ស្រមើស្រមៃតែឯង! ថៃធ្វើជាបដិសេធមិនព្រមបើកច្រកព្រំដែន ទាំងដែលកម្ពុជាមិនបានស្នើសុំ

រាជធានីភ្នំពេញ៖ អ្នកនាំពាក្យក្រសួងការពារជាតិថៃ លោក Surasan Kongsiri កាលពីថ្ងៃពុធ ទី15 តុលាម្សិលមិញ បានប្រកាសក្ដែងៗតែម្នាក់ឯងថា ប្រទេសថៃនៅប្រកាន់ជំហមិនបើកច្រកព្រំដែនគោកជាមួយកម្ពុជាវិញតាមការចង់បានរបស់កម្ពុជានោះទេ ទាំងដែលកម្ពុជាខ្លួនឯងមិនបានដឹងផងថា តើកម្ពុជាបានទៅស្នើសុំឲ្យថៃបើកព្រំដែនឡើងវិញតាំងពីពេលណា។

យោងតាមការចុះផ្សាយរបស់សារព័ត៌មាន The Nation នៅថ្ងៃទី15 ខែតុលា ឆ្នាំ2025 បានឲ្យដឹងថា ប្រធានព្រឹទ្ធសភាកម្ពុជា សម្ដេចតេជោ ហ៊ុន សែន បានគាបសង្កត់ប្រទេសថៃឱ្យធ្វើការបើកច្រកព្រំដែនកម្ពុជា-ថៃឡើងវិញនៅថ្ងៃទី20 ខែតុលាខាងមុខ។ ការណ៍នេះ បានជំរុញឲ្យលោក Surasan Kongsiri អ្នកនាំពាក្យក្រសួងការពារជាតិថៃ បានឆ្លើយតបទៅវិញយ៉ាងដូច្នេះថា៖
«យើងមិនច្បាស់ថាតើការលើកឡើងរបស់លោក ហ៊ុន សែន មានបំណងបញ្ជូនសញ្ញាជាក់លាក់ណាមួយនោះទេ ប៉ុន្តែជំហររបស់ប្រទេសថៃនៅតែរឹងមាំមិនបើកព្រំដែនវិញឡើយ ពោលគឺថៃមិនមានវិធានការថ្មីណាផ្សេង ក្រៅពីលក្ខខណ្ឌទាំងបួនចំណុចនោះទេ។»

ការលើកឡើងរបស់លោក Surasan ខាងលើនេះ គឺចង់សំដៅលើលក្ខខណ្ឌបួនចំណុចរួមមាន៖ ១.ដកអាវុធធុនធ្ងន់ ២.ដោះមីន ៣.បង្ក្រាបបទល្មើសឆ្លងដែន និង៤.គ្រប់គ្រងតំបន់ព្រំដែនដែលមានបញ្ហាតាមសំណើក្នុងកិច្ចប្រជុំ GBC កម្ពុជា-ថៃ ព្រមទាំងមានយន្តការសហការដើម្បីពិភាក្សាគ្នាឱ្យភាគីទាំងពីរឈានដល់កិច្ចព្រមព្រៀង ដោយថៃចង់ឲ្យកម្ពុជាយល់ព្រមតាមចំណុចទាំងនេះ ទើបខ្លួនព្រមចូលរួមកិច្ចប្រជុំ ដើម្បីចរចាពីប្រធានបទផ្សេងៗទៀត។

ដោយឡែកជុំវិញការអះអាងថាសម្ដេចតេជោ បានដាក់សម្ពាធលើថៃដើម្បីឲ្យបើកព្រំដែនឡើងវិញនោះ ថៃមិនបានបង្ហាញពីប្រភពច្បាស់លាស់ថាខ្លួនទទួលបានដំណឹងនេះមកពីណាឡើយ។ ផ្ទុយទៅវិញ បើតាមការបញ្ជាក់របស់សម្ដេចតេជោតាំងពីខែកញ្ញាមកបានឲ្យដឹងថា កម្ពុជាមិនដែលសុំឲ្យថៃបើកច្រកព្រំដែនវិញទេ ថៃជាអ្នកបិទ ថៃគឺជាអ្នកបើកវិញ មិនបាច់ចរចាជាមួយកម្ពុជាទេ ហើយកម្ពុជានឹងបើកតាមក្រោយយ៉ាងយូរ5ម៉ោង។

រហូតមកដល់នៅថ្ងៃទី15 តុលា ឆ្នាំ2025 សម្ដេចតេជោ ហ៊ុន សែន នៅលើទំព័រហ្វេសប៊ុកបានធ្វើការបញ្ជាក់ជាថ្មីម្ដងទៀតដើម្បីកុំឲ្យថៃយល់ច្រលំតែម្នាក់ឯងថា សម្ដេចមិនបានបន្ទន់ជំហរទៅអង្វរថៃឱ្យបើកព្រំដែនជាមួយថៃនៅថ្ងៃទី២០ តុលា ដូចការចុះផ្សាយរបស់ថៃឡើយ ហើយជំហរកម្ពុជានេះ នឹងមិនផ្លាស់ប្តូរទេ កម្ពុជាក៏មិនធ្វើថោកទៅសុំថៃបើក ច្រកព្រំដែននោះដែរ។ ថៃអាចបន្តបិទ សូម្បី១០០ឆ្នាំទៀតក៏កម្ពុជាមិនស្លា.ប់ដែរ៕