BLACKPINK ជួយសង្គ្រោះក្រុមហ៊ុន YG

ដំណើរទេសចរណ៍ជាសកលរបស់ BLACKPINK បានចូលរួមចំណែកយ៉ាងធំធេងក្នុងការជួយសង្គ្រោះ YG Entertainment ពីការខាតបង់។ យោងតាមប្រព័ន្ធផ្សព្វផ្សាយកូរ៉េ ក្រុមហ៊ុនកម្សាន្ត YG ទើបតែបានប្រកាសប្រាក់ចំណេញប្រតិបត្តិការរួមរបស់ខ្លួនក្នុងត្រីមាសទី៣ ឆ្នាំ ២០២៥ គឺ ៣១.១ ពាន់លានវ៉ុន ដោយប្តូរពីការខាតបង់ ៣.៦ ពាន់លានវ៉ុនក្នុងរយៈពេលដូចគ្នាកាលពីឆ្នាំមុនទៅជាប្រាក់ចំណេញ។

ប្រាក់ចំណូលរបស់ក្រុមហ៊ុនឈានដល់ ១៧៣.១ ពាន់លានវ៉ុន កើនឡើង ១០៧.២% ពីឆ្នាំមុន។ ប្រាក់ចំណេញសុទ្ធក៏បានវិលមករកកម្រិតរកប្រាក់ចំណេញវិញផងដែរ ដោយឡើងដល់ ២៤,៤ ពាន់លានវ៉ុន។ កន្លងមក យោងតាមទិន្នន័យពីក្រុមហ៊ុនព័ត៌មានហិរញ្ញវត្ថុ ការប៉ាន់ប្រមាណជាមធ្យមនៃប្រាក់ចំណេញប្រតិបត្តិការរបស់ YG ដែលព្យាករណ៍ដោយឧស្សាហកម្មមូលបត្រគឺ ៣៣.៩ ពាន់លានវ៉ុន ប្រាក់ចំណូល ១៩៨.៤ ពាន់លានវ៉ុន និងប្រាក់ចំណេញសុទ្ធ ២៥.២ ពាន់លានវ៉ុន។ ទោះបីជាលទ្ធផលជាក់ស្តែងទាបជាងការរំពឹងទុករបស់ទីផ្សារបន្តិចក៏ដោយ YG បាននិយាយថា ប្រាក់ចំណូលត្រីមាសទី ៣ក្នុងឆ្នាំនេះគឺជាចំនួនខ្ពស់បំផុតនៅក្នុងប្រវត្តិសាស្រ្តត្រីមាសទីបីរបស់ក្រុមហ៊ុន។

YG បានពន្យល់ថា លទ្ធផលនេះបានមកពីការចេញអាល់ប៊ុមថ្មី និងសមិទ្ធិផលឌីជីថលរបស់ Treasure និង Baby Monster រួមជាមួយនឹងភាពជោគជ័យនៃដំណើរទេសចរណ៍ទូទាំងពិភពលោកដោយ BLACKPINK, Treasure និង Baby Monster ។
យើងនឹងបន្តពង្រីកសកម្មភាពរបស់សិល្បករដែលជាសាខារបស់យើងដើម្បីកសាងមូលដ្ឋានគ្រឹះសម្រាប់កំណើនប្រកបដោយចីរភាពនាពេលអនាគត» សង្កត់ធ្ងន់ថាចំណុចកណ្តាលនៃការរីកចម្រើនរបស់ YG លើកនេះគឺ BLACKPINK ។

ដំណើរទេសចរណ៍ជុំវិញពិភពលោក Deadline របស់ BLACKPINK បានចាប់ផ្តើមនៅក្នុងខែកក្កដា ហើយនឹងមានរយៈពេលរហូតដល់ខែមករា ឆ្នាំ២០២៦ ជាមួយនឹងកម្មវិធីចំនួន ៣៣និងការរំពឹងទុកថានឹងមានអ្នកចូលរួមជាង ២ លាននាក់។ ទោះបីជាទំហំនៃកម្មវិធីបន្ថែមមិនត្រូវបានបង្ហាញក៏ដោយ ជាមួយនឹងការប្រគំតន្ត្រីនីមួយៗទាក់ទាញអ្នកទស្សនាប្រហែល ៦០,០០០នាក់ ដំណើរកម្សាន្តនេះត្រូវបានគេរំពឹងថានឹងបន្តមានឥទ្ធិពលវិជ្ជមានលើប្រាក់ចំណូលរបស់ YG នៅឆមាសទីមួយនៃឆ្នាំ២០២៦។

អ្នកគាំទ្រកំពុងរង់ចាំការត្រឡប់មកវិញរបស់ Blackpink ជាមួយនឹងអាល់ប៊ុមថ្មី។ ទោះជាយ៉ាងណាក៏ដោយ YG មិនទាន់បង្ហាញកាលបរិច្ឆេទចេញអាល់ប៊ុមផ្លូវការនៅឡើយទេ ដោយគ្រាន់តែនិយាយថា អាល់ប៊ុមនេះស្ថិតក្នុងដំណាក់កាលចុងក្រោយនៃការបញ្ចប់ ហើយ Blackpink បានបញ្ចប់ការថត MV ថ្មី។ ថ្មីៗនេះ មានព័ត៌មានថា អាល់ប៊ុមរបស់ Blackpink នឹងចេញនៅខែមករា ឆ្នាំ២០២៦៕