បាងកក៖ ស្ថានទូតចិនប្រចាំប្រទេសថៃ នៅថ្ងៃអង្គារនេះ បានចេញការព្រមានមួយ ដោយជំរុញឱ្យភ្ញៀវទេសចរជនជាតិចិន ជៀសវាងកញ្ចប់ដំណើរកំសាន្តថោ.កៗព្រោះអាចនឹងនាំទុក្ខដល់ខ្លួន បន្ទាប់ពីវីដេអូដ៏ល្បីមួយបានបង្ហាញថា ហ្គាយនៅថៃម្នាក់ បានគាបសង្កត់ភ្ញៀវទេសចរចិននៅក្នុងឡានក្រុងឲ្យទិញទំនិញតាមគេណែនាំ ដើម្បីគេទទួលបានកម្រៃជើងសារពីអ្នកលក់។

យោងតាមទំព័រហ្វេសប៊ុករបស់ស្ថានទូតចិនប្រចាំនៅប្រទេសថៃ នៅថ្ងៃទី15 ខែតុលា ឆ្នាំ2025 បានបង្ហោះសំណេរដែលមានចំណងជើងថា៖ «ការព្រមានស្ដីពីមគ្គុទ្ទេសក៍ទេសចរណ៍សម្រាប់ភ្ញៀវទេសចរចិននៅក្នុងប្រទេសថៃ» នៅក្នុងសំណេរនោះផងដែរ ស្ថានទូតចិនបានរៀបរាប់ថា៖ កាលពីប៉ុន្មានថ្ងៃមុន វីដេអូមួយបានផ្សព្វផ្សាយពេញប្រព័ន្ធអ៊ីនធឺណែត ដែលបង្ហាញពីភ្ញៀវទេសចរចិនត្រូវបានគេបង្ខិតបង្ខំឱ្យទិញទំនិញក្នុងអំឡុងពេលនៃដំណើរកំសាន្តរបស់ពួកគេនៅក្នុងប្រទេសថៃ។

ស្ថានទូតចិនយកចិត្តទុកដាក់ចំពោះបញ្ហានេះ ហើយបានទាក់ទងទៅប៉ូលិសទេសចរណ៍ និងអាជ្ញាធរទេសចរណ៍នៃប្រទេសថៃភ្លាមៗ ដើម្បីស៊ើបអង្កេតលើបញ្ហានេះ។ បន្ទាប់ពីការស៊ើបអង្កេតរបស់ប្រទេសថៃ អាជ្ញាធរថៃបានកំណត់ថា មគ្គុទ្ទេសក៍ទេសចរណ៍នោះមិនមានអាជ្ញាប័ណ្ណជាមគ្គុទ្ទេសក៍ទេសចរណ៍របស់ថៃទេ និងបានព្យាយាមដាក់សម្ពាធភ្ញៀវទេសចរឱ្យទិញទំនិញ ដើម្បីទាមទារកម្រៃជើងសារពីការទិញ។

ជាមួយគ្នានេះ ស្ថានទូតចិនប្រចាំនៅប្រទេសថៃក៏បានដាស់តឿនដល់ភ្ញៀវទេសចរទាំងអស់ កុំឲ្យចាញ់បោ.ក «កញ្ចប់ដំណើរទេសចរណ៍ថោកៗ» ធ្វើដំណើរមកកាន់ថៃឲ្យសោះ។ គួរជ្រើសរើសក្រុមហ៊ុនទេសចរណ៍ណាដែលមានអាជ្ញាប័ណ្ណសម្រាប់ដំណើរទេសចរណ៍ក្រៅប្រទេស កេរ្តិ៍ឈ្មោះ ផ្តល់ជូននូវដំណើរទេសចរណ៍ប្រកបដោយគុណភាពក្នុងតម្លៃសមរម្យ និងដោយមានកិច្ចសន្យាផ្លូវការ។

គួរជម្រាបថា មិនមែនជារឿងថ្មីនោះទេដែលភ្ញៀវទេសចរបរទេសទៅលេងប្រទេសថៃទទួលរងនូវការបោ.កប្រាស់ និងការគំរាមកំហែងពីសុវត្ថិភាពនោះ។ តាមរយៈការស្ទង់មតិពីភ្ញៀវទេសចរមកពីជុំវិញពិភពលោកដែលធ្លាប់ទៅលេងនៅថៃបានបង្ហាញថា ប្រទេសថៃជាពិសេសនៅទីក្រុងបាងកក និងទីប្រជុំជនអ៊ូអរមួយចំនួន មានករណីឆបោ.កភ្ញៀវទេសចរបរទេសយ៉ាងញឹកញាប់គួរឲ្យកត់សម្គាល់។

ជាមួយគ្នានេះ ភ្ញៀវទេសចរដែលមកពីប្រទេសមួយចំនួនមានការខ្លាចរអា និងបានប្រាប់តៗគ្នាឲ្យជៀសវាងការធ្វើដំណើរមកលេងថៃផងដែរ បន្ទាប់ពីព័ត៌មាននៃការវា.យធ្វើបាប ដូចជាដុត និងចា.ក់ភ្ញៀវទេសចរ និងបំពានលើភ្ញៀវទេសចរបរទេសក្នុងប្រទេសថៃដោយពលរដ្ឋថៃបានចុះផ្សាយជាបន្តបន្ទាប់។

កត្តាទាំងនេះ បានជំរុញឲ្យថៃក្លាយជាប្រទេសមួយដែលអសន្តិសុខសម្រាប់ភ្ញៀវទេសចរមកកំសាន្ត បើទោះជាថ្នាក់ដឹកនាំរបស់ប្រទេសនេះបានប្រកាសក្ដែងៗដដែលជាដដែលថា ប្រទេសរបស់ខ្លួនមានសុវត្ថិភាព និងមានប្រជាជនរួសរាយរាក់ទាក់ក៏ដោយ៕

ក្រុមហ៊ុន Hida Food JSC នៅប្រទេសវៀតណាម ត្រូវបានកម្លាំងសមត្ថកិច្ចទីក្រុងហាណូយបានចុះបង្ក្រាប ក្រោយរកឃើញមានចាក់សារធាតុគីមីចូលទៅក្នុងសាច់ក្របី ហើយលក់ចេញជាសាច់គោ Wagyuជប៉ុនលំដាប់ខ្ពស់។

ក្រុមហ៊ុននេះ បាននាំចូលសាច់ក្របីពីប្រទេសឥណ្ឌាក្នុងតម្លៃថោក រួចបានចាក់គីមីចូលឱ្យក្លាយទៅជាសាច់ Wagyu ហើយយកលក់ថ្លៃ៤ដងនៃតម្លៃដើម។

សាច់ក្របីឥណ្ឌា ត្រូវបានទិញចូលក្នុងតម្លៃប្រមាណជា៤.៧០ដុល្លារ ក្នុងមួយគីឡូក្រាម ហើយចាក់សារធាតុគីមីបង្កើតជាខ្លាញ់ រួចយកលក់នៅក្នុងទីផ្សារក្នុងតម្លៃចន្លោះពី១៥-២០ដុល្លារក្នុងមួយគីឡូក្រាម។

តាមការស៊ើបអង្កេត ពីចន្លោះខែឧសភា ឆ្នាំ២០២៤ ក្រុមហ៊ុន Hida Food JSC បានផលិតសាច់គោWagyu ក្លែងក្លាយចំនួន ១៤ តោន ដោយលក់នៅទីក្រុងហាណូយ ដាណាង ញ៉ាត្រាង និងទីក្រុងហូជីមិញ។

នៅក្នុងប្រតិបត្តិការនេះ សមត្ថកិច្ចវៀតណាម បានរឹបអូសសាច់ក្របី និងសាច់គោក្លែងក្លាយចំនួន ៦៥ តោន និងសារធាតុគីមីចំនួន ១៧ តោន៕

ប្រទេសថៃ ៖ សង្គ្រាមកម្ពុជា-ថៃនៅតំបន់ព្រំដែនកាលពីខែកក្កដា ឆ្នាំ២០២៥ កើតឡើងដោយសារកងទ័ពថៃចាប់ផ្តើមបា.ញ់ប្រ.ហារមុនមកលើកម្ពុជា ខណៈកងទ័ពកម្ពុជាប្រើប្រាស់សិទ្ធិការពារខ្លួន ដោយកងទ័ពថៃបានប្រើប្រាស់សព្វាវុ.ធគ្រប់ប្រភេទ ថែមទាំងប្រើប្រាស់យន្តហោះចម្បាំង F-16 ទម្លាក់គ្រា.ប់បែកមកលើទីតាំងកងទ័ព និងតំបន់ស៊ីវិលកម្ពុជា ។ ប៉ុន្តែបែរជានិយាយលាបពណ៌ ចោទប្រកាន់កម្ពុជាបា.ញ់មុន ហើយកងទ័ពអាកាសថៃថា ការប្រើប្រាស់យន្តហោះចម្បាំងវាយប្រ.ហារកម្ពុជា គឺស្របច្បាប់អន្តរជាតិ និងដើម្បីការពារខ្លួន ។

ក្រោយមានការចុះផ្សាយក្នុងសារព័ត៌មាន និងបណ្តាញសង្គមថា សង្គ្រាមនៅតំបន់ព្រំដែនកម្ពុជា-ថៃកន្លងមក កើតឡើងដោយសារកងទ័ពថៃជាអ្នកបាញ់មុនមកលើកម្ពុជាដោយប្រើប្រាស់យន្តហោះចម្បាំង F-16 នោះ អ្នកនាំពាក្យកងទ័ពអាកាសថៃ លោក ចាក់គ្រីត ថាំម៉ាវិឆ័យ បាននិយាយកាលពីថ្ងៃទី១៥ ខែតុលា ឆ្នាំ២០២៥ ថា ការប្រើប្រាស់យន្តហោះចម្បាំង F-16 និង Gripen វាយប្រហារកម្ពុជា គឺជាការទប់ទល់នឹងការវាយប្រហាររបស់កងទ័ពកម្ពុជា ។

លោក ចាក់គ្រីត បានចោទប្រកាន់កងទ័ពកម្ពុជាប្រើប្រាស់គ្រាប់រ៉ុក្កែត និងកាំភ្លើងធំបាញ់លើតំបន់ស៊ីវិលរបស់ថៃ ដូចជា ៖ បាញ់គ្រាប់រ៉ុកែត BM-21 មកលើស្រុកកាបឈើង ខេត្តសុរិន្ទ កាលពីថ្ងៃទី២៤ ខែកក្កដា បណ្តាលឱ្យពលរដ្ឋថៃស្លាប់២នាក់ និងរងរបួស២នាក់ ។ លោកថែមទាំងចោទប្រកាន់កងទ័ពកម្ពុជាបាញ់លើតំបន់ស៊ីវិលជាបន្តបន្ទាប់ ជាពិសេស បាញ់ហាងលក់ទំនិញ 7-11 ធ្វើឱ្យពលរដ្ឋថៃស្លាប់៧នាក់ និងរងរបួសជាច្រើននាក់ ។

កងទ័ពអាកាសថៃក៏សម្រេចចិត្តវាយប្រហារកម្ពុជាតាមផ្លូវអាកាស ដោយកំណត់គោលដៅកំទេចទីតាំងកងទ័ពកម្ពុជាដើម្បីបំផ្លាញសមត្ថភាពប្រតិបត្តិការ ក្រោយពីភាគីថៃចោទប្រកាន់ថា សកម្មភាពរបស់កងទ័ពកម្ពុជាបានបំពានអធិបតេយ្យ និងធ្វើឱ្យពលរដ្ឋថៃគ្មានសុវត្ថិភាព ក៏ដូចជាខូចខាតទ្រព្យសម្បត្តិ ។ យន្តហោះចម្បាំង F-16 របស់ថៃបានទម្លាក់គ្រាប់បែកលើទីតាំងកងទ័ពកម្ពុជាលើកដំបូងកាលពីវេលាម៉ោង១០និង៣៨នាទី ថ្ងៃទី២៤ ខែកក្កដា ដែលកងទ័ពអាកាសថៃអួតអាងការទម្លាក់គ្រាប់បែកចំគោលដៅ ។

ការប្រើប្រាស់យន្តហោះចម្បាំងវាយប្រ.ហារកម្ពុជា គឺស្របច្បាប់អន្តរជាតិ ថៃប្រើប្រាស់ដើម្បីការពារខ្លួនតាមមាត្រា៥១ នៃធម្មនុញ្ញអង្គការសហប្រជាជាតិ និងដោយសារចាំបាច់ ព្រមទាំងបែងចែករវាងទីតាំងកងទ័ពកម្ពុជា និងតំបន់ស៊ីវិលកម្ពុជា ។ សូមពលរដ្ឋថៃជឿជាក់មកលើកងទ័ពអាកាសក្នុងការត្រៀមខ្លួនប្រយុទ្ធគ្រប់ពេលវេលាដើម្បីការពារឯករាជ្យ អធិបតេយ្យជាតិ ការពារជីវិត និងទ្រព្យសម្បត្តិពលរដ្ឋ រួមទាំងកំណត់លក្ខខណ្ឌយុទ្ធសាស្ត្រសម្រាប់ការចរចាឈានទៅរកសន្តិភាព ។ នេះបើតាមការលើកឡើងរបស់អ្នកនាំពាក្យកងទ័ពអាកាសថៃ ។

គួរបញ្ជាក់ថា លោកស្រី អាំងខាណា សមាជិកព្រឹទ្ធសភាថៃបាននិយាយការពិតប្រាប់សារព័ត៌មាន Amarin កាលពីថ្ងៃទី១៤ ខែតុលា ថា លោកស្រីមិនកាន់ជើងកម្ពុជាទេ ប៉ុន្តែអ្វីដែលនិយាយ សុទ្ធតែជាការពិត គឺថៃជាអ្នកវាយប្រហារមុនមកលើកម្ពុជា ហើយថែមទាំងបើកការវាយប្រហារដោយយន្តហោះចម្បាំង F-16 លើកម្ពុជា ។ ការនិយាយការពិត ទើបពេលនេះ លោកស្រីរងការរិះគន់យ៉ាងខ្លាំងពីក្រុមជ្រុលនិយមវង្វេងប្រវត្តិសាស្ត្ររួមគ្នាថ្កោលទោស ។

សង្គ្រាមកម្ពុជា-ថៃកាលពីខែកក្កដា ឆ្នាំ២០២៥ កងទ័ពថៃបានប្រើប្រាស់សព្វាវុធធុនធ្ងន់មកលើដែនអធិបតេយ្យកម្ពុជា ជាបន្តបន្ទាប់ ដោយប្រើប្រាស់យន្តហោះចម្បាំង F-16 គ្រាប់បែកចង្កោម ដ្រូនអត្តឃាត គ្រាប់រ៉ុក្កែត កាំភ្លើងធំ និងបាញ់ផ្សែងពុល មកលើទីតាំងកងទ័ព លំនៅឋានពលរដ្ឋកម្ពុជា រួមទាំងវត្តអារ៉ាម ។ ក្រោយពីមានការអន្តរាគមន៍ពីប្រធានាធិបតីអាមេរិក លោក Donald Trump ភាគីទាំងពីរក៏ធ្វើកិច្ចព្រមព្រៀងបទឈប់បាញ់ដោយឥតលក្ខខណ្ឌ ប៉ុន្តែថៃល្មើសបទឈប់បាញ់រហូតមក ។

លោក Trump ថ្លែងថា ថៃនៅតែព្យាយាមឈ្លានពានកម្ពុជា ហើយមិនអើពើនឹងការគោរពបទឈប់បាញ់ដែលរៀបចំដោយម៉ាឡេស៊ី ។ វានឹងធ្វើឱ្យថៃក្លាយជាប្រទេសមិនគោរពច្បាប់អន្តរជាតិ លោកនឹងអំពាវនាវឱ្យពិភពលោក ដាក់ទណ្ឌកម្មប្រឆាំងថៃក្នុងអំឡុងកិច្ចប្រជុំកំពូលអាស៊ាននាខែតុលា នៅម៉ាឡេស៊ី ៕

ប្រទេសថៃ ៖ វាបានក្លាយជាទម្លាប់ដែលបុគ្គលណាម្នាក់នៅប្រទេសថៃហ៊ាននិយាយការពិតពីថៃឈ្លានពាន គឺបុគ្គលនោះតែងតែរងការរិះគ.ន់វាយប្រ.ហារយ៉ាងចាស់ដៃពីក្រុមជ្រុលនិយម រហូតបុគ្គលផ្សេងទៀតលែងហ៊ានបញ្ចេញមតិ ទោះដឹងថាកងទ័ពថៃបើកការឈ្លា.នពានកម្ពុជាក្តី ។ លោកស្រី អាំងខាណា នីឡៈផៃជីត សមាជិកព្រឹទ្ធសភាថៃ បានរងការគំរា.មសម្លា.ប់ ក្រោយនិយាយថា ថៃវាយប្រ.ហារកម្ពុជាមុនដោយប្រើប្រាស់យន្តហោះចម្បាំង F-16 ហើយលោកស្រីបារម្ភពីការបើកសំឡេងរំខានពលរដ្ឋខ្មែរនៅព្រំដែន បែរជារងការថ្កោលទោស គំរា.មបញ្ចប់ជីវិត ដែលធ្វើឱ្យអ្នករាយការណ៍ពិសេស UN បារម្ភពីសុវត្ថិភាពសមាជិកព្រឹទ្ធសភារូបនេះ ។

ថ្មីៗនេះ លោកស្រី អាំងខាណា សមាជិកព្រឹទ្ធសភាថៃបានដាស់តឿនរដ្ឋាភិបាលរបស់ខ្លួនឱ្យគិតគូរចំពោះសកម្មភាពក្រុមជ្រុលនិយមឡើងវិញ អំពីការបើកសំឡេងផ្សេងៗរំខានសុខភាពផ្លូវកាយ ផ្លូវចិត្តដល់កុមារ ស្ត្រី ចាស់ជរា អ្នកជំងឺ និងជនពិការ នៅភូមិជោគជ័យ និងភូមិព្រៃចាន់ ។ លោកស្រីបញ្ជាក់ថា សកម្មភាពរបស់ក្រុមជ្រុលនិយមបានបំពានយ៉ាងធ្ងន់ធ្ងរលើបទឈប់បាញ់ និងបំពានគោលការណ៍ធម្មនុញ្ញនៃអង្គការសហប្រជាជាតិ តើរដ្ឋាភិបាលថៃនឹងដោះស្រាយបញ្ហានេះជាមួយកម្ពុជាលើឆាកអន្តរជាតិបែបណា បើអន្តរជាតិដឹងរឿងនេះ ។

លោកស្រីបានសរសេរក្នុងបណ្តាញសង្គមពីការបណ្តោយឱ្យ Influencer ធ្វើសកម្មភាពដាក់សម្ពាធ ឬបន្លាចដោយការបើកសំឡេងខ្មោចស្រែក សំឡេងយន្តហោះចម្បាំង ឆ្កែលូ ពេលកម្ពុជា-ថៃកំពុងមានជម្លោះ ដែលអាចជាបញ្ហាប្រឈមដល់រដ្ឋាភិបាលថៃ ជាពិសេស រដ្ឋមន្ត្រីក្រសួងការបរទេសថៃក្នុងការចរចារកដំណោះស្រាយរួមគ្នាជាមួយកម្ពុជា ។ ប៉ុន្តែក្រោយពីលោកស្រីនិយាយការពិតបែរជាសង្គមថៃរិះគន់វាយប្រហារយ៉ាងចាស់ដៃ ថែមទាំងប្រមាថជីវិតលោកស្រីទៀតផង ។

តាមការចុះផ្សាយរបស់សារព័ត៌មាន Matichon កាលពីថ្ងៃទី១៥ ខែតុលា ឆ្នាំ២០២៥ ឱ្យដឹងថា អ្នករាយការណ៍ពិសេសរបស់អង្គការសហប្រជាជាតិ (UN) បារម្ភពីសុវត្ថិភាពលោកស្រី អាំងខាណា សមាជិកព្រឹទ្ធសភាថៃ ក្រោយក្រុមជ្រុលនិយមគំរា.មសម្លា.ប់ ដោយអ្នករាយការណ៍ពិសេសថា លោកស្រីគួរតែទទួលបានការការពារ មិនមែនត្រូវសង្គមថ្កោលទោសទេ ។

កាលពីថ្ងៃទី១៥ ខែតុលា អ្នករាយការណ៍ពិសេសអង្គការសហប្រជាជាតិ លោកស្រី Mary Lawlor បានសរសេរក្នុងហ្វេសប៊ុកផេកឈ្មោះ «Mary Lawlor UN Special Rapporteur for human rights defenders» ថា លោកស្រីបារម្ភយ៉ាងខ្លាំងពីការគំរាមសម្លា.ប់ និងរិះគន់វាយប្រហារតាមបណ្តាញសង្គមលើលោកស្រី អាំងខាណា សមាជិកព្រឹទ្ធសភា គឺជាអតីតមន្ត្រីសិទ្ធិមនុស្ស និងអ្នកការពារសិទ្ធិស្ត្រីនៅប្រទេសថៃ ដែលបញ្ចេញមតិការពិត ផ្តល់ភាពយុត្តិធម៌ និងសេចក្តីថ្លៃថ្នូររបស់មនុស្ស មិនមែនជាឧក្រិដ្ឋកម្មទេ ។ លោកស្រី អាំងខាណា គួរតែទទួលបានការការពារ មិនមែនរងការថ្កោលទោស ។

គួរបញ្ជាក់ថា ពលរដ្ឋថៃនៅភូមិណងចាន់ (ទល់មុខភូមិជោគជ័យ) បានស្តីបន្ទោសលោកស្រី អាំងខាណា ដែលមិនគាំទ្របុគ្គល កាន់ ចមផ្លាំង Influencer បើកសំឡេងរំខានពលរដ្ឋខ្មែរ ។ ពលរដ្ឋថៃទាំងនេះរិះគន់លោកស្រី អាំងខាណា អង្គុយតែក្នុងម៉ាស៊ីនត្រជាក់ និងចង់ឱ្យចុះពិនិត្យមើលដោយផ្ទាល់ថា តើ កាន់ ចមផ្លាំង ហត់នឿយកម្រិតណាក្នុងការឈ្លានពានទឹកដីកម្ពុជា ។ ពួកគេថែមទាំងគំរាមទម្លាក់លោកស្រីពីតំណែង និងបណ្តេញឱ្យមករស់នៅកម្ពុជា ដោយសារមិនចេះនិយាយលាបពណ៌ ។

កន្លងមក ក្រុមអ្នកនយោបាយមកពីគណបក្សប្រឆាំង ក៏រងការរិះគន់យ៉ាងចាស់ដៃផងដែរពីក្រុមជ្រុលនិយមថៃ គ្រាន់តែសំណូមពរឱ្យរដ្ឋាភិបាលថៃបើកព្រំដែនឡើងវិញដោយសារសេដ្ឋកិច្ចថៃធ្លាក់ចុះខ្លាំង គ្មានចំណូល ពលរដ្ឋអត់ឃ្លាន ។ ក្រុមជ្រុលនិយមថៃពុំទទួលស្គាល់ការពិតទេ និងតែងវាយប្រហារអ្នកហ៊ាននិយាយពីថៃឈ្លានពានកម្ពុជា ទើបគ្មានអ្នកហ៊ានបញ្ចេញមតិ ៕

ធនាគារ ព្រីនស៍ បានប្រកាសពីគោលជំហររបស់ខ្លួនក្នុងដំណើរប្រតិបត្តិការដោយឯករាជ្យភាព និងប្តេជ្ញារក្សាភាពស្មោះត្រង់ ស្ថិរភាពហិរញ្ញវត្ថុ និងការពារសិទិ្ធប្រយោជន៍ជូនដល់អតិថិជនគ្រប់រូប បើទោះជាប្រធានសម្ព័ន្ធ ព្រីនស៍ ហូលឌីងគ្រុប ដែលជាក្រុមហ៊ុនមេ កំពុងស្ថិតក្រោមការតាមចាប់ខ្លួនរបស់សហរដ្ឋអាមេរិក និងត្រូវបានគេរឹបអូសទ្រព្យសម្បត្តិជារូបិយវត្ថុ Bitcoin សរុបអស់ 15ពាន់លានដុល្លារក៏ដោយ។

យោងតាមសេចក្ដីប្រកាសរបស់ធនាគារ ព្រីនស៍ (Prince Bank Plc.) នៅរសៀលថ្ងៃទី15 ខែតុលានេះបានឲ្យដឹងថា ធនាគារនឹងនៅតែបន្តប្រតិបត្តិការយ៉ាងឯករាជ្យ ស្របច្បាប់ និងមានអាជ្ញាប័ណ្ណពេញលេញ ជាធនាគារពាណិជ្ជក្រោមការត្រួតពិនិត្យរបស់ធនាគារជាតិនៃកម្ពុជា (NBC)។ ជាមួយគ្នានេះ ធនាគារបានបញ្ជាក់ថា សម្រាប់ប្រតិបត្តិការធនាគារទាំងអស់ សេវាអេធីអឹម វេទិកាធនាគារឌីជីថល និងសេវានៅតាមសាខា គឺនៅតែដំណើរការយ៉ាងពេញលេញជាធម្មតា។

បន្ថែមពីនេះ ធនាគារ ព្រីនស៍ បានធ្វើការអះអាងថា ធនាគារនឹងនៅតែប្តេជ្ញារក្សាភាពស្មោះត្រង់ ស្ថិរភាពហិរញ្ញវត្ថុ និងការពារសិទិ្ធប្រយោជន៍អតិថិជនគ្រប់រូប។ យើងនឹងបន្តធ្វើការយ៉ាងជិតស្និទ្ធជាមួយធនាគារជាតិនៃកម្ពុជា ដើម្បីធានាថាប្រតិបត្តិការរបស់យើងអនុលោមតាមច្បាប់យ៉ាងពេញលេញ និងមានតម្លាភាពគ្រប់ដំណាក់កាល។

គួរជម្រាបថា ជុំវិញការប្រកាសរបស់ធនាគារដូចខាងលើនេះគឺធ្វើឡើងបន្ទាប់ពីប្រធានក្រុមហ៊ុន Prince Group លោក Chen Zhi ត្រូវបានសហរដ្ឋអាមេរិករកឃើញថាមានជាប់ពាក់ព័ន្ធនឹងបទឧក្រិដ្ឋឆបោ.កតាមអនឡាញ និងការលាងលុយកខ្វក់ដ៏ធំសម្បើមនៅ ដោយបានកេងប្រវ័ញ្ចលើជនរងគ្រោះនៅទូទាំងពិភពលោករាប់លាននាក់ និងបង្កើតប្រាក់ចំណេញខុសច្បាប់រាប់ពាន់លានដុល្លារ។

ប្រតិបត្តិការបង្ក្រាបដ៏កក្រើកនេះ រឹបអូសបាន 127,271 Bitcoin ដែលបច្ចុប្បន្នមានតម្លៃប្រហែល 15 ពាន់លានដុល្លារ ដែលទាំងនោះគឺជាប្រាក់ចំណូលពីការក្លែងបន្លំ និងសកម្មភាពលាងលុយកខ្វក់របស់ Chen Zhi។

រដ្ឋអាជ្ញាសហរដ្ឋអាមេរិកនៅទីក្រុង Brooklyn និងទីក្រុងញូវយ៉ក បានចោ.ទប្រកាន់ក្រុមហ៊ុន Prince Group របស់លោក Chen ដែលរកសុីខាងអចលនទ្រព្យ និងហិរញ្ញវត្ថុនៅកម្ពុជា ថាវាបានប្រែក្លាយដោយសម្ងាត់ទៅជា “អង្គការឧក្រិដ្ឋកម្មឆ្លងដែនដ៏ធំបំផុតមួយនៅអាស៊ី” ខណៈមានបុគ្កលិកជាច្រើនត្រូវបានពួកគេជួញដូរ បង្ខាំងទុក និងបង្ខំឱ្យធ្វើការងារ ផ្នែកឆបោកតាមអ៊ីនធឺណិតក្រោមការគំរាមកំហែង និងទារុ.ណកម្ម។

ប្រតិបត្តិការបង្រ្កាបឧក្រិដ្ឋជនឆបោ.ក និងលាងលុយកខ្វក់ដែលមានគោលដៅសង្កត់ធ្ងន់នៅកម្ពុជានេះ កំពុងទាញទម្លាក់កេរ្តិ៍ឈ្មោះរបស់កម្ពុជានៅលើឆាកអន្តរជាតិ ខណៈក្រសួងរតនាគារសហរដ្ឋអាមេរិកបានហាមឃាត់ក្រុមហ៊ុន និងពលរដ្ឋអាមេរិកមិនឱ្យធ្វើអាជីវកម្មជាមួយក្រុមហ៊ុន និងបណ្ដាញព្រីនស៍គ្រុបជាដាច់ខាត៕