បរទេស៖ ក្រុមអ្នកពន្លត់អគ្គីភ័យរុស្ស៊ីបានប្រញាប់ប្រញាល់ពន្លត់ភ្លើងដ៏សន្ធោសន្ធៅនៅក្នុងហាងលក់ទំនិញ មួយកន្លែង នៅជាយក្រុងមូស្គូ។ ការផ្ទុះនេះបានបន្តរហូតដល់ដំបូលបាក់ស្រុតទាំងស្រុង និងបង្កឱ្យមានមនុស្សមានម្នាក់បានស្លាប។

ប្រព័ន្ធផ្សព្វផ្សាយសង្គមបានបង្ហាញពីហេតុការនៃការផ្ទុះមួយបានកើតឡើងរហូតមានភ្លើងបានឆាបឆេះយ៉ាងសន្ធោសន្ធៅនៅក្នុងហាងលក់ទំនិញ Mega Khimki នៅ Khimki ដែលជាជាយក្រុងនៃទីក្រុងម៉ូស្គូ ប្រទេសរុស្ស៊ីបន្ទាប់ពីមានភ្លើងឆេះនៅក្នុងផ្សារ។

យ៉ាងណាមិញក្រោយពីមានហេតុការនេះបានកើតឡើងក្រុមអ្នកជួយពន្លត់អគ្គីភ័យជាង ៧០ នាក់ និងរថយន្តពន្លត់អគ្គីភ័យ ២០ គ្រឿងបានប្រញាប់ប្រញាល់មកពន្លត់ភ្លើងដែលមានទំហំ ៧,០០០ ម៉ែត្រការ៉េនៅទីតាំងកើតហេតុ ប៉ុន្តែរចនាសម្ព័ន្ធអាគារបានរារាំង និងមានផលលំបាកខ្លាំងដល់ពួកគេ រហូតមានការដួលរលំនៃដំបូលដែលបណ្ដាលឲ្យឆេះរាលដាលយ៉ាងសន្ធោសន្ធៅ និងបង្កឱ្យមានមនុស្សម្នាក់បានស្លាប់ក្នុងហេតុការណ៍ដ៏អាក្រក់នេះផងដែរ។

តាមការសន្និដ្ឋានជំហានដំបូងសមត្ថកិច្ចសន្និដ្ឋានថាអគ្គិភ័យនេះបង្កឡើងដោយចេតនា ប៉ុន្តែក្រោយមក ព័ត៌មានត្រូវបានកែប្រែ ដើម្បីបញ្ជាក់ថា វាអាចបណ្តាលមកពីការបំពានច្បាប់សុវត្ថិភាព ដែលបានបង្កការឆាបឆេះចាបពីយប់អាធ្រាតរហូតមកដល់ម៉ោង ១:០០ រសៀលម៉ោងក្នុងស្រុក ភ្លើងនៅតែបន្តឆេះ។

គួរបញ្ជាក់ថា ផ្សារទំនើបមាននេះទាំងមជ្ឈមណ្ឌលលក់ទំនិញ និងកន្លែងកម្សាន្ត  វាមានចម្ងាយតែប្រាំពីរគីឡូម៉ែត្រពីអាកាសយានដ្ឋានអន្តរជាតិ Sheremetyevo នៃទីក្រុងមូស្គូ ហើយបច្ចុប្បន្នប៉ូលិសកំពុងបន្តធ្វើការស៊ើបអង្កេតនូវមូលហេតុនៃការឆេះនេះ៕ ប្រភព៖ Thairath

អន្តរជាតិ៖ ប្រធានាធិបតីអាមេរិក លោក​ ចូ បៃដិន បានឲ្យដឹងកាលពីថ្ងៃព្រហស្បតិ៍ថា តារា WNBA នាង ប្រ៊ីតនី គ្រីនឺ (Brittney Griner) ត្រូវបានដោះលែងពីការឃុំឃាំងរុស្ស៊ីហើយ ក្នុង​ការ​ដោះ​ដូរ​អ្នក​ទោស​ដែល​ជាប់​ពាក់​ព័ន្ធ​នឹង​ឈ្មួញ​អាវុធ​រុស្ស៊ី លោក វីកទ័រ ប៊ូត (Viktor Bout)។ នេះបើយោងតាមការចេញផ្សាយដោយ​ សារព័ត៌មាន CNN នៅយប់ថ្ងៃទី០៨ ខែធ្នូ ឆ្នាំ២០២២។

ការ​ដោះដូរ​នេះ​ធ្វើ​ឡើង ​នៅ​អាកាសយានដ្ឋានអាប៊ូដាប៊ី​ (Abu Dhabi) ក្នុង​ប្រទេស​អារ៉ាប់រួម បន្ទាប់​ពី​ការ​ចរចា​ជា​យូរ​មក​ហើយ​ រវាង​ប្រទេស​ទាំង​ពីរ​។

តើលោក Viktor Bout ជានរណា?

លោក Bout គឺជនជាតិរុស្ស៊ីដើមកំណើតតាហ្ស៊ីគីស្ថាន។ គាត់បានចាប់ផ្តើមអាជីព​ ជាអ្នកដឹកជញ្ជូនតាមផ្លូវអាកាសនៅដើមទសវត្សរ៍ឆ្នាំ១៩៩០ បន្ទាប់ពីការដួលរលំនៃសហភាពសូវៀត។

លោក Bout ត្រូវ​បាន​គេ​និយាយ​ថា ​បាន​ចាប់​ផ្តើម​បញ្ជូន​អាវុធ​តាម​រយៈ​ក្រុម​ហ៊ុន​ជួរ​មុខ​មួយ​ចំនួន​ ទៅ​កាន់តំបន់​ដែល​ហែកហួរ​ដោយ​សង្គ្រាម​នៅ​ទ្វីប​អាហ្វ្រិក។

អង្គការសហប្រជាជាតិ (UN) បានដាក់ឈ្មោះគាត់ថាជា សហការីរបស់អតីតប្រធានាធិបតីលីបេរីយ៉ា លោក ឆាលែស ថាយល័រ (Charles Taylor) ដែលត្រូវបានកាត់ទោសក្នុងឆ្នាំ២០១២ ក្រោមការចោទប្រកាន់ពីបទជួយ និងលុបបំបាត់ឧក្រិដ្ឋកម្មសង្រ្គាម ក្នុងអំឡុងពេលសង្រ្គាមស៊ីវិលនៅប្រទេស សៀរ៉ាឡេអូន។

យោងតាមឯកសាររបស់ UN, “លោក Bout គឺជាអ្នកជំនួញ និងអ្នកដឹកជញ្ជូនអាវុធ និងរ៉ែដែលបានគាំទ្ររបបរបស់អតីតប្រធានាធិបតី Taylor ក្នុងកិច្ចខិតខំប្រឹងប្រែង បង្កអស្ថិរភាពនៅ សៀរ៉ាឡេអូន និងទទួលបានត្បូងពេជ្រដោយខុសច្បាប់”។

ចំណែករបាយការណ៍​ប្រព័ន្ធ​ផ្សព្វផ្សាយ​នៅ​មជ្ឈិមបូព៌ា​បាន​អះអាង​ថា ​គាត់គឺ​ជា​អ្នក​រត់ការ​កាំភ្លើង​សម្រាប់​ក្រុម​អាល់កៃដា និង​តាលីបង់។

គាត់ក៏ត្រូវបានគេចោទប្រកាន់ថា បានបញ្ជូនអាវុធដល់ភាគីទាំងសងខាងនៅក្នុងសង្គ្រាមស៊ីវិលរបស់ប្រទេសអង់ហ្គោឡា ហើយបានផ្គត់ផ្គង់អាវុធដល់ក្រុមមេដឹកនាំសង្រ្គាម និងរដ្ឋាភិបាលពីសាធារណរដ្ឋអាហ្វ្រិកកណ្តាល និងសាធារណរដ្ឋប្រជាធិបតេយ្យកុងហ្គោ ទៅកាន់ប្រទេសស៊ូដង់ និងលីប៊ីផងដែរ។

គាត់​បាន​ទទួល​ស្គាល់​ថា ​បានបញ្ជូន​អាវុធ​ទៅ​ប្រទេស​អាហ្វហ្គានីស្ថាន ​នៅ​ពាក់​កណ្តាល​ទសវត្សរ៍​ឆ្នាំ១៩៩០ ដោយ​និយាយ​ថា អាវុធត្រូវ​បាន​ប្រើ​ដោយពួក​មេបញ្ជាការ ​ប្រយុទ្ធ​ប្រឆាំង​នឹង​ក្រុម​តាលីបង់។

គាត់ក៏បានអះអាងដែរថា បានជួយរដ្ឋាភិបាលបារាំង ដឹកជញ្ជូនទំនិញទៅកាន់ប្រទេស រវ៉ាន់ដា បន្ទាប់ពីអំពើប្រល័យពូជសាសន៍ និងបានដឹកជញ្ជូនកងរក្សាសន្តិភាពរបស់ UN។

ប៉ុន្តែភ្នាក់ងារអនុវត្តច្បាប់ បានដេញតាមគាត់ពេញមួយទសវត្សរ៍ឆ្នាំ២០០០។ គាត់បានចាកចេញពីផ្ទះរបស់គាត់នៅប្រទេសបែលហ្ស៊ិកក្នុងឆ្នាំ២០០២ ពេលដែលអាជ្ញាធរនៅទីនោះ ចេញដីកាចាប់ខ្លួន។

គេគិតថា លោក Bout បានធ្វើដំណើរក្រោមឈ្មោះក្លែងក្លាយជាច្រើន ដោយឆ្លងកាត់ប្រទេសនានាដូចជា អារ៉ាប់រួម និងអាហ្រ្វិកខាងត្បូងជាដើម មុនពេលវិលទៅរុស្ស៊ីវិញក្នុងឆ្នាំ ២០០៣។

ក្នុងឆ្នាំដដែលនោះ អតីតរដ្ឋមន្ត្រីក្រសួងការបរទេសអង់គ្លេស លោក ភីតធ័រ ហេន​ (Peter Hain) បានដាក់ងារឲ្យគាត់ថា “ឈ្មួញមរណៈ”។

ទីបំផុត លោក Bout ត្រូវបានបញ្ជូនទៅឃុំឃាំងក្នុងទីក្រុងវ៉ាស៊ីនតោននៅឆ្នាំ២០០៨ ក្រោយត្រូវបានចាប់ខ្លួននៅក្នុងប្រទេសថៃ បន្ទាប់ពីប្រតិបត្តិការដ៏សាហាវដែលគ្រប់គ្រងដោយរដ្ឋបាលប្រឆាំងគ្រឿងញៀនរបស់សហរដ្ឋអាមេរិក។

គាត់ត្រូវបានគេធ្វើបត្យាប័នជាបន្តបន្ទាប់ទៅកាន់សហរដ្ឋអាមេរិក ហើយត្រូវបានកាត់ទោសឲ្យជាប់ពន្ធនាគាររយៈពេល២៥ឆ្នាំក្នុងឆ្នាំ២០១២​ ៕

ថៃ៖ មានករណីប្លន់មិនបានសម្រេចមួយ បានកើតឡើងនៅឯប្រទេសថៃ ដោយជនល្មើសមានគ្នា ៤នាក់ ជិះម៉ូតូ ២គ្រឿង ប្រដាប់ដោយអាវុធ និងឧបករណ៍កាត់ដែក បានចូលទៅប្លន់ហាងមាសមួយកន្លែង នៅមុខសាលា Takpittayakhom ក្នុងខេត្តតាក។​ នៅពេលមកដល់ចំណុចមុខហាងមាស ក្រុមជនល្មើសដែលមានអាយុប្រហែល ២៥-៣០ ឆ្នាំទាំងនោះ ក៏បាន​ទម្លាយ​ចូលទៅក្នុងហាង ដោយ​ប្រើ​កាំភ្លើងបាញ់​ទ្វារកញ្ចក់របស់ហាង។ យ៉ាងណាក៏ដោយ វាមិនងាយស្រួលដូចការរំពឹងរបស់ពួកលោកចោរនោះទេ ខណៈដែលពួកជនល្មើសបានព្យាយាមកាត់ដែកនៅបញ្ជរលក់មាស ស្រាប់តែម្ចាស់ហាងមាសទាញកាំភ្លើងវែងបាញ់តបតវិញ។

នៅក្នុងវីដេអូបានបង្ហាញថា ម្ចាស់ហាងបានប្រើប្រាស់កាំភ្លើងវែងបាញ់ទៅជនល្មើស ដែលបណ្តាលឱ្យជនល្មើស ១នាក់ រងរបួសធ្ងន់ធ្ងរដេកដួលលើដី ខណៈក្រុមជនល្មើសផ្សេងទៀតបានរត់គេចខ្លួន និងបន្សល់ទុកម៉ូតូ ១គ្រឿង ហើយខ្លះទៀតបានរត់ពួននៅម្តុំមុខហាង។ ក្រោយទទួលបានការរាយការណ៍ ប៉ូលិស​ក៏ចាប់បានចោរ​ចំនួន ​២​នាក់​ (ម្នាក់ដែលរបួស និងម្នាក់ដែលរត់ពួន) ហើយ ២ នាក់ផ្សេងទៀត បាន​រត់គេច​ខ្លួន​បាត់។ នៅក្នុងបណ្ដាញសង្គមហ្វេសប៊ុក គេក៏ឃើញមានការបង្ហោះរូបភាពកាំភ្លើងវែងរបស់ម្ចាស់ហាង និងពានរង្វាន់មួយផងដែរ ដែលអាចឱ្យដឹងបានថា ម្ចាស់ហាងគឺជាអ្នកជំនាញ ឬជាជើងឯកខាងបាញ់កាំភ្លើង ៕

បរទេស៖ របាយការណ៍ពីប្រព័ន្ធផ្សព្វផ្សាយខាងក្រៅបានរាយការណ៍ថាអាមេរិក និងរុស្ស៊ី បានធ្វើការផ្លាស់ប្តូរអ្នកទោសគ្នារវាង ប្រីត នី ក្រៃ នើរ (Britney Greiner) អ្នកលេងបាល់បោះដ៏ល្បីល្បាញ និងអ្នកទោស វ៉ិចធឺ បូត (Victor Bout) ដែលជាឈ្មួញអាវុធរុស្ស៊ីដ៏ល្បីល្បាញបំផុតមួយរបស់ពិភពលោក។

ទីភ្នាក់ងារសារព័ត៌មានបរទេសរាយការណ៍ពីទីក្រុងវ៉ាស៊ីនតោន នៃសហរដ្ឋអាមេរិក នាថ្ងៃទី៩ ខែធ្នូ ដែលបានឱ្យដឹងថា ​សេតវិមានបានចេញសេចក្តីថ្លែងការណ៍មួយ បញ្ជាក់អំពីការធ្វើបត្យាប័នលោក វ៉ិចធឺ បូត (Victor Bout) ដែលជាឈ្មួញអាវុធរុស្ស៊ីដ៏ល្បីល្បាញបំផុតមួយរបស់ពិភពលោកទៅកាន់រដ្ឋាភិបាលក្រុងម៉ូស្គូ នៃប្រទេសរុស្ស៊ី។

ខណៈ ភាគីខាងរុស្ស៊ី បានក៏បញ្ជូនលោកស្រី ប្រីត នី ក្រៃ នើរ(Britney Greiner) ដែលជាកីឡាករបាល់បោះស្ត្រីជនជាតិ អាមេរិកមកកាន់ប្រទេសវិញ។

គួររំលឹកថាលោក វ៉ិចធឺ បូត(Victor Bout) ដែលជាអតីតទាហានសូវៀត និងជាឈ្មួញអាវុធរុស្ស៊ីដ៏ល្បីល្បាញបំផុតមួយរបស់ពិភពលោកត្រូវបានកាត់ទោសឱ្យជាប់គុក ២៥ ឆ្នាំនៅសហរដ្ឋអាមេរិក ដោយចោទប្រកាន់ពីបទសមគំនិតធ្វើឃាតជនជាតិអាមេរិក និងការនាំចេញកាំជ្រួចប្រឆាំងយន្តហោះ។

ក្នុងនោះវិមានក្រឹមឡាំងក៏បានអំពាវនាវឱ្យមានការដោះលែងលោក ដោយបាននិយាយថាការកាត់ក្តីនេះមិនមានមូលដ្ឋាន និងមានភាពលម្អៀងផងដែរ។

ដោយឡែកអ្នកទោស ប្រីត នី ក្រៃ នើរ (Britney Greiner) ដែលនាងជាអ្នកលេងឱ្យក្រុមបាល់បោះនារីរុស្ស៊ីអស់ជាច្រើនឆ្នាំត្រូវបានចាប់ខ្លួនពីបទរត់ពន្ធថ្នាំញៀននៅព្រលានយន្តហោះក្នុងតំបន់ មូស្គូ កាលពីខែកុម្ភៈកន្លងទៅ។ ទោះបីជានាងបានផ្តល់សក្ខីកម្មថានាងបានវេចខ្ចប់ប្រេងកញ្ឆាដោយចៃដន្យដែលបានរកឃើញនៅក្នុងវ៉ាលីរបស់នាងក៏ដោយ ប៉ុន្តែទោះជាយ៉ាងណានាងត្រូវបានកាត់ទោសឱ្យជាប់ពន្ធនាគាររយៈពេល៩ឆ្នាំ ហើយត្រូវបានផ្ទេរទៅពន្ធនាគារនៅ ម៉រ ឌូ វៀ (Mordovia) នៅពាក់កណ្តាលខែវិច្ឆិកា បន្ទាប់ពីបាត់បង់បណ្តឹងឧទ្ធរណ៍។

យ៉ាងណាមិញ ការដោះដូរអ្នកទោសទាំងពីរភាគី គឺធ្វើឡើងនៅអាកាសយានដ្ឋានអន្តរជាតិ អាបូ ដាប៊ី(Abu Dhabi) រដ្ឋធានីនៃប្រទេសអារ៉ាប់រួម ខណៈពេលដែលក្រសួងការបរទេសអារ៉ាប់រួម​បានចេញសេចក្តីថ្លែងការណ៍ស្តីពីបញ្ហានេះ ដោយបញ្ជាក់ថាការផ្លាស់ប្តូររវាងអ្នកទោសទាំងពីរគឺជាការចរចាដោយផ្ទាល់ រវាងអាមេរិក និងរុស្ស៊ីតែប៉ុណ្ណោះ ដែលមិនគួរពាក់ព័ន្ធនឹងអារ៉ាប់រួមនោះឡើយ៕ ប្រភព៖ Dailynews

Elon Musk បានធ្លាក់ទៅចំណាត់ថ្នាក់លេខ២ក្នុងបញ្ជីរបស់ មហាសេដ្ឋីមានជាងគេបង្អស់របស់ពិភពលោក  ដោយនិយកប្រតិបត្តិរបស់ក្រុមហ៊ុនស្លាកយីហៅដ៏ល្បី Louis Vuitton (LV)  លោក Bernard Arnault ឡើងមកលេខមួយវិញ។

ទស្សនាវត្តីដ៏ធំរបស់ពិភពលោក Forbes បានចេញផ្សាយថា  បច្ចុប្បន្ន Musk មានត្រឹមតែ ១៨៣.៦ ពាន់លានដុល្លារតែប៉ុណ្ណោះ ដែលទាបជាងទ្រព្យសម្បត្តិរបស់លោក  Arnault ១៨៦.២ ពាន់លានដុល្លារ។

កត្តាដែលជំរុញឱ្យ Musk ធ្លាក់ទៅលេខ២បែបនេះ ក៏ព្រោះតែការធ្លាក់ចុះនៃភាគហ៊ុន Tesla និងចំណាយថវិការ៤៤ពាន់លានដុល្លារ ទិញបណ្តាញសង្គម Twitter។

ដោយឡែក ភាគហ៊ុនរបស់លោក Bernard Arnault វិញបានកើនឡើងគួរឱ្យកត់សម្គាល់នៅដើមឆ្នាំ២០២២នេះ។ គួរបញ្ជាកផងដែរមិនត្រឹមតែជាម្ចាស់យីហៅ Louis Vuitton តែប៉ុណ្ណោះនោះទេ រូបលោកក៏ជាម្ចាស់Christian Dior, Fendi, Givenchy, Marc Jacobs និង Kenzo ផងដែរ៕

ប្រភព៖ CNN

បរទេស៖ តួលេខទីភ្នាក់ងារសន្តិសុខ សុខភាពចុងក្រោយបង្អស់របស់ចក្រភពអង់គ្លេសបានបង្ហាញថា ក្មេងអាយុក្រោម ១៥ ឆ្នាំចំនួន ១៥ នាក់បានបាត់បង់ជីវិតជាបន្តបន្ទាប់ដោយសារជំងឺ Strep A ដែលបានរាតត្បាតនៅក្នុងចក្រភពអង់គ្លេសចាប់តាំងពីខែកញ្ញាកន្លងទៅ។

នាថ្ងៃទី ៩ ខែធ្នូ ឆ្នាំ២០២២ មានសេចក្តីរាយការណ៍បានបញ្ជាក់ពីតួលេខនៃការស្លាប់របស់កុមារនៅក្នុងចក្រភពអង់គ្លេសដោយសារតែជំងឺរាតត្បាត Strep A ក្នុងប្រទេស។ ដោយជំងឺ Strep A បានបណ្តាលឱ្យមានជំងឺរួមមានការឆ្លងមេរោគលើស្បែក គ្រុនក្តៅក្រហម និងរលាកបំពង់កជាដើម។

ប៉ុន្តែខណៈពេលដែលការឆ្លងភាគច្រើនមានលក្ខណៈស្រាល ជួនកាលបាក់តេរីអាចបង្កជាជំងឺដែលគំរាមកំហែងដល់អាយុជីវិត និងបង្កឱ្យមានករណីបាត់បង់ជីវិតលើកុមារជាច្រើន​នាក់។

ជាមួយគ្នានោះផងដែរនៅក្នុងរដូវកាលបច្ចុប្បន្ននៃការឆ្លងមេរោគ Strep A មានដល់ ៨៥ ករណីចំពោះកុមារដែលមានអាយុចាប់ពី ១ ទៅ ៤ ឆ្នាំ ហើយ UKHSA បានបន្ថែមថាការកើនឡើងនៃករណីនេះគឺដោយសារតែចំនួនបាក់តេរីដ៏ច្រើន និងការកើនឡើងនៃទំនាក់ទំនងសង្គមដែលមានភាពងាយស្រួលដល់ការរីករាលដាល។

យ៉ាងណាមិញនាពេសបច្ចប្បន្ន ខាងឧសថការីបានត្អូញត្អែរពីកង្វះខាតថ្នាំ រួមទាំងកំណែរាវនៃប៉េនីស៊ីលីន និងអង់ទីប៊ីយោទិចដែលជារឿយៗផ្តល់ឱ្យកុមារសម្រាប់ការព្យាបាល ទើបធ្វើឱ្យមានករណីស្លាប់បែបនេះ ប៉ុន្តែរដ្ឋមន្ត្រីសុខាភិបាល Steve Barclay បាននិយាយថា វាមិនមានការខ្វះខាតថ្នាំអង់ទីប៊ីយោទិចទេជាមួយនឹងការលើកឡើងរបស់ឧសថការីនេះ៕ ប្រភព៖ LBC