កាន់តែផ្គើ.នលែងខ្លាចការថ្កោលទោ.សពីអន្តរជាតិ! ក្រោយផ្អាកសកម្មភាពតម្លង់ពលរដ្ឋខ្មែរបានតែប៉ុន្មានថ្ងៃ ពេលនេះក្រុមជ្រុលនិយមថៃបាននាំក្រុមឡានដែលបំពាក់ទៅដោយប្រព័ន្ធសម្លេងលឺខ្លាំងៗទៅបានណងចាន់ទាំងថ្ងៃ ដើម្បីរំខានពលរដ្ឋខ្មែរដែលរស់នៅភូមិជោគជ័យក្បែរនោះ។

យោងតាមការចុះផ្សាយរបស់ Khaosod នៅរសៀលថ្ងៃទី១៧ ខែតុលានេះ បានឲ្យដឹងថា រថយន្តមួយក្រុមដែលមានបំពាក់មេក្រូបំពងសម្លេងធំៗបានប្រមូលផ្តុំគ្នានៅបានណងចាន់ ស្រុកខកស៊ុង ខេត្តស្រះកែវ នៅរសៀលថ្ងៃសុក្រ ក្រោមយុទ្ធនាការចាក់សម្លេងរំខានពេញមួយថ្ងៃឲ្យពលរដ្ឋខ្មែរស្ដាប់។

ក្រុមជ្រុលនិយមខាងលើនេះ បានប្រកាសថានៅក្នុងព្រឹត្តិការណ៍នេះ ពួកគេនឹងចាក់បញ្ចាំងភាពយន្តឯកសារស្ដីពីគុណបំណាច់របស់ថៃលើជនភៀសសឹកកម្ពុជាកន្លងមក ជាមួយនឹងសម្លេងខ្លាំងៗ សម្រាប់ឲ្យអ្នកទន្ទ្រានដែនអធិបតេយ្យភាពថៃស្តាប់ពេញមួយថ្ងៃ។ សកម្មភាពនេះនឹងប្រព្រឹត្តទៅចាប់ពីថ្ងៃទី១៧ តុលា ដល់ថ្ងៃទី១៩ តុលា ។

គួររំលឹកថា កាលពីថ្ងៃទី១០ ខែតុលា កន្លងមក មេចលនាជ្រុលនិយមថៃ គឺបុគ្គល កាន់ ចមផ្លាង បានដឹកនាំចលនាបំពងសម្លេងរំខានលើពលរដ្ឋខ្មែរចំនួន ៤យប់ជាប់ៗគ្នាម្ដងរួចហើយ ប៉ុន្តែសកម្មភាពនេះត្រូវបានសមាជិកព្រឹទ្ធសភា អ្នកនយោបាយ និងពលរដ្ឋថៃមួយចំនួនរិះគន់ ឲ្យបញ្ឈប់ទៅវិញ ក្រោយវាបង្ហាញពីភាពអមនុស្សធម៌ និងបំពានសិទ្ធិមនុស្សយ៉ាងខ្លាំង ដែលអាចនាំឲ្យថៃស្អុ.យឈ្មោះនៅលើឆាកអន្តរជាតិបាន។

ទោះជាយ៉ាងណាក៏ដោយ សារជាតិជាមនុស្សគ្មានគុណធម៌ និងមិនគោរពកផតខ្លាចច្បាប់អន្តរជាតិនៅតែមាននៅក្នុងចិត្តរបស់ពលរដ្ឋថៃជាច្រើនផ្សេងទៀត ដោយពួកគេមិនអាចទប់អារម្មណ៍ឲ្យនៅស្ងៀមៗ មិនបៀតបៀនអ្នកដទៃបាននោះទេ ពេលនេះក៏បានប្រមូលផ្ដុំគ្នាសារជាថ្មីដើម្បីធ្វើទុក្ខបុកម្នេញពលរដ្ឋខ្មែរ។

ដូច្នេះយើងមានតែរង់ចាំមើលជាបន្តទៀតថា តើរដ្ឋាភិបាលថៃនឹងឈរឱបដៃមើលពលរដ្ឋរបស់ខ្លួននាំឈ្មោះប្រទេសធ្លាក់រណ្ដៅតាមរយៈសកម្មភាពខ្វះការគិតពិចារណាបែបនេះ ឬមួយយ៉ាងណា៕

ប្រទេសថៃ ៖ លោក អនុថីន ឆាន់វីរៈគូន នាយករដ្ឋមន្ត្រីថៃបានស្នើឱ្យកម្ពុជាអនុវត្តលក្ខខណ្ឌ៤ចំណុចរបស់ថៃ ប្រសិនបើកម្ពុជាមិនអនុវត្តតាមលក្ខខណ្ឌទាំង៤ គឺនឹងគ្មានការចុះហត្ថលេខាលើកិច្ចព្រមព្រៀងសន្តិភាពនៅប្រទេសម៉ាឡេស៊ីថ្ងៃទី២៦ ខែតុលា តាមការជំរុញរបស់ប្រធានាធិបតីអាមេរិកទេ ។ នេះបើតាមការលើកឡើងរបស់អ្នកនាំពាក្យរដ្ឋាភិបាលថៃនៅថ្ងៃទី១៧ ខែតុលា ឆ្នាំ២០២៥ ។

ប្រធានាធិបតីអាមេរិក លោក Donald Trump បានជំរុញឱ្យកម្ពុជា-ថៃចុះហត្ថលេខាលើកិច្ចព្រមព្រៀងសន្តិភាពនៅកិច្ចប្រជុំកំពូលអាស៊ាន ប្រទេសម៉ាឡេស៊ី ដោយសារលោកប្រាថ្នាចង់ឃើញប្រទេសទាំងពីរមានសន្តិភាពពេញលេញ ហើយលោកត្រៀមខ្លួនចូលរួមធ្វើជាសាក្សីក្នុងពិធីចុះហត្ថលេខានេះ ។ ប៉ុន្តែរដ្ឋាភិបាលថៃបែរជាថា អាមេរិកដាក់សម្ពាធឱ្យថៃចុះហត្ថលេខាសន្តិភាព និងទាមទារឱ្យកម្ពុជាគោរពលក្ខខណ្ឌ៤ចំណុចរបស់ខ្លួនជាមុន បើមិនដូច្នោះទេ នឹងគ្មានការចុះហត្ថលេខាឡើយ ។

តាមការលើកឡើងរបស់អ្នកនាំពាក្យរដ្ឋាភិបាលថៃ លោក សិរិផុង អាំងខាសាគុនកៀត គឺនាយករដ្ឋមន្ត្រីថៃ លោក អនុថីន នៅតែប្រកាន់គោលជំហរឱ្យកម្ពុជាអនុវត្តតាមលក្ខខណ្ឌ៤ចំណុចរបស់ថៃ មិនមែនអនុវត្តតែលក្ខខណ្ឌខ្លះៗទេ ទើបថៃយល់ព្រមចុះហត្ថលេខាសន្តិភាពនៅម៉ាឡេស៊ី ។ រីឯការលុបចោលអនុស្សរណៈនៃការយោគយល់គ្នា (MOU) ឆ្នាំ២០០០ និងឆ្នាំ២០០១ គឺត្រូវរង់ចាំចាប់ពី១ខែ ទៅ២ខែទៀត ទើបមានការសម្រេចចិត្ត ។

នាវេលាម៉ោង១២និង១៥នាទី នៅថ្ងៃទី១៧ ខែតុលា អ្នកនាំពាក្យរដ្ឋាភិបាលថៃ លោក សិរិផុង បាននិយាយពីការលុបអនុស្សរណៈនៃការយោគយល់គ្នា (MOU) ឆ្នាំ២០០០ និងឆ្នាំ២០០១ គឺចាប់ពី១ខែ ទៅ២ខែទៀតនឹងដឹងថា តើថៃចាត់វិធានការបែបណាចំពោះ MOU ទាំង២ច្បាប់ ។ ក្រៅពីនេះ លោកលើកឡើងពីក្រសួងការបរទេសថៃចរចាជាមួយកម្ពុជា ថាតើមានគុណសម្បត្តិ និងគុណវិបត្តិអ្វីខ្លះ ។

នាយករដ្ឋមន្ត្រីថៃ លោក អនុថីន នឹងធ្វើដំណើរទៅចូលរួមកិច្ចប្រជុំកំពូលអាស៊ាន នៅប្រទេសម៉ាឡេស៊ី ចាប់ពីថ្ងៃទី២៥ ដល់ថ្ងៃទី២៨ ខែតុលា ឆ្នាំ២០២៥ ។ បន្ទាប់មក នៅថ្ងៃទី២៩ ខែតុលា នាយករដ្ឋមន្ត្រីថៃនឹងធ្វើដំណើរទៅប្រទេសកូរ៉េខាងត្បូង ដើម្បីចូលរួមកិច្ចប្រជុំសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) ។

ការចុះហត្ថលេខាសន្តិភាពជាមួយកម្ពុជានៅម៉ាឡេស៊ី គឺនាយករដ្ឋមន្ត្រីថៃស្នើឱ្យកម្ពុជាអនុវត្តតាមលក្ខខណ្ឌ៤ចំណុច រួមមាន ៖ ១-ការដកថយកម្លាំងទ័ពចេញពីតំបន់ព្រំដែន ២-ការដកថយសព្វាវុធធុនធ្ងន់ ៣-ការបោសសម្អាតមីន និង៤-បង្ក្រាបឧក្រិដ្ឋកម្មឆ្លងដែន រួមទាំងជម្លៀសពលរដ្ឋខ្មែរចេញពីតំបន់ព្រំដែនខេត្តស្រះកែវ ។ ហេតុនេះ កម្ពុជាត្រូវតែយល់ព្រមអនុវត្តតាមលក្ខខណ្ឌ៤ចំណុចនេះ ទើបឈានទៅរកការចរចា ។

តាមការបញ្ជាក់របស់រដ្ឋមន្ត្រីការបរទេសម៉ាឡេស៊ីនៅថ្ងៃទី១៤ ខែតុលា កន្លងមក ប្រធានាធិបតីអាមេរិក លោក Donald Trump នឹងធ្វើដំណើរទៅម៉ាឡេស៊ីថ្ងៃទី២៦ ខែតុលា ដើម្បីចូលរួមពិធីចុះហត្ថលេខាលើកិច្ចព្រមព្រៀងសន្តិភាពរវាងកម្ពុជានិងថៃ ក្នុងអំឡុងកិច្ចប្រជុំកំពូលអាស៊ាន ដែលនឹងប្រព្រឹត្តចាប់ថ្ងៃទី២៦ ដល់ថ្ងៃទី២៨ ខែតុលា ។ នេះជាស្ថានភាពវិវត្តន៍ថ្មីនៃវិវាទព្រំដែនកម្ពុជា-ថៃ ដែលបានកើតឡើងអស់រយៈពេលជាច្រើនខែ ក្រោយការផ្តើមវាយប្រហារយ៉ាងបំពានពីសំណាក់កងទ័ពថៃមកលើអធិបតេយ្យភាពកម្ពុជាកាលពីថ្ងៃទី២៨ ខែឧសភា ឆ្នាំ២០២៥ ហើយថៃចាប់ផ្តើមធ្វើសង្គ្រាមឈ្លានពានរំលោភអធិបតេយ្យភាពកម្ពុជានៅថ្ងៃទី២៤ ខែកក្កដា ឆ្នាំ២០២៥ ៕

ឥណ្ឌូណេស៊ី បានបង្កភាពភ្ញាក់ផ្អើលនៅក្នុងតំបន់អាស៊ាន ក្រោយពីប្រកាសផែនការទិញយន្តហោះចម្បាំង Chengdu J-10C ចំនួន៤២គ្រឿង ពីប្រទេសចិន។

ការទិញយន្តដ៏ច្រើននេះ គឺជាផ្នែកមួយនៃកិច្ចខិតខំប្រឹងប្រែង ដើម្បីធ្វើទំនើបកម្មកងកម្លាំងប្រដាប់អាវុធនិងបង្ហាញសាច់ដុំរបស់ឥណ្ឌូនេសុីក្នុងតំបន់អាសុីអាគ្នេយ៍។

Chengdu J-10C ហោះបានក្នុងល្បឿន២៣២៧គីឡូម៉ែត្រក្នុងមួយម៉ោង ដោយអាចបំពាក់មកជាមួយមីសុីលប្រភេទ PL បានរហូតដល់៧តោន។

កេរ្តិ៍ឈ្មោះយន្តហោះនេះល្បីរន្ទឺខ្លាំង ក្រោយពីប៉ាគីស្ថាន បានប្រើវា បាញ់ទម្លាក់យន្តហោះឥណ្ឌា Rafale ជាច្រើនគ្រឿងដែលផលិតឡើងដោយប្រទេសបារាំង។

សូមរំលឹកថា កាលពីខែកក្កដា ឆ្នាំ២០២៥កន្លងទៅ ប្រទេសឥណ្ឌូណេសុី ក៍បានបានចុះកិច្ចព្រមព្រៀង ទិញយន្តហោះចម្បាំង KAAN ចំនួន៤៨គ្រឿងពីប្រទេសតួកគីយ៉េផងដែរ៕

DF-61 ជាមីសុីលអន្តរទ្វីបជំនាន់ចុងក្រោយគេបង្អស់របស់ចិន ដែលត្រូវបានដាក់សម្ញែងកាលពីខែកញ្ញាកន្លងទៅក្នុងអំឡុងពិធីគំរប់ខួបជ័យជំនះទៅលើកងទ័ពជប៉ុន។

មីសុីលនេះ អាចបាញ់បានចម្ងាយ១៥០០០គីឡូម៉ែត្រ ដោយចាយពេលប្រមាណជា២០នាទី ពីទីក្រុងប៉េកាំង បាញ់ដល់រដ្ឋវ៉ាសុីតោនរបស់អាមេរិក។

DF-61 អាចផ្ទុកក្បាលគ្រាប់នុយក្លេរអ៊ែរចំនួន៦០គ្រាប់ និងជាពិសេសបំពាក់មកជាមួយគ្រាប់បែកអ៊ីដ្រូសែន ដែលមានតែមួយគត់នៅលើពិភពលោក។

វាមានល្បឿនលឿនខ្លាំងរហូតដល់​ Mach ៥៥ ឬស្មើនឹងប្រមាណជា៦៧០០០គីឡូម៉ែត្រក្នុងមួយម៉ោង ដែលអាចអនុញ្ញាតឱ្យវាវាយប្រហារទៅលើគោលដៅបានគ្រប់ទីកន្លែងក្នុងពិភពលោក ត្រឹមរយៈពេល៣០នាទី។

មីសុីល DF-61 ត្រូវបានគេផលិតឡើង ដើម្បីស្នងតំណាងមីសុីល DF-41 ដែលអាចបាញ់បានរយៈចម្ងាយត្រឹម១២០០០គីឡូម៉ែត្រ៕

ប្រទេសកូរ៉េខាងត្បូង ៖ ភ្ញៀវទេសចរកូរ៉េខាងត្បូងបានលុបចោលដំណើរកម្សាន្តមកកម្ពុជា និងប្រទេសជិតខាងដូចជា ថៃ វៀតណាម និងឡាវ ដោយសារបារម្ភពីការឆបោ.កតាមប្រព័ន្ធបច្ចេកវិទ្យា និងការជួ.ញដូរមនុស្ស ។ ការបារម្ភពីសុវត្ថិភាពយ៉ាងខ្លាំងនេះ ក្រោយពីសារព័ត៌មាននានាចុះផ្សាយពីនិស្សិតកូរ៉េខាងត្បូងម្នាក់ ភេទប្រុស អាយុ២២ឆ្នាំ ស្លា.ប់ដោយសារគាំងបេះដូងក្រោយការធ្វើទារុ.ណកម្មក្នុងករណីឆបោ.កតាមប្រព័ន្ធបច្ចេកវិទ្យានៅខេត្តកំពត ។

កាលពីថ្ងៃទី១៥ ខែតុលា ឆ្នាំ២០២៥ កូរ៉េខាងត្បូងបានហាមពលរដ្ឋរបស់ខ្លួនធ្វើដំណើរមកភ្នំបូកគោ ទីក្រុងបាវិត និងទីក្រុងប៉ោយប៉ែត ដែលកូរ៉េខាងត្បូងគិតថា គឺជាទីតាំងការឆបោកតាមប្រព័ន្ធបច្ចេកវិទ្យា ដែលបម្រាមនេះធ្វើឱ្យប៉ះពាល់យ៉ាងខ្លាំងដល់ក្រុមហ៊ុនទេសចរណ៍កូរ៉េខាងត្បូងដែលរៀបចំដំណើរកម្សាន្តមកកម្ពុជា ។ ក្រសួងការបរទេសកូរ៉េខាងត្បូងបញ្ជាក់ថា បើជនជាតិកូរ៉េខាងត្បូងធ្វើដំណើរ ឬស្នាក់នៅតំបន់ទាំងនេះអាចមានទោស ដូច្នេះ សូមឱ្យពលរដ្ឋដែលមានគម្រោងធ្វើដំណើរទៅតំបន់ទាំងនេះ លុបចោលការធ្វើដំណើរ ។

ភ្ញៀវទេសចរកូរ៉េខាងត្បូងមិនត្រឹមតែលុបចោលដំណើរកម្សាន្តមកកម្ពុជាប៉ុណ្ណោះទេ ប៉ុន្តែពួកគេក៏បានលុបចោលការធ្វើដំណើរមកប្រទេសជិតខាងផងដែរដូចជា ៖ ថៃ វៀតណាម និងឡាវ ដោយសារបារម្ភអាចក្លាយជាជនរងគ្រោះការឆបោកតាមប្រព័ន្ធបច្ចេកវិទ្យា ។

លោក ផាក់ យ៉ងឈូ អាយុ៤៦ឆ្នាំ ភ្ញៀវទេសចរកូរ៉េខាងត្បូងបាននិយាយប្រាប់កាសែត Korea JoongAng Daily ថា ខ្លួននិងគ្រួសារបានលុបចោលដំណើរកម្សាន្តទៅទីក្រុងដាណាង ប្រទេសវៀតណាម ក្រោយទទួលបានព័ត៌មានក្រុមឆបោកអនឡាញប្តូរទីតាំងពីកម្ពុជា ទៅវៀតណាម ។ ការបារម្ភពីសុវត្ថិភាព គឺសំខាន់ណាស់ យើងមានគម្រោងទៅលេងកោះសេជូ ឬប្រទេសជប៉ុនវិញ ។

ក្រុមហ៊ុនទេសចរណ៍នៅទីក្រុងសេអ៊ូលរងផលប៉ះពាល់ខ្លាំងដោយសារការលុបចោលដំណើរកម្សាន្ត ក្នុងនោះក្រុមហ៊ុនទេសចរណ៍កូរ៉េមួយប្រាប់ថា តាមធម្មតា ចាប់ពីខែធ្នូ ដល់ខែកុម្ភៈ មានជនជាតិកូរ៉េខាងត្បូងកក់ដំណើរកម្សាន្តទៅកម្ពុជា ប៉ុន្តែក្រោយមានព័ត៌មាននិស្សិតកូរ៉េខាងត្បូងស្លាប់ គឺគ្មានអ្នកកក់ដំណើរកម្សាន្តទេ ខណៈអ្នកកក់រួចហើយ ទូរស័ព្ទមកសួរក្រុមហ៊ុន តើតំបន់ទេសចរណ៍នានាមានសុវត្ថិភាពដែរឬទេ? យើងព្យាយាមពន្យល់ពួកគេឱ្យមានទំនុកចិត្តលើតំបន់ទេសចរណ៍មានសុវត្ថិភាព ។

គួរបញ្ជាក់ថា រាជរដ្ឋាភិបាលកម្ពុជាមានឆន្ទៈក្នុងការបង្ការ ទប់ស្កាត់ និងបង្ក្រាបបទល្មើសឆ្លងដែនគ្រប់ប្រភេទ ដែលជាបទល្មើសរួមរបស់មនុស្សជាតិ តម្រូវឱ្យប្រទេសនីមួយៗចាំបាច់សហការគ្នាប្រយុទ្ធប្រឆាំងនឹងបទល្មើសនេះ ជាជាងការឆ្លៀតកេងចំណេញពីការរងគ្រោះរបស់ពលរដ្ឋខ្លួន ដោយទម្លាក់បន្ទុកទៅលើប្រទេសណាមួយ ។

កាលពីព្រឹកថ្ងៃទី១៦ ខែតុលា ឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានអនុញ្ញាតឱ្យលោកស្រី Kim Jina អនុរដ្ឋមន្ត្រីទី២ នៃក្រសួងការបរទេសកូរ៉េខាងត្បូងចូលជួបសម្តែងការគួរសម និងពិភាក្សាការងារនៅវិមានសន្តិភាព ។ ក្នុងឱកាសនេះ លោកស្រីលើកឡើងពីការប្រយុទ្ធប្រឆាំងឧក្រិដ្ឋកម្មឆ្លងដែន ជាពិសេស ការឆបោកតាមប្រព័ន្ធបច្ចេកវិទ្យាកន្លងមក ។

លោកស្រីថា សមត្ថកិច្ចប្រទេសទាំងពីរបានសហការគ្នាជាច្រើន ប៉ុន្តែប្រព័ន្ធផ្សព្វផ្សាយពុំបានផ្សាយព័ត៌មានទាំងនេះឱ្យពេញលេញ ដូច្នេះ ទស្សនកិច្ចរបស់លោកស្រីពេលនេះ នឹងរួមចំណែកកាត់បន្ថយការភាន់ច្រឡំតាមបណ្តាញសារព័ត៌មានដោយសារការផ្សាយព័ត៌មានមិនគ្រប់ជ្រុងជ្រោយ និងរួមចំណែកពង្រឹង ពង្រីកទំនាក់ទំនង និងកិច្ចសហការទ្វេភាគីឱ្យរឹងមាំរួមគ្នាប្រយុទ្ធប្រឆាំងឧក្រិដ្ឋកម្មឆ្លងដែន រួមទាំងការឆបោកតាមប្រព័ន្ធបច្ចេកវិទ្យា ។

កន្លងមក កម្ពុជាបានចាប់ខ្លួន និងបញ្ជូនជនជាតិកូរ៉េចំនួន១៨០នាក់ ដែលពាក់ព័ន្ធនឹងការឆបោកតាមប្រព័ន្ធបច្ចេកវិទ្យាត្រឡប់ទៅកូរ៉េវិញ ។ បច្ចុប្បន្ន ជនជាតិកូរ៉េជាង៦០នាក់ ដែលពាក់ព័ន្ធនឹងករណីឆបោកតាមប្រព័ន្ធបច្ចេកវិទ្យា កំពុងរង់ចាំការបញ្ជូនត្រឡប់ទៅកូរ៉េវិញនាពេលឆាប់ៗ ៕

ប៉ុន្មានថ្ងៃចុងក្រោយនេះ អ្នកប្រើប្រាស់បណ្ដាញសង្គម Facebook ជាច្រើន បានជួបបញ្ហាគណនីត្រូវបាន Disable ឬ Suspend ដោយមិនដឹងពីមូលហេតុច្បាស់លាស់។ តាមការពន្យល់ពីអ្នកជំនាញបច្ចេកវិទ្យា និងគោលការណ៍របស់ក្រុមហ៊ុន Meta ឬ Facebook មានមូលហេតុសំខាន់ៗជាច្រើន ដែលអាចនាំឲ្យគណនីរបស់អ្នកត្រូវបានបិទជាបណ្ដោះអាសន្ន ឬអចិន្ត្រៃយ៍។

យ៉ាងណាមិញ មូលហេតុសំខាន់ៗដែលធ្វើឲ្យគណនីរបស់អ្នកត្រូវបានបិទរួមមាន៖

១. ការល្មើសនឹងគោលការណ៍សហគមន៍ (Community Standards):
Facebook មានគោលការណ៍ច្បាស់លាស់ក្នុងការត្រួតពិនិត្យមាតិកា។ ប្រសិនបើអ្នកបង្ហោះរូបភាព ឬអត្ថបទដែលមានអត្ថន័យប៉ះពាល់ដល់សុវត្ថិភាព សីលធម៌ ឬសង្គម ដូចជា មាតិកាហិង្សា ព័ត៌មានក្លែងក្លាយ ការផ្សាយពាណិជ្ជកម្មបន្លំ ឬ spam នោះអាចនាំឲ្យគណនីត្រូវបានបិទ។

២. មានការសង្ស័យអំពីសុវត្ថិភាពគណនី (Account Security):
ប្រសិនបើ Facebook សង្ស័យថាមានការចូលប្រើប្រាស់មិនស្របច្បាប់ ដូចជា ចូលពីឧបករណ៍ ឬទីតាំងថ្មីៗជាបន្តបន្ទាប់ ការផ្លាស់ប្តូរអ៊ីមែល ឬពាក្យសម្ងាត់ច្រើនដង ឬសកម្មភាពប្លែកៗ ដូចជាបញ្ជូនសារ spam នោះប្រព័ន្ធនឹងបិទគណនីបណ្តោះអាសន្ន ដើម្បីការពារទិន្នន័យអ្នក។

៣. គណនីក្លែងក្លាយ ឬក្លែងបន្លំ:
Facebook ចង់ឲ្យគណនីទាំងអស់ប្រើឈ្មោះ និងអត្តសញ្ញាណពិត។ ប្រសិនបើអ្នកប្រើឈ្មោះក្លែង ឬបង្កើតគណនីច្រើនសម្រាប់គោលបំណងពាណិជ្ជកម្ម អាចនាំឲ្យត្រូវលុបចោល។

៤. ការរាយការណ៍ (Reports) ពីអ្នកប្រើផ្សេង:
ប្រសិនបើមានអ្នករាយការណ៍ថាគណនីរបស់អ្នកបង្ហោះមាតិកាមិនសមរម្យ ឬប្រើសកម្មភាពបន្លំ ប្រព័ន្ធនឹងពិនិត្យ ហើយអាចបិទ (Disable) បណ្តោះអាសន្ន។

៥. ការផ្ញើសារឥតបានការ ឬការបោកប្រាស់ (Scam/Spam):
ប្រសិនបើគណនីរបស់អ្នកផ្ញើតំណភ្ជាប់ឬសារមិនពិតដែលបញ្ឆោតអ្នកដទៃ Facebook នឹងបិទគណនីភ្លាមៗ។

ទោះជាយ៉ាងណា បញ្ហានេះភាគច្រើនអាចដោះស្រាយបាន ដោយដាក់សំណើ (Appeal) ឲ្យ Facebook ពិនិត្យឡើងវិញ ហើយអាចទាញយកគណនីមកវិញក្នុងរយៈពេលពីរទៅប្រាំថ្ងៃ ប្រសិនបើបញ្ជាក់អត្តសញ្ញាណត្រឹមត្រូវ ប៉ុន្តែក្នុងករណីខ្លះ នឹងត្រូវបិទជាអចិន្ត្រៃយ៍។ ដូចនេះ ដើម្បីការពារគណនីឲ្យមានសុវត្ថិភាព អ្នកគួរប្រើឈ្មោះពិត បើកប្រើ Two-Factor Authentication ដើម្បីការពារការលួចចូល និងជៀសវាងការចុចលើតំណគួរឱ្យសង្ស័យ ឬមិនគួរផ្តល់ពាក្យសម្ងាត់ឲ្យនរណាម្នាក់ឡើយ៕

ប្រទេសថៃ ៖ ក្រុមជ្រុលនិយមថៃនៅតែមិនបញ្ឈប់ការរិះគ.ន់វាយប្រ.ហារយ៉ាងចាស់ដៃមកលើលោកស្រី អាំងខាណា នីឡៈផៃជីត សមាជិកព្រឹទ្ធសភា ក្រោយនិយាយការពិតពីថៃឈ្លានពា.នកម្ពុជា រួមទាំងបើកសំឡេងរំខានពលរដ្ឋខ្មែរនៅភូមិជោគជ័យ និងភូមិព្រៃចាន់ ដែលជាការរំលោ.ភសិទ្ធិមនុស្សយ៉ាងធ្ងន់ធ្ងរ ថែមទាំងប្រើប្រាស់យន្តហោះចម្បាំង F-16 ទម្លាក់គ្រា.ប់បែ.កមកលើទីតាំងកងទ័ព និងលំនៅឋានពលរដ្ឋខ្មែរ ។ បន្ទាប់ពីក្រុមជ្រុលនិយមគំរា.មសម្លា.ប់សមាជិកព្រឹទ្ធសភា សមត្ថកិច្ចថៃត្រៀមបញ្ជូនកម្លាំងការពារសុវត្ថិភាព និងសំណូមពរឱ្យមហាជនទទួលយកការបញ្ចេញមតិខុសពីគំនិតរបស់ខ្លួន ។

ថ្មីៗនេះ លោកស្រី អាំងខាណា សមាជិកព្រឹទ្ធសភាបានដាស់តឿនរដ្ឋាភិបាលថៃឱ្យគិតគូរចំពោះសកម្មភាពក្រុមជ្រុលនិយមឡើងវិញពីការបើកសំឡេងផ្សេងៗរំខានសុខភាពផ្លូវកាយ ផ្លូវចិត្តកុ.មារ ស្ត្រី ចាស់ជរា អ្នកជំងឺ និងជនពិការ នៅភូមិជោគជ័យ និងភូមិព្រៃចាន់ ។ លោកស្រីបញ្ជាក់ថា សកម្មភាពរបស់ក្រុមជ្រុលនិយមបានបំពានយ៉ាងធ្ងន់ធ្ងរលើបទឈប់បា.ញ់ និងបំពានគោលការណ៍ធម្មនុញ្ញនៃអង្គការសហប្រជាជាតិ តើរដ្ឋាភិបាលថៃនឹងដោះស្រាយបញ្ហានេះជាមួយកម្ពុជាលើឆាកអន្តរជាតិបែបណា បើអន្តរជាតិដឹងរឿងនេះ ។

លោកស្រីបានសរសេរក្នុងបណ្តាញសង្គមពីការបណ្តោយឱ្យ Influencer ធ្វើសកម្មភាពដាក់សម្ពាធ ឬបន្លាចដោយការបើកសំឡេងខ្មោច សំឡេងយន្តហោះចម្បាំង ឆ្កែលូ ពេលកម្ពុជា-ថៃកំពុងមានជម្លោះ ដែលអាចជាបញ្ហាប្រឈមដល់រដ្ឋាភិបាលថៃ ជាពិសេស រដ្ឋមន្ត្រីក្រសួងការបរទេសថៃក្នុងការចរចារកដំណោះស្រាយរួមគ្នាជាមួយកម្ពុជា ។ ប៉ុន្តែការបញ្ចេញមតិនេះធ្វើឱ្យលោកស្រីរងការរិះគន់យ៉ាងចាស់ដៃក្នុងបណ្តាញសង្គម និងរងការគំរាមកំហែងគ្រប់បែបយ៉ាង មិនថាទម្លាក់ពីមុខតំណែង បណ្តេញទៅរស់នៅកម្ពុជា និងសម្លា.ប់ ។

តាមការចុះផ្សាយរបស់សារព័ត៌មាន Daily News កាលពីថ្ងៃទី១៦ ខែតុលា ឆ្នាំ២០២៥ ឱ្យដឹងថា សមត្ថកិច្ចថៃត្រៀមបញ្ជូនកម្លាំងការពារសុវត្ថិភាពលោកស្រី អាំងខាណា សមាជិកព្រឹទ្ធសភា ក្រោយរងការគំរាមសម្លាប់ បើទោះជាលោកស្រីពុំបានទាក់ទង ឬស្នើឱ្យសមត្ថកិច្ចជួយអន្តរាគមន៍ក្តី ។ សមត្ថកិច្ចបានអង្វរទៅមហាជនឱ្យទទួលយកការបញ្ចេញមតិខុសពីគំនិតរបស់ខ្លួន និងកុំប្រើប្រាស់អំពើហិង្សា ។

កាលពីថ្ងៃទី១៦ ខែតុលា អគ្គស្នងការនគរបាលជាតិ លោក គីតរ៉ាត់ ផាន់ផេត បាននិយាយពីអ្នករាយការណ៍ពិសេសអង្គការសហប្រជាជាតិ លោកស្រី Mary Lawlor បារម្ភយ៉ាងខ្លាំងពីការគំរាមសម្លា.ប់ និងរិះគន់តាមបណ្តាញសង្គមលើលោកស្រី អាំងខាណា សមាជិកព្រឹទ្ធសភា គឺជាអតីតមន្ត្រីសិទ្ធិមនុស្ស និងអ្នកការពារសិទ្ធិស្ត្រីនៅប្រទេសថៃ ដោយសារនិយាយការពិតដើម្បីផ្តល់ភាពយុត្តិធម៌ និងសេចក្តីថ្លៃថ្នូររបស់មនុស្ស ដែលគួរទទួលបានការការពារ មិនមែនរងការថ្កោលទោស ។

សមត្ថកិច្ចបានដឹងពីការគំរាមសម្លាប់សមាជិកព្រឹទ្ធសភាតាមរយៈសារព័ត៌មាន ប៉ុន្តែលោកស្រី អាំងខាណា ពុំបានប្តឹងមកសមត្ថកិច្ចទេ ។ សមត្ថកិច្ចនឹងស៊ើបអង្កេតពីការគំរាមសម្លាប់ បើមានហេតុការណ៍កើតឡើងមែន គឺលោកស្រី អាំងខាណា អាចដាក់ពាក្យប្តឹងមកសមត្ថកិច្ចដើម្បីចាត់វិធានការជនល្មើសតាមច្បាប់ ហើយលោកស្រីអាចស្នើឱ្យសមត្ថកិច្ចបញ្ជូនកម្លាំងទៅការពារសុវត្ថិភាពបាន ។

លោក គីតរ៉ាត់ បានសំណូមពរទៅមហាជនកុំរិះគន់លើអ្នកដែលបញ្ចេញមតិផ្ទុយពីគំនិតរបស់ខ្លួន ពីព្រោះវាជាសិទ្ធិរបស់បុគ្គលម្នាក់ៗ ហើយអ្នកដែលមិនពេញចិត្តនឹងការលើកឡើងរបស់លោកស្រី អាំងខាណា ពុំអាចប្រើប្រាស់អំពើហិង្សាទេ ។ សមត្ថកិច្ចមិនគាំទ្រការប្រើប្រាស់អំពើហិង្សាទៅលើអ្នកមានមតិយោបល់ផ្ទុយពីមតិភាគច្រើន ពីព្រោះយើងជាជនជាតិថៃដូចគ្នា សូមសហការធ្វើដើម្បីប្រទេសជាតិ ។

គួរបញ្ជាក់ថា បើបុគ្គលណាម្នាក់ហ៊ានបញ្ចេញមតិពីភាពត្រឹមត្រូវ ឬពុំគាំទ្រការឈ្លានពានរបស់ថៃមកលើកម្ពុជា បុគ្គលនោះនឹងរងការរិះគន់យ៉ាងខ្លាំងពីក្រុមជ្រុលនិយម ដោយសារពួកគេពុំទទួលស្គាល់ការពិត ។ ហេតុនេះ អ្នកដែលនិយាយការពិត ពុំចង់បញ្ចេញឈ្មោះ ឬបង្ហាញអត្តសញ្ញាណជាសាធារណៈទេ ដើម្បីកុំឱ្យរងការរិះគន់ដូចលោកស្រី អាំងខាណា ៕