ប្រទេសថៃ៖ មានហេតុការណ៍ផ្ទុះគ្រាប់បែកមួយបានកើតឡើងនៅផ្លូវរថភ្លើងមួយកន្លែងក្នុងស្រុក Sadao ខេត្ត Songkhla ដែលបានសម្លាប់មនុស្សយ៉ាងហោចណាស់ ៣នាក់ និង ៤នាក់ទៀតរងរបួស បញ្ជូនទៅកាន់មន្ទីរពេទ្យ។

កាលពីថ្ងៃទី ៦ ខែធ្នូ ឆ្នាំ ២០២២ ត្រូវបានគេរាយការណ៍ថាការផ្ទុះគ្រាប់បែកលើកទីពីរបានកើតឡើងនៅលើផ្លូវរថភ្លើងនៃឃុំថាផូ ស្រុក Sadao ខេត្ត Songkhla ចម្ងាយត្រឹមតែ ៤០០ គីឡូម៉ែត្រពីកន្លែងផ្ទុះចាស់កាលពីថ្ងៃទី ៣ ខែធ្នូកន្លងទៅ។

ប្រភពដដែលបានរាយការណ៍មកថាមានអ្នកស្លាប់ចំនួន ៣ នាក់ ដែលជាជំនួយការអធិការស្រុកហាត យៃ និងបុគ្គលិក ក្បាលរថភ្លើងផងដែរ លើសពីនេះក៏មានអ្នករងរបួស៤នាក់ផ្សេងទៀត និងត្រូវបានបញ្ជូនទៅកាន់មន្ទីរពេទ្យក្បែរនោះ។

គួរបញ្ជាក់ថាហេតុការណ៍នេះបានកើតឡើងនៅវេលាម៉ោង ៦ និង ២០ នាទីព្រឹក ខណៈ មន្ត្រី ៧ នាក់បានចុះទៅ ប្រមូលបំណែក រថភ្លើងមកជួសជុលផ្លូវដែកដែល ត្រូវរងការខូចខាតកាលពីមុន។

ទោះជាយ៉ាងណាផ្នែក SRT បានសម្របសម្រួលដើម្បីស្នើសុំកិច្ចសហការជាមួយនឹងផ្នែកសន្តិសុខ ដើម្បីប្រញាប់ចុះទៅពិនិត្យកន្លែងកើតហេតុរកនូវមូលហេតុនៃហេតុការណ៍បំផ្ទុះនេះ ព្រមទាំងបង្កើន ការរឹតបន្តឹងសន្តិសុខដល់បុគ្គលិកដែលបំពេញភារកិច្ចក្នុងតំបន់ ក៏ដូចជាអ្នកដំណើរដែលមកប្រើប្រាស់សេវាដើម្បីទទួលបានសុវត្ថិភាព និងទំនុកចិត្តខ្ពស់បំផុតក្នុងការធ្វើដំណើរ៕ ប្រភព៖ pptvhd36

រដ្ឋធានីកៀវ៖ ស្របពេលសង្គ្រាម វាយប្រយុទ្ធគ្នា រវាងកងទ័ពការពារទឹកដីរបស់ក្រុងកៀវ និង កម្លាំងទាហានរុស្ស៊ី មានសភាពសាហាវខ្លាំងបំផុត ចាប់តាំងពីសង្គ្រាមលោកលើកទី២មក ខណៈភាគីជម្លោះ បាន និង កំពុងតែបន្ដបាញ់ផ្លោងស្រោចដាក់គ្នាទៅវិញទៅមក អស់រាប់ម៉ឺនគ្រាប់ ក្នុង១សប្ដាហ៍ៗ ទើបបណ្ដាប្រទេសជាសម្ពន្ធមិត្តលោកខាងលិច បង្កើនការបញ្ជូនគ្រឿងសឹក យកទៅផ្គត់ផ្គង់ រហូតខ្សោះស្ទើរអស់ពីឃ្លាំង រហូតធ្វើឲ្យក្រុមផលិតអាវុធដ៏ធំបំផុតមួយ ដកដង្ហើមធំ ហើយសុំពេលវេលា ចន្លោះពី១០ ទៅ១៥ឆ្នាំ ទើបអាចបំពេញឃ្លាំងស្ដុកអាវុធរបស់បស្ចិលោក ឡើងវិញបាន។

សារព័ត៌មាន Al Jazeeera បានចេញផ្សាយ កាលពីថ្ងៃទី៧ ខែធ្នូ ថា លោក មីឆាល ស្ដ្រណាដ (Michal Strnad ) ជាសហគ្រិនជនជាតិឆែក ហើយជាម្ចាស់ក្រុមហ៊ុនផលិតគ្រឿងសព្វាវុធដ៏ធំបំផុតមួយ នៅតំបន់អឺរ៉ុប បានថ្លែង ថា ក្រុមហ៊ុនឆែកចូស្លូវ៉ាក់ គ្រូប (Czechoslovak Group) របស់គាត់ នឹងត្រូវចំណាយពេលវេលា ចន្លោះពី១០ទៅ១៥ឆ្នាំ ដើម្បីបំពេញស្ដុកគ្រឿងសព្វាវុធរបស់លោកខាងលិច ក្រោយពេលពួកគេ បាន និង កំពុងតែបន្ដបញ្ជូនគ្រឿងយុទ្ធោបករណ៍ទាំងនោះ ទៅជួយដល់កងទ័ពអ៊ុយក្រែន ដែលកំពុងតែធ្វើសង្គ្រាមការពារទឹកដី និង សេរីភាពរបស់ពួកគេ។

លោកប្រធានក្រុមហ៊ុន រូបនេះ បានបន្ដ ថា ឥឡូវ កងទ័ពការពារទឹកដីរបស់អ៊ុយក្រែន កំពុងតែប្រឈមមុខនឹងការខ្វះខាតគ្រាប់រំសេវ។ ស្របគ្នានេះដែរ បណ្ដារដ្ឋាភិបាលបស្ចិមលោក ក៏កំពុងតែខ្សោះគ្រាប់ ចេញពីឃ្លាំងស្ដុកអាវុធរបស់ពួកគេផងដែរ ខណៈសមត្ថភាពផលិតគ្រឿងសឹក នៅមានកម្រិតនៅឡើយ។

ម្ចាស់ក្រុមហ៊ុនឆែកចូស្លូវ៉ាក់ គ្រូប បានប្រាប់ដល់ទីភ្នាក់ងារសារព័ត៌មានរបស់ចក្រភពអង់គ្លេស Reuters ថា បច្ចុប្បន្ននេះ ក្រុមហ៊ុនរបស់គាត់ មានសមត្ថភាពផលិត បានត្រឹមតែ ប្រហែល២៥ ទៅ៣០ភាគរយ នៃតម្រូវការរបស់អឺរ៉ុប ដែលធ្វើឲ្យស្របតាមមាត្រដ្ឋាន ឬស្ដង់ដាររបស់អង្គការណាតូ សម្រាប់កាំភ្លើងផ្លោង ទំហំ១៥៥មិល្លីម៉ែត្រ។ ឥឡូវ ការផលិតគ្រាប់រំសេវ សម្រាប់កាំភ្លើងផ្លោងប្រភេទនេះ មានការខ្វះខាតកម្លាំងពលកម្មខ្លាំងណាស់។

លោក មីឆាល ស្ដ្រណាដ (Michal Strnad ) បានបញ្ជាក់ ថា រដ្ឋាភិបាល នៅតំបន់អឺរ៉ុប បានបង្ហូរគ្រឿងសព្វាវុធ ចេញពីឃ្លាំងស្ដុកអាវុធរបស់ពួកគេ នាំទៅជួយដល់ប្រទេសអ៊ុយក្រែន នៅក្នុងការធ្វើសង្គ្រាម ប្រឆាំងនឹងការលុកលុយរបស់រុស្ស៊ី។ ជាមួយគ្នានេះ កងទ័ពអ៊ុយក្រែន បានបាញ់គ្រាប់ ចេញពីកាំភ្លើងផ្លោង ហូវីតហ្ស៊ើរ រាប់រយគ្រឿង ដែលផ្គង់ផ្គង់ ដោយលោកខាងលិច ក្នុងមួយសប្ដាហ៍ៗ មានចំនួន រហូតដល់ ៤០ ០០០គ្រាប់។

លោកប្រធានក្រុមហ៊ុន បានសង្កត់ធ្ងន់ ថា «បើស្ថិតក្នុងស្ថានភាពបែបនេះ ខ្ញុំបានប៉ាន់ប្រមាណ ថា ក្រុមហ៊ុនរបស់ខ្ញុំ ក៏នឹងត្រូវការចំណាយពេលវេលា ចន្លោះពី១០ទៅ១៥ឆ្នាំ ដើម្បីផលិតគ្រាប់រំសេវ បំពេញឃ្លាំងស្ដុកគ្រឿងសព្វាវុធរបស់កងទ័ពលោកខាងលិច នៅក្នុងអំឡុងពេលមានសង្គ្រាម នៅអ៊ុយក្រែន នាពេលនេះ»៕

កាពីម្សិលមិញមនុស្ស ៣នាក់បានស្លាប់ និង ៤នាក់ផ្សេងទៀតបានរងរបួស បន្ទាប់ពីគ្រាប់បែកមួយគ្រាប់បានផ្ទុះនៅលើផ្លូវមួយ ក្នុងភាគខាងត្បូង ប្រទេសថៃ។ គ្រាប់បែកនេះ ត្រូវបានលាក់ទុក នៅចម្ងាយ២០០ ម៉ែត្រពី កន្លែងកើតហេតុ។

លោក វរសេនីយឯក Chartchai Chanasit បានអះអាងថា “គ្រាប់បែកនោះបាននៅទីនោះ តាំងពីថ្ងៃសៅរ៍”។ លោកបានបន្ថែមថា” ការបន្ទុះគ្រាប់បែកនេះ ក៏ព្រោះតែក្រុមឧទ្ទាមនៅក្នុងតំបន់ដែលភាគច្រើនកាន់សាសនាឥស្លាម កំពុងប្រយុទ្ធដើម្បីស្វ័យភាពពីរដ្ឋាភិបាលថៃ”។

គួរបញ្ជាក់ផងដែរថា ជម្លោះប្រដាប់អាវុធកម្រិតស្រាល នៅភាគខាងត្បូងប្រទេសថៃនេះ បានកើតមានចាប់តាំងពីឆ្នាំ២០០៤ ដោយបានសម្លាប់មនុស្សជាង ៧០០០នាក់។

ដោយឡែកកាលពីម្សិលមិញនេះផងដែរ គ្រាប់បែកមួយទៀតក៏បានផ្ទុះឡើងនៅក្នុងប្រទេសឥណ្ឌូនេសុី ដោយបានសម្លាប់មនុស្សពីរនាក់និងជាច្រើននាក់ទៀតបានរងរបួសក្នុងហេតុការណ៍បំផ្ទុះគ្រាប់បែកអត្តឃាតនាប៉ុស្តិ៍ប៉ូលីសមួយកន្លែង។

ជនសង្ស័យបានកាន់កាំបិតចូលប៉ុស្តិ៍ប៉ូលីស និងបានបំផ្ទុះខ្លួនឯងភ្លាមៗតែម្តង។ ជុំវិញហេតុការណ៍នេះប៉ូលិសឥណ្ឌូនេសុី មិនទាន់បញ្ជាក់អំពីមូលហេតុច្បាស់លាស់នៅឡើយនោះទេ៕

ប្រភព៖ CNA

សមាជិកសភាឥណ្ឌូនេស៊ីបានអនុម័តជាឯកច្ឆ័ន្ទនូវក្រមព្រហ្មទណ្ឌថ្មីដ៏ទូលំទូលាយមួយកាលពីថ្ងៃ អង្គារ ដែលនឹងដាក់ទោសការរួមភេទមុនការរៀបអាពាហ៍ពិពាហ៍ ឲ្យជាប់ពន្ធនាគាររហូតដល់ ១ឆ្នាំ នេះជាផ្នែកមួយនៃការផ្លាស់ប្ដូរដែលអ្នករិះគន់និយាយថា គំរាមកំហែងដល់សិទ្ធមនុស្ស និង​ សិទ្ធិសេរីភាពនៅក្នុងប្រទេស អាស៊ីអាគ្នេយ៍។

ច្បាប់នេះ ក៏អនុវត្តចំពោះជនបរទេស និង អ្នកទេសចរផងដែរ ដោយហាមប្រាមការរួមរស់ជាមួយគ្នាមុនរៀបការ ការក្បត់សាសនា និង ផ្ដល់ទណ្ឌកម្មចំពោះការប្រមាថប្រធានាធិបតី ឬ ការបង្ហាញទស្សនៈផ្ទុយនឹងមនោគមវិជ្ជាជាតិរបស់ឥណ្ឌូនេស៊ីផងដែរ។

សមាជិកសភា លោក Bambang Wuryanto ដែលដឹកនាំគណៈកម្មាការសភាទទួលបន្ទុកកែសម្រួលក្រមសម័យអាណានិគមបាននិយាយថា «យើងទាំងអស់គ្នាបានយល់ព្រមផ្ដល់សច្ចាប័ន លើសេចក្ដីព្រាងច្បាប់នេះ ហើយអាចនឹងត្រូវបានអនុម័តនៅដើមសប្ដាហ៍ក្រោយ»។

គួរបញ្ជាក់ផងដែរថា  ប្រទេស ឥណ្ឌូនេស៊ី ដែលជាប្រទេសកាន់សាសនាឥស្លាមធំជាងគេក្នុងពិភពលោក បានឃើញការកើនឡើងនៃការអភិរក្សសាសនាក្នុងរយៈពេលប៉ុន្មានឆ្នាំចុងក្រោយនេះ ខណៈច្បាប់ឥស្លាមតឹងរឹងត្រូវបានអនុវត្តរួចហើយ នៅក្នុងផ្នែកខ្លះនៃប្រទេស។ ជាពិសេសការទទួលទាន់គ្រឿងស្រវឹង និង ល្បែងស៊ីសង គឺត្រូវបានហាមឃាត់ជាដាច់ខាត៕

ប្រភព៖ BBC

យោងតាមសារព័ត៌មាន AP បានផ្សាយថា សមាជិកសភាបក្សប្រឆាំងទួរគីម្នាក់ត្រូវបានបញ្ជូនទៅកាន់មន្ទីរពេទ្យកាលពីថ្ងៃទី៦ ខែធ្នូបន្ទាប់ពីការប៉ះទង្គិចគ្នាជាមួយសមាជិកសភាដទៃទៀតនៅក្នុងកិច្ចប្រជុំសភា ខណៈដែលភាគីទាំងសងខាងព្យាយាមចរចាអំពីថវិកាសម្រាប់ឆ្នាំក្រោយ។

វីដេអូពីកន្លែងកើតហេតុបានបង្ហាញឱ្យឃើញថា សមាជិកសភាមកពីគណបក្សកាន់អំណាចរបស់ប្រធានាធិបតី Recep Tayyip Erdogan និងគណបក្សប្រឆាំងកំពុងវាយតប់គ្នា។ សមាជិកសភាមួយចំនួនបានប្រកែកគ្នាទៅវិញទៅមក ខណៈដែលអ្នកខ្លះទៀតព្យាយាមទាញមិត្តរួមការងារឱ្យបែកគ្នា។ យ៉ាងហោចណាស់មានសមាជិកសភាម្នាក់ត្រូវបានគេវាយហើយដួលទៅលើដី។

គេហទំព័រព័ត៌មាន DHA បានផ្សាយថា លោក Huseyin Ors សមាជិកសភាមកពីគណបក្ស Good party ត្រូវបានគេវាយចំក្បាល។ លោក Ors ត្រូវបានគេបញ្ជូនទៅបន្ទប់សង្គ្រោះបន្ទាន់ក្នុងមន្ទីរពេទ្យ។ លោក Aylin Cesur សមាជិកសភាមកពីគណបក្ស Good បាននិយាយថា “យើងបានឃើញថា ស្ថានភាពរបស់គាត់កាន់តែយ៉ាប់យ៉ឺនបន្ទាប់ពីការវាយចំក្បាល។

cកន្លងមក សភាទួរគីមានការប៉ះទង្គិចគ្នាមួយចំនួនរវាងសមាជិកសភា ។ មូលហេតុចម្បងនៃឧបទ្ទវហេតុនៅថ្ងៃទី ៦ ខែធ្នូគឺមិនច្បាស់ទេ ប៉ុន្តែរដ្ឋាភិបាលទួរគីកំពុងជួបប្រទះបរិយាកាសតានតឹងនៅមុនការបោះឆ្នោតប្រធានាធិបតី និងសភាដែលគ្រោងធ្វើនៅខែមិថុនាឆ្នាំក្រោយ៕