តារាចម្រៀងហង្សមាសចំនួន៣រូបរួមមាន ធែល ថៃ ម្ចាស់ពាន The Voice Cambodia រដូវកាលទី២ សយ រតនៈ ប៉ាច គីមមួយ ត្រូវបានអ្នកគាំទ្រជឿថាអ្នកទាំងបីបានចាកចេញពីផលិតកម្មរស្មីហង្សមាសហើយជ្រកក្នុងទ្រនំថ្មីជាផលិតកម្មសាន់ដេ។

ថ្មីៗនេះមានផ្ទាំងរូបភាពមួយសន្លឹកដែលបង្ហោះដោយផលិតកម្មសាន់ដេ ធ្វើឱ្យមានអ្នកមួយចំនួនចាប់អារម្មណ៍ជាពិសេសនៅពេលឃើញវត្តមានរបស់ ធែល ថៃ សយ រតនៈ និង ប៉ាច គីមមួយ ដែលគេដឹងថាជាតាចម្រៀងហង្សមាសមាននៅក្នុងផ្ទាំងរូបភាពនេះជាមួយនឹងតារាចម្រៀងសាន់ដេ។ អ្វីដែលធ្វើឱ្យអ្នកគាំទ្រកាន់តែរំពឹងទុក នៅថ្ងៃទី២០ ខែមីនា នេះខាងផលិតកម្មក៏បានបញ្ចេញវីដេអូមួយដែលបង្ហាញពីតារាចម្រៀងប្រុសពីររូបនិងស្រីមួយរូបជាសមាជិកថ្មីរបស់គ្រួសារសាន់ដេ។

តាមរយៈដំរួយទាំងនេះទស្សនិកជនជឿថាអ្នកទាំងបីបានចាកចេញពីទ្រនំហង្សមាសហើយសម្រេចចិត្តបើកជំពូកថ្មីរបស់ខ្លួនក្នុងផលិតកម្មសាន់ដេ ដែលជាទ្រនំតែមួយនឹងតារាចម្រៀង សុខ ពិសី ។

តារាចម្រៀង សយ រតនៈ និង ប៉ាច គីមមួយ គឺជាអតីតបេក្ខជនក្នុងកម្មវិធី The Voice Cambodia កាលពីឆ្នាំ២០១៤។ ចាប់តាំងពីប្រកួតចប់ទោះបីជាមិនមែនជាម្ចាស់ជ័យលាភី អ្នកទាំងពីរបានក្លាយជាតារាចម្រៀងក្នុងផលិតកម្មរស្មីហង្សមាស។ សម្រាប់ ធែល ថៃ វិញគឺជាម្ចាស់ពាន The Voice Cambodia រដូវកាលទី២ ក្នុងឆ្នាំ ២០១៦។

អ្នកទាំង៣សុទ្ធតែមានបទពិសោធន៍ច្រើននៅក្នុងផលិតកម្មចាស់ ហើយការសម្រេចចិត្តចាកចេញបន្ទាប់ពីរយៈពេលជាង១០ឆ្នាំនេះរបស់ពួកគេនឹងអាចឱ្យពួកគេស្វែងរកឱកាសថ្មីក្នុងអាជីពរបស់ខ្លួន៕

ថ្មីៗនេះតារាចម្រៀង សួ វិចិត្រ ម្ចាស់ពាន Beat The Best រដូវកាលទី១ ត្រូវបាននារីម្នាក់អះអាងថាជាភរិយាដោយបញ្ជាក់ពីរូបថតអាពាហ៍ពិពាហ៍របស់ពួកគេទៀតផងខណៈតារាចម្រៀងរូបនេះមានកូនចំនួន២នាក់ហើយ។ ទោះជាយ៉ាងណា ការបង្ហោះរបស់នារីម្នាក់នេះពុំបានធ្វើឱ្យ សួ វិចិត្រ ឆ្លើយតប រង្គោះរង្គើឬស្ងប់ស្ងាត់ពីបណ្តាញសង្គមនោះទេផ្ទុយទៅវិញរូបលោកបង្ហោះវីដេអូបញ្ចេញសកម្មភាពធម្មតា។

គណនីទិកតុកមួយដែលមានឈ្មោះថា «Pheak» បានបង្ហាញពីចំណងអាពាហ៍ពិពាហ៍រវាងខ្លួននិងតារាចម្រៀង សួ វិចិត្រ ដោយបង្ហាញពីទុក្ខសោកសៅ ត្រូវបានមនុស្សសំខាន់ក្នុងជីវិតអស់ចិត្តពីខ្លួននិងសុំលែងលះគ្នា។ ការបង្ហោះចោទប្រកាន់នេះបានទាក់ទាញទស្សនិកជនជាច្រើនដោយមានមតិខ្លះបានរិះគន់តារាចម្រៀង សួ វិចិត្រ ថាបានល្បីល្បាញចោលមនុស្សស្រីកម្សត់កម្រជាមួយគ្នា ខណៈអ្នកខ្លះថារឿងនៅក្នុងគ្រួសារគ្មានអ្នកណាដឹងច្បាស់ក្រៅពីសាមីខ្លួននោះទេ។

ម្ចាស់គណនីនេះក៏បានបញ្ជាក់នៅថ្ងៃទី២០ ខែមីនា ថារូបនាងនិង សួ វិចិត្រ «រៀបការមានអេតាស៊ីវិលស្របច្បាប់ មិនទាន់បានផ្ដិតមេដៃលែងលះផងនិយាយប្រាប់គេថាលែងប្រពន្ធហើយតាំងពីការរួច បើមិនឱ្យតម្លៃខ្ញុំតាំងពីដើមចូលមកក្នុងជីវិតខ្ញុំធ្វើអី ឬមកពីខ្ញុំស្រឡាញ់គាត់ពេក ទើបមិនឱ្យតម្លៃខ្ញុំ»។ តាមការរបស់អ្នកនាង ឈន សុភ័ក្រ ពួកគេបានរៀបការនៅថ្ងៃទី១៧ ខែឧសភា ឆ្នាំ២០២០។ សួ វិចិត្រ គឺជាអ្នកខេត្តពោធិ៍សាត់បានក្លាយជាម្ចាស់ពាន Beat The Best កាលពីខែមីនា ឆ្នាំ២០២២។
បន្ទាប់ពីរឿងនេះសាយភាយនៅលើបណ្តាញសង្គមទិកតុករហូតឈានដល់ហ្វេកប៊ុកគេសង្កេតឃើញថាតារាចម្រៀង សួ វិចិត្រ ពុំបានចេញមកបកស្រាយអ្វីទាក់ទងនឹងការបង្ហោះរបស់នារីអះអាងថាជាភរិយារៀបការតាមប្រពៃណីខ្មែរនោះទេ។ ទស្សនិកជនបានឃើញតារាចម្រៀងរូបនេះបានបង្ហោះវីដេអូបញ្ចេញសកម្មភាពធម្មតាពីប្អូនៗរបស់លោកដែលកំពុងរកស៊ីលក់ដូរនៅក្នុងបុរី។

គួរបញ្ជាក់ផងដែរថា មុននឹងនារីម្នាក់ដែលអះអាងថាជាភរិយារបស់សួ វិចិត្រ បង្ហាញពីទុក្ខលំបាករបស់ខ្លួនខ្ចរខ្ចាយនៅលើបណ្តាញសង្គមតារាចម្រៀងរូបនេះធ្លាប់បានបញ្ចេញសំណេរចង់ឱ្យមច្ចុរាជផ្តាច់ជីវិតរបស់ខ្លួនដោយសារតែបញ្ហាស្រ្តេសខ្លាំងពេក៕

Zuo Yi បានកសាងកេរ្តិ៍ឈ្មោះរបស់នាងលើរូបភាពដែលល្អឥតខ្ចោះនៅក្នុងឈុតឆាករឿងភាគខ្លីរបស់ប្រទេសចិន។ ទោះជាយ៉ាងណាក៏ដោយនៅពេលដែលអាជីពរបស់នាងកំពុងទទួលបានសន្ទុះ ហើយជិតឈានដល់ការផ្លាស់ប្តូរទៅជាផលិតកម្មសំខាន់ៗ ភាពចម្រូងចម្រាសដ៏ធំមួយបានផ្ទុះឡើងនៅចុងឆ្នាំ២០២៥ បានបំផ្លាញកេរ្តិ៍ឈ្មោះរបស់នាងភ្លាមៗ។

នៅថ្ងៃបុណ្យណូអែល ឆ្នាំ២០២៥ អតីតជំនួយការរបស់នាងបានបង្កការភ្ញាក់ផ្អើលយ៉ាងខ្លាំងដល់ឧស្សាហកម្មកម្សាន្តចិនដោយបានចេញផ្សាយវីដេអូសំឡេងវែងមួយដែលបង្ហាញពីបុគ្គលិកលក្ខណៈពិតរបស់តារាស្រី Zuo Yi ។ វីដេអូនោះត្រូវបានគេរាយការណ៍ថាបានថតតារាស្រីរូបនេះកំពុងប្រើពាក្យសម្ដីប្រមាថយ៉ាងធ្ងន់ធ្ងរទៅលើជំនួយការ រួមជាមួយនឹងសំឡេងវាយកម្ទេចវត្ថុ និងសំឡេងស្រែកដ៏គួរឱ្យភ័យខ្លាចរបស់ស្ត្រីម្នាក់ដែលហាក់ដូចជាត្រូវបានវាយប្រហាររាងកាយ។មិនយូរប៉ុន្មាន អតីតជំនួយការរូបនេះបានមករៀបរាប់រឿងរ៉ាវពេញលេញនៅពីក្រោយវីដេអូនោះ។

យោងតាមអតីតជំនួយការ នាងបានចាប់ផ្តើមធ្វើការឱ្យ Zuo Yi នៅថ្ងៃទី១០ ខែកញ្ញា ឆ្នាំ២០២៥ ហើយថែមទាំងបានផ្លាស់ទៅរស់នៅជាមួយតារាស្រីរូបនេះទៀតផង។ ទោះបីជាមានបន្ទុកការងារដ៏លំបាក ម៉ោងធ្វើការយូរ និងបុគ្គលិកលក្ខណៈដែលមិនអាចទាយទុកជាមុនបានរបស់ Zuo Yi ក៏ដោយ ក៏នាងបានស៊ូទ្រាំនឹងស្ថានភាពនេះដើម្បីបំពេញកាតព្វកិច្ចរបស់នាង។ ទោះជាយ៉ាងណាក៏ដោយ តារាស្រីរូបនេះត្រូវបានគេចោទប្រកាន់ថាកាន់តែមានការទាមទារច្រើនឡើងៗ ដោយធ្វើការស្នើសុំមិនសមហេតុផល និងដាក់សម្ពាធឥតឈប់ឈរលើនាង។ស្ថានភាពកាន់តែធ្ងន់ធ្ងរឡើងនៅថ្ងៃទី ២៤ ខែកញ្ញា ឆ្នាំ ២០២៥ នៅពេលដែលជំនួយការ ដែលមិនអាចទ្រាំទ្រនឹងការព្យាបាលបានទៀតទេ បានសម្រេចចិត្តឈប់ពីការងារ ហើយស្នើសុំប្រាក់ឈ្នួលសម្រាប់ការងារ៨ថ្ងៃ។ ជំនួសឱ្យការដោះស្រាយបញ្ហាដោយសន្តិវិធី Zuo Yi ត្រូវបានគេចោទប្រកាន់ថាបានខឹងសម្បារយ៉ាងខ្លាំង ដោយវាយប្រហារនាងដោយពាក្យសម្ដី ហើយបដិសេធមិនព្រមបង់ប្រាក់។

ជម្លោះនេះត្រូវបានគេរាយការណ៍ថាបានប្រែក្លាយទៅជាហិង្សា ដោយតារាសម្តែងរូបនេះបានបាត់បង់ការគ្រប់គ្រង និងវាយជំនួយការម្តងហើយម្តងទៀតដោយវត្ថុ បណ្តាលឱ្យរងរបួស។ ជំនួយការរូបនេះបានថតហេតុការណ៍នេះដោយសម្ងាត់ជាភស្តុតាង។ ក្រោយមក ប៉ូលិសត្រូវបានបញ្ជូនទៅកន្លែងកើតហេតុ បន្ទាប់ពីអ្នកស្រុកបានរាយការណ៍ពីការរំខានយ៉ាងខ្លាំងនៅក្នុងអគារផ្ទះល្វែង។ បន្ទាប់ពីហេតុការណ៍នេះត្រូវបានលាតត្រដាង Zuo Yi បានចេញមុខសូមទោសជាសាធារណៈ ដោយទទួលស្គាល់ថាខ្លួនបានប្រើអំពើហិង្សាប្រឆាំងនឹងអតីតជំនួយការរបស់នាង។ នាងបាននិយាយថា នាងបានបង់ប្រាក់សរុបចំនួន ៥៦១៩ យ័ន ប្រហែល ៨០០ ដុល្លារអាម៉េរិក សម្រាប់ប្រាក់ឈ្នួល សំណង និងការចំណាយលើការព្យាបាល។ នាងក៏បានចេញរបាយការណ៍របស់ប៉ូលិសដើម្បីគាំទ្រការអះអាងរបស់នាងផងដែរ។

Zuo Yi បានពន្យល់ថា «ខ្ញុំសូមទោសចំពោះការប្រើប្រាស់អំពើហិង្សា។ ពេលខ្លះខ្ញុំរវល់ខ្លាំងពេកជាមួយតួនាទីរបស់ខ្ញុំ ហើយមិនអាចគ្រប់គ្រងអារម្មណ៍របស់ខ្ញុំបាន»។ ទោះជាយ៉ាងណាក៏ដោយ ការសូមទោសរបស់នាងបានធ្វើឱ្យការរិះគន់ជាសាធារណៈកាន់តែខ្លាំងឡើង។ អ្នករិះគន់ក៏បានចង្អុលបង្ហាញផងដែរថា ការសូមទោសរបស់នាងហាក់ដូចជាបង្វែរការទទួលខុសត្រូវដោយស្តីបន្ទោសតួនាទីសម្តែងរបស់នាង ដែលធ្វើឱ្យខូចដល់រូបភាពរបស់នាងបន្ថែមទៀត។ ជាលទ្ធផលកេរ្តិ៍ឈ្មោះបរិសុទ្ធរបស់នាងធ្លាប់បានដួលរលំស្ទើរតែភ្លាមៗ ដោយអ្នកលេងអ៊ីនធឺណិតជាច្រើនបានអំពាវនាវឱ្យធ្វើពហិការ។

របាយការណ៍បន្ថែមបានអះអាងថា Zuo Yi មានចរិតឆេវឆាវ ដែលត្រូវបានគេចោទប្រកាន់ថាមានប្រតិកម្មខ្លាំងសូម្បីតែចំពោះភាពរអាក់រអួលតូចតាចក៏ដោយ។ ពាក្យចចាមអារ៉ាមមួយបានបង្ហាញថា នាងធ្លាប់ទះកំផ្លៀងតារាសម្តែង Chen Gang ពីរដងក្នុងអំឡុងពេលទំនាក់ទំនងរបស់ពួកគេ ដោយសារតែលោកដាស់នាងឱ្យភ្ញាក់សម្រាប់ការថតរឿងតាមកាលវិភាគ។ ជាលទ្ធផល ឈ្មោះរបស់នាងឥឡូវនេះត្រូវបានផ្សារភ្ជាប់យ៉ាងទូលំទូលាយជាមួយនឹងគំនិតដែលថារូបរាងអាចបញ្ឆោតបាន។ បន្ទាប់ពីរឿងអាស្រូវនេះ ផលិតករបានដកខ្លួនចេញពីនាង ហើយថ្មីៗនេះនាងត្រូវបានដកចេញពីគម្រោង Bu Rang Jiang Shan។

Zuo Yi ដែលមានឈ្មោះពិតថា Chen Xiaoqing កើតនៅឆ្នាំ ១៩៩៨ និងទទួលបានការទទួលស្គាល់តាមរយៈគម្រោងដូចជា You Wu, Gentlemen I’m in Your Care និង Mermaid Husband៕

ការមិនផ្តល់តម្លៃស្មើគ្នាជាមួយនឹងអតិថិជនផ្សេងទៀតបង្កឱ្យមានមតិរិះគន់យ៉ាងខ្លាំងទៅកាន់អាកាសចរណ៍ Vietnam Airlines ដែលហាក់ដូចជារើសអើងអ្នកដំណើរកម្ពុជា។ ទោះជាយ៉ាងណាតាមព័ត៌មានចុងក្រោយ Rick Kh បានបញ្ជាក់ថាខាងក្រុមហ៊ុននេះបានសូមទោសមកកាន់លោកហើយចំពោះភាពមិនស្រណុកសុខស្រួលរបស់អតិថិជនដោយពួកគេនឹងពិចារណាពង្រឹងសេវាកម្មបន្ថែមទៀត។ យ៉ាងណាមិញ Rick Kh បានបញ្ជាក់យ៉ាងច្បាស់លាស់ថាលោកមិនជិះយន្តហោះក្រុមហ៊ុននេះទៀតនោះទេ។

ថ្មីៗនេះ Rick Kh បានធ្វើឱ្យមានការចាប់អារម្មណ៍ជាសាធារណៈបន្ទាប់ពីលោកបានលាតត្រដាងពីការប្រព្រឹត្តមិនយុត្តិធម៌ខាងក្រុមហ៊ុន Vietnam Airlines ខណៈដែលភ្ញៀវដទៃដែលជាជនជាតិផ្សេងអាចស្ពាយកាបូបឡើងយន្តហោះបានយ៉ាងងាយស្រួលប៉ុន្តែសម្រាប់លោកដែលជាជនជាតិកម្ពុជាបែរតម្រូវឱ្យ Upgrade ជើងហោះហើររបស់ខ្លួនទៅវិញ។ អ្នកបង្កើតមាតិការូបនេះថែមទាំងបញ្ជាក់ថាបុគ្គលិកដែលបម្រើសេវាកម្មប្រើសម្តីហោះមិនគោរអ្នកដំណើរសោះឡើយ។

ក្រោយរឿងនេះរីកសាយភាយបានបង្កឱ្យមានការរិះគន់ជាសាធារណៈទៅកាន់ខាង Vietnam Airlines ដោយអ្នកមួយចំនួនបានខម្មិនថាពួកគេនឹងមិនជិះខាងក្រុមហ៊ុននេះឡើយពីព្រោះតែរើសអើងអ្នកដំណើរកម្ពុជា។

នៅយប់ថ្ងៃទី១៩ ខែមីនា អ្នកបង្កើតមាតិកា Rick Kh បានបញ្ជាក់ថាខាងអាកាសចរណ៍នេះបានសូមទោសលោកហើយដោយមិនមែនលោកបង្ហោះវីដេអូទើបខាងក្រុមហ៊ុន Vietnam Airlines សូមទោសលោកនោះទេ ប៉ុន្តែគឺលោកបានអ៊ីម៉ែលទៅកាន់ពួកគេ។ គ្មានដំណោះស្រាយអ្វីក្រៅពីពេលសូមទោសចំពោះការបម្រើសេវាកម្មអតិថិជនមិនល្អ និងសន្យាថានឹងពង្រឹងលើចំណុចនេះបន្ថែម Rick Kh បានបញ្ជាក់ថាលោកមិនជិះខាងក្រុមហ៊ុននេះបន្តទៀតនោះទេ។

Rick Kh ថាសំឡេងរបស់លោកនិយាយឡើងនេះគឺដើម្បីឱ្យប្រជាជនខ្មែរទាំងអស់ដែលធ្វើដំណើរគឺទទួលបានសិទ្ធិស្មើគ្នាដូចជាអ្នកដំណើរឯទៀតដោយគ្មានការរើសអើងមកកាន់អ្នកដំណើរខ្មែរឡើយ៕