ប្រទេសថៃ ៖ ការសាងសង់របងនៅព្រំដែនកម្ពុជា-ថៃ ទទួលបានការគាំទ្រពីពលរដ្ឋ និងអ្នកនយោបាយថៃ ក្រោយពីអគ្គមេបញ្ជាការកងទ័ព លោក សុងវីត ណុនភក្តី និយាយនាពេលថ្មីៗនេះថា កងទ័ពនឹងពិចារណាសាងសង់របងស៊ីម៉ងត៍យ៉ាងរឹងមាំនៅព្រំដែនខេត្តស្រះកែវ ដើម្បីផ្តល់សុវត្ថិភាពដល់ពលរដ្ឋ និងទប់ស្កាត់ការល្មើសអធិបតេយ្យពីប្រទេសជិតខាង ។ ការលើកឡើងបែបនេះហាក់ដូចជាថៃព្យាយាមលុបលាងកំហុស និងប្រាប់ពិភពលោកថាខ្លួនស្អាតស្អំ ខណៈថៃបានឈ្លានពានកម្ពុជា និងពុំគោរពបទឈប់បា.ញ់ ។

នៅថ្ងៃទី២៨ ខែសីហា ឆ្នាំ២០២៥ សារព័ត៌មានថៃ The Better News រាយការណ៍ថា ប្រធានគណបក្សផ្លាំងប្រាឆារ៉ាត់ លោក ប្រាវីត វង្សសុវណ្ណ បានគាំទ្រឱ្យកងទ័ពសាងសង់របងនៅព្រំដែនកម្ពុជា-ថៃ ដែលលោកធ្លាប់ស្នើឱ្យសាងសង់របងតាំងពីពុំទាន់កាន់តំណែងជាប្រធានគណបក្សនយោបាយដើម្បីការពារអធិបតេយ្យ ។ គណបក្សផ្លាំងប្រាឆារ៉ាត់ ក៏បានស្នើអនុវត្តវិធានការបន្ទាន់ចំនួន៤ចំណុចដើម្បីដោះស្រាយបញ្ហាព្រំដែន ។

លោក ប្រាវីត វង្សសុវណ្ណ ប្រធានគណបក្សផ្លាំងប្រាឆារ៉ាត់ និងជាអតីតមេបញ្ជាការកងទ័ពជើងគោក បាននិយាយពីស្ថានការណ៍តានតឹងនៅតំបន់ព្រំដែនកម្ពុជា-ថៃ ក្រោយហេតុការណ៍ផ្ទុះមីនម្តងហើយម្តងទៀតនៅខេត្តសុរិន្ទ ដែលធ្វើឱ្យកងទ័ពថៃឈ្មោះ អឌិសន ប៉ុមក្លាង រងរបួសធ្ងន់ដោយសារជាន់មីន និងជាបុគ្គលទី៦ ដែលបានជាន់មីន ។ លោកចោទប្រកាន់ថា ពលរដ្ឋថៃរងការគំរាមកំហែងពីប្រទសជិតខាងជាញឹកញាប់ ។

គណបក្សផ្លាំងប្រាឆារ៉ាត់មានគោលជំហរច្បាស់លាស់គាំទ្រការសាងសង់របងស៊ីម៉ងត៍តាមបណ្តោយព្រំដែន ជាពិសេស នៅតំបន់ប៉ះទង្គិចគ្នា និងកន្លែងផ្ទុះមីនញឹកញាប់ ដើម្បីការពារអធិបតេយ្យ និងផ្តល់សន្តិសុខដល់ពលរដ្ឋ ។ គំនិតសាងសង់របងព្រំដែនពុំមែនជារឿងថ្មីទេ លោកមានគំនិតសាងសង់របងព្រំដែនតាំងពីកាន់តំណែងជាមេបញ្ជាការកងទ័ព ហើយលោកនៅតែប្រកាន់គំនិតនេះរហូតដល់បច្ចុប្បន្ន ។

លោកថា ទឹកដីថៃទាំងអស់ត្រូវតែទទួលបានការការពារឱ្យខ្លាំងបំផុត ពលរដ្ឋនៅព្រំដែនត្រូវរស់នៅយ៉ាងមានសុវត្ថិភាព ពុំរងការឈ្លានពាន ។ គណបក្សផ្លាំងប្រាឆារ៉ាត់នឹងជំរុញការសាងសង់របងព្រំដែនដើម្បីការពារអធិបតេយ្យយូរអង្វែង ។ គណបក្សបានស្នើអនុវត្តវិធានការបន្ទាន់៤ចំណុច ដើម្បីដោះស្រាយបញ្ហាព្រំដែនកម្ពុជា-ថៃ ដូចជា ៖

១-បញ្ជាក់ពីអធិបតេយ្យថៃ និងអំពាវនាវឱ្យរដ្ឋាភិបាលចាត់វិធានការការទូត និងសន្តិសុខជាបន្ទាន់
២-នាយករដ្ឋមន្ត្រី និងរដ្ឋមន្ត្រីពាក់ព័ន្ធ គួរថ្លែងទៅកាន់សភា និងពលរដ្ឋដោយផ្ទាល់ ដើម្បីកសាងទំនុកចិត្ត និងបញ្ជាក់ផែនការច្បាស់លាស់
៣-បង្កើតគណៈកម្មការពិសេសត្រួតពិនិត្យ និងតាមដានស្ថានការណ៍ព្រំដែន រួមទាំងពិនិត្យតួនាទីអ្នកនយោបាយដែលរារាំងការងារសន្តិសុខ
៤-ពន្លឿនការសាងសង់របងព្រំដែននៅតំបន់ជម្លោះដើម្បីការពារយូរអង្វែង ។

លោក ប្រាវីត ក៏បានបង្ហាញការសោកស្តាយចំពោះហេតុការណ៍ផ្ទុះមីនបណ្តាលឱ្យកងទ័ពរងរបួសធ្ងន់ ព្រមទាំងអំពាវនាវឱ្យរដ្ឋាភិបាល និងកងទ័ពប្រញាប់ចាត់វិធានការតាមច្បាប់ ក៏ដូចជាផ្តល់ប្រាក់ឧបត្ថម្ភដល់អ្នករងរបួស ពីព្រោះអធិបតេយ្យថៃត្រូវតែការពារ ។

ថ្មីៗនេះ អគ្គមេបញ្ជាការកងទ័ពថៃ លោក សុងវីត ណុនភក្តី និយាយថា កងទ័ពនឹងពិចារណាសាងសង់របងស៊ីម៉ងត៍នៅព្រំដែនខេត្តស្រះកែវ ដើម្បីការពារពលរដ្ឋ និងទប់ស្កាត់បទល្មើសពីប្រទេសជិតខាង ។ កងទ័ពភូមិភាគ១ និងភូមិភាគ២ នឹងចាប់ផ្តើមពិនិត្យការសាងសង់របងនៅភូមិណងចាន់ ខេត្តស្រះកែវ (ទល់មុខច្រកអូរបីជាន់) ដែលជាតំបន់កំពុងមានបញ្ហាជាមួយកម្ពុជា ។

បើថៃសាងសង់របងព្រំដែន ហាមដាច់ខាតសង់ល្មើសចូលទឹកដីកម្ពុជា និងមានការកំណត់បន្ទាត់ព្រំដែនឱ្យច្បាស់លាស់ដើម្បីកុំឱ្យមានបញ្ហា ពីព្រោះកម្ពុជាចង់បានតែសន្តិភាព គ្មានការបំពានពីប្រទេសជិតខាង ។ កម្ពុជាបញ្ជាក់ជាច្រើនលើកថា ពុំបានបង្កប់មីនថ្មីលើទឹកដីរបស់ថៃទេ និងអំពាវនាវកុំឱ្យកងទ័ពថៃដើរហួសបន្ទាត់ព្រំដែន ៕

អ្នកនយោបាយថៃបានបង្ហាញក្តីបារម្ភពីជម្លោះនៅព្រំដែនកម្ពុជា-ថៃអាចនឹងរីករាលដាលខ្លាំង និងអង្វរពលរដ្ឋថៃបញ្ឈប់ការញុះញង់ ក្រោយពី Influencer ឈ្មោះ កាន់ ចមផ្លាំង បានបញ្ជូនរថយន្តដឹកទឹកស្អុយលាយលាមក ចំនួន១៤គ្រឿង មកកាន់ព្រំដែននៅភូមិណងចាន់ ខេត្តស្រះកែវ ទល់មុខច្រកអូរបីជាន់ ខេត្តបន្ទាយមានជ័យ ត្រៀមបា.ញ់ទឹកស្អុយស្រោចលើពលរដ្ឋខ្មែរ ។

នៅថ្ងៃទី២៨ ខែសីហា ឆ្នាំ២០២៥ លោក កាន់ ចមផ្លាំង គឺជា Influencer ថៃដែលតាំងខ្លួនជាអ្នកស្នេហាជាតិការពារទឹកដី និងបណ្តេញពលរដ្ឋខ្មែរចេញពីប្រទេសថៃ បានបញ្ជូនរថយន្តដឹកទឹកស្អុយចំនួន១៤គ្រឿង មកកាន់ព្រំដែននៅភូមិណងចាន់ និងត្រៀមបាញ់ស្រោចលើពលរដ្ឋខ្មែរ ប៉ុន្តែត្រូវបានកងទ័ពហាមឃាត់ដើម្បីឱ្យជម្លោះកាន់តែវែងឆ្ងាយ ។ ម្យ៉ាងទៀត ការស្រោចទឹកស្អុយ ឬលាមកលើពលរដ្ឋខ្មែរបែបនេះ នឹងធ្វើឱ្យថៃអាសោចកេរ្តិ៍ឈ្មោះលើឆាកអន្តរជាតិ ដែលប្រព្រឹត្តទង្វើបាតផ្សារមកលើប្រទេសជិតខាង ។

នៅថ្ងៃដដែលនេះ អ្នកនយោបាយថៃ លោក សម្បត្តិ ប៊ុនង៉ាមអាណុង បានសរសេរក្នុងហ្វេសប៊ុករបស់ខ្លួនថា ៖ «តាមការយល់ឃើញរបស់ខ្ញុំ តំបន់ព្រំដែនកម្ពុជា-ថៃពេលនេះ គួរតែប្រកាសអនុវត្តច្បាប់អាជ្ញាសឹក ខណៈមន្ត្រីប្រទេសទាំងពីរបានចរចាគ្នាដើម្បីដោះស្រាយបញ្ហាជាបណ្តើរៗ ប៉ុន្តែនៅតំបន់វិញបែរជាមានការញុះញង់ ជាពិសេស នៅខេត្តស្រះកែវ» ។

លោកបន្តថា ៖ «ខ្ញុំភ្ញាក់ផ្អើលណាស់ដែលមាន Influencer រស់នៅក្រៅតំបន់ចូលមកបញ្ចេញមតិឱ្យបញ្ជូនរថយន្តដឹកទឹកស្អុយបាញ់ឆ្លងព្រំដែន ។ វាជាវិធីកខ្វក់ គ្មានអនាម័យ និងធ្វើឱ្យខូចកេរ្តិ៍ឈ្មោះប្រទេសថៃក្នុងក្រសែភ្នែកអន្តរជាតិ ។ សំណួរគឺ ហេតុអ្វីកងទ័ពបណ្តោយឱ្យក្រុមញុះញង់ទាំងនេះប្រព្រឹត្តទង្វើអាក្រក់ក្នុងតំបន់?» ។

អ្នកនយោបាយរូបនេះបានប្រាប់ឱ្យពលរដ្ឋថៃ និង Influencer គិតពីការធ្វើបាបរាងកាយពលករខ្មែរនៅប្រទេសថៃកន្លងមក ហើយត្រូវបានចុះសារព័ត៌មានផ្សព្វផ្សាយ និងបង្ហោះរូបភាពចែកចាយពេញពិភពលោក ។ ហេតុនេះ ការបាញ់ទឹកស្អុយ ឬលាមកដាក់ពលរដ្ឋខ្មែរនឹងពុំមានផលល្អដល់ប្រទេសថៃទេ សូមអង្វរកុំធ្វើបែបនេះ ពីព្រោះវាធ្វើឱ្យពលរដ្ឋថៃកាន់តែមើលទៅអាក្រក់ អ្នកក្លាហានគេពុំធ្វើបែបនេះឡើយ ។

ចំណែកនាយករដ្ឋមន្ត្រីស្តីទីថៃ លោក ភូមិថាំ វីឆាយ៉ាឆៃ បាននិយាយពី Influencer បញ្ជូនរថយន្តដឹកទឹកស្អុយ និងលាមកមកកាន់ព្រំដែននៅភូមិណងចាន់ ថានេះជាគំនិតរបស់បុគ្គល សូមកុំធ្វើបែបនេះ ។ លោកនិយាយនេះ ពុំមែនកាន់ជើងកម្ពុជាទេ ប៉ុន្តែពលរដ្ឋត្រូវប្រុងប្រយ័ត្នដើម្បីឱ្យអន្តរជាតិយល់ពីថៃ ពីព្រោះលោកបារម្ភពីការប្រើប្រាស់លាមក កម្ពុជានឹងប្តឹងថៃទៅកាន់តុលាការយុត្តិធម៌អន្តរជាតិ (ICJ) ធ្វើឱ្យថៃកាន់តែមានបញ្ហាខ្លាំងឡើង ។ រដ្ឋាភិបាលថៃពុំចង់បានបែបនេះទេ វាជាគំនិតរបស់ពលរដ្ឋ ៕

បុរសអ៊ុយក្រែនដែលមានអាយុចាប់ពី ១៨ ដល់ ២២ ឆ្នាំ ឥឡូវនេះត្រូវបានអនុញ្ញាតឱ្យឆ្លងកាត់ព្រំដែនដោយសេរី ទៅកាន់ទិសណាក៏បាន ក្រោមច្បាប់អាជ្ញាសឹក។ នេះបើតាម សេចក្តីថ្លែងការណ៍មួយរបស់ លោកស្រី អ៊ុលៀ ស្វីរីដិនកូ នាយករដ្ឋមន្ត្រីអ៊ុយក្រែន កាលពីថ្ងៃទី ២៦ ខែ សីហា ឆ្នាំ ២០២៥។

ទោះជាយ៉ាងណា វាផ្ទុយពីបទបញ្ញត្តិពីមុន ដែលបានដាក់ចេញបន្ទាប់ពីការឈ្លានពានរបស់រុស្ស៊ី កាលពីខែកុម្ភៈ ឆ្នាំ ២០២២ ដែលបានហាមឃាត់បុរសអ៊ុយក្រែនអាយុចាប់ពី ១៨ ដល់ ៦០ ឆ្នាំ មិនឱ្យចាកចេញពីប្រទេស។

យោងតាមរដ្ឋាភិបាលអ៊ុយក្រែន លោកស្រី ស្វីរីដិនកូ បានសរសេរនៅលើ Telegram ថា “វិធានការនេះ អនុវត្តចំពោះពលរដ្ឋទាំងអស់ដែលស្ថិតនៅក្នុងក្រុមអាយុនេះ។ ការសម្រេចចិត្តនេះក៏ទាក់ទងទៅនឹងពលរដ្ឋដែលស្ថិតនៅក្រៅប្រទេស ដោយមានហេតុផលផ្សេងៗផងដែរ”។

លោកស្រីបន្តថា “យើងចង់ឱ្យប្រជាជនអ៊ុយក្រែនរក្សាទំនាក់ទំនងអតិបរមាជាមួយប្រទេស។ ការផ្លាស់ប្តូរនេះនឹងមានប្រសិទ្ធភាពបន្ទាប់ពីការបោះពុម្ពផ្សាយចេញជាផ្លូវការ។” នេះបើតាមសារព័ត៌មាន រ៉យទ័រ៕

ក្រុមហ៊ុន EDF Energy បានអនុវត្តការបំផ្លាញប៉មត្រជាក់ចំនួន ៨ ចោល នៅស្ថានីយ៍ថាមពល Cottam Power Station ក្នុងពេលតែមួយ បង្កើតបានកំណត់ត្រា Guinness World Record ថ្មី សម្រាប់ការកម្ទេចប៉មត្រជាក់ច្រើនបំផុតក្នុងពេលតែមួយ។

ប៉មនីមួយៗមានកំពស់ ១១៤ ម៉ែត្រ (ប្រហែល ៣៧៥ ហ្វីត) និងបានបំផ្លាញក្នុងរយៈពេលតែ ១០ វិនាទី ប៉ុណ្ណោះ ដោយប្រើសារធាតុផ្ទុះជាងកន្លះតោន។ ការកម្ទេចនេះត្រូវបានរៀបចំ និងអនុវត្តដោយក្រុមហ៊ុន Brown & Mason ដែលមានជំនាញខ្ពស់ក្នុងវិស្វកម្មការបំផ្លាញប៉មត្រជាក់។

លោក Kieran Green អ្នកគ្រប់គ្រងកម្មវិធីបិទ និងបំផ្លាញ EDF Energy បាននិយាយថា “ការកម្ទេចបង្កើតកំណត់ត្រានេះគឺជាការសម្របសម្រួលយ៉ាងសកម្មរបស់ក្រុមការងារទាំងអស់ និងបានអនុវត្តដោយ សុវត្ថិភាព។ ប៉មទាំងនេះមានអត្ថន័យសម្រាប់តំបន់ជាង ៥០ ឆ្នាំ មកហើយ ហើយវានឹងត្រូវបានចងចាំដោយមនុស្សជាច្រើន។”

ទោះជាយ៉ាងណា លោក Rachael Glaving អគ្គនាយកអភិវឌ្ឍន៍អាជីវកម្ម UK, បានថ្លែងថា “ស្ថានីយ៍នេះមានប្រវត្តិសាស្រ្តយ៉ាងសំខាន់ សម្រាប់មនុស្សក្នុងតំបន់ ហើយក្រុមហ៊ុន EDF កំពុងពិចារណាអំពី ការអភិវឌ្ឍន៍ជាថ្មី សម្រាប់ទីតាំងនេះ។”

គួររំលឹកថា Cottam Power Station បានដំណើរការចាប់តាំងពីឆ្នាំ ១៩៦៨ ដល់ ២០១៩ វាមានសមត្ថភាពផ្គត់ផ្គង់អគ្គិសនីឱ្យប្រហែល ៣.៧ លានគ្រួសារនៅចក្រភពអង់គ្លេស។ ការបំផ្លាញប៉មទាំង ៨ នេះជាជំហានសំខាន់ចុងក្រោយក្នុងដំណើរការបិទ និងសម្អាតស្ថានីយ៍ថាមពលនេះ។ យ៉ាងណាមិញ ការសម្អាតស្ថានីយ៍ទាំងស្រុងទំនងនឹងបញ្ចប់ នៅដើមឆ្នាំ ២០២៦៕

ខេត្តសុរិន្ទ៖ រស់នៅថៃតាំងពីតូច សុខៗក្មេងប្រុសអាយុ ១៣ឆ្នាំម្នាក់ ដែលមានម្តាយជាជនជាតិខ្មែរ និងឪពុកចុងជាជនជាតិថៃ ត្រូវបានប៉ូលីសខេត្តសុរិន្ទចូលទៅចាប់ខ្លួនដល់ក្នុងសាលារៀន ក្រោយទទួលបានការរាយការណ៍ពីអ្នកភូមិថា គេជាជនប្រវេសន៍ខ្មែរដែលរស់នៅក្នុងប្រទេសថៃខុសច្បាប់។ បច្ចុប្បន្នកុមាររូបនេះកំពុងត្រូវបានឃុំខ្លួនក្នុងបន្ទប់ឃុំឃាំង ដើម្បីរង់ចាំការនិរទេសមកកម្ពុជា។

យោងតាមការចុះផ្សាយរបស់ Khaosod នៅថ្ងៃទី២៨ ខែសីហា ឆ្នាំ២០២៥ បានឲ្យដឹងថា ប៉ូលិសអន្តោប្រវេសន៍បានចាប់ខ្លួនក្មេងប្រុសខ្មែរអាយុ 13 ឆ្នាំម្នាក់នៅសាលារៀន ខណៈដែលសិស្សានុសិស្សកំពុងគោរពទង់ជាតិ ដើម្បីត្រៀមបញ្ជូនគេមកប្រទេសកម្ពុជាវិញ។ តាមការសាកសួរបានដឹងបន្ថែមថា ក្មេងប្រុសរូបនេះ បានរស់នៅក្នុងប្រទេសថៃតាំងពីតូចមក គេអាចនិយាយភាសាថៃបានស្ទាត់ជំនាញ មិនចេះភាសាខ្មែរឡើយ និងមានកំណត់ត្រាសិក្សាដ៏ល្អជាមួយនឹងពិន្ទុ GPA 4.00។

ទោះជាយ៉ាងណា ភាពសន្ដោសប្រណី និងមនុស្សធម៌គ្មានទេសម្រាប់ប៉ូលីសអន្តោប្រវេសន៍ថៃ ជាពិសេសចំពោះជនជាតិខ្មែរដែលរស់នៅលើទឹកដីថៃ ដោយបន្តាប់ពីនោះភ្លាមៗ ពួកគេបានបញ្ជូនកុមារដែលមិនទាន់យល់ការអ្វីផងនោះទៅមន្ទីរឃុំឃាំងបណ្ដោះអាសន្ន និងត្រៀមបញ្ជូនមកកម្ពុជាវិញជាមួយជនអន្តោប្រវេសន៍ខ្មែរខុសច្បាប់10នាក់ផ្សេងទៀត។

ជាមួយនឹងបញ្ហាខាងលើនេះ លោក Pravit Rojanaphruk អតីតអ្នកកាសែតជើងចាស់ដ៏ល្បីម្នាក់បានលើកឡើងថា៖ គ្នាគ្រាន់តែជាកូនក្មេងម្នាក់ប៉ុណ្ណោះ ហេតុអ្វីបានជាធ្វើឱ្យគាត់រងទុក្ខដោយសារសង្គ្រាមដែលគ្មានអត្ថន័យ បង្កើតឡើងដោយមនុស្សធំនៅប្រទេសថៃ និងកម្ពុជាដូច្នេះ? រដ្ឋាភិបាលថៃគួរធ្វើអន្តរាគមន៍ជាបន្ទាន់ ហើយផ្តល់ការគោរពដល់គាត់ និងម្តាយគាត់ផង។

បន្ថែមពីលើនេះ សមាជិកសភាដែលមកពីគណបក្សប្រជាជនថៃ បានព្រ.មានប៉ូលីសអន្តោប្រវេសន៍ថៃថា ការបញ្ជូនកុមារនេះមកកម្ពុជាវិញ ច្បាស់ជាបំពានលើអនុសញ្ញាស្ដីពីសិទ្ធិកុមារមិនខាន។

គួរជម្រាបថា ពាក់ព័ន្ធនឹងករណីខាងលើនេះ មានមតិរបស់ពលរដ្ឋជាច្រើនបានរិះគន់ចំពោះមន្ត្រីអន្តោប្រវេសន៍ថៃដែលអនុវត្តសកម្មភាពបង្រ្កាបហួសហេតពេកទៅលើអនីតិជន ចំពោះការចូលទៅចាប់ខ្លួនដល់ក្នុងសាលារៀន និងទាំងដែលកុមាររូបនេះកំពុងពាក់ឯកសណ្ឋានកាយរឹទ្ធទៀតផង។

នេះបង្ហាញឲ្យឃើញថា ប្រទេសថៃ មិនថាតែមន្រ្តីរាជការ ឬប្រជាពលរដ្ឋធម្មតានោះទេ គឺមានចិត្តរើសអើងប្រជាជនខ្មែរខ្លាំងណាស់។ ជាក់ស្ដែងការណ៍ដែលអ្នកភូមិនាំគ្នាទៅរាយការណ៍អំពីក្មេងប្រុសខាងលើប្រាប់ទៅកាន់ប៉ូលីស ហើយប៉ូលីសក៏ចុះមកចាប់បញ្ជូនខ្លួនគេទៅឃុំខ្លួនភ្លាមៗដូច្នេះ គឺបញ្ជាក់ពីការប្រើប្រាស់ភាពគុំគួន និងកំហឹងមកធ្វើការ ជាជាងការសួរនាំឲ្យបានច្បាស់លាស់ និងរកដំណោះស្រាយឲ្យបានសមស្រប ដើម្បីឲ្យស័ក្តិសមនឹងការតាំងខ្លួនជាប្រទេសថាស្រលាញ់សន្តិភាព៕

ប្រទេសថៃ៖ គ្រោះធម្មជាតិគាបសង្កត់លើថៃកាន់តែធ្ងន់ធ្ងរ ដោយឥទ្ធិពលនៃព្យុះត្រូពិច Kajiki បានគ្របដណ្ដប់លើប្រទេសថៃកាន់តែខ្លាំងឡើង បង្កឲ្យមានទាំងភ្លៀងធ្លាក់ខ្លាំងជាប់ៗគ្នានាំមកនូវទឹកជំនន់ បាក់ដី បំផ្លិចបំផ្លាញហេដ្ឋារចនាសម្ព័ន្ធ ផ្ទះសម្បែង បណ្ដាលឲ្យមនុស្សរងរបួស បាត់បង់ជីវិត និងបាត់ខ្លួនបានកើនឡើងជាបន្តបន្ទាប់។

យោងតាមសារព័ត៌មាន Khaosod បានឲ្យដឹងថា គិតត្រឹមថ្ងៃទី28 ខែសីហា ឆ្នាំ2025 ចំនួនអ្នកស្លា.ប់ដោយសារការបាក់ដីដែលបានវាយប្រហារនៅតំបន់ Ban Pang Ung ឃុំ Mae Suek ស្រុក Mae Chaem ខេត្ត Chiang Mai បានកើនឡើងដល់ 4 នាក់ ហើយមានមនុស្សចំនួន 5 នាក់ត្រូវបានទឹកជំនន់គួចហូរទៅបាត់និងកំពុងត្រូវបានក្រុមជួយសង្រ្គោះបើកប្រតិបត្តិការស្វែងរក។

ចំណែកចំនួនអ្នករបួសបានកើនឡើងដល់ 15នាក់ ក្នុងនោះប្រុស 9នាក់ ស្រី 6នាក់ ហើយមានជនរងគ្រោះ 2នាក់ កំពុងស្ថិតក្នុងស្ថានភាពធ្ងន់ធ្ងរ ត្រូវបានបញ្ជូនទៅកាន់មន្ទីរពេទ្យបង្អែកចោមថង ដើម្បីព្យាបាល។ ការរបួសនេះ ភាគច្រើនបណ្ដាលមកពីការបាក់ដីបានកើតឡើងនៅម៉ោង 2 និង 50 នាទីព្រឹកថ្ងៃនេះ ដោយសារឥទ្ធិពលនៃព្យុះត្រូពិច Kajiki ។

ក្រៅពីបំផ្លាញផ្ទះសម្បែង ភូមិដ្ឋាន និងប៉ះពាល់ដល់ជីវិតមនុស្ស ទ្រព្យសម្បត្តិជាច្រើន រួមទាំងរថយន្តរបស់ប្រជាជនក៏ត្រូវបានកម្លាំងទឹកជំនន់ហូរនាំយកទៅបាត់ផងដែរ។ លើសពីនេះ ផ្លូវថ្នល់ជាច្រើនខ្សែក៏ត្រូវបានកាត់ផ្ដាច់ ជាហេតុធ្វើឲ្យមានការកកស្ទះដល់ការធ្វើដំណើរជាខ្លាំង។

ស្របពេលដែលគ្រោះធម្មជាតិ បានគាបសង្កត់លើប្រទេសផ្ទួនៗ មិនទាន់អាចទប់ស្កាត់បានដូច្នេះ លោក Ekawich Meepien អភិបាលខេត្ត Mae Hong Son បានបញ្ជាក់ថា កិច្ចការបន្ទាន់ដែលចាំបាច់ខ្លាំងនៅពេលនេះ គឺការស្វែងរកអ្នកបាត់ខ្លួន និងពន្លឿនការជួសជុល ឬសម្អាតផ្លូវដឹកជញ្ជូនសម្រាប់អ្នកស្រុករងគ្រោះទាំងអស់។

គួរជម្រាបថា ព្យុះដ៏កំណាចដែលកំពុងវា.យប្រហារប្រទេសជិតខាងរួមមានថៃ វៀតណាម ឡាវ និងប្រទេសមួយចំនួនតំបន់អាស៊ាននេះ មានឈ្មោះថា កាជិគី (Kajiki)។ វាជាព្យុះទី13 ក្នុងឆ្នាំ2025 ដែលបានវិវដ្ដទៅជាព្យុះសង្ឃរា នៅតែបន្តជះឥទ្ធិពលមកលើព្រះរាជាណាចក្រកម្ពុជា ដែលនឹងធ្វើឲ្យតំបន់មួយចំនួនមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់រហូតដល់ថ្ងៃទី29សីហា។ តែទោះយ៉ាងណា គន្លងផ្លូវដើររបស់ព្យុះសង្ឃរានេះ មិនមានឥទ្ធិពលខ្លាំងមកលើព្រះរាជាណាចក្រកម្ពុជានោះទេ៕