ប្រទេសថៃ ៖ បញ្ហាមួយដែលតែងតែកើតឡើងនៅទីក្រុងបាងកក ហើយរដ្ឋាភិបាលថៃពុំអាចដោះស្រាយបាន គឺទីក្រុងនេះពោរពេញទៅដោយធូលីកខ្វក់យ៉ាងខ្លាំងដែលប៉ះពាល់សុខភាពពលរដ្ឋ និងភ្ញៀវទេសចរ ។ ចាប់ពីខែធ្នូ រហូតដល់ខែមីនា ជារៀងរាល់ឆ្នាំ ទីក្រុងបាងកកតែងតែប្រឈមជាមួយធូលីកខ្វក់ ដែលធ្វើឱ្យអាជ្ញាធរអំពាវនាវទៅកាន់ពលរដ្ឋចុះឈ្មោះធ្វើការពីផ្ទះ (Work from Home) ដើម្បីកាត់បន្ថយផលប៉ះពាល់សុខភាព ។ នេះបើតាមការចុះផ្សយរបស់សារព័ត៌មាន TNN Thailand នៅថ្ងៃទី៦ ខែតុលា ឆ្នាំ២០២៥ ។

តាមការអះអាងរបស់លោក ផនព្រំ វិគីតសេត ទីប្រឹក្សាអភិបាលក្រុងបាងកក គឺចាប់ពីខែធ្នូ រហូតដល់ខែមីនា ជារៀងរាល់ឆ្នាំ ទីក្រុងបាងកកទាំងមូលតែងតែប្រឈមនឹងធូលីកខ្វក់ PM 2.5 ។ ហេតុនេះ អាជ្ញាធរក្រុងបានកំណត់វិធានការជាច្រើនសម្រាប់ដោះស្រាយបញ្ហានេះកាន់តែច្បាស់លាស់ជាងមុន ក្នុងនោះមានវិធានការធ្វើការពីផ្ទះ (Work from Home) ផងដែរ ។

ទីក្រុងបាងកកនឹងឱ្យពលរដ្ឋសហការអនុវត្តវិធានការធ្វើការពីផ្ទះ និងជាជម្រើសឱ្យស្ថាប័នឯកជនចូលរួមថែរក្សាខ្យល់អាកាសបរិសុទ្ធ ដូចជា ៖

១-ធ្វើការពីផ្ទះពេលក្រុងបាងកកប្រកាសសុំការសហការពីពលរដ្ឋ ករណីធូលីកខ្វក់ PM 2.5 មានកម្រិតពណ៌ទឹកក្រូចនៅ៣៥តំបន់ (ឬស្មើតំបន់៧០% នៃទីក្រុងបាងកក)
២-ស្ថាប័នឯកជនប្រមូលព័ត៌មានលម្អិតពាក់ព័ន្ធនឹងចំនួនបុគ្គលិកធ្វើការពីផ្ទះ និងមធ្យោបាយធ្វើដំណើររបស់បុគ្គលិក ។

លោក ផនព្រំ វិគីតសេត ទីប្រឹក្សាអភិបាលក្រុងបាងកកបន្តថា កាលពីដើមឆ្នាំ២០២៥ អាជ្ញាធរក្រុងបាងកកបានអំពាវនាវឱ្យស្ថាប័នរដ្ឋាភិបាល និងក្រុមហ៊ុនឯកជន ចូលរួមចុះឈ្មោះឱ្យបុគ្គលិកធ្វើការពីផ្ទះ ។ ស្ថាប័ន និងក្រុមហ៊ុន ចំនួន២៧៨ ដែលមានបុគ្គលិកចំនួន៩៦,៣០៧នាក់បានចូលរួមចុះឈ្មោះធ្វើការពីផ្ទះ ក្រោយពីអភិបាលក្រុងបាងកក លោក ឆាត់ឆាតិ សិទ្ធីផាន់ ប្រកាសសុំការសហការធ្វើការពីផ្ទះ ចាប់ពីថ្ងៃទី២០ ដល់ថ្ងៃទី២១ ខែមករា ឆ្នាំ២០២៥ ដើម្បីដោះស្រាយបញ្ហាធូលីកខ្វក់ក្នុងទីក្រុង ។

លោករំពឹងថា នឹងមានពលរដ្ឋចំនួន៣សែននាក់ចុះឈ្មោះធ្វើការពីផ្ទះតាមរយៈគេហទំព័ររបស់ក្រុងបាងកក ។ ក្រៅពីនេះ លោកអំពាវនាវឱ្យពលរដ្ឋនៅទីក្រុងតាមដានស្ថានការណ៍ធូលីកខ្វក់ PM 2.5 និងសេចក្តីប្រកាសឱ្យពលរដ្ឋធ្វើការពីផ្ទះ តាមរយៈក្រុមបណ្តាញសង្គម Line ឬតាមដានហ្វេសប៊ុកផេកក្រុងបាងកក ឬការិយាល័យបរិស្ថានក្រុងបាងកក ឬមជ្ឈមណ្ឌលទិន្នន័យគុណភាពខ្យល់ក្រុងបាងកក ព្រមទាំងសាកសួរព័ត៌មានលម្អិតទៅកាន់ការិយាល័យបរិស្ថានក្រុងបាងកកតាមរយៈលេខទូរស័ព្ទ ៕

ប្រទេសថៃ ៖ កាលពីថ្ងៃទី៤ ខែតុលា ឆ្នាំ២០២៥ លោក អនុថីន ឆាន់វីរៈគូន នាយករដ្ឋមន្ត្រីថៃ និងជារដ្ឋមន្ត្រីក្រសួងមហាផ្ទៃ បានដឹកនាំមន្ត្រីរដ្ឋាភិបាលធ្វើដំណើរទៅខេត្តបុរីរាំ ដើម្បីស្តាប់បញ្ហាប្រឈមរបស់ពលរដ្ឋ ។ លោកសន្យាផ្តល់ប្រាក់ឧបត្ថម្ភឱ្យពលរដ្ឋរងផលប៉ះពាល់ដោយសារស្ថានការណ៍ព្រំដែនឆាប់ៗ និងប្រាប់ពលរដ្ឋឱ្យជឿជាក់លើកងទ័ពអាចការពារប្រទេស ខណៈពលរដ្ឋខេត្តបុរីរាំជំរុញរដ្ឋាភិបាលបិទព្រំដែនជាមួយកម្ពុជារយៈពេលយូរ និងធ្វើរបង ។ នេះបើតាមការចុះផ្សាយរបស់សារព័ត៌មាន Thai PBS កាលពីថ្ងៃទី៤ ខែតុលា ។

នាយករដ្ឋមន្ត្រីថៃ លោក អនុថីន ព្រមទាំងរដ្ឋមន្ត្រីជាច្រើនរូប សមត្ថកិច្ច កងទ័ព និងមន្ត្រីរាជការនៅខេត្តបុរីរាំ បានធ្វើដំណើរមកឃុំប្រាសាទ ស្រុកបានក្រួត ខេត្តបុរីរាំ ដើម្បីជួបពលរដ្ឋរងផលប៉ះពាល់ដោយសារការប៉ះទង្គិចនៅព្រំដែនកម្ពុជា-ថៃកាលពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៥ ហើយលោកបានស្តាប់បញ្ហាផ្សេងៗ និងតម្រូវការរបស់ពលរដ្ឋ ។ ពលរដ្ឋបានសំណូមពរឱ្យនាយករដ្ឋមន្ត្រីដោះស្រាយបញ្ហាព្រំដែនដើម្បីឱ្យពួកគេរស់នៅក្នុងជីវិតដូចមុន បើអាចធ្វើបាន ពួកគេនឹងជ្រើសរើសលោក អនុថីន ឱ្យធ្វើជានាយករដ្ឋមន្ត្រីបន្តទៀត ។

ក្រៅពីនេះ ពលរដ្ឋខេត្តបុរីរាំជំរុញរដ្ឋាភិបាលថៃបិទព្រំដែនជាមួយកម្ពុជារយៈពេលយូរដោយពុំចាំបាច់ពឹងផ្អែកកម្ពុជា (ផ្នែកសេដ្ឋកិច្ច) និងធ្វើរបងតាមបណ្តោយព្រំដែនកម្ពុជា-ថៃឱ្យជិត ។ បើរដ្ឋាភិបាលថៃចង់បើកព្រំដែនឡើងវិញ លុះត្រាតែមានសន្តិសុខ និងសណ្តាប់ធ្នាប់គ្រប់ច្រកព្រំដែនជាមុន ។

លោក អនុថីន បានសន្យាបម្រើការងារពលរដ្ឋអស់ពីសមត្ថភាពពេលលោកគ្រប់គ្រងរដ្ឋាភិបាល និងជួយសម្រួលទុក្ខលំបាកផ្សេងៗ លោកមិនចង់ឱ្យកងទ័ពនៅព្រំដែនបារម្ភពីពលរដ្ឋទេ ដើម្បីឱ្យកងទ័ពផ្តោតលើការប្រយុទ្ធជាមួយសត្រូវ ។ រីឯការផ្តល់ប្រាក់ឧបត្ថម្ភ គឺឆាប់ៗនេះ ក្រសួងហិរញ្ញវត្ថុនឹងផ្ទេរប្រាក់ចូលគណនីធនាគារពលរដ្ឋដែលរងផលប៉ះពាល់ និងចាកចេញពីផ្ទះសម្បែង ចំនួន៥,០០០បាត (ឬជាង១៥០ដុល្លារ) ក្នុង១គ្រួសារ ។

រដ្ឋាភិបាលថៃជឿជាក់លើកងទ័ពការពារសន្តិសុខ ពលរដ្ឋត្រូវធ្វើចិត្តឱ្យត្រជាក់ កុំដាក់សម្ពាធកងទ័ព ។ កងទ័ពដឹងយ៉ាងច្បាស់ថា គ្មានផ្លូវបាត់បង់ទឹកដីដាច់ខាត និងគ្មានថ្ងៃយល់ព្រមទេ ដោយពលរដ្ឋអាចសហការជាមួយកងទ័ព រីឯខ្លួនលោកជានាយករដ្ឋមន្ត្រី លោកនឹងបន្តបិទព្រំដែន រហូតដល់ថៃទទួលជ័យជម្នះ ។ រដ្ឋាភិបាលនឹងស្តាប់តាមមតិពលរដ្ឋ បើពលរដ្ឋឱ្យបិទព្រំដែន រដ្ឋាភិបាលនឹងបិទព្រំដែនបន្តរហូតស្ថានការណ៍ធូរស្រាល ។

គួរបញ្ជាក់ថា កាលពីថ្ងៃទី៣ ខែតុលា កន្លងមក នាយករដ្ឋមន្ត្រីថៃ លោក អនុថីន ឆាន់វីរៈគូន ព្រមទាំងមន្ត្រីពាក់ព័ន្ធជាច្រើនរូបបានធ្វើដំណើរទៅពិនិត្យស្ថានការណ៍ព្រំដែនកម្ពុជា-ថៃ និងសួរសុខទុក្ខកងទ័ពនៅស្រុកភ្នំដងរ៉ាក់ ខេត្តសុរិន្ទ ហើយលោកប្រាប់ទៅកងទ័ពថៃយកឈ្នះឱ្យបាន កុំចុះចាញ់ដាច់ខាត ។ បើកងទ័ពថៃបំពេញភារកិច្ចនៅព្រំដែនជោគជ័យ លោកនឹងអនុញ្ញាតឱ្យត្រឡប់ទៅផ្ទះវិញឆាប់ៗយកអធិបតេយ្យទៅជូនពលរដ្ឋ ។

ក្រោយពីនាយករដ្ឋមន្ត្រីថ្មី និងនាយករដ្ឋមន្ត្រីចាស់របស់ថៃបានប្រគល់អំណាចឱ្យកងទ័ពមានសិទ្ធិសម្រេចលើកិច្ចការព្រំដែន ធ្វើឱ្យវិស័យឯកជនថៃដែលរងផលប៉ះពាល់ដោយសារការបិទព្រំដែនបង្ហាញក្តីបារម្ភពីជម្លោះព្រំដែនអាចអូសបន្លាយពេលយូរ គ្មានពាណិជ្ជកម្មតាមព្រំដែន គ្មានភ្ញៀវទេសចរ និងធ្លាក់ចុះសេដ្ឋកិច្ចថៃកាន់តែខ្លាំង ៕

ប្រទេសថៃ ៖ បន្ទាប់ពីផ្លូវនៅទីក្រុងបាងកកបានបាក់ស្រុតជាបន្តបន្ទាប់ដោយសារការធ្វើផ្លូវរថភ្លើងក្រោមដីខ្វះបច្ចេកទេស នៅបណ្តាខេត្តរបស់ថៃបានរងឥទ្ធិពលខ្យល់ព្យុះ បណ្តាលឱ្យទឹកជំនន់លិចខ្លាំងរហូតដល់ដំបូលផ្ទះ ។ ខេត្តនគរស្រីអយុធ្យា ក៏ស្ថិតក្នុងចំណោមបណ្តាខេត្តលិចលង់ខ្លាំងដែរ ពលរដ្ឋនៅខេត្តនេះជួបទុក្ខលំបាកយ៉ាងខ្លាំងគ្មានកន្លែងសម្រាក ត្រូវសម្រាកលើទូកក្រោយពីទឹកជំនន់លិចផ្ទះជាច្រើនខែពុំស្រក ។

តាមការចុះផ្សាយរបស់សារព័ត៌មាន Daily News នៅថ្ងៃទី៦ ខែតុលា ឆ្នាំ២០២៥ ឱ្យដឹងថា ទឹកជំនន់បានលិចផ្ទះពលរដ្ឋនៅស្រុកបាងបាល ខេត្តនគរស្រីអយុធ្យា ជាច្រើនខែមកហើយ រហូតដល់ពលរដ្ឋត្រូវសម្រាកនៅលើទូក និងធ្វើដំណើរកាត់ទឹកជារៀងរាល់ថ្ងៃ ។ ពលរដ្ឋមួយចំនួនទៀតមិនអាចរស់នៅផ្ទះរបស់ខ្លួនបានទេ ត្រូវទៅសុំជ្រកកោនផ្ទះសាច់ញាតិ មិនដឹងថា តើទឹកជំនន់នឹងស្រកចុះពេលណា ។

រហូតមកដល់ថ្ងៃទី៦ ខែតុលា ពលរដ្ឋនៅខេត្តនគរស្រីអយុធ្យា នៅតែជួបទុក្ខលំបាកដោយសារទឹកជំនន់លិចផ្ទះ ក្រោយពីទំនប់ចៅព្រះយ៉ា នៅខេត្តឆ័យណាត នៅតែមានទឹកហូរក្នុងបរិមាណ២,៥០០ម៉ែត្រគូបក្នុង១វិនាទី ។ វាធ្វើឱ្យកម្រិតទឹកហូរឆ្លងកាត់ខេត្តនគរស្រីអយុធ្យាកើនឡើងខ្ពស់ជាបន្តបន្ទាប់ ដោយទន្លេចៅព្រះយ៉ា ទន្លេណាមណយ រួមទាំងប្រឡាយជាច្រើនមានកម្ពស់ទឹកកើនឡើងជាមធ្យមប្រមាណពី១០សង់ទីម៉ែត្រ ទៅ១៥សង់ទីម៉ែត្រ ហើយកម្ពស់ទឹកនឹងកើនឡើងបន្ថែមទៀត ។

តាមរបាយការណ៍មជ្ឈមណ្ឌលការពារ និងកាត់បន្ថយគ្រោះមហន្តរាយខេត្តនគរស្រីអយុធ្យា គឺមានស្រុកចំនួន១១, ឃុំ១៤១, ភូមិ៨២៦ និងពលរដ្ឋ៤៣,៨៨២គ្រួសារ បានរងផលប៉ះពាល់ដោយសារទឹកជំនន់ ។

តំបន់រងផលប៉ះពាល់ខ្លាំងបំផុត គឺស្រុកបាងបាល ខេត្តនគរស្រីអយុធ្យា ដែលទឹកបានលិចឃុំចំនួន១៦, ភូមិ១០១ និងប៉ះពាល់ពលរដ្ឋ៦,១៩៧គ្រួសារ ។ ផ្លូវចូលទៅទីប្រជុំជនត្រូវបានទឹកលិច ខណៈតំបន់ជាច្រើនលិចទឹកពី១ខែ ទៅ២ខែ ដែលធ្វើឱ្យពលរដ្ឋពិបាករស់នៅ បាត់បង់ប្រាក់ចំណូល ។ ភូមិមួយនៅឃុំវត្តតាក់គូ ស្រុកបាងបាល ខេត្តនគរស្រីអយុធ្យា ត្រូវបានទឹកលិចខ្លាំងរហូតដល់រនាបផ្ទះ ពលរដ្ឋត្រូវជិះទូកទៅទិញធ្វើការ ឬទិញអាហារ ។

លោក ប្រាសីត កិច្ចនិយម អាយុ៧៨ឆ្នាំ ជាជាងកាត់សក់ ប្រាប់ថា ទឹកបានលិចផ្ទះរបស់ខ្លួនរហូតដល់ជាន់ទី២ ពុំអាចប្រកបរបរកាត់សក់បានទេ ។ លោកគ្មានកន្លែងណាសម្រាកក្រៅពីលើទូកតូចមួយ ខណៈសម្ភារៈក្នុងផ្ទះខូចខាត ៕

ប្រទេសថៃ ៖ កងទ័ពឈ្លានពា.នថៃបានបិទព្រំដែនជាមួយកម្ពុជាច្រើនខែមកហើយក្រោមហេតុផលការពារអធិបតេយ្យ និងសុវត្ថិភាពពលរដ្ឋរបស់ខ្លួន ហើយរដ្ឋាភិបាលថៃតែងតែប្រាប់ឱ្យកម្ពុជាដោះស្រាយជម្លោះព្រំដែនទ្វេភាគីដោយពុំចាំបាច់មានប្រទេសផ្សេងៗចូលរួម ឬប្តឹងទៅតុលាការយុត្តិធម៌អន្តរជាតិ (ICJ) ។ ពេលកម្ពុជាប្រកាន់គោលជំហរដោះស្រាយជម្លោះព្រំដែនដោយសន្តិវិធី គោរពបទឈប់បា.ញ់ បែរជាថៃបំពានបទឈប់បា.ញ់ជាច្រើនលើក ថែមទាំងគំរា.មដាក់សម្ពាធសេដ្ឋកិច្ចកម្ពុជាតាមរយៈការបិទព្រំដែន ។

លោក សាន់ទិសុខ ម៉ារុងស៊ី អ្នកសារព័ត៌មានថៃ Top News បានជំរុញឱ្យរដ្ឋាភិបាលរបស់នាយករដ្ឋមន្ត្រី លោក អនុថីន ឆាន់វីរៈគូន បង្ហាញគោលជំហរច្បាស់លាស់ពីការត្រៀមបិទទ្វារសេដ្ឋកិច្ចកម្ពុជា ដោយអ្នកសារព័ត៌មានរូបនេះថា បើថៃកាន់តែដាក់សម្ពាធសេដ្ឋកិច្ចកម្ពុជាខ្លាំងកម្រិតណា នឹងកាន់តែបិទទ្វារសេដ្ឋកិច្ចកម្ពុជាខ្លាំងកម្រិតនោះ ។

កាលពីថ្ងៃទី៥ ខែតុលា ឆ្នាំ២០២៥ លោក សាន់ទិសុខ បានសរសេរក្នុងហ្វេសប៊ុករបស់ខ្លួនថា ដល់ពេលវេលាដែលថៃត្រូវដាក់សម្ពាធកម្ពុជាឱ្យខ្លាំងបំផុត ដោយការបិទទ្វារសេដ្ឋកិច្ចកម្ពុជា ។ លោកគាំទ្រឱ្យរដ្ឋាភិបាល លោក អនុថីន បង្ហាញគោលជំហរច្បាស់លាស់ត្រៀមខ្លួនជាស្រេចក្នុងការអភិវឌ្ឍសេដ្ឋកិច្ចថៃដោយពុំចាំបាច់មានកម្ពុជា ។

លោកក៏គាំទ្រគ្រប់វិស័យរបស់ថៃឱ្យកំណត់គោលជំហរច្បាស់លាស់ពីការអភិវឌ្ឍសេដ្ឋកិច្ចដោយគ្មានកម្ពុជាដើម្បីដាក់សម្ពាធកម្ពុជា ដោយអ្នកសារព័ត៌មានរូបនេះចោទប្រកាន់កម្ពុជាគំរាមកំហែងប្រទេសខ្លួន ។ កម្ពុជាមានទុនបម្រុងអន្តរជាតិ (Foreign Exchange Reserves) ចំនួន២៤,៧០០លានដុល្លារអាមេរិកកាលពីខែមិថុនា ឆ្នាំ២០២៥ ខណៈថៃមានទុនបម្រុងអន្តរជាតិរហូតដល់២៨៩,៦៨១លានដុល្លារអាមេរិក ។

អ្នកសារព័ត៌មានថៃរូបនេះថា ការបិទព្រំដែនធ្វើឱ្យសេដ្ឋកិច្ចកម្ពុជារង្គោះរង្គើ កាត់ផ្តាច់ពាណិជ្ជកម្ម ប៉ះពាល់ការផលិត ការដឹកជញ្ជូនវត្ថុធាតុដើម ការនាំចេញ និងវិស័យទេសចរណ៍ ហើយសេដ្ឋកិច្ចកម្ពុជាដែលពឹងផ្អែកលើការនាំចេញសម្លៀកបំពាក់ ស្បែកជើង ទេសចរណ៍ កសិកម្ម អចលនទ្រព្យ កំពុងតែធ្លាក់ចុះ ។ បច្ចុប្បន្ន ថៃពុំដឹងថា តើទុនបម្រុងអន្តរជាតិរបស់កម្ពុជាធ្លាក់ចុះប៉ុន្មានទេ ហើយកម្ពុជាបានទម្លាក់ការព្យាករណ៍សេដ្ឋកិច្ចមកនៅត្រឹម៥% ពីអត្រា៦.៣% ខណៈមូលនិធិរូបិយវត្ថុអន្តរជាតិ (IMF) រំពឹងថា នឹងមានកំណើនជាង៤% ។

នាយករដ្ឋមន្ត្រីថៃ លោក អនុថីន បានចុះពិនិត្យមើលស្ថានការណ៍ព្រំដែនកម្ពុជា-ថៃនាពេលថ្មីៗនេះ ហើយលោកប្រាប់ទៅពលរដ្ឋពុំបើកព្រំដែនដាច់ខាត បើកម្ពុជាពុំឯកភាពតាមលក្ខខណ្ឌរបស់ថៃ ។ លោកយល់ថា ពាណិជ្ជកម្មថៃបច្ចុប្បន្នមិនចាំបាច់បើកព្រំដែនទេ ប៉ុន្តែលោកនឹងរកវិធីជួយសេដ្ឋកិច្ចព្រំដែនឱ្យងើបឡើងវិញពេលបិទព្រំដែន ដូចជា ៖ ស្វែងរកទីផ្សារថ្មី ផ្តល់ប្រាក់ឧបត្ថម្ភ និងការងារឱ្យពលរដ្ឋ រួមទាំងជំរុញទេសចរណ៍ក្នុងស្រុក ។

តាំងពីរដ្ឋាភិបាលរបស់លោកស្រី ផេថងថាន ស៊ីណាវ៉ាត់ បាត់បង់អំណាច គឺគោលជំហរប្រទេសថៃរឹងមាំទៅកាន់ទិសដៅតែមួយ តាំងពីការទូត កងទ័ព ពាណិជ្ជកម្ម ធនធានធម្មជាតិ ការងារ និងមេដឹកនាំរដ្ឋាភិបាលថៃ ។ បើថៃបង្កើនការដាក់សម្ពាធឱ្យខ្លាំង គឺវានឹងធ្វើឱ្យការវិនិយោគ ការជួលកម្លាំងពលកម្ម ទេសចរណ៍ និងទំនិញនៅកម្ពុជាកាន់តែឡើងថ្លៃ ដែលនេះជាយុទ្ធសាស្ត្រសេដ្ឋកិច្ចថៃពុំចាំបាច់មានកម្ពុជា ហើយកម្ពុជានឹងចុះចាញ់តាំងពីមិនទាន់ប្រយុទ្ធ ។ នេះបើតាមការលើកឡើងរបស់លោក សាន់ទិសុខ ។

គួរបញ្ជាក់ថា ជ.នជាតិថៃមួយចំនួនរៀនសូត្រចេះដឹងជ្រៅជ្រះ ប៉ុន្តែនិយាយដូចអ្នកគ្មានចំណេះដឹង ដោយពួកគេលើកឡើងពីការបិទព្រំដែនបានដាក់សម្ពាធសេដ្ឋកិច្ចកម្ពុជា គឺការបិទទ្វារមិនឱ្យកម្ពុជានាំចេញទំនិញ និងបិទទ្វារទេសចរណ៍ ។ ប៉ុន្តែប្រទេសរងផលប៉ះពាល់សេដ្ឋកិច្ចខ្លាំងដោយសារការបិទព្រំដែន គឺថៃខ្លួនឯង សេដ្ឋកិច្ចថៃកំពុងដាំក្បាលចុះ បាត់បង់ចំណូលពីពាណិជ្ជកម្មព្រំដែន ទេសចរណ៍ធ្លាក់ចុះ បាត់បង់ទំនុកចិត្តពីវិនិយោគិនបរទេស និងពលរដ្ឋគ្មានការងារធ្វើស្រែករកជំនួយ ។

ផ្ទុយទៅវិញ ការបិទព្រំដែនធ្វើឱ្យពលរដ្ឋកម្ពុជាងាកមកគាំទ្រទំនិញក្នុងស្រុកកាន់តែខ្លាំង ដែលធ្វើឱ្យក្រុមហ៊ុនសហគ្រាសមានទឹកចិត្តក្នុងការផលិតទំនិញលក់ក្នុងស្រុកដើម្បីជំរុញសេដ្ឋកិច្ចជាតិ ។ ស្របពេលជ.នជាតិថៃព្យាយាមដាក់សម្ពាធសេដ្ឋកិច្ចកម្ពុជា យើងជាពលរដ្ឋកម្ពុជាត្រូវតែព្យាយាមដាក់សម្តាធសេដ្ឋកិច្ចថៃវិញដោយឈប់ទិញទំនិញថៃជារៀងរហូត ៕

ក្រៅពីប្រាសាទតាមាន់តូច ប្រាសាទតាមាន់ធំ ប្រាសាទតាក្របី និងប្រាសាទព្រះវិហារ ប្រទេសថៃកំពុងទាមទារយកប្រាសាទខ្មែរមួយទៀត នៅលើជួរភ្នំដងរ៉ែក។

ប្រាសាទខ្នារ ភូមិអូរទឹកចោល សង្កាត់កូនក្រៀល ក្រុងសំរោង ខេត្តឧត្តរមានជ័យ ទល់មុខនឹង ស្រុកកាបឈើង ខេត្តសុរិន្ទ ប្រទេសថៃ។

ប្រាសាទនេះ ឈរនៅលើកំពូលភ្នំកម្ពស់ប្រមាណជាង៨០០ម៉ែត្រ ដែលពលរដ្ឋកម្ពុជាអាចធ្វើដំណើរឡើងបានតាមរយៈជណ្ដើរឈើមួយដែលមានចំនួន១១៨១កាំ។

មេភូមិភាគ២ថៃថ្មី បានអះអាងថាប្រាសាទនេះមិនមែនជារបស់ប្រទេសណាម្នាក់កាន់កាប់នោះទេ ដោយកំពុងស្ថិតនៅតំបន់អង្កេតការណ៍រួមគ្នា។

គួរបញ្ជាក់ថា បច្ចុប្បន្នកងទ័ពកម្ពុជាកំពុងឈរជើងនៅទិសខាងត្បូង ពីតំបន់ប្រាសាទចុះទៅក្រោម ស្របពេលកងទ័ពថៃនៅទិសខាងជើង ក្បែរប្រាសាទដោយគ្រប់គ្រងស្រះទឹកចំនួន២៕