ប្រទេសសំប៊ី ៖ ចិនបានឆ្លើយតបទៅកាន់អាមេរិកវិញថា ឱ្យដោះស្រាយបញ្ហាបំណុលរបស់ខ្លួនសិន បន្ទាប់ពីរដ្ឋមន្ត្រីហិរញ្ញវត្ថុអាមេរិករិះគន់ចិនពីបញ្ហាបំណុលរបស់ប្រទេសកំពុងអភិវឌ្ឍន៍ ។ វាបានក្លាយជាបញ្ហាមួយទៀត នៅពេលស្ថានទូតចិនប្រចាំទីក្រុងលូសាកា ប្រទេសសំប៊ី បានឆ្លើយតបទៅកាន់រដ្ឋមន្ត្រីក្រសួងហិរញ្ញវត្ថុអាមេរិក លោកស្រី Janet Yellen ខណៈលោកស្រីនិយាយប៉ះពាល់ប្រទេសចិនថា ឱ្យរៀបចំគម្រោងបំណុលប្រាក់កម្ចីរបស់ប្រទេសសំប៊ីឱ្យបានរហ័ស ។ លោកស្រីយល់ឃើញថា ប្រាក់កម្ចីរបស់ចិន គឺជាឧបសគ្គក្នុងការគ្រប់គ្រងបំណុលសាធារណៈរបស់ប្រទេសក្នុងទ្វីបអាហ្វ្រិក ។

ក្នុងអំឡុងពេលធ្វើដំណើរទស្សនកិច្ចទៅកាន់ទីក្រុងលូសាកា ប្រទេសសំប៊ី លោកស្រី Yellen ថ្លែងថា នឹងទទួលបានការពន្លឿនពីចិន អំពីកិច្ចព្រមព្រៀងដែលប្រើពេលវេលាយូរពេកក្នុងការដោះស្រាយ ។ វាជាឧបសគ្គធ្វើឱ្យបណ្តាប្រទេសនៅទ្វីបអាហ្វ្រិកពិបាករួចផុតពីអន្ទាក់បំណុលរបស់ចិន ។ លោកស្រីថ្លែងថា ៖ «ខ្ញុំដឹងថា ចិនជាឧបសគ្គក្នុងកិច្ចចរចារវាងសហរដ្ឋអាមេរិក និងសំប៊ី ជាពិសេស ការស្នើរួមសហការជាមួយចិនដើម្បីទូទាត់បំណុលឱ្យបានឆាប់» ។

មិនយូរប៉ុន្មានបន្ទាប់ពីរដ្ឋមន្ត្រីហិរញ្ញវត្ថុអាមេរិករិះគន់ចិន ស្ថានទូតចិនប្រចាំទីក្រុងលូសាកា ក៏បានឆ្លើយតបទៅវិញថា ក្រសួងហិរញ្ញវត្ថុអាមេរិកចាត់វិធានការពិសេសដើម្បីសងសំណុល ក្រោយពីការខ្ចីប្រាក់របស់រដ្ឋាភិបាលអាមេរិកជិតពេញ ។ ចំណុចសំខាន់បំផុតដែលអាមេរិកអាចដោះស្រាយបញ្ហាបំណុលក្រៅប្រទេសបាន គឺទទួលខុសត្រូវគោលនយោបាយរូបិយវត្ថុ ដោះស្រាយបំណុលរបស់ខ្លួនឯងជាមុនសិន និងឈប់បំផ្លាញការព្យាយាមរបស់ប្រទេសផ្សេងៗក្នុងការដោះស្រាយបំណុល ។

ការរិះគន់គ្នាទៅវិញទៅមកនេះ កើតឡើងមុនពេលលោក Anthony Blinken រដ្ឋមន្ត្រីក្រសួងការបរទេសអាមេរិក នឹងធ្វើដំណើរទស្សនកិច្ចទៅកាន់ប្រទេសចិននៅថ្ងៃទី៥-៦ ខែកុម្ភៈ ខាងមុខនេះ ដោយសង្ឃឹមថា ប្រទេសចិន និងអាមេរិក នឹងស្តារទំនាក់ទំនងទ្វេភាគីឡើងវិញ ជាពិសេស ទំនាក់ទំនងផ្នែកនយោបាយ និងសេដ្ឋកិច្ច ៕

ប្រភព ៖ The Better

រដ្ឋធានីវ៉ាស៊ីនតោន៖ ស្របពេលអ៊ុយក្រែន កំពុងតែធ្វើសង្គ្រាម ប្រឆាំងនឹងការឈ្លានពានរបស់រុស្ស៊ី នៅលើទឹកដីរបស់ខ្លួននោះ មេដឹកនាំ នៃប្រទេសដែលកំពុងតែហែកហួរ ដោយសារសង្គ្រាមមួយនេះ ក៏កំពុងតែប្រយុទ្ធ ប្រឆាំងនឹងអំពីពុករលួយបន្ថែមទៀត រហូតធ្វើមហាអំណាចកំពូលរបស់បស្ចិមលោក បានកោតសរសើរយ៉ាងខ្លាំង ជាមួយនឹងការអះអាង អំពីការផ្ដល់ជំនួយបន្ដទៀត។

សារព័ត៌មាន US News បានចេញផ្សាយ កាលពីព្រឹក ថ្ងៃពុធ ទី២៥ ខែមករា ថា សមាជិកសភារបស់សហរដ្ឋអាមេរិក មកពីគណបក្សប្រជាធិបតេយ្យ និង សាធារណរដ្ឋ កាលពីថ្ងៃអង្គារ បានកោតសរសើរ ដល់រដ្ឋាភិបាលអ៊ុយក្រែន សម្រាប់ការចាត់វិធានការយ៉ាងឆាប់រហ័ស ប្រឆាំងនឹងអំពើពុករលួយ។ ជាមួយគ្នានេះ តំណាងរាស្រ្ដទាំង២គណបក្សរបស់ប្រទេសមហាអំណាចកំពូលនៅលើលោកមួយនេះ ថែមទាំងបានអះអាង ថា ជំនួយយោធា និង មនុស្សធម៌របស់សហរដ្ឋអាមេរិក គួរតែបន្ដ ជួយដល់រដ្ឋាភិបាលរបស់ប្រធានាធិបតី លោក វ៉ូឡូឌីមៀរ ហ្សេឡែនស្គី (Volodymyr Zelenskiy) បន្ថែមទៀត។

ការកោតសរសើររបស់សមាជិកព្រឹទ្ធសភារបស់សហរដ្ឋអាមរិក បានកើតឡើង ស្របគ្នានឹងក្រុមមន្រ្ដីជាន់ខ្ពស់របស់អ៊ុយក្រែន មួយចំនួន ត្រូវបានបណ្តេញ ចេញពីមុខតំណែង កាលពីថ្ងៃអង្គារ ។ នេះជាការរង្គោះរង្គើខាងនយោបាយដ៏ធំបំផុតមួយ នៅក្នុងប្រទេសអ៊ុយក្រែន ក្រោយពេលរដ្ឋាភិបាលក្រុងកៀវ បានអះអាង ថា លោកប្រធានាធិបតី ហ្សេឡែនស្គី កំពុងតែធ្វើសកម្មភាព ស៊ីសង្វាក់គ្នាជាមួយសាធារណជនរបស់គាត់ បន្ទាប់ពីមានការចោទប្រកាន់ អំពីអំពើពុករលួយ។

លោក លីនសេ ហ្ក្រាហាម (Lindsey Graham) សមាជិកព្រឹទ្ធសភា មកពីគណបក្សសាធារណរដ្ឋ បានថ្លែងទៅកាន់សន្និសីទសារព័ត៌មាន ក្រោយការវិលត្រឡប់ មកពីរដ្ឋធានីក្រុងកៀវ ត្រឹមតែរយៈពេល១ថ្ងៃ ថា «នេះជាពេលវេលាកំណត់ សម្រាប់អ៊ុយក្រែន ហើយក៏ជាពេលវេលាកំណត់ សម្រាប់យើងទាំងអស់គ្នា ដូចជា អាល្លឺម៉ង់ សហរដ្ឋអាមេរិក សម្ពន្ធមិត្តរបស់យើង។ យើងរំពឹង ថា លោកប្រធានាធិបតី ហ្សេឡែនស្គី នឹងធ្វើតាមការសន្យា ដែលគាត់បានប្ដេជ្ញា ថា អ៊ុយក្រែន នឹងលុបបំបាត់អំពើពុករលួយ»។

សមាជិកព្រឹទ្ធសភារបស់សហរដ្ឋអាមេរិក រូបនេះ បានបញ្ជាក់ ថា «យើងមានទំនុកចិត្តលើបញ្ហានេះ ហើយវាជាការបោះជំហាន ជាលើកដំបូង នៅក្នុងដំណើរដ៏វែងឆ្ងាយ សម្រាប់ការផ្លាស់ប្ដូរ អំពីរបៀបធ្វើការ»។

លោក រីឆាដ ប្លូមែនថល (Richard Blumenthal) សមាជិកព្រឹទ្ធសភា មកពីគណបក្សប្រជាធិបតេយ្យ ដែលរួមដំណើរជាមួយដែរនោះ បានបញ្ជាក់ ថា ការបណ្ដេញមន្រ្ដីជាន់ខ្ពស់ ប្រព្រឹត្ដអំពើពុករលួយ ពិតជាមានសារៈសំខាន់ខ្លាំងណាស់។ នេះជាការបង្ហាញ អំពីអ្វីដែលលោកប្រធានាធិបតី ហ្សេឡែនស្គី បានប្រាប់ពួកយើង ថា នឹងមិនមានការអត់ធ្មត់ ចំពោះការក្លែងបន្លំ ឬ ការកិបកេងខ្ជះខ្ជាយនោះឡើយ។ ប៉ុន្ដែសកម្មភាពពុករលួយទាំងនោះ មិនបានបង្ហាញ ថា គ្រឿងយុទ្ធភណ្ឌរបស់សហរដ្ឋអាមេរិក មានការជាប់ព័ន្ធនឹងអំពើពុករលួយនោះឡើយ»។

សមាជិកព្រឹទ្ធសភា រូបនេះ បានបញ្ជាក់ ថា «រហូតមកដល់ពេលនេះ រាល់ការត្រួតពិនិត្យ និង ការឆែកឆេរពិនិត្យមើល មិនបានបង្ហាញ អំពីការកេងបន្លំ ឬ ការខ្ជះខ្ជាយ ហើយក៏គ្មានការកេងបន្លំនូវជំនួយយោធា ឬ ជំនួយមនុស្សធម៌របស់សហរដ្ឋអាមេរិក ដែលត្រូវបានផ្តល់ឲ្យនោះដែរ»។

លោក សែលដុន វ៉ាយហាវ (Sheldon Whitehouse) សមាជិកព្រឹទ្ធសភា មកពីគណបក្សប្រជាធិបតេយ្យ ដែលរួមដំណើរទៅកាន់ទីក្រុងកៀវ បានកោតសរសើរ ដល់កងទ័ពអ៊ុយក្រែន ចំបោះការតាមដានគ្រឿងសឹក ត្រូវបានផ្គត់ផ្គង់ ដោយសារសហរដ្ឋអាមេរិក ព្រោះពួកគេដឹង ថា «យើងត្រូវការទំនុកចិត្ត នៅក្នុងសហរដ្ឋអាមេរិក»។

សមាជិកព្រឹទ្ធសភាទាំង៣រូបនេះ បានបញ្ជាក់ ថា ជំនួយរបស់សហរដ្ឋអាមេរិក នឹងបន្ដបញ្ជូន ទៅកាន់អ៊ុយក្រែន។ ជាមួយគ្នានេះ លោក ហ្ក្រាហាម បានសង្កត់ធ្ងន់ ថា «ខ្ញុំដឹង ថា យើងមានការនឿយណាយ នៅក្នុងការចូលរួមក្នុងជម្លោះ នៅខាងក្រៅប្រទេសរបស់យើង ប៉ុន្តែអ្វីៗទាំងអស់ ដែលយើងប្រកាន់ខ្ជាប់ និង ជាទីស្រឡាញ់ នៅក្នុងនាមប្រទេសមួយ មានការជាប់ពាក់ព័ន្ធ»។

លោក ប៉ាវឡូ ខាលីម៉ុន (Pavlo Khalimon) សមាជិកសភារបស់អ៊ុយក្រែន នឹងត្រូវបណ្តេញចេញពីគណបក្សរបស់លោកប្រធានាធិបតី ហ្សេឡែនស្គី ដោយសារតែមានការជាប់ពាក់ព័ន្ធនឹងការចោទប្រកាន់ អំពីការប៉ុនប៉ងលាក់បាំងនូវការទិញវិឡាដ៏ទំនើបមួយកន្លែង នៅក្នុងរដ្ឋធានីកៀវ។ បើតាមការស៊ើបអង្កេតរបស់កាសែត Ukrainska Pravda (អ៊ុយក្រែនស្កា ប្រាវដា) បានបង្ហាញ ថា លោក Pavlo Khalimon បានទិញវិមានដ៏ប្រណីតមួយកន្លែង នៅកណ្តាលទីក្រុងកៀវ កាលពីរដូវក្តៅ ឆ្នាំ២០២២ ដោយបានដាក់ឈ្មោះមនុស្សផ្សេង។

ទោះជាយ៉ាងណា រហូតមកដល់ពេលនេះ ក្រុមមន្ត្រីជាន់ខ្ពស់ជាច្រើននាក់របស់អ៊ុយក្រែន បានប្រកាស អំពីការលាលែងមុខតំណែងរបស់ពួកគេ កាលពីថ្ងៃអង្គារ ចំពេលលោកប្រធានាធិបតី ហ្សេឡែនស្គី បានអះអាង ថា នឹងមានការផ្លាស់ប្តូរមន្រ្ដីមួយចំនួន នៅក្នុងរដ្ឋាភិបាលរបស់គាត់។ ស្របគ្នានេះដែរ លោក វៀចេស្លាវ សាប៉ូវ៉ាឡូវ (Viacheslav Shapovalov) អនុរដ្ឋមន្ត្រីក្រសួងការពារជាតិ ទទួលបន្ទុកផ្នែកភស្តុភារ សម្រាប់កងទ័ពអ៊ុយក្រែន ក៏បានលាលែងមុខតំណែងរបស់គាត់ ពាក់ព័ន្ធនឹងការចោទប្រកាន់ ជុំវិញរឿងអាស្រូវផ្គត់ផ្គង់ស្បៀង ប៉ុន្ដែគាត់បានបដិសេធ។

លោក អូឡែកស៊ី ស៊ីម៉ូណែនកូ (Oleksiy Symonenko) អគ្គរដ្ឋអាជ្ញារង និង លោក គីរីឡូ ទីម៉ូសែនកូ (Kyrylo Tymoshenko) អនុប្រធានខុទ្ទកាល័យរបស់លោកប្រធានាធិបតី ហ្សេឡែនស្គី ក៏បានប្រកាសលាលែង ពីតំណែង ដោយមិនបានប្រាប់ អំពីហេតុផល សម្រាប់ការចាកចេញរបស់ពួកគេ៕

អង្គការសុខភាពពិភពលោក (WHO) បានអំពាវនាវក្នុងអំឡុងពេលសន្និសីទសារព័ត៌មានកាលពីថ្ងៃទី២៣ ខែមករា កន្លងមកថា ត្រូវការឱ្យបណ្តាប្រទេសជាសមាជិកចំនួន១៩៤ប្រទេសចាត់វិធានការការពារកុមារពីការញ៉ាំស៊ីរ៉ូក្អក ដែលផ្សំបញ្ចូលគ្នាជាមួយសារធាតុគីមី ។ WHO បានស្នើឱ្យប្រទេសទាំងនេះជំរុញការត្រួតពិនិត្យរកមូលហេតុដែលធ្វើឱ្យកុមារស្លាប់ ព្រមទាំងឱ្យប្រទេសសមាជិកធ្វើការសាកល្បងលើផលិតផលឱសថ ដែលចែកចាយនៅក្នុងទីផ្សារជាប្រចាំផងដែរ ។

អង្គការសុខភាពពិភពលោកបង្ហាញថា បច្ចុប្បន្ននេះ មានកុមារស្លាប់បាត់បង់ជីវិតដោយសារញ៉ាំស៊ីរ៉ូក្អក ដែលផ្សំជាមួយសារធាតុគីមីដល់ជាង៣០០នាក់ឯណោះទូទាំងពិភពលោក ដូចជា នៅប្រទេសហ្គាំប៊ី ឥណ្ឌូណេស៊ី និងអ៊ូសបេគីស្ថាន ។ ក្មេងភាគច្រើនដែលស្លាប់នោះមានអាយុតិចជាង៥ឆ្នាំ គឺពួកគេស្លាប់ដោយសារមានបញ្ហាតម្រង់នោម ខណៈសារធាតុគីមីដែលផ្សំក្នុងស៊ីរ៉ូក្អកនេះមានកម្រិតខ្ពស់ ដូច្នេះ ធ្វើឱ្យក្មេងស្លាប់បាន បើទោះជាពួកគេញ៉ាំក្នុងបរិមាណតិចតួចក្តី ។

លើសពីនេះ ប្រទេសហ្វីលីពីន ទីម័រខាងកើត សេណាហ្គាល់ និងកម្ពុជាយើង ក៏អាចរងផលប៉ះពាល់ដោយស៊ីរ៉ូក្អកដែលផ្សំបញ្ចូលជាមួយសារធាតុគីមីនេះផងដែរ ខណៈមានការចែកចាយស៊ីរ៉ូក្អកនៅក្នុងប្រទេស ។

ទោះជាយ៉ាងណា បណ្តាក្រុមហ៊ុនដែលពាក់ព័ន្ធនឹងស៊ីរ៉ូក្អកនេះ បានបដិសេធមិនធ្វើអត្ថាធិប្បាយពីមូលហេតុដែលបណ្តាលឱ្យក្មេងស្លាប់ទេ ៕

ប្រភព ៖ Mono News

ប្រទេសជប៉ុន ៖ ភ្នាក់ងារសារព័ត៌មានស៊ីនហួរបានរាយការណ៍កាលពីថ្ងៃទី២៣ ខែមករាថា ក្រុមហ៊ុន Tokyo Electric Power Company (TEPCO) របស់ជប៉ុននឹងស្នើសុំការអនុម័តទៅកាន់រដ្ឋាភិបាល ដើម្បីដំឡើងថ្លៃអគ្គិសនីសម្រាប់លំនៅឋានប្រមាណជា៣០% ចាប់តាំងពីខែមិថុនាតទៅ ដើម្បីដោះស្រាយជាមួយតម្លៃថាមពលកើនឡើងខ្លាំង និងប្រាក់យ៉េនជប៉ុនកំពុងតែធ្លាក់ថ្លៃ ។

ការស្នើសុំដំឡើងថ្លៃអគ្គិសនីលើកនេះបង្ហាញឱ្យឃើញថា ដំណើរការអាជីវកម្មកាន់តែយ៉ាប់យឺនដោយសារតម្លៃប្រេងឥន្ធនៈហ្វូស៊ីលឡើងថ្លៃ ដូចជា ឧស្ម័នធម្មជាតិរាវ (LNG) និងធ្យូងថ្មក្តៅសម្រាប់ផលិតអគ្គិសនី ។ កាលពីមុននេះ ក្រុមហ៊ុនថាមពលធំៗចំនួន៥ ក៏បានស្នើសុំការអនុម័តពីរដ្ឋាភិបាលផងដែរ ដើម្បីដំឡើងថ្លៃអគ្គិសនីចន្លោះពី២៨% ទៅ៤៦% តាំងពីខែមេសា កន្លងមក ។ ក្រសួងឧស្សាហកម្មជប៉ុននឹងត្រួតពិនិត្យឱ្យបានលម្អិតលើវិធានការកាត់បន្ថយថ្លៃដើមរបស់ក្រុមហ៊ុន និងសម្រេចចិត្តអំពីការដំឡើងថ្លៃអគ្គិសនីពិតប្រាកដ ។

លោក តូម៉ូគី កូបាយ៉ាហ្គាវ៉ា (Tomoaki Kobayagawa) ប្រធានក្រុមហ៊ុន TEPCO ឱ្យដឹងថា ក្រុមហ៊ុននឹងប្រឈមជាមួយបញ្ហាការស្វែងរកអគ្គិសនីដែលមានស្ថេរភាព បើលោកបណ្តោយឱ្យស្ថានការណ៍ក្លាយជាបែបនេះបន្តទៀត ។ លោកថ្លែងថា ៖ «ក្រុមហ៊ុនមិនត្រូវការដាក់បន្ទុកលើអតិថិជនទេ ប៉ុន្តែយើងត្រូវតែសម្រេចចិត្តក្នុងស្ថានភាពលំបាកនេះ» ។

គួរបញ្ជាក់ថា វាគឺជាលើកដំបូងហើយដែលក្រុមហ៊ុនបានប្រកាសដំឡើងថ្លៃអគ្គិសនីចាប់តាំងពីឆ្នាំ២០១២មក បន្ទាប់ពីប្រទេសជប៉ុនជួបគ្រោះមហន្តរាយនុយក្លេអ៊ែរហ្វុកុសិមៈ (Fukushima) នៅឆ្នាំ២០១១ ៕

ប្រភព ៖ TNN World

រដ្ឋធានីប៊ែរឡាំង៖ ក្រោយការពិភាក្សាដេញដោលដ៏ចម្រូងចម្រាស អស់រយៈពេលជាច្រើនខែ កន្លងមក អំពីបញ្ហាសន្ដិសុខផ្ទាល់ខ្លួន នៅក្នុងប្រទេសអាល្លឺម៉ង់ គួបផ្សំជាមួយនឹងសម្ពាធកាន់តែធ្ងន់ មកពីសម្ពន្ធមិត្តផងនោះ នៅទីបំផុត មេដឹកនាំក្រុងប៊ែរឡាំង បានសម្រេចជាផ្លូវការ អនុញ្ញាតដល់ប្រទេសប៉ូឡូញ និង ប្រទេសផ្សេងៗទៀត បញ្ជូនរថក្រោះ Leopard 2 រាប់សិបគ្រឿង នាំទៅជួយដល់កងទ័ពការពារទឹកដីរបស់អ៊ុយក្រែន ដែលកំពុងតែធ្វើសង្គ្រាម ទប់ទល់ ប្រឆាំងនឹងការឈ្លានពានរបស់រុស្ស៊ី ដើម្បីការពារទឹកដី និង សេរីភាពរបស់ពួកគេ។

គេហទំព័ររបស់ទូរទស្សន៍សហរដ្ឋអាមេរិក CNN បានចេញផ្សាយ កាលពីព្រឹក ថ្ងៃពុធ ទី២៥ ខែមករា ថា សារព័ត៌មានរបស់អាល្លឺម៉ង់ Der Spiegel បានរាយការណ៍ កាលពីល្ងាច ថ្ងៃអង្គារ ដោយដកស្រង់ប្រភពជាច្រើន សុំមិនបញ្ចេញអត្តសញ្ញាណ ថា រដ្ឋាភិបាលក្រុងប៊ែរឡាំង គ្រោងនឹងបញ្ជូនរថក្រោះ Leopard 2 ជាច្រើនគ្រឿង ទៅកាន់ប្រទេសអ៊ុយក្រែន ដើម្បីជួយជំរុញដល់កិច្ចខិតខំប្រឹងប្រែង ធ្វើសង្គ្រាមរបស់ប្រទេសអឺរ៉ុបខាងកើតមួយនេះ ទប់ទល់នឹងការឈ្លានពានរបស់ក្រុងមូស្គូ។ លោក អូឡាហ្វ សូលហ្ស៍ (Olaf Scholz) អធិការបតីអាល្លឺម៉ង់ បានសម្រេចផ្ដល់សិទ្ធិ នាំចេញរថក្រោះដ៏ទំនើបរបស់ខ្លួន ទៅកាន់ប្រទេសដែលកំពុងតែហែកហួរ ដោយសារសង្គ្រាមមួយនេះ ក្រោយមានការពិភាក្សាដេញដោលគ្នា អស់រយៈពេលជាច្រើនខែកន្លងមក។

ជាមួយគ្នានេះដែរ សភារបស់អាល្លឺម៉ង់ គ្រោងនឹងពិភាក្សាគ្នា លើបញ្ហាដ៏ចម្រូងចម្រាសនេះ នៅព្រឹក ថ្ងៃពុធ។ ការសម្រេចចិត្តបញ្ជូនរថក្រោះ Leopard 2 រាប់សិបគ្រឿងនេះ នឹងក្លាយជាពេលវេលាដ៏សំខាន់មួយ នៅក្នុងកិច្ចគាំទ្ររបស់លោកខាងលិច សម្រាប់រដ្ឋាភិបាលក្រុងកៀវ (Kyiv) ក្រោយពេលក្រុងប៊ែរឡាំង បានរងសម្ពាធយ៉ាងខ្លាំង ពីប្រទេសជាដៃគូ នៅក្នុងសម្ពន្ធមិត្តយោធារបស់អង្គការសន្ធិសញ្ញាអាត្លង់ទិកខាងជើង ហៅកាត់ ណាតូ ឬ អូតង់។

ការសម្រេចចិត្តរបស់ក្រុងប៊ែរឡាំង បានកើតឡើងភ្លាមៗ ក្រោយពេលក្រុមមន្រ្ដីរបស់សហរដ្ឋអាមេរិក កាលពីថ្ងៃអង្គារ បានបង្ហាញ ថា រដ្ឋបាលរបស់ប្រធានាធិបតី លោក ចូ បៃដិន (Joe Biden) កំពុងតែបញ្ចប់នូវផែនការបញ្ជូនរថក្រោះ ផលិតដោយសហរដ្ឋអាមេរិក នាំទៅកាន់អ៊ុយក្រែន។ អាល្លឺម៉ង់ បានចង្អុលបង្ហាញ ទៅកាន់សហរដ្ឋអាមេរិក កាលពីសប្តាហ៍មុន ថា ក្រុងប៊ែរឡាំង នឹងបញ្ជូនរថក្រោះ Leopard របស់ខ្លួន ទៅកាន់ប្រទេសអ៊ុយក្រែន លុះត្រាតែក្រុងវ៉ាស៊ីនតោន យល់ព្រម បញ្ជូនរថក្រោះ M1 Abrams ផលិតនៅសហរដ្ឋអាមេរិក ទៅជួយដល់ក្រុងកៀវ ដែរ។

ការបញ្ជូនរថក្រោះ Leopard 2 ទៅកាន់អ៊ុយក្រែន នឹងផ្តល់ឱ្យកងទ័ពការពារទឹកដីរបស់ក្រុងកៀវ ជាមួយនឹងរថចម្បាំងដ៏ទំនើបៗ និង មានឥទ្ធិពលដ៏ខ្លាំងក្លា នៅមុនការវាយលុកដ៏មានសក្តានុពល នានិទាឃរដូវ ពីកម្លាំងទាហានរុស្ស៊ី។ សកម្មភាពបែបនេះ នឹងកើតឡើង ស្របពេលវិមានក្រឹមឡាំង កំពុងតែបង្កើនយុទ្ធនាការ វាយប្រហារទៅលើកងទ័ពអ៊ុយក្រែន ជាមួយនឹងប្រព័ន្ធប្រយុទ្ធបច្ចេកវិទ្យាជាន់ខ្ពស់ ខណៈសង្រ្គាមរបស់រុស្ស៊ី បានខិតជិតដល់ រយៈពេលមួយឆ្នាំ។

អាល្លឺម៉ង់ បានទប់ទល់នឹងសម្ពាធ កាន់តែខ្លាំងឡើង ពីលោកខាងលិច នៅក្នុងការបញ្ជូនរថក្រោះមួយចំនួន ទៅកាន់ប្រទេសអ៊ុយក្រែន ដោយរដ្ឋមន្ត្រីការពារជាតិថ្មីរបស់អាល្លឺម៉ង់ លោក បូរីស ពីស្ដូរៀស (Boris Pistorius) បានអំពាវនាវម្តងហើយម្តងទៀត សម្រាប់ពេលវេលាបន្ថែមទៀត ហើយថែមទាំងលើកឡើង ថា ការផ្លាស់ប្តូរនេះ នឹងនាំមកជាមួយនឹងគុណសម្បត្តិ និង គុណវិបត្តិ សម្រាប់ក្រុងប៊ែរឡាំង ក៏ដូចជា ប្រជាជនអាល្លឺម៉ង់ ផងដែរ៕