នាយករដ្ឋមន្ត្រីថៃ លោក Anutin Charnvirakul កាលពីថ្ងៃទី៨ ខែឧសភា ឆ្នាំ២០២៦ បានបង្ហោះសារក្នុងហ្វេសប៊ុកពីទីក្រុងសេប៊ូ ប្រទេសហ្វីលីពីន ដោយស្តីបន្ទោសអ្នកប្រើប្រាស់បណ្តាញសង្គមនៅប្រទេសថៃ ដែលតែងតែផ្សព្វផ្សាយព័ត៌មានក្លែងក្លាយនាំឱ្យភាន់ច្រឡំឈានទៅបែកបាក់ផ្ទៃក្នុង, រើសអើ.ងជាតិសាសន៍ និងញុះញង់ឱ្យមានជម្លោះ ជាពិសេស បញ្ហាព្រំដែនជាមួយកម្ពុជា ។ នាយករដ្ឋមន្ត្រីថៃថា ព័ត៌មានក្លែងក្លាយភាគច្រើនកើតឡើងដោយសារការសរសេរប្រឌិតរឿងឡើងដើម្បីបង្កការបែកបាក់ និងស្អ.ប់គ្នា ។

ការបង្ហោះសារក្នុងហ្វេសប៊ុករបស់នាយករដ្ឋមន្ត្រីថៃ បន្ទាប់ពីអ្នកប្រើប្រាស់បណ្តាញសង្គមថៃមួយចំនួនដែលមានគំនិតជ្រុលនិយមបានផ្សព្វផ្សាយព័ត៌មានក្លែងក្លាយ និងក្រុមជ្រុលនិយមខ្លះទៀតមិនគាំទ្រគោលជំហររបស់រដ្ឋាភិបាលថៃនាពេលនេះ ដែលចង់ស្តារទំនាក់ទំនងល្អជាមួយកម្ពុជាឡើងវិញ ។

លោក Anutin បញ្ជាក់ក្នុងហ្វេសប៊ុកថា រដ្ឋាភិបាលថៃមានបំណងស្តារទំនាក់ទំនងល្អជាមួយកម្ពុជា ជាជំហ៊ានៗ ប៉ុន្តែបែរជាមានការផ្សព្វផ្សាយព័ត៌មានមិនពិតជាច្រើនក្នុងបណ្តាញសង្គមប្រទេសថៃ ពាក់ព័ន្ធនឹងជំនួបត្រីភាគីនៅទីក្រុងសេប៊ូ ដោយព័ត៌មានទាំងនេះសរសេរប្រឌិតឡើងដើម្បីឱ្យមានការបែកបាក់ និងស្ពប់ខ្ពើម ។ កន្លងមក លោក និងរដ្ឋមន្ត្រីក្រសួងការបរទេស លោក Sihasak Phuangketkeow បានប្រកាសព័ត៌មានលម្អិតរួចហើយថា រដ្ឋាភិបាលនឹងដោះស្រាយបញ្ហាទាំងអស់ដោយការប្រុងប្រយ័ត្ន និងផ្តោតលើច្បាប់អន្តរជាតិ គោលការណ៍ដែលភាគីទាំង២ (កម្ពុជា-ថៃ) បានឯកភាពគ្នា ។

ក្នុងហ្វេសប៊ុក លោកនាយករដ្ឋមន្ត្រី Anutin គូសបញ្ជាក់ថា ប្រធានាធិបតីហ្វីលីពីន លោក Ferdinand R. Marcos Jr ក្នុងនាមជាប្រធានអាស៊ាន បានរៀបចំឱ្យមានជំនួបត្រីភាគីរវាងប្រធានាធិបតីហ្វីលីពីន, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងខ្លួនលោក (Anutin) កាលពីថ្ងៃទី៧ ខែឧសភា នៅទីក្រុងសេប៊ូ ប្រទេសហ្វីលីពីន ដើម្បីកាត់បន្ថយភាពតានតឹងរវាងកម្ពុជា-ថៃ នៅមុនកិច្ចប្រជុំកំពូលអាស៊ាន ។

ក្នុងជំនួបរវាងលោក និងសម្តេចមហាបវរធិបតី ហ៊ុន ម៉ាណែត គឺភាគីទាំងពីរបានពិភាក្សាគ្នាអំពីប្រធានបទមួយចំនួន ដូចជា ៖ ពិភាក្សាពីការកាត់បន្ថយភាពតានតឹង, កសាងទំនុកចិត្តដើម្បីសន្តិភាពយូរអង្វែង និងធ្វើឱ្យទំនាក់ទំនងរវាងប្រទេសទាំងពីរមានភាពប្រក្រតីឡើងវិញ ។ ភាគីទាំងពីរក៏បានពិភាក្សាពីការចាប់ផ្តើមអនុវត្តនូវរាល់យន្តការដែលមានស្រាប់ ជាពិសេស គណៈកម្មការចម្រុះខណ្ឌសីមាព្រំដែនគោក (JBC), គណៈកម្មាធិការព្រំដែនទូទៅ (GBC) និងគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) ។

លោក Anutin បន្តថា ក្រៅពីនេះ ភាគីទាំងពីរបានពិភាក្សាពីការឱ្យមន្ត្រីជាន់ខ្ពស់នៃប្រទេសទាំង២ ជួបពិភាក្សាគ្នាឱ្យបានញឹកញាប់ ហើយថៃនឹងរង់ចាំពេលវេលាសមស្របដើម្បីលើកកម្ពស់ទំនាក់ទំនងការទូតជាមួយកម្ពុជាឱ្យល្អប្រសើរឡើងវិញបន្តិចម្តងៗ តាមរយៈការបញ្ជូនមន្ត្រីស្ថានទូតថៃមកកម្ពុជា ។ ប៉ុន្តែក្នុងជំនួបនេះភាគីទាំងពីរមិនទាន់ពិភាក្សាអំពីការបើកព្រំដែនឡើងវិញនៅឡើយទេ ដោយភាគីទាំងពីរបានឯកភាពគ្នាស្តារទំនាក់ទំនងឈានទៅរកសន្តិភាព ។

គួរបញ្ជាក់ថា រដ្ឋាភិបាលថៃបច្ចុប្បន្នចង់វិលមករកទំនាក់ទំនងការទូតល្អជាមួយកម្ពុជា និងមិនគាំទ្រឱ្យពលរដ្ឋខ្លួនបង្ហោះសារញុះញង់ ឬផ្សព្វផ្សាយព័ត៌មានមិនពិតក្នុងបណ្តាញសង្គមទៀតទេ បន្ទាប់ពីសេដ្ឋកិច្ចថៃធ្លាក់ចុះខ្លាំងដោយសារការបិទព្រំដែនជាឯកតោភាគីរបស់ថៃ កាលពីខែមិថុនា ឆ្នាំ២០២៥ ។

ក្រុមជនខិលខូចមួយចំនួននៅប្រទេសថៃបានប្រើប្រាស់បច្ចេកវិទ្យា AI បង្កើតរូបភាព និងវីដេអូក្លែងក្លាយ ក្នុងគោលបំណងញុះញង់ឱ្យមានជម្លោះព្រំដែន ហើយព័ត៌មានក្លែងក្លាយភាគច្រើនផ្តោតទៅលើបញ្ហារសើបបំផុត ដោយការយករូបភាពចាស់ៗពីជម្លោះឆ្នាំមុនៗមកបង្ហោះជាថ្មីដើម្បីឱ្យមហាជនយល់ច្រឡំ ៕

សូមប្រុងប្រយ័ត្នខ្ពស់! ពេលនេះអង្គការសុខភាពពិភពលោក (WHO) កំពុងតាមដានយ៉ាងយកចិត្តទុកដាក់លើការផ្ទុះឡើងនៃ វីរុសហាន់តា (Andes hantavirus) ដែលបានរីករាលដាលដល់ប្រទេសនិងតំបន់ចំនួន ៩ នៅជុំវិញពិភពលោក ក្នុងនោះក៏មានប្រទេសដែលស្ថិតក្នុងតំបន់អាស៊ីអាគ្នេយ៍យើងផងដែរ។

យោងតាមការចុះផ្សាយរបស់ CNN ដោយដកស្រង់របាយការណ៍ពី WHO កាលពីថ្ងៃព្រហស្បត្តិ៍ បានឲ្យដឹងថា មានសេចក្ដីរាយការណ៍អំពីការឆ្លងនៃវីរុសហាន់តា ប្រភេទ Andes strain ត្រូវបានរកឃើញនៅក្នុងប្រទេសនិងតំបន់ចំនួន ៩ រួមមាន៖ អាហ្សង់ទីន, ឈីលី, អាហ្វ្រិកខាងត្បូង, ហូឡង់, អាល្លឺម៉ង់, អង់គ្លេស, អេស្ប៉ាញ (កោះ Canary), កាណាដា និងសិង្ហបុរី ដែលជាប្រទេសនៅក្នុងតំបន់អាស៊ាន។

ការផ្ទុះឡើងនៃវីរុសហាន់តានៅពេលនេះ ត្រូវបានគេសន្និដ្ឋានថាមានផ្សារភ្ជាប់យ៉ាងសំខាន់ទៅនឹងនាវាទេសចរណ៍ MV Hondius ដោយសារតែអ្នកជំងឺស្ទើរតែទាំងអស់គឺជាអ្នកដំណើរ ឬបុគ្គលិកដែលបានធ្វើដំណើរលើនាវានេះ នៅពេលវាចាកចេញពីទីក្រុង Ushuaia ប្រទេសអាហ្សង់ទីន ឆ្ពោះទៅកាន់ទ្វីបអង់តាក់ទិក កាលពីខែមេសា ឆ្នាំ ២០២៦។ គិតត្រឹមថ្ងៃទី ៨ ខែឧសភា ឆ្នាំ ២០២៦ នេះ ចំនួនអ្នកឆ្លងវីរុសហាន់តា (Andes virus) ដែលពាក់ព័ន្ធនឹងការផ្ទុះឡើងលើនាវាទេសចរណ៍ MV Hondius មានសរុប ៨ ករណី (ក្នុងនោះមាន ៦ ករណីបញ្ជាក់ច្បាស់ និង ២ ករណីទៀតស្ថិតក្នុងភាពសង្ស័យខ្លាំង) រួមទាំងមានអ្នកស្លាប់ ៣ នាក់។

សូមជម្រាបថា វីរុសហាន់តាឆ្លងពីសត្វកកេរ (កណ្តុរ) មកមនុស្សតាមរយៈលាមក ឬទឹកមាត់។ ប៉ុន្តែប្រភេទ Andes strain នេះ មានលក្ខណៈពិសេសត្រង់ថា វាអាចឆ្លងពីមនុស្សម្នាក់ទៅមនុស្សម្នាក់ទៀតបាន តាមរយៈការប៉ះពាល់ជិតស្និទ្ធក្នុងរយៈពេលយូរ (ដូចជាការនៅជាមួយគ្នាក្នុងកាប៊ីននាវា ឬលើយន្តហោះ)។

បច្ចុប្បន្ន មិនទាន់មានវ៉ាក់សាំង ឬថ្នាំព្យាបាលជាក់លាក់សម្រាប់វីរុសហាន់តានៅឡើយទេ។ ការព្យាបាលគឺផ្អែកលើ “ការជួយសង្គ្រោះបន្ទាន់កម្រិតធ្ងន់ (ICU)” ឱ្យបានឆាប់រហ័ស ដើម្បីបង្កើនឱកាសរស់រានមានជីវិត។

ទោះបីជាវាបានរីករាលដាលដល់ច្រើនប្រទេសក៏ដោយ ប៉ុន្តែអង្គការសុខភាពពិភពលោក (WHO) វាយតម្លៃថា ហានិភ័យជាសកលនៅមានកម្រិតទាបនៅឡើយ។ អ្នកជំនាញយល់ថា វីរុសនេះមិនងាយឆ្លងតាមខ្យល់ដូចជាជំងឺកូវីដ-១៩ ឬគ្រុនផ្តាសាយធំឡើយ ដូច្នេះការផ្ទុះឡើងក្នុងសហគមន៍ខ្នាតធំទំនងជាមិនអាចកើតមានទេ៕

មេដឹកនាំកូរ៉េខាងជើង លោក Kim Jong Un បានប្រកាសនៅថ្ងៃទី៨ ខែឧសភា ឆ្នាំ២០២៦នេះថា ប្រទេសរបស់លោកនឹងដាក់ពង្រាយកាំភ្លើ.ងធំប្រភេទថ្មីនៅតាមបណ្តោយព្រំដែនជាប់កូរ៉េខាងត្បូង ដែលមានសមត្ថភាពបា.ញ់ស្រោចលើទីក្រុងសេអ៊ូល យ៉ាងងាយស្រួល ។ ការប្រកាសនេះត្រូវបានចាត់ទុកជាការគំរា.មកំហែងដល់សន្តិសុខកូរ៉េខាងត្បូង ពីព្រោះទីក្រុងសេអ៊ូលស្ថិតនៅឆ្ងាយពីព្រំដែនត្រឹមតែពី៤០គីឡូម៉ែត្រ ទៅ៥០គីឡូម៉ែត្រប៉ុណ្ណោះ ។

កូរ៉េខាងជើង នឹងដាក់ពង្រាយកាំភ្លើងធំប្រភេទថ្មីទំហំ១៥៥មីលីម៉ែត្រ នៅតាមបណ្តោយព្រំដែនជាប់កូរ៉េខាងត្បូងនៅចុងឆ្នាំ២០២៦ ដែលមានសមត្ថភាពបាញ់ឆ្ងាយរហូតដល់ទីក្រុងសេអ៊ូលតែម្តង ហើយកូរ៉េខាងជើង នឹងដាក់ពង្រាយកាំភ្លើងធំថ្មីនេះលើនាវាពិឃាតរបស់ខ្លួននាពេលឆាប់ៗផងដែរ ។ នេះបើតាមការចុះផ្សាយរបស់សារព័ត៌មានអន្តរជាតិនៅថ្ងៃទី៨ ខែឧសភា ។

ការប្រកាសដាក់ពង្រាយកាំភ្លើងធំប្រភេទថ្មីបានកើតឡើងមិនប៉ុន្មានថ្ងៃ បន្ទាប់ពីកូរ៉េខាងត្បូងលើកឡើងពីការធ្វើវិសោធនកម្មរដ្ឋធម្មនុញ្ញរបស់កូរ៉េខាងជើង ដែលលុបចោលរាល់ខ្លឹមសារទាក់ទងនឹងការបង្រួបបង្រួមជាតិរវាងកូរ៉េទាំង២ ។ ការធ្វើវិសោធនកម្មរដ្ឋធម្មនុញ្ញនេះដើម្បីឱ្យស្របនឹងការសន្យារបស់មេដឹកនាំកូរ៉េខាងជើង លោក Kim Jong Un ថា នឹងកាត់ផ្តាច់ទំនាក់ទំនងជាមួយកូរ៉េខាងត្បូង និងបង្កើតប្រព័ន្ធរដ្ឋ២ នៅឧបទ្វីបកូរ៉េ ។

សារព័ត៌មានកណ្តាលកូរ៉េខាងជើង (KCNA) រាយការណ៍ថា លោក Kim Jong Un បានចុះត្រួតពិនិត្យដំណើរការផលិតកាំភ្លើងធំទំហំ១៥៥មីលីម៉ែត្រ កាលពីថ្ងៃទី៦ ខែឧសភា កន្លងមក មុនពេលដាក់ពង្រាយនៅតាមបណ្តោយព្រំដែនជាប់កូរ៉េខាងត្បូងនាចុងឆ្នាំ២០២៦ ។ លោកថា ៖ «វាអាចបាញ់ចម្ងាយលើសពី៦០គីឡូម៉ែត្រ អាចវាយប្រហារយ៉ាងឆាប់រហ័ស និងផ្តល់ផលចំណេញយ៉ាងខ្លាំងដល់ប្រតិបត្តិកងទ័ពជើងគោករបស់យើង» ។

កូរ៉េខាងត្បូងចាត់ទុកការដាក់ពង្រាយកាំភ្លើងធំរបស់កូរ៉េខាងជើងនៅតាមបណ្តោយព្រំដែន គឺជាការគំរាមកំហែងដល់សន្តិសុខកូរ៉េខាងត្បូង ពីព្រោះទីក្រុងសេអ៊ូលដែលមានពលរដ្ឋរស់នៅចំនួន១០លាននាក់ ស្ថិតនៅឆ្ងាយពីព្រំដែនត្រឹមតែពី៤០គីឡូម៉ែត្រ ទៅ៥០គីឡូម៉ែត្រប៉ុណ្ណោះ ។

លើសពីនេះ តំបន់ជាច្រើនទៀតក្នុងខេត្ត Gyeonggi ដែលជាតំបន់ឧស្សាហកម្មសំខាន់ៗរបស់កូរ៉េខាងត្បូង និងមានមនុស្សរស់នៅយ៉ាងច្រើន ក៏ស្ថិតក្នុងគោលដៅរបស់កូរ៉េខាងជើងអាចបាញ់កាំភ្លើងធំដល់ដែរ វាធ្វើឱ្យកូរ៉េខាងត្បូងព្រួយបារម្ភយ៉ាងខ្លាំងអំពីសន្តិសុខជាតិរបស់ខ្លួន ៕

ដកទូតចេញមុនដោយខ្លួនឯង ឥឡូវសុខៗក៏នឹកឃើញចង់បញ្ជូនមកវិញដោយខ្លួនឯង! យោងតាមពាក្យសម្ដីរបស់រដ្ឋមន្រ្តីក្រសួងការបរទេសថៃនៅល្ងាចថ្ងៃព្រហស្បត្តិ៍ ម្សិលមិញនេះបានឲ្យដឹងថា ឆាប់ៗខាងមុខនេះ ប្រទេសថៃនឹងពិភាក្សាលើការបញ្ជូនទូតត្រឡប់ទៅកាន់តំណែងនៅស្ថានទូតថៃប្រចាំនៅកម្ពុជាវិញ ដើម្បីកសាងទំនុកចិត្តរវាងថៃជាមួយកម្ពុជាឡើងវិញក្នុងនាមជាអ្នកជិតខាងល្អ។

យោងតាមការចុះផ្សាយរបស់ទីភ្នាក់ងារសារព័ត៌មានថៃ នៅថ្ងៃសុក្រ ទី៨ ខែឧសភា ឆ្នាំ២០២៦ លោក Sihasak Phuangketkeow ឧបនាយករដ្ឋមន្ត្រី និងជារដ្ឋមន្ត្រីការបរទេសថៃ បានធ្វើសេចក្តីថ្លែងការណ៍ជាពិសេសថា «ពាក់ព័ន្ធនឹងបញ្ហាព្រំដែនគោក នៃកិច្ចប្រជុំ (JBC) ជាមួយកម្ពុជា ប្រទេសថៃមិនបានគេចវេះពីកិច្ចប្រជុំទេ ប៉ុន្តែថៃត្រូវការពេលវេលាត្រៀមលក្ខណៈប្រជុំជាមុនសិនតែប៉ុណ្ណោះ»។

លោកបន្ថែមថា៖ ចំពោះបញ្ហាដែនសមុទ្រជាមួយកម្ពុជាវិញ ប្រទេសថៃ សម្រេចលុបចោល (MoU) ឆ្នាំ២០០១ ជាឯកតោភាគី គឺផ្អែកលើការពិតដែលថា ការអនុវត្តរយៈពេល ២៥ ឆ្នាំមកនេះវាមិនបានផ្តល់លទ្ធផលអ្វីឡើយ ហើយបើនៅបន្តចរចាដោយប្រើក្របខណ្ឌនេះ ទោះ ២០ឆ្នាំទៅមុខទៀត ក៏មិនរីកចម្រើនទៅណាដែរ។

តាមលោក Sihasak ប្រទេសថៃបានសង្កត់ធ្ងន់លើការកសាងឡើងវិញនូវទំនាក់ទំនងមិត្តភាព ដូច្នេះឆាប់ៗខាងមុខនេះ គណៈរដ្ឋមន្រ្តីថៃនឹងធ្វើការពិភាក្សា ក៏ដូចជាពិនិត្យទៅលើលទ្ធភាព ក្នុងការបញ្ជូនឯកអគ្គរាជទូតថៃត្រឡប់មកកាន់តំណែងជាឯកអគ្គរាជទូតថៃ ប្រចាំនៅទឹកដីនៃព្រះរាជាណាចក្រកម្ពុជា ឡើងវិញ»។

គួររម្លឹកថា រដ្ឋាភិបាលថៃ ក្រោមការដឹកនាំរបស់លោកនាយករដ្ឋមន្ត្រីស្តីទី Phumtham Wechayachai កាលពីថ្ងៃទី២៣ ខែកក្កដា ឆ្នាំ២០២៥ បានប្រកាសជាផ្លូវការនូវការសម្រេចចិត្តទម្លាក់កម្រិតទំនាក់ទំនងការទូតជាមួយកម្ពុជា។ ភាគីថៃបានដកឯកអគ្គរាជទូតរបស់ខ្លួនត្រឡប់ទៅវិញទាំងយប់ និងបានបណ្តេញឯកអគ្គរាជទូតកម្ពុជា ប្រចាំទីក្រុងបាងកកឱ្យត្រឡប់មកភ្នំពេញវិញ។

ជាការឆ្លើយតប រាជរដ្ឋាភិបាលកម្ពុជាក៏បានទម្លាក់កម្រិតការទូតជាមួយថៃមកនៅត្រឹមកម្រិតទី២ដូចគ្នា ហើយកម្ពុជាបានបង្គាប់ឱ្យមន្ត្រីការទូតទាំងអស់ដែលបម្រើការងារនៅស្ថានទូតកម្ពុជាប្រចាំទីក្រុងបាងកក ចាកចេញ និងត្រឡប់មកភ្នំពេញវិញជាបន្ទាន់។ ទោះបីជាស្ថានការណ៍បច្ចុប្បន្នលែងមានការបាញ់បោះដូចមុនក៏ដោយ ប៉ុន្តែទំនាក់ទំនងការទូតនៅតែស្ថិតក្នុងស្ថានភាព “កកស្ទះ” នៅឡើយ។ ភាគីទាំងពីរកំពុងស្ថិតក្នុងដំណាក់កាល “ស្ទាបស្ទង់” គ្នា ដើម្បីរកវិធីស្ដារទំនាក់ទំនងឡើងវិញដោយមិនឱ្យចាញ់ប្រៀបរៀងៗខ្លួន៕

មានមាត់ចេះតែនិយាយ! ឆ្លៀតក្នុងឱកាសឡើងថ្លែងសន្ទរកថាក្នុងកិច្ចប្រជុំត្រីភាគី នៅចំពោះមុខប្រធានអាស៊ាន លោក Anutin Charnvirakul នាយករដ្ឋមន្ត្រីថៃ បាននិយាយឡើងយ៉ាងដូច្នេះថា៖ លោកសំណូមពរឱ្យប្រជាជនខ្មែរ កុំឱ្យមានការរើសអើងទៅលើពលរដ្ឋថៃ ដែលកំពុងរស់នៅក្នុងប្រទេសកម្ពុជាអី ព្រោះទំនាស់ព្រំដែនគឺបញ្ហារវាងរដ្ឋនិងរដ្ឋប៉ុណ្ណោះ»។ តើមានជនជាតិថៃប៉ុន្មាននាក់ហើយដែលត្រូវពលរដ្ឋខ្មែរព្រួតធ្វើបាប ទើបលោក អនុទីន មកធ្វើជាស្នើសុំយ៉ាងកំសត់បែបនេះ?

យោងតាមការចុះផ្សាយរបស់បណ្ដាញសារព័ត៌មានថៃ ដែលដកស្រង់ពាក្យសម្ដីពីលោក អនុទីន នៅល្ងាចថ្ងៃព្រហស្បត្តិ៍ ទី៧ ខែឧសភា ដែលបានបង្ហាញក្ដីបារម្ភចំពោះជនជាតិថៃ ដែលរស់នៅក្នុងប្រទេសកម្ពុជា ដោយបានស្នើសុំឱ្យប្រជាជនកម្ពុជាកុំមានការរើសអើងចំពោះពួកគេ និងបានសង្កត់ធ្ងន់លើសារៈសំខាន់នៃការរស់នៅជាមួយគ្នាដោយសន្តិវិធី។

លោក អនុទីន បានលើកឡើងថា បើទោះបីជាកម្ពុជា-ថៃ កំពុងដោះស្រាយបញ្ហានេះមិនទាន់ដាច់ស្រេចក៏ដោយ ប៉ុន្តែលោកសង្ឃឹមថាប្រជាជនខ្មែរនឹងមិនពង្រីកបញ្ហានេះឲ្យក្លាយជាការរើសអើងពូជសាសន៍នោះទេ ដោយលោកបានបញ្ជាក់យ៉ាងច្បាស់ថា «ជម្លោះដែលកើតឡើងគឺជាបញ្ហារវាងរដ្ឋាភិបាល និងរដ្ឋាភិបាល មិនមែនជាជម្លោះរវាងប្រជាជន និងប្រជាជននោះទេ»។

សូមជម្រាបថា បច្ចុប្បន្នជនជាតិថៃដែលកំពុងរស់នៅ និងប្រកបរបររកស៊ីនៅកម្ពុជាមានចំនួនប្រមាណ ៣,៣០០០ នាក់ នេះបើយោងតាមទិន្នន័យពី នាយកដ្ឋានសេដ្ឋកិច្ច និងសង្គមរបស់អង្គការសហប្រជាជាតិ (UNDESA)។ ចាប់តាំងពីមានជម្លោះព្រំដែនរវាងកម្ពុជា និងថៃ នៅខែកក្កដា ឆ្នាំ២០២៥ រហូតមកដល់បច្ចុប្បន្ន ពុំមានសេចក្ដីរាយការណ៍អំពីករណីជនជាតិថៃរស់នៅកម្ពុជាត្រូវពលរដ្ឋខ្មែរធ្វើបាបសូម្បីតែម្នាក់។

របាយការណ៍នេះផ្ទុយស្រឡះពីស្ថានភាពជនជាតិខ្មែរដែលកំពុងរស់នៅក្នុងប្រទេសថៃ ដែលកាលពីកន្លងធ្លាប់មានការបង្ហោះក្នុងបណ្ដាញសង្គមថា ត្រូវបានពលរដ្ឋថៃជ្រុលនិយមមួយចំនួនជិះជាន់ធ្វើបាប ប្រើអំពោះហិង្សាដាក់ទាំងមិនមានកំហុសអ្វីទាល់តែសោះ។ ចំណែកការលើកឡើងរបស់នាយករដ្ឋមន្រ្តីថៃដូចខាងលើនេះ ហាក់សបញ្ជាក់ឲ្យឃើញពីចេតនាដែលចង់បង្កឲ្យមានការយល់ច្រលំនៅចំពោះមុខសមាគមន៍អន្តរជាតិ៕