ក្រចេះគឺជាខេត្តតូចមួយ សិ្ថតនៅប៉ែកឦសាននៃប្រទេសកម្ពុជា មានទីតាំងលាតសន្ធឹងតាមបណ្តោយដងទន្លេមេគង្គ។ ខេត្តនេះមានព្រំប្រទល់ជាប់នឹងខេត្តស្ទឹងត្រែងនៅភាគខាងជើង មណ្ឌលគិរីនៅភាគខាងកើត ហើយជាប់ខេត្តកំពង់ធំ និងកំពង់ចាមនៅភាគខាងលិច និងជាប់ខេត្តត្បូងឃ្មុំ និងប្រទេសវៀតណាមផងដែរ ។
ខេត្តក្រចេះមានផ្លូវគមនាគមន៍តភ្ជាប់៣ខ្សែ គឺផ្លូវជាតិលេខ៧A ចម្ងាយ៣៤០គីឡូម៉ែត្រ ពីរាជធានីភ្នំពេញ និងផ្លូវកៅស៊ូកំណាត់ផ្លូវជាតិលេខ៧៣ មួយខ្សែកាត់ស្រុកតំបែខេត្តត្បូងឃ្មុំ មកទល់នឹងស្រុកឆ្លូង និងមានផ្លូវតាមជួរមាត់ទនេ្លមួយខ្សែទៀតមានចម្ងាយប្រហាក់ប្រហែលនឹងផ្លូវទឹកទនេ្លមេគង្គ២២០គីឡូម៉ែត្រ។
បើតាមឯកសារមួយបានបង្ហាញថា ខេត្តក្រចេះ ជាដែនដីប្រវត្តិសាស្ត្រមួយក្នុងកម្ពុជរដ្ឋនៃយើង តាំងពីសម័យចេនឡាមកម្ល៉េះ ដោយហេតុថា “ស្រុកសម្បូរ” ដែលស្ថិតនៅតាមដងទន្លេមេគង្គ គឺជាអតីតរាជធានីនៃ “ចេនឡាទឹកលិច” មានឈ្មោះថា “ក្រុងសម្ភុបុរៈ” ។
ខេត្តក្រចេះ បានបន្សល់នូវប្រាសាទបុរាណមួយចំនួនដែលបានកសាងឡើងនៅសតវត្សទី៨ ផងដែរ ដូចជា ប្រាសាទនាងពៅ ស្ថិតនៅឃុំសំបុក ប្រាសាទព្រះធាតុខ្វាន់ពីរ ស្ថិតនៅក្នុងស្រុកក្រចេះ ប្រាសាទទួល ត្រពាំងថ្ម ស្ថិតនៅស្រុកសំបូរនៅខាងកើត ប្រាសាទប្រាំ ប្រាសាទកោះគ្រីង ដែលមានរូបទេវៈដ៏ល្អវិចិត្រៗជាច្រើន សាលបុរាណៗ ព្រះវិហារសសរមួយរយដែលបានកសាងនៅសតវត្សទី១៦ វត្តនេះមានជាប់ទាក់ទងនឹងរឿងព្រេងខ្មែរ រឿងក្រពើនេនធន ផ្ទះបុរាណៗរបស់ខ្មែរ អគាររចនាបថបារាំង និងប្រាសាទជាច្រើនទៀត ដែលគេមិន អាចស្គាល់់ឈ្មោះ ព្រោះបានបែកបាក់អស់ហើយ។
ផ្ទួយមកវិញ យោងតាមប្រភពឯកសារដែលចងក្រងដោយរដ្ឋបាលខេត្តក្រចេះបានបង្ហាញថា សាវតាខេត្តក្រចេះអ្នកស្រាវជ្រាវបារាំងបានបញ្ជាក់ថាមនុស្សរស់នៅកម្ពុជាដំបូងៗមានភស្ដុតាងជាង៦០ម៉ឺនឆ្នាំមុន មាននៅតំបន់ខ្ពង់រាបក្នុងតំបន់ស្រែស្បូវ រលួច ស្រែឫស្សី ..ខេត្តក្រចេះ រហូតដល់កំឡុងឆ្នាំ២៥០០ មុនគ្រិសសករាជ នៅតំបន់ស្នួល របស់ខេត្តក្រចេះ មានការកសាងរដ្ឋរបស់សហគមនុស្សដំបូងៗ រស់នៅក្នុងជំរុំដីរាងមូល នៅស្ថានីយធួនស្នួល កាំឡែក ប៉ាក់កាឡី ជើងឃ្លូ និងត្រពាំងល័ក្ស។ ប្រភពដដែលបន្តថាបើតាមវចនានុក្រមខ្មែរបានពន្យល់ពាក្យ “ក្រចេះ: ជាឈ្មោះខេត្តមួយនៃប្រទេសកម្ពុជា ។
ក្រចេះ ជាឈ្មោះម្សៅក្រអូបមួយប្រភេទ ៖ គឺម្សៅក្រចេះ តាមវចនានុក្រមខែ្មរ របស់សមេ្តចព្រះសង្ឃរាជ ជួន-ណាត លោកបានសរសេរថា “ក្រចេ” ជាពាក្យជនជាតិស្ទៀង ក្របីកំពង់ក្រចេ មានន័យថាកំពង់ចម្លងក្របី លុះក្រោយមកក៏ក្លាយជា មកជាពាក្យ “ក្រចេះ”៕
