ភ្នំពេញ៖ លោក ឡាយ សំណាង អនុប្រធាននាយកដ្ឋានហិរញ្ញវត្ថុ និងផ្គត់ផ្គង់ក្រសួងសង្គមកិច្ចអតីតយុវជន និងយុវនីតីសម្បទា និងជាអ្នកភ្នាក់ងាររបស់ក្រសួងដើម្បីទៅបើកប្រាក់ពីធនាគារ ត្រូវបានអង្គភាពប្រឆាំងអំពើពុករលួយចាប់ខ្លួនហើយ ពាក់ព័ន្ធនឹងការកិបគេងថវិការដ្ឋជាង៣០ម៉ឺនដុល្លារ។

លោកទេសរដ្ឋមន្ត្រី ឱម យ៉ិនទៀង បានបញ្ជាក់ប្រាប់ឱ្យដឹងថា អបពបញ្ជូនជនសង្ស័យ ឈ្មោះ ឡាយ សំណាង ទៅកាន់សាលាដំបូងរាជធានីភ្នំពេញ​ នៅព្រឹកថ្ងៃទី១១ ខែមករានេះ ករណីកិបគេងថវិការដ្ឋជាង ១,៥០០ លានរៀល (ជាង៣៨ម៉ឺនដុល្លារ) ក្នុងនោះមានទាំងការកិបគេងប្រាក់របបគោលនយោបាយរបស់រដ្ឋជូនជនពិការក្រីក្រនៅតាមសហគមន៍ចំនួនជិត ៤ពាន់នាក់ផងដែរ។

«ក្រៅអំពីការជាប់សង្ស័យលើអំពើពុករលួយ បទល្មើសកេងយកផលប្រយោជន៍ដោយខុសច្បាប់ ឡាយសំណាង នៅជាប់សង្ស័យអំពីបទល្មើសសម្អាតប្រាក់ទៀតផង»។ នេះបើតាមការបញ្ជាក់បន្ថែមរបស់ លោកទេសរដ្ឋមន្ត្រី៕

ភ្នំពេញ៖ លោកអ្នកប្រាកដជាបានអានអំពីប្រវត្តិទំនាក់ទំនងរវាងកម្ពុជានិងចិន ដែលបានភ្ជាប់ទំនាក់ទំនងជាមួយគ្នាតាំងដើមសម័យអាណាចក្រភ្នំមកម្ល៉េះ ក្នុងនោះកម្ពុជាជាភាគីដែលបានបញ្ជូនរាជទូតទៅកាន់ប្រទេសចិនមុន ហើយនៅអត្ថបទនេះ «KBN» នឹងបង្ហាញអំពីបណ្ដាបេសកទូតចិនដែលបានមកទស្សនកិច្ចនៅកម្ពុជាមុនគេបង្អស់វិញម្ដង។

បើតាមសៀវភៅប្រវត្តិទំនាក់ទំនងកម្ពុជា-ចិន មុនពេលបេសកទូតចិនធ្វើដំណើរមកកាន់ទឹកដីកម្ពុជាលើកដំបូង កម្ពុជាបានបញ្ជូនបណ្ណាការទៅថ្វាយស្ដេចចិនជាច្រើនលើក ក្នុងនោះនៅគ្រិស្ដសករាជឆ្នាំ២៤៣ ព្រះមហាក្សត្រនគរភ្នំ ព្រះបាទហ្វានឆាន (King Fan Chan) បានបញ្ជូនបណ្ណាការមានដូចជាក្រុមតន្ត្រីករ ឧបករណ៍ភ្លេង និងវត្ថុប្រចាំតំបន់ជាច្រើនទៀតទៅថ្វាយស្ដេចស៊ុនឈាន (Sun Qian) ដែលសោយរាជ្យនៅនគរតុងអ៊ូ (Dong Wu) ពោលគឺចំសម័យកាលសាមកុក ឬយុទ្ធសម័យនគរទាំងបី។ ព្រះបាទហ្វានឆាន ដែលហៅតាមសំនៀងភាសាចិននេះ ប្រហែលជាត្រូវនឹងភាសាខ្មែរហៅថា ព្រះបាទស្រីមារៈ (សិលាចារឹកនៅវ៉ូកាញ់)។

យោងតាមសៀវភៅប្រវត្តិសាស្ត្រខ្មែរបានសរសេរថា ក្នុងយុទ្ធសម័យនគរទាំងបី នគរអ៊ូដែលស្ថិតនៅភាគខាងកើតប្រទេសចិនមិនអាចធ្វើជំនួញ និងទំនាក់ទំនងជាមួយប្រទេសនៅប៉ែកខាងលិចបានឡើយ ដោយសារតែនៅខាងលិចនគរអ៊ូនេះមាននគរវ៉ី (Cao-Wei) និងនគរស៊ូ (Han-Shu) ដែលជាសត្រូវរបស់ខ្លួន ជាហេតុមិនអាចឆ្លងកាត់បាន។ ដូច្នេះហើយទើបនគរតុងអ៊ូត្រូវងាកមកធ្វើជំនួញ និងរឹតចំណងមេត្រីភាពជាមួយប្រទេសដទៃតាមផ្លូវសមុទ្រវិញ ក្នុងនោះក៏មាននគរភ្នំរបស់ខ្មែរផងដែរ។

ពាក់ព័ន្ធនឹងទំនាក់ទំនងរវាងប្រទេសមិត្តទាំងពីរនេះ សៀវភៅប្រវត្តិសាស្ត្រចិនដែលសរសេរដោយជនជាតិបារាំង ហ្សាក ហ្ស៊ែរណេ (Jacques Gernet) ក៏បានបញ្ជាក់ថា នគរតុងអ៊ូបានបញ្ជូនបេសកជន និងអ្នកជំនួញពីប្រទេសខ្លួនឱ្យមកកាន់នគរភ្នំលើកដំបូងនៅគ្រិស្ដសករាជ ២២៨។

លុះដល់គ្រិស្ដសករាជ ២៤៥-២៥០ ស្ដេចនគរតុងអ៊ូ ស៊ុន ឈាន ក៏បានបញ្ចូលបេសកទូតចំនួន២រូបមកបំពេញទស្សនកិច្ចនៅនគរភ្នំ ក្នុងបំណងដើម្បីចងស្ពានមេត្រីជាមួយកម្ពុជា។ រាជទូតទាំងពីរនាក់នោះ ម្នាក់មានឈ្មោះ ខាង ថាយ (Kang Tai) មានតួនាទីជាពលទោនៃកងទ័ពតុងអ៊ូ និងម្នាក់ទៀតមានឈ្មោះ ជូ អ៉ីង (Zhu Ying) មានតួនាទីជាឃោសនករនៃនគរតុងអ៊ូ។

រាជទូត ខាង ថាយ និង ជូ អ៉ីង ក្រោយត្រលប់មកពីនគរភ្នំវិញ ពួកគេបានសរសេរនូវស្នាដៃដែលទាក់ទងនឹងទឹកដីភូមិសាស្ត្រ ធនធានផលិតផល និងប្រពៃណីរបស់អ្នកស្រុកនគរភ្នំ។ លោក ជូ អ៉ីង បានសរសេរនូវកំណត់ត្រាវត្ថុចម្លែកៗនៅនគរភ្នំ កត់ត្រានូវគំហើញនិងការជួបប្រទះផ្ទាល់ភ្នែកក្នុងពេលចុះទស្សនកិច្ចនៅនគរភ្នំ និងបណ្តានគរផ្សេងទៀត។ ចំណែកលោក ខាង ថាយ ក៏បានសរសេរនូវកំណត់ត្រាបរទេសសម័យអ៊ូ ឬហៅថា «តម្រាបរទេសសម័យអ៊ូ» ឬក៏អាចហៅថា «កំណត់ហេតុហ្វូណន» ហើយក៏អាចហៅម្យ៉ាងទៀតថា «ប្រវត្តិហ្វូណន»។ លោក ខាង ថាយ បានបញ្ជាក់ថា ប្រទេសកម្ពុជាមានទេសភាពល្អ ប៉ុន្តែរាស្រ្តលេងខ្លួនទទេគួរចម្លែក។

ឆ្លងកាត់ការសរសេរសៀវភៅទាំងនេះ ខាង ថាយ និង ជូ អ៉ីង បានរៀបរាប់អំពីស្ថានភាពនៅកម្ពុជានាសម័យនគរភ្នំដល់ប្រជាជនចិន ធ្វើឱ្យជនជាតិចិនយល់ដឹងនិងស្គាល់ពីកម្ពុជាបានកាន់ច្រើន រួមចំណែកដល់ការផ្សព្វផ្សាយប្រវត្តិសាស្ត្រ ទំនាក់ទំនង វប្បធម៌កម្ពុជានិងចិន។ ស្របពេលនោះដែរ ស្នាដៃលោកពីរក៏ជាឯកសារប្រវត្តិសាស្ត្រដែលបានរៀបរាប់ពីកម្ពុជានាសម័យនោះផងដែរ ៕

ភ្នំពេញ ៖ របាយការណ៍របស់អគ្គនាយកដ្ឋានគយ និងរដ្ឋាករកម្ពុជា បានឲ្យដឹងថា រយៈពេលពេញ១ឆ្នាំ២០២២ កម្ពុជាបាននាំចេញទំនិញទៅកាន់ទីផ្សារអន្តរជាតិ ក្នុងតម្លៃជាង ២២ពាន់លានដុល្លារ កើនឡើង១៦.៤% បើធៀបនឹងរយៈពេលដូចគ្នា កាលពីឆ្នាំ២០២១។

របាយការណ៍បញ្ជាក់ថា ពីខែមករា ដល់ខែធ្នូ ឆ្នាំ២០២២ កម្ពុជានាំចេញទំនិញក្នុងតម្លៃ ២២ ៤៨២ លានដុល្លារ កើនឡើង ១៦.៤% បើធៀបនឹងរយៈពេលដូចគ្នាកាលពីឆ្នាំមុន ដែលតម្លៃ ១៩ ៣០៨ លានដុល្លារ។ ទន្ទឹមគ្នានេះ កម្ពុជាបាននាំចូលទំនិញមកវិញក្នុងតម្លៃ ២៩ ៩៤១ លានដុល្លារ កើនឡើង ៤.៣% ដែលធ្វើឱ្យទំហំពាណិជ្ជកម្មរវាងកម្ពុជា និងទីផ្សារអន្តរជាតិ កើនឡើង ៥២ ៤២៤លានដុល្លារ កើនឡើង ៩.២%។

អាមេរិក គឺជាប្រទេសដែលកម្ពុជាបាននាំចេញទំនិញច្រើនជាង ដោយសម្រេចបានជាងជិត ៩ពាន់លានដុល្លារ ខណៈវៀតណាម ស្ថិតនៅលំដាប់ទី២ ដែលបានកម្ពុជាបានចេញទំនិញក្នុងតម្លៃជាង ២ពាន់លានដុល្លារ និងនាំចេញទៅចិន ក្នុងតម្លៃជាង ១២០០លានដុល្លារ រួមនឹងបណ្តាប្រទេស ដែលជាដៃគូនាំចេញទំនិញសំខាន់មួយចំនួនទៀត។

អគ្គនាយកដ្ឋានគយ និងរដ្ឋាករកម្ពុជាបានដឹងដែរថា កាលពីឆ្នាំ២០២២ កម្ពុជាបាននាំចេញសម្លៀកបំពាក់ ក្នុងតម្លៃជាង ៩ពាន់លានដុល្លារ , ម៉ាស៊ីន និងឧបករណ៍អគ្គិសនីតម្លៃជិត ២ពាន់លានដុល្លារ កើនឡើង ៨៤.៨%, គ្រាប់ធញ្ញជាតិចំនួនជាង ១២០០លានដុល្លារ ថយចុះ៣.៧% និងស្បែកជើងចំនួន ១៧ ០០លានដុល្លារ កើនឡើង២៤.៨%៕

នាយករដ្ឋមន្ត្រីវៀតណាម ផាម មិញ ជិញ(Pham Minh Chinh) បានបញ្ជាឱ្យស្ថាប័នពាក់ព័ន្ធ សម្រួលនីតិវិធីរដ្ឋបាលក្នុងការផ្តល់ទិដ្ឋាការតាមប្រព័ន្ធអេឡិចត្រូនិកដល់ជនបរទេស និងផ្លាស់ប្តូរគោលនយោបាយទិដ្ឋាការបច្ចុប្បន្ន ដើម្បីសម្រួលដល់ការចេញចូលរបស់ភ្ញៀវទេសចរឱ្យកាន់តែប្រសើរឡើង។

ប្រភពដដែលបន្តថាការសម្រេចចិត្តរបស់នាយករដ្ឋមន្ត្រីវៀតណាមបានធ្វើឡើងដោយសារតែវិស័យទេសចរណ៍ប្រទេសវៀតណាមស្ទុះងើបយឺតឆ្ងាយពីប្រទេសជិតខាងអាស៊ីអាគ្នេយ៍មួយចំនួនបើទោះបីជាប្រទេសនេះបើកឡើងវិញឆាប់ក៏ដោយ។

នៅក្នុងកិច្ចប្រជុំមួយកាលពីខែមុនស្តីពីការស្តារឡើងវិញនូវទេសចរណ៍អន្តរជាតិក្រោយកូវីដ១៩ រដ្ឋមន្ត្រីក្រសួងវប្បធម៌ កីឡា និង ទេសចរណ៍វៀតណាមបានស្នើរដ្ឋាភិបាលបន្តការស្នាក់នៅដោយគ្មានទិដ្ឋាការសម្រាប់ភ្ញៀវទេសចរបរទេសឱ្យដល់រយៈពេល៣០ថ្ងៃនិងផ្តល់ទិដ្ឋាការពេលមកដល់(Visa arrival )សម្រាប់ជន បរទេស ។

លោក ហ័ង ញាន ជិញ(Hoang Nhan Chinh) អគ្គលេខាធិការ ក្រុម ប្រឹក្សាទេសចរណ៍វៀតណាមបាននិយាយថា ប្រទេស វៀតណាម គួរតែពង្រីកបញ្ជីប្រទេសដែលមានសិទ្ធិលើក លែងទិដ្ឋាការ ព្រមទាំកផ្ដល់ទិដ្ឋាការស្នាក់នៅអតិបរមារហូតដល់៤៥ថ្ងៃ ដូចដែលប្រទេសថៃបានធ្វើ។

វៀតណាមទទួលបានភ្ញៀវទេសចរបរទេសតែ៣,៦លាននាក់កាលពីឆ្នាំមុន ដែលមានតែ៧០ភាគរយនៃគោលដៅកំណត់របស់ខ្លួន៕

ប្រភព៖ VN Express

ភ្នំពេញ៖ កម្លាំងការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តក្រចេះ សហការជាមួយកម្លាំងអធិការដ្ឋាននគរបាលស្រុកសំបូរ និងអាជ្ញាធរមូលដ្ឋាន នៅថ្ងៃទី៩ ខែមករា ឆ្នាំ២០២៣នេះ បានចុះបង្ក្រាបទីតាំងទទួលបញ្ចាំម៉ូតូ-រថយន្ដ ដោយគ្មានលិខិតអនុញ្ញាត ចំនួន០៦ទីតាំង នៅស្រុកសំបូរ ខេត្តក្រចេះ។

កម្លាំងនគរបាលបានចុះបង្ក្រាបទីបញ្ចាំគ្មានច្បាប់អនុញ្ញាត៦កន្លែងរួមមាន៖

*ទីតាំងទី១ ឈ្មោះ ជួប សុកុណា ភេទប្រុស អាយុ៤៩ឆ្នាំ ទីលំនៅភូមិកែងប្រាសាទ ឃុំសំបូរ ដោយដកហូតម៉ូតូចំនួន៤០គ្រឿង (ក្នុងនោះមានម៉ូតូសណ្តោងរឺម៉ក០១គ្រឿង) និងរថយន្ដចំនួន០១គ្រឿង។

*ទីតាំងទី២ ឈ្មោះ ឡាង ធា ភេទប្រុស អាយុ៥២ឆ្នាំ ទីលំនៅភូមិសណ្ដាន់ ឃុំសណ្ដាន់ ដោយដកហូតម៉ូតូចំនួន០៥គ្រឿង។

*ទីតាំងទី៣ ឈ្មោះ ឆីវ ម៉េង ភេទប្រុស អាយុ៥៥ឆ្នាំ ទីលំនៅភូមិសណ្ដាន់ ឃុំសណ្ដាន់ (ម៉ូតូគ្មាន)។

*ទីតាំងទី៤ ឈ្មោះ ប៉េង សុខឌី ភេទប្រុស អាយុ៤៦ឆ្នាំ ទីលំនៅភូមិសណ្ដាន់ ឃុំសណ្ដាន់ ដោយដកហូតម៉ូតូចំនួន១០គ្រឿង។

*ទីតាំងទី៥ ឈ្មោះ កេត សុធា ភេទប្រុស អាយុ៥៣ឆ្នាំ ទីលំនៅភូមិសំបូរ ឃុំសំបូរ ដោយដកហូតម៉ូតូចំនួន០៣គ្រឿង។

*ទីតាំងទី៦ ឈ្មោះ ហេង ម៉េងសុង ភេទប្រុស ទីលំនៅភូមិសំបូរ ឃុំសំបូរ ដោយដកហូតម៉ូតូចំនួន០២គ្រឿង ។

ចំពោះម្ចាស់ទីតាំងខាងលើ ត្រូវបានសមត្ថកិច្ចហៅមកសាកសួរ នៅអធិការដ្ឋាននគរបាលស្រុកសំបូរ ចំណែកវត្ថុតាងខាងលើដកហូតយកមករក្សាទុកបណ្ដោះអាសន្ននៅសាលាស្រុកសំបូរ ដើម្បីកសាងសំណុំរឿងតាមនីតិវិធី៕

ស្ត្រីអ្វី៧២ឆ្នាំម្នាក់មកបំភ្លៃព័ត៌មានប្រាប់សមត្ថកិច្ចនិងអាជ្ញាធរថាមានស្ត្រីម្នាក់យកកូនមកផ្លុងចោលនៅក្នុងបន្ទប់ផ្ទះសំណាក់របស់គាត់កាលពីយប់ថ្ងៃទី៨ខែមករា ឆ្នាំ២០២៣ ររហូតមកដល់រសៀលថ្ងៃទី៩ ខែមករា ឆ្នាំ២០២៣
ស្រាប់តែនៅព្រឹកថ្ងៃទី១០ខែមករាឆ្នាំ ២០២៤នេះបែជាម្តាយរបស់កូនតូចខាងលើមកសុំអាជ្ញាធរជួយអន្តរាគមន៍រកយុត្ដិធម័ទៅវិញ។

ស្ត្រីជាម្តាយក្មេងប្រុសខាងលេីបានរៀបរាប់ថា តាមពិតគាត់មានការទំនាក់ទំនងជាមួយកូនប្រុសថៅកែផ្ទះសំណាក់ស្កាយលាភរហូតជ្រុលជ្រួសមានកូនប្រុសម្នាក់ខាងលេីថែមទាំងមាននៅក្នុងផ្ទៃ៧ខែម្នាក់ទៀត នៅក្នុងពោះ ហេីយបុរសជាប្តីមិនបានផ្តល់ភាពកក់ក្តៅក៏ដូចជាថវិការដេីម្បីចិញ្ចឹមកូនទេរហូតមកដល់ថ្ងៃទី៨ ខែមករា គាត់ក៏បានយកកូនប្រុសរបស់គាត់មកអោយប្តីដេីម្បីចិញ្ចឹមដោយសារគាត់មិនមានលទ្ធភាពក្នុងការចិញ្ចឹមកូននោះទេ។

តែរឿងដែលហួសចិត្តនោះស្រាប់តែប្តីរបស់គាត់និងម្តាយក្មេកយកកូនប្រុសរបស់គាត់មកសាលាសង្កាត់ចោមចៅទី៣ ដោយបំភ្លៃព័ត៌មានថាមានស្ត្រីម្នាក់បើករថយន្តមួយគ្រឿងពីរនាក់ក្មេងប្រុសខាងលើទៅជួលបន្ទប់សម្រាកមួយសន្ទុះក្រោយមកស្ត្រីរូបនោះបានចុះមកវិញតែម្នាក់ឯងហើយប្រាប់កូនប្រុសរបស់គាត់ថាកូនគាត់ដេកលក់ហើយគាត់ចេញទៅទិញអីហូបមួយភ្លែតហើយក៏បើករថយន្តចេញទៅបាត់មិនឃើញមកវិញតាំងពីយប់ថ្ងៃទី ៨ ខែមករាឆ្នាំ ២០២៣ រហូតមកដល់រសៀលថ្ងៃទី ៩ ខែមករាឆ្នាំ ២០២៣ទៅវិញ។

ស្រាប់តែនៅព្រឹកថ្ងៃទី ១០ខែមករាឆ្នាំ ២០២៣នេះស្ត្រីជាម្តាយក្មេងខាងលើមកសាលាសង្កាត់ចោមចៅទី ៣ទាំងព្រឹកស្នេីសុំឲ្យអាជ្ញាធរជួយអន្តរាគមន៍ ដល់គាត់ផង។
គាត់យល់ព្រមឲ្យម្ដាយក្មេកនិងប្តីយកកូនទៅចិញ្ចឹម
ហើយគាត់គ្រាន់តែសុំពេលណាគាត់ចង់លេងកូនឬយកកូនទៅលេងផ្ទះម្តងម្កាលផង៕