ប្រទេសចិន ៖ តាមការចុះផ្សាយរបស់សារព័ត៌មានបរទេសនៅថ្ងៃទី២៦ ខែវិច្ឆិកា ឆ្នាំ២០២៥ មនុស្សយន្តចិនអាចដើរបានចម្ងាយរហូតដល់ជាង១០០គីឡូម៉ែត្រក្នុង១ថ្ងៃដោយពុំឈប់តាមផ្លូវ រហូតដល់បំបែកកំណត់ត្រាពិភពលោក Guinness World Records គឺជាមនុស្សយន្តដើរឆ្ងាយបំផុត ។ នេះបង្ហាញពីបច្ចេកវិទ្យាកាន់តែទំនើបខ្លាំងឡើងរបស់ក្រុមហ៊ុនផលិតមនុស្សយន្តនៅប្រទេសចិន និងអាចអភិវឌ្ឍន៍បច្ចេកវិទ្យាខ្លាំងជាងនេះសម្រាប់ប្រកួតប្រជែងជាមួយមនុស្សយន្តផលិតដោយក្រុមហ៊ុនផ្សេងៗលើពិភពលោក ។

ក្រុមហ៊ុនបច្ចេកវិទ្យាចិនឈ្មោះ AgiBot បានល្បីល្បាញលើពិភពលោក បន្ទាប់ពីក្រុមហ៊ុននេះផលិតមនុស្សយន្ត A2 អាចដើរបានចម្ងាយរហូតដល់១០៦គីឡូម៉ែត្រក្នុង១ថ្ងៃ ដោយចាប់ផ្តើមធ្វើដំណើរចាកចេញពីបឹងជិនជី ខេត្តជៀនស៊ូ ទៅកាន់ទីក្រុងសៀងហៃដោយជោគជ័យដោយពុំឈប់តាមផ្លូវ ។ នេះជាការបំបែកកំណត់ត្រាថ្មីក្នុង Guinness World Records សម្រាប់មនុស្សយន្តដើរឆ្ងាយបំផុត ។

មនុស្សយន្តចិនអាចដើរឆ្ងាយដោយសារប្រព័ន្ធបច្ចេកវិទ្យាពិសេសផលិតឡើងដោយក្រុមហ៊ុន AgiBot ទើបធ្វើឱ្យវាផ្លាស់ប្តូរថ្មដោយខ្លួនឯងក្នុងអំឡុងពេលធ្វើដំណើរ ។ ក្រុមហ៊ុន AgiBot បញ្ជាក់ថា មនុស្សយន្តនេះគោរពច្បាប់ចរាចរណ៍គ្រប់ប្រភេទ និងដើរលើផ្លូវខុសៗគ្នា ទាំងផ្លូវកៅស៊ូ ផ្លូវរាបស្មើ ឬឡើងស្ពាន ដែលនេះបញ្ជាក់ពីមនុស្សយន្តមានសមត្ថភាពដើរតាមតំបន់នានាជាក់ស្តែង ។

ពេលដល់គោលដៅ វានិយាយទៅកាន់អ្នកសារព័ត៌មានស៊ីនហួរថា ៖ «ការដើរនេះជាបទពិសោធន៍មិនអាចបំភ្លេចបាន និងត្រូវការស្បែកជើងថ្មី» ដែលការនិយាយនេះធ្វើឱ្យវាទទួលបានការចាប់អារម្មណ៍ខ្លាំងពីមហាជន ។ ភាពជោគជ័យនេះមិនត្រឹមតែទាក់ទាញការចាប់អារម្មណ៍ប៉ុណ្ណោះទេ ប៉ុន្តែបង្ហាញពីការរីកចម្រើននៃបច្ចេកវិទ្យាមនុស្សយន្ត និងថាមពលថ្ម ដែលអាចឱ្យវាដើរមិនឈប់ឈរ ហើយថ្ងៃអនាគត វានឹងមានតួនាទីសំខាន់ក្នុងការងារដឹកជញ្ជូន ត្រួតពិនិត្យ ឬជួយសង្គ្រោះជីវិតមនុស្សនៅកន្លែងគ្រោះថ្នាក់ ព្រមទាំងបង្កើនប្រសិទ្ធភាពការងារច្រើនផ្នែក ។

ការដើរផ្លូវឆ្ងាយរបស់មនុស្សយន្ត A2 មិនត្រឹមតែបានបំបែកកំណត់ត្រាពិភពលោកប៉ុណ្ណោះទេ ប៉ុន្តែការរីកចម្រើនរបស់បច្ចេកវិទ្យាមនុស្សយន្តអាចប្រើប្រាស់ជាប្រយោជន៍ក្នុងជីវិតប្រចាំថ្ងៃ និងឧស្សាហកម្ម ។ អនុប្រធានក្រុមហ៊ុន AgiBot និយាយថា ការធ្វើដំណើរក្នុងចម្ងាយផ្លូវឆ្ងាយនេះពិបាកណាស់សម្រាប់មនុស្សធម្មតា ប៉ុន្តែមនុស្សយន្តអាចធ្វើបាន ។ នេះបញ្ជាក់ពីបច្ចេកវិទ្យាខ្ពស់របស់មនុស្សយន្តក្នុងផ្នែកពាណិជ្ជកម្ម ដោយសារវាអាចដើរតាមផ្លូវចង្អៀត និងដឹងពីពេលវេលាយប់-ថ្ងៃ ។

គួរបញ្ជាក់ថា កាលពីខែមេសាកន្លងមក មនុស្សយន្ត Tien Kung Ultra ផលិតដោយក្រុមហ៊ុននៅទីក្រុងប៉េកាំង បានរត់ប្រណាំងម៉ារ៉ាថនក្នុងចម្ងាយ២១គីឡូម៉ែត្រ ចំណាយពេលត្រឹមតែ២ម៉ោងនិង៤០នាទី ៕

ប្រទេសថៃ ៖ បន្ទាប់ពីទឹកជំនន់ជន់លិចខេត្តនានានៅភាគខាងត្បូងយ៉ាងធ្ងន់ធ្ងរ និងបង្កមហ.ន្តរាយខ្លាំងបំផុតធ្វើឱ្យពលរដ្ឋថៃនឹកឃើញដល់ការទស្សន៍ទាយរបស់អ្នកស្រី ប្រាយ ក្រាស៊ីប ជាគ្រូទាយល្បីឈ្មោះធ្លាប់ទាយពីហេតុការណ៍ផ្សេងៗ ដូចជា ការរញ្ជួយដីនៅទីក្រុងបាងកក ហើយហេតុការណ៍ទាំងនោះក៏បានកើតឡើងដូចការទស្សន៍ទាយពិតប្រាកដមែន ។ អ្នកស្រីធ្លាយទាយពីទឹកជំនន់ដ៏អាក្រក់នៅភាគខាងត្បូងផងដែរ ហើយវីដេអូរបស់អ្នកស្រីត្រូវបានពលរដ្ឋថៃចែកចាយឡើងវិញក្នុងបណ្តាញសង្គម ។

អ្នកស្រីបានទាយពីទឹកជំនន់នៅប្រទេសថៃថា ចាប់ពីខែកញ្ញា តុលា និងវិច្ឆិកា ឆ្នាំ២០២៥ នឹងមានទឹកជំនន់ជន់លិចបណ្តាខេត្តនៅភាគខាងត្បូងយ៉ាងធ្ងន់ធ្ងរ ដែលកម្ពស់ទឹកនឹងកើនឡើងខ្លាំងចាប់ពី២ម៉ែត្រ ទៅ៣ម៉ែត្រ ខណៈកម្ពស់ទឹកសមុទ្រកើនឡើងខ្ពស់ ។ គ្រោះធម្មជាតិដ៏អាក្រក់នេះពិតជាគួរឱ្យបារម្ភបំផុតសម្រាប់ប្រទេសថៃ ក្រៅពីរញ្ជួយដីនៅទីក្រុងបាងកក បង្កឱ្យបាត់បង់ជីវិតមនុស្ស ទ្រព្យសម្បត្តិ និងចំណាយថវិកាយ៉ាងច្រើន ។

វីដេអូរបស់អ្នកស្រីត្រូវបានចែកចាយឡើងវិញក្នុងបណ្តាញសង្គម ពីព្រោះទឹកជំនន់ដែលកើតឡើងនៅភាគខាងត្បូងពេលនេះ គឺធ្ងន់ធ្ងរបំផុតដូចការទាយគ្មានខុស ។ ខេត្តភាគខាងត្បូងបានលិចទឹកជាបន្តបន្ទាប់ក្រោយភ្លៀងធ្លាក់ខ្លាំងជាច្រើនថ្ងៃ ថែមទាំងមានខ្យល់ព្យុះកាន់តែធ្វើឱ្យស្ថានការណ៍អាក្រក់ខ្លាំងឡើង ដែលពលរដ្ឋថៃពុំធ្លាប់ជួបហេតុការណ៍នេះពីមុនទេ ។ ពេលទឹកជំនន់ហូរពីព្រៃភ្នំភ្លាមៗដែលគ្មានការជូនដំណឹង ពលរដ្ឋថៃរត់ស្ទើរមិនទាន់ ខ្លះឡើងលើដំបូលផ្ទះ ខ្លះជាប់ក្នុងអគារដង្ហើយរកការសង្គ្រោះជាបន្ទាន់ ខណៈភ្នាក់ងារខ្វះទាំងកម្លាំង ខ្វះទាំងឧបករណ៍ ។

ពលរដ្ឋភាគខាងត្បូងស្រែកសុំការជួយសង្គ្រោះបន្ទាន់ពីនាយករដ្ឋមន្ត្រី លោក Anutin Charnvirakul ដូចជា ៖ ជួយជម្លៀសពួកគេចេញពីអគារ ជាពិសេស មនុស្សចាស់ កុមារ និងអ្នកឈឺធ្ងន់ ប៉ុន្តែអ្វីគួរឱ្យហួសចិត្ត គឺលោក Anutin បាននាំមន្ត្រីពាក់ព័ន្ធមកពិនិត្យមើលស្ថានការណ៍ទឹកជំនន់នៅស្រុកហាតយៃ ត្រឹមតែ២ដងប៉ុណ្ណោះ ហើយក៏ថតរូបបង្ហោះក្នុងបណ្តាញសង្គមទាក់ដើម្បីទាញប្រជាប្រិយភាព រួចត្រឡប់ទៅទីក្រុងបាងកកវិញ ។ ពលរដ្ឋថៃចង់ឃើញនាយរដ្ឋមន្ត្រីជួយជម្លៀសពួកគេចេញពីតំបន់គ្រោះថ្នាក់ កុំទុកឱ្យពលរដ្ឋប្រថុយស្លាប់រស់ដោយខ្លួនឯង ប៉ុន្តែការជួយយឺតយ៉ាវមិនទាន់ពេលវេលា ។

ទោះយ៉ាងណា លោក Anutin បង្ហាញក្តីបារម្ភខ្លាំងចំពោះស្ថានការណ៍ទឹកជំនន់នៅភាគខាងត្បូង ដោយលោកបញ្ជាឱ្យក្រសួងពាក់ព័ន្ធបញ្ជូនកម្លាំងមកជួយជម្លៀសពលរដ្ឋជាប់ក្នុងអគារឱ្យលឿនបំផុត ។ លើសពីនេះ លោកបញ្ជាឱ្យកងទ័ពអាកាសបញ្ជូនយន្តហោះមកជួយពលរដ្ឋជាប់លើដំបូលផ្ទះ រីឯកងទ័ពជើងទឹកបញ្ជូននាវាចម្បាំងរបស់ព្រះមហាក្សត្រថៃដែលទុកឈ្លានពានដែនទឹកកម្ពុជា មកជួយពលរដ្ឋរងគ្រោះ ។

គួរបញ្ជាក់ថា ទឹកជំនន់បានជន់លិចបណ្តាខេត្តភាគខាងត្បូងរបស់ថៃយ៉ាងធ្ងន់ធ្ងរ ជាពិសេស ស្រុកហាតយៃ ខេត្តសុងក្លា កម្ពស់ទឹកកើនឡើងរហូតដល់ជាង២ម៉ែត្រ ដែលធ្វើឱ្យស្រុកហាតយៃលិចទៅក្រោមទឹក ផ្ទះសម្បែង ផ្លូវ ស្ពាន មន្ទីរពេទ្យ និងអគារពាណិជ្ជកម្មលិចស្មើដំបូល ខ្លះទៀតលិចដល់អគារជាន់ទី២ ខណៈភ្នាក់ងារសង្គ្រោះពិបាកជួយព្រោះខ្វះខាតកម្លាំង និងឧបករណ៍មិនគ្រប់គ្រាន់ ។ ពលរដ្ឋភាគខាងត្បូងស្លា.ប់ដោយសារទឹកជំនន់យ៉ាងហោចណាស់ស្មើ១៩នាក់ បណ្តាលមកពីឆក់ខ្សែភ្លើង និងគ្រោះថ្នាក់ផ្សេងៗ ហើយរហូតមកដល់ថ្ងៃទី២៥ ខែវិច្ឆិកា ឆ្នាំ២០២៥ មនុស្សជាច្រើនដែលជាប់ក្នុងអគារចេញពុំរួច បានស្រែកសុំជំនួយគួរឱ្យសង្វេក ។

ភ្លៀងធ្លាក់ខ្លាំងបំផុតនៅមជ្ឈមណ្ឌលពាណិជ្ជកម្ម និងដឹកជញ្ជូននៅស្រុកហាតយៃ ខេត្តសុងក្លា និងមិនធ្លាប់ធ្លាក់ខ្លាំងបែបនេះមុនពីមក ។ នាយកដ្ឋានធារាសាស្ត្រប្រកាសថា ខ្យល់ព្យុះលាយឡំទឹកភ្លៀងនេះ គឺរយៈពេល៣០០ឆ្នាំ ទើបកើតឡើងម្តង ។ ទឹកជំនន់ប៉ះពាល់ដល់ពលរដ្ឋជាង១២ម៉ឺន៧ពាន់គ្រួសារ គ្មានអាហារ គ្មានទឹក គ្មានអគ្គិសនី ខូចខាតទ្រព្យសម្បត្តិ និងរង់ចាំរដ្ឋាភិបាលបញ្ជូនភ្នាក់ងារមកជួយជម្លៀស ។ ខេត្តភាគខាងត្បូងផ្សេងទៀតក៏លិចធ្ងន់ធ្ងរដែរ ដូចជា ៖ ផាត់តាលុង ណាខនស្រ៊ីថាំម៉ារ៉ាច ប៉ាត់តានី ត្រាំង និងសាទូន កម្ពស់ទឹកកើនឡើងជាង២ម៉ែត្រ ហើយបរិមាណទឹកនៅតែបន្តកើនឡើង ថែមទាំងបាក់ដីនៅតំបន់ភ្នំ ៕

ប្រទេសថៃ៖ ក្រុមហ៊ុនធំៗរបស់ថៃ ដូចជាខារ៉ាបាវ មីម៉ាម៉ា ក្រុមហ៊ុនទឹកផ្លែឈើ ម៉ាលី រួមទាំងក្រុមហ៊ុននំចំណីមួយចំនួន បាននិងកំពុងផ្លាស់ប្ដូរយុទ្ធសាស្រ្តទីផ្សារក្នុងការលក់ ដោយបន្ថែម«អក្សរខ្មែរ»ដាក់លើសំបកវេចខ្ចប់របស់ខ្លួន ដើម្បីបន្តឈរជើងនៅកម្ពុជាចំពេលមានចលនាពហិការយ៉ាងខ្លាំងក្លាពីប្រជាពលរដ្ឋខ្មែរ ដែលធ្វើឲ្យការលក់របស់ពួកគេធ្លាក់ចុះជាគំហុក។

យោងតាមការចុះផ្សាយរបស់សារព័ត៌មាន The Nation កាលពីថ្ងៃទី២៥ ខែវិច្ឆិកា ឆ្នាំ២០២៥ បានដកស្រង់ទិន្នន័យពីរបាយការណ៍លក់ប្រចាំឆមាសទី៣ របស់ក្រុមហ៊ុនថៃធំៗខាងលើថា បានខាតបង់រាប់ពាន់លានបាត ចាប់តាំងពីមានការបិទព្រំដែនគោករវាងកម្ពុជានិងថៃ និងសកម្មភាពឈ្លានពានរបស់ថៃ បានជំរុញឲ្យប្រជាពលរដ្ឋកម្ពុជានាំគ្នាធ្វើពហិការឈប់ប្រើប្រាស់ផលិតផលថៃ។

បើតាមសម្ដីរបស់លោក Sathien Sathienthamនាយកប្រតិបត្តិក្រុមហ៊ុនCarabao Group បានឲ្យដឹងថា ទីផ្សារភេសជ្ជៈប៉ូវកម្លាំង Carabao កម្ពុជាបានរងផលប៉ះពាល់យ៉ាងខ្លាំង បើទោះជាវានៅតែទទួលបានការគាំទ្រខ្ពស់ក្នុងស្រុកក្ដី។ កត្តានេះបាននាំឲ្យក្រុមហ៊ុនខាតបង់ចំណូលអស់ជាច្រើនរយលានបាត។

ដោយឡែកបើតាមការលើកឡើងរបស់ នាយកប្រតិបត្តិក្រុមហ៊ុន Thai President Foods PCL លោក Pan Paniangvait ដែលជាក្រុមហ៊ុនផលិតមី Mamaបានបញ្ជាក់ថា ប្រទេសកម្ពុជា គឺជាទីផ្សារនាំចេញដ៏សំខាន់មួយ ដែលមានចំនួន ១៧-១៨ភាគរយ នៃការនាំចេញរបស់ក្រុមហ៊ុន រួមជាមួយនឹងមូលដ្ឋានផលិតកម្មក្នុងស្រុកដែលមានអាយុកាលយូរអង្វែង។

ក្រៅពីនេះ ក្រុមហ៊ុនផ្សេងទៀតដូចជា ក្រុមហ៊ុនទឹកផ្លែឈើ Malee Group PCL, ក្រុមហ៊ុនគ្រឿងសម្អាង និងក្រុមហ៊ុនចំណីអាហារមួយចំនួន ដែលធ្លាប់ក្ដោបបានចំណែកធំនូវការនាំចេញផលិតរបស់ខ្លួនមកកាន់កម្ពុជា ក៏បានត្អូញត្អែរពីការថយចុះនៃប្រាក់ចំណូលកាន់តែធំទៅៗផងដែរ។

បើតាមការរាយការណ៍របស់ The Nation ឥឡូវនេះមានក្រុមហ៊ុនធំមួយបានបង្ហើបថា ពួកគេកំពុងត្រៀមផ្លាស់ប្ដូរយុទ្ធសាស្រ្តទីផ្សារសម្រាប់ទំនិញដែលកំពុងរងការគំរាមកំហែងពីចលនាពហិការរបស់ប្រជាជនខ្មែរ តាមរយៈការដាក់អក្សរខ្មែរនៅលើសំបកផលិតផលខ្លួនដើម្បីបំភាន់ភ្នែកអ្នកប្រើប្រាស់កុំឲ្យចាប់អារម្មណ៍។

គួរបញ្ជាក់ថា តួលេខនៃការខាតបង់ប្រាក់ចំណូលរបស់ក្រុមហ៊ុនថៃជាច្រើនបានកើនឡើងកាន់ខ្ពស់ទៅៗ នៅខណៈពេលដែលប្រជាពលរដ្ឋខ្មែរបានធ្វើពហិការឈប់ទិញទំនិញរបស់ពួកគេ។ ចលនាពហិការនេះ កើតឡើងក្រោយពេលដែលយោធាថៃបានបើកការឈ្លានពានយ៉ាងកម្រោលមកលើកម្ពុជាមុន ក្នុងគោលបំណងចង់លេបត្របាក់ទឹកដី។

សកម្មភាពឥតអៀនខ្មាសនេះ បានជំរុញឲ្យពលរដ្ឋកម្ពុជាដែលនិយមផលិតផលថៃស្ទើរពេញមួយជីវិតនិងស្ទើរពេញមួយប្រទេស បាននាំគ្នាធ្វើពហិការទំនិញថៃ ហើយត្រឹមតែរយៈពេលប៉ុន្មានខែប៉ុណ្ណោះ ពេលនេះទីផ្សារទំនិញថៃចាប់ផ្ដើមរង្គុះរង្គើ និងត្អូញត្អែពីការខាតបង់យ៉ាងច្រើនសន្ធឹកសន្ធាប់៕

ប្រទេសថៃ ៖ ពលរដ្ឋថៃបានចែកចាយរូបភាពក្នុងបណ្តាញសង្គមដែលមើលទៅគួរឱ្យអាណោចអាធមបំផុត គឺរូបភាពនេះបង្ហាញពីពលរដ្ឋនៅស្រុកហាតយៃ ខេត្តសុងក្លា នាំគ្នាដើរតាមខ្សែភ្លើងលើបង្គោលដើម្បីគេចពីទឹកជំនន់កើនឡើងខ្ពស់មិនឈប់ឈរ ពីព្រោះពួកគេគ្មានជម្រើសផ្សេងក្រៅពីនេះទេ ។ ស្រុកហាតយៃបានលិចទឹកយ៉ាងធ្ងន់ធ្ងរជាច្រើនថ្ងៃ កម្ពស់ទឹកនៅតំបន់ខ្លះកើនឡើងដល់អគារជាន់ទី២ និងផុតដំបូលផ្ទះ ដែលធ្វើឱ្យពលរដ្ឋថៃចាប់ផ្តើមគ្មានអាហារ និងទឹក ។ នេះបើតាមការចុះផ្សាយរបស់សារព័ត៌មាន Thairath នៅថ្ងៃទី២៥ ខែវិច្ឆិកា ឆ្នាំ២០២៥ ។

ស្ថានការណ៍ទឹកជំនន់នៅស្រុកហាតយៃ ខេត្តសុងក្លា នៅថ្ងៃទី២៥ ខែវិច្ឆិកា នៅតែធ្ងន់ធ្ងរ ជាពិសេស នៅផ្លូវផុនពិឆ័យ មុខវត្តពុទ្ធិការ៉ាម ក្នុងឃុំហាតយៃ ស្រុកហាតយៃ ពលរដ្ឋជាច្រើននាក់កំពុងប្រឈមនឹងគ្រោះថ្នាក់ស្រែកសុំជំនួយជាបន្ទាន់ ។ ពួកគេបានព្យាយាមផ្ញើសារតាមទូរស័ព្ទសុំការសង្គ្រោះថា ៖ «ពេលនេះ កម្រិតទឹកជំនន់បានកើនឡើងយ៉ាងខ្ពស់រហូតដល់អគារជាន់ទី២ ធ្វើឱ្យអ្នកជាប់ក្នុងអគារចាប់ផ្តើមគ្មានអាហារ និងទឹក» ។

ហ្វេសប៊ុកមួយឈ្នោះ «Kang Namthip» បានបង្ហោះវីដេអូបុរស៣នាក់ កំពុងដើរតាមខ្សែភ្លើងលើបង្គោលគេចពីទឹកជំនន់ ខណៈនៅខាងក្រោមបង្គោលសុទ្ធតែទឹកជំនន់ ដោយម្ចាស់ហ្វេសប៊ុកសរសេរថា «សូមយល់ពីពួកយើងផង មនុស្សជាច្រើនកំពុងរង់ចាំការជួយសង្គ្រោះចេញពីទីនេះ ទឹកឡើងខ្ពស់ដល់អគារជាន់ទី២ហើយ ។ យើងខ្វះខាតអាហារ និងទឹក ជួយផង ពីព្រោះមិនអាចទាក់ទងទៅភ្នាក់ងារសង្គ្រោះណាមួយបានទេ យើងកំពុងស្ថិតនៅផ្លូវផុនពិឆ័យ មុខវត្តពុទ្ធិការ៉ាម ក្នុងឃុំហាតយៃ ស្រុកហាតយៃ ខេត្តសុងក្លា» ។

ជនរងគ្រោះដោយទឹកជំនន់ក៏បានប្រថុយដើរតាមខ្សែភ្លើងលើបង្គោលដើម្បីជម្លៀសពីកន្លែងគ្រោះថ្នាក់ និងទៅសុំការជួយសង្គ្រោះពីខាងក្រៅ ។ ពួកយើងសង្ឃឹមថា នឹងមានការជួយជម្លៀសចេញ និងមានភ្នាក់ងារស្ម័គ្រចិត្តមកជួយ បើទោះជាពិបាកជួយក៏ដោយព្រោះទឹកហូរខ្លាំង ។ សូមមជ្ឈមណ្ឌលគ្រប់គ្រងគ្រោះមហន្តរាយប្រញាប់បញ្ជូនភ្នាក់ងារដែលមានឧបករណ៍ និងទូកមកកាន់ទីនេះជាបន្ទាន់ ។

នេះជាការស្រែកសុំជំនួយរបស់ពលរដ្ឋរងគ្រោះដោយសារទឹកជំនន់នៅស្រុកហាតយៃ ខេត្តសុងក្លា ដែលរហូតមកដល់ថ្ងៃទី២៥ ខែវិច្ឆិកា ពួកគេនៅតែទន្ទឹងរង់ចាំការជួយសង្គ្រោះ ខណៈអាជ្ញាធរ និងភ្នាក់ងារពាក់ព័ន្ធនឹងទឺកជំនន់ធ្វើការងារយឺតយ៉ាវ ។ លើសពីនេះ ពលរដ្ឋស្រុកហាតយៃជាច្រើនទៀតក៏កំពុងរង់ចាំការសង្គ្រោះជាបន្ទាន់ដែរ ក្រោយពីកម្ពស់ទឹកជំនន់កើនឡើងខ្លាំងយ៉ាងឆាប់រហ័ស និងលិចដល់អគារជាន់ទី២ បើជួយមិនទាន់ទេ មុខជាស្លាប់មិនខាន ។

គួរបញ្ជាក់ថា ពេលនេះ បណ្តាខេត្តនៅភាគខាងត្បូងប្រទេសថៃបានលិចទឹកធ្ងន់ធ្ងរជាបន្តបន្ទាប់ ដូចជា ខេត្តសុងក្លា ប៉ាត់តានី សាទូន និងត្រាំង ក្រោយពីភ្លៀងធ្លាក់ជាច្រើនថ្ងៃ និងបន្តធ្លាក់ធ្វើឱ្យទឹកហូរពីព្រៃភ្នំ ។ ក្រៅពីទឹកជំនន់ ក៏មានការបាក់ដី ខ្យល់ព្យុះ ដែលបណ្តាលឱ្យពលរដ្ឋថៃនៅខេត្តទាំងនេះប្រឈមនឹងគ្រោះថ្នាក់ដល់ជីវិត ខូចខាតទ្រព្យសម្បត្តិ ផលដំណាំ និងងាប់សត្វចិញ្ចឹម ៕

យោងតាមការប្រកាសរបស់ក្រុមហ៊ុនគ្រប់គ្រង SG Way Entertainment តារាសម្តែងកូរ៉េជើងចាស់ Lee Soon Jae បានទទួលមរណភាពនៅព្រឹកព្រលឹមថ្ងៃទី២៥ ខែវិច្ឆិកា ក្នុងជន្មាយុ ៩១ឆ្នាំ។ ក្រុមហ៊ុនបាននិយាយថាពិធីបុណ្យសពនិងនីតិវិធីពាក់ព័ន្ធនឹងត្រូវបានកំណត់នៅពេលក្រោយ។

លោក Lee Soon Jae កើតនៅឆ្នាំ១៩៣៤ នៅខេត្ត North Hamgyong ប្រទេសកូរ៉េខាងជើង ហើយបានផ្លាស់ទៅទីក្រុង Seoul កូរ៉េខាងត្បូងនៅអាយុ៤ ឆ្នាំ។ លោកបានសិក្សានៅវិទ្យាល័យ Seoul និងសិក្សាទស្សនវិជ្ជានៅសាកលវិទ្យាល័យ Seoul National University មុនពេលចូលប្រឡូកក្នុងវិស័យសិល្បៈ។

នៅឆ្នាំ ១៩៦០ លោកបានចូលរៀនថ្នាក់តារា KBS ដំបូងបង្អស់ ដោយចាប់ផ្តើមអាជីពសម្តែងរបស់គាត់ជាផ្លូវការ។ នៅពេលគាត់ស្លាប់ គាត់គឺជាតារាសម្តែងកូរ៉េដែលមានវ័យចំណាស់ជាងគេបំផុត។ ក្នុងអំឡុងទសវត្សរ៍ឆ្នាំ ១៩៧០ និង ១៩៨០ តារាសម្ដែង Lee Soon Jae បានបម្រើការជាប្រធានសមាគមតារាសម្ដែងកូរ៉េចំនួនបីអាណត្តិ។

នៅឆ្នាំ ១៩៩២ គាត់ត្រូវបានជាប់ឆ្នោតក្នុងសភាជាតិទី ១៤ដែលតំណាងឱ្យសង្កាត់ Jungnang (ទីក្រុងសេអ៊ូល) ជាបេក្ខជននៃគណបក្សប្រជាធិបតេយ្យសេរី ហើយក្នុងពេលដំណាលគ្នាធ្វើជាអ្នកនាំពាក្យរង និងជាលេខានៃសម្ព័ន្ធសភាកូរ៉េ-ជប៉ុន។
នៅខែមករា ឆ្នាំ២០២៥ គាត់បានបង្ហាញខ្លួននៅក្នុងកម្មវិធី KBS Drama Awards ឆ្នាំ២០២៤ដើម្បីទទួលបានពានរង្វាន់ Daesang ដែលបានក្លាយជាមនុស្សចាស់ជាងគេដែលទទួលបានពានរង្វាន់នេះ។ ទោះជាយ៉ាងណាក៏ដោយនៅក្នុងខែមេសាគាត់បានអវត្តមានពីពិធីប្រគល់ពានរង្វាន់អ្នកដឹកនាំនិងអ្នកផលិតរបស់កូរ៉េ។ តំណាងក្រុមហ៊ុនរបស់គាត់បាននិយាយថា សុខភាពរបស់គាត់មិនស្ថិតស្ថេរទេ។

ពាក្យចចាមអារ៉ាមអំពីការធ្លាក់ចុះសុខភាពរបស់ Lee Soon Jae កាន់តែខ្លាំងបន្ទាប់ពីតារាសម្តែង Park Geun Hyung បាននិយាយនៅក្នុងសន្និសីទសារព័ត៌មានមួយកាលពីថ្ងៃទី១៩ ខែសីហា ថាគាត់ត្រូវបានគេជូនដំណឹងថា Lee Soon Jae មិនចង់ទទួលភ្ញៀវដោយសារតែសុខភាពមិនល្អ។

យោងតាមប្រព័ន្ធផ្សព្វផ្សាយកូរ៉េ តារាសម្តែង Lee Soon Jae មានអាជីពជិត ៧០ឆ្នាំ ដោយបានបង្ហាញខ្លួនក្នុងរឿងភាគទូរទស្សន៍ប្រហែល ១៤០ រួមទាំងរឿង “I’ll Become a Man,” “See and See Again,” “Three Kim Generation,” “Men of the Bath House,” “Mom’s Dead Upset,” “What on Earth is Love,” “High Kick!”និង “Again My Life»ជាដើម។ ក្នុងចំណោមនោះ ស្នាដៃ «High Kick» ល្បីក្នុងប្រទេសកូរ៉េ និងទូទាំងអាស៊ី។ ចាប់ពីចុងឆ្នាំ២០២៤ គាត់បានចាប់ផ្តើមកាត់បន្ថយចំនួនសកម្មភាពដោយសារតែសុខភាពធ្លាក់ចុះ និងបានលុបចោលកម្មវិធីមួយចំនួន៕

ដ្បិតថាជាគ្រោះធម្មជាតិដែលមិនអាចទាយដឹងមុន ប៉ុន្តែក៏ពិបាកនឹងប្រកែកថាវាជាមិនជាប់ពាក់ព័ន្ធនឹងកម្មពៀ.រផងដែរ ក្រោយទិដ្ឋភាពដ៏សោ.កសង្រេងនៃពលរដ្ឋខេត្តសុងក្លា បាននាំគ្នាស្រែកយ៉ាងទ្រហឹងអឺងកងស្នើសុំការជួយសង្គ្រោះពីលើដំបូលផ្ទះក្នុងស្ថានភាពងងឹតស្លុបនាពេលយប់។ មនុស្សជាច្រើនយល់ឃើញថាទាំងនេះអាចជាផលក.ម្មក្នុងពេលកន្លងមក ដែលពលរដ្ឋថៃភាគច្រើនបានគាំទ្រឲ្យមានការចាក់សម្លេងរំខានពលរដ្ឋខ្មែរនៅតាមព្រំដែន ដើម្បីរំខានមិនឲ្យពួកគាត់រស់នៅសុខស្រួល។

នៅពេលដែលប្រជាពលរដ្ឋមួយចំនួនត្រូវបានជួយសង្រ្គោះឲ្យចាកចេញពីផ្ទះរបស់ពួកគេទៅរកទីសុវត្ថិភាពគេចពីស្ថានភាពទឹកជំនន់ដ៏កា.ចសាហា.វរួចហើយ គេនៅឃើញមានពលរដ្ឋជាច្រើនគ្រួសារផ្សេងទៀតនៅតែជាប់ក្នុងផ្ទះរបស់ពួកគេនៅឡើយ ដ្បិតក្រុមជួយសង្គ្រោះមិនទាន់អាចចូលទៅជិតពួកគេបាន។

តាមរយៈវីដេអូមួយចំនួនដែលត្រូវបានចែកចាយនៅក្នុងបណ្ដាញសង្គម TikTok ក្នុងអំឡុងពេលដែលទូកសង្រ្គោះកំពុងធ្វើដំណើរបន្តប្រតិបត្តិការជួយជម្លៀសប្រជាជនក្នុងស្រុកហាតយ៉ៃ ខេត្តសុងក្លានៅពេលយប់ គេបានឮសម្លេងស្រែកសុំជំនួយយ៉ាងគ្រលួចចេញពីផ្ទះជាច្រើន ដែលកំពុងមានមនុស្សកំពុងជាប់នៅក្នុងនោះនៅឡើយ។

សម្លេងដង្ហើយរកជំនួយទាំងនោះ ហាក់បង្ហាញនូវភាពភ័យខ្លាចយ៉ាងគួរឲ្យសោ.កសៅចេញពីផ្ទះដែលគ្មានសូម្បីតែភ្លើងអគ្គិសនីប្រើប្រាស់។ តាមសម្ដីរបស់បុរសម្នាក់ដែលស្ថិតនៅលើទូកសង្រ្គោះនោះបាននិយាយទាំងស្រក់ទឹកភ្នែកថា មនុស្សច្រើនណាស់ស្រែកសុំឲ្យយើងជួយយកពួកគេចេញពីទីនោះ ប៉ុន្តែយើងមិនដឹងថាជួយអ្នកណាទុកអ្នកណាមុននោះទេព្រោះទឹកលេចគ្រប់ច្រកល្ហកអស់ហើយ។

តាមរបាយការណ៍របស់អាជ្ញាធរក្នុងខេត្តសុងក្លា កាលពីសប្ដាហ៍មុនបានឲ្យដឹងថា ខេត្តភាគខាងត្បូងរបស់ថៃកំពុងតែទទួលរងនូវសម្ពាធទាប ដែលនាំមកនូវភ្លៀងធ្លាក់ឥតឈប់ឈរបណ្ដាលឲ្យតំបន់ជាច្រើនដែលស្ថិតនៅដីទំនាប ត្រូវរងការជនលិចយ៉ាងខ្លាំងខ្លាដោយសារតែការកើនឡើងយ៉ាងឆាប់រហ័សនៃជំនន់ទឹកភ្លៀង ហើយតំបន់ជាច្រើនត្រូវបង្ខំចិត្តកាត់ផ្ដាច់ចនរន្តអគ្គិសនីទាំងស្រុងដើម្បីជៀសវាងគ្រោះថ្នាក់។

ទន្ទឹមនឹងស្ថានការណ៍ដ៏តានតឹងនេះ រដ្ឋាភិបាលថៃមិនទាន់អាចរកវិធីរំដោះទឹក ឬជួយសង្រ្គោះប្រជាពលរដ្ឋបានសមស្របឡើយ ដោយអះអាងថា ផ្លូវថ្នល់ជាច្រើនត្រូវបានទឹកកាត់ផ្ដាច់ រីឯតំបន់មួយចំនួនពិបាកក្នុងការធ្វើដំណើរចូលទៅជួយ គួបផ្សុំនឹងមធ្យោបាយជួយសង្រ្គោះនៅមានកម្រិតផងដែរ។ គិតត្រឹមថ្ងៃទី២៥ ខែវិច្ឆិកា កងទ័ពេជើងទឹក និងអាកាសរបស់ថៃ បានប្រកាសពីការត្រៀមយកនាវា និងយន្តហោះ មកប្រត្រិបត្តិការជួយសង្រោះពលរដ្ឋ។

តែទោះជាយ៉ាងណា ការជួយសង្រ្គោះគឺនៅតែត្រូវការពេលវេលាដដែល ព្រោះតំបន់ខ្លះមិនសមស្របសម្រាប់ទូកធំៗចូលបានឡើយ ចំណែកទូកតូចៗខ្លះក៏មិនមានសុវត្ថិភាពក្នុងការចូលទៅជម្លៀសប្រជាជនដោយផ្ទាល់ផងដែរ។ ដូច្នេះមានតែតម្រូវឲ្យប្រជាជនមានការអត់ធ្មត់រស់នៅក្នុងផ្ទះដែលលិចទឹក និងគ្មានអគ្គិសនីប្រើប្រាស់នោះជាបន្តសិន៕