សមាជិកសភាឥណ្ឌូនេស៊ីបានអនុម័តជាឯកច្ឆ័ន្ទនូវក្រមព្រហ្មទណ្ឌថ្មីដ៏ទូលំទូលាយមួយកាលពីថ្ងៃ អង្គារ ដែលនឹងដាក់ទោសការរួមភេទមុនការរៀបអាពាហ៍ពិពាហ៍ ឲ្យជាប់ពន្ធនាគាររហូតដល់ ១ឆ្នាំ នេះជាផ្នែកមួយនៃការផ្លាស់ប្ដូរដែលអ្នករិះគន់និយាយថា គំរាមកំហែងដល់សិទ្ធមនុស្ស និង​ សិទ្ធិសេរីភាពនៅក្នុងប្រទេស អាស៊ីអាគ្នេយ៍។

ច្បាប់នេះ ក៏អនុវត្តចំពោះជនបរទេស និង អ្នកទេសចរផងដែរ ដោយហាមប្រាមការរួមរស់ជាមួយគ្នាមុនរៀបការ ការក្បត់សាសនា និង ផ្ដល់ទណ្ឌកម្មចំពោះការប្រមាថប្រធានាធិបតី ឬ ការបង្ហាញទស្សនៈផ្ទុយនឹងមនោគមវិជ្ជាជាតិរបស់ឥណ្ឌូនេស៊ីផងដែរ។

សមាជិកសភា លោក Bambang Wuryanto ដែលដឹកនាំគណៈកម្មាការសភាទទួលបន្ទុកកែសម្រួលក្រមសម័យអាណានិគមបាននិយាយថា «យើងទាំងអស់គ្នាបានយល់ព្រមផ្ដល់សច្ចាប័ន លើសេចក្ដីព្រាងច្បាប់នេះ ហើយអាចនឹងត្រូវបានអនុម័តនៅដើមសប្ដាហ៍ក្រោយ»។

គួរបញ្ជាក់ផងដែរថា  ប្រទេស ឥណ្ឌូនេស៊ី ដែលជាប្រទេសកាន់សាសនាឥស្លាមធំជាងគេក្នុងពិភពលោក បានឃើញការកើនឡើងនៃការអភិរក្សសាសនាក្នុងរយៈពេលប៉ុន្មានឆ្នាំចុងក្រោយនេះ ខណៈច្បាប់ឥស្លាមតឹងរឹងត្រូវបានអនុវត្តរួចហើយ នៅក្នុងផ្នែកខ្លះនៃប្រទេស។ ជាពិសេសការទទួលទាន់គ្រឿងស្រវឹង និង ល្បែងស៊ីសង គឺត្រូវបានហាមឃាត់ជាដាច់ខាត៕

ប្រភព៖ BBC

យោងតាមសារព័ត៌មាន AP បានផ្សាយថា សមាជិកសភាបក្សប្រឆាំងទួរគីម្នាក់ត្រូវបានបញ្ជូនទៅកាន់មន្ទីរពេទ្យកាលពីថ្ងៃទី៦ ខែធ្នូបន្ទាប់ពីការប៉ះទង្គិចគ្នាជាមួយសមាជិកសភាដទៃទៀតនៅក្នុងកិច្ចប្រជុំសភា ខណៈដែលភាគីទាំងសងខាងព្យាយាមចរចាអំពីថវិកាសម្រាប់ឆ្នាំក្រោយ។

វីដេអូពីកន្លែងកើតហេតុបានបង្ហាញឱ្យឃើញថា សមាជិកសភាមកពីគណបក្សកាន់អំណាចរបស់ប្រធានាធិបតី Recep Tayyip Erdogan និងគណបក្សប្រឆាំងកំពុងវាយតប់គ្នា។ សមាជិកសភាមួយចំនួនបានប្រកែកគ្នាទៅវិញទៅមក ខណៈដែលអ្នកខ្លះទៀតព្យាយាមទាញមិត្តរួមការងារឱ្យបែកគ្នា។ យ៉ាងហោចណាស់មានសមាជិកសភាម្នាក់ត្រូវបានគេវាយហើយដួលទៅលើដី។

គេហទំព័រព័ត៌មាន DHA បានផ្សាយថា លោក Huseyin Ors សមាជិកសភាមកពីគណបក្ស Good party ត្រូវបានគេវាយចំក្បាល។ លោក Ors ត្រូវបានគេបញ្ជូនទៅបន្ទប់សង្គ្រោះបន្ទាន់ក្នុងមន្ទីរពេទ្យ។ លោក Aylin Cesur សមាជិកសភាមកពីគណបក្ស Good បាននិយាយថា “យើងបានឃើញថា ស្ថានភាពរបស់គាត់កាន់តែយ៉ាប់យ៉ឺនបន្ទាប់ពីការវាយចំក្បាល។

cកន្លងមក សភាទួរគីមានការប៉ះទង្គិចគ្នាមួយចំនួនរវាងសមាជិកសភា ។ មូលហេតុចម្បងនៃឧបទ្ទវហេតុនៅថ្ងៃទី ៦ ខែធ្នូគឺមិនច្បាស់ទេ ប៉ុន្តែរដ្ឋាភិបាលទួរគីកំពុងជួបប្រទះបរិយាកាសតានតឹងនៅមុនការបោះឆ្នោតប្រធានាធិបតី និងសភាដែលគ្រោងធ្វើនៅខែមិថុនាឆ្នាំក្រោយ៕

អន្តរជាតិ៖ ក្រោយចេញការព្រមានជាបន្តបន្ទាប់ទៅលើក្រុមហ៊ុនបច្ចេកវិទ្យាយក្ស Meta Platform ដែលជាមេធំរបស់ Facebook ជុំវិញការរំលោភទិន្នន័យអ្នកប្រើប្រាស់ ពេលនេះសហភាពអឺរ៉ុបមិនអនុញ្ញាតឱ្យ Meta ដំណើរការការផ្សាយពាណិជ្ជកម្មដោយប្រើទិន្នន័យផ្ទាល់ខ្លួនរបស់អ្នកប្រើប្រាស់នោះទេ។ នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃទី០៧ ខែធ្នូ ឆ្នាំ២០២២។

ជុំវិញបញ្ហានេះនិយតករអៀរឡង់ត្រូវបានអ្នកឃ្លាំមើលឯកជនភាព និងក្រុមប្រឹក្សាការពារទិន្នន័យអឺរ៉ុបផ្តល់រយៈពេលមួយខែក្នុងការសម្រេចចិត្តទាក់ទិននឹងការរំលោភបំពានទិន្នន័យ ក៏ដូចជាការតាមដានភាពឯកជនរបស់អ្នកប្រើប្រាស់ម្តងហើយម្តងទៀត។ ពេលនេះនិយតករអៀឡង់បានចេញសេចក្តីសម្រេចហើយ ដោយ Meta នឹងមិនអាចដំណើរការការផ្សាយពាណិជ្ជកម្មដោយផ្អែកលើការប្រើប្រាស់ទិន្នន័យផ្ទាល់ខ្លួនបាននោះទេ។ ពោលគឺ លុះត្រាតែមានការយល់ព្រមពីអ្នកប្រើប្រាស់ទើប Meta អាចបើកដំណើរការផ្សព្វផ្សាយពាណិជ្ជកម្មនៅសហភាពអឺរ៉ុបបាន។

គួរបញ្ជាក់ដែរថា ក្នុងអំឡុងចុងខែវិច្ឆិកាកន្លងទៅនេះ Meta ទើបតែទទួលរងការផាកពិន័យប្រមាណខ្ទង់ ២៧៥លានដុល្លារនៅក្នុងប្រទេសអៀឡង់ ក្រោមការស៊ើបអង្កេតរបស់ DPC ចាប់តាំងពីឆ្នាំ២០២១ មកម្លេះ បន្ទាប់ពីមានរបាយការណ៍ប្រព័ន្ធផ្សព្វផ្សាយបានរកឃើញថាមានសំណុំក្លែងបន្លំទិន្នន័យដែលត្រូវបានដាក់ឱ្យប្រើប្រាស់នៅលើអ៊ីនធឺណិត៕

បរទេស៖ ប្រទេសប៉េរូបានបញ្ជាឱ្យបិទឆ្នេរជាច្រើនកន្លែងនៅភាគខាងលិចនៃប្រទេស ក្រោយរកឃើញពីការផ្ទុះឡើងយ៉ាងខ្លាំងនៃជំងឺគ្រុនផ្តាសាយបក្សី រហូតបណ្ដាលឱ្យសត្វស្លាបសមុទ្រងាប់រាប់ម៉ឺនក្បាល។

ប្រព័ន្ធផ្សព្វផ្សាយក្នុងស្រុក របស់ប៉េរូ បានរាយការណ៍ថានៅថ្ងៃទី ៦ ខែធ្នូ ឆ្នាំ ២០២២ អាជ្ញាធរនៃប្រទេសប៉េរូបានបញ្ជាឱ្យបិទឆ្នេរទេសចរណ៍ជាច្រើនជាបណ្ដោះអាសន្ននៅភាគខាងលិចនៃប្រទេសបន្ទាប់ពីការផ្ទុះឡើងនៃជំងឺគ្រុនផ្តាសាយបក្សី ហើយសត្វស្លាបសមុទ្រ ៨០,០០០-៩០,០០០ ក្បាលបានស្លាប់នៅតាមបណ្តោយឆ្នេរ រហូតអាជ្ញាធរត្រូវប្រញាប់ប្រញាល់ធ្វើការសម្អាត សាកសព និងគ្រោងឆ្អឹងសត្វស្លាប ដើម្បីបំផ្លាញ និងគ្រប់គ្រងការសម្លាប់មេរោគនៅតាមតំបន់ឆ្នេរ។

ជាមួយគ្នានោះអភិបាលក្រុង Miraflores លោក Luis Molina បាននិយាយថា ឆ្នេរនឹងត្រូវបិទជាបណ្តោះអាសន្នសិន ដោយភ្ញៀវទេសចរដែលធ្លាប់ទៅហាលថ្ងៃ ឬហែលទឹកលេងនឹងមិនអាចចូលទៅក្នុងតំបន់នេះបានទេ លើកលែងតែអ្នកជិះទូកលេងប៉ុណ្ណោះ។

វិធានការនេះអនុវត្តរហូតដល់អាជ្ញាធរ បោសសម្អាតគ្រោងឆ្អឹងបក្សី និង សម្លាប់មេរោគតាមតំបន់ឆ្នេរឱ្យមានសុវត្តិភាព។

គួរបញ្ជាក់ថា មុននឹងសត្វស្លាបបានស្លាប់កាន់តែច្រើនរហូតដល់រាប់ម៉ឺនក្បាលនេះ វាបានឆ្លងជំងឺគ្រុនផ្តាសាយបក្សី និងរីករាលដាលពាសពេញឆ្នេរតាំងពីសប្តាហ៍មុនមកម្លេះ៕ ប្រភព៖ Thairath