ថ្មីៗនេះអ៊ុយក្រែន បានស្នើសុំអាមេរិកផ្តល់ជំនួយមីសុីល Tomahawks ដើម្បីតទល់ជាមួយរស្សុី ស្របពេលការប្រយុទ្ធគ្នាកាន់តែខ្លាំងក្លាជាមុន។
រុស្ស៊ីធ្លាប់បានព្រមានជាច្រើនដងប្រឆាំងនឹងការផ្តល់មីស៊ីល Tomahawks ណាមួយដល់អ៊ុយក្រែន ហើយការផ្តល់មីស៊ីលប្រភេទនេះទៅអ៊ុយក្រែនគឺជាការប្រកាសសង្រ្គាមជាមួយនឹងរុស្ស៊ី។
Tomahawks ជាមីសុីលរយៈចម្ងាយឆ្ងាយ ដែលក្នុងមួយគ្រាប់មានតម្លៃប្រមាណជា ១.៣លានដុល្លារ ហើយអាចបាញ់បានពីចន្លោះ១៦០០គីឡូម៉ែត្រ ដល់២៥០០គីឡូម៉ែត្រ។
ជាទូទៅ បើអាមេរិក លក់មីសុីលនេះឱ្យប្រទេសសម្ពន័្ធមិត្ត វាបំពាក់ក្បាលគ្រាប់ដែលមានសមត្ថភាពផ្ទុះខ្លាំងជាមីសុីលផ្សេងៗទៀត។ ប៉ុន្តែបើអាមេរិកប្រើប្រាស់ខ្លួនឯង មីសុីលនេះ នឹងត្រូវបំពាក់ក្បាលគ្រាប់នុយក្លេអ៊ែរ។
ក្នុងករណីអ៊ុយក្រែនទទួលបានមីសុីល Tomahawks រុស្សុីនឹងដាក់ពង្រាយប្រព័ន្ធការពារមីសុីលជំនាន់ចុងក្រោយគេបំផុត S-500។
S-500 មានល្បឿន៩២០គីឡូម៉ែត្រក្នុងមួយម៉ោង ដែលអាចស្ទាក់ចាប់ឃើញមីសុីលក្នុងចម្ងាយ២០០០គីឡូម៉ែត្រឯណោះ៕

ប្រទេសថៃ ៖ អតីតមេបញ្ជាការយោធភូមិភាគ២ថៃ ប៊ុនស៊ីន ផាកក្លាង បានបដិសេធមិនដកកងទ័ពចេញពីព្រំដែនកម្ពុជា-ថៃនៅតំបន់ដែលកងទ័ពថៃឈរជើងទេ បើអ្នកណាបញ្ជាឱ្យដកកងទ័ពចេញពីព្រំដែនត្រូវទទួលខុសត្រូវជាមួយពលរដ្ឋ ពីព្រោះមើលឃើញស្ថានការណ៍បច្ចុប្បន្ននៅតែតានតឹង ។ រីឯការរៀបចំកិច្ចប្រជុំគណៈកម្មាធិការព្រំដែនថ្នាក់យោធភូមិភាគ (RBC) គឺគ្មានប្រយោជន៍ និងសំណូមពរឱ្យពលរដ្ឋយល់ពីមេបញ្ជាការយោធភូមិភាគ២ថ្មីដែលទើបឡើងកាន់តំណែងមិនដល់១ខែ ជាមនុស្សមិនពូកែនិយាយដូចខ្លួន ។

នៅថ្ងៃទី២១ ខែតុលា ឆ្នាំ២០២៥ នៅទីបញ្ជាការកងទ័ពជើងគោក ប៊ុនស៊ីន ផាកក្លាង អតីតមេបញ្ជាការយោធភូមិភាគ២ ដែលបច្ចុប្បន្នកាន់តំណែងជាអង្គរក្សពិសេសស្តេច និងជាទីប្រឹក្សាមេបញ្ជាការកងទ័ពជើងគោក បាននិយាយពីលោក វីរៈយុទ្ធ រ៉ាក់ស៊ីន មេបញ្ជាការយោធភូមិភាគ២ថ្មីរងការរិះគន់យ៉ាងចាស់ដៃពីពលរដ្ឋថៃ គឺលោក វីរៈយុទ្ធ មិនពូកែទ្រឹស្តី ប៉ុន្តែដឹងតួនាទីការងារទាំងអស់ ។ លោក វីរៈយុទ្ធ ធ្វើការជាមួយខ្លួនរហូតមក ពេលកងទ័ពថៃធ្វើសង្គ្រាមឈ្លានពានកម្ពុជា ក៏លោក វីរៈយុទ្ធ ចូលរួមប្រយុទ្ធនៅសមរភូមិមុខដែរ ប៉ុន្តែមិនផ្តល់សម្ភាសន៍ជាមួយសារព័ត៌មាន ។

លោក វីរៈយុទ្ធ ទើបកាន់តំណែងជាមេបញ្ជាការយោធភូមិភាគ២ថ្មីមិនដល់១ខែ ពេលខ្លះ ការនិយាយចេញមកទូលំទូលាយពេក ទើបធ្វើឱ្យពលរដ្ឋរិះគន់ និងយល់ន័យផ្សេង ។ ពេលនេះ លោក វីរយុទ្ធ ព្យាយាមចុះពិនិត្យមើកស្ថានការណ៍ព្រំដែនកម្ពុជា-ថៃញឹកញាប់ ប៉ុន្តែបញ្ហាខ្លះ ត្រូវរង់ចាំស្តាប់គោលនយោបាយពីថ្នាក់លើផងដែរ មិនមែនធ្វើតែម្នាក់ឯង ពីព្រោះវាប៉ះពាល់សន្តិសុខ សង្គម នយោបាយ សេដ្ឋកិច្ច មិនមែនប៉ះពាល់តែកងទ័ពទេ ។

ចំណែកកិច្ចប្រជុំគណៈកម្មាធិការព្រំដែនថ្នាក់យោធភូមិភាគ (RBC) ដែលមេបញ្ជាការយោធភូមិភាគ២ថៃមិនចូលរួមប្រជុំកន្លងមក ដោយសារមើលឃើញស្ថានការណ៍នៅតែតានតឹង បើជជែកគ្នា ក៏គ្មានប្រយោជន៍ដែរ ។ រីឯកិច្ចប្រជុំពេញអង្គគណៈកម្មការចម្រុះខណ្ឌសីមាព្រំដែនគោកកម្ពុជា-ថៃ (JBC) គឺជាកិច្ចការរបស់រដ្ឋាភិបាល និងក្រសួងការបរទេស គឺក្រសួងការបរទេសទំនងជាមានគោលដៅច្បាស់លាស់ក្នុងការពិភាក្សាជាមួយកម្ពុជា ។ នេះបើតាមការលើកឡើងរបស់ ប៊ុនស៊ីន ផាកក្លាង ។

ដោយឡែក កិច្ចប្រជុំក្រុមលេខាធិការគណៈកម្មាធិការព្រំដែនទូទៅកម្ពុជា-ថៃ (GBC) ដែលភាគីថៃបានស្នើឱ្យកម្ពុជាយល់ព្រមតាមលក្ខខណ្ឌ៤ចំណុច រួមមាន ៖ ដកអាវុធធុនធ្ងន់ចេញពីតំបន់ព្រំដែន ២-ដោះមីន ៣-បង្ក្រាបឧក្រិដ្ឋកម្មឆ្លងដែន និង៤-គ្រប់គ្រងតំបន់ព្រំដែន ទើបនាយករដ្ឋមន្ត្រីថៃចុះហត្ថលេខាលើកិច្ចព្រមព្រៀងសន្តិភាពក្នុងកិច្ចប្រជុំកំពូលអាស៊ាន ដោយមានប្រធានាធិបតីអាមេរិក លោក Donald Trump និងប្រធានអាស៊ានជាសាក្សី គឺបុគ្គល ប៊ុនស៊ីន គ្មានយោបល់អ្វីទេ ប៉ុន្តែស្នើឱ្យកម្ពុជាស្មោះត្រង់ ។

ក្រៅពីនេះ ប៊ុនស៊ីន ផាកក្លាង ចង់ឱ្យកម្ពុជាដកពាក្យបណ្តឹងនៅតុលាការយុត្តិធម៌អន្តរជាតិ (ICJ) ដើម្បីជួយស្វែងរកដំណោះស្រាយពាក់ព័ន្ធនឹងបញ្ហាវិវាទព្រំដែននៅតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ដោយបុគ្គលនេះនិយាយថា ដោយសារកម្ពុជាអះអាងជាម្ចាស់កម្មសិទ្ធិលើប្រាសាទទាំង៣ និងតំបន់មុំបី ទើបថៃធ្វើសង្គ្រាមជាមួយកម្ពុជាកន្លងមក ថៃមិនទទួលស្គាល់ប្រាសាទទាំងនេះជារបស់កម្ពុជាទេ កម្ពុជាប្តឹងទៅតុលាការ ICJ ប៉ុន្តែថៃពុំទទួលអំណាចតុលាការ ICJ ។ បើកងទ័ពទាំងសងខាងត្រូវរ៉ូវគ្នាវិញ លុះត្រាតែដកកម្លាំងទ័ពទៅកាន់ទីតាំងចាស់ រីឯកងទ័ពថៃនឹងឈរជើងនៅទីតាំងដែលធ្លាប់ឈរជើង មិនដកថយទេ បើអ្នកណាចង់ឱ្យកងទ័ពថៃដកថយ ត្រូវសួរមតិពលរដ្ឋ ។

គួរបញ្ជាក់ថា លោក វីរៈយុទ្ធ មេបញ្ជាការយោធភូមិភាគ២ថ្មីរងនូវការរិះគន់យ៉ាងចាស់ដៃពីសំណាក់ពលរដ្ឋថៃថា គ្មានជំហរម៉ឺងម៉ាត់ក្នុងការងារដូច ប៊ុនស៊ីន ផាកក្លាង ហើយមិនសូវបង្ហាញមុខ ឬមានមតិយោបល់ក្នុងសារព័ត៌មាន ។ ក្រោយពីរងការរិះគន់បែបនេះ លោក វីរៈយុទ្ធ បានព្យាយាមចុះពិនិត្យមើលស្ថានការណ៍ព្រំដែនជាញឹកញាប់ និងបង្ហាញគោលជំហរតឹងរ៉ឹងជាមួយកម្ពុជា ៕

ទីក្រុងតូក្យូ៖ អភិរក្សនិយមជើងចាស់ លោកស្រី Sanae Takaichi ដែលត្រូវបានសមាជិកសភាក្នុងប្រទេសជប៉ុនបានបោះឆ្នោតជ្រើសរើសឲ្យតែងតាំងជានាយករដ្ឋមន្រ្តីថ្មីរបស់ជប៉ុន បានក្លាយជាស្ត្រីដំបូងគេបង្អស់ក្នុងប្រវត្តិសាស្រ្ត។

យោងតាមទីភ្នាក់ងារព័ត៌មាន CNBC នៅថ្ងៃអង្គារ នេះបានឲ្យដឹងថា លោកស្រី Takaichi វ័យ 64 ឆ្នាំ ប្រធានគណបក្សប្រជាធិបតេយ្យសេរី (LDP) ទទួលបានសម្លេងឆ្នោតពីសភាជាន់ទាប 237-149 និងសភាជាន់ខ្ពស់ 125-46 លើគូប្រជែងដ៏ជិតស្និទ្ធបំផុតរបស់នាងគឺ លោក Yoshihiko Noda មេដឹកនាំគណបក្សប្រឆាំងសេរីនិយមតាមរដ្ឋធម្មនុញ្ញ។

គោលនយោបាយធំៗរបស់លោកស្រី Takaichi គឺសន្យាពង្រឹងវិស័យការពារជាតិ កែប្រែគោលការណ៍អន្តោប្រវេសន៍ និងការកែប្រែរដ្ឋធម្មនុញ្ញសន្តិភាពរបស់ប្រទេសជប៉ុនឡើងវិញ ក្រោយលោក Shigeru Ishiba បានលាលែងពីតំណែងកាលពីដើមខែនេះ ដែលបន្សុលទុកនូវភាពមិនច្បាស់លាស់ផ្នែកនយោបាយអស់ជាច្រើនសប្តាហ៍។

ទោះជាយ៉ាងណាក៏ដោយ គាត់ត្រូវបានគេរិះគន់ចំពោះការប្រឆាំងនឹងអាពាហ៍ពិពាហ៍ភេទដូចគ្នា និងកំណែទម្រង់លើកកម្ពស់សមភាពយេនឌ័រ បើទោះបីជាក្លាយជាមេដឹកនាំស្ត្រីដំបូងរបស់ប្រទេសជប៉ុនក៏ដោយ។

នៅក្នុងសុន្ទរកថាដំបូងក្នុងនាមជានាយករដ្ឋមន្រ្តីជប៉ុន លោកស្រី Takaichi បាននិយាយថា នាងនឹង «ធ្វើការដោយមិននឿយហត់ដើម្បីកសាងទំនុកចិត្តក្នុងនយោបាយឡើងវិញ និងការពារផលប្រយោជន៍ជាតិរបស់ប្រទេសជប៉ុន»។ លោកស្រីក៏បានសង្កត់ធ្ងន់ផងដែរ ពីសារៈសំខាន់នៃការស្តារសេដ្ឋកិច្ចឡើងវិញ ដែលវាកំពុងបន្តតស៊ូជាមួយអតិផរណា និងប្រាក់យ៉េនរបស់ជប៉ុនដែលធ្លាក់ចុះ។

ឥឡូវនេះរដ្ឋាភិបាលថ្មីរបស់លោកស្រី Takaichi កំពុងប្រឈមមុខនឹងបញ្ហាមួយចំនួនភ្លាមៗ រួមទាំងការដោះស្រាយភាពជាប់គាំងនៃសេដ្ឋកិច្ច ការគ្រប់គ្រងទំនាក់ទំនងជាមួយប្រទេសចិន និងសហរដ្ឋអាមេរិក និងការធានាបាននូវឯកភាពនៅក្នុងក្រុមចម្រុះរបស់នាង។

អ្នកវិភាគនយោបាយបាននិយាយថា ការដឹកនាំរបស់លោកស្រីនឹងបង្ហាញឲ្យឃើញថា តើនាយករដ្ឋមន្ត្រីស្ត្រីដំបូងរបស់ប្រទេសជប៉ុនអាចរក្សាតម្លៃអភិរក្ស និងផ្តល់កំណែទម្រង់ដែលរង់ចាំជាយូរមកហើយឲ្យប្រទេសជប៉ុនបានដែរ ឬទេ។ ទន្ទឹមនឹងនេះ អ្នកអត្ថាធិប្បាយនយោបាយតូក្យូម្នាក់បាននិយាយថា “ការក្លាយជានាយករដ្ឋមន្ត្រីស្ត្រីដំបូងគេរបស់ជប៉ុន បានបង្កើតជារឿងប្រវត្តិសាស្ត្រមួយ។ ប៉ុន្តែបញ្ហាប្រឈមពិតប្រាកដ គឺស្ថិតនៅក្នុងរបៀបដែលនាងដឹកនាំប្រទេស»។

សូមជម្រាបថា បច្ចុប្បន្នប្រទេសជប៉ុនកំពុងស្ថិតនៅលំដាប់ខាងក្រោមគេ ក្នុងចំណោមប្រទេសអភិវឌ្ឍន៍សម្រាប់ស្ត្រីក្នុងតំណែងជាអ្នកដឹកនាំ ខណៈការឡើងកាន់អំណាចរបស់មេដឹកនាំស្រ្តី គឺតំណាងឱ្យរបកគំហើញថ្មីដ៏សំខាន់នៅក្នុងប្រទេសមួយដែលត្រូវបានរិះគន់ជាញឹកញាប់ ចំពោះការផ្ដល់ឱកាសទាបដល់ស្រ្តីនៅក្នុងវិស័យនយោបាយ៕

ប្រទេសថៃ ៖ បន្ទាប់ពីរដ្ឋមន្ត្រីការពារជាតិថៃ លោក ណាត់ថាផុង ណាកផានិច និយាយថា បើការពិភាក្សាក្នុងកិច្ចប្រជុំ GBC នៅម៉ាឡេស៊ី និងការពិភាក្សាក្នុងកិច្ចប្រជុំ JBC នៅថៃបរាជ័យ នាយករដ្ឋមន្ត្រីថៃនឹងមិនចុះហត្ថលេខាលើកិច្ចព្រមព្រៀងសន្តិភាពនៅម៉ាឡេស៊ីទេ ថៃក៏មិនចូលរួមកិច្ចប្រជុំទៀតដែរនាំតែខ្ជះខ្ជាយថវិកាជាតិ ហើយនេះអាចជាកិច្ចប្រជុំចុងក្រោយ ថៃមានវិធីជាច្រើនដោះស្រាយជម្លោះព្រំដែនជាមួយកម្ពុជា អ្វីដែលបម្រុងនឹងកើតឡើង វាត្រូវតែកើត ប៉ុន្តែរដ្ឋមន្ត្រីការបរទេសថៃយល់ឃើញខុសពីនេះ និងជឿជាក់កិច្ចប្រជុំទាំងពីរនឹងទទួលបានលទ្ធផលល្អប្រសើរ ។

ពេលសម្ភាសន៍ជាមួយសារព័ត៌មាននៅថ្ងៃទី២១ ខែតុលា ឆ្នាំ២០២៥ រដ្ឋមន្ត្រីការបរទេស លោក សីហស័ក្តិ និយាយថា លោកជឿជាក់ថៃនឹងទទួលបានលទ្ធផលល្អប្រសើរពីការពិភាក្សាក្នុងកិច្ចប្រជុំក្រុមលេខាធិការគណៈកម្មាធិការព្រំដែនទូទៅកម្ពុជា-ថៃ (GBC) នៅទីក្រុងកូឡាឡាំពួ ប្រទេសម៉ាឡេស៊ី ចាប់ពីថ្ងៃទី២០ ដល់ថ្ងៃទី២២ ខែតុលា ឆ្នាំ២០២៥ និងកិច្ចប្រជុំពេញអង្គគណៈកម្មការចម្រុះខណ្ឌសីមាព្រំដែនគោកកម្ពុជា-ថៃ (JBC) នៅខេត្តចន្ទបុរី ប្រទេសថៃ ចាប់ពីថ្ងៃទី២១ ដល់ថ្ងៃទី២២ ខែតុលា ឆ្នាំ២០២៥។

រដ្ឋមន្ត្រីការបរទេសថៃជឿថា កិច្ចប្រជុំ GBC នៅទីក្រុងកូឡាឡាំពួ ប្រទេសម៉ាឡេស៊ី គឺភាគីទាំងពីរនឹងអាចធ្វើផែនការលម្អិតផ្សេងៗក្រោយពីបានជជែកគ្នា ហើយភាគីទាំងពីរនឹងឈានទៅរកការព្រមព្រៀងគ្នា ។ ទោះយ៉ាងណា ក្រសួងការបរទេសត្រូវជជែកជាមួយមន្ត្រីថៃដែលទៅចូលរួមកិច្ចប្រជុំ GBC នៅទីក្រុងកូឡាឡាំពួ បន្ថែមទៀត ខណៈកិច្ចប្រជុំ JBC នៅខេត្តចន្ទបុរី គឺថៃបានលើកឡើងពីការបណ្តេញពលរដ្ឋខ្មែរចេញពីតំបន់ភូមិណងចាន់ និងភូមិណងញ៉ាកែវ (ទល់មុខភូមិជោគជ័យ និងភូមិព្រៃចាន់) ព្រមទាំងជូនដំណឹងមកកម្ពុជាពីការសាងសង់របងព្រំដែន ។

ថ្មីៗនេះ លោក សីហស័ក្តិ បានចូលរួមកិច្ចប្រជុំចតុភាគីនៅម៉ាឡេស៊ី ហើយពេលបញ្ចប់កិច្ចប្រជុំភាគីកម្ពុជានិងថៃបានឯកភាពគ្នាលើឯកសារព្រាងស្តីពីកិច្ចព្រមព្រៀងសន្តិភាពសម្រាប់ការចុះហត្ថលេខាដោយនាយករដ្ឋមន្ត្រីកម្ពុជា-ថៃ ក្នុងកិច្ចប្រជុំកំពូលអាស៊ាន ដែលមានប្រធានាធិបតីអាមេរិក លោក Donald Trump និងប្រធានអាស៊ានជាសាក្សី ប៉ុន្តែលោក សីហស័ក្តិ បែរជារងនូវការរិះគន់យ៉ាងខ្លាំងពីសំណាក់ក្រុមជ្រុលនិយម ។ ក្រុមជ្រុលនិយមស្តីបន្ទោសរដ្ឋមន្ត្រីការបរទេសថា មុននឹងឯកភាពជាមួយកម្ពុជាលើឯកសារព្រាងសន្តិភាព ហេតុអ្វីមិនសួរមតិពលរដ្ឋ និងកងទ័ពជាមុនសិន ។

គួរបញ្ជាក់ថា កម្ពុជានិងថៃបានរៀបចំកិច្ចប្រជុំក្រុមលេខាធិការគណៈកម្មាធិការព្រំដែនទូទៅកម្ពុជា-ថៃ (GBC) នៅទីក្រុងកូឡាឡាំពួ ប្រទេសម៉ាឡេស៊ី ចាប់ពីថ្ងៃទី២០ ដល់ថ្ងៃទី២២ ខែតុលា ឆ្នាំ២០២៥ ។ កិច្ចប្រជុំនេះធ្វើឡើងដើម្បីត្រៀមរៀបចំសម្រាប់កិច្ចប្រជុំពិសេសលើកទី២ គណៈកម្មាធិការព្រំដែនទូទៅកម្ពុជា-ថៃ (GBC) ដែលនឹងប្រព្រឹត្តនៅថ្ងៃទី២៣ ខែតុលា ឆ្នាំ២០២៥ ដ៏ខ្លីខាងមុខ ដើម្បីជំរុញបន្ថែមការអនុវត្តបទឈប់បា.ញ់ឱ្យបានពេញលេញ និងប្រកបដោយប្រសិទ្ធភាព ព្រមទាំងស្វែងរកកិច្ចសហប្រតិបត្តិការជាក់ស្តែងសំដៅលើកកម្ពស់សន្តិភាព និងស្ថិរភាពរវាងប្រទេសទាំងពីរ ក៏ដូចជាការវិលត្រឡប់ទៅរកប្រក្រតីភាពឡើងវិញ ។

ប្រទេសទាំងពីរក៏បានរៀបចំកិច្ចប្រជុំពេញអង្គគណៈកម្មការចម្រុះខណ្ឌសីមាព្រំដែនគោកកម្ពុជា-ថៃ (JBC) នៅខេត្តចន្ទបុរី ប្រទេសថៃ ដែលមានរយៈពេល២ថ្ងៃ គឺចាប់ពីថ្ងៃទី២១ ដល់ថ្ងៃទី២២ ខែតុលា ឆ្នាំ២០២៥ ដើម្បីពិនិត្យ និងតាមដានវឌ្ឍនភាពកិច្ចប្រជុំ JBC លើកទី៦ ដែលបានរៀបចំនៅរាជធានីភ្នំពេញ កាលពីថ្ងៃទី១៤ ដល់ថ្ងៃទី១៦ ខែមិថុនា ។ កិច្ចប្រជុំប្រព្រឹត្តនេះមានសមាសភាពកម្ពុជាដឹកនាំដោយឯកឧត្ដម ឡាំ ជា រដ្ឋមន្រ្តីទទួលបន្ទុករដ្ឋលេខាធិការដ្ឋានកិច្ចការព្រំដែន និងជាប្រធានគណៈកម្មការចម្រុះព្រំដែនកម្ពុជា-ថៃ ដោយមានសមាសភាពអន្តរក្រសួង និងបណ្តាខេត្តជាប់ព្រំដែនកម្ពុជា-ថៃ ចូលរួម ។ រីឯសមាសភាពថៃដឹកនាំដោយ លោក Prasas Prasasvinitchai ទីប្រឹក្សាក្រសួងការបរទេស និងជាប្រធានគណៈកម្មការចម្រុះព្រំដែនថៃ-កម្ពុជា និងមានការចូលរួមពីតំណាងប្រតិភូអមដទៃទៀត ៕

មីយ៉ាន់ម៉ា៖ យោធាមីយ៉ាន់ម៉ាកាលពីថ្ងៃចន្ទ បានបើកប្រតិបត្តិការបង្រ្កាបលើទីតាំងមួយដែលស្ថិតនៅជិត«ព្រំដែនថៃ» ដោយបានឃាត់ខ្លួនមនុស្សចំនួន 2,198 នាក់ ដែលរួមមានទាំងបុរស ស្រ្តី និងសន្តិសុខ ហើយបានរឹបអូសឧបករណ៍អ៊ីនធឺណេតផ្កាយរណប Starlink ចំនួន 30គ្រឿង ដែលត្រូវបានគេដឹងថា គឺជាឧបករណ៍សម្រាប់បម្រើឲ្យសកម្មភាពឆបោ.កតាមអនឡាញ។

យោងតាមប្រព័ន្ធផ្សព្វផ្សាយក្នុងស្រុករបស់មីយ៉ាន់ម៉ា បានឲ្យដឹងថា ស្ថិតនៅទូទាំងពីស្រុក Mae Sot ក្នុងខេត្ត Tak ទល់មុខនឹង Ban Mae Ku Mai Tha Sung ក្នុងឃុំ Mae Ku របស់ប្រទេសថៃ។ យោធាមីយ៉ាន់ម៉ាបានកំណត់គោលដៅសំខាន់លើបណ្តាញឆបោ.ករបស់ចិន ដោយធ្វើការវា.យឆ្មក់លើទីតាំងមួយដែលគេស្គាល់ថាជា “KKPark” ។ ប្រតិបត្តការនេះ យោធាមីយ៉ាន់ម៉ាបានចោ.ទប្រកាន់មេដឹកនាំកំពូលទ័ព Karen ថាជាប់ពាក់ព័ន្ធក្នុងសកម្មភាពឆបោកទាំងនោះ ប៉ុន្តែខាង Karen បដិសេធរាល់ការជាប់ពាក់ព័ន្ធ។

គួរជម្រាបថា KK Park ត្រូវបានគេរាយការណ៍ថាគឺជាបណ្ដុំសំណង់គ្មានច្បាប់ត្រឹមត្រូវ ដែលមានប្រហែល 260 អាគារនៅមិនទាន់បានចុះឈ្មោះ ហើយត្រូវបានពិពណ៌នានៅក្នុងប្រព័ន្ធផ្សព្វផ្សាយផ្សេងទៀតថាជាមជ្ឈមណ្ឌលបោកប្រាស់តាមអ៊ីនធឺណិតដ៏សំខាន់ ជួលកម្មករដែលត្រូវបានជួញដូរ ឬបង្ខិតបង្ខំឱ្យអនុវត្តការក្លែងបន្លំតាមអ៊ីនធឺណិត និងល្បែងស៊ីសងខុសច្បាប់។

ប្រតិបត្តិការនេះគឺជាផ្នែកមួយនៃការបង្រ្កាបយ៉ាងទូលំទូលាយដោយយោធារបស់មីយ៉ាន់ម៉ា លើការក្លែងបន្លំតាមអ៊ីនធឺណិត ការលេងល្បែងខុសច្បាប់ និងឧក្រិដ្ឋកម្មតាមអ៊ីនធឺណិតឆ្លងដែន ដែលមានទីតាំងប្រមូលផ្ដុំភាគច្រើនស្ថិតនៅតំបន់ជាប់ព្រំដែនថៃ។

តាមរយៈព័ត៌មានខាងលើ វាបង្ហាញឲ្យយើងឃើញថា ការពិតជនល្មើសដែលជាប់ពាក់ព័ន្ធនឹងករណីឆបោ.កតាមប្រព័ន្ធអុីនធើណេតភាគច្រើន គឺមានប្រភពមកពីប្រទេសថៃ និងមីយ៉ាន់ម៉ា ប៉ុន្តែរាជរដ្ឋាភិបាលប្រទេសថៃហាក់មិនសូវយកចិត្តទុកដាក់បង្រ្កាប ឬចាត់វិធានការបោសសម្អាតអ្វីធំដុំឡើយ។ បន្ថែមពីនោះ នាយករដ្ឋមន្រ្តីថៃបែរជាខំចំណាយពេលរាប់ម៉ោងសុំជួបប្រធានាធិបតីកូរ៉េតាមទូរស័ព្ទ ដើម្បីចូលខ្លួនមកជួយដោះស្រាយបញ្ហានៅប្រទេសកម្ពុជាទៅវិញ ស្របពេលដែលប្រទេសរបស់ខ្លួនកំពុងស្ថិតក្នុងសភាពអាណាធិបតេយ្យនៅឡើយ៕

លោក ដូណាល់ ត្រាំ បានជំរុញឱ្យ លោក វ៉ូឡូឌីមៀ ហ្សេឡេនស្គី (Volodymyr Zelenskyy) បោះបង់ចោលទឹកដីមួយចំនួនធំទៅឱ្យរុស្ស៊ី ជាពិសេសតំបន់ Donbas។
ដូណាល់ ត្រាំ បានថ្លែងថា៖”អ៊ុយក្រែន គួរតែបោះបង់តំបន់ Donbas ដែលត្រូវបានរុស្សុីគ្រប់គ្រង ប្រមាណជា៨០ភាគរយ ដើម្បីឈានទៅរកសន្តិភាព និងបទឈប់បាញ់។ ក្នុងករណីអ៊ុយក្រែនចង់បានតំបន់នោះមកវិញ យើងនឹងបើកកិច្ចពិភាក្សាតាមក្រោយទៀត”។
ពាក់ព័ន្ធនឹងបញ្ហានេះ លោក វ៉ូឡូឌីមៀ ហ្សេឡេនស្គី (Volodymyr Zelenskyy) បដិសេធមិនឱ្យទឹកដីរបស់ខ្លួនទៅរុស្ស៊ី ដើម្បីប្តូរយកសន្តិភាពនោះឡើយ។
លោក ពូទីន អះអាងថា ប្រជាជនភាគច្រើននៅតំបន់ Donbas និយាយភាសារុស្ស៊ី ហើយពួកគេកំពុងប្រឈមមុខនឹងអំពើប្រល័យពូជសាសន៍ ដែលចាំរុស្ស៊ី ចូលទៅរំដោះ។
គួរបញ្ជាក់ថា តំបន់ Donbas ជាតំបន់សម្បូរដោយធនធានធម្មជាតិ ដូចជា ធ្យូងថ្ម រ៉ែដែក លីចូម ទីតានីញ៉ូម និងរ៉ែកម្រផ្សេងទៀតដែលមានសារសំខាន់សម្រាប់ការអភិវឌ្ឍបច្ចេកវិទ្យាអេឡិចត្រូនិក៕

ប្រទេសថៃ ៖ នៅថ្ងៃទី២១ ខែតុលា ឆ្នាំ២០២៥ លោក ណាត់ថាផុង ណាកផានិច រដ្ឋមន្ត្រីការពារជាតិថៃបាននិយាយទៅកាន់សារព័ត៌មានថា បើការពិភាក្សាក្នុងកិច្ចប្រជុំ GBC នៅម៉ាឡេស៊ី និងការពិភាក្សាក្នុងកិច្ចប្រជុំ JBC នៅថៃបរាជ័យ គឺថៃនឹងមិនចុះហត្ថលេខាលើកិច្ចព្រមព្រៀងសន្តិភាពនៅម៉ាឡេស៊ីទេ ហើយថៃក៏មិនចូលរួមកិច្ចប្រជុំទៀតដែរ នេះអាចជាលើកចុងក្រោយ ។ ថៃមានវិធីជាច្រើនដើម្បីដោះស្រាយជម្លោះព្រំដែនជាមួយកម្ពុជា អ្វីដែលបម្រុងនឹងកើតឡើង វាត្រូវតែកើត ។ ការលើកឡើងរបស់រដ្ឋមន្ត្រីការពារជាតិថៃ គឺស្របពេលកម្ពុជានិងថៃបាននិងកំពុងរៀបចំកិច្ចប្រជុំ GBC និង JBC ។

លោក ណាត់ថាផុង រដ្ឋមន្ត្រីការពារជាតិសង្ឃឹមនឹងទទួលបានលទ្ធផលពីកិច្ចប្រជុំ GBC នៅប្រទេសម៉ាឡេស៊ី ៥០% ពីព្រោះកន្លងមក លោក សីហស័ក្តិ ពួងកេតកែវ រដ្ឋមន្ត្រីការបរទេសបានជជែករួចហើយ បើកិច្ចប្រជុំ GBC លើកនេះជោគជ័យជារឿងល្អប្រសើរ និងចង់ឱ្យពលរដ្ឋយល់ពីការដោះស្រាយជម្លោះដោយសន្តិវិធី ។ ថៃនឹងពុំចាញ់ប្រៀបដាច់ខាត ប៉ុន្តែបើកិច្ចប្រជុំបរាជ័យ លោកនឹងមិនចូលរួមប្រជុំជាមួយកម្ពុជាទៀតទេ នាំតែខាតបង់ថវិកាជាតិ ។ ថៃអនុវត្តបានល្អបំផុតកន្លងមក បើកម្ពុជាមិនសហការ អ្វីដែលបម្រុងនឹងកើតឡើង វាត្រូវតែកើត ។

កម្ពុជាត្រូវតែយល់ព្រមអនុវត្តតាមលក្ខខណ្ឌ៤ចំណុចរបស់ថៃ រួមមាន ៖ ១-ដកអាវុធធុនធ្ងន់ចេញពីតំបន់ព្រំដែន ២-ដោះមីន ៣-បង្ក្រាបឧក្រិដ្ឋកម្មឆ្លងដែន និង៤-គ្រប់គ្រងតំបន់ព្រំដែន ទើបនាយករដ្ឋមន្ត្រីថៃចុះហត្ថលេខាលើកិច្ចព្រមព្រៀងសន្តិភាពក្នុងកិច្ចប្រជុំកំពូលអាស៊ានដោយមានប្រធានាធិបតីអាមេរិក លោក Donald Trump និងប្រធានអាស៊ានជាសាក្សី ។

ប្រទេសថៃនៅតែប្រកាន់គោលជំហរយកទឹកដីនៅតំបន់ព្រំដែនខេត្តស្រះកែវ (ទល់មុខភូមិជោគជ័យ និងភូមិព្រៃចាន់) ប្រគល់ឱ្យពលរដ្ឋថៃ បើកម្ពុជាមិនព្រមជជែកពីបញ្ហានេះក្នុងកិច្ចប្រជុំ JBC គឺថៃមិនចាប់អារម្មណ៍ទេ ថៃចង់បានកន្លែងណា ត្រូវតែយកកន្លែងនោះ ។ ហេតុនេះ បើកិច្ចប្រជុំ GBC និង JBC លើកនេះបរាជ័យ គឺគ្មានការចុះហត្ថលេខាលើកិច្ចព្រមព្រៀងសន្តិភាពនៅម៉ាឡេស៊ីក្នុងខែតុលាទេ វាអាចជាកិច្ចប្រជុំលើកចុងក្រោយ ថៃនឹងមិនចូលរួមប្រជុំទៀតឡើយ ។

គួរបញ្ជាក់ថា ប្រទេសកម្ពុជានិងថៃបាននិងកំពុងរៀបចំកិច្ចប្រជុំក្រុមលេខាធិការដ្ឋាននៃគណៈកម្មាធិការព្រំដែនទូទៅកម្ពុជា-ថៃ (GBC) នៅទីក្រុងកូឡាឡាំពួ ប្រទេសម៉ាឡេស៊ី ចាប់ពីថ្ងៃទី២០ ដល់ថ្ងៃទី២២ ខែតុលា ឆ្នាំ២០២៥ និងរៀបចំកិច្ចប្រជុំពិសេសគណៈកម្មការចម្រុះខណ្ឌសីមាព្រំដែនគោកកម្ពុជា-ថៃ (JBC) នៅខេត្តចន្ទបុរី ប្រទេសថៃ ចាប់ពីថ្ងៃទី២១ ដល់ថ្ងៃទី២២ ខែតុលា ឆ្នាំ២០២៥ ។ កិច្ចប្រជុំនេះដើម្បីជំរុញបន្ថែមការអនុវត្តបទឈប់បា.ញ់ឱ្យបានពេញលេញ និងប្រកបដោយប្រសិទ្ធភាព ព្រមទាំងស្វែងរកកិច្ចសហប្រតិបត្តិការជាក់ស្តែងសំដៅលើកកម្ពស់សន្តិភាព ស្ថិរភាពរវាងប្រទេសទាំងពីរ ក៏ដូចជាការវិលត្រឡប់ទៅរកប្រក្រតីភាពឡើងវិញ ៕

ទីក្រុងសេអ៊ូល៖ អនុរដ្ឋមន្រ្តីក្រសួងការពារជាតិរបស់វៀតណាម កំពុងរងការថ្កោលទោ.សយ៉ាងធ្ងន់ធ្ងរ ក្រោយប្រព្រឹត្តសកម្មភាពមិនសមរម្យ ដោយបានប្រើកាយវិការ និងពាក្យសំដីបំពានទៅលើនារីម្នាក់ដែលមន្រ្តីរាជការបស់កូរ៉េខាងត្បូងដោយចេតនា នៅក្នុងកិច្ចប្រជុំដ៏ពិសេសមួយលកាលពីខែមុន ដែលមានអ្នកចូលរួមមកពី 68ប្រទេស។

នៅថ្ងៃទី21 ខែតុលា ឆ្នាំ2025 សារព័ត៌មានរបស់កូរ៉េខាងត្បូងបានចុះផ្សាយយ៉ាងផុសផុល ក្រោយករណីនៃការបៀតបៀនកេរ្តិ៍ខ្មាសលើមន្រ្តីរាជការនារីកូរ៉េម្នាក់ ពីសំណាក់អនុរដ្ឋមន្រ្តីក្រសួងការពារជាតិរបស់វៀតណាម កាលពីខែមុនបានបែ.កធ្លាយ ដែលធ្វើឲ្យវាក្លាយជាប្រធានបទជជែកដេញដោលពេញប្រព័ន្ធផ្សព្វផ្សាយ និងទាមទារឲ្យរដ្ឋាភិបាលរបស់វៀតណាមចេញមកបកស្រាយ និងទទួលសុខត្រូវចំពោះបញ្ហានេះ។

យោងតាមអត្ថបទចុះផ្សាយរបស់សារព័ត៌មាន Yonhap បានឲ្យដឹងថា អនុរដ្ឋមន្ត្រីក្រសួងការពារជាតិវៀតណាម Hoang Xuan Chien ដែលបានទៅបំពេញទស្សនកិច្ចនៅកូរ៉េខាងត្បូងក្នុងឱកាសនៃកិច្ចសន្ទនាការពារជាតិទីក្រុងសេអ៊ូល (SDD) ត្រូវបានគេរាយការណ៍ថា បានប៉ះពាល់រាងកាយមិនសមរម្យលើនារីជាមន្រ្តីរាជការរបស់កូរ៉េខាងត្បូងម្នាក់ ដែលជាអ្នកលើកម្ហូបអាហារនៅក្នុងកម្មវិធីទទួលទានអាហារពេលល្ងាចជុំគ្នា រវាងមន្ត្រីយោធាជាន់ខ្ពស់មកពីកូរ៉េខាងត្បូង និងវៀតណាមកាលពីថ្ងៃទី 11 ខែកញ្ញា។

បើតាមពាក្យសំដីរបស់នារីរងគ្រោះបានឲ្យដឹងថា «នៅកំឡុងពេលអាហារពេលល្ងាច លោក Hoang Xuan Chien បានអង្គុយនៅតុផ្សេងទេ ប៉ុន្តែសុខៗគាត់បែរជាបានមកអង្គុយពីក្រោយនាងដោយចេតនា» នាងបានបន្ថែមថា «គាត់បានព្យាយាមមកសំណេះសំណាលជាមួយខ្ញុំ ហើយបន្ទាប់មក គាត់បានប៉ះពាល់លើរាងកាយ និងប្រើពាក្យសំដីមិនសមរម្យជាច្រើនមកកាន់ខ្ញុំ»។

គួរបញ្ជាក់ថា នៅពិធីនោះក៏មានទទួលគ្រឿងស្រវឹងសម្រាប់ភ្ញៀវដែលបានចូលរួមផងដែរ។ យ៉ាងណាក៏ដោយ នៅមួយថ្ងៃបន្ទាប់ពីកើតមាននូវបញ្ហានេះ អនុរដ្ឋមន្រ្តីវៀតណាមរូបនេះបានធ្វើដំណើរចាកចេញពីប្រទេសកូរ៉េបាត់ទៅហើយ។ នេះបើយោងតាមសេចក្ដីរាយការណ៍បន្ទាប់ពីកើតមានបញ្ហានេះ។

ក្រសួងការពារជាតិកូរ៉េខាងត្បូង បានចាត់ទុកបញ្ហានេះ គឺបញ្ហារឿងធ្ងន់ធ្ងរមួយ ដោយបន្ទាប់ពីនោះបាន 8ថ្ងៃ ក្រសួងការពារជាតិកូរ៉េ បានកោះហៅអនុព័ន្ធយោធាវៀតណាម ប្រចាំនៅកូរ៉េខាងត្បូងមកជួប ដើម្បីធ្វើការតវ៉ា។ ជាមួយគ្នានេះដែរ ក្រសួងការពារជាតិកូរ៉េ បានថ្កោលទោសចំពោះទង្វើរបស់អនុរដ្ឋមន្ត្រីវៀតណាមរូបនេះ និងស្នើឱ្យប្រទេសវៀតណាមចាត់វិធានការទប់ស្កាត់ការកើតឡើងវិញ ហើយភាគីវៀតណាមក៏បានបង្ហាញពីចេតនាយល់ស្របតាមការទាមទាររបស់កូរ៉េខាងត្បូងផងដែរ។

បញ្ហាមួយនេះបានធ្វើឲ្យវៀតណាមអាម៉ាសមុខនៅចំពោះមុខអន្តរជាតិជាខ្លាំង ដែលមិនគួរណាមន្រ្តីជាន់ខ្ពស់មួយរូបរបស់ខ្លួនម្នាក់ ហ៊ានប្រព្រឹត្តទង្វើគ្មានសីលធម៌ នៅក្នុងកម្មវិធីអន្តរជាតិដ៏ធំមួយ និងមានអ្នកចូលរួមសុទ្ធតែជាអ្នកការទូតតំណាងប្រទេសជាច្រើនបែបនេះសោះ៕

បាងកក៖ អ្នកនាំពាក្យកងទ័ពជើងគោកថៃ បានប្រើពាក្យសំដីប្រមា.ថមើលងាយកម្ពុជា ថាប្រឌិតរឿងរកអំពីការឃើញសារធាតុគីមីនៅតាមព្រំដែន រួចទម្លាក់កំហុសថាវាជាស្នាដៃរបស់ថៃ ដើម្បីកៀគរជំនួយពីសម្បុរសជនបរទេស។ មិនតែប៉ុណ្ណោះ អ្នកនាំពាក្យកងទ័ពថៃរូបនេះថែមទាំងនិយាយដោយមិនចេះខ្មាសមាត់ថា តាំងពីដើមមក យោធាថៃមិនដែលប្រើសារធាតុគីមីជាអាវុ.ធវា.យប្រហា.រលើកម្ពុជានោះទេ។

ក្រោយកម្ពុជាបានប្រកាសថា អាជ្ញាធរជំនាញផ្នែកអាវុ.ធជាតិគីមីបានរកឃើញនូវសារធាតុគីមីច្រើនប្រភេទខុសៗគ្នា ប្រមាណជា 70 មុខ នៅតាមបណ្ដោយព្រំដែនកម្ពុជា-ថៃ បន្ទាប់ពីសង្រ្គា.មបានបញ្ចប់,នៅថ្ងៃទី 20 ខែតុលា ឆ្នាំ 2025 អ្នកនាំពាក្យរបស់កងទ័ពជើងគោកថៃ លោក Winthai Suvaree បានចេញមកច្រានចោលការលើកឡើងនេះ និងវា.យបកមកកម្ពុជាវិញថា ការចោ.ទប្រកាន់នេះគឺជាការបំភ្លៃការពិត ខ្វះភស្តុតាងគាំទ្រ និងមិនមានទម្ងន់ផ្លូវច្បាប់។

លោក Winthai បញ្ជាក់ថា ថៃមិនបានប្រយុទ្ធដោយប្រើអាវុ.ធគីមីទេ ទាក់ទងនឹងគ្រាប់រំសេវផូស្វ័រពណ៌ស (WP) ដែលកម្ពុជាយល់ថាជាផ្សែងពុលកន្លងមកនោះ គឺគ្រាន់តែជាផ្សែងដើម្បីបង្កើតជាការបំភ្លឺ ការបំផ្ទុះ និងភ្លើងប៉ុណ្ណោះ ហើយវាមិនត្រូវបានចាត់ថ្នាក់ជាអាវុធគីមីនៅក្រោមអនុសញ្ញាអាវុធគីមី (CWC) នោះទេ។ ជាងនេះទៅទៀត មិនមានសន្ធិសញ្ញាអន្តរជាតិហាមឃាត់ការរក្សាទុក ឬប្រើប្រាស់គ្រាប់រំសេវប្រភេទនេះផងដែរ។

ថ្លែងនៅចំពោះមុខអ្នកសារព័ត៌មាន អ្នកនាំពាក្យកងទ័ពថៃខាងលើបានលើកឡើងពីការយល់ឃើញរបស់ខ្លួនថា ការផ្សព្វផ្សាយក្នុងន័យចោ.ទប្រកាន់របស់ប្រទេសកម្ពុជា គឺមានចេតនាបំភ្លៃការពិត និងបង្កើតការយល់ច្រឡំចំពោះថៃនៅលើឆាកអន្តរជាតិ។

គួរបញ្ជាក់ថា បើតាមលោក នាយឧត្តមសេនីយ៍ ផន ណារ៉ា អគ្គលេខាធិការអាជ្ញាធរជាតិនៃព្រះរាជាណាចក្រកម្ពុជាសម្រាប់ការហាមឃាត់អាវុធគីមី នុយក្លេអ៊ែរ ជីវសាស្ត្រ និងវិទ្យុសកម្ម (NACW) ១៦ ខែតុលា ឆ្នាំ ២០២៥ បានប្រកាសដោយបើកជំហរថា អាជ្ញាធរជំនាញកម្ពុជាបានរកឃើញសារធាតុគីមីជាង 70ប្រភេទ ដែលអាចប៉ះពាល់ដល់មនុស្សនិងសត្វ បរិស្ថាន ក្នុងរយៈពេលមធ្យម និងយូរអង្វែង នៅតាមបណ្តោយព្រំដែនកម្ពុជា-ថៃ ក្រោយសង្គ្រាមរយៈពេល5ថ្ងៃបានបញ្ចប់។

លោក ណារ៉ា បានសង្កត់ធ្ងន់ថា ក្រោយសង្គ្រាមបញ្ចប់ទៅ នៅក្នុងតំបន់ព្រំដែនទាំងអស់មិនមែនមានតែមីនសុទ្ធនោះទេ ដោយឥឡូវនេះរកឃើញសារធាតុគីមីមួយចំនួនទៀត ដែលតម្រូវឲ្យធ្វើផែនការរៀបចំដើម្បីបន្សាប ឬបំផ្លាញចោល ដែលទាមទារឱ្យមានការរៀបចំថវិកាមួយចំនួនដើម្បីដោះស្រាយ ហើយលោកក៏បានទទូចឱ្យគ្រប់ភាគីពាក់ព័ន្ធទាំងអស់ សូមបន្តតាមដានដោយយកចិត្តទុកដាក់ខ្ពស់លើបញ្ហានោះផងដែរ។

សរុបមក មិនថាក្នុងអំឡុងពេលនៃការប៉ះទង្គិចគ្នារវាងកម្ពុជា-ថៃ និងនៅក្នុងពេលដែលភាពតានតឹងកំពុងបន្តកើតមាននៅតាមតំបន់ព្រំដែនមួយចំនួននោះទេ មនុស្សជាច្រើនសុទ្ធតែដឹងថា យោធាថៃបានលួ.ចប្រើនូវអាវុ.ធគីមីដើម្បីប្រឆាំងលើកងទ័ព និងជនសុីវិលកម្ពុជា។ ប៉ុន្តែជាសន្តាននៃជាតិសាសន៍ដែលពូកែបំភ្លៃការពិត ថៃតែងបដិសេធដោយមិនអៀនខ្មាស និងមិនទទួលស្គាល់ការពិតជាដាច់ខាត៕