ប្រទេសជប៉ុន ៖ ចាប់តាំងពីខែមេសា ឆ្នាំ២០២៥ ប្រទេសជប៉ុនមានហេតុការណ៍ខ្លាឃ្មុំវាយប្រ.ហារពលរដ្ឋរហូតដល់២២០លើក និងមានពលរដ្ឋបាត់បង់ជីវិ.តដោយសារខ្លាឃ្មុំ ចំនួន១៣នាក់ ក្នុងនោះ៧នាក់បាត់បង់ជីវិ.តកាលពីខែតុលា ដែលជាពេលខ្លាឃ្មុំដើររកចំណីស៊ីច្រើនមុនត្រឡប់ចូលព្រៃវិញ ។ អាជ្ញាធរជប៉ុនបានព្យាយាមរកវិធីផ្សេងៗការពារពលរដ្ឋពីការវាយប្រ.ហាររបស់ខ្លាឃ្មុំ ហើយវិធីចុងក្រោយ គឺប្រើប្រាស់ដ្រូនបណ្តេញខ្លាឃ្មុំ ។

នៅផ្នែកខាងក្រោមរបស់ដ្រូនបំពាក់ដោយឧបករណ៍បំពងសំឡេងយ៉ាងធំដើម្បីបើកសំឡេងឆ្កែព្រុស ខណៈផ្នែកចំហៀងបំពាក់ឧបករណ៍បាញ់បណ្តេញខ្លាឃ្មុំ ។ ខ្លាឃ្មុំចូលចិត្តវាយប្រហារពលរដ្ឋជប៉ុនដែលរស់នៅតំបន់ឆ្ងាយៗពុំសូវមានភ្ញៀវទេសចរ ប៉ុន្តែកាលពីពេលថ្មីៗនេះ មានហេតុការណ៍កូនខ្លាឃ្មុំខាំភ្ញៀវទេសចរជនជាតិអេស្ប៉ាញនៅភូមិបុរាណឈិរ៉ាខាវ៉ាកុ ដែលជាភូមិទេសចរណ៍ដ៏ល្បីល្បាញ និងត្រូវបានអង្គការយូណេស្កូចុះក្នុងបញ្ជីបេតិកភណ្ឌពិភពលោក ។

តាមការចុះផ្សាយរបស់សារព័ត៌មានបរទេសកាលពីថ្ងៃទី១៨ ខែវិច្ឆិកា ឆ្នាំ២០២៥ ប្រទេសជប៉ុននៅតែប្រឈមនឹងបញ្ហាខ្លាឃ្មុំវាយប្រហារពលរដ្ឋ និងភ្ញៀវទេសចរ ដែលធ្វើឱ្យអាជ្ញាធរជប៉ុនប្រើប្រាស់ដ្រូនបណ្តេញខ្លាឃ្មុំ បន្ទាប់ពីប្រើប្រាស់វិធីជាច្រើន ។ ដ្រូននេះផលិតដោយក្រុមហ៊ុន Aero Japan ហើយក្រុមហ៊ុនបានសាកល្បងប្រើប្រាស់ដ្រូននៅចម្ការផ្លែឈើក្នុងទីក្រុងហ៊ិតាក់ ខេត្តគីហ្វុ ភាគកណ្តាលប្រទេសដើម្បីការពារកុំឱ្យខ្លាឃ្មុំលួចផ្លែឈើ ។

ការប្រើប្រាស់ដ្រូនបណ្តេញខ្លាឃ្មុំ គឺជាវិធីថ្មីដែលអាជ្ញាធរជប៉ុនប្រើប្រាស់ដើម្បីផ្តល់សុវត្ថិភាពដល់ពលរដ្ឋ និងភ្ញៀវទេសចរ ក្រោយពីមានហេតុការណ៍ខ្លាឃ្មុំវាយប្រហារមនុស្សជាញឹកញាប់នៅឆ្នាំ២០២៥ ជាពិសេស ខេត្តភាគខាងជើង ។ តាមទិន្នន័យ គឺចាប់ពីខែមេសា មានហេតុការណ៍ខ្លាឃ្មុំវាយប្រហារមនុស្សរហូតដល់២២០លើក និងមានមនុស្សបាត់បង់ជីវិត១៣នាក់ ក្នុងនោះ៧នាក់បាត់បង់ជីវិតកាលពីខែតុលា ដែលជាពេលខ្លាឃ្មុំដើររកចំណីស៊ីច្រើនមុនត្រឡប់ចូលព្រៃវិញ ។

ក្រៅពីនេះ អាជ្ញាធរជប៉ុនបានដាក់ស្លាកសញ្ញាដាស់តឿន «ប្រយ័ត្នខ្លាឃ្មុំធ្វើបាប» នៅតំបន់ទេសចរណ៍ ព្រមទាំងណែនាំឱ្យភ្ញៀវទេសចរដើរកម្សាន្តជាក្រុម និងហាមទៅតំបន់មួយចំនួនពេលព្រលប់ ។ កាលពីដើមខែវិច្ឆិកា កងទ័ពជប៉ុនបានជួយចាប់ខ្លាឃ្មុំជាមួយអាជ្ញាធរ ខណៈរដ្ឋាភិបាលបន្ធូរបន្ថយច្បាប់ដោយអនុញ្ញាតឱ្យអ្នកបរបាញ់សត្វអាចបាញ់ខ្លាឃ្មុំ ក្រោយពីអាមេរិក ចិន និងអង់គ្លេស ដាស់តឿនពលរដ្ឋខ្លួនឱ្យប្រយ័ត្នសុវត្ថិភាព និងគេចពីខ្លាឃ្មុំពេលទៅលេងជប៉ុន ។ កាលពីថ្ងៃទី១៦ ខែវិច្ឆិកា ស្ត្រីជប៉ុនម្នាក់បានស្លាប់ក្នុងស្រែនៅខេត្តអាគិតាក់ ភាគខាងជើងប្រទេស ហើយសមត្ថកិច្ចសន្និដ្ឋានថា ស្លាប់ដោយសារខ្លាឃ្មុំ ។

គួរបញ្ជាក់ថា ខ្លាឃ្មុំពណ៌ខ្មៅនៅតំបន់អាស៊ីត្រូវបានចាត់ទុកជាសត្វជិតផុតពូជលើពិភពលោក ប៉ុន្តែខ្លាឃ្មុំប្រភេទនេះនៅជប៉ុនបានកើនឡើងរហូតដល់៣ដងតាំងពីឆ្នាំ២០១២ ដោយសារការបាញ់ខ្លាឃ្មុំធ្លាក់ចុះ ។ តាមអ្នកជំនាញ គឺបម្រែបម្រួលអាកាសធាតុធ្វើឱ្យរុក្ខជាតិក្នុងព្រៃជាចំណីរបស់ខ្លាឃ្មុំធ្លាក់ចុះ ព្រមទាំងចំនួនពលរដ្ឋជប៉ុនរស់នៅជនបទតិចតួច ខណៈកសិដ្ឋាននានាត្រូវបោះបង់ចោលកាន់តែច្រើន ជាមូលហេតុធ្វើឱ្យខ្លាឃ្មុំជាច្រើនក្បាលចេញមករកចំណីជិតភូមិ ៕

ប្រទេសថៃ ៖ នាយករដ្ឋមន្ត្រីថៃ លោក Anutin Charnvirakul បាននិយាយកាលពីថ្ងៃទី១៨ ខែវិច្ឆិកា ឆ្នាំ២០២៥ ពីការបង្កើនទំនាក់ទំនងជិតស្និទ្ធជាមួយចិនផ្នែកពាណិជ្ជកម្ម ទេសចរណ៍ និងកសិកម្ម ដោយសមាគមទេសចរណ៍ថៃនឹងជំរុញវិធានការទាក់ទាញភ្ញៀវទេសចរចិន រួមទាំងសហការបង្ក្រាបការឆបោ.កអនឡាញនៅប្រទេសថៃ ។ ការបង្កើនទំនាក់ទំនងជិតស្និទ្ធថៃ-ចិន ស្របពេលអាមេរិកផ្អាកចរចាពន្ធទំនិញជាមួយថៃ រហូតដល់ថៃអនុវត្តឱ្យបានពេញលេញតាមកិច្ចព្រមព្រៀងសន្តិភាពជាមួយកម្ពុជា ដែលបានចុះហត្ថលេខារួមគ្នានៅទីក្រុងគូឡាឡាំពួរ ប្រទេសម៉ាឡេស៊ី ។

អ្នកនាំពាក្យរដ្ឋាភិបាលថៃ លោក Siripong Angkasakulkiat បាននិយាយកាលពីថ្ងៃទី១៨ ខែវិច្ឆិកា នៅវិមានរដ្ឋាភិបាលថា លោក គិតទិផុង តេរតនាឆ័យ នាយកសមាគមពាណិជ្ជកម្មថៃ-ចិន បាននាំសមាជិកសមាគមមកជួបពិភាក្សាជាមួយលោកនាយករដ្ឋមន្ត្រី Anutin អំពីគោលនយោបាយការនាំចូល និងនាំចេញទំនិញថៃទៅក្រៅប្រទេស ព្រមទាំងពិភាក្សាពីការបង្កើនទំនាក់ទំនងជិតស្និទ្ធជាមួយចិន ។ សមាជិកសមាគមដែលមកជួបពិភាក្សានេះ គឺមកពីក្រុមហ៊ុនជាច្រើនទាំងផ្នែកសណ្ឋាគារ អចលនទ្រព្យ ម្ហូបអាហារ និងក្រុមហ៊ុនផលិតសម្ភារៈអគ្គិសនី ។

លោកនាយករដ្ឋមន្ត្រី Anutin បាននិយាយទៅកាន់សមាជិកសមាគមពាណិជ្ជកម្មថៃ-ចិនថា ថៃមានទំនាក់ទំនងជិតស្និទ្ធជាមួយចិនរហូតមក ហើយក្នុងកិច្ចប្រជុំ APEC កន្លងមក លោកមានឱកាសជជែកជាមួយប្រធានាធិបតីចិន លោក Xin Jinping និងបានបញ្ជាក់ពីការប្តេជ្ញាចិត្តរបស់រដ្ឋាភិបាលថៃកំណត់គោលនយោបាយជំរុញសេដ្ឋកិច្ចតាមរយៈកាស៊ីណូ ។ ក្រៅពីនេះ លោកបញ្ជាក់ពីថៃមានសុវត្ថិភាពសម្រាប់ភ្ញៀវទេសចរចិន ខណៈលោក Xi សន្យាជំរុញឱ្យភ្ញៀវទេសចរចិនមកកម្សាន្តនៅប្រទេសថៃ ។

នាយករដ្ឋមន្ត្រីថៃក៏បាននិយាយពីព្រះមហាក្សត្រថៃ និងព្រះមហាក្សត្រីយាងទៅទីក្រុងប៉េកាំង ដោយព្រះអង្គបានពិភាក្សាជាមួយប្រធានាធិបតីចិន លោក Xi និងនាយករដ្ឋមន្ត្រីចិន ។ ការពិភាក្សានេះបន្តពីការពិភាក្សាក្នុងកិច្ចប្រជុំ APEC ជាពិសេស ជំរុញឱ្យចិនជួយទិញទិន្នផលកសិកម្មថៃ ខណៈចិនថា នឹងជួយទិញញអង្ករថៃចំនួន៥សែនតោន ព្រះមហាក្សត្រថៃក៏បានអញ្ជើញប្រធានាធិបតីចិនធ្វើដំណើរទស្សនកិច្ចមកកាន់ប្រទេសថៃផងដែរ ។

រដ្ឋាភិបាលថៃមើលឃើញការចាប់អារម្មណ៍របស់ចិន ហើយរដ្ឋាភិបាលថៃនឹងបង្កើនទំនាក់ទំនងជាមួយចិនលើគ្រប់វិស័យឱ្យកាន់តែស្អិតរមួត ទាំងសេដ្ឋកិច្ច ទេសចរណ៍ សន្តិសុខ និងការផ្លាស់ប្តូរវប្បធម៌ ។ ថៃនិងចិនមានទំនាក់ទំនងជិតស្និទ្ធដូចបងប្អូន វានឹងធ្វើឱ្យកិច្ចសហការរវាងប្រទេសទាំងពីរកាន់តែរឹងមាំដើម្បីផលប្រយោជន៍រួមគ្នារបស់ពលរដ្ឋថៃ-ចិន ។

ចំណែកសមាគមពាណិជ្ជកម្មថៃ-ចិនបាននិយាយពីការជំរុញពាណិជ្ជកម្ម និងវិនិយោគរវាងប្រទេសទាំងពីរ ព្រមទាំងជំរុញឱ្យរដ្ឋាភិបាលថៃបង្ក្រាបការឆបោកអនឡាញនៅប្រទេសថៃ ដោយធ្វើវិសោធនកម្មច្បាប់ដើម្បីកំណត់វិធានការតឹងរ៉ឹង និងដាក់ទោសក្រុមឆបោកអនឡាញ ។ សមាគមក៏បានជំរុញឱ្យផ្តល់ភាពងាយស្រួលដល់ភ្ញៀវទេសចរចិន តាមរយៈការទូទាត់ប្រាក់ឌីជីថល ដូចជា ៖ Alipay និង WeChat Pay ខណៈនាយករដ្ឋមន្ត្រីថៃយល់ព្រមតាមសំណូមពររបស់សមាគម និងប្តេជ្ញាជំរុញកិច្ចសហការជាមួយចិនឱ្យទទួលបានលទ្ធផលផ្លែផ្កា ដើម្បីផលប្រយោជន៍យូរអង្វែងរបស់ប្រទេសទាំងពីរ ។

គួរបញ្ជាក់ថា ថៃបង្កើនទំនាក់ទំនងជិតស្និទ្ធជាមួយចិនលើគ្រប់វិស័យនេះ ស្របពេលអាមេរិកផ្អាកការចរចាពន្ធទំនិញជាមួយថៃ រហូតដល់ថៃអនុវត្តឱ្យបានពេញលេញតាមកិច្ចព្រមព្រៀងសន្តិភាពជាមួយកម្ពុជា ដែលបានចុះហត្ថលេខារួមគ្នានៅទីក្រុងគូឡាឡាំពួរ ប្រទេសម៉ាឡេស៊ី ។ លោកប្រធានាធិបតី Trump ជំរុញឱ្យរដ្ឋាភិបាលថៃងាកមកគោរពកិច្ចព្រមព្រៀងសន្តិភាពឡើងវិញ បញ្ឈប់ការឈ្លានពានកម្ពុជា ក្រោយពីនាយករដ្ឋមន្ត្រីថៃបញ្ចប់កិច្ចព្រមព្រៀងសន្តិភាពដោយចោទប្រកាន់កម្ពុជាបង្កប់មីនថ្មី និងទាមទារឱ្យកម្ពុជាសូមទោស ទាំងដែលកម្ពុជាពុំបានបង្កប់មីនថ្មីដូចការចោទប្រកាន់ឡើយ ។

អ្នកវិភាគថៃមើលឃើញថា ព្រះមហាក្សត្រ និងរដ្ឋាភិបាលថៃបានយកចិនជាខ្នងបង្អែកតាមរយៈការបង្កើនទំនាក់ទំនងជិតស្និទ្ធជាមួយចិន ខណៈចិនចាត់ទុកថៃជាបងប្អូន ។ ការបង្កើនទំនាក់ទំនងជិតស្និទ្ធរវាងប្រទេសទាំងពីរ ក្រោយពីថៃមើលឃើញមេដឹកនាំអាមេរិកមានជំហរគាំទ្រកម្ពុជា និងជំរុញសន្តិភាពកម្ពុជា-ថៃ ៕

ប្រទេសថៃ ៖ កាលពីថ្ងៃទី១៧ ខែវិច្ឆិកា ឆ្នាំ២០២៥ អ្នកលេងបណ្តាញសង្គមថៃបានរិះគ.ន់ខ្លាំងៗទៅបុរសថៃម្នាក់ជា Influencer បង្ហាញអាកប្បកិរិយាមិនសមរម្យនៅប្រទេសជប៉ុន គឺរាំដោះអាវលើដំបូលរថយន្តមុខហាងលក់ទំនិញនៅភ្នំភ្លើងហ្វូជិ ដែលធ្វើឱ្យស្អុយកេរ្តិ៍ឈ្មោះដល់ប្រទេសថៃ និងពលរដ្ឋថៃ ។ ក្រោយពីអ្នកលេងបណ្តាញសង្គមថៃសំណូមពរឱ្យជប៉ុនហាមឃាត់ Influencer រូបនេះកុំឱ្យជាន់ទឹកដីជប៉ុនបន្តទៀត និងឱ្យមន្ត្រីថៃពាក់ព័ន្ធចាត់វិធានការជាបន្ទាន់ រដ្ឋមន្ត្រីក្រសួងទេសចរណ៍ថៃបានដាស់ឱ្យ Influencer គោរពវប្បធម៌ និងច្បាប់ជប៉ុន ។

តាមការចុះផ្សាយរបស់សារព័ត៌មាន Khaosod នៅថ្ងៃទី១៨ ខែវិច្ឆិកា រដ្ឋមន្ត្រីក្រសួងទេសចរណ៍ថៃ លោក Atthakorn Sirilatthayakorn បាននិយាយពី Influencer ថៃបង្ហោះវីដេអូរាំដោះអាវមុខហាងលក់ទំនិញឈ្មោះ «LAWSON» នៅភ្នំភ្លើងហ្វូជិ ជាតំបន់ទេសចរណ៍ដ៏ល្បីល្បាញរបស់ជប៉ុនថា ទង្វើនេះមិនសមរម្យយ៉ាងខ្លាំង ប៉ះពាល់ដល់មាត់មុខប្រទេសថៃ និងសំណូមពរឱ្យ Influencer គោរពវប្បធម៌ជប៉ុន ។

កាលពីព្រឹកថ្ងៃទី១៨ ខែវិច្ឆិកា នៅវិមានរដ្ឋាភិបាលថៃ រដ្ឋមន្ត្រីក្រសួងទេសចរណ៍ និងកីឡា លោក Atthakorn និយាយថា Influencer ថៃល្បីល្បាញម្នាក់ឈ្មោះ «Jaturong Papho» បានបង្ហោះវីដេអូដោះអាវរាំមុខហាងលក់ទំនិញ «LAWSON» ខាងមុខភ្នំដ៏ស្រស់ស្អាតនៅខេត្តយ៉ាម៉ាណាឈិ ប្រទេសជប៉ុន ។ ទង្វើនេះប៉ះពាល់ដល់កេរ្តិ៍ឈ្មោះភ្ញៀវទេសចរថៃផ្សេងទៀតដែលទៅលេងប្រទេសជប៉ុន ។

រដ្ឋមន្ត្រីក្រសួងទេសចរណ៍ថៃបន្តថា ពុំអាចហាមឃាត់កុំឱ្យ Influencer ថៃប្រព្រឹត្តទង្វើឥតអៀនខ្មាស់បែបនេះនៅក្រៅប្រទេសទេ ពីព្រោះវាជាសិទ្ធិ ប៉ុន្តែកន្លងមក ក្រសួងទេសចរណ៍ថៃព្យាយាមអំពាវនាវទៅកាន់ជនជាតិថៃដែលធ្វើដំណើរទៅក្រៅប្រទេស សូមកុំធ្វើអ្វីផ្ទុយនឹងវប្បធម៌ ឬច្បាប់ប្រទេសនោះដាច់ខាត ពីព្រោះវានឹងប៉ះពាល់ដល់កិត្តិយសប្រទេសថៃទាំងមូល ។

ជនជាតិថៃទៅកម្សន្តនៅក្រៅប្រទេស មិនត្រូវប្រព្រឹត្តទង្វើមិនសមរម្យ និងជួយគ្នាទប់ស្កាត់ ពីព្រោះគ្រប់ទង្វើអវិជ្ជមាននឹងប៉ះពាល់ដល់មុខមាត់ប្រទេសថៃ ហើយក្រសួងទេសចរណ៍បានព្យាយាមបកស្រាយប្រាប់ប្រទេសនានា រួមទាំងជប៉ុន កុំឱ្យវាយតម្លៃដល់ពលរដ្ឋថៃផ្សេងទៀត ។ បើអាចធ្វើបាន គឺចង់ឱ្យជនជាតិថៃដើរលេងក្នុងប្រទេសរបស់ខ្លួនប៉ុណ្ណោះ ។ នេះបើតាមការលើកឡើងរបស់រដ្ឋមន្ត្រីក្រសួងទេសចរណ៍ថៃ ។

គួរបញ្ជាក់ថា វីដេអូរបស់ Influencer ថៃត្រូវបានសារព័ត៌មានថៃផ្សព្វផ្សាយ និងចែកចាយយ៉ាងច្រើនក្នុងបណ្តាញសង្គម រហូតដល់ផ្ទុះការរិះគន់ពីទង្វើមិនសមរម្យនៅទីសាធារណៈ បង្ហាញពីការមិនគោរពវប្បធម៌បរទេស ខណៈ Influencer រូបនេះសរសេរសារថា «ទោះជាមានអ្នកមើលងាយខ្លួនក៏ដោយ ក៏មិនចាប់អារម្មណ៍ដែរ» ។ រីឯសារព័ត៌មានជប៉ុនបានចុះផ្សាយព័ត៌មាននេះ ដោយសរសេរចំណងជើងថា «Youtuber ថៃបង្កភាពរញ៉េរញ៉ៃនៅជប៉ុន ដោយរាំដោះអាវលើដំបូលរថយន្តមុខហាងលក់ទំនិញនៅភ្នំភ្លើងហ្វូជិ នេះជាការអាម៉ាស់របស់ប្រទេសថៃ» ៕