ប្រទេសថៃ ៖ កាលពីថ្ងៃទី៣១ ខែសីហា ឆ្នាំ២០២៥ សារព័ត៌មាន Thairath រាយការណ៍ថា លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីបានចុះហត្ថលេខាអនុញ្ញាតឱ្យមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃដំណើរការបន្តទៀតដើម្បីដោះស្រាយជម្លោះព្រំដែន ប្រសិនបើស្ថានការណ៍ព្រំដែនត្រឡប់មកប្រក្រតីវិញ មជ្ឈមណ្ឌលនេះត្រូវរាយការណ៍មកកាន់រដ្ឋាភិបាលឱ្យបានជ្រាបដើម្បីរដ្ឋាភិបាលបិទមជ្ឈមណ្ឌល ។

កន្លងមក រដ្ឋាភិបាលថៃបានប្រកាសបិទមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ ដើម្បីបង្ហាញថា ថៃចង់បានសន្តិភាព និងបញ្ចប់ជម្លោះព្រំដែនជាមួយកម្ពុជាឆាប់ៗ ប៉ុន្តែដោយសារកងទ័ពថៃប្រឌិតរឿងកងទ័ពជាន់មីនជាបន្តបន្ទាប់នៅតំបន់ព្រំដែន និងចោទប្រកាន់កម្ពុជាបង្កប់មីនថ្មី ទើបរដ្ឋាភិបាលថៃសម្រេចចិត្តដំណើរការមជ្ឈមណ្ឌលនេះបន្តទៀត រហូតដល់ស្ថានការណ៍ត្រឡប់មកប្រក្រតីវិញ ។

លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីបានចុះហត្ថលេខាកាលពីថ្ងៃទី៣១ ខែសីហា អនុញ្ញាតឱ្យមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃដំណើរការបន្តទៀត ដើម្បីបំពេញការងារពាក់ព័ន្ធនឹងស្ថានការណ៍ព្រំដែន និងដោះស្រាយបញ្ហាតានតឹងដែលកើតឡើងតាមបណ្តោយព្រំដែនជាមួយកម្ពុជាក្នុងនាមប្រទេសជាមិត្ត ដោយ ប្រទេសទាំងពីរនឹងស្វែងរកសន្តិភាពតាមយន្តការទ្វេភាគី គោរពគ្នាទៅវិញទៅមក ការពារអធិបតេយ្យ និងផ្សព្វផ្សាយព័ត៌មានត្រឹមត្រូវ ។ រីឯលោក ណាត់ថាផុង ណាកផានិច អនុរដ្ឋមន្ត្រីក្រសួងការពារជាតិ គឺជានាយកមជ្ឈមណ្ឌល ។

មជ្ឈមណ្ឌលនេះមានតួនាទី និងអំណាច ដូចជា ៖ តាមដាន ត្រួតពិនិត្យ វាយតម្លៃស្ថានការណ៍ព្រំដែនកម្ពុជា-ថៃ រាយការណ៍ពីលទ្ធផលអនុវត្តការងារ និងគ្រប់គ្រងស្ថានការណ៍ព្រំដែនទៅកាន់ក្រុមប្រឹក្សាសន្តិសុខជាតិ, នាយករដ្ឋមន្ត្រី ឬគណៈរដ្ឋមន្ត្រី ដើម្បីឱ្យថ្នាក់លើជ្រាប ។ មជ្ឈមណ្ឌលនឹងដោះស្រាយស្ថានការណ៍តានតឹងដែលកើតឡើងដើម្បីឱ្យស្ថានការណ៍ត្រឡប់មកប្រក្រតីវិញ ដោយកម្ពុជា-ថៃប្រកាន់យកការគោរពឯករាជ្យ និងអធិបតេយ្យទៅវិញទៅមក ហើយថៃពុំចង់ឱ្យមានការអន្តរាគមន៍ពីប្រទេសផ្សេង ឬអង្គការអន្តរជាតិ ។

នៅពេលស្ថានការណ៍ព្រំដែនកម្ពុជា-ថៃត្រឡប់មកប្រក្រតីវិញ នាយកមជ្ឈមណ្ឌល (គឺលោក ណាត់ថាផុង ណាកផានិច អនុរដ្ឋមន្ត្រីក្រសួងការពារជាតិ) ត្រូវជូនដំណឹងទៅកាន់រដ្ឋាភិបាលឱ្យបានជ្រាប ដើម្បីរដ្ឋាភិបាលបិទមជ្ឈមណ្ឌលនេះ ។

គួរបញ្ជាក់ថា លោក ភូមិថាំ វីឆាយ៉ាឆៃ បានចូលរួមប្រជុំក្រុមប្រឹក្សាសន្តិសុខជាតិ ចាប់ពីថ្ងៃទី១៣-១៤ ខែសីហា កន្លងមក ដើម្បីពិចារណាបិទមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ ដោយសារមើលឃើញស្ថានការណ៍ស្ងប់ស្ងាត់ និងមានតែការផ្សព្វផ្សាយព័ត៌មានក្លែងក្លាយប៉ុណ្ណោះនៅប្រទេសថៃ ក្នុងគោលបំណងបង្កើតភាពវឹកវរពាក់ព័ន្ធនឹងស្ថានការណ៍ព្រំដែន ។

គោលបំណងនៃការបង្កើតមជ្ឈមណ្ឌលនេះ គឺផ្សព្វផ្សាយព័ត៌មានពីជម្លោះព្រំដែនទៅកាន់ពលរដ្ឋ ដែលមជ្ឈមណ្ឌលស្ថិតក្រោមការគ្រប់គ្រងរបស់លោក ណាត់ថាផុង ណាកផានិច អនុរដ្ឋមន្ត្រីក្រសួងការពារជាតិ ។ មជ្ឈមណ្ឌលធ្វើការងារផ្តោតសំខាន់លើផលប្រយោជន៍ខ្លាំងបំផុតរបស់ពលរដ្ឋ និងប្រទេសជាតិ ៕

ប្រទេសថៃ ៖ កាលពីថ្ងៃទី៣១ ខែសីហា ឆ្នាំ២០២៥ សារព័ត៌មានថៃ The Better News បានដកស្រង់សម្តីរបស់អ្នកនាំពាក្យគណបក្សថៃសាងថៃថា ពុំទទួលយកបេក្ខជននាយករដ្ឋមន្ត្រីមកពីគណបក្សភឿថៃ ពីព្រោះគណបក្សភឿថៃអស់សិទ្ធិបង្កើតរដ្ឋាភិបាលស្របច្បាប់ ប្រទេសថៃត្រូវការនាយករដ្ឋមន្ត្រីថ្មីមកពីគណបក្សផ្សេងដើម្បីដោះស្រាយបញ្ហាសន្តិសុខ និងសេដ្ឋកិច្ច ។ រីឯអតីតសមាជិកសភាតំណាងរាស្ត្ររបស់គណបក្សកាវក្លៃ ប្រកាសពុំទទួលយកបេក្ខជនគណបក្សភឿថៃដាច់ខាត ពីព្រោះធ្លាប់ក្រឡាស់សម្តីជាមួយគណបក្សកាវក្លៃកន្លងមក ។

លោក ប៉ារិយ៉ត អាំងគូនគិទិ អ្នកនាំពាក្យគណបក្សថៃសាងថៃ បាននិយាយកាលពីថ្ងៃទី៣១ ខែសីហា អំពីតុលាការធម្មនុញ្ញដកតំណែងលោកស្រី ផេថងថាន ស៊ីណាវ៉ាត់ ជាកូនស្រីរបស់លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃ ដោយសារលោកស្រីខុសក្រមសីលធម៌រដ្ឋមន្មនុញ្ញថៃក្នុងសារសំឡេងបែកធ្លាយជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ។ នេះបង្ហាញយ៉ាងច្បាស់ថា គណបក្សភឿថៃអស់សិទ្ធិបង្កើតរដ្ឋាភិបាលដោយស្របច្បាប់ទៀតហើយ ។

អ្នកនាំពាក្យគណបក្សថៃសាងថៃបញ្ជាក់ថា សន្តិសុខជាបញ្ហាប្រឈមដ៏ធំរបស់ថៃនាពេលនេះ ហើយពេលនាយករដ្ឋមន្ត្រីមកពីគណបក្សភឿថៃធ្លាក់ពីតំណែងដោយសារអសមត្ថភាពដឹកនាំប្រទេស គឺគណបក្សភឿថៃពុំអាចបង្កើតរដ្ឋាភិបាលដឹកនាំប្រទេសឱ្យឆ្លងផុតពីវិបត្តិឡើយ ។ ប្រទេសថៃត្រូវការនាយករដ្ឋមន្ត្រីថ្មី រដ្ឋាភិបាលថ្មី ដើម្បីដោះស្រាយបញ្ហាសន្តិសុខ ស្តារសេដ្ឋកិច្ច និងជំរុញជីវភាពពលរដ្ឋ ខណៈគណបក្សថៃសាងថៃបានស្នើដំណោះស្រាយដើម្បីឱ្យថៃបន្តដំណើរឆ្ពោះទៅមុខដោយស្ថិរភាព ។

លោក ប៉ារិយ៉ត អាំងគូនគិទិ ក៏បានដាស់តឿនទៅកាន់អ្នកនយោបាយគ្រប់គណបក្សថា ត្រូវតែគិតពីផលប្រយោជន៍ជាតិ កុំគិតតែចង់បានតំណែងនាយករដ្ឋមន្ត្រីមុនការរំលាយសភា ពីព្រោះបើខ្វះភាពស្មោះត្រង់ និងពុំធ្វើអ្វីដើម្បីពលរដ្ឋ គឺពលរដ្ឋនឹងពុំអភ័យទោសឱ្យអ្នកនយោបាយទេ ។

ដូចគ្នានេះ អ្នកស្រី អាំម៉ារ៉ាត ឈូកប៉ាមីតគូន អតីតសមាជិកសភាតំណាងរាស្ត្ររបស់គណបក្សកាវក្លៃ បានសរសេរក្នុងហ្វេសប៊ុកឈ្មោះ «Amarat Chokepamitkul» ថា ពុំឯកភាពឱ្យគណបក្សភឿថៃបង្កើតរដ្ឋាភិបាល និងពុំទទួលយកបេក្ខជននាយករដ្ឋមន្ត្រីមកពីគណបក្សភឿថៃដាច់ខាត ពីព្រោះគណបក្សនេះធ្លាប់ក្រឡាស់សម្តីជាមួយគណបក្សកាវក្លៃកន្លងមក ។

អ្នកស្រីបញ្ជាក់ថា គណបក្សភឿថៃធ្លាប់បំផ្លាញកិច្ចព្រមព្រៀង MOU ជាមួយគណបក្សកាវក្លៃដោយឥតអៀនខ្មាស់ ដែលបន្សល់នូវការឈឺចាប់រហូតដល់បច្ចុប្បន្ន និងបំផ្លាញឱកាសពលរដ្ឋថៃដែលប្រើប្រាស់សិទ្ធិក្នុងការបោះឆ្នោតរំពឹងចង់ផ្លាស់ប្តូរនយោបាយ បែរជាគណបក្សភឿថៃក្បត់ឆន្ទៈពលរដ្ឋ ។ លើសពីនេះ គណបក្សភឿថៃតែងតែវាយប្រហារគណបក្សប្រជាជនជាបន្តបន្ទាប់ និងពុំចាត់ទុកគណបក្សប្រជាជនជាបងប្អូន ។

លោកស្រីបានជំរុញឱ្យគណបក្សនយោបាយផ្សេងបង្កើតរដ្ឋាភិបាល ទើបអាចដោះស្រាយជម្លោះព្រំដែនជាមួយប្រទេសជិតខាង ពីព្រោះរដ្ឋាភិបាលគណបក្សភឿថៃពុំអាចដោះស្រាយជម្លោះព្រំដែន និងកាន់តែធ្វើឱ្យស្ថានការណ៍នេះអូសបន្លាយ ។ ភឿថៃ ពុំមែនជាគណបក្សនយោបាយទេ ភឿថៃគ្រាន់តែជាក្រុមហ៊ុនប៉ុណ្ណោះ ដែលសមាជិកគ្រប់រូប គឺជាបុគ្គលិករបស់លោក ថាក់ស៊ីន ។

គួរបញ្ជាក់ថា គណបក្សភឿថៃបានសុំឱ្យគណបក្សប្រជាជន (គណបក្សប្រឆាំង) ជួយគាំទ្របេក្ខជនរបស់ខ្លួន លោក ឆ័យក្សេម និទិសិរិ ធ្វើជានាយករដ្ឋមន្ត្រីថ្មី និងសន្យាទទួលយកសំណើទាំង៣ចំណុចរបស់គណបក្សប្រជាជន ប៉ុន្តែគណបក្សប្រជាជនពុំទាន់ឆ្លើយតបយ៉ាងណាទេ ។ មានសេចក្តីរាយការណ៍ថា កាលពីថ្ងៃទី៣១ ខែសីហា លោក ថាក់ស៊ីន បានខ្នះខ្នែងជជែកជាមួយអ្នកនយោបាយផ្សេងទៀតដើម្បីសុំសំឡេងគាំទ្រគណបក្សភឿថៃបង្កើតរដ្ឋាភិបាល ៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ កាលពីថ្ងៃទី៣១ ខែសីហា ឆ្នាំ២០២៥ ឱ្យដឹងថា ខេត្តពេជ្រឆាប៊ូនរបស់ថៃកំពុងតែលិចទឹកជំនន់ធ្ងន់ធ្ងរបំផុតក្នុងរយៈពេល៥ឆ្នាំ ដោយសាររងឥទ្ធិពលខ្យល់ព្យុះត្រូនិកណងហ្វា ។ ភ្លៀងបានធ្លាក់យ៉ាងខ្លាំងជាប់ៗគ្នា និងទឹកហូរពីតំបន់ព្រៃភ្នំបណ្តាលឱ្យលិចលង់ស្រុកចំនួន៣ រួមមាន ៖ ស្រុកឡុមកៅ ស្រុកណាមណាវ និងស្រុកឡុមឡាក់ ។

ក្នុងចំណោមស្រុកទាំង៣ គឺទឹកជំនន់បានលិចស្រុកឡុមកៅ ខ្លាំងជាងគេ ក្នុងនោះឃុំចំនួន២ ដែលមានពលរដ្ឋរស់នៅជាង៥០០គ្រួសារ បានរងផលប៉ះពាល់ដោយសារទឹកជំនន់ គឺកម្រិតទឹកជំនន់ជាមធ្យម ចាប់ពី៥០សង់ទីម៉ែត្រ ទៅ៨០សង់ទីម៉ែត្រ ។ ហេតុនេះ ធ្វើឱ្យផ្ទះពលរដ្ឋជាច្រើនខ្នងលិចក្នុងទឹក ខណៈហេដ្ឋារចនាសម្ព័ន្ធសំខាន់ៗខូចខាតធ្ងន់ធ្ងរ ផ្លូវធំៗ និងស្ពាន ត្រូវបានទឹកហូរកាត់ផ្តាច់ពុំអាចឱ្យពលរដ្ឋធ្វើដំណើរឆ្លងកាត់ ។

ចៅហ្វាយស្រុកឡុមកៅ លោក ឆាន់ឆ័យផាកថាគូន បានបញ្ជាឱ្យមន្ត្រីពាក់ព័ន្ធក្នុងតំបន់ និងក្រុមសង្គ្រោះស្ម័គ្រចិត្តសហការគ្នាជួយជម្លៀសពលរដ្ឋ រួមទាំងកុមារ មនុស្សចាស់ និងអ្នកជំងឺចេញពីផ្ទះជាបន្ទាន់ ជាពិសេស ជួយពលរដ្ឋក្នុងទឹកតំបន់មានទឹកជំនន់ខ្លាំង ។

តាមសេចក្តីរាយការណ៍របស់មេឃុំតាកក្លយ លោក ផនសាក់ គុនក្រៀង គឺទឹកជំនន់បានលិចផ្ទះពលរដ្ឋរហូតដល់ជាង២០០ខ្នង ស្ថិតក្នុងភូមិចំនួន៦ បរិមាណទឹកជំនន់លើកនេះច្រើនខ្លាំងណាស់ និងហូរខ្លាំងទៀតផង ។ បើគ្មានភ្លៀងធ្លាក់ជាប់ៗគ្នាទេ ស្ថានការណ៍ទឹកជំនន់អាចធូរស្រាល លោកក៏បានផ្តាំផ្ញើទៅពលរដ្ឋឱ្យត្រៀមខ្លួនទប់ទល់ទឹកជំនន់ ។

របាយការណ៍របស់មជ្ឈមណ្ឌលបង្ការ និងកាត់បន្ថយគ្រោះមហន្តរាយខេត្តពេជ្រឆាប៊ូន គឺភ្លៀងធ្លាក់ខ្លាំងជាច្រើនថ្ងៃធ្វើឱ្យតំបន់ជាច្រើនរងផលប៉ះពាល់ ផ្ទះពលរដ្ឋខូចខាតចំនួន៥២ខ្នង ខណៈភូមិជាច្រើនត្រូវបានទឹកជំនន់ហូរកាត់ផ្តាច់ផ្លូវធ្វើដំណើរ ។ អាជ្ញាធរបានវាយតម្លៃការខូចខាតទ្រព្យសម្បត្តិផ្សេងៗដោយសារទឹកជំនន់ ប៉ុន្តែពុំមានពលរដ្ឋថៃរងរបួស ឬស្លាប់ទេ ។

អភិបាលខេត្តពេជ្រឆាប៊ូន លោក សារ៉ាន់យូ មីថងខាំ បានបញ្ជាឱ្យមន្ត្រីពាក់ព័ន្ធ រួមទាំងក្រុមសង្គ្រោះស្ម័គ្រចិត្ត ប្រមូលកម្លាំង និងប្រើប្រាស់ឧបករណ៍ជួយសង្គ្រោះពលរដ្ឋទាំងយប់ ទាំងថ្ងៃ ។ ក្រៅពីនេះ ត្រូវប្រុងប្រយ័ត្នស្ថានការណ៍ទឹកជំនន់ និងជូនដំណឹងទៅពលរដ្ឋជាបន្តបន្ទាប់ រហូតដល់ទឹកជំនន់ស្រកចុះ ៕

អាហ្វហ្គានីស្ថាន៖ គ្រោះរញ្ជួយដីដ៏មានឥទ្ធិពលកម្រិតប្រមាណ ៦.០រ៉ិចទ័រ បានវា.យប្រហារភាគខាងកើតប្រទេសអាហ្វហ្គានីស្ថាន កាលពីយប់ថ្ងៃទី៣១ ខែសីហា ឆ្នាំ២០២៥ ដោយបន្សល់ទុកនូវការបំផ្លិចបំផ្លាញនៅទូទាំងខេត្ត Nangarhar និង Kunar បណ្ដាលឲ្យមនុស្សរាប់ពាន់នាក់ត្រូវបានរងគ្រោះដល់អាយុជីវិត រងរបួស និងបាត់ខ្លួនក្រោមគំនរថ្មបាក់បែ.ក។

យោងតាមរបាយការណ៍ក្រសួងមហាផ្ទៃដែលគ្រប់គ្រងដោយតាលីបង់ មនុស្សយ៉ាងហោចណាស់ ៦២២ នាក់បានស្លា.ប់ និងជាង ១.៥០០ នាក់បានរងរបួស ចំណែកអ្នកនៅរស់រានមានជីវិតខ្លះបានរៀបរាប់ទាំងភ័យរន្ធត់ថា មានសមាជិកគ្រួសារ រួមទាំងក្មេងៗបានកប់ជាប់នៅក្រោមគំនរបាក់បែក។ លើសពីនេះ ការរអិលបាក់ដីតាមជម្រាលភ្នំក៏បានបិទផ្លូវ ដែលធ្វើឲ្យក្រុមអ្នកជួយសង្គ្រោះពិបាកក្នុងការទៅដល់តំបន់ដែលរងគ្រោះខ្លាំងបំផុត។ កត្តានេះ បានជំរុញអ្នកស្រុកជាច្រើនត្រូវបានបង្ខំចិត្តជីកកាយរកមនុស្សជាទីស្រលាញ់របស់ពួកគេដោយខ្លួនឯង។

ក្រុមសង្គ្រោះបន្ទាន់ ដែលគាំទ្រដោយឧទ្ធម្ភាគចក្រ និងអឌ្ឍចន្ទក្រហមអាហ្វហ្គានីស្ថាន បានចាប់ផ្តើមបញ្ជូនអ្នករបួសទៅកាន់មន្ទីរពេទ្យដែលចង្អៀត។ ជាមួយគ្នានេះ ការអំពាវនាវសុំការបរិច្ចាគឈា.មបានរីករាលដាលយ៉ាងឆាប់រហ័ស ខណៈអ្នកស្ម័គ្រចិត្តក្នុងតំបន់ជាច្រើនបានប្រញាប់ផ្ដល់ឈា.មដើម្បីជួយជនរងគ្រោះជាបន្ទាន់។ បន្ថែមពីនេះ ការបំផ្លិចបំផ្លាញបានរីករាលដាលយ៉ាងខ្លាំង ដែលសហគមន៍ជាច្រើនត្រូវបានទុកចោលដោយគ្មានទីជម្រក អាហារ ឬទឹកស្អាត។

អាជ្ញាធរបាននិយាយថា ក្រុមអ្នកជួយសង្គ្រោះកំពុងព្យាយាមស្វែងរកអ្នកនៅរស់រានមានជីវិតនៅក្នុងតំបន់ជាប់ព្រំដែនតំបន់ Khyber Pakhtunkhwa របស់ប្រទេសប៉ាគីស្ថាន ជាកន្លែងដែលផ្ទះសង់ឡើងពីភក់និងថ្ម ត្រូវបានដួលរៀបដល់ដី ដោយសារកម្រិតរញ្ជួយដីនៅពាក់កណ្តាលអធ្រាត្រ ដែលបានវាយប្រហារនៅជម្រៅ 10 គីឡូម៉ែត្រពីផ្ទៃខាងលើ។

អ្នកនាំពាក្យការិយាល័យបរទេសអាហ្វហ្គានីស្ថានបាននិយាយថា៖ «រហូតមកដល់ពេលនេះ មិនមានរដ្ឋាភិបាលបរទេសណាមួយបានឈានដល់ការផ្តល់ជំនួយសម្រាប់ការជួយសង្គ្រោះ ឬការងារសង្គ្រោះមនុស្សរងគ្រោះទាំងនេះនៅឡើយទេ»។

គួរជម្រាបថា អាហ្វហ្គានីស្ថាន គឺជាប្រទេសមួយដែលងាយនឹងកើតមានការរញ្ជួយដីដ៏កា.ចសា.ហាវ ជាពិសេសនៅតំបន់ជួរភ្នំ Hindu Kush ជាកន្លែងដែលបន្ទះតិចតូនិចឥណ្ឌា និងអឺរ៉ាស៊ីជួបគ្នា។ ការរញ្ជួយដីជាបន្តបន្ទាប់នៅភាគខាងលិចរបស់អាហ្វហ្គានីស្ថានកាលពីឆ្នាំមុន បានសម្លា.ប់មនុស្សជាង 1,000 នាក់ ដែលទិន្នន័យនេះ បង្ហាញពីភាពងាយរងគ្រោះនៃប្រទេសមួយក្នុងចំណោមប្រទេសដែលក្រីក្របំផុតរបស់ពិភពលោកចំពោះគ្រោះមហន្តរាយធម្មជាតិ៕

ប្រទេសថៃ ៖ កងទ័ពថៃតែងតែចោទប្រកាន់កម្ពុជាដដែលៗថា បង្កប់មីនក្នុងទឹកដីរបស់ខ្លួន និងបង្កើតរឿងកងទ័ពថៃជាន់មីនរងរបួសដាច់ជើងដើម្បីបោកប្រាស់អន្តរជាតិ និងពលរដ្ឋថៃ ខណៈថៃខ្លួនឯងកំពុងល្មើសបទឈប់បា.ញ់ជាបន្តបន្ទាប់ ។ នៅថ្ងៃទី១ ខែកញ្ញា ឆ្នាំ២០២៥ សារព័ត៌មានថៃបានផ្សព្វផ្សាយចោទប្រកាន់កងទ័ពខ្មែរបង្កប់មីននៅខាងលិចប្រាសាទតាក្របី ដែលមានចម្ងាយពីភ្នំ៣៥០ ប្រមាណជាង១គីឡូម៉ែត្រ ហើយថៃចាត់ទុកការបង្កប់មីនជាអាវុធវាយប្រ.ហារកងទ័ពខ្លួនឱ្យមានគ្រោះថ្នា.ក់ដល់ជីវិត ។

កាលពីថ្ងៃទី៣១ ខែសីហា ឆ្នាំ២០២៥ កងទ័ពថៃរាយការណ៍ថា បានប្រទះឃើញគ្រាប់មីនរបស់កងទ័ពខ្មែរនៅខាងលិចប្រាសាទតាក្របី ដែលមានចម្ងាយពីភ្នំ៣៥០ ប្រមាណជាង១គីឡូម៉ែត្រ ក្បែរព្រំដែនខេត្តសុរិន្ទ ។ កងទ័ពថៃថា ពួកគេបានឃើញកងទ័ពខ្មែរល្បាតនៅតំបន់ខាងលិចភ្នំ៣៥០ កាលពីថ្ងៃទី២២ ខែសីហា កន្លងមក ហើយកងទ័ពថៃក៏បានចូលត្រួតពិនិត្យក្នុងតំបន់ ស្រាប់តែឃើញមីនប្រភេទ PMN-2 ចំនួន៣គ្រាប់ រួមទាំងគ្រាប់បែក២គ្រាប់ ។

អ្នកនាំពាក្យកងទ័ពជើងគោក លោកឧត្តមសេនីយ៍ វីនឆ័យ ស៊ុវ៉ារី និយាយថា ការបង្កប់មីន និងភស្តុតាងនេះបង្ហាញឱ្យឃើញពីការបំពានបទឈប់បាញ់យ៉ាងច្បាស់ក្រឡែតរបស់កម្ពុជា ដែលមានគោលបំណងវាយប្រហារកងទ័ពថៃ និងមានចេតនាបង្កគ្រោះថ្នាក់ដល់ជីវិតក្នុងទឹកដីថៃ ។ លោកចាត់ទុកនេះជាទង្វើឈានទៅភាពតានតឹងរវាងប្រទេសទាំងពីរ ហើយលោកចោទប្រកាន់ថា ទង្វើរបស់កម្ពុជា ជាការបោកប្រាស់សហគមន៍អន្តរជាតិឱ្យមើលឃើញកម្ពុជាចង់បានសន្តិភាព ។

លោកថែមទាំងចោទប្រកាន់កម្ពុជាល្មើសអនុសញ្ញាអូតាវ៉ារហូតមក គឺការបង្កប់មីននេះមានចេតនាវាយប្រហារកងទ័ពថៃជាបន្តបន្ទាប់ ។ ក្រោយពីរកឃើញគ្រាប់មីន មេបញ្ជាការកងទ័ព លោក ផាណា ឃ្លេវផ្លតថុក បានបញ្ជាំឱ្យកងទ័ពភូមិភាគ២ ប្រាប់ដល់កងទ័ពទាំងអស់ដើរល្បាតដោយប្រុងប្រយ័ត្ន ពុំធ្វេសប្រហែស និងបញ្ជូនក្រុមដោះមីនមកកាន់តំបន់គ្រោះថ្នាក់ដើម្បីសុវត្ថិភាព ។

គួរបញ្ជាក់ថា ថ្មីៗនេះ អតីតអ្នកសារព័ត៌មានថៃ Khaosod លោក Pravit Rojanaphruk បានលាតត្រដាងការពិតនៅពីក្រោយគ្រោះថ្នាក់នៃការជាន់មីនរងរបួស និងដាច់ជើងរបស់កងទ័ពថៃកន្លងមកថា វាគ្រាន់តែជាការសម្តែងបោកប្រាស់អន្តរជាតិ និងពលរដ្ឋថៃប៉ុណ្ណោះ ដើម្បីទទួលបានផលចំណេញនយោបាយ និងជាយុទ្ធសាស្ត្រយកឈ្នះសង្គ្រាម ។

ទាក់ទងនឹងការចោទប្រកាន់កម្ពុជាបង្កប់មីនថ្មីនៅក្នុងទឹកដីថៃនេះ ក្រសួងការពារជាតិកម្ពុជា និងអង្គភាពកម្ចាត់មីនកម្ពុជា (CMAC) បានបញ្ជាក់ឡើងវិញថា កម្ពុជាពុំប្រព្រឹត្តល្មើសអនុសញ្ញាអូតាវ៉ា ព្រមទាំងប្ដេជ្ញាមិនប្រើប្រាស់មីនថ្មីដាច់ខាត ។ ម្យ៉ាងទៀត ចាប់តាំងពីក្លាយជារដ្ឋភាគីនៃសន្ធិសញ្ញានេះមក កម្ពុជាបានអនុវត្តយ៉ាងខ្ជាប់ខ្ជួននូវគោលការណ៍មនុស្សធម៌ ចូលរួមក្នុងសកម្មភាពប្រឆាំងមីនទាំងក្នុង និងក្រៅប្រទេស ដែលមានការទទួលស្គាល់ពីអន្តរជាតិ ។ ដូច្នេះ អ្វីដែលភាគីថៃបានចោទប្រកាន់នោះ គឺគ្មានមូលដ្ឋានច្បាស់លាស់ និងមិនអាចជឿជាក់បានឡើយ ៕