រដ្ឋធានីប៊ែរឡាំង៖ ក្រោយពេលប្រធានាធិបតី លោក វ៉្លាឌីមៀ ពូទីន (Vladimir Putin) បានចេញក្រឹត្យមួយ ដាក់បម្រាម ដល់ការលក់ប្រេងទៅកាន់ប្រទេសណាមួយ ធ្វើតាមក្រុមប្រទេស G7 ដោយបានកំណត់តម្លៃប្រេងរបស់ក្រុងមូស្គូ ត្រឹមតែ៦០ដុល្លារនោះមក ប្រទេសអាល្លឺម៉ង់ បានសម្រេចបញ្ឈប់នូវការនាំចូលប្រេងរបស់រុស្ស៊ី តាមបំពង់បង្ហូរប្រេង ខណៈចក្រភពអង់គ្លេស ក៏បានបញ្ឈប់នូវការទិញឧស្ម័នរបស់រុស្ស៊ី ក្រោមហេតុផលដូចគ្នា។

គេហទំព័រ Oil Price បានចេញផ្សាយ កាលពីថ្ងៃចន្ទ ទី២ ខែមករា ថា ប្រទេសអាល្លឺម៉ង់ កាលពីថ្ងៃទី១ ខែមករា បានផ្អាកនូវការនាំចូលប្រេង តាមបំពង់បង្ហូរពីប្រទេសរុស្ស៊ី។ ការសម្រេចចិត្តរបស់ក្រុងប៊ែរឡាំង បានធ្វើឡើង តាមការសន្យាពីមុន ដើម្បីបញ្ឈប់ការទិញប្រេងឆៅ តាមបំពង់បង្ហូរប្រេងរបស់រុស្ស៊ី ថ្វីបើការហាមឃាត់របស់សហភាពអឺរ៉ុប មានការលើកលែងនូវការទិញប្រេង តាមបំពង់បង្ហូរ ពីប្រទេសរុស្ស៊ី មកកាន់តំបន់អឺរ៉ុប យ៉ាងក៏ដោយ។

សហភាពអឺរ៉ុប ហាមឃាត់ដល់ការនាំចូលប្រេងឆៅរបស់រុស្ស៊ី ដឹកចូលតាមច្រកសមុទ្រ ត្រូវបានចូលជាធរមាន កាលពីថ្ងៃទី៥ ខែធ្នូ ឆ្នាំ២០២២។ ប៉ុន្ដែបម្រាមនេះ មានការលើកលែងនូវការនាំចូលប្រេងរបស់រុស្ស៊ី តាមបំពង់បង្ហូរប្រេង ទៅកាន់បណ្ដារដ្ឋជាសមាជិក នៃសហភាពអឺរ៉ុប។

ទោះជាយ៉ាងណាក៏ដោយ អាល្លឺម៉ង់ និង ប៉ូឡូញ បានបញ្ជាក់ ថា ប្រទេសអឺរ៉ុបទាំងនេះ នឹងបញ្ឈប់នូវការនាំចូលប្រេងឆៅ មកពីប្រទេសរុស្ស៊ី តាមរយៈបំពង់បង្ហូរប្រេងឌ្រូសបា (Druzhba) ចាប់ពីថ្ងៃទី១ ខែមករា ឆ្នាំ២០២៣នេះតទៅ។

បើតាមទីភ្នាក់ងារសារព័ត៌មានរបស់អាល្លឺម៉ង់ DPA បានផ្សាយ ថា ការផ្អាកនូវការនាំចូលប្រេងតាមបំពង់បង្ហូរប្រេងនេះ នឹងធ្វើឲ្យប៉ះពាល់ ដល់រោងចក្រចម្រាញ់ប្រេងនានា នៅក្នុងទីក្រុង Schwedt រដ្ឋប្រេនដែនប៊ឺគ (Bradenburg) និង ទីក្រុងលូណា (Leuna) រដ្ឋសាកសូនីអានហាល (Saxony-Anhatl) នាភាគខាងកើត ប្រទេសអាល្លឺម៉ង់។ ប៉ុន្ដែរដ្ឋាភិបាលក្រុងប៊ែរឡាំង បានបញ្ជាក់ ថា ជំនួសការផ្គត់ផ្គង់ ដល់រោងចក្រចម្រាញ់ប្រេងទាំងនោះ នឹងត្រូវទិញយក។

រដ្ឋាភិបាលអាល្លឺម៉ង់ បានដាក់អាជីវកម្មក្នុងប្រទេស សម្រាប់ក្រុមហ៊ុនប្រេងយក្ស Rosneft របស់រុស្ស៊ី ឱ្យស្ថិតក្រោមការធានា នៅក្នុងខែកញ្ញា ដោយប្រគល់នូវការគ្រប់គ្រង លើរោងចក្រចម្រាញ់ Schwedt ទៅឱ្យនិយតករទីផ្សារថាមពលរបស់ប្រទេស។ រោងចក្រ Schwedt នេះ ក្លាយជារោងចក្រចម្រាញ់ប្រេងដ៏ធំជាងគេលំដាប់លេខ៤ នៅក្នុងប្រទេសអាល្លឺម៉ង់ ហើយត្រូវបានគ្រប់គ្រង រហូតដល់៥៤ភាគរយ ដោយក្រុមហ៊ុនប្រេងរដ្ឋរបស់រុស្ស៊ី។ រោងចក្រចម្រាញ់ប្រេងមួយនេះ បានទទួលប្រេងឆៅ តាមបំពង់បង្ហូរប្រេង Druzhba ហើយបានផ្គត់ផ្គង់ប្រេងឥន្ធនៈ រហូតដល់៩០ភាគរយ នៅក្នុងរដ្ឋធានីប៊ែរឡាំង។

ស្របគ្នានេះដែរ ចក្រភពអង់គ្លេស បានប្រកាសជាផ្លូវការ ថា ក្រុងឡុងដ៍ បញ្ឈប់នូវការនាំចូលឧស្ម័ន (LNG) មកពីប្រទេសរុស្ស៊ី។ ការិយាល័យកិច្ចការបរទេសរបស់ចក្រភពអង់គ្លេស បានចាត់ទុកនូវការទិញឧស្ម័នទាំងនេះ នឹងផ្ដល់ប្រាក់ចំណូល សម្រាប់ផ្គត់ផ្គង់ហិរញ្ញវត្ថុ ជួយដល់សង្គ្រាមរបស់រុស្ស៊ី ដែលកំពុងតែបន្ដ នៅក្នុងប្រទេសអ៊ុយក្រែន។

ការិយាល័យកិច្ចការបរទេសរបស់ចក្រភពអង់គ្លេស បានបញ្ជាក់ នៅក្នុងបណ្ដាញសង្គម Tweet ថា «ថ្ងៃនេះ ចក្រភពអង់គ្លេស បានបញ្ចប់នូវការនាំចូលឧស្ម័ន មកពីប្រទេសរុស្ស៊ី ទាំងស្រុង។ យើងកំពុងតែកាត់ផ្ដាច់នូវមូលនិធិ ចេញពីលោក ពូទីន សម្រាប់យកលុយទៅផ្គត់ផ្គង់ដល់សង្គ្រាមរបស់គាត់ ហើយយើងក៏កំពុងតែគាំទ្រដល់បណ្ដាប្រទេសនានា នៅជុំវិញពិភពលោក ត្រូវតែកាត់បន្ថយនូវការពឹងផ្អែករបស់ពួកគេ ទៅលើប្រេង និង ឧស្ម័នរបស់រុស្ស៊ី»។

បច្ចុប្បន្ន សហរដ្ឋអាមេរិក ក្លាយជាអ្នកផ្គត់ផ្គង់ឧស្ម័ន (LNG) ដ៏ធំជាងគេបំផុត ដល់ចក្រភពអង់គ្លេស និង បណ្ដាប្រទេសផ្សេងៗទៀត នៅតំបន់អឺរ៉ុប។ អឺរ៉ុប បានខិតខំប្រឹងប្រែងយ៉ាងលំបាក សម្រាប់ការផ្តាច់ខ្លួន ចេញពីការទំនិញថាមពលរបស់រុស្ស៊ី ចាប់តាំងពីការឈ្លានពានរបស់ក្រុងមូស្គូ នៅក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ រហូតមក។ សហភាពអឺរ៉ុប បានហាមឃាត់ធ្យូងថ្មរបស់រុស្ស៊ី ហើយគ្រោងនឹងរារាំង ដល់ការនាំចូលប្រេង មកពីរុស្ស៊ី ភាគច្រើន នៅចុងឆ្នាំ២០២២ ដោយមានគោលបំណង ដកហូតប្រភពប្រាក់ចំណូលដ៏សំខាន់ ចេញពីក្រុងមូស្គូ យកទៅធ្វើសង្គ្រាម នៅក្នុងអ៊ុយក្រែន។

បើតាមសារព័ត៌មាន The Wall Street Journal បានរាយការណ៍ ថា ការនាំចូលឧស្ម័នរបស់រុស្ស៊ីរបស់ប្លុកសេរីមួយនេះ កើនឡើង ដល់៤១ភាគរយ នៅក្នុងឆ្នាំនេះ រហូតដល់ខែសីហា៕

ប្រទេសវៀតណាម៖ ក្រុមអ្នកជួយសង្គ្រោះនៅប្រទេសវៀតណាម កំពុងព្យាយាមជួយសង្គ្រោះក្មេងប្រុសអាយុ ១០ ឆ្នាំម្នាក់ បន្ទាប់ពីគេបានធ្លាក់ចូលទៅក្នុងរណ្តៅបេតុងនៅឯការដ្ឋានសំណង់មួយនៅភាគខាងត្បូងប្រទេសវៀតណាម។

ឧប្បត្តិហេតុនេះបានកើតឡើងនៅព្រឹកថ្ងៃសៅរ៍ ទី៣១ ធ្នូ ឆ្នាំ២០២២ នៅពេលដែល Li Hao Nam អាយុ ១០ ឆ្នាំ រួមនឹងមិត្តភ័ក្តិបីនាក់កំពុងស្វែងរកដែកអេតចាយនៅឯការដ្ឋានសាងសង់ស្ពាន Roxen  នៅក្នុងស្រុក Than Binh ខេត្តដុងថាប មុនពេលធ្លាក់ចូលទៅក្នុងរណ្តៅបេតុងតូចចង្អៀត ដែលមានទទឹងត្រឹមតែ ២៥ សង់ទីម៉ែត្រ ជម្រៅប្រហែល ៣៥ ម៉ែត្រ ហើយបានជាប់គាំងនៅក្នុងនោះ។

ជាមួយគ្នានោះអាជ្ញាធរបាននិយាយថាក្មេងប្រុសម្នាក់នេះបានស្រែករកជំនួយបន្ទាប់ពីធ្លាក់ចូលក្នុងរណ្ដៅកាលពីថ្ងៃសៅ ប៉ុន្តែស្ថានភាពគួរឱ្យបារម្ភដោយនៅថ្ងៃច័ន្ទនេះ មិនមានការឆ្លើយតបណាមួយពីក្មេងប្រុសនោះទេ ខណៈដែលគេបានព្យាយាមយកកាមេរ៉ាដើម្បីកំណត់ទីតាំងគាត់នៅក្នុងរណ្តៅសសរបេតុងនោះ។

ទោះជាយ៉ាងណាពេញមួយយប់នៅថ្ងៃទី ២ និងថ្ងៃទី ៣ ខែមករា ឆ្នាំ២០២៣នេះ អ្នកជួយសង្គ្រោះប្រហែល ៣៥០ នាក់ត្រូវបានបែងចែកទៅជាក្រុមជាច្រើនដើម្បីធ្វើការជាបន្តបន្ទាប់ជួយសង្គ្រោះ ហើយនៅម៉ោងប្រហែល ៣ ទៀបភ្លឺថ្ងៃនេះ ក្រុមអ្នកជួយសង្គ្រោះបានប្រើប្រាស់បំពង់ដែកអង្កត់ផ្ចិត ១.៥ ម៉ែត្រ ដើម្បីបិទបាំងរន្ធដែលក្មេងប្រុសធ្លាក់ពីលើសសរបេតុងបន្ទាប់មកជីក និងជីកដីតាមរន្ធសសរបេតុង រួចលើករន្ធសសរបេតុងបន្តិចម្តងៗឡើង។

ទន្ទឹមនឹងនោះក្រុមអ្នកជួយសង្គ្រោះបាននិយាយថា គ្មាននរណាម្នាក់នឹកស្មានដល់ថាក្មេងប្រុសនោះអាចជាប់ក្នុងបង្គោលភ្លើងយ៉ាងជ្រៅនោះទេ ព្រោះចន្លោះខាងក្នុងគឺត្រឹមទទឹងបាតដៃរបស់មនុស្ស ពេញវ័យប៉ុណ្ណោះ។

ហើយបច្ចុប្បន្ន អាក្រុមអ្នកជួយសង្គ្រោះកំពុងព្យាយាម និងដុតដៃដុតជើង ព្រមទាំងប្រើឧបករណ៍ទំនើបៗដែលមាន និងប្រឹងប្រែងឱ្យអស់ពីសមត្ថភាពដើម្បីស្វែងរកវិធីសាស្ត្រសង្គ្រោះដ៏ល្អបំផុតក្នុងការជួយសង្គ្រោះក្មេងប្រុសនោះ៕ ប្រភព៖ Thairath

រាជធានីអូតតាវ៉ា (Ottawa)៖ ដោយសារសង្គ្រាមកំពុងតែបន្ដ និង មានគំនិតគិតគូរ អំពីសុវត្ថិភាពអាយុជីវិតរបស់កងទ័ពអ៊ុយក្រែន កំពុងតែធ្វើសង្គ្រាម ការពារទឹកដី និង សេរីភាពរបស់ពួកគេ ទើបក្រុមហ៊ុនផលិតរថចម្បាំងរ៉ូសែល (Roshel) របស់កាណាដា បានបញ្ជូនរថយន្ដដឹកទ័ពពាសដែក ប្រកបដោយបច្ចេកវិទ្យាជាន់ខ្ពស់ ជាង១០០គ្រឿង ទៅឲ្យកងទ័ព នៅក្នុងប្រទេសអឺរ៉ុបខាងកើតមួយនេះ។

សារព័ត៌មាន Defense បានចេញផ្សាយ កាលពីព្រឹក ថ្ងៃអង្គារ ទី៣ ខែមករា ថា រថយន្ដដឹកកងទ័ពពាសដែកក្រោះ ជាង១០០គ្រឿង កំពុងតែបញ្ជូនទៅកាន់ប្រទេសអ៊ុយក្រែន។ នេះជាផ្នែកមួយ នៃជំនួយយោធារបស់ក្រុងអូតតាវ៉ា សម្រាប់ក្រុងកៀវ និង ជាកិច្ចគាំទ្រ ជួយដល់ប្រទេសអឺរ៉ុបខាងកើត ដែលកំពុងតែហែកហួរ ដោយសារសង្រ្គាមរបស់ក្រុងមូស្គូ អស់រយៈពេល៣១៤ថ្ងៃ គិតត្រឹម ថ្ងៃទី១ ខែមករា។

តំណាងជាន់ខ្ពស់របស់ក្រុមហ៊ុនផលិតរថចម្បាំងរបស់កាណាដា បានបញ្ជាក់ ថា «ក្រុមហ៊ុន Roshel បានបញ្ជូនយានយន្ដពាសដែកក្រោះដឹកកងទ័ព ជាង១០០គ្រឿង ទៅកាន់ប្រទេសអ៊ុយក្រែន។ រហូតមកដល់ពេលនេះ ក្រុមហ៊ុន បានបញ្ជូនរថយន្ដប្រភេទនេះ ជាង៣០០គ្រឿង ទៅជួយដល់ប្រទេសអ៊ុយក្រែន សម្រាប់ប្រើប្រាស់ នៅក្នុងចម្បាំងនេះ។

រថយន្ដ Senator នេះ ជាប្រភេទយានយន្ដពាសដែកក្រោះដឹកកងទ័ព ទើបនឹងបង្កើតថ្មី ត្រូវបានដាក់ឲ្យដំណើរការ ជាលើកដំបូង នៅក្នុងអំឡុងឆ្នាំ២០១៨។ រថយន្ដដឹកកងទ័ព ប្រភេទនេះ ត្រូវបានរចនាឡើង សម្រាប់ការអនុវត្តច្បាប់ និង ការប្រើប្រាស់ សម្រាប់ល្បាត នៅតាមព្រំដែន។

កងទ័ពការពារទឹកដីរបស់អ៊ុយក្រែន បានប្រើប្រាស់រថយន្តទាំងនេះយ៉ាងសកម្ម នៅក្នុងអំឡុងការវាយលុករបស់កម្លាំងទាហានរបស់រុស្ស៊ី នៅភាគខាងកើត និង ភាគខាងត្បូង ប្រទេស។ លើសពីនេះ រថពាសដែកមួយឈុត ត្រូវបានប្រគល់ទៅឱ្យកងទ័ពការពារព្រំដែន ដើម្បីធានាដល់សន្តិសុខ នៅតាមព្រំដែនរបស់អ៊ុយក្រែន ជាប់ជាមួយនឹងបេឡារុស ដែលជាសម្ពន្ធមិត្តដ៏ជិតស្និទ្ធបំផុតរបស់ក្រុងមូស្គូ។

ក្រុមហ៊ុន Roshel បានបញ្ជាក់ទៀត ថា តួរថយន្ត ប្រភេទនេះ ត្រូវបានរចនាឡើងយ៉ាងពិសេស សម្រាប់បញ្ចូលនូវសម្ភារៈការពារកម្ដៅ និង សំឡេងរំខានកម្រិតខ្ពស់ និង ផាសុភាពដល់អ្នកប្រើប្រាស់វា។ រថយន្តនេះ ក៏បានបំពាក់ម៉ាស៊ីនត្រជាក់យ៉ាងល្អបំផុត សម្រាប់ការប្រើប្រាស់ ប្រកបដោយផាសុកភាព នៅក្នុងបរិយាកាសដ៏អាក្រក់បំផុត។

រថយន្ដ ប្រភេទ Senator នេះ បានពាសដែក នៅតាមបរិវេណកន្លែងរបស់អ្នកជិះ និង កន្លែងដាក់ម៉ាស៊ីន។ លើសពីនេះទៅទៀត រថយន្ដស៊េរីនេះ ក៏ត្រូវបានរចនាឡើង ដើម្បីផ្តល់កិច្ចការពារ រហូតដល់កម្រិតគ្រាប់ផ្លោង CEN B7។ ប៉ុន្តែគ្រឿងសឹករបស់រថយន្ដ ប្រភេទនេះ ធន់នឹងផលប៉ះពាល់ខ្លាំង។ ចំណែកផ្នែកខាងក្រោមរបស់រថយន្ដ ត្រូវបានបំពាក់ជាមួយនឹងដែកក្រោះការពារគ្រឿងបំផ្ទុះ សម្រាប់ការពារដល់អ្នកបើកបរ នៅក្នុងករណីមានការបំផ្ទុះគ្រាប់ នៅក្នុងពេលដំណាលគ្នា ឬ គ្រាប់មីនធុនស្រាល សម្រាប់ប្រឆាំងនឹងមនុស្ស៕

បរទេស៖ មនុស្សយ៉ាងហោចណាស់ ១៤ នាក់ត្រូវបានបាត់បង់ជីវិត របួស ១៣ នាក់ និងអ្នកទោសចំនួន ២៤ នាក់ផ្សេងទៀតបានរត់គេចខ្លួនបាត់ស្រមោលពីពន្ធនាគារនៅប្រទេសម៉ិកស៊ិក រហូតក្រុមប្រដាប់អាវុធនៃពន្ធនាគារ បើកការវាយប្រហារឡើង។

កាលពីថ្ងៃទី ២ ខែមករា ឆ្នាំ២០២៣ មានសេចក្ដីរាយការណ៍ពីសារព័ត៌មាន CNN បានឱ្យដឹងថាមានករណីនៃការ វាយប្រហាររបស់ក្រុមប្រដាប់អាវុធ ក្នុងគុក Ciudad Juárez នៃរដ្ឋ Chihuahua ប្រទេសម៉ិកស៊ិក។

ហេតុការណ៍នេះបានចាប់ផ្តើមនៅម៉ោងប្រហែល ៧:០០ ព្រឹក ម៉ោងក្នុងស្រុកកាលពីថ្ងៃអាទិត្យកន្លង នៅពេលដែលក្រុមប្រដាប់អាវុធក្នុងរថពាសដែកបានមកដល់ពន្ធនាគារពួកគេបានធ្វើការបាញ់ប្រហារលើ បុគ្គលិកសន្តិសុខ ងរហូតធ្វើឱ្យមន្ត្រី ១០ នាក់ និង ទណ្ឌិត ៤ នាក់បានស្លាប់ និង១៣ នាក់ផ្សេងទៀត រងរបួស។

លើសពីនេះជាមួយនឹងហេតុការណ៍មួយនេះផងដែរអ្នកទោសរហូតទៅដល់ ២៤ នាក់បានរត់គេច ចេញពីពន្ធនាគារបាត់ស្រមោល។

ប្រភពដដែលបានបង្ហាញថាអំពើអំពើហឹង្សាដែលបានកើតឡើងនេះ វាមិនមែនជាលើកទីមួយទេដែលវាផ្ទុះនៅក្នុងគុក ព្រោះនៅខែសីហាឆ្នាំមុន ទាហានម៉ិកស៊ិករាប់រយនាក់មាន ការប៉ះទង្គិចគ្នារវាងក្រុមទាំងពីររវាងក្រុម Juarez និងក្រុម Sinaloa ដែលនាំឱ្យមានកុប្បកម្ម និង ការបាញ់ប្រហារ រហូតបង្កឱ្យមានមនុស្សចំនួន ១១ នាក់បានស្លាប់។ ហើយករណីកើតឡើងខាងលើគេនៅមិនទាន់ច្បាស់ថាក្រុមណានៅពីក្រោយករពណីនេះនៅឡើយទេ។

គួរបញ្ជាក់ផងដែរថាពន្ធនាគារ Ciudad Juárez គឺជាទីតាំងនៃព្រំដែនអាមេរិក-ម៉ិកស៊ិក ក្នុងរដ្ឋតិចសាស់ គដែលជាទីក្រុងគ្រោះថ្នាក់បំផុតមួយរបស់ម៉ិកស៊ិក និងជាមជ្ឈមណ្ឌលនៃអំពើហឹង្សារបស់ក្រុមជួញដូរគ្រឿងញៀន គូប្រជែងក្រុម Juarez និងក្រុម Sinaloa កំពុងប្រយុទ្ធនឹងសង្រ្គាមបង្ហូរឈាមក្នុងតំបន់សម្រាប់ផ្លូវរត់ពន្ធ និងការជួញដូរគ្រឿងញៀនយ៉ាងសកម្ម៕ ប្រភព៖ pptvhd36

អន្តរជាតិ៖ ប្រព័ន្ធផ្សព្វផ្សាយរដ្ឋបានរាយការណ៍ថា ប្រទេសកូរ៉េខាងជើងបានបណ្តេញលោក ផាក ជុងឈុន (Pak Jong Chon) ដែលជាមន្ត្រីយោធាដ៏មានឥទ្ធិពលបំផុតទីពីរ បន្ទាប់ពីមេដឹកនាំកំពូល លោក គីម ជុងអ៊ុន (Kim Jong Un)។ នេះបើយោងតាមការចុះផ្សាយដោយ ទីភ្នាក់ងារសារព័ត៌មាន AFP នៅថ្ងៃចន្ទ ទី២ ខែមករា ឆ្នាំ២០២៣។

កាលពីថ្ងៃអាទិត្យចុងសប្តាហ៍កន្លងទៅនេះ ទីភ្នាក់ងារសារព័ត៌មាន KCNA បានឲ្យដឹងថា លោក ផាក អនុប្រធានគណៈកម្មាធិការយោធាមជ្ឈិមនៃគណបក្សពលករ ដែលកំពុងកាន់អំណាច និងជាលេខានៃគណៈកម្មាធិការមជ្ឈិមបក្ស ត្រូវបានជំនួសតំណែងដោយលោក រី យុងហ្គីល (Ri Yong Gil) ក្នុងកិច្ចប្រជុំប្រចាំឆ្នាំរបស់គណៈកម្មាធិការកាលពីសប្តាហ៍មុន។ ប៉ុន្តែគ្មានការបញ្ជាក់ណាមួយអំពីហេតុផលនៃការផ្លាស់ប្តូរនេះទេ។

ការផ្លាស់ប្តូរតំណែងរបស់លោក ផាក បានកើតឡើងនៅពេលដែលលោក គីម បានអំពាវនាវឲ្យមានការអភិវឌ្ឍ មីស៊ីលផ្លោងអន្តរទ្វីបថ្មី និងឃ្លាំងអាវុធនុយក្លេអ៊ែរធំជាងមុន ដើម្បីប្រឆាំងនឹងសហរដ្ឋអាមេរិក និងកូរ៉េខាងត្បូង ដែលជាគន្លឹះនៃយុទ្ធសាស្ត្រការពារប្រទេសឆ្នាំ២០២៣។

គួរបញ្ជាក់ថា លោក ផាក បានឡើងតំណែងបន្តបន្ទាប់យ៉ាងឆាប់រហ័ស ពីមេបញ្ជាការកងកាំភ្លើងធំ ដែលពាក់ផ្កាយមួយក្នុងឆ្នាំ ២០១៥ ទៅជាឧត្តមសេនីយ៍ផ្កាយបួន ក្នុងឆ្នាំ២០២០ ដោយសារស្នាដៃសម្រាប់ការរួមចំណែកដល់វឌ្ឍនភាព ក្នុងការអភិវឌ្ឍបច្ចេកវិទ្យាមីស៊ីលរយៈចម្ងាយខ្លី។ ក្រោយមក នៅចុងឆ្នាំ២០២០ លោក ផាក ត្រូវបានដំឡើងឋានៈ ជាសាមជិកនៃការិយាល័យនយោបាយរបស់បក្ស និងទទួលបានងារជាសេនាប្រមុខយោធា ដែលជាឋានៈខ្ពស់បំផុតក្នុងជួរយោធា ក្រោមការដឹកនាំរបស់លោក គីម។

ប៉ុន្តែ លោក ផាក ក៏ដូចជំនួយការយោធាកំពូលៗដទៃទៀត ដែលបានឡើងនិងទម្លាក់ពីតួនាទីក្នុងពេលយ៉ាងឆាប់រហ័ស គឺត្រូវបានបន្ទាបតួនាទីអស់មួយរយៈ កាលពាក់កណ្តាលឆ្នាំ២០២១ នោពេលលោក គីម បានស្តីបន្ទោសមន្ត្រីមួយចំនួន ពាក់ព័ន្ធចំណាត់ការដោះស្រាយបញ្ហាជំងឺកូវីដ១៩ មុនពេលត្រូវបានដំឡើងឋានៈឡើងវិញ។ ចំណែកឯ លោក រី ដែលជាអ្នកស្នងតំណែងពីលោក ផាក ក៏ជាមេបញ្ជាការយោធាជាន់ខ្ពស់ផងដែរ ដែលធ្លាប់កាន់តំណែងសំខាន់ៗ រួមទាំងជាអគ្គសេនាធិការរបស់កងទ័ពជើងគោក និងជារដ្ឋមន្ត្រីការពារជាតិ​ ៕

ប្រទេសជប៉ុន ៖ សារព័ត៌មាន Kyodo News បានរាយការណ៍កាលពីថ្ងៃទី៣០ ធ្នូ កន្លងមកថា រដ្ឋាភិបាលជប៉ុនត្រៀមផ្តល់ប្រាក់ឧបត្ថម្ភដល់គ្រួសារណាដែលផ្លាស់ប្តូរទីលំនៅពួកគេចេញពីក្រុងតូក្យូ ចំនួនខ្ពស់ដល់១លានយេន (ស្មើ៧.៥០០ដុល្លារអាមេរិក) សម្រាប់គ្រួសារមានកូនម្នាក់ ដែលបន្ថែមពីចំនួន៣០០.០០០យេន ។ គោលការណ៍នេះ ជាផ្នែកមួយនៃការព្យាយាមកាត់បន្ថយការប្រមូលផ្តុំប្រជាជននៅក្នុងទីក្រុង ។

តាមប្រភពព័ត៌មានពីរឿងការផ្លាស់ប្តូរទីលំនៅឱ្យដឹងថា ការផ្តល់ប្រាក់នេះ គឺជាការលើកទឹកចិត្តថ្មីដែលស្នើផ្តល់ឱ្យក្រុមគ្រួសារណាស្ម័គ្រចិត្តប្តូរទីលំនៅរបស់ខ្លួន ។ ច្បាប់ថ្មីនេះនឹងយកមកអនុវត្តនាដើមខែមេសា ឆ្នាំ២០២៣ ។

អ្នករស់នៅទីក្រុងតូក្យូ បរិវេណជុំវិញ រួមទាំងខេត្ត Saitama, Chiba និង Kanagawa មានសិទ្ធិទទួលបានប្រាក់ពីការលើកទឹកចិត្តផ្លាស់ប្តូរទីលំនៅនេះ ។ ក្នុងនោះមានក្រុងប្រមាណ១.៣០០ ស្ថិតនៅក្នុងគម្រោងនេះ ។ អ្នកបានទទួលប្រាក់ត្រូវរស់នៅក្រុងស្ថិតក្នុងគម្រោងយ៉ាងតិចរយៈពេល៥ឆ្នាំ ហើយនឹងត្រូវដកប្រាក់មកវិញ បើពួកគេមិនផ្លាស់ទីលំនៅចេញតាមពេលកំណត់ ។ ពួកគេនឹងទទួលបានប្រាក់ឧបត្ថម្ភសម្រាប់កូនៗអាយុក្រោម១៨ឆ្នាំ ឬកូននៅរៀនថ្នាក់ជិតចប់វិទ្យាល័យ ។

គោលការណ៍លើកទឹកចិត្តថ្មីនេះ នឹងឆ្លុះបញ្ចាំងពីការតាំងចិត្តរបស់រដ្ឋាភិបាល ដែលគាំទ្រដល់គ្រួសារណាមានកូននៅរៀន ដើម្បីផ្លាស់ប្តូរទីលំនៅ ។ បើគូស្វាមីភរិយាណាមានកូនអាយុក្រោម១៨ឆ្នាំ ចំនួន២នាក់ផ្លាស់ប្តូរទីលំនៅនោះ ហើយចាប់ផ្តើមមុខរបរថ្មីនៅទីតាំងថ្មី ពួកគេនឹងទទួលបានប្រាក់ឧបត្ថម្ភខ្ពស់ដល់ទៅ៥លានយេនឯណោះ ។ កន្លងមក មានមនុស្សចំនួន២.៣៨១នាក់បានស្ម័គ្រចិត្តផ្លាស់ចេញពីទីក្រុង ដោយប្រើប្រាស់ប្រាក់ដែលរដ្ឋាភិបាលផ្តល់ឱ្យក្នុងអំឡុងឆ្នាំ២០២១ ៕

ប្រភព ៖ mgronline