ថៃនឹងធ្វើពហិការមិនចូលរួមព្រឹត្តិការណ៍គុនខ្មែរក្នុងព្រឹត្តិការណ៍កីឡាស៊ីហ្គេមនៅកម្ពុជានាពេលខាងមុខនេះ ដោយយកហេតុផលខាងកម្ពុជាមិនប្រើប្រាស់ឈ្មោះ Muay Thai ជំនួស “គុនខ្មែរ”។
ដោយឡែកខាងកម្ពុជា ក៏បានប្រកាន់ជំហរយ៉ាងមុតមាំដែរថា “កម្ពុជានឹងសងសឹកហើយមិនបញ្ជូនអ្នកប្រដាល់ទៅថៃទេពេលធ្វើម្ចាស់ផ្ទះស៊ីហ្គេមឆ្នាំ២០២៥”។
ស្របពេលដែលថៃ បានអះអាងថា Muay Thai ត្រូវបានគេទទួលស្គាល់ជុំវិញពិភពលោក និងល្បីរន្ទឺជាងគុនខ្មែរកម្ពុជានោះ មន្ត្រីកម្ពុជាបានអះអាងថា កីឡាគុនខ្មែរមានប្រភពចេញពីវប្បធម៌ខ្មែរ តាំងពីបុរាណមកម្ល៉េះ ខណៈថៃ បានលួចម្លងពីកម្ពុជា។
បើយើងក្រឡេកទៅមើលប្រវត្តិសាស្ត្រ គុនខ្មែរកម្ពុជា មានប្រវត្តិយូរលង់ណាស់មកហើយតាំងពីសម័យមុនអង្គរ ដែលយើងបានឃើញជាក់ស្តែងនៅតាមប្រាង្គប្រាសាទនានា តែងតែមានចម្លាក់ស្តីអំពីគុនខ្មែរ។ ដោយឡែកថៃ មិនមានប្រវត្តិសាស្ត្រ ឬវប្បធម៌អ្វីជាអំណះអំណាងនោះទេ ដោយពួកគេប្រើការផ្សព្វផ្សាយប្រដាល់ Muay Thai របស់គេ ទៅកាន់ពិភពលោកខ្លាំងជាកម្ពុជាតែប៉ុណ្ណោះ។
គួរបញ្ជាក់ផងដែរថា ចំពោះវិញ្ញាសាប្រដាល់គុនខ្មែរ បើទោះជាគ្មានភាគីថៃ ចូលរួម ក៏មានប្រទេសចំនួន ៧ ដោយរាប់ទាំងកម្ពុជា ជាម្ចាស់ផ្ទះ, ឥណ្ឌូណេស៊ី, វៀតណាម, ហ្វីលីពីន, ឡាវ, មីយ៉ាន់ម៉ា និងម៉ាឡេស៊ី ចូលរួមផងដែរ។ យោងតាមច្បាប់កីឡា វិញ្ញាសា ដែលមានចាប់ពី ៤ប្រទេសឡើងទៅ គឺអាចដាក់ឱ្យប្រកួតបាន។ ព្រឹត្តិការណ៍ស៊ីហ្គេម លើកទី ៣២ នៅកម្ពុជា នឹងចាប់ផ្ដើមនៅថ្ងៃទី៥-១៧ ខែឧសភា ឆ្នាំ២០២៣៕