ប្រទេសចិន បានចាក់សង់ដីលើតំបន់ដែលមិនមានការកាន់កាប់ជាច្រើនកន្លែងក្នុងសមុទ្រចិនខាងត្បូង ដែលជាផ្នែកមួយ នៃកិច្ចខិតខំប្រឹងប្រែងដ៏យូរអង្វែងរបស់ទីក្រុងប៉េកាំង ដើម្បីពង្រឹងការទាមទារទឹកដីនៅតំបន់ជម្លោះ និងពង្រឹងវត្តមាន យោធារបស់ខ្លួនក្នុងតំបន់ដែលមានសារៈសំខាន់ចំពោះពាណិជ្ជកម្មពិភពលោក។

កន្លងមក​ចិនបានសង់ថ្មប៉ប្រះទឹក កោះ និងទីទួលចាក់ដី ផ្សេងៗទៀតដែលចិនគ្រប់គ្រង ក៏ដូចជាសាងសង់កំពង់ផែ ផ្លូវយន្តហោះ និងហេដ្ឋារចនាសម្ព័ន្ធ ផ្សេងៗជាដើម។  ហើយបច្ចុប្បន្ននេះ ចិនកំពុងតែទន្ទ្រាន ធ្វើ សកម្មភាពដូចគ្នានេះលើតំបន់ថ្មី ដែលគ្មានការកាន់កាប់។

ការបែកធ្លាយនេះសកម្មភាពទាំងនេះ ត្រូវបានជនអនាមិក ធ្វើការហេក(Hack) ចូលផ្កាយរណបមួយ ហើយបានបង្ហាញយ់ាងច្បាស់ អំពីសកម្មភាពរបស់យោធាចិនកំពុងបញ្ចូននាវា ផ្ទុកអេស្កាវ៉ាទ័រ ប្រពន្ធធារាសាស្ត្រ ដើម្បីធ្វើការសាងសង់ ហេដ្ឋារចនាសម្ព័ន្ធ នៅតាមថ្មថ្មប៉ប្រះទឹក។

គួររំឭកថា ចិនបានទាមទារកម្មសិទ្ធិលើផ្ទៃទឹកជាង ៨០ ភាគរយ នៃសមុទ្រចិនខាងត្បូង ដោយផ្អែកលើផែនទីឆ្នាំ ១៩៤៧ ហើយ ធ្លាប់និយាយផងដែរថា ខ្លួនមានសិទ្ធិអធិបតេយ្យភាពក្នុងការ សាងសង់អ្វីៗលើទឹកដីរបស់ខ្លួន។

ភាពតានតឹងរវាងចិន និងអ្នកទាមទារផ្សេងទៀតនៅក្នុង សមុទ្រ ចិនខាងត្បូងដូចជាហ្វីលីពីន តៃវ៉ាន់ ម៉ាឡេស៊ី ឥណ្ឌូនេស៊ី វៀតណាម និងប្រ៊ុយណេ បានកើនឡើងជាច្រើនឆ្នាំមកហើយ ដោយសារតែទីក្រុងប៉េកាំងបានវិនិយោគបន្ថែមលើនាវាកងទ័ពជើងទឹក និងឆ្មាំឆ្នេរសមុទ្រ ដើម្បីអនុវត្តការទាមទាររបស់ខ្លួន ដែលរងការរិះគន់ពីសហគមន៍អន្តរជាតិ ជាពិសេសសហរដ្ឋ អាមេរិក៕

ប្រភព៖ Japan Times

បរទេស៖ ពិតជាគួរឱ្យភ្ញាក់ផ្អើល និងគួរតែប្រុងប្រយ័ត្នចំពោះកុមារតូចៗ ក្រោយវេជ្ជបណ្ឌិតនៅមន្ទីរពេទ្យកុមារក្នុងខេត្ត Dong Nai នៃប្រទេសវៀតណាម បានធ្វើការចែករំលែកករណីវះកាត់យកបំណែកកញ្ចក់ដ៏មុតស្រួចចេញពីពោះរបស់ក្មេងប្រុសអាយុទើប៨ខែយ៉ាងប្រថុយប្រថាន។

បើយោងតាមរបាយការណ៍របស់ប្រព័ន្ធផ្សព្វផ្សាយក្នុងស្រុកនៃប្រទេសវៀតណាមមួយបានឱ្យដឹងថា មានការបង្ហោះចែករំលែកពីវេជ្ជបណ្ឌិតនៅមន្ទីរពេទ្យកុមារក្នុងខេត្ត Dong Nai អំពីបទពិសោធរបស់ឪពុកម្ដាយអ្នកជំងឺម្នាក់ដែលជាទារកទើបអាយុ៨ខែ ដែលគេបានបញ្ជូនកូនប្រុសមកកាន់បន្ទប់សង្គ្រោះ បន្ទាន់កាលពីល្ងាច ថ្ងៃ ទី ២០ ធ្នូ ឆ្នាំ២០២២នេះ។

ក្នុងនោះប្រភពបានបញ្ជាក់ថា បើតាមក្រុមគ្រួសារទារកបាននិយាយថា កូនប្រុសរបស់ពួកគេបានលេប វត្ថុចម្លែកម្យ៉ាង ហើយក៏សន្លប់បាត់មាត់បាត់ក។

លុះមកដល់មន្ទីរពេទ្យជាលទ្ធផល កាំរស្មីអ៊ិច បានបង្ហាញឱ្យឃើញពីវត្ថុនោះ គឺជាអំបែងកែវកញ្ចក់ដែលមាន ប្រវែងប្រហែល ២ សង់ទីម៉ែត្រ មានរាងរាងត្រីកោណស្រួច នៅក្នុងក្រពះរបស់អ្នកជំងឺ រហូត ចាក់ស្រទាប់ក្រពះដែលបណ្តាលឱ្យមានការហូរឈាម។ បន្ទាប់មកគ្រូពេទ្យបានប្រើឧបករណ៍មួយដើម្បីយកកញ្ចក់ចេញពីរាងកាយអ្នកជំងឺតាមមាត់យោយប្រុងប្រយ័ត្ន និងប្រថុយបំផុត និងទទួលបានដោយជោគជ័យ។

ទោះជាយ៉ាងណាអនុប្រធានផ្នែកក្រពះពោះវៀនក៏បាននិយាយដែរថានេះជាលើកទីមួយហើយដែល មានទារកលេបបំណែកកញ្ចក់យ៉ាងមុតស្រួចបែបនេះ  ហើយចំពោះអ្នកជំងឺកុមារប្រសិនបើមានការ ពន្យារពេល នោះបំណែកកញ្ចក់អាចនាំឱ្យមានការរលាកពោះវៀនធ្ងន់ធ្ងរ ហើយការព្យាបាលនឹងមាន ការលំបាក និងចំណាយច្រើន។

ដូច្នេះសូមឱ្យឪពុកម្ដាយមានការប្រុងប្រយ័ត្ន និងបើដឹងថាកូនតូចបានលេចវត្ថុអ្វីហើយគួរតែយកទៅ មន្ទីរពេទ្យភ្លាមៗ ដើម្បីពិនិត្យ និងព្យាបាលជាបន្ទាន់ បន្ថែមពីនោះ ឪពុកម្តាយមិនគួរព្យាយាមយកវត្ថុដែលក្មេងលេចចេញដោយខ្លួនឯងទេ ព្រោះវាអាចរុញវត្ថុនោះចូលទៅក្នុងផ្លូវដង្ហើមដោយអចេតនា ធ្វើឱ្យកុមារឈប់ដកដង្ហើម និងបេះដូងឈប់លោតបាន៕ ប្រភព៖ Sanook

ថៃ៖ នាយករដ្ឋមន្ត្រីថៃ លោក ប្រាយុទ្ធ ចាន់អូចា (Prayut Chan-o-cha) បានប្រាប់ប្រព័ន្ធផ្សព្វផ្សាយក្នុងស្រុក នៅថ្ងៃសុក្រនេះថា លោកនឹងស្វែងរកអាណត្តិមួយទៀត ក្នុងការបោះឆ្នោតសកល ដែលអាចធ្វើឡើងមុន ខែឧសភា ឆ្នាំ២០២៣។ នេះបើយោងតាមការចុះផ្សាយដោយទីភ្នាក់ងារសារព័ត៌មាន AFP នៅថ្ងៃសុក្រ ទី២៣ ខែធ្នូ ឆ្នាំ២០២២។

ថ្លែងប្រាប់អ្នកសារព័ត៌មាននៅខាងក្រៅវិមានរដ្ឋាភិបាល ក្នុងទីក្រុងបាងកក លោក ប្រាយុទ្ធ បានគូសបញ្ជាក់ថា «គណបក្សថៃរួបរួមជាតិ (United Thai Nation Party) ដែលទើបបង្កើតឡើង បានផ្តល់ការគាំទ្រដល់ខ្ញុំ ក្នុងការក្លាយជាបេក្ខជននាយករដ្ឋមន្ត្រី នៅក្នុងការបោះឆ្នោតបន្ទាប់ទៀត»។ លោក ប្រាយុទ្ធ បានបន្ថែមថា «ខ្ញុំសូមបញ្ជាក់ឲ្យបានច្បាស់នៅថ្ងៃនេះថា ខ្ញុំបានសម្រេចចិត្តចូលរួមប្រកួតប្រជែង សម្រាប់តំណែងនេះបន្តទៀត»។

កាលបរិច្ឆេទជាក់លាក់នៃការបោះឆ្នោតនៅមិនទាន់ត្រូវបានសម្រេចនោះទេ ប៉ុន្តែប្រសិនបើមិនត្រូវបានរំលាយចោលក្នុងពេលឆាប់ៗនោះទេ សភានឹងបញ្ចប់អាណត្តិរបស់ខ្លួនត្រឹមខែមីនា ដោយកំណត់ដំណាក់កាលបោះឆ្នោត នៅខែឧសភា ឆ្នាំ២០២៣។

គួរបញ្ជាក់ថា លោក ប្រាយុទ្ធ បានឡើងកាន់តំណែងជាប្រមុខយោធា ក្រោយរដ្ឋប្រហារទម្លាក់រដ្ឋាភិបាលឆ្នាំ២០១៤ មុនពេលក្លាយជានាយករដ្ឋមន្រ្តីក្នុងការបោះឆ្នោត ឆ្នាំ២០១៩។ កាលពីខែកញ្ញា តុលាការធម្មនុញ្ញថៃ បានកាត់សេចក្តីកំណត់អាណត្តិរយៈពេល ៨ឆ្នាំ របស់លោកប្រាយុទ្ធ ខណៈដែលអាណត្តិនាយករដ្ឋមន្ត្រីនឹងបញ្ចប់នៅឆ្នាំ២០២៥៕

បរទេស៖ ភ្ញៀវក្នុងពិធីជប់លៀងបុណ្យណូអែលក្នុងភោជនីយដ្ឋានទួរគីនៃប្រទេសអង់គ្លេសចំនួន២០០នាក់បានចាប់ផ្ដើមធ្លាក់ខ្លួនឈឺភ្លាមៗ និងបញ្ជូនទៅកាន់មន្ទីរពេទ្យសង្គ្រោះបន្ទាន់ ក្រោយគេរកឃើញថាបណ្តាលមកពីឧស្ម័នកាបូនម៉ូណូអុកស៊ីតធ្លាយ ចូលពេញទាំងក្នុងហាង។

បានក្លាយជារឿងដ៏គួរឱ្យភ្ញាក់ផ្អើលក្រោយពីមានពិធីជប់លៀងបុណ្យណូអែលនៅទីក្រុងឡុងដ៍ ក្នុងភោជនីយដ្ឋានទួរគី Gokyuzu ក្នុង Qingford  ប្រទេសអង់គ្លេស ដោយបានជួបហេតុការដ៏អាក្រក់ បន្ទាប់ពីមនុស្សប្រមាណ ២០០ នាក់ដែលបានចូលរួមក្នុង ពិធីនោះបានធ្លាក់ខ្លួនឈឺ។

ជាមួយគ្នានោះក្រោយពេលកើតហេតុ ពួកត្រូវបានគេបញ្ជូនទៅកាន់មន្ទីរពេទ្យក្បែរនោះភ្លាមៗ លើសពីនោះក៏មានការសំណូមពរឱ្យជួយធ្វើសេវាសង្គ្រោះបន្ទាន់ប្រញាប់ ដោយនាំអ្នកជំងឺទៅមន្ទីរពេទ្យជាច្រើន ព្រោះមានជនរងគ្រោះជាច្រើនដែលគេមិនអាចទទួលមើលថែ ក្នុងមន្ទីរពេទ្យតែមួយបាន។

ដំបូងឡើយគេយល់ថាអាចបណ្ដាលមកពីមានអាហារពុល ប៉ុន្តែក្រុមគ្រូពេទ្យបានរកឃើញថានេះគឺជា រោគសញ្ញានៃការពុលកាបូនម៉ូណូអុកស៊ីត ដែលពួកគេបានស្រូបយកឧស្ម័នកាបូនម៉ូណូអុកស៊ីត ច្រើនពេកចូលក្នុងខ្លួន។

បើយោងតាមវេជ្ជបណ្ឌិតបានបន្ថែមថាមាន មនុស្សម្នាក់ៗមានកម្រិតកាបូនឌីអុកស៊ីតក្នុងរាងកាយខុសៗគ្នា បណ្តាលឱ្យមានរោគសញ្ញាផ្សេងៗគ្នា រួមទាំងឈឺក្បាល ចង្អោរ ដួលសន្លប់ និងពិបាកដកដង្ហើម ដែលប្រសិនបើស្រូបចូលក្នុងបរិមាណច្រើនរហូតដល់កម្រិតកាបូនម៉ូណូអុកស៊ីតក្នុងឈាមឡើងខ្ពស់ វានឹងបណ្តាលឱ្យខូចខាតដល់ជាលិកា សរីរាង្គ និងអាចបណ្តាលឱ្យស្លាប់បាន។

យ៉ាងណាមិញ គេជឿថាប្រភពនៃឧស្ម័នកាបូនម៉ូណូអុកស៊ីត គឺជាការធ្លាយចេញពីហាងផ្ទាល់ ដែលធ្វើឱ្យមនុស្សទាំងអស់ក្នុងព្រឹត្តិការណ៍នោះធ្លាក់ខ្លួនឈឺមានអាការដូចពុលចំណី ប៉ុន្តែរហូតមកដល់ពេល នេះមិនទាន់មានព័ត៌មានលម្អិតណាមួយត្រូវបានខាងភោជនីយដ្ឋានបញ្ជាក់ទាំងស្រុងទេ៕ ប្រភព៖ Thairath