្លាស់ប្តូរគោលជំហរឬក៏យ៉ាងណា បន្ទាប់ពីគណបក្សកាន់អំណាចភឿថៃសន្យារំលាយសភាភ្លាមៗបែបនេះ ៕

ប្រទេសថៃ ៖ លោក ជិរ៉ាយុ ហួងសាប់ អ្នកនាំពាក្យរដ្ឋាភិបាលថៃ និងជាគណៈកម្មការមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ បានរាយការណ៍ពីស្ថានការណ៍ព្រំដែននៅ១១ទីតាំង ក្នុងខេត្តចំនួន៧ ថា ស្ថានការណ៍ទូទៅប្រក្រតី ខណៈកងទ័ពថៃបានត្រៀមកម្លាំង និងប្រុងប្រយ័ត្ន២៤ម៉ោង ។ ក្រៅពីនេះ ថៃត្រៀមចូលរួមកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) លើកទី២ នៅខេត្តកោះកុង ប្រទេសកម្ពុជា និងខេត្តត្រាត ប្រទេសថៃ ចាប់ពីថ្ងៃទី៧ ដល់ថ្ងៃទី១០ ខែកញ្ញា ។ នេះបើតាមការផ្សព្វផ្សាយរបស់សារព័ត៌មានថៃ នៅថ្ងៃទី៤ ខែកញ្ញា ឆ្នាំ២០២៥ ។

លោក ជិរ៉ាយុ ហួងសាប់ អ្នកនាំពាក្យរដ្ឋាភិបាលថៃនិយាយថា កាលពីថ្ងៃទី៣ ខែកញ្ញា គណៈកម្មការមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ បានប្រជុំផ្នែកសន្តិសុខ និងកិច្ចការបរទេស ហើយកាលពីថ្ងៃទី២ ខែកញ្ញា ថៃបាននាំក្រុមអ្នកសង្កេតការណ៍អន្តរកាល (IOT) ធ្វើដំណើរទៅខេត្តចាន់បុរី និងខេត្តត្រាត ដើម្បីពិនិត្យមើលការបំពេញការងាររបស់កងទ័ព និងបោសសម្អាតមីន ។ ការនាំក្រុមអ្នកសង្កេតការណ៍អន្តរកាលទៅពិនិត្យមើលទីតាំងនេះ គឺថៃចង់ឱ្យអន្តរជាតិមើលឃើញថា ថៃពិតជាសហការរក្សាសន្តិភាពក្នុងតំបន់ ។

ប្រទេសថៃបានត្រៀមចូលរួមកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) លើកទី២ នៅខេត្តកោះកុង ប្រទេសកម្ពុជា និងខេត្តត្រាត ប្រទេសថៃ ចាប់ពីថ្ងៃទី៧ ដល់ថ្ងៃទី១០ ខែកញ្ញា ព្រមទាំងចាត់វិធានការលើឆាកអន្តរជាតិដើម្បីរាយការណ៍ទម្លាក់កំហុសលើកម្ពុជាពីការបង្កប់មីន ប្រាប់ទៅមន្ត្រីជាន់ខ្ពស់របស់អង្គការសហប្រជាជាតិ (UN), រដ្ឋភាគីនៃអនុសញ្ញាអូតាវ៉ា និងគណៈកម្មការកាកបាទក្រហមអន្តរជាតិ ។

ក្រៅពីនេះ មជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ ក៏មានគម្រោងសាងសង់របងប្រវែង១៦គីឡូម៉ែត្រ ត្រង់ចំណុចព្រំដែនលេខ៥០-៥១ នៅភូមិបានណងចាន់ និងភូមិបានណងញ៉ាកែវ ខេត្តស្រះកែវ (ទល់មុខភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ) ដើម្បីការពារកុំឱ្យពលរដ្ឋខ្មែរតវ៉ានឹងទង្វើឈ្លានពានរបស់កងទ័ពថៃ ។

កាលពីថ្ងៃទី៣ ខែកញ្ញា អភិបាលខេត្តស្រះកែវបានចេញសេចក្តីប្រកាសឱ្យពលរដ្ឋខ្មែរ ចំនួន១៧០គ្រួសារ ចាកចេញពីព្រំដែនភូមិណងចាន់ និងភូមិបានណងញ៉ាកែវ ខេត្តស្រះកែវ (ទល់មុខភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ) និងអះអាងថា នេះជាទឹកដីរបស់ថៃ ។ ថៃចាត់ទុកថា ការតវ៉ារបស់ពលរដ្ឋខ្មែរ គឺល្មើសអធិបតេយ្យ និងច្បាប់របស់ថៃ ថែមទាំងគំរាមចាត់វិធានការពលរដ្ឋខ្មែរតាមច្បាប់ បើហ៊ានតវ៉ាជាមួយកងទ័ពឈ្លានពានថៃ ។

គិតត្រឹមថ្ងៃទី៤ ខែកញ្ញា ឆ្នាំ២០២៥ ថៃនៅតែបន្តឈ្លានពានមកលើកម្ពុជា តាមរយៈការយកបន្លាលួស និងសំណាញ់មកព័ទ្ធយកដីភូមិ បិទផ្លូវ និងលំនៅឋានរបស់ពលរដ្ឋខ្មែរ ដោយមិនគោរពកិច្ចព្រមព្រៀងក្នុងកិច្ចប្រជុំ RBC ស្ដីពីការមិនពង្រីកជម្លោះ និងមិនខ្លាចច្បាប់អន្តរជាតិ ៕

ប្រទេសថៃ ៖ កាលពីថ្ងៃទី៣ ខែកញ្ញា ឆ្នាំ២០២៥ គណបក្សប្រជាជនបានប្រកាសពីគោលជំហរគាំទ្រលោក អនុថីន ឆាន់វីរៈគូន ប្រធានគណបក្សភូមិចៃថៃ កាន់តំណែងជានាយករដ្ឋមន្ត្រីថ្មី ទី៣២ របស់ថៃ និងទាត់ចោលគណបក្សភឿថៃ ខណៈលោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទី បានដាក់ញត្តិទៅព្រះមហាក្សត្រសុំរំលាយសភា ពីព្រោះគណបក្សភឿថៃពុំទទួលបានការគាំទ្រពីគណបក្សប្រជាជនឱ្យបង្កើតរដ្ឋាភិបាល ។

លោក ភូមិថាំ នាយករដ្ឋមន្ត្រីស្តីទីបានដាក់ញត្តិទៅព្រះមហាក្សត្រសុំរំលាយសភា កាលពីថ្ងៃទី២ ខែកញ្ញា ក្រោយពីគណបក្សភឿថៃពុំទទួលបានការគាំទ្រពីគណបក្សប្រជាជន (ឬគណបក្សប្រឆាំង) ដើម្បីបង្កើតរដ្ឋាភិបាល ។ លោក ភូមិថាំ និយាយថា ចលាចលនយោបាយ បញ្ហាផ្សេងៗ និងការល្មើសអធិបតេយ្យ គឺជាកត្តាធ្វើឱ្យគណបក្សភឿថៃសម្រេចចិត្តរំលាយសភាដើម្បីឱ្យប្រទេសថៃរៀបចំការបោះឆ្នោតឡើងវិញ និងប្រគល់អំណាចឱ្យពលរដ្ឋជ្រើសរើសនាយករដ្ឋមន្ត្រីថ្មី ។

បើព្រះមហាក្សត្រថៃសម្រេចរំលាយសភាចោល មានន័យថា ប្រទេសថៃនឹងមានការបោះឆ្នោតជ្រើសរើសនាយករដ្ឋមន្ត្រីថ្មី ដោយប្រគល់អំណាចឱ្យពលរដ្ឋជាអ្នកសម្រេចចិត្ត ហើយលោក អនុថីន នឹងពុំអាចកាន់តំណែងនាយករដ្ឋមន្ត្រីថ្មីទេ ។ ការដាក់ញតិ្តសុំរំលាយសភារបស់លោក ភូមិថាំ ទទួលបានការគាំទ្រពីពលរដ្ឋដែលស្រឡាញ់គណបក្សភឿថៃ ប៉ុន្តែមន្ត្រីគណបក្សភូមិចៃថៃមិនពេញចិត្ត និងថាលោក ភូមិថាំ គ្រាន់តែជានាយករដ្ឋមន្ត្រីស្តីទី គ្មានអំណាចដាក់ញត្តិសុំរំលាយសភា ។

ការដាក់ញត្តិរំលាយសភាធ្វើឱ្យប្រទេសថៃមានភាពចលាចលនយោបាយកើតឡើង ដោយសារគណបក្សភឿថៃមើលឃើញតែប្រយោជន៍ផ្ទាល់ខ្លួន និងប្រឆាំងការបង្កើតរដ្ឋាភិបាលរបស់គណបក្សផ្សេង ។ កាលពីថ្ងៃទី៣ ខែកញ្ញា លោក ស៊ុផាឆ័យ ចៃសមុទ្រ ប្រធានក្រុមការងារផ្នែកច្បាប់របស់គណបក្សភូមិចៃថៃ បានដាក់ពាក្យប្តឹងលោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទី ពីបទបំពេញភារកិច្ចមិនត្រឹមត្រូវតាមច្បាប់ព្រហ្មទណ្ឌ ពីព្រោះនាយករដ្ឋមន្ត្រីស្តីទីគ្មានអំណាចដាក់ញត្តិទៅព្រះមហាក្សត្រសុំរំលាយសភាទេ ។

មន្ត្រីគណបក្សភូមិចៃថៃថា លោក ភូមិថាំ បានដាក់ញត្តិដោយខុសច្បាប់ ។ ផ្អែកតាមការលើកឡើងរបស់លេខាធិការការិយាល័យក្រុមប្រឹក្សារដ្ឋ លោក នីល ប្រាផាន់ គឺនាយករដ្ឋមន្ត្រីស្តីទីគ្មានអំណាចដាក់ញត្តិសុំសុំរំលាយសភាទេ ដែលនេះជាទង្វើមិនសមរម្យ និងអាចធ្វើឱ្យព្រះមហាក្សត្រខ្ញាល់ ។ ហេតុនេះ លោក ស៊ុផាឆ័យ ចៃសមុទ្រ ប្រធានក្រុមការងារផ្នែកច្បាប់របស់គណបក្សភូមិចៃថៃបានប្តឹងលោក ភូមិថាំ ពីបទបំពេញតួនាទីពុំត្រឹមត្រូវ និងសុំឱ្យមានការស៊ើបអង្កេតបន្ថែមដើម្បីចាត់វិធានការមន្ត្រីពាក់ព័ន្ធតាមច្បាប់ ។

ដូចគ្នានេះ សមាជិកសភាមកពីគណបក្សប្រជាធិបតេយ្យថ្មី និងសកម្មជននយោបាយ ក៏បានដាក់ពាក្យប្តឹងលោក ភូមិថាំ ដូចគ្នាដែរ ពីបទលោកប្រព្រឹត្តទង្វើខុសពីមាត្រា១១២ ។ ការទូលសុំព្រះមហាក្សត្ររំលាយសភាជាទង្វើពុំសមរម្យ ពីព្រោះលោក ភូមិថាំ គ្មានអំណាចតួនាទី និងចង់យកអំណាចព្រះមហាក្សត្រមកធ្វើជាឧបករណ៍នយោបាយ ។

គួរបញ្ជាក់ថា គណបក្សភឿថៃ (អាវក្រហម) បានសុំសំឡេងគាំទ្រពីគណបក្សប្រជាជនដែលជាគណបក្សប្រឆាំង ដើម្បីឱ្យបេក្ខជនគណបក្សភឿថៃ គឺលោក ឆ័យក្សេម និទិស៊ិរិ កាន់តំណែងជានាយករដ្ឋមន្ត្រីថ្មី ប៉ុន្តែត្រូវបានគណបក្សប្រជាជនបដិសេធ ហើយទៅគាំទ្រលោក អនុថីន ឆាន់វីរៈគូន ប្រធានគណបក្សភូមិចៃថៃ ឱ្យកាន់តំណែងជានាយករដ្ឋមន្ត្រីថ្មី ដោយកំណត់លក្ខខណ្ឌមួយចំនួន ៕