បរទេស៖ ពិតជាគួរឱ្យភ្ញាក់ផ្អើល និងគួរតែប្រុងប្រយ័ត្នចំពោះកុមារតូចៗ ក្រោយវេជ្ជបណ្ឌិតនៅមន្ទីរពេទ្យកុមារក្នុងខេត្ត Dong Nai នៃប្រទេសវៀតណាម បានធ្វើការចែករំលែកករណីវះកាត់យកបំណែកកញ្ចក់ដ៏មុតស្រួចចេញពីពោះរបស់ក្មេងប្រុសអាយុទើប៨ខែយ៉ាងប្រថុយប្រថាន។

បើយោងតាមរបាយការណ៍របស់ប្រព័ន្ធផ្សព្វផ្សាយក្នុងស្រុកនៃប្រទេសវៀតណាមមួយបានឱ្យដឹងថា មានការបង្ហោះចែករំលែកពីវេជ្ជបណ្ឌិតនៅមន្ទីរពេទ្យកុមារក្នុងខេត្ត Dong Nai អំពីបទពិសោធរបស់ឪពុកម្ដាយអ្នកជំងឺម្នាក់ដែលជាទារកទើបអាយុ៨ខែ ដែលគេបានបញ្ជូនកូនប្រុសមកកាន់បន្ទប់សង្គ្រោះ បន្ទាន់កាលពីល្ងាច ថ្ងៃ ទី ២០ ធ្នូ ឆ្នាំ២០២២នេះ។

ក្នុងនោះប្រភពបានបញ្ជាក់ថា បើតាមក្រុមគ្រួសារទារកបាននិយាយថា កូនប្រុសរបស់ពួកគេបានលេប វត្ថុចម្លែកម្យ៉ាង ហើយក៏សន្លប់បាត់មាត់បាត់ក។

លុះមកដល់មន្ទីរពេទ្យជាលទ្ធផល កាំរស្មីអ៊ិច បានបង្ហាញឱ្យឃើញពីវត្ថុនោះ គឺជាអំបែងកែវកញ្ចក់ដែលមាន ប្រវែងប្រហែល ២ សង់ទីម៉ែត្រ មានរាងរាងត្រីកោណស្រួច នៅក្នុងក្រពះរបស់អ្នកជំងឺ រហូត ចាក់ស្រទាប់ក្រពះដែលបណ្តាលឱ្យមានការហូរឈាម។ បន្ទាប់មកគ្រូពេទ្យបានប្រើឧបករណ៍មួយដើម្បីយកកញ្ចក់ចេញពីរាងកាយអ្នកជំងឺតាមមាត់យោយប្រុងប្រយ័ត្ន និងប្រថុយបំផុត និងទទួលបានដោយជោគជ័យ។

ទោះជាយ៉ាងណាអនុប្រធានផ្នែកក្រពះពោះវៀនក៏បាននិយាយដែរថានេះជាលើកទីមួយហើយដែល មានទារកលេបបំណែកកញ្ចក់យ៉ាងមុតស្រួចបែបនេះ  ហើយចំពោះអ្នកជំងឺកុមារប្រសិនបើមានការ ពន្យារពេល នោះបំណែកកញ្ចក់អាចនាំឱ្យមានការរលាកពោះវៀនធ្ងន់ធ្ងរ ហើយការព្យាបាលនឹងមាន ការលំបាក និងចំណាយច្រើន។

ដូច្នេះសូមឱ្យឪពុកម្ដាយមានការប្រុងប្រយ័ត្ន និងបើដឹងថាកូនតូចបានលេចវត្ថុអ្វីហើយគួរតែយកទៅ មន្ទីរពេទ្យភ្លាមៗ ដើម្បីពិនិត្យ និងព្យាបាលជាបន្ទាន់ បន្ថែមពីនោះ ឪពុកម្តាយមិនគួរព្យាយាមយកវត្ថុដែលក្មេងលេចចេញដោយខ្លួនឯងទេ ព្រោះវាអាចរុញវត្ថុនោះចូលទៅក្នុងផ្លូវដង្ហើមដោយអចេតនា ធ្វើឱ្យកុមារឈប់ដកដង្ហើម និងបេះដូងឈប់លោតបាន៕ ប្រភព៖ Sanook

ថៃ៖ នាយករដ្ឋមន្ត្រីថៃ លោក ប្រាយុទ្ធ ចាន់អូចា (Prayut Chan-o-cha) បានប្រាប់ប្រព័ន្ធផ្សព្វផ្សាយក្នុងស្រុក នៅថ្ងៃសុក្រនេះថា លោកនឹងស្វែងរកអាណត្តិមួយទៀត ក្នុងការបោះឆ្នោតសកល ដែលអាចធ្វើឡើងមុន ខែឧសភា ឆ្នាំ២០២៣។ នេះបើយោងតាមការចុះផ្សាយដោយទីភ្នាក់ងារសារព័ត៌មាន AFP នៅថ្ងៃសុក្រ ទី២៣ ខែធ្នូ ឆ្នាំ២០២២។

ថ្លែងប្រាប់អ្នកសារព័ត៌មាននៅខាងក្រៅវិមានរដ្ឋាភិបាល ក្នុងទីក្រុងបាងកក លោក ប្រាយុទ្ធ បានគូសបញ្ជាក់ថា «គណបក្សថៃរួបរួមជាតិ (United Thai Nation Party) ដែលទើបបង្កើតឡើង បានផ្តល់ការគាំទ្រដល់ខ្ញុំ ក្នុងការក្លាយជាបេក្ខជននាយករដ្ឋមន្ត្រី នៅក្នុងការបោះឆ្នោតបន្ទាប់ទៀត»។ លោក ប្រាយុទ្ធ បានបន្ថែមថា «ខ្ញុំសូមបញ្ជាក់ឲ្យបានច្បាស់នៅថ្ងៃនេះថា ខ្ញុំបានសម្រេចចិត្តចូលរួមប្រកួតប្រជែង សម្រាប់តំណែងនេះបន្តទៀត»។

កាលបរិច្ឆេទជាក់លាក់នៃការបោះឆ្នោតនៅមិនទាន់ត្រូវបានសម្រេចនោះទេ ប៉ុន្តែប្រសិនបើមិនត្រូវបានរំលាយចោលក្នុងពេលឆាប់ៗនោះទេ សភានឹងបញ្ចប់អាណត្តិរបស់ខ្លួនត្រឹមខែមីនា ដោយកំណត់ដំណាក់កាលបោះឆ្នោត នៅខែឧសភា ឆ្នាំ២០២៣។

គួរបញ្ជាក់ថា លោក ប្រាយុទ្ធ បានឡើងកាន់តំណែងជាប្រមុខយោធា ក្រោយរដ្ឋប្រហារទម្លាក់រដ្ឋាភិបាលឆ្នាំ២០១៤ មុនពេលក្លាយជានាយករដ្ឋមន្រ្តីក្នុងការបោះឆ្នោត ឆ្នាំ២០១៩។ កាលពីខែកញ្ញា តុលាការធម្មនុញ្ញថៃ បានកាត់សេចក្តីកំណត់អាណត្តិរយៈពេល ៨ឆ្នាំ របស់លោកប្រាយុទ្ធ ខណៈដែលអាណត្តិនាយករដ្ឋមន្ត្រីនឹងបញ្ចប់នៅឆ្នាំ២០២៥៕

បរទេស៖ ភ្ញៀវក្នុងពិធីជប់លៀងបុណ្យណូអែលក្នុងភោជនីយដ្ឋានទួរគីនៃប្រទេសអង់គ្លេសចំនួន២០០នាក់បានចាប់ផ្ដើមធ្លាក់ខ្លួនឈឺភ្លាមៗ និងបញ្ជូនទៅកាន់មន្ទីរពេទ្យសង្គ្រោះបន្ទាន់ ក្រោយគេរកឃើញថាបណ្តាលមកពីឧស្ម័នកាបូនម៉ូណូអុកស៊ីតធ្លាយ ចូលពេញទាំងក្នុងហាង។

បានក្លាយជារឿងដ៏គួរឱ្យភ្ញាក់ផ្អើលក្រោយពីមានពិធីជប់លៀងបុណ្យណូអែលនៅទីក្រុងឡុងដ៍ ក្នុងភោជនីយដ្ឋានទួរគី Gokyuzu ក្នុង Qingford  ប្រទេសអង់គ្លេស ដោយបានជួបហេតុការដ៏អាក្រក់ បន្ទាប់ពីមនុស្សប្រមាណ ២០០ នាក់ដែលបានចូលរួមក្នុង ពិធីនោះបានធ្លាក់ខ្លួនឈឺ។

ជាមួយគ្នានោះក្រោយពេលកើតហេតុ ពួកត្រូវបានគេបញ្ជូនទៅកាន់មន្ទីរពេទ្យក្បែរនោះភ្លាមៗ លើសពីនោះក៏មានការសំណូមពរឱ្យជួយធ្វើសេវាសង្គ្រោះបន្ទាន់ប្រញាប់ ដោយនាំអ្នកជំងឺទៅមន្ទីរពេទ្យជាច្រើន ព្រោះមានជនរងគ្រោះជាច្រើនដែលគេមិនអាចទទួលមើលថែ ក្នុងមន្ទីរពេទ្យតែមួយបាន។

ដំបូងឡើយគេយល់ថាអាចបណ្ដាលមកពីមានអាហារពុល ប៉ុន្តែក្រុមគ្រូពេទ្យបានរកឃើញថានេះគឺជា រោគសញ្ញានៃការពុលកាបូនម៉ូណូអុកស៊ីត ដែលពួកគេបានស្រូបយកឧស្ម័នកាបូនម៉ូណូអុកស៊ីត ច្រើនពេកចូលក្នុងខ្លួន។

បើយោងតាមវេជ្ជបណ្ឌិតបានបន្ថែមថាមាន មនុស្សម្នាក់ៗមានកម្រិតកាបូនឌីអុកស៊ីតក្នុងរាងកាយខុសៗគ្នា បណ្តាលឱ្យមានរោគសញ្ញាផ្សេងៗគ្នា រួមទាំងឈឺក្បាល ចង្អោរ ដួលសន្លប់ និងពិបាកដកដង្ហើម ដែលប្រសិនបើស្រូបចូលក្នុងបរិមាណច្រើនរហូតដល់កម្រិតកាបូនម៉ូណូអុកស៊ីតក្នុងឈាមឡើងខ្ពស់ វានឹងបណ្តាលឱ្យខូចខាតដល់ជាលិកា សរីរាង្គ និងអាចបណ្តាលឱ្យស្លាប់បាន។

យ៉ាងណាមិញ គេជឿថាប្រភពនៃឧស្ម័នកាបូនម៉ូណូអុកស៊ីត គឺជាការធ្លាយចេញពីហាងផ្ទាល់ ដែលធ្វើឱ្យមនុស្សទាំងអស់ក្នុងព្រឹត្តិការណ៍នោះធ្លាក់ខ្លួនឈឺមានអាការដូចពុលចំណី ប៉ុន្តែរហូតមកដល់ពេល នេះមិនទាន់មានព័ត៌មានលម្អិតណាមួយត្រូវបានខាងភោជនីយដ្ឋានបញ្ជាក់ទាំងស្រុងទេ៕ ប្រភព៖ Thairath

បរទេស៖ ក្រុមតាលីបង់បានចាប់ខ្លួនស្ត្រី ៥ នាក់ដែលបានចូលរួមក្នុងការតវ៉ានៅក្នុងរដ្ឋធានីកាប៊ុលរបស់ប្រទេសអាហ្វហ្គានីស្ថាន ប្រឆាំងនឹងការហាមឃាត់ស្ត្រីឱ្យចូលរៀននៅសាកលវិទ្យាល័យ។

នាថ្ងៃទី ២៣ ខែធ្នូ ឆ្នាំ២០២២ មានសេចក្ដីរាយការណ៍ពីទីភ្នាក់ងារក្នុងស្រុកបានឱ្យដឹងថា មានបាតុកររាប់សិបនាក់បានធ្វើការតវ៉ា នៅក្នុងប្រទេសអាហ្វហ្គានីស្ថាន ជាមួយនឹងរដ្ឋាភិបាល តាលីបង់ ដែលបានសម្រេចអនុម័តច្បាប់ហាមលែងឱ្យសិស្សស្រីចូលរៀនបន្តក្នុងសកលវិទ្យាល័យបន្តទៀត។

ក្នុងនោះរូបភាពដែលបានចែករំលែកនៅលើប្រព័ន្ធផ្សព្វផ្សាយសង្គមកាលពីថ្ងៃព្រហស្បតិ៍ម្សិលមិញនេះបង្ហាញពីស្ត្រីជនជាតិអាហ្វហ្គានីស្ថានប្រហែល ២០ នាក់ដែលស្លៀកពាក់ហ៊ីយ៉ាបកំពុងដើរតាមដងផ្លូវនៃទីក្រុងកាប៊ុល កាន់ស្លាកសញ្ញា និងស្រែកពាក្យស្លោកបង្ហាញពីអារម្មណ៍ប្រឆាំងនឹងការអនុម័តនេះ។

ដំបូងឡើយ ក្រុមនេះគ្រោងនឹងប្រមូលផ្តុំនៅមុខសាកលវិទ្យាល័យកាប៊ុល ដែលជាស្ថាប័នអប់រំធំជាងគេ និងមានកិត្យានុភាពបំផុតរបស់ប្រទេស ប៉ុន្តែត្រូវបានផ្លាស់ប្តូរទីតាំងរបស់ខ្លួន បន្ទាប់ពីអាជ្ញាធរបានបញ្ជូនបុគ្គលិកសន្តិសុខជាច្រើននៅទីនោះ។

ទោះជាយ៉ាងណាស្ត្រីជាច្រើននាក់ដែលចូលរួមក្នុងការតវ៉ាបាននិយាយដូច្នេះថា ពួកគេត្រូវបានមន្ត្រី តាលីបង់វាយដំ ខ្លះត្រូវបានចាប់ខ្លួន ហើយស្ត្រីអ្នកតវ៉ាម្នាក់ដែលមិនស្គាល់អត្តសញ្ញាណបាននិយាយ ថា នាងត្រូវបានគេវាយដំយ៉ាងធ្ងន់ធ្ងរ ប៉ុន្តែអាចគេចពីការឃុំខ្លួនបាន ស្របពេលដែលអ្នកតវ៉ាម្នាក់ទៀត បានប្រាប់ថាខ្លួនត្រូវបានពួកគេដោះលែង ប៉ុន្តែមនុស្សជាច្រើនផ្សេងទៀតត្រូវបានជាប់ឃុំឃាំង។

គួរបញ្ជាក់ថាសិទ្ធស្ត្រីក្នុងប្រទេសអាហ្វហ្គានីស្ថានត្រូវបានរឹតបណ្ដឹងជាខ្លាំងបន្ទាប់ពីរដ្ឋាភិបាលតាលីបង់ឡើងកាន់អំណាចក្នុងឆ្នាំ២០២១៕ ប្រភព៖ Thairath

ភ្នំពេញ៖ លោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានប​ង្ហាញក្តីរំពឹងថា រដ្ឋាភិបាលចិននឹងជួយស្តារ ក៏ដូចជាជីកព្រែក នៅតាមទន្លេបាសាក់ ពីព្រែកអំបិល ទៅសមុទ្រ ដើម្បីសម្រួលដល់ការដឹកជញ្ជូនតាមផ្លូវទឹក។

ថ្លែងក្នុងពិធីបិទវេទិកាវិទ្យាសាស្ត្រស្ដីពី «ទំនាក់ទំនងកម្ពុជា-ចិន និងរំឭកខួប១០០ព្រះវស្សារបស់ព្រះបរមរតនកោដ្ឋ» នាព្រលប់ថ្ងៃទី២២ ខែធ្នូ ឆ្នាំ២០២២ លោកបណ្ឌិត សុខ ទូច បានលើកឡើងដូច្នេះថា៖ «បើយើងចង់ទៅសមុទ្រយើងត្រូវជីកប្រឡាយ ហើយសង្ឃឹមថា មិត្តចិននឹងជួយសហការជីកព្រែក»។

លោក​បណ្ឌិតបានបន្តថា សម្រាប់ការរៀបចំផែនការស្ដារផ្លូវទឹក និងការសាងសង់ផែរណបរបស់កម្ពុជា គឺជាទិសដៅមួយដែលមានសារៈសំខាន់ណាស់ ក្នុងការធ្វើឱ្យចម្ងាយដឹកជញ្ជូនពីគ្រប់ផ្លូវទន្លេ ទៅកាន់សមុទ្រកម្ពុជាកាន់តែខ្លី កាត់បន្ថយពេលវេលា និងចម្ងាយដឹកជញ្ជូន ចំណេញថវិកា ក្នុងការដឹកជញ្ជូន កាត់បន្ថយគ្រោះថ្នាក់ចរាចរណ៍ និងសម្ពាធនៃការប្រើប្រាស់ផ្លូវ ព្រមទាំងបង្កើនសកម្មភាពដឹកជញ្ជូន តាមផ្លូវទឹកកាន់តែច្រើនផងដែរ។

«យើងនាំតាមផ្លូវគោក គឺមានតម្លៃខ្ពស់ណាស់ តែបើយើងនាំតាមផ្លូវទឹករឹតតែថោក យើងដឹងហើយ១០០ឡាន ស្មើនឹងមួយទូរទេះភ្លើង ១០រទេះភ្លើង បាន១នាវា ដូច្នេះ មាននាវាដឹកនាំទំនិញ ធ្វើឱ្យតម្លៃកាន់តែថោក នឹងធ្វើទំនិញកាន់តែងាយស្រួលប្រកួតប្រជែង»។

បណ្ឌិត សុខ ទូច បានថ្លែងថា កម្ពុជា និងចិន កំពុងមានទំនាក់ទំនងជាមួយគ្នាលើ៥ចំណុចធំៗ តាំងពីអតីត បច្ចុប្បន្ន រហូតដល់អនាគត ក្នុងនោះមានប្រវត្តិសាស្ត្រ សេដ្ឋកិច្ច វប្បធម៌ បរិស្ថាន និងពេលទៅថ្ងៃអនាគត។

ក្នុងចំណោមទាំង ៥ចំណុចនេះ គឺផ្នែកសេដ្ឋកិច្ច ដោយចិនបានជួយធ្វើឲ្យកម្ពុជាឱ្យមានការរីកចម្រើនផងដែរ តាមរយៈការវិនិយោគមកលើវិស័យផ្សេងៗ ហើយបានធ្វើឱ្យតម្លៃអចលនទ្រព្យនៅកម្ពុជា មានការកើនឡើង។ លោកបណ្ឌិតសង្ឃឹមថា នៅពេលចប់កូវីដ-១៩ វិនិយោគគិនចិន នឹងមកបណ្ដាក់ទុកវិនិយោគនៅកម្ពុជាច្រើនឡើងបន្ថែមទៀត។

សូមជម្រាបថា រាជរដ្ឋាភិបាលបានអនុញ្ញាតឱ្យក្រសួងសាធារណការ និងដឹកជញ្ជូន ធ្វើការសិក្សាពីការស្ដារផ្លូវទឹក នៅតាមទន្លេបាសាក់ ពីព្រែកអំបិល ទៅខេត្តតាកែ, ខេត្តកំពត និងខេត្តកែប មានចម្ងាយ១៦៨គីឡូម៉ែត្រ។

ទេសរដ្ឋមន្ត្រី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានបញ្ជាក់ថា ក្រសួងនឹងជីកព្រែកថ្មីសុទ្ធសាធប្រវែងចន្លោះ ៥-៧គីឡូម៉ែត្រ តភ្ជាប់គ្នារវាងទន្លេ និងសមុទ្រ ដើម្បីសម្រួលដល់ការដឹកជញ្ជូនតាមផ្លូវទឹកពីទន្លេទៅកំពង់ផែសមុទ្រកែប។

អគ្គនាយកដ្ឋានដឹកជញ្ជូនផ្លូវទឹកសមុទ្រ និងកំពង់ផែ នៃក្រសួងសាធារណការ និងដឹកជញ្ជូន បានសិក្សាមួយជំហានហើយ ជុំវិញដំណើរការនេះ ដោយលទ្ធផលបញ្ជាក់ថា ក្នុងចម្ងាយផ្លូវទឹក ១៦៨គីឡូម៉ែត្រ ពីព្រែកអំបិលទៅតាកែវ និងភ្ជាប់ទៅកំពង់ផែកែប ស្មើនឹង ៦៨ភាគរយ គឺជាទន្លេដែលមានស្រាប់ និងជាង ២០ភាគរយ គឺជាប្រព័ន្ធធារាសាស្រ្ត ដែលត្រូវស្តារ និងពង្រីកបន្ថែម។

បច្ចុប្បន្ននេះ កម្ពុជា កំពុងមានការរីកម្រើនជាលំដាប់លើវិស័យដឹកជញ្ជូនទាំងផ្លូវគោក និងផ្លូវទឹក។ រាជរដ្ឋាភិបាល តាមរយៈក្រសួងសាធារណការ និងដឹកជញ្ជូន បានពង្រីកសក្តានុពលវិស័យដឹកជញ្ជូនតាមផ្លូវទឹក ឱ្យកាន់តែទូលំទូលាយ ដើម្បីជាផ្នែកមួយជួយដល់កំណើនសេដ្ឋកិច្ចជាតិ៕