អន្តរជាតិ៖ ការិយាល័យរបស់មន្ទីរប៉ង់តាហ្គោនថ្មី ដែលបង្កើតឡើងដើម្បីតាមដានរបាយការណ៍នៃវត្ថុហោះហើរដែលមិនស្គាល់អត្តសញ្ញាណ ឬ UFO បានរាយការណ៍ថា ខ្លួនបានទទួលរបាយការណ៍ថ្មីៗរាប់រយរហូតមកទល់ពេលនេះ នេះបើតាមថ្នាក់ដឹកនាំរបស់ទីភ្នាក់ងារបានឱ្យដឹងកាលពីថ្ងៃសុក្រ។ ការិយាល័យ All-domain Anomaly Resolution Office (AARO) ត្រូវបានបង្កើតកាលពីខែកក្កដា និងទទួលខុសត្រូវមិនត្រឹមតែ UFO នៅលើមេឃប៉ុណ្ណោះទេ ប៉ុន្តែនៅក្រោមទឹក ឬក្នុងលំហរ ក៏ដូចជា UFO ដែលបង្កើតដោយយោធា។ កន្លងមកអ្នកបើកបរយន្តហោះបានឃើញ UFO ជាច្រើន ប៉ុន្តែពួកគេមិនដែលបានរាយការណ៍ឱ្យបានច្រើននោះទេ ដោយសារខ្លាចថាគ្មានអ្នកជឿ ឬខ្មាសគេ ដែលជាហេតុនាំឱ្យមានការបង្កើតការិយាល័យមួយនេះ។

នៅខែមិថុនា ឆ្នាំ២០២១ លោក Sean Kirkpatrick មកពីការិយាល័យនាយកស៊ើបការណ៍ជាតិបានឱ្យដឹងថា ចន្លោះឆ្នាំ២០០៤ ដល់ឆ្នាំ២០២១ មានការជួបវត្ថុចម្លែកបែបនេះ ១៤៤ ករណី ដែល ៨០ ក្នុងចំណោមនោះ ត្រូវបានចាប់យកនៅលើឧបករណ៍ចាប់សញ្ញាច្រើនដង។ ម្យ៉ាងទៀត ក្រៅពីវត្តមានរបស់ UFO ពួកគេក៏មានការព្រួយបារម្ភពាក់ព័ន្ធនឹងបច្ចេកវិទ្យាទំនើបក្នុងវិស័យយោធា ដូចជា៖ យន្តហោះទម្លាក់គ្រាប់បែក យន្តហោះចម្បាំង ដ្រូនគ្មានមនុស្សបើក និងមីស៊ីលឿនជាងសំឡេង Hypersonic ដែលទាំងសហរដ្ឋអាមេរិក និងប្រទេសចិន កំពុងបង្កើនការផលិតដូចគ្នា ហើយវាអាចច្រឡំថាជា UFO ក៏ថាបាន។

លោក Kirkpatrick បាននិយាយថា ការិយាល័យ AARO បាននឹងកំពុងសម្របសម្រួលជាមួយមន្ទីរបញ្ចកោណ និងសហគមន៍ស៊ើបការណ៍សម្ងាត់អាមេរិក ដើម្បីទទួលបានបច្ចេកវិទ្យាខ្ពស់របស់សហរដ្ឋអាមេរិក ដើម្បីគ្រប់គ្រងយន្តហោះ ឬដ្រូនទាំងនោះ។ ជម្រាបដែរថា កាលពីខែឧសភានេះ សភាអាមេរិកក៏បានបើកសវនាការលើកដំបូងរបស់ខ្លួនក្នុងរយៈពេលជាងកន្លះសតវត្ស លើប្រធានបទទាំងអស់នេះ ស្របពេលឥទ្ធិពលរបស់រុស្ស៊ី និងចិន កាន់តែមានសន្ទុះឡើង ជាពិសេសការវាយលុករបស់រុស្ស៊ីនៅអ៊ុយក្រែន៕

រដ្ឋធានីកៀវ៖ ចាប់តាំងពីប្រធានាធិបតីរុស្ស៊ី បានបញ្ជាកងទ័ពរបស់ខ្លួន ឲ្យបើកទ្វារព្រំដែន ធ្វើសង្គ្រាមវាយលុក ចូលទៅក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ រហូតមកដល់ពេលនេះ ចក្រភពអង់គ្លេស ក្លាយជាប្រទេសបស្ចិមលោកនាំមុខគេមួយ បញ្ជូនគ្រឿងយុទ្ធោបករណ៍ ទៅជួយដល់ក្រុងកៀវ ហើយឥឡូវ ប្រទេសមហាអំណាចមួយនេះ បានសម្រេចចិត្ត បញ្ជូនមីស៊ីលនាំផ្លូវដ៏ទំនើបរបស់ខ្លួន ទៅជួយប្រទេសដែលកំពុងតែហែកហួរ ដោយសារសង្គ្រាមមួយនេះបន្ដទៀត។

ទីភ្នាក់ងារសារព័ត៌មាន Ukrinform បានចេញផ្សាយ កាលពីថ្ងៃអាទិត្យ ទី១៨ ខែធ្នូ ថា ចក្រភពអង់គ្លេស បានអះអាង អំពីការបញ្ជូនមីស៊ីលនាំផ្លូវ ប្រភេទ Brimstone 2 ទៅកាន់ប្រទេសអ៊ុយក្រែន ដែលជាផ្នែកមួយ នៃកញ្ចប់ជំនួយយោធារបស់ក្រុងឡុងដ៍។ក្រសួងការពាជាតិ ចក្រភពអង់គ្លេស បានសរសេរ នៅលើបណ្ដាញសង្គមធ្វីធើរ ថា ចក្រភពអង់គ្លេស បានសម្រេចផ្ដល់មីស៊ីល Brimstone 2 ដែលជាប្រភេទមីស៊ីលនាំផ្លូវជាក់លាក់មួយ បញ្ជូនទៅឲ្យកងទ័ពការពារទឹកដីរបស់អ៊ុយក្រែន ហើយនេះក៏ជាផ្នែកមួយ នៃកញ្ចប់ជំនួយសន្ដិសុខរបស់ក្រុងឡុងដ៍ ផងដែរ។ កញ្ចប់ជំនួយនេះ នឹងតួនាទីយ៉ាងសំខាន់ សម្រាប់ការបញ្ឈប់ល្បឿន វាយរុលទៅមុខ ពីកម្លាំងទាហានរុស្ស៊ី។

បើតាមសេចក្ដីរាយការណ៍ បានអះអាង ថា មីស៊ីល Brimstone 2 ចុងក្រោយបង្អស់របស់ចក្រភពអង់គ្លេស មានសមត្ថភាពខ្លាំងជាងមុនទ្វេដង ហើយត្រូវបានផ្តល់ ទៅឲ្យកងទ័ពការពារទឹកដីរបស់អ៊ុយក្រែន។ ប្រព័ន្ធមីស៊ីលប្រភេទនេះ អនុញ្ញាតឱ្យកាំជ្រួចស្កែន ទៅលើសមរភូមិ និង ជ្រើសរើស អំពីគោលដៅសមស្របបំផុត ខណៈកំពុងពិនិត្យលើយានស៊ីវិល ឬ ឧបករណ៍យោធាមិនសូវសំខាន់។

ចាប់តាំងពីក្រុងមូស្គូ បានប្រកាសធ្វើសង្គ្រាម ប្រឆាំងនឹងអ៊ុយក្រែន រហូតមកដល់ពេលនេះ ចក្រភពអង់គ្លេស បានផ្លាស់ប្ដូរនាយករដ្ឋមន្រ្ដី ចំនួន៣រូបរួចមកហើយ ប៉ុន្ដែប្រទេសមហាអំណាចបស្ចិមលោកមួយនេះ នៅតែប្រកាន់គោលជំហរ មិនងាកថយ នៅក្នុងការជួយដល់អ៊ុយក្រែន ដើម្បីការពារទឹកដី និង សេរីភាពរបស់ពួកគេ។ កាលពីនៅក្នុងឋានៈជានាយករដ្ឋមន្រ្ដី លោក បូរីស ចនសុន (Boris Johnson) បានទៅធ្វើដំណើរទៅជួយមេដឹកនាំអ៊ុយក្រែន ដល់រដ្ឋធានីកៀវ ចំនួន៣លើក ដើម្បីសិក្សា អំពីតម្រូវការចាំបាច់របស់ពួកគេ។ លើសពីនេះទៅទៀត សូម្បីតែជិតដល់ពេលគាត់ត្រូវដើរចេញ ពីតំណែងទៅហើយ ក៏លោក ចនសុន ថែមទាំងទៅជួយបង្ហាត់បង្រៀន ដល់កងទ័ពអ៊ុយក្រែន ដោយផ្ទាល់ទៀតផង។

ស្របគ្នានឹងសកម្មភាពរបស់លោក បូរីស ចនសុន នោះ លោក រីស៊ី ស៊ុនណាក់ (Rishi Sunak) នាយករដ្ឋមន្រ្ដីបច្ចុប្បន្នរបស់ចក្រភពអង់គ្លេស ក៏បានធ្វើដំណើរទៅជួយមេដឹកនាំរបស់អ៊ុយក្រែន ដល់រដ្ឋធានីកៀវ ដើម្បីប្រកាស អំពីគោលជំហររបស់ប្រទេសមហាអំណាចបស្ចិមលោកមួយនេះ សម្រាប់កិច្ចគាំទ្រ ជួយដល់ប្រជាជនអ៊ុយក្រែន។ ចក្រភពអង់គ្លេស នៅតែប្រកាន់ជំហរយ៉ាងម៉ឺងម៉ាត់ ជួយដល់អ៊ុយក្រែន រហូតទទួលបានជ័យជម្នះយ៉ាងពិតប្រាកដ៕

អន្តរជាតិ៖ ទីភ្នាក់ងារជនភៀសខ្លួនអង្គការសហប្រជាជាតិ UNHCR បាននិយាយនៅក្នុងសេចក្តីថ្លែងការណ៍រួមមួយ ថា លោកស្រី អែនជីលីណា ជូលី (Angelina Jolie) កំពុងផ្លាស់ប្តូរពីតួនាទីរបស់នាងជាបេសកជនពិសេសរបស់អង្គការសហប្រជាជាតិទទួលបន្ទុកជនភៀសខ្លួន ហើយនឹងចូលរួមលើបញ្ហាមនុស្សធម៌ និងសិទ្ធិមនុស្សយ៉ាងទូលំទូលាយ។​នេះបើយោងតាមការចុះផ្សាយរបស់សារព័ត៌មានCNNនៅថ្ងៃទី ១៨ ខែធ្នូ ឆ្នាំ២០២២។

លោកស្រី Jolie  ដែលបានធ្វើការជាមួយ UNHCR អស់រយៈពេលជាង ២ទសវត្សរ៍ និងត្រូវបានតែងតាំងជាបេសកជនពិសេសក្នុងឆ្នាំ២០១២ និយាយថានាងមានគម្រោងធ្វើការខុសគ្នា និងចូលរួមដោយផ្ទាល់ជាមួយជនភៀសខ្លួន និងអង្គការក្នុងស្រុក ក្នុងចំណោមកិច្ចខិតខំប្រឹងប្រែងផ្សេងទៀត។

លោកស្រី Jolie បាននិយាយនៅក្នុងសេចក្តីថ្លែងការណ៍ថា ខ្ញុំដឹងគុណចំពោះឯកសិទ្ធិ និងឱកាសដែលខ្ញុំត្រូវតែធ្វើការជាមួយមន្រ្តីផ្នែក UNHCR ឆ្នើម និងមានការលះបង់ជាច្រើននាក់ និងសហការីផ្សេងទៀតដែលកំពុងធ្វើការងារសង្គ្រោះជីវិតទូទាំងពិភពលោក និងដើម្បីបម្រើជាបេសកជនពិសេស។

​ចំណែកសេចក្តីថ្លែងការណ៍អង្គការបាននិយាយថា ក្នុងរយៈពេល ២១ឆ្នាំកន្លងមកនេះ លោកស្រី Jolie បានធ្វើការដោយមិនចេះនឿយហត់ ដោយបានបំពេញបេសកកម្មជាង៦០ ដើម្បីធ្វើជាសាក្សីចំពោះរឿងរ៉ាវនៃការរងទុក្ខ ជាមួយជនភៀសខ្លួន។

សេចក្តី​ថ្លែងការណ៍​បាន​បន្ថែម​ថា​ លោកស្រី Jolie នឹង​បន្ត​ធ្វើ​ការ​ដើម្បីកសាង​ប្រព័ន្ធ​អន្តរជាតិ​ដែល​ស្មើភាព យុត្តិធម៌ និង​រួម​បញ្ចូល​គ្នា​បន្ថែម​ទៀត​ ៕

បរទេស៖ អាងចិញ្ចឹមត្រីធំបំផុតលើពិភពលោកផ្ទុះឆេះនៅអាល្លឺម៉ង់ទឹកបានជន់លិចអគារសណ្ឋាគារ មនុស្ស រាប់ពាន់នាក់ស្លាប់ និង ២នាក់ទៀតរងរបួសដោយអំបែងកញ្ចក់។

នាថ្ងៃទី ១៧ ខែធ្នូ ឆ្នាំ២០២២ មានសារព័ត៌មាន AFP បានរាយការណ៍យ៉ាងដូច្នេះថា មានការផ្ទុះអាងកញ្ចក់ចិញ្ចឹមត្រីនៅសណ្ឋាគារ Radisson Blu ក្នុងទីក្រុងប៊ែកឡាំង នៃប្រទេសអាល្លឺម៉ង់ កាលពីវេលាម៉ោង ៥ និង ៥០ នាទីព្រឹក ថ្ងៃ សុក្រកន្លងទៅ។

ជាមួយគ្នានោះគេបានដឹងថាអាងចិញ្ចឹមត្រីដ៏ធំជាងគេលើពិភពលោកមួយនេះ មានទឹកមួយលានលីត្រ និងត្រីទាំងអស់នៅក្នុងអាងយក្សនេះប្រហែល ១,៥០០ក្បាល។

បន្ទាប់ពីផ្ទុះបែកវាបានបណ្ដាលឱ្យហូរហៀរទឹកពាសពេញអាគារសណ្ឋាគាររួមទាំងមានកម្ទេចថ្ម ខ្សាច់ និងប្រភេទត្រីកម្រជាច្រើន បានខ្ទាត់ខ្ចាយពាស់ពេញអាគាររហូតហៀរមកដល់ផ្លូវខាងក្រៅដែលបណ្ដាលឱ្យសត្វត្រីរាប់ពាន់ងាប់ពេញទាំងឥដ្ឋ បន្ថែមពីនោះក៏បានបង្កឱ្យមានអ្នករងរបួសពីអំបែងកញ្ចក់ចំនួន២នាក់ផងដែរ។

បន្ទាប់ពីហេតុការណ៍នេះ​កើតឡើងអាជ្ញាធរបានធ្វើការបិទផ្លូវសំខាន់ៗមួយចំនួន រួមទាំងសេវារថភ្លើងនៅក្បែរនោះក៏ត្រូវបានផ្អាកផងដែរ ហើយតំបន់ជុំវិញសណ្ឋាគារទាំងមូលត្រូវបានបិទ ហើយប៉ូលិសត្រូវប្រើសត្វឆ្កែ Sniffer ដើម្បីកំណត់ទីតាំងអ្នកដែលអាចនឹងជាប់នៅក្នុងចំណោមបំណែកត្រីរាប់ពាន់នោះ។

ជាមួយគ្នានោះផងដែរចំពោះមូលហេតុនៃការផ្ទុះអាងចិញ្ចឹមត្រី ស្ថិតក្នុងដំណើរការស៊ើបអង្កេតនៅឡើយ។

យ៉ាងណាមិញបើតាមគេហទំព័ររបស់សារមន្ទីរ The Aquadome បានបញ្ជាក់ថានេះគឺជាអាងចិញ្ចឹមត្រីរាងស៊ីឡាំងធំជាងគេបំផុតនៅលើពិភពលោក ដែលបានបើកសម្ពោធនៅឆ្នាំ២០០៤ ហើយអាងចិញ្ចឹមត្រីរាងស៊ីឡាំងដ៏ធំនេះ គឺជាការទាក់ទាញដ៏ពេញនិយមមួយនៅក្នុងទីក្រុងប៊ែកឡាំង រាជធានីនៃប្រទេសអាល្លឺម៉ង់ ជាមួយនឹងការរចនាមានជណ្ដើរកញ្ចក់មួយនៅខាងក្នុងដើម្បីឲ្យភ្ញៀវចូលទៅក្នុងអាងចិញ្ចឹមត្រី និងទស្សនាបានយ៉ាងច្បាស់៕ ប្រភព៖ Sanook

អន្តរជាតិ៖ រដ្ឋមន្ត្រីការពារជាតិអ៊ុយក្រែន លោក អូលិកស៊ី រ៉េនស្នីកូវ (Oleksii Reznikov) បាននិយាយថា ភស្តុតាងកំពុងកើនឡើងថា រុស្ស៊ី ដែលបានរងការខាតបង់ជាបន្តបន្ទាប់នៃសមរភូមិ គ្រោងនឹងបើកការវាយលុកថ្មីមួយនៅឆ្នាំ២០២៣។ លោកបានប៉ាន់ស្មានថា ការវាយលុយលើដីគោកអ៊ុយក្រែន អាចកើតឡើងនៅក្នុងខែកុម្ភៈ នៅពេលដែលពាក់កណ្តាលនៃកងទ័ព ៣០០,០០០នាក់ ដែលរុស្ស៊ីបានបញ្ចូលក្នុងខែតុលា ដើម្បីគាំទ្រសង្រ្គាមអ៊ុយក្រែន នឹងបញ្ចប់ការហ្វឹកហ្វឺនរបស់ពួកគេ។ បញ្ចប់ការហ្វឹកហាត់ នោះពួកទាហានរុស្ស៊ីថ្មីៗទាំងនោះ នឹងត្រូវបញ្ជូនទៅកាន់សមរភូមិប្រយុទ្ធ ដែលបើតាមមន្រ្តីជាន់ខ្ពស់អ៊ុយក្រែនបាននិយាយថា ការវាយលុកអាចកើតឡើងនៅតំបន់ ដន់បាស (Donbas) ភាគខាងកើត និងភាគខាងត្បូងប្រទេសអ៊ុយក្រែន ឬសូម្បីតែទីក្រុងគៀវផងដែរ។

ការព្រមានរបស់អ៊ុយក្រែនពីការលុកលុយរបស់រុស្ស៊ី ធ្វើឡើងក្រោយក្រុងមូស្គូបានច្រានចោលបទឈប់បាញ់ ក្នុងឱកាសបុណ្យណូអែលនៅចុងខែធ្នូនេះ និងគំរាមអ៊ុយក្រែនឱ្យយល់ព្រមចុះចាញ់ ដោយប្រគល់ដែនដីដែលបាត់បង់មកឱ្យរុស្ស៊ីតាមសម្រួល មុនមានវឌ្ឍនៈភាពកាន់តែខ្លាំងនៅពេលខាងមុខ។ ជាការពិត បច្ចុប្បន្នសកម្មភាពប្រយុទ្ធនៅលើដីអ៊ុយក្រែនបានថយចុះ ដោយរុស្ស៊ីបន្តជាមួយនឹងការវាយប្រហារតាមអាកាស កាត់ផ្តាត់ហេដ្ឋារចនាសម្ព័ន្ធថាមពលអ៊ុយក្រែន ចំពេលរដូវរងារឈានចូលមកដល់។ គ្មានថាមពល គឺមិនអាចប្រើប្រាស់ម៉ាស៊ីនកម្តៅបាន ដែលបង្កការលំបាកយ៉ាងខ្លាំងដល់ពលរដ្ឋស៊ីវិលអ៊ុយក្រែន។

រដ្ឋមន្ត្រីការពារជាតិអ៊ុយក្រែនបានថ្លែងថា ការកេណ្ឌទ័ពទ្រង់ទ្រាយធំដំណាក់កាលទី២ រុស្ស៊ីត្រូវប្រើពេលយ៉ាងហោចណាស់ប្រហែល៣ខែដើម្បីរៀបចំវា។ នោះមានន័យថា រុស្ស៊ីកំពុងព្យាយាមចាប់ផ្តើមការវាយលុក ប្រហែលជានៅក្នុងខែកុម្ភៈឆ្នាំ២០២៣ គម្រប់ខួប១ឆ្នាំនៃសង្រ្គាមឈ្លានពានលើអ៊ុយក្រែនដែលបានចាប់ផ្តើមនៅថ្ងៃទី២៤ខែកុម្ភៈឆ្នាំ២០២២។

ប្រធានាធិបតីអ៊ុយក្រែនលោក​ (វ៉ូឡូឌីមៀ ហ្សេលេនស្គី) Volodymyr Zelensky និងមន្ត្រីជាន់ខ្ពស់បានព្រមានថា ទីក្រុងគៀវ និងសម្ព័ន្ធមិត្តត្រូវតែការពារប្រឆាំងនឹងរុស្ស៊ី។ អ៊ុយក្រែនបានធ្វើឱ្យប្រសើរឡើងយ៉ាងខ្លាំង នូវការការពារដែនអាកាសរបស់ខ្លួនប្រឆាំងនឹងមីស៊ីលរុស្ស៊ី ដោយមានការគាំទ្រពីលោកខាងលិច ប៉ុន្តែកំពុងអំពាវនាវឱ្យមានអាវុធទំនើបបន្ថែមទៀត។ កាលពីថ្ងៃព្រហស្បតិ៍ សម្ព័ន្ធមិត្តលោកខាងលិចបានបង្កើនការគាំទ្រដោយមានការផ្តល់ថវិកាបន្ថែម ប្រមាណ១៩ពាន់លានដុល្លារអាមេរិកដល់អ៊ុយក្រែននៅឆ្នាំ២០២៣ និងការហ្វឹកហ្វឺនយោធា។ យោធាអាមេរិកបានប្រកាសថា ខ្លួននឹងពង្រីកការហ្វឹកហ្វឺនបុគ្គលិកយោធាអ៊ុយក្រែននៅក្នុងប្រទេសអាល្លឺម៉ង់។ ពោល ចាប់ផ្តើមពីខែមករា ទាហាន ៥០០ នាក់ក្នុងមួយខែ នឹងត្រូវបានបណ្តុះបណ្តាល។ គិតចាប់តាំងពីខែមេសាមក កងទ័ពអ៊ុយក្រែនជាង ១៥,០០០ នាក់ បានទទួលការបណ្តុះបណ្តាល ដោយសហរដ្ឋអាមេរិកនិងសម្ព័ន្ធមិត្ត។

នៅថ្ងៃព្រហស្បតិ៍ មេដឹកនាំសហភាពអឺរ៉ុប បានបញ្ចប់កិច្ចប្រជុំកំពូលចុងក្រោយរបស់ពួកគេនៃឆ្នាំ ២០២២ ដោយសម្រេចដាក់សម្ពាធបន្ថែមទៀតលើរុស្ស៊ី ដោយនៅក្នុងនោះប្លុកដែលមាន២៧ប្រទេសនេះ បានព្រមព្រៀងគ្នាទម្លាក់ទណ្ឌកម្មទី៩លើក្រុងមូស្គូ។ កិច្ចព្រមព្រៀងជុំវិញកញ្ចប់ទណ្ឌកម្មថ្មីប្រឆាំងនឹងរុស្ស៊ី ត្រូវបញ្ជាក់ជាលាយលក្ខណ៍អក្សរនៅថ្ងៃសុក្រសប្តាហ៍នេះ។ ព័ត៌មានលម្អិតមិនត្រូវបានបង្ហាញឱ្យដឹងនោះទេ ប៉ុន្តែទណ្ឌកម្មនេះត្រូវបានគេរំពឹងថា នឹងរួមបញ្ចូលការហាមឃាត់ការធ្វើដំណើរ និងការបង្កកទ្រព្យសម្បត្តិរបស់មន្ត្រី និងមន្ត្រីយោធារុស្ស៊ីជិត ២០០ នាក់ទៀត ដូចដែលបានស្នើឡើងដោយគណៈកម្មការអឺរ៉ុបកាលពីសប្តាហ៍មុន។ មេដឹកនាំសហភាពអឺរ៉ុប ក៏ទំនងជាហាមឃាត់ការបញ្ជូនម៉ាស៊ីនយន្តហោះដ្រូន (drones) គ្មានមនុស្សបើកទៅឱ្យទាំងរុស្ស៊ី និងអ៊ីរ៉ង់ ដែលត្រូវបានចោទប្រកាន់ថា បានផ្តល់ យន្តហោះ កាមីកាសេ ដ្រូន (kamikaze drones) សម្រាប់ដាក់ពង្រាយប្រឆាំងនឹងគោលដៅជនស៊ីវិលអ៊ុយក្រែន៕