ប្រទេសថៃ៖ មានហេតុការណ៍អគ្គិភ័យឆាបឆេះនៅរោងចក្រផលិតគ្រឿងបន្លាស់រថយន្តមួយកន្លែងនៅ តំបន់ Bang Lamung ក្នុងប្រទេសថៃ ខូចខាតទាំងស្រុង ខណៈបច្ចុប្បន្នសមត្ថកិច្ច កំពុងធ្វើការស្រាវជ្រាវដើម្បីពន្លឿនរក មូលហេតុនៃឧបទ្ទវហេតុ។

នាថ្ងៃទី ៦ ខែមករា ឆ្នាំ២០២៣ មានសេចក្ដីរាយការណ៍មួយបានឱ្យដឹងថា មានពីករណីអគ្គីភ័យឆាបឆេះយ៉ាងសន្ធោសន្ធៅក្នុងរោងចក្ររបស់ក្រុមហ៊ុន ស៊ូប៉ាវ អ៊ិនធេដ ខូអិលធីឌី ផ្ទះលេខ ៤៤/២ ភូមិ ៨ ឃុំផុង ស្រុកបាងឡាំង ខេត្តឈុនបុរី។

ដែលគេដឹងថារោងចក្រនោះជារោងចក្រផលិតគ្រឿងបន្លាស់រថយន្ត ម៉ូតូ សម្រាប់ម៉ាករថយន្តល្បីៗ នៅវេលាម៉ោង៦ និង១៥នាទីព្រឹក ថ្ងៃទី៦ ខែមករា  ដោយអគ្គីភ័យបានឆាបឆេះនៅបរិវេណអគារទី២ ក្នុងចំណោមអគារទាំង៥ ហើយអណ្តាតភ្លើងបានឆាបឆេះយ៉ាងសន្ធោសន្ធៅ ជាមួយគ្នានោះអាគារបានបាក់ដួលរលំ បណ្តាលឲ្យខូចខាតអស់ទាំងស្រុង។

ទោះជាយ៉ាងណាបន្ទាប់ពីមានហេតុការកើតឡើងអាជ្ញាធរក្នុងតំបន់ Chonburi បានចល័តមន្ត្រីជាង ១០០នាក់ និងរថយន្តពន្លត់អគ្គីភ័យជាង ២០ដើម្បីគ្រប់គ្រងភ្លើងកុំឱ្យឆេះរីករាលដាលបន្តទៀត។

យ៉ាងណាមិញបន្ទាប់ពីការគ្រប់គ្រងភ្លើងបានរួចរាល មិនមានរបាយការណ៍បញ្ជាក់ពីអ្នករងគ្រោះដោយសារអគ្គិសភ័យនេះនោះឡើយទេ ប៉ុន្តែសម្រាប់តម្លៃនៃការខូចខាតត្រូវបានគេប៉ាន់ស្មានថាមាន ប្រហែល ១០០ លានបាត។

ដោយឡែកចំពោះមូលហេតុនៃការឆេះនៅមិនទាន់អាចសន្និដ្ឋានពីមូលហេតុពិតនៅឡើយទេ ដែល តម្រូវឱ្យប៉ូលិសប៉ុស្តិ៍ស៊ើបអង្កេតឱ្យបានស៊ីជម្រៅម្តងទៀត៕ ប្រភព៖ Thairath

បរទេស៖ អ្នកទេសចរជាច្រើននាក់បានគេចពីសេចក្តីស្លាប់ បន្ទាប់ពីទូកទេសចរណ៍ល្បឿនលឿនមួយគ្រឿងនៅ កោះបាលីប្រទេសឥណ្ឌូណេស៊ី បានជួបនឹងខ្យល់បក់ខ្លាំង បណ្តាលឱ្យទូកក្រឡាប់លិចនៅកណ្តាល សមុទ្រ។

នាថ្ងៃទី ៥ ខែមករា ឆ្នាំ២០២៣ មានសេចក្ដីរាយការណ៍បានឱ្យដឹងថាមានហេតុការណ៍ដ៏រន្ធត់មួយ បានកើតឡើង ដោយមានទូកល្បឿនលឿនមួយគ្រឿងកំពុងធ្វើដំណើរដឹកអ្នកដំណើរចំនួន២៨នាក់ពីកោះ Noosa  Penida ទៅកោះ Sanur ក្នុងកោះបាលី ស្រាប់តែទូកនេះបានជួបនឹងរលកដ៏ខ្លាំងៗ និងខ្យល់បក់បោក រហូតចាប់ផ្តើមបាត់បង់លំនឹង ហើយបានលិចបន្តិចម្តងៗចូលទៅក្នុងទឹក។

ហេតុការណ៍នេះផងដែរបានបង្កឱ្យភ្ញៀវទេសចរមានការភ័យស្លន់ស្លោ ប៉ុន្តែនៅតែរាប់ថាសំណាងល្អ ដែលគ្មាននរណាម្នាក់រងរបួសធ្ងន់ធ្ងរ និងបាត់បង់ជីវិតក្នុងឧបទ្ទវហេតុនេះឡើយ ព្រោះមានទូកនៅ ក្បែរជួយភ្ញៀវទេសចរទាំងនោះទាន់ពេលវេលា ហើយពួកគេបានប្រញាប់ពាក់ពងការពារ និងលោតចេញពីទូកជាបន្តបន្ទាប់ ខណៈទូកលិចបណ្តើរៗ។

ទោះជាយ៉ាងណាបន្ទាប់ពីកើតហេតុអាជ្ញាធរកំពុងស៊ើបអង្កេតថាតើហេតុអ្វីបានជាទូកចេញទៅសមុទ្រ ក្នុងពេលអាកាសធាតុអាក្រក់បែបនេះ? ដោយសារតែភាគរយមានហានិភ័យនៃគ្រោះថ្នាក់ជាមួយភ្ញៀវទេសចរ ក្នុងទូកល្បឿនលឿនមានភាគច្រើន រវាងការធ្វើដំណើរទៅកាន់នីមួយ។

គួរបញ្ជាក់ថាទីភ្នាក់ងារអាកាសធាតុក្នុងតំបន់ក៏ បានចេញការព្រមានពី អាកាសធាតុធ្ងន់ធ្ងរចាប់ពីថ្ងៃទី ២ ដល់ ថ្ងៃ ទី ៤ ខែមករា ហើយកំពុងបន្តការព្រមានដល់ល្ងាចថ្ងៃទី ៥ ខែមករាផងដែរ  ខណៈពេលដែលអ្នកដំណើរ ធ្វើដំណើរឆ្លងកាត់កោះត្រូវបានណែនាំដោយមន្ត្រីកំពង់ផែឱ្យធ្វើដំណើរតាមសាឡាង ជាជាងដោយទូកទូកល្បឿនលឿនដើម្បីជាសុវត្ថិភាព៕ ប្រភព៖ Thairath

រដ្ឋធានីកៀវ៖ ដោយសារតែគ្រឿងសឹកចម្បាំងដ៏ទំនើបៗ ផ្គត់ផ្គង់មកពីបណ្ដាប្រទេសបស្ចិមលោក ទើបធ្វើឲ្យកងទ័ពការពារទឹកដីអ៊ុយក្រែន មានលទ្ធភាព វាយបង្ក្រាប រហូតធ្វើឲ្យកម្លាំងទាហានរុស្ស៊ី បាក់ទ័ពជាហូរហែ និង រំដោះទឹកដីរបស់ខ្លួនយ៉ាងច្រើន យកមកគ្រប់គ្រងវិញ ហើយឥឡូវនេះ ក្រុងកៀវ បន្ដទទួលរថពាសដែកប្រយុទ្ធ មកពីប្រទេសលោកខាងលិចបន្ថែមទៀត។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃព្រហស្បតិ៍ ទី៥ ខែមករា ថា លោក អែមម៉ាញ៉ែល ម៉ាក្រុង (Emmanuel Macron) ប្រធានាធិបតីបារាំង បានប្រាប់ដល់សមភាគីអ៊ុយក្រែន លោក វ៉ូឡូឌីមៀរ ហ្សេឡែនស្គី (Volodymyr Zelenskyy) តាមទូរស័ព្ទ កាលពីថ្ងៃពុធ ថា រដ្ឋាភិបាលរបស់គាត់ នឹងបញ្ជូនរថចម្បាំង ប្រភេទ AMX-10 RC ផលិត នៅក្នុងប្រទេសបារាំង ទៅជួយជ្រោមជ្រែង ដល់កិច្ចខិតខំប្រឹងប្រែងការពារទឹកដីរបស់អ៊ុយក្រែន។

មន្រ្ដីបារាំង បានបញ្ជាក់ ក្រោយជំនួបតាមទូរស័ព្ទរបស់មេដឹកនាំទាំងពីរ ថា «នេះជាលើកទី១ ដែលរថចម្បាំង ផលិតដោយបស្ចិមលោក កំពុងតែបញ្ជូន ទៅជួយគាំទ្រ ដល់កងទ័ពការពារទឹកដីរបស់អ៊ុយក្រែន»។

ទោះជាយ៉ាង មន្រ្ដីរដ្ឋាភិបាលបារាំង មិនបានផ្ដល់ព័ត៌មានលម្អិត អំពីចំនួនរថពាសដែក ដែលនឹងត្រូវដឹកបញ្ជូន ទៅកាន់ប្រទេសអ៊ុយក្រែន នោះឡើយ។ ប៉ុន្ដែមន្រ្ដីបារាំង គ្រាន់តែប្រាប់ ថា គ្រឿងសឹកទាំងនោះ ជាប្រភេទយានយន្ដយោធារបស់កងទ័ពបារាំង។

រយៈពេលមួយម៉ោង ក្រោយពេលមេដឹកនាំបារាំង និង អ៊ុយក្រែន បានជួបគ្នារួចមក លោក ចូ បៃដិន (Joe Biden) ប្រធានាធិបតីសហរដ្ឋអាមេរិក បានបញ្ជាក់ ថា ក្រុងវ៉ាស៊ីនតោន កំពុងតែគិតពិចារណា អំពីការបញ្ជូនរថចម្បាំង Brdley ទៅជួយដល់ប្រទេសអ៊ុយក្រែន បន្ថែមទៀត។

Bradley ជារថពាសដែកប្រយុទ្ធមធ្យម អាចបម្រើការងារ ជាយានដឹកកងទ័ព ហើយវាមានទម្ងន់ស្រាល និង អាចបត់បែនបានយ៉ាងរហ័សរហួន ជាងប្រភេទរថចម្បាំងផ្សេងៗទៀត។ រថពាសដែក ប្រភេទនេះ អាចដឹកកងទ័ពបាន ប្រហែលចំនួន១០នាក់ ឬ ត្រូវជំនួសមកវិញ ដោយការផ្ទុកគ្រាប់រំសេវ ឬ ឧបករណ៍ទំនាក់ទំនងបន្ថែមផ្សេងៗទៀត។

រហូតមកដល់ពេលនេះ សហរដ្ឋអាមេរិក បានបំពាក់រថពាសដែក Bradleys រាប់ពាន់គ្រឿង ដល់កងទ័ពរបស់ខ្លួន ហើយពួកគេអាចនឹងផ្គត់ផ្គង់គ្រាប់រំសេវបន្ថែមទៀត ជួយដល់កងទ័ពការពារទឹកដីរបស់អ៊ុយក្រែន ដែលកំពុងវាយប្រយុទ្ធ នៅលើសមរភូមិប្រយុទ្ធ និង បង្កើនសមត្ថភាព ទប់ទល់នឹងសង្គ្រាមរបស់រុស្ស៊ី។

មន្ទីរបញ្ចកោណ បានបញ្ជូនរថពាសដែកជាង២ពាន់គ្រឿងរួចមកហើយ នាំទៅផ្គត់ផ្គង់ដល់ប្រទេសអ៊ុយក្រែន រួមទាំង យានទប់ទល់នឹងគ្រាប់មីន ចំនួន៤៧៧គ្រឿង និង រថយន្ដយោធា Humvee ជាង ១២០០គ្រឿង។

ការផ្គត់ផ្គង់គ្រឿងសឹកចុងក្រោយរបស់បណ្ដាប្រទេសមហាអំណាចបស្ចិមលោក ជួយដល់ក្រុងកៀវ នៅតែមានការខ្វះខាត ដោយមិនបានផ្ដល់រថក្រោះដ៏ទំនើប Abrams ផលិតដោយសហរដ្ឋអាមេរិក និង រថក្រោះ Leopard ផលិតដោយអាល្លឺម៉ង់។ ក្រុងកៀវ តែងតែស្នើសុំម្តងហើយម្តងទៀត ជំរុញឲ្យសម្ពន្ធមិត្តលោកខាងលិច ជួយផ្គត់ផ្គង់យ៉ាងពិសេសនូវរថក្រោះប្រភេទទាំងនេះ ខណៈកងទ័ពការពារទឹកដីរបស់អ៊ុយក្រែន កំពុងតែប្រយុទ្ធជាមួយនឹងទាហានរុស្ស៊ី នៅក្នុងសង្គ្រាមរដូវរងា ហើយដែនដីរបស់ខ្លួន ក្រាលដោយទឹកកក អាចងាយស្រួល ប្រើប្រាស់រថក្រោះធុនធ្ងន់ នៅតាមជនបទ នៃប្រទេសអ៊ុយក្រែន។

ប្រធានាធិបតីអ៊ុយក្រែន បានសង្កត់ធ្ងន់ ថា «យើងត្រូវតែបញ្ចប់នូវការឈ្លានពានរបស់រុស្ស៊ី នៅឆ្នាំ។ រថក្រោះ និង រថពាសដែកដ៏ទំនើបៗរបស់បណ្ដាប្រទេសបស្ចិមលោក ក្លាយជាទ្រព្យសម្បត្ដិដ៏សំខាន់ ដែលអ៊ុយក្រែន ចង់បានបំផុត សម្រាប់វាយបណ្ដេញទាហានរបស់ក្រុងមូស្គូ ឲ្យចេញអស់ពីប្រទេសរបស់គាត់»។

លោក អេនឌ្រី ឆឺនៀក (Andriy Cherniak) មន្រ្ដីទីភ្នាក់ងារស៊ើបការណ៍សម្ងាត់របស់ក្រសួងការពារជាតិអ៊ុយក្រែន បានអះអាង ថា «នៅក្នុងរយៈពេល៤-៥ខែខាងមុខ រុស្ស៊ី អាចនឹងបាត់បង់ទាហានបន្ថែម រហូតដល់ ៧០ ០០០នាក់។ ចំណែកមេដឹកនាំ នៅក្នុងតំបន់កាន់កាប់ដោយរុស្ស៊ី ក៏នឹងត្រូវបាត់បង់ដូចគ្នាផងដែរ។ ចំណែកមេដឹកនាំរុស្ស៊ី ក៏បានដឹងខ្លួន កាន់តែច្បាស់ហើយថា ក្រុងមូស្គូ នឹងចាញ់សង្គ្រាមនេះ ប៉ុន្ដែពួកគេនៅតែមិនមានគម្រោងបញ្ចប់សង្គ្រាមនេះឡើយ»។

ដោយឡែក បណ្ដាប្រទេសបស្ចិមលោក បានមើលឃើញសញ្ញាថ្មីមួយ ថា ក្រុងមូស្គូ នឹងមិនដកខ្លួនថយចេញពីអ៊ុយក្រែន នោះទេ ព្រោះប្រធានាធិបតីរុស្ស៊ី លោក Vladimir Putin កាលពីថ្ងៃពុធ បានបញ្ជូននាវាចម្បាំង បំពាក់ដោយមីស៊ីល មានល្បឿនលឿនជាងសំឡេងជំនាន់ថ្មី អាចហោះលឿនជាងសំឡេងជាង៥ដង បញ្ជូនទៅធ្វើប្រតិបត្ដិការ នៅក្នុងមហាសមុទ្រអាត្លង់ទិក មហាសមុទ្រឥណ្ឌា និង សមុទ្រមីឌីទែររ៉ាណេ៕

វៀតណាម៖ មន្ត្រីវៀតណាមបញ្ជាក់យ៉ាងដូច្នេះថាក្មេងប្រុសអាយុ១០ឆ្នាំម្នាក់ដែលបានធ្លាក់ចូលក្នុងរណ្តៅបេតុងជម្រៅ ៣៥ ម៉ែត្របបន្ទាប់ពីទៅរើសអេតចាយជាមួយមិត្តភ័ក្តិ បានទទួលមរណភាពហើយក្រោយពីខណៈប្រតិបត្តិការពីក្រុមជួយសង្គ្រោះនៅមិនទាន់អាចយកសាកសពមកខាងលើបាន។

នាថ្ងៃទី៥ ខែមករា ឆ្នាំ២០២២ទីភ្នាក់ងារសារព័ត៌មានបរទេសរាយការណ៍ពីទីក្រុងហាណូយ នៃប្រទេសវៀតណាម អំពីករណីក្មេងប្រុស Tai Li Hao Nam អាយុ១០ឆ្នាំ បានធ្លាក់ចូលទៅក្នុងរណ្តៅបេតុង ជម្រៅ៣៥ម៉ែត្រ និងទទឹងតែ២៥សង់ទីម៉ែត្រ ហើយបានជាប់នៅក្នុងនោះតាំងពីថ្ងៃចូលឆ្នាំសកល ពេលចេញ ទៅដើររកអេតចាយជាមួយមិត្តភ័ក្តិ ៣ នាក់ទៀតនៅតំបន់គម្រោងសាងសង់ស្ពាននៅស្រុក Thang Binh នៃខេត្តដុងថាប វៀតណាមខាងត្បូង។

ជាមួយគ្នានោះ ដែលមន្រ្តីបានបញ្ជាក់ថា ក្រុមអ្នកេជួយសង្គ្រោះបានព្យាយាមអស់ពីសមត្ថភាពដើម្បីជួយ Tai Li Hao Nam ប៉ុន្តែពួកគេមិនអាចរកឃើញជនរងគ្រោះឡើយ ខណ៖”សញ្ញាឆ្លើយតប” ពីក្មេងប្រុសតាំងពីថ្ងៃច័ន្ទកន្លងមកបានបាត់បងលលែងមានសញ្ញានៃជីវិតអ្វីទាំងអស់។

យ៉ាងណាមិញថ្មីៗនេះអាជ្ញាធរខេត្ត Dong Thap បានចេញផ្សាយរបាយការណ៍មួយទៅកាន់ប្រព័ន្ធផ្សព្វផ្សាយបញ្ជាក់ថា ក្មេងប្រុសរងគ្រោះនោះបានស្លាប់ហើយ  ហើយជំហានបន្ទាប់ គឺជាប្រតិបត្តិការមួយដើម្បីយកសពក្មេងប្រុសមកខាងលើវិញ ទីបំផុតគេបានរកឃើញ និងបានបង្ហាញថាជនរងគ្រោះមានស្នាមរបួសយ៉ាងធ្ងន់ធ្ងរលើដងខ្លួន និងកង្វះអុកស៊ីសែន។

ជាមួយគ្នានោះផងដែរប្រព័ន្ធផ្សព្វផ្សាយក្នុងស្រុករបស់វៀតណាមបានរាយការណ៍ដូចគ្នា ទាក់ទងនឹង ការយល់ឃើញរបស់មហាជន ដោយមានការភ្ញាក់ផ្អើល និងមានការរិះគន់យ៉ាងខ្លាំងដែល ទាក់ទងនឹងការសាងសង់ស្ពាននេះបានចាប់ផ្តើមប្រហែលប្រាំមួយខែមុនមុនកើតហេតុ​ ប៉ុន្តែតំបន់នោះមិនត្រូវបានដាក់បំរាមហាមឃាត ឬបិទនោះទេ៕ ប្រភព៖ Dailynews

តៃវ៉ាន់ ៖ តៃវ៉ាន់នឹងចែកប្រាក់ចំនួន៦.០០០ដុល្លារតៃវ៉ាន់ដល់ពលរដ្ឋរបស់ខ្លួននៅឆ្នាំ២០២៣ ដោយបញ្ជាក់ថា ប្រាក់នេះជាការតបស្នងពីការលូតលាស់សេដ្ឋកិច្ចស្មើ៦,៤៥%ក្នុងឆ្នាំ២០២១ វាជាការលូតលាស់យ៉ាងរហ័សតាំងពីឆ្នាំ២០១០ ។

លោកនាយករដ្ឋមន្ត្រីតៃវ៉ាន់ Su Zhengchang បានប្រកាសកាលពីថ្ងៃទី៤ ខែមករាថា រដ្ឋាភិបាលតៃវ៉ាន់នឹងផ្តល់ប្រាក់ដល់ពលរដ្ឋក្នុងម្នាក់៦.០០០ដុល្លារតៃវ៉ាន់ ដោយប្រើប្រាស់ទឹកប្រាក់សរុប១៤០.០០០លានដុល្លារតៃវ៉ាន់ ។ វាជាប្រាក់ចំណូលមួយផ្នែករបស់រដ្ឋាភិបាល ដែលបានពីការប្រមូលពន្ធលើសគោលដៅ ។ រដ្ឋាភិបាលនឹងបែងចែកផលសម្រេចខាងសេដ្ឋកិច្ចដល់ពលរដ្ឋតៃវ៉ាន់គ្រប់រូប ប៉ុន្តែការបែងចែកនេះត្រូវឆ្លងកាត់ការយល់ព្រមពីរដ្ឋសភាតៃវ៉ាន់ផងដែរ ។

លោកនាយករដ្ឋមន្ត្រីបន្តថា លោកជូនពរដល់ពលរដ្ឋតៃវ៉ាន់ទាំងអស់ជួបតែសេចក្តីសុខក្នុងឱកាសបុណ្យចូលឆ្នាំចិនខាងមុខនេះ ដែលនឹងចាប់ផ្តើមតាំងពីថ្ងៃទី២០ ខែមករា តែលោកមិនបានបង្ហើបថា រដ្ឋាភិបាលនឹងចែកប្រាក់នោះទៅពលរដ្ឋតាមវិធីណាទេ ។

តៃវ៉ាន់ គឺជាអ្នកនាំចេញទំនិញបច្ចេកវិទ្យាធំមួយ មានបន្ទះអេឡិចត្រូនិកជាផ្នែកសំខាន់ មានអត្រាលូតលាស់ខាងសេដ្ឋកិច្ចខ្ពស់ដល់៦,៤៥%ក្នុងឆ្នាំ២០២១ គឺបានលូតលាស់យ៉ាងឆាប់រហ័សតាំងពីឆ្នាំ២០១០មក ដែលមានតួលេខខ្ពស់ដល់១០,២៥% ។ រដ្ឋាភិបាលតៃវ៉ាន់បានដាក់ផែនការផ្តល់ទឹកប្រាក់បន្ថែមចំនួន៣៨០.០០០លានដុល្លារតៃវ៉ាន់ដើម្បីជំរុញសេដ្ឋកិច្ច និងការពារតៃវ៉ាន់ពីការជាប់គាំងសេដ្ឋកិច្ច ដូចជា ការប្រគល់ប្រាក់ឧបត្ថម្ភថ្លៃអគ្គិសនី ការជួលកម្លាំងពលកម្ម និងថ្លៃធានារ៉ាប់រងសុខភាព ៕

ប្រភព ៖ TNN World