នាយកប្រតិបត្តិក្រុមហ៊ុនកាហ្វេយក្ស Starbucks លោក Brian Niccol បានចេញសេចក្ដីប្រកាសមួយជូនបុគ្គលិកកាលពីថ្ងៃព្រហស្បតិ៍ ថា ក្រុមហ៊ុនកាហ្វេ Starbucks នឹងបញ្ឈប់បុគ្គលិក និងបិទហាងមួយចំនួន ដែលជាផ្នែកមួយនៃការរៀបចំរចនាសម្ព័ន្ធឡើងវិញ ដែលមានតម្លៃប្រមាណ ១ ពាន់លានដុល្លារអាមេរិក។

លោក Niccol បានបញ្ជាក់ថា ការកាត់បន្ថយនឹងប៉ះពាល់ដល់បុគ្គលិកប្រមាណ ៩០០ នាក់ នៅតាមហាងក្នុងតំបន់អាមេរិកខាងជើង។ ខណៈពេលជាមួយគ្នា ការបិទនេះនឹងបណ្ដាលឲ្យចំនួនហាងកាហ្វេ Starbucks សរុបនៅតំបន់នេះធ្លាក់ចុះប្រមាណ ១% ក្នុងឆ្នាំសារពើពន្ធនេះ បន្ទាប់ពីបានគណនាការបើកហាងថ្មីជាច្រើន។ លោក Niccol បាននិយាយថា “ទោះបីជាក្រុមហ៊ុនកំពុងមានកំណើនល្អក្តី ក៏យើងនៅតែត្រូវធ្វើអ្វីៗជាច្រើន ដើម្បីកសាង Starbucks ឲ្យកាន់តែរឹងមាំ និងប្រសើរឡើង”។ទោះជាយ៉ាងណា បន្ទាប់ពីការប្រកាសនេះរួច ភាគហ៊ុនរបស់ Starbucks បានកើនឡើងបន្តិចផងដែរ។

អ្នកវិភាគបានប្រាប់សារព័ត៌មាន ABC News ថា Starbucks កំពុងប្រឈមមុខនឹងបញ្ហា ការលក់ធ្លាក់ចុះជាបន្តបន្ទាប់ ក្នុងរយៈពេលចុងក្រោយនេះ ដោយសារអតិថិជនរងផលប៉ះពាល់ពីអតិផរណាកើនឡើង។ ក្រុមហ៊ុនបានចុះខ្សោយការលក់ ៦ ត្រីមាសជាប់ៗគ្នា នៅក្នុងហាងដដែលៗ។

យ៉ាងណាមិញ ក្នុងកិច្ចខិតខំប្រឹងប្រែងដើម្បីទាក់ទាញអតិថិជន ក្រុមហ៊ុនបានធ្វើការកែលម្អបរិវេណ និងសេវាកម្មនៅហាងជាច្រើន។ ទោះយ៉ាងណា លោក Niccol បានប្រាប់ថា ក្នុងការពិនិត្យឡើងវិញ ក្រុមហ៊ុនបានរកឃើញហាងមួយចំនួនដែល មិនអាចបង្កើតបទពិសោធន៍ដ៏ល្អឲ្យអតិថិជន ឬ មិនមានសក្តានុពលផ្នែកហិរញ្ញវត្ថុ ដូចដែលរំពឹងទុក ដូច្នេះហាងទាំងនេះនឹងត្រូវបិទ។
លោកបន្តថា “ជារៀងរាល់ឆ្នាំ យើងមានការបើក និងបិទហាង ដោយហេតុផលផ្សេងៗចាប់ពីការបញ្ចប់កិច្ចជួល ដល់បញ្ហាហិរញ្ញវត្ថុ។ តែសកម្មភាពនេះមានទំហំធំជាង យើងដឹងថាវានឹងប៉ះពាល់ដល់ទាំងបុគ្គលិក និងអតិថិជន” ។

Starbucks រំពឹងថានឹងបញ្ចប់ឆ្នាំសារពើពន្ធ ២០២៥ ជាមួយនឹងហាងសរុបប្រមាណ ១៨,៣០០ កន្លែង នៅសហរដ្ឋអាមេរិក និងកាណាដា ហើយក្រុមហ៊ុននឹងជូនដំណឹងដល់បុគ្គលិកនៅតាមហាងដែលត្រូវបិទ នៅក្នុងសប្តាហ៍ដដែល។ គួរបញ្ជាក់ថា លោក Niccol មានបំណង ផ្លាស់ប្តូរបុគ្គលិកទៅហាងផ្សេង នៅក្បែរៗគ្នា។ ប៉ុន្តែបើមិនអាចធ្វើបានទេ Starbucks នឹងផ្តល់នូវ សំណង និងការគាំទ្រពិសេស ដល់បុគ្គលិកដែលរងផលប៉ះពាល់៕

ប្រទេសថៃ ៖ នាយករដ្ឋមន្ត្រីថៃ លោក អនុថីន ឆាន់វីរៈគូន បានប្រគល់អំណាចពេញលេញឱ្យកងទ័ពសម្រេចចិត្តលើជម្លោះព្រំដែនកម្ពុជា-ថៃ និងធ្វើប្រតិបត្តិការប្រឆាំងកម្ពុជាភ្លាមៗបើស្ថានការណ៍កាន់តែតានតឹង ដោយលោកចោទប្រកាន់កម្ពុជាបង្កហេតុគ្រប់ពេលវេលា ទើបគ្មានការចរចាជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ។ លោកប្រគល់តួនាទីឱ្យក្រសួងការបរទេសទទួលខុសត្រូវការទូត និងបន្តបិទព្រំដែន លុះត្រាតែថៃយល់ថា កម្ពុជាលែងបង្កគ្រោះថ្នា.ក់ ។ នេះបើតាមការផ្សព្វផ្សាយរបស់សារព័ត៌មាន Thairath កាលពីថ្ងៃទី២៦ ខែកញ្ញា ឆ្នាំ២០២៥ ។

លោក អនុថីន នាយករដ្ឋមន្ត្រីថៃ និងជារដ្ឋមន្ត្រីក្រសួងមហាផ្ទៃបានផ្តល់សម្ភាសន៍ជាមួយសារព័ត៌មានកាលពីថ្ងៃទី២៦ ខែកញ្ញា អំពីស្ថានការណ៍ព្រំដែនកម្ពុជា-ថៃថា ការស្នើឱ្យលុបចោល MOU ឆ្នាំ២០០០ និង MOU ឆ្នាំ២០០១ គឺស្ថិតក្រោមនយោបាយរបស់រដ្ឋាភិបាលនៅឡើយដើម្បីកុំឱ្យប្រទេសទាំងពីរមានជម្លោះកាន់តែខ្លាំង ។ ពេលនេះ លោកបានឱ្យសភាតំណាងរាស្ត្របង្កើតគណៈកម្មការសិក្សាពី MOU ។

នាយករដ្ឋមន្ត្រីថៃបានចោទប្រកាន់កម្ពុជាបង្កហេតុគ្រប់ពេលវេលានៅតំបន់ព្រំដែនជាច្រើនកន្លែង ហើយថាកងទ័ពថៃអត់ធ្មត់ខ្លាំង និងត្រៀមខ្លួនរួចហើយ ។ លោកបានផ្តល់អំណាចពេញលេញឱ្យកងទ័ពធ្វើប្រតិបត្តិការនៅព្រំដែន និងនិយាយជាមួយលោក ណាត់ថាផុង ណាកផានិច រដ្ឋមន្ត្រីក្រសួងការពារជាតិ និងលោក អាឌុល ប៊ុនថាំចារើន អនុរដ្ឋមន្ត្រីក្រសួងការពារជាតិ អំពីគោលជំហររបស់រដ្ឋាភិបាលថៃ និងគោលជំហរនាយករដ្ឋមន្ត្រី រួមទាំងជជែកតាមទូរស័ព្ទជាមួយលោក ផាណា ក្លេវប្លតថុក មេបញ្ជាការកងទ័ពជើងគោក ឱ្យយល់ពីតួនាទី ក៏ដូចជាបើកដៃឱ្យកងទ័ពធ្វើប្រតិបត្តិការប្រឆាំងកម្ពុជា ។

ឆ្លើយតបនឹងសំណួររបស់អ្នកសារព័ត៌មានដែលសួរថា ពេលនេះ លោក អនុថីន មានអំណាចពេញលេញជានាយករដ្ឋមន្ត្រីថៃ តើលោកនឹងជជែកជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាដែរឬទេ ដើម្បីឱ្យស្ថានការណ៍ធូរស្រាល បើមិនចរចាជម្លោះនឹងអូសបន្លាយបែបនេះ? លោក អនុថីន ឆ្លើយថា ពុំចរចាជាមួយថ្នាក់ដឹកនាំកម្ពុជាទេ ការការពារទឹកដី អធិបតេយ្យ រួមទាំងសុវត្ថិភាពប្រទេស និងពលរដ្ឋ គឺជាអំណាចរបស់កងទ័ព ។ លោកបន្តបិទព្រំដែន លុះត្រាតែថៃយល់ថាកម្ពុជាលែងបង្កគ្រោះថ្នាក់ ។

ដោយឡែក រឿងការទូត លោកបានប្រគល់តួនាទីឱ្យរដ្ឋមន្ត្រីក្រសួងការបរទេស ពីព្រោះមានជំនាញខាងកិច្ចការបរទេស និងការទូត ។ រីឯការរក្សាទំនាក់ទំនងល្អ ឬដោះស្រាយជម្លោះ គឺលោកនឹងពិភាក្សាជាមួយរដ្ឋមន្ត្រីក្រសួងការបរទេសដើម្បីកំណត់វិធានការបន្តទៀត ។

កាលពីថ្ងៃទី២៥ ខែកញ្ញា ផេកផ្លូវការរបស់មជ្ឈមណ្ឌលប្រតិបត្តិការតំបន់កងទ័ពទី២របស់ថៃ និងសារព័ត៌មានថៃមួយចំនួនផ្សាយថា កម្ពុជាបង្កហេតុដោយមានសកម្មភាពចល័តរថក្រោះចូល និងឮសំឡេងកាំភ្លើង ឮសំឡេងផ្ទុះគ្រាប់បែក និងរកឃើញការចូលជិតបន្លាលួស ព្រមទាំងមានការបាញ់ដើម្បីពិនិត្យមើលរយៈចម្ងាយ ។ ក្រសួងការពារជាតិកម្ពុជាបានស្រាយបំភ្លឺថា កងកម្លាំងរបស់កម្ពុជាមិនបានបង្កហេតុ ឬធ្វើសកម្មភាពណាមួយដែលរំលោភបំពានលើកិច្ចព្រមព្រៀងបទឈប់បា.ញ់ ដូចការលើកឡើងរបស់ថៃឡើយ ។

កម្ពុជាប្តេជ្ញាចិត្តយ៉ាងពេញលេញចំពោះការគោរព និងអនុវត្តនូវកិច្ចព្រមព្រៀងបទឈប់បាញ់រវាងកងទ័ពកម្ពុជា និងកងទ័ពថៃ បានយ៉ាងម៉ឺងម៉ាត់ និងខ្ជាប់ខ្ជួនបំផុត ជាមួយនឹងស្មារតីនៃការប្តេជ្ញាចិត្តក្នុងការសហការគ្នានៅគ្រប់កម្រិត កម្ពុជាតែងតែរក្សាកិច្ចសហការល្អជាមួយគ្នា ៕

ប្រទេសថៃ ៖ សារព័ត៌មានថៃ Amarin News រាយការណ៍នៅថ្ងៃទី២៦ ខែកញ្ញា ឆ្នាំ២០២៥ ថា ពលរដ្ឋនៅឃុំបាក់ដៃ ស្រុកភ្នំដងរ៉ាក់ ខេត្តសុរិន្ទ បានជម្លៀសចេញពីលំនៅឋានជាបន្តបន្ទាប់ក្រោយពីកងទ័ពថៃចោទប្រកាន់កម្ពុជាបង្កហេតុនៅព្រំដែន ។ ពលរដ្ឋថៃផ្តាំផ្ញើឱ្យកងទ័ពថៃធ្វើសង្គ្រា.មឆាប់ៗពុំចាំបាច់ចរចាជាមួយកម្ពុជា ពីព្រោះរដ្ឋាភិបាលរបស់លោកនាយករដ្ឋមន្ត្រី អនុថីន ឆាន់វីរៈគូន បានបើកដៃឱ្យកងទ័ពរួចហើយ ។

នៅថ្ងៃទី២៦ ខែកញ្ញា ពលរដ្ឋនៅឃុំបាក់ដៃ ស្រុកភ្នំដងរ៉ាក់ និងស្រុកកាបឈើង ខេត្តសុរិន្ទ បានជម្លៀសចេញពីលំនៅឋានជាបន្តបន្ទាប់ដោយសារកងទ័ពឈ្លានពានថៃបង្កហេតុញុះញង់មិនឈប់ឈរនៅព្រំដែនកម្ពុជា-ថៃ ហើយកុហកពលរដ្ឋរបស់ខ្លួនថា កងទ័ពកម្ពុជាជាអ្នកបង្កហេតុ ។ ការនិយាយបំភ្លៃរបស់កងទ័ពឈ្លានពានថៃបានធ្វើឱ្យពលរដ្ឋនៅខេត្តសុរិន្ទជឿជាក់ និងជំរុញឱ្យធ្វើសង្គ្រាមជាមួយកម្ពុជា ។

អ្នកស្រី ផាត់ត្រា ហានស៊ីផូមិ អាយុ៤៨ឆ្នាំ រស់នៅឃុំបាក់ដៃ ស្រុកភ្នំដងរ៉ាក់ ខេត្តសុរិន្ទ និយាយថា ខ្លួន និងក្រុមគ្រួសារបានជម្លៀសចេញពីលំនៅឋានជាមួយអ្នកភូមិផ្សេងទៀត ក្រោយពីកងទ័ពថៃប្រាប់ថា កងទ័ពខ្មែរបាញ់កាំភ្លើងតូចចូលទឹកដីថៃ ។ អ្នកស្រីពុំចង់ឱ្យរង់ចាំរហូតមានការប្រើប្រាស់កាំភ្លើងធំទេ ពីព្រោះរដ្ឋាភិបាលថៃពុំបានជួយពលរដ្ឋ រហូតមកដល់ពេលនេះ ពលរដ្ឋពុំទាន់ទទួលបានប្រាក់សំណងពីរដ្ឋាភិបាលចំនួន៥,០០០បាតទេ (ស្មើជាង១៥០ដុល្លារ) ។

ស្ត្រីរូបនេះបន្តថា ខ្លួនរស់នៅព្រំដែនពុំអាចប្រកបរបរអ្វីទេ ក្មេងៗក៏ពុំបានចូលសាលារៀន ខណៈទិន្នផលកសិកម្មមានតម្លៃថោកទាំងអស់ ពលរដ្ឋត្រូវជម្លៀសចេញពីលំនៅឋាន ប៉ុន្តែគ្មានជំរំភៀសសឹកត្រឹមត្រូវ ទើបចង់ឱ្យអាជ្ញាធរខេត្តសុរិន្ទរៀបចំជំរំភៀសសឹក ។ ស្ត្រីរូបនេះចង់សួរទៅមេបញ្ជាការកងទ័ពថា កន្លងមក រដ្ឋាភិបាលចាស់ពុំផ្តល់អំណាចឱ្យកងទ័ពពេញលេញ ប៉ុន្តែពេលនេះ រដ្ឋាភិបាលថ្មីប្រគល់អំណាចឱ្យកងទ័ពសម្រេចចិត្តរឿងព្រំដែន តើកងទ័ពកំពុងធ្វើអ្វី ហេតុអ្វីមិនចាត់វិធានការក្តៅជាមួយកម្ពុជា?

ស្ត្រីរូបនេះយល់ថា ការចរចារវាងប្រទេសទាំងពីរគ្មានប្រយោជន៍ ថែមទាំងនិយាយបំភ្លៃថា ពលរដ្ឋខ្មែរមករស់នៅលើទឹកដីថៃ ។ ស្ត្រីរូបនេះសំណូមពរឱ្យថ្នាក់ដឹកនាំរបស់ខ្លួនបញ្ឈប់ការចចាជាមួយកម្ពុជា និងផ្តាច់ទំនាក់ទំនងការទូត-ពាណិជ្ជកម្ម រួមទាំងបិទព្រំដែនជារៀងរហូត ។ ដូចគ្នានេះ ពលរដ្ឋថៃជាច្រើនទៀតក្នុងបណ្តាញសង្គមបានគាំទ្រគំនិតរបស់ស្ត្រីរូបនេះ ដោយជំរុញឱ្យកងទ័ពធ្វើសង្គ្រាមឆាប់ៗ និងជម្លៀសពលរដ្ឋចេញពីព្រំដែនឱ្យអស់ ។

ការញុះញង់របស់ពលរដ្ឋថៃមួយចំនួនបង្ហាញថា ពួកគេស្រេកឃ្លានសង្គ្រាម ពុំចង់បានសន្តិភាព ដែលផ្ទុយពីពលរដ្ឋខ្មែរចង់បានសុខសន្តិភាព ចង់រស់នៅមានសេចក្តីសុខ និងពុំញុះញង់ឱ្យធ្វើសង្គ្រាមដូចពលរដ្ឋថៃទេ ។ ការធ្វើសង្គ្រាមឈ្លានពានកម្ពុជា គឺមានតែធ្វើឱ្យថៃខ្លួនឯងខាតបង់ប្រាក់ចំណូលសេដ្ឋកិច្ច បាត់បង់ទំនុកចិត្តពីអន្តរជាតិ ប្រទេសនានាថ្កោលទោស និងដាក់ទណ្ឌកម្មសេដ្ឋកិច្ចថៃ ហើយពេលនោះ ភាពក្រីក្រតោកយ៉ាកនឹងធ្លាក់មកលើពលរដ្ឋថៃ ៕

ប្រទេសថៃ ៖ លោក អនុថីន ឆាន់វីរៈគូន ដែលទើបតែឡើងកាន់តំណែងជានាយករដ្ឋមន្ត្រីថ្មីរបស់ថៃជំនួសលោកស្រី ផេថងថាន ស៊ីណាវ៉ាត់ បានព្យាយាមយកចិត្តកងទ័ព និងពលរដ្ឋរបស់ខ្លួន ដែលតែងតែញុះញង់ ចោទប្រកាន់ និងបង្កជម្លោះជាមួយកម្ពុជារហូតមក ។ លោកបានប្រគល់អំណាចពេញលេញឱ្យកងទ័ពមានសិទ្ធិសម្រេចចិត្តលើកិច្ចការព្រំដែន ព្រមទាំងបន្តបិទព្រំដែនកម្ពុជា-ថៃតាមសំណូមពររបស់ពលរដ្ឋ បើទោះជាសេដ្ឋកិច្ចថៃនាពេលបច្ចុប្បន្នធ្លាក់ចុះដល់កម្រិតទាបក៏ដោយ ។

តាមការផ្សព្វផ្សាយរបស់សារព័ត៌មាន PP TV HD នៅថ្ងៃទី២៦ ខែកញ្ញា ឆ្នាំ២០២៥ ឱ្យដឹងថា នាយករដ្ឋមន្ត្រីថៃ លោក អនុថីន ឆាន់វីរៈគូន បានបើកដៃឱ្យកងទ័ពធ្វើប្រតិបត្តិការប្រឆាំងកម្ពុជាភ្លាមៗដោយពុំចាំបាច់រង់ចាំយូរ ប្រសិនបើមើលឃើញស្ថានការណ៍ព្រំដែនកម្ពុជា-ថៃកាន់តែតានតឹងខ្លាំង ហើយរដ្ឋាភិបាលថៃនឹងជួយគាំទ្រកងទ័ព ។

កាលពីថ្ងៃទី២៥ ខែកញ្ញា លោក អនុថីន នាយករដ្ឋមន្ត្រីថៃ និងជារដ្ឋមន្ត្រីក្រសួងមហាផ្ទៃ បាននិយាយពីស្ថានការណ៍ព្រំដែនត្រឡប់មកតានតឹងឡើងវិញថា ថៃបានប្រកាសច្បាប់អាជ្ញាសឹកនៅព្រំដែនកម្ពុជា-ថៃរួចហើយ ។ ហេតុនេះ ការសម្រេចចិត្ត និងការពារអធិបតេយ្យ គឺជាអំណាចផ្ទាល់របស់អ្នកប្រកាសច្បាប់អាជ្ញាសឹក ហើយមេបញ្ជាការយោធភូមិភាគ២ ត្រូវតែមានទំនុកចិត្តក្នុងការប្រតិបត្តិការកងទ័ព និងប្រកាន់ខ្ជាប់នូវគោលការណ៍រក្សាអធិបតេយ្យ ។

នាយករដ្ឋមន្ត្រីថៃបានបើកដៃឱ្យកងទ័ពអាចធ្វើប្រតិបត្តិការប្រឆាំងកម្ពុជាប្រសិនបើចាំបាច់ ហើយរដ្ឋាភិបាលថៃនឹងជួយគាំទ្រ ផ្តល់កម្លាំងចិត្តឱ្យកងទ័ពបន្តការឈ្លានពាននៅព្រំដែន ។ នៅចុងខែកញ្ញា ឬដើមខែតុលា ឆ្នាំ២០២៥ លោក អនុថីន នឹងមកពិនិត្យមើលស្ថានការណ៍នៅព្រំដែនដោយផ្ទាល់ ក្រោយពីកងទ័ពថៃរាយការណ៍បំភ្លៃថា កម្ពុជាបានចល័តកម្លាំងទ័ព និងបង្កហេតុ ។

លោកមើលឃើញស្ថានការណ៍ព្រំដែនកម្ពុជា-ថៃតានតឹងរហូតមក ភាគីថៃបានត្រៀមខ្លួនប្រឆាំងកម្ពុជារួចហើយ លោកជឿជាក់លើកងទ័ពថៃមានកម្លាំងខ្លាំងរឹងមាំ ។ កងទ័ពមានអំណាចពេញលេញក្នុងការប្រឆាំងជាមួយកម្ពុជាដោយពុំចាំបាច់រង់ចាំយូរ ខណៈរដ្ឋាភិបាលជាអ្នកគាំទ្រ និងបើកដៃឱ្យកងទ័ពសម្រេចចិត្តលើកិច្ចការព្រំដែនរហូតមក ។

គួរបញ្ជាក់ថា ឈ្មួញ និងពលរដ្ឋថៃដែលរងផលប៉ះពាល់ដោយសារការបិទព្រំដែនជាឯកតោភាគីពីសំណាក់កងទ័ពថៃ ពិតជាខកចិត្តយ៉ាងខ្លាំងដែលនាយករដ្ឋមន្ត្រីថ្មីគ្មានគោលនយោបាយច្បាស់លាស់ដើម្បីបញ្ចប់ជម្លោះព្រំដែនជាមួយកម្ពុជា ដោយសារខ្លាចពលរដ្ឋពុំគាំទ្រឱ្យធ្វើជានាយករដ្ឋមន្ត្រីយូរអង្វែង ។ នាយករដ្ឋមន្ត្រីថ្មីគួរតែចរចាស្វែងរកសន្តិភាពជាមួយប្រទេសជិតខាងដើម្បីឱ្យសេដ្ឋកិច្ចថៃងើបឡើងវិញ ប៉ុន្តែបែរជាជំរុញឱ្យជម្លោះកាន់តែអូសបន្លាយ និងយល់ស្របតាមទង្វើរបស់កងទ័ព និងក្រុមជ្រុលនិយម ។

កងទ័ពថៃថា ខ្លួនអនុវត្តកិច្ចព្រមព្រៀងឈប់បាញ់ និងចោទប្រកាន់កម្ពុជាបង្កហេតុមិនឈប់ឈរ ដូចជា ៖ បង្ហោះដ្រូននៅព្រំដែន បង្កប់មីន ចល័តទ័ព-សព្វាវុធ និងល្មើសអធិបតេយ្យថៃ ។ នេះជាការបិទបាំងទង្វើរបស់កងទ័ពថៃដែលតែងតែឈ្លានពានកម្ពុជា ខណៈកម្ពុជាមិនបានធ្វើសកម្មភាពបង្កហេតុ ឬធ្វើសកម្មភាពណាមួយដែលរំលោភបំពានកិច្ចព្រមព្រៀងបទឈប់បាញ់ដូចការចោទប្រកាន់របស់កងទ័ពថៃ និងសារព័ត៌មានថៃឡើយ ៕