ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានប្រកាសមិនគាំទ្រដាច់ខាត ចំពោះជនបើកបរបង្កគ្រោះថ្នាក់ដល់ជនដទៃ ហើយបែរជារួចខ្លួនពីសំណាញ់ច្បាប់ ត្រឹមការបង់លុយជាសំណងជំងឺចិត្ត។

នៅប៉ុន្មានថ្ងៃនេះ ផ្ទុះការចាប់អារម្មណ៍ និងប្រតិកម្មជាខ្លាំងលើហេតុការណ៍គ្រោះថ្នាក់ចរាចរណ៍មួយបង្កឡើង ដោយរថយន្ដ បុកម៉ូតូមួយគ្រឿង នៅលើស្ពានជ្រោយចង្វារ បណ្ដាលឱ្យមនុស្ស៣នាក់រងរបួសធ្ងន់ ក្នុងនោះក៏មានទារកអាយុ៦០ថ្ងៃម្នាក់ផងដែរ។

គ្រោះថ្នាក់ចរាចរណ៍មួយនេះ បានបង្កឱ្យមានការជជែកគ្នាជាច្រើននៅលើបណ្ដាញសង្គម ដោយជនបង្កបញ្ចប់រឿងជាមួយជនរងគ្រោះ ត្រឹមសំណង ២,៥០០ដុល្លារ។ បើទោះបីបញ្ចប់សំណងជាមួយជនរងគ្រោះយ៉ាងណាក្ដី ប៉ុន្ដែក្នុងច្បាប់បានកំណត់ថា ជនបង្កមិនត្រូវរួចខ្លួននោះទេ។ ជនបង្កនៅតែជាប់បណ្ដឹងអាជ្ញា ហើយត្រូវតែទទួលខុសត្រូវចំពោះមុខច្បាប់។

សម្ដេចក្រឡាហោម ស ខេង បានបង្ហាញការសោកស្ដាយចំពោះករណីគ្រោះថ្នាក់ចរាចរណ៍ ដែលកើតឡើងជាបន្ដបន្ទាប់នៅក្នុងសង្គម ហើយមានពេលខ្លះរហូតបាត់បង់ជីវិតថែមទៀតផង។

ឆ្លើយតបនឹងសំណួរថា តើសម្តេចយល់យ៉ាងណាចំពោះជនបង្កដែលចេះតែរួចខ្លួន ត្រឹមផ្តល់សំណងជាប្រាក់ជូនជនរងគ្រោះនោះ? សម្ដេចក្រឡាហោម ស ខេង បានបញ្ជាក់ថា សម្តេច មិនគាំទ្រដាច់ខាត។

ក្នុងបទសម្ភាសជូនអ្នកសារព័ត៌មាន ក្រោយពីបញ្ចប់ការប្រារព្ធទិវាអន្តរជាតិរំលឹកដល់ជនរងគ្រោះដោយគ្រោះថ្នាក់ចរាចរណ៍ផ្លូវគោក លើកទី១៧ នាព្រឹកថ្ងៃទី០៧ ខែធ្នូ ឆ្នាំ២០២២នេះ សម្ដេចក្រឡាហោម ស ខេង ក៏ចង់ដឹងបន្ថែមទៀតផងដែរ អំពីរឿងរ៉ាវជាក់លាក់ដែលបានកើតមានឡើង ពិសេសអ្នកដែលបង្កគ្រោះថ្នាក់ចរាចរណ៍ រហូតបាត់បង់ជីវិតអ្នកដទៃហើយរួចខ្លួន ដើម្បីចាត់វិធានការឱ្យបានសមស្រប។

សម្ដេចក្រឡាហោម ស ខេង បានថ្លែងយ៉ាងដូច្នេះថា «ខ្ញុំគិតថា មិនមែនជារឿងទូទៅទេ កន្លែងខ្លះជាបុគ្គល ដែលខ្ញុំ ក៏ចង់ដឹងព័ត៌មានជាក់លាក់ ដើម្បីចាត់វិធានការឱ្យបានសមស្របដែរ ហើយខ្ញុំមិនគាំទ្ររឿងអ៊ីចឹងទេ»។

សម្ដេចក្រឡាហោម បានទាញការចាប់អារម្មណ៍ដែរថា បញ្ហាគ្រោះថ្នាក់ចរាចរណ៍នេះ គឺជារឿងដែលគ្រប់ភាគីពាក់ព័ន្ធត្រូវរួមគ្នាគាំទ្រ ការបញ្ចៀសនូវគ្រោះថ្នាក់ចរាចរណ៍ ហើយកត្តាដែលសំខាន់ គឺកត្តាមនុស្សតែម្ដង ក្នុងនោះអ្នកដែលធ្វើដំណើរក្ដី អ្នកដែលរស់នៅតាមដងផ្លូវក្ដី ត្រូវគោរពច្បាប់ចរាចរណ៍។

ក្នុងបទសម្ភាសន៍នោះ សម្ដេចក្រឡាហោម ស ខេង គូសបញ្ជាក់ពាក់ព័ន្ធការធ្វើវិសោធនកម្មច្បាប់ចរាចរណ៍ផ្លូវគោកលើការរកសារធាតុញៀនលើអ្នកបើកបរផងដែរ។ សម្តេចក្រឡាហោម បានបញ្ជាក់ថា សារធាតុញៀនត្រូវបានដាក់ជាកាតព្វកិច្ច មិនមែនជាការភ្ញាក់រលឹកនោះទេ។ សម្ដេចបានពន្យល់ថា អ្នកបើកយានយន្ដទាំងឡាយ ត្រូវតែមានវិញ្ញាបនបត្របញ្ជាក់អំពីភាពគ្មានសារធាតុញៀននៅក្នុងខ្លួន ទើបអនុញ្ញាតផ្ដល់ប័ណ្ណបើកបរ។

ពាក់ព័ន្ធកម្រិតផាកពិន័យចំពោះអ្នកបង្កគ្រោះថ្នាក់ចរាចរណ៍ ដោយមានសារធាតុស្រវឹងនៅក្នុងខ្លួនវិញ សម្ដេចក្រឡាហោម ស ខេង បានប្រគល់ជូនក្រសួងយុត្តិធម៌ ដើម្បីពិនិត្យកំណត់ឲ្យបានត្រឹមត្រូវតាមស្ដង់ដារ៕

ភ្នំពេញ៖ ជារឿយៗនៅពេលមានករណីធ្លាក់យន្តហោះ យើងតែងចំណាំឃើញថាក្រុមប្រតិបត្តិការរុករកខិតខំខ្នះខ្នែងរករបស់ម៉្យាង ហៅថា «ប្រអប់ខ្មៅ»។ ប្រហែលជាអ្នកខ្លះមានចម្ងល់ថាតើវាជាអ្វីទៅ ហើយមានសារសំខាន់កម្រិតក្នុងការជួយដល់ការស៉ើបអង្កេត។

ប្រអប់ខ្មៅគឺជាឧបករណ៍អេឡិចត្រូនិកមួយដែលផ្ទុកនៅក្នុងយន្តហោះសម្រាប់កត់ត្រានូវព័ត៌មានសំខាន់ៗ ដែលអាចជួយសម្រួលដល់ការងារស៊ើបអង្កេតជុំវិញ គ្រោះថ្នាក់ ឬឧបទ្ទវហេតុផ្សេងៗនៃការធ្វើដំណើរតាមផ្លូវអាកាស។ ឧបករណ៍នេះជាទូទៅ ត្រូវគេស្គាល់ថាជាប្រអប់ខ្មៅ ប៉ុន្តែតាមពិតទៅរូបរាងរបស់វាមានពណ៌ទឹកក្រូចទៅវិញទេ ដើម្បីងាយស្រួលក្នុងការស្វែងរក ក្រោយករណីគ្រោះថ្នាក់ធ្លាក់យន្តហោះកើតឡើង។

ជាទូទៅ ប្រអប់ខ្មៅត្រូវបែងចែកជាពីរប្រភេទ ក្នុងនោះមួយប្រភេទសម្រាប់កំណត់ត្រាទិន្នន័យផ្សេងៗរបស់យន្តហោះអំឡុងពេលធ្វើដំណើរ ហើយវាហៅកាត់ថា FDR។ មួយប្រភេទទៀតសម្រាប់កត់ត្រាសំឡេងក្នុងបន្ទប់អ្នកបើកយន្តហោះ បូករួមទាំងការសន្ទនារវាងអាកាសយានិក ហៅកាត់ថា CVR។

ប្រអប់ខ្មៅ FDR កត់ត្រាទុកនូវទិន្នន័យដូចជាល្បឿន រយៈកម្ពស់ សន្ទុះឡើងចុះ និងរំហូរឥន្ធនៈរបស់យន្តហោះជាដើម ហើយវាអាចផ្ទុកទិន្នន័យទាំងនេះបានរយៈពេល២៥ម៉ោងចុងក្រោយ។ ចំណែកប្រអប់ខ្មៅ CVR វិញថតទុកនូវសំឡេងសន្ទនាទាំងអស់រវាងអាកាសយានិក ក៏ដូចជាការសន្ទនារវាងអាកាសយានិក និងក្រុមអ្នកគ្រប់គ្រងចរាចរណ៍ផ្លូវអាកាស។ សំឡេងកុងតាក់ និងម៉ាស៉ីនយន្តហោះក៏ត្រូវថតទុកដោយឧបករណ៍ CVR ដែរ ខណៈសមត្ថភាពរក្សាទុកសំឡេងរបស់វាគឺបានត្រឹម២ម៉ោងចុងក្រោយប៉ុណ្ណោះ។

ករណីខ្លះឧបករណ៍ FDR និង CVR ក៏ត្រូវបានបញ្ចូលជាប្រអប់ខ្មៅតែមួយតែម្តងផងដែរ។ ឧបករណ៍ទាំងពីរមានតួនាទីចងក្រងជាឯកសារនូវប្រវត្តិការហោះហើររបស់យន្តហោះ ជាពិសេសយន្តហោះដឹកអ្នកដំណើរដែលនឹងអាចជួយដល់ការងារស៊ើបអង្កេតនាពេលក្រោយ។ ប្រអប់ខ្មៅទាំងពីរ គឺតម្រូវឱ្យបំពាក់ក្នុងយន្តហោះដោយគោលការណ៍អន្តរជាតិ ត្រួតពិនិត្យដោយអង្គការអាកាសចរណ៍ស៊ីវិលអន្តរជាតិ។ ប្រអប់ខ្មៅយន្តហោះអាចធន់នឹងលក្ខខណ្ឌផ្សេងៗដែលអាចជួបប្រទះក្នុងករណីគ្រោះថ្នាក់យន្តហោះធ្ងន់ធ្ងរបាន ហើយជាធម្មតាពួកវាត្រូវបំពាក់នៅផ្នែកកន្ទុយរបស់យន្តហោះ ដែលជាកន្លែងមានសុវត្ថិភាពជាងគេសម្រាប់ឱ្យពួកវារួចខ្លួនពីការប៉ះទង្គិចធ្ងន់ធ្ងរ។

ប្រអប់ខ្មៅក៏មានបំពាក់នូវឧបករណ៍ប្រាប់ទីតាំងក្រោមទឹក ហៅកាត់ថា ULB ផងដែរ។ ប្រសិនបើករណីដែលយន្តហោះធ្លាក់ចូលក្នុងសមុទ្រ ឧបករណ៍នោះនឹងបញ្ចេញរលកសញ្ញាអ៊ុលត្រាសូនិក (Ultrasonic) ដែលអាចទទួលបានដោយឧបករណ៍ស្តាប់សំឡេង ហើយវាអាចដំណើរការនៅក្រោមជម្រៅទឹក៦,០០០ម៉ែត្របាន។ នៅពេលវាចាប់ផ្តើមបញ្ចេញសញ្ញា វានឹងបន្តលោតក្នុងមួយវីនាទីម្តងសម្រាប់រយៈពេល៣០ថ្ងៃរហូតដល់អស់ថ្ម។ ដោយឡែកក្នុងករណីយន្តហោះធ្លាក់ទៅលើគោកវិញ ឧបករណ៍ ULB មិនបញ្ចេញសញ្ញាទេ។

គួរបញ្ជាក់ថា ប្រអប់ខ្មៅសាកល្បងដំបូងបំផុតត្រូវបានផលិតឡើងកាលពីឆ្នាំ១៩៥៧ ក៏ប៉ុន្តែទាល់តែដល់ឆ្នាំ១៩៦០ បន្ទាប់ពីមានករណីធ្លាក់យន្តហោះពិបាកនឹងបកស្រាយចម្ងល់មួយ នៅរដ្ឋឃ្វីនលែន (Queensland) ទើបអូស្រ្តាលីបានក្លាយជាប្រទេសដំបូងគេលើលោក ដែលបានតម្រូវឱ្យមានការបំពាក់ប្រអប់ខ្មៅនៅក្នុងយន្តហោះពាណិជ្ជកម្មទាំងអស់។ អ្នកវិទ្យាសាស្រ្តអូស្រ្តាលីឈ្មោះ ដេវីដ វ៉ារិន (David Warren) គឺជាអ្នកបង្កើតប្រអប់ខ្មៅនេះឡើង​៕

ភ្នំពេញ៖ អង្គភាពប្រឆាំងអំពើពុករលួយ( ACU) នៅថ្ងៃទី៧ ខែធ្នូ ឆ្នាំ២០២២ បានចេញសេចក្តីប្រកាស ព័ត៌មាន ស្តីពីការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៥ ធ្នូ ២០២២។

នៅក្នុងសេចក្ដីប្រកាសព័ត៌មានរបស់ ACU បានឲ្យដឹងថា ឆ្នាំ២០២២ ជាឆ្នាំទី៨ និងជាលើកទី៩ ដែលអង្គភាពប្រឆាំងអំពើពុករលួយ (អ.ប.ព.) បានសហការជាមួយនឹង ក្រសួងអប់រំ យុវជន និងកីឡា ចូលរួមសង្កេតការណ៍លើដំណើរការប្រឡងសញ្ញាបត្រមធ្យមសិក្សាទុតិយភូមិ។ ក្នុងសម័យប្រឡង ០៥ ធ្នូ ២០២២ នេះ មានថ្នាក់ដឹកនាំ មន្រ្តី អ.ប.ព. និងអ្នកសង្កេតការណ៍ស្ម័គ្រចិត្តជាង ៣ ០០០ នាក់ ដោយក្នុងនោះ អ.ប.ពបានរៀបចំមន្ត្រីប្រចាំតាមមណ្ឌប្រឡង ១នាក់ ក្នុង ១មណ្ឌលប្រឡង និងបានដាក់ពង្រាយអ្នកសង្កេតការណ៍ស្ម័គ្រចិត្តដោយអនុវត្ត តាមនិយាម ១នាក់ សង្កេត ២បន្ទប់ នៅគ្រប់មណ្ឌលប្រឡងទាំង ២២១ មណ្ឌល ត្រូវជា ៥ ១៧៤ បន្ទប់ ទូទាំងរាជធានី-ខេត្ត ដើម្បី ធានាឱ្យបាននូវគោលការណ៍ទាំង៤ នៃការប្រឡង គឺគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។

តាមរយៈការសង្កេតការណ៍លើការរៀបចំ និងការប្រព្រឹត្តទៅនៃដំណើរការសំណេរ អ.ប.ព. សូមធ្វើការវាយតម្លៃខ្ពស់ និង កោតសរសើរចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីគ្រប់ជាន់ថ្នាក់នៃក្រសួងអប់រំ យុវជន និងកីឡា អាជ្ញាធរដែនដី កងកម្លាំងសមត្ថកិច្ច មន្ត្រីសុខាភិបាល និងភាគីពាក់ព័ន្ធទាំងអស់ដែលបានបំពេញភារកិច្ចប្រកបដោយ ស្មារតីទទួល ខុសត្រូវខ្ពស់ គោរពបទប្បញ្ញត្តិជាធរមាន និងមានចំណាត់ការឆ្លើយតបបានយ៉ាងទាន់ពេលវេលា លើរាល់បាតុភាពនានាដែលកើតមានឡើង ជាយថាហេតុ។

អ.ប.ព. ក៏សូមថ្លែងអំណរគុណ និងវាយតម្លៃខ្ពស់ចំពោះសហភាពសហព័ន្ធយុវជនកម្ពុជា (ស.ស.យ.ក.) ដែលបានរៀបចំ អ្នកសង្កេតការណ៍ស្ម័គ្រចិត្តឱ្យចូលរួមសង្កេតការណ៍លើដំណើរការ ប្រឡងសញ្ញាបត្រមធ្យមសិក្សាទុតិយភូមិទាំងពេលកន្លងមក និងពេលនេះ។ កាយវិការប្រកបដោយអត្ថន័យនេះ បង្ហាញនូវឆន្ទៈដ៏មោះមុតក្នុងការចូលរួមអនុវត្តកម្មវិធី កំណែទម្រង់លើវិស័យអប់រំ និងពង្រឹងសមត្ថភាពរបស់យុវជនជំនាន់ក្រោយ ដែលជាធនធានមនុស្ស សម្រាប់បន្តវេនសង្គមកម្ពុជាឱ្យកាន់តែរឹងមាំថែមទៀត។

ជាមួយគ្នានេះ អ.ប.ព. សូមថ្លែងអំណរគុណ និងកោតសរសើរដល់អ្នកសង្កេតការណ៍ស្ម័គ្រចិត្តទាំងអស់ ដែលបានលះបង់ ពេលវេលានៃយុវវ័យរបស់ខ្លួនមកបំពេញ ការងារស្ម័គ្រចិត្តដើម្បីឆ្លើយតបនឹង ដំណើរការនៃកំណែទម្រង់លើវិស័យអប់រំ សំដៅពង្រឹង និងពង្រីកគុណភាពយុវជនជំនាន់រួមគ្នា។ យុវជន ពិតជាធនធានដ៏មានតម្លៃ កម្លាំងដ៏ខ្លាំងក្លាក្នុងការរុញច្រានការអភិវឌ្ឍសង្គមជាតិ ដូច្នេះយុវជន ត្រូវប្រើប្រាស់ភាពយុវវ័យរបស់ខ្លួនឱ្យមានប្រយោជន៍ដល់ខ្លួន គ្រួសារ និងសង្គមជាតិទាំងមូល៕