កម្ពុជានឹងប្រើប្រាស់ “គុនខ្មែរ (Kun Khmer)” សម្រាប់ការប្រើប្រាស់ជាផ្លូវការក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣នៅប្រទេសកម្ពុជា មិនមែន “Muay Thai” របស់ប្រទេសថៃនោះទេ។

ដោយសង្កេតឃើញមានការយល់ច្រឡំអំពីកីឡាគុនខ្មែរ និងមួយថៃ ឯកឧត្តម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា (NOCC) បានពន្យល់ថា ៖ “នៅក្នុងធម្មនុញ្ញរបស់សហព័ន្ធកីឡាអាស៊ីអាគ្នេយ៍បានដាក់ពាក្យថា “កីឡាមួយ” ជាគុនខ្មែរ។ ក្នុងនេះគឺកម្ពុជាយើងធ្វើជាម្ចាស់ផ្ទះ យើងប្រកួតកីឡាមួយ ប៉ុន្ដែយើងបានសុំការឯកភាពពីគេដាក់ថា គុនខ្មែរ យើងចូលរួមក្នុងកីឡាមួយ ក៏ប៉ុន្ដែជាគុនខ្មែរ មិនមែនមួយថៃទេ។ មួយថៃគឺមួយថៃ ដូច្នេះកីឡាមួយ គឺមិនមែន មួយថៃ ទេ”។

ឯកឧត្តមបានលើកឡើងថា ក្នុងនាមប្រធានសហព័ន្ធកីឡាមួយអាស៊ី គឺមិនមែនមួយថៃ ហើយប្រធានរបស់សហព័ន្ធកីឡាមួយពិភពលោក គឺជនជាតិឡាវ ប៉ុន្តែក៏មិនមែនមួយថៃដែរ។ កម្ពុជាក៏មិនចូលរួមក្នុងសហព័ន្ធមួយថៃ (IFMA) នោះទេ។ កម្ពុជាមិនចូលរួមជាសមាជិកទេ ប៉ុន្ដែបើជាសកម្មភាពកីឡាប្រកួត កម្ពុជាប្រកួតនៅក្រៅប្រទេស បើខាង មួយថៃ អញ្ជើញ កម្ពុជាចូលរួមប្រកួតលក្ខណៈមួយថៃ ប៉ុន្ដែបើថៃ ឬប្រទេសផ្សេងមកស្រុកខ្មែរវិញ ពួកគេត្រូវចូលរួមប្រកួតជាលក្ខណៈ គុនខ្មែរ៕

បរទេស៖ តំបន់ Guryong ដែលត្រូវបានគេស្គាល់ថាជាតំបន់ “អនាធិបតេយ្យចុងក្រោយ” នៅក្នុងទីក្រុងសេអ៊ូល ប្រទេសកូរ៉េខាងត្បូង ត្រូវបានឱ្យដឹងថាបានខូចខាតយ៉ាងខ្លាំង ដោយសារភ្លើងឆាបឆេះ ជាលទ្ធផល អាជ្ញាធរបានធ្វើការជម្លៀសមនុស្សប្រមាណ ៥០០ នាក់ចេញពីតំបន់គ្រោះថ្នាក់ទៅកាន់ទីមានសុវត្តិភាព។

នាថ្ងៃទី២០ ខែមករា ឆ្នាំ២០២៣ ទីភ្នាក់ងារសារព័ត៌មានបរទេសរាយការណ៍ពីទីក្រុងសេអ៊ូល ប្រទេសកូរ៉េខាងត្បូង ដោយនាយកដ្ឋានពន្លត់អគ្គីភ័យស្រុក Gangnam ក្នុងទីក្រុងសេអ៊ូលបានរាយការណ៍ថា មានអគ្គិភ័យបានកើតឡើងនៅក្នុងតំបន់អនាធិបតេយ្យ Guryeong នាពីព្រឹកថ្ងៃសុក្រនេះ (ម៉ោងក្នុងស្រុក)។

ជាមួយគ្នានោះសមត្ថកិច្ចពាក់ព័ន្ធបានប្រញាប់ប្រញាស់ចុះទៅដល់កន្លែងកើតហេតុដើម្បីរួមគ្នា គ្រប់គ្រងស្ថានការណ៍ រួមមានក្រុមពន្លត់អគ្គីភ័យចំនួន ១៧០ នាក់ ប៉ូលីសចំនួន ២៦០ នាក់ និងមន្ត្រីរដ្ឋាភិបាលប្រហែល ៣០០ នាក់ផ្សេងទៀត។

ការឆាបឆេះនេះត្រូវបានគេរកឃើញថាបានបំផ្លាញសង្កាត់ និងភូមិជាច្រើនដែលបណ្តាលឱ្យខូចខាតផ្ទះប្រហែល ៦០ខ្នង ខណៈមនុស្សប្រហែល ៥០០ នាក់ត្រូវជម្លៀសទៅកាន់ទីជម្រកបណ្តោះអាសន្ន។

គួរឱ្យដឹងផងដែរថានៅក្នុងតំបន់នេះមានផ្ទះប្រហែល ៦៦៦ គ្រួសារ ហើយផ្ទះភាគច្រើនត្រូវបានសាងសង់ពីឈើ ដែលនេះចាត់ទុកថាជាឥន្ធនៈដ៏ល្អក្នុងការឆេះរីករាលដាលកាន់តែខ្លាំង។

ទោះជាយ៉ាងណា របាយការបឋមមិនមានការបញ្ជាក់ពីមូលហេតុច្បាស់លាស់ និងមិនបានបញ្ជាក់ថាមានអ្នកស្លាប់ ឬ របួសក្នុងហេតុការណ៍នេះនោះទេ ស្របពេលប្រធានាធិបតីកូរ៉េខាងត្បូងលោក Yun Seok-Yol បានប្តេជ្ញាចិត្តយ៉ាងពេញទំហឹងក្នុងការជួយជនរងគ្រោះ និងទទួលខុសត្រូវ ក្នុងហេតុការណ៍អគ្គិភ័យមួយនេះ។

គួររំលឹកផងដែរថា Guryeong ជាតំបន់ “អនាធិបតេយ្យចុងក្រោយ” នៅក្នុងរដ្ឋធានីរបស់ប្រទេសកូរ៉េខាងត្បូង តំបន់នេះបានកើតឡើងនៅក្នុងទសវត្សរ៍ឆ្នាំ ១៩៨០ នៅពេលដែលប្រជាជនក្រីក្រត្រូវការផ្លាស់ទីលំនៅមករស់នៅទីនេះ ដើម្បីបើកផ្លូវសម្រាប់គម្រោងអភិវឌ្ឍន៍ស្រុក Gangnam ដែលជាតំបន់សម្បូរទឹកបំផុតរបស់កូរ៉េខាងត្បូងសម្រាប់សេដ្ឋកិច្ចនាពេលបច្ចុប្បន្ន៕ ប្រភព៖ Dailynews

ប្រទេសថៃ ៖ កាលពីថ្ងៃទី១៨ ខែមករា កន្លងមក លោក ផលភី សុវណ្ណឆាវី អគ្គលេខាធិការរងនាយករដ្ឋមន្ត្រី ទទួលបន្ទុកកិច្ចការនយោបាយ និងលោក អនុថិន ឆាន់វីរៈ ឧបនាយករដ្ឋមន្ត្រី និងរដ្ឋមន្ត្រីក្រសួងសុខាភិបាល បានលើកឡើងក្នុងកិច្ចប្រជុំវេទិកាសេដ្ឋកិច្ចពិភពលោក (World Economic Forum) នៅទីក្រុងដាវ៉ូស ប្រទេសស្វីសថា ថៃជាប្រទេសមួយក្នុងតំបន់អាស៊ាន ដែលទាក់ទាញការវិនិយោគ មជ្ឈមណ្ឌលសុខភាព និងគមនាគមន៍ដឹកជញ្ជូនក្នុងតំបន់ ។

កិច្ចប្រជុំក្នុងប្រធានបទ «ភាពទាក់ទាញរបស់អាស៊ាន» លោក អនុថិន បាននិយាយអំពីចំណុចខ្លាំងរបស់អាស៊ាន និងថៃ ក្នុងផ្នែកសេដ្ឋកិច្ច និងការវិនិយោគ ខណៈលោក អនុថិន បានដើរតួជាអ្នកជំរុញអាស៊ានទៅកាន់ពិភពលោក ។ កិច្ចប្រជុំនេះមានវិនិយោគិនបរទេសជាច្រើនចូលរួមប្រជុំដូចជា លោកស្រី Merit Janow ប្រធានក្រុមហ៊ុន MasterCard, លោក Luhut B Panchaitan រដ្ឋមន្ត្រីក្រសួងកិច្ចការសមុទ្រ និងវិនិយោគឥណ្ឌូណេស៊ី និងលោកស្រី Teresita Cycoson អនុប្រធានក្រុមហ៊ុន SM Investment Corporation របស់ហ្វីលីពីនជាដើម ។

លោក ផលភី សុវណ្ណឆាវី អគ្គលេខាធិការរងនាយករដ្ឋមន្ត្រីថៃ បានឆ្លើយតបសំណួរអំពីកត្តាលូតលាស់ជាបន្តបន្ទាប់របស់អាស៊ាន រហូតដល់សមត្ថភាពសម្របខ្លួនរបស់អាស៊ានចំពោះស្ថានការណ៍ផ្សេងៗបានយ៉ាងមានប្រសិទ្ធភាព បើទោះជាប្រឈមជាមួយបញ្ហាជម្លោះ និងមានជំងឺកូវីដរាតត្បាតក្តី ក៏អាស៊ានអាចដោះស្រាយបញ្ហាបានគួរឱ្យសរសើរ និងសហការរួមគ្នាយ៉ាងល្អ ។ លោកបន្តថា ផ្នែកសុខាភិបាល ប្រទេសថៃត្រូវបានជ្រើសរើសជាទីតាំងលេខាធិការដ្ឋាននៃមជ្ឈមណ្ឌលអាស៊ាន និងការដោះស្រាយបញ្ហាបន្ទាន់ រួមទាំងជំងឺរាតត្បាត ដែលចាត់ទុកថា ជាកិច្ចសហការរួមគ្នាដោះស្រាយបញ្ហាសុខាភិបាលក្នុងតំបន់អាស៊ាននាថ្ងៃអនាគត ។

ដោយឡែក ទាក់ទងនឹងសក្តានុពលនៃកំណើនសេដ្ឋកិច្ចអាស៊ាន លោក អនុថិន រដ្ឋមន្ត្រីក្រសួងសុខាភិបាល បានស្នើឱ្យតាមដានគម្រោង Land Bridge នៅប្រទេសថៃ ។ វានឹងជួយលើកកម្ពស់សក្តានុពលក្នុងតំបន់ ព្រោះអាស៊ានជាចំណុចកណ្តាលក្នុងការដឹកជញ្ជូនទំនិញឆ្លងកាត់មហាសមុទ្រ Andaman ជាមួយឈូងសមុទ្រថៃ ដែលបង្កើតឱកាសឱ្យថៃ និងប្រទេសក្នុងតំបន់ផងដែរ ។

លោក អនុថិន បញ្ជាក់ថា ប្រទេសថៃកំពុងតែនាំមុខផ្នែកសុខាភិបាល ខណៈនិស្សិតបរទេសមកសិក្សាផ្នែកពេទ្យនៅថៃ ។ លើសពីនេះ ថៃជាទីកន្លែងសម្រាកលំហែរកាយ និងពិនិត្យសុខភាព ដោយថៃមានការព្យាបាលតាមវេជ្ជសាស្ត្រទំនើប ព្យាបាលបែបបុរាណ ព្រមទាំងការស្វែងរកផលិតផលសុខភាព និងឱសថធម្មជាតិផ្សេងៗ ៕

ប្រភព ៖ The Reporters

រដ្ឋធានីម៉ានីល៖ ជម្លោះសមុទ្រចិនខាងត្បូង បានចាប់ផ្តើម នៅដើមទសវត្សរ៍ ឆ្នាំ១៩៧០ ដែលភាគច្រើនផ្តោត ទៅលើតំបន់សេដ្ឋកិច្ចផ្តាច់មុខ ស្របពេលប្រទេសចិន តែងតែទាមទារស្ទើរតែទាំងអស់ នៃផ្ទៃសមុទ្រ មានទំហំ ប្រហែល៣,៥លានគីឡូម៉ែត្រការ៉េ សម្បូរទៅ ដោយជីវចម្រុះ រ៉ែ ធនធានប្រេង និងឧស្ម័នធម្មជាតិ ហើយក្រុងប៉េកាំង ថែមទាំងចង់គ្រប់គ្រងកោះតូចៗ និង ថ្មប៉ប្រះទឹក ព្រមទាំងតំបន់នេសាទដ៏សម្បូរបែប រហូតនាំឲ្យកើតមានជម្លោះជាមួយនឹងប្រទេសនៅក្នុងតំបន់ និង ការប្រជែងអំណាចជាមួយនឹងមហាអំណាចលោកខាងលិច ទើបប្រធានាធិបតីហ្វីលីពីន បានអះអាង ថា ជម្លោះនេះ នឹងបង្កគ្រោះមហន្ដរាយដ៏ធ្ងន់បំផុត ដល់ពិភពលោកទាំងមូល។

សារព័ត៌មាន Spunik គ្រប់គ្រង ដោយរដ្ឋរុស្ស៊ី បានចេញផ្សាយ កាលពីព្រឹក ថ្ងៃសុក្រ ទី២០ ខែមករា ថា លោក ហ្វឺរឌីណង់ដ៍ ម៉ាកូស (Ferdinand Marcos Jr.) ប្រធានាធិបតីហ្វីលីពីន កាលពីថ្ងៃពុធ បានថ្លែងទៅកាន់វេទិកាសេដ្ឋកិច្ចពិភពលោក នៅទីក្រុងដាវ៉ូស ប្រទេសស្វីស ថា ជម្លោះដែនទឹក នៅសមុទ្រចិនខាងត្បូង ធ្វើឱ្យគាត់ដេកលែងលក់ ព្រោះជម្លោះណាមួយ នៅក្នុងតំបន់នេះ នឹងក្លាយជាគ្រោះមហន្តរាយដ៏ធំសម្បើម សម្រាប់ពិភពលោកទាំងមូល។ ជម្លោះដ៏រ៉ាំរ៉ៃនេះ បានកើតឡើង រវាងមហាយក្សចិន និង ប្រទេសរបស់គាត់ រួមជាមួយនឹងប្រទេសផ្សេងៗទៀត នៅក្នុងតំបន់ និង នៅជុំវិញសមុទ្រចិនខាងត្បូង។

សមុទ្រចិនខាងត្បូង មានទំហំ៣,៥លានគីឡូម៉ែត្រការ៉េ ជាទីសម្បូរទៅ ដោយធនធានធម្មជាតិដ៏សម្បូរបែប រួមមាន ជីវចម្រុះ រ៉ែ ប្រេង និង ឧស្ម័ន…ជាដើម។ ចំណែកការធ្វើពាណិជ្ជកម្មឆ្លងកាត់ដែនទឹកមួយនេះ ទៅកាន់ពិភពលោក មានទំហំទឹកប្រាក់ ប្រហែល៣ពាន់ពាន់លានដុល្លារ ជារៀងរាល់ឆ្នាំ។

ដោយឡែក ក្រុងប៉េកាំង តែងតែទាមទារសមុទ្រចិនខាងត្បូង ស្ទើរតែទាំងស្រុង ជាដែនអធិបតេយ្យភាពរបស់ប្រទេសចិន បើទោះជាដែនទឹក ជាយុទ្ធសាស្ត្រ និង មានសម្បូរធនធានធម្មជាតិដ៏សំខាន់បំផុតរបស់ពិភពលោកមួយនេះ ត្រូវបានសម្រេច កាលពីឆ្នាំ២០១៦ ដោយតុលាការអន្តរជាតិ ច្រានចោលនូវការអះអាងរបស់ក្រុងប៉េកាំង ជាដែនអធិបតេយ្យភាពរបស់ចិន យ៉ាងណាក៏ដោយ។ ការអះអាងរបស់ចិន បង្កឲ្យមានជម្លោះជាមួយនឹងប្រទេសផ្សេងៗ នៅក្នុងតំបន់ ជុំវិញការទាមទារត្រួតស៊ីគ្នានេះដែរ រួមមាន ហ្វីលីពីន វៀតណាម ម៉ាឡេស៊ី ប្រ៊ុយណេ និង តៃវ៉ាន់។

ក្រុងប៉េកាំង កាលពីពេលថ្មីៗកន្លងទៅ បានបង្កើនសកម្មភាពយោធា នៅក្នុងតំបន់ទាំងនេះ ទើបក្រុងម៉ានីល បានបង្កើនវត្តមានយោធារបស់ខ្លួន នៅក្នុងតំបន់ ក្រោយពេលមានសេចក្តីរាយការណ៍ ថា ចិនបានចាប់ផ្តើម ចាប់យកដែនដី ដែលមិនទាន់បានកាន់កាប់ជាច្រើនកន្លែង នៅក្នុងដែនទឹករបស់ហ្វីលីពីន។ ភាពតានតឹងនេះ បានកើតឡើង ស្របពេលចិន កំពុងតែឈានជើង ចូលតទល់ជាមួយសហរដ្ឋអាមេរិក ជាសម្ពន្ធមិត្តរបស់ហ្វីលីពីន ដែលកំពុងតែព្យាយាមបង្កើនឥទ្ធិពលរបស់ខ្លួន នៅក្នុងតំបន់អាស៊ីអាគ្នេយ៍។

ប្រធានាធិបតីហ្វីលីពីន បានបញ្ជាក់ ថា «យើងឈរនៅជួរមុខបំផុត ហើយពេលណាមានភាពតានតឹង កាន់តែខ្លាំងឡើង នាវាជាច្រើននឹងចេញមក ជាមួយនឹងកងទ័ព និង កងនាវាឆ្មាំសមុទ្ររបស់ចិន ហើយអាមេរិកាំង អាចនឹងឆ្លើយ ថា… យើងកំពុងតែសម្លឹងមើល ជាអ្នកឈរមើល។ ប្រសិនមានកំហុសឆ្គង នៅទីនេះ យើងនឹងរងគ្រោះ។ ចំណែកគោលនយោបាយរបស់ហ្វីលីពីន គឺប្ដេជ្ញាចិត្ត ដើម្បីសន្ដិភាព»។

លោកប្រធានាធិបតី Marcos បានធ្វើដំណើរបំពេញទស្សនកិច្ចជាផ្លូវរដ្ឋ លើកដំបូង ទៅកាន់រដ្ឋធានីក្រុងប៉េកាំង កាលពីដើមខែមករា ដើម្បីជួបជាមេដឹកនាំចិន។ លោកប្រធានាធិបតី បានលើកយកបញ្ហាសមុទ្រចិនខាងត្បូង មកពិភាក្សា នៅក្នុងជំនួបជាមួយសមភាគីចិន លោក ស៊ី ជិនពីង (Xi Jinping)។ ប្រមុខរដ្ឋទាំង២នេះ បានយល់ព្រម ដោះស្រាយនូវការខ្វែងគំនិតគ្នា នៅលើដែនសមុទ្រនេះ តាមរយៈការពិគ្រោះយោបល់គ្នា នៅក្នុងនាមជាមិត្ត។

ប្រធានាធិបតីហ្វីលីពីន បានសង្កត់ធ្ងន់ ថា «យើងមិនអាច… បោសសម្អាតសំរាម នៅក្រោមកម្រាលព្រំ ហើយធ្វើពុត ថា វាមិនមានអ្វីកើតឡើងនោះទេ ព្រោះវាមិនត្រឹមតែមានផលប៉ះពាល់ នៅក្នុងន័យការទូត ហើយមិនត្រឹមតែប៉ះពាល់ដល់សន្តិសុខប៉ុណ្ណោះទេ វាថែមទាំងធ្វើឲ្យប្រឈមកាន់តែខ្លាំង នៅក្នុងជីវភាពរស់នៅរបស់ប្រជាពលរដ្ឋយើងថែមទៀតផង»។

លោក ម៉ាកូ បានទទួលស្គាល់ ថា «ស្ថានភាពនៅសមុទ្រចិនខាងត្បូង កាន់កើនឡើង និង ស្មុគស្មាញខ្លាំងណាស់ ហើយថា បញ្ហានេះនឹងមិនមានដំណោះស្រាយ ដោយស្រួលៗនោះទេ។ ប៉ុន្ដែហ្វីលីពីន មិនបានទាមទារជម្លោះ ជាមួយនឹងចិននោះដែរ។ អ្វីដែលយើងត្រូវប្រឈមមុខខ្លាំង ត្រង់ថា ចិនកំពុងតែទាមទារដែនអធិបតេយ្យ នៅលើដែនដីរបស់យើង»៕

បរទេស៖ យោងតាមប្រព័ន្ធផ្សព្វផ្សាយរដ្ឋបានឱ្យដឹងថា មានមនុស្សប្រាំបីនាក់បានស្លាប់ និងជាច្រើននាក់ផ្សេងទៀតបានបាត់ខ្លួន បន្ទាប់ពីមានខ្យល់ព្យុះទឹកកកបានវាយប្រហារបិទផ្លូវរោងក្រោមដីនៅតំបន់ភ្នំទីបេ។

កាលពីថ្ងៃទី ១៩ ខែមករា ឆ្នាំ២០២៣ ទីភ្នាក់ងារសារព័ត៌មាន Xinhua បានរាយការណ៍ពីឧបទ្ទវហេតុនៃការធ្លាក់ទឹកក ដែលបានកើតឡើងនៅច្រកចេញនៃផ្លូវរូងក្រោមដីមួយកន្លែងនៅលើផ្លូវហាយវេទីក្រុង Nyingchi ក្នុងតំបន់ Medog County ទៅកាន់ទីក្រុង Mainling នៅភាគអាគ្នេយ៍ទីបេ និងជាតំបន់ទេសចរណ៍ដ៏ពេញនិយមមួយកន្លែង។

ជាមួយគ្នានោះបើយោងតាមមន្ត្រីក្នុងតំបន់បានឱ្យដឹងថាទីក្រុង Nyingchi មានសណ្ថានដីកម្ពស់ ៣,០៤០ ម៉ែត្រពីលើនីវ៉ូទឹកសមុទ្រ ហើយការធ្លាក់ទឹកកកនេះបានបណ្ដាលឱ្យជាប់មនុស្សនៅក្នុងរថយន្តរបស់ពួកគេខណៈពេលកំពុងធ្វើដំណើរលើផ្លូវរូងក្រោមដីនៃតំបន់នោះ។

យ៉ាងណាមិញបន្ទាប់ពីហេតុការណ៍នេះកើតឡើង ក្រុមអ្នកជួយសង្គ្រោះរាប់រយនាក់ត្រូវបានបញ្ជូនមកដើម្បីដោះស្រាយស្ថានភាព រួមជាមួយនឹងម៉ាស៊ីនធំៗចំនួន ៣០គ្រឿង ដើម្បីជួយក្នុងការស្វែងរកអ្នកបាត់ខ្លួន។

ក្នុងនោះគេបានរាយការណ៍មកថា ក្នុងហេតុការណ៍នេះបានបណ្ដាលឱ្យមនុស្សចំនួន៨នាក់បានបាត់បង់ជីវិត និងមានអ្នកបាត់ខ្លួន​ជាច្រើននាក់ផ្សេងទៀត។

ហើយប្រតិបត្តិការជួយសង្គ្រោះកំពុងដំណើរការសម្រាប់អ្នកបាត់ខ្លួន ដែលគេមិនទាន់ដឹងច្បាស់ថាមានមនុស្សប៉ុន្មាននាក់នោះទេដែលបានបាត់ខ្លួនពីឧបទ្ទវហេតុកើតឡើងមួយនេះ។

គួរបញ្ជាក់ផងដែរថា តំបន់ភ្នំនេះងាយនឹងកើតមានការធ្លាក់ព្រិលជាញឹកញាប់ ដោយកាលពីខែ តុលា ឆ្នាំ២០២២កន្លងទៅ ក៏ធ្លាប់មានការធ្លាក់ទឹកកកបោកបក់លើផ្លូវភ្នំមួយនេះ ដោយបានសម្លាប់មនុស្សយ៉ាងតិច ២៦ នាក់ផងដែរ៕ ប្រភព៖ Thairath

បរទេស៖ លោក ស៊ី ជីនពីង(Xi Jinping)បានសម្ដែងការព្រួយបារម្ភ និងការភ័យខ្លាចពីហានីភ័យនៃការរីករាលដាលនៃជំងឺកូវីដ-១៩ នៅតាមតំបន់”ជនបទ” ក្រោយពីមានចំនួនប្រជាជនយ៉ាងច្រើនកុះករសម្រុកនាំគ្នាទៅប្រារព្ធពីធីបុណ្យចូលឆ្នាំចិននៅស្រុកកំណើរ ហើយក្នុងនោះលោកបានបញ្ជាឱ្យបង្កើនកម្រិតនៃការបង្ការឱ្យបានខ្ពស់ផងដែរ។

កាលពីថ្ងៃទី ១៩ ខែមករា ឆ្នាំ២០២៣ សារព័ត៌មាន AFP បានរាយការណ៍ថា លោកស៊ី ជីនពីង (Xi Jinping) មេដឹកនាំប្រទេសចិន បានសម្តែងការព្រួយបារម្ភអំពីស្ថានភាពនៃការរីករាលដាលនៃកូវីដ-១៩ នៅតាមតំបន់ជនបទ បន្ទាប់ពីប្រជាពលរដ្ឋជាច្រើនបានត្រឡប់ទៅស្រុកកំណើតជាបណ្តើរៗក្នុងអំឡុងពេលនៃការប្រារព្ធ ពិធីបុណ្យចូលឆ្នាំចិន។

ជាមួយគ្នានោះ លោក Xi Jinping ក៏បានបញ្ជាឱ្យបង្កើនកម្រិតនៃការបង្ការឱ្យបានតឹងរ៉ឹង ព្រមទាំងរំលឹកឡើងវិញនូវតម្រូវការ ក្នុងការពន្លឿនការធ្វើឱ្យប្រសើរឡើងនូវការថែទាំវេជ្ជសាស្រ្តនៅតាមតំបន់ជនបទជាពិសេសអ្នកដែលងាយរងគ្រោះពីជំងឺកូវីដនៅតាមជនបទឱ្យកាន់តែខ្លាំង។

បន្ថែមពីនោះលោកក៏បានលើកឡើងថា ការបង្ការ និងគ្រប់គ្រងជំងឺរាតត្បាតក្នុងប្រទេសបានឈានចូលដំណាក់កាលថ្មីមួយ ហើយប្រទេសកំពុងតែស្ថិតក្នុងពេលវេលានៃការខិតខំប្រឹងប្រែងយ៉ាងយកចិត្តទុកដាក់ ហើយស្ថានភាពនេះត្រូវពិភាក្សាអំពីចំណុចខ្វះខាតនៃការបង្ការ និងគ្រប់គ្រងជំងឺរាតត្បាតទូទាំងប្រទេស ជាពិសេសនៅតាមតំបន់ជនបទផ្ទាល់ ខណៈពេលដែលប្រជាជនជាច្រើននាំគ្នាសម្រុកធ្វើដំណើរទៅកាន់ស្រុកកំណើត ដើម្បីទៅប្រារព្ធពិធីបុណ្យចូលឆ្នាំចិនដែលជាឱកាសយ៉ាងងាយស្រួលពីការរីករាលដាលនៃជំងឺ។

យ៉ាងណាមិញនៅថ្ងៃដដែល អាជ្ញាធរដឹកជញ្ជូនរបស់ប្រទេសចិនបាននិយាយថា ខ្លួនរំពឹងថានឹងមានការធ្វើដំណើរច្រើនជាង ២ ពាន់លានដង ជាមួយមនុស្សជាង ៣០.២ លាននាក់ធ្វើដំណើរទូទាំងប្រទេសក្នុងអំឡុងពិធីបុណ្យចូលឆ្នាំចិនខាងមុខនេះ៕ ប្រភព៖ Khaosod