ប្រទេសថៃ៖ នៅចន្លោះថ្ងៃទី៧ និងទី៨ ខែមករា ហេតុការណ៍អគ្គីភ័យឆាបឆេះដ៏សន្ធោសន្ធៅ និងគួរឲ្យតក់ស្លុ.តចំនួន ២ករណី បានកើតមាននៅក្នុងខេត្តភូកេត និងខេត្តឈៀងម៉ៃ ប្រទេសថៃ ដែលបង្កឲ្យមានមនុស្សស្លា.ប់ចំនួន ៥នាក់ និងខូចខាតទ្រព្យសម្បត្តិគិតជាទឹកប្រាក់អស់រាប់រយលានបាត។

យោងតាមការចុះផ្សាយរបស់សារព័ត៌មាន Khaosod ថ្ងៃទី០៧ខែមករាឆ្នាំ២០២៦នេះ កំពង់ផែChalong នៅខេត្ត Phuket ប្រទេសថៃ ត្រូវបានភ្លើងឆេះនៅមុនពេលថ្ងៃរះ ដោយបង្កើតបានជាអណ្ដាតភ្លើងឆាបឆេះ និងផ្សែងយ៉ាងខ្មួលស្មាញ់លើឆ្នេរសមុទ្រ។ ក្នុងហេតុការណ៍នេះ អាជ្ញាធរបានបរាជ័យក្នុងការញែកទូកដែលនៅជាប់ច្រាំងចេញពីគ្នាឲ្យបានទាន់ពេលវេលា ជាហេតុធ្វើឲ្យទូកល្បឿនលឿនចំនួន ២០ គ្រឿង ត្រូវភ្លើងឆាបឆេះខូចខាតទាំងស្រុង។

តាមសំដីម្ចាស់ទូកបាននិយាយថា ទូកមួយគ្រឿងៗមានតម្លៃខ្ទង់៥លានបាត ឬប្រហែលជាង១៦ម៉ឺនដុល្លារអាមេរិក ហើយដោយសារតែគ្រោះអគ្គិភ័យដ៏អាក្រក់នេះ សេវាទេសចរណ៍ដ៏ពេញនិយមតាមរយៈការជិះទូកនៅតំបន់នេះ ត្រូវបានលុបចោលបណ្តោះអាសន្ន ដែលធ្វើឱ្យម្ចាស់អាជីរកម្មរងការខាតបង់យ៉ាងធ្ងន់ធ្ងរ។

ដោយឡែក នៅខេត្តឈៀងម៉ៃ ឯណោះវិញ នាយប់រំលងអាធ្រាតឈានចូលថ្ងៃទី៨ ខែមករា ហេតុការណ៍អគ្គីភ័យឆេះផ្ទះដ៏សោកសៅមួយ បានឆក់យកជីវិតមនុស្សអស់មួយគ្រួសារ ដែលមានសមាជិក ៥នាក់ រួមមានម្ដាយ ឪពុក ជីដូនចាស់ និងក្មេងស្រីភ្លោះមួយគូរ ឲ្យអស់បុណ្យទៅទាំងអស់គ្នាតែម្ដងក្នុងអំឡុងពេលដែលពួកគេកំពុងលង់លក់ក្នុងដំណេក។

របាយការណ៍ចុងក្រោយបំផុតបានបង្ហាញថា នៅពេលសមត្ថកិច្ចបានទៅដល់ គេបានប្រទះឃើញមានអ្នករងរបួសទាំង ៥ នាក់ ប៉ុន្តែក្រោយមកបានស្លា.ប់បន្ទាប់ពីត្រូវបានគេជួយសង្គ្រោះនៅមន្ទីរពេទ្យ។ ចំណែកសភាពផ្ទះដែលភ្លើងបានរឆាបឆេះ បានទទួលរងការខូចខាតយ៉ាងធ្ងន់ធ្ងរ និងទ្រព្យសម្បត្តិដែលមាននៅក្នុងផ្ទះមួយភាគធំត្រូវបានភ្លើងឆាបឆេះស្ទើទាំងស្រុង។

រដ្ឋបាលស្រុកឈៀងម៉ៃ បានបង្ហាញថា មូលហេតុនៃគ្រោះអគ្គីភ័យ អាចបណ្ដាលមកពីការឆ្លងចរន្តអគ្គិសនី ដែលកើតឡើងខណៈពេលអ្នកនៅក្នុងផ្ទះទាំងអស់កំពុងដេកលក់ ជាហេតុនាំឲ្យពួកគេមិនអាចរត់គេចខ្លួនទាន់ពេលវេលា។ ជុំវិញគ្រោះថ្នាក់អគ្គីភ័យដ៏កាចសា.ហាវទាំង២ករណីខាងលើនេះ បានជំរុញឲ្យក្ដីបារម្ភរបស់សាធារណជនកាន់តែកើនមានឡើង ខណៈកន្លងទៅថ្មីៗនេះតែងមានការចុះផ្សាយអំពីហេតុការណ៍ភ្លើងឆេះវត្ត ផ្សារ និងលំនៅឋានរបស់ពលរដ្ឋជាច្រើនកន្លែង៕

ប្រទេសថៃ ៖ តាមការចុះផ្សាយរបស់សារព័ត៌មាន Thai Post នៅថ្ងៃទី៨ ខែមករា ឆ្នាំ២០២៦ រលកសមុទ្រធំៗបានបោកបក់ខ្លាំងៗបណ្តាលឱ្យផ្ទះសម្បែងជាច្រើនខ្នងរបស់ពលរដ្ឋថៃខូចខ្ទេចខ្ទី ជាពិសេស នៅស្រុកប៉ាកផាណាំង និងស្រុកហួសៃ ខេត្តណាខនស្រ៊ីថាំម៉ារាជ ។ ពលរដ្ឋរស់នៅក្បែរមាត់សមុទ្ររងផលប៉ះពាល់យ៉ាងខ្លាំង និងប្រឈមនឹងការបាត់បង់ទីលំនៅ បានអំពាវនាវឱ្យអាជ្ញាធរជួយដោះស្រាយបញ្ហាជាបន្ទាន់ ។

ស្ថានការណ៍នៅឈូងសមុទ្រថៃនាថ្ងៃទី៨ ខែមករា គឺមានរលកសមុទ្រធំៗបោកបក់យ៉ាងខ្លាំង បន្ទាប់ពីឧតុនិយមថៃប្រកាសពីការផ្លាស់ប្តូរអាកាសធាតុ ។ វាធ្វើឱ្យនៅផ្ទះពលរដ្ឋជាច្រើនខ្នងនៅមាត់សមុទ្រខេត្តណាខនស្រ៊ីថាំម៉ារាជ ជាពិសេស ស្រុកប៉ាកផាណាំង និងស្រុកហួសៃ ខូចខាតខ្ទេចខ្ទីដោយសាររលកសមុទ្របោកបក់ខ្លាំងៗពេញមួយថ្ងៃ ដែលធ្វើឱ្យពលរដ្ឋបារម្ភយ៉ាងខ្លាំងពីការបាត់បង់ទីលំនៅ ។

នៅតំបន់ខ្លះត្រូវរលកសមុទ្របោកបក់បំផ្លាញផ្លូវធ្វើដំណើរ ប៉ះពាល់បរិស្ថាន និងលិចផ្ទះ ដែលធ្វើឱ្យពលរដ្ឋជាច្រើនគ្រួសារបង្ខំចិត្តដឹកជញ្ជូនទ្រព្យសម្បត្តិទៅកាន់កន្លែងសុវត្ថិភាព ។ ពលរដ្ឋថៃមានផ្ទះនៅមាត់សមុទ្រប្រាប់ថា បញ្ហារលកសមុទ្របោកបក់បំផ្លាញផ្ទះ និងសំណឹកឆ្នេរ បានកើតឡើងជាច្រើនឆ្នាំហើយ បើទោះជាមានការតវ៉ា និងស្នើការជួយអន្តរាគមន៍ពីស្ថាប័នពាក់ព័ន្ធជាបន្តបន្ទាប់ក៏ដោយ ប៉ុន្តែបញ្ហាមិនទាន់ដោះស្រាយទេ ទើបពេលខ្យល់ខ្លាំងធ្វើឱ្យរលកសមុទ្របោកបក់បំផ្លាញផ្ទះ និងទ្រព្យសម្បត្តិពលរដ្ឋនៅមាត់សមុទ្រជាញឹកញាប់ ។

ទោះជាមានមន្ត្រីមកពីស្ថាប័នពាក់ព័ន្ធចុះមកពិនិត្យមើលការខូចខាតផ្ទះ និងតាមដានស្ថានការណ៍យ៉ាងដិតដល់ ប៉ុន្តែពលរដ្ឋនៅតែទាមទារឱ្យជួយស្វែងរកវិធានការដោះស្រាយបញ្ហាយូរអង្វែង ដើម្បីកាត់បន្ថយការខូចខាតផ្ទះ និងផ្លូវ ដោយសាររលកសមុទ្រនាថ្ងៃអនាគត ។

មន្ត្រីឧតុនិយមបានដាស់តឿនពលរដ្ឋរស់នៅមាត់សមុទ្រឱ្យប្រុងប្រយ័ត្នគ្រោះថ្នាក់កើតឡើងដោយសាររលកសមុទ្រ, ចៀសវាងនេសាទតាមទូកពេលខ្យល់ខ្លាំង និងតាមដានការប្រកាសរបស់ឧតុនិយមយ៉ាងដិតដល់ដើម្បីសុវត្ថិភាព និងការពារការខូចខាតទ្រព្យសម្បត្តិ ។ ខ្យល់មូសុងឦសានបានគ្របដណ្តប់លើឈូងសមុទ្រថៃ និងភាគខាងត្បូង រីឯរលកសមុទ្រក្នុងឈូងសមុទ្រថៃមានកម្លាំងខ្លាំង កម្ពស់ពី២ម៉ែត្រ ទៅ៣ម៉ែត្រ ។ តំបន់មានផ្គររន្ទះ រលកសមុទ្រមានកម្ពស់ដល់ជាង៣ម៉ែត្រ ខណៈរលកសមុទ្រនៅសមុទ្រអាន់ដាម៉ាន់ មានកម្ពស់ពី១ម៉ែត្រ ទៅ២ម៉ែត្រ ។

មន្ត្រីឧតុនិយមសំណូមពរឱ្យពលរដ្ឋចេញទូកនេសាទដោយការប្រុងប្រយ័ត្ន រីឯទូកនេសាទតូចៗនៅឈូងសមុទ្រថៃគួរតែផ្អាកនេសាទ ។ ដូចគ្នានេះ ពលរដ្ឋរស់នៅមាត់សមុទ្រភាគខាងត្បូង និងខាងកើត ក៏ត្រូវប្រុងប្រយ័ត្នគ្រោះថ្នាក់ដោយសាររលកសមុទ្រផងដែរ ។

គួរបញ្ជាក់ថា ប្រទេសណាដែលឈ្លានពានទន្ទ្រានទឹកដី បំផ្លាញផ្ទះ និងទ្រព្យសម្បត្តិពលរដ្ឋប្រទេសជិតខាង គឺប្រទេសនោះនឹងទទួលកម្មពៀរភ្លាមៗដែលខ្លួនបានប្រព្រឹត្ត ឬត្រូវធម្មជាតិបំផ្លាញវិញ ។ ផ្ទះសម្បែងពលរដ្ឋថៃជាច្រើនខ្នងត្រូវបានរលកសមុទ្របោកបក់ខូចខ្ទេចខ្ទីនេះ ស្របពេលកងទ័ពថៃបាននិងកំពុងប្រើប្រាស់គ្រឿងចក្រឈូសឆាយបំផ្លាញផ្ទះ និងប្លន់ទ្រព្យសម្បត្តិពលរដ្ឋខ្មែរនៅជាប់ព្រំដែនថៃ ។ កងទ័ពថៃពង្រាយទូរកុងតឺន័រ និងរាយបន្លាលួសដោតទង់ជាតិថៃព័ទ្ធយកទឹកដីកម្ពុជាដោយខុសច្បាប់ និងជាការបំពានលើខ្សែព្រំដែនអន្តរជាតិរវាងប្រទេសទាំងពីរ ។

កងទ័ពថៃបានរំលោភបំពានមកលើទឹកដីកម្ពុជាក្រោយបទឈប់បាញ់ចូលជាធរមាន ហើយប្រកាសថា ទឹកដីដែលខ្លួនពង្រាយកុងតឺន័រ និងរាយបន្លាលួសដោតទង់ជាតិថៃដោយខុសច្បាប់នោះជាទឹកដីរបស់ខ្លួន ។ កងទ័ពថៃបានវាយកំទេចផ្ទះពលរដ្ឋខ្មែរ និងហេដ្ឋារចនាសម្ព័ន្ធ គឺជាការរំលោភយ៉ាងជាក់ច្បាស់ចំពោះគោលការណ៍ជាមូលដ្ឋាននៃច្បាប់អន្តរជាតិ ក៏ដូចជាច្បាប់មនុស្សធម៌ និងច្បាប់សិទ្ធិមនុស្សអន្តរជាតិ ៕

ប្រទេសដាណឺម៉ាក ៖ កាលពីថ្ងៃទី៧ ខែមករា ឆ្នាំ២០២៦ រដ្ឋាភិបាលដាណឺម៉ាកបានប្រកាសគម្រោងបញ្ជូនកងទ័ពទៅប្រចាំការនៅកោះហ្គ្រីនឡែន (Greenland) ដោយផ្តោតលើការហ្វឹកហាត់កងទ័ពជាមួយអង្គការសន្ធិសញ្ញាអាត្លង់ទិកខាងជើង (NATO) ដើម្បីទប់ស្កាត់ការគំរា.មកំហែង ឬប្រើប្រាស់កម្លាំងកងទ័ពរបស់អាមេរិកគ្រប់គ្រងកោះហ្គ្រីនឡែន ។ ការប្រកាសរបស់រដ្ឋាភិបាលដាណឺម៉ាក បន្ទាប់ពីប្រធានាធិបតីអាមេរិកបង្ហាញជំហរចង់បញ្ចូលកោះនេះទៅក្នុងទឹកដីអាមេរិកដើម្បីជាប្រយោជន៍សន្តិសុខជាតិ ពីព្រោះកោះស្ថិតនៅទីតាំងយុទ្ធសាស្ត្រតំបន់អាកទិក និងសម្បូររ៉ែធម្មជាតិសម្រាប់ប្រើប្រាស់ក្នុងបច្ចេកវិទ្យាជាន់ខ្ពស់ ។

នាយករដ្ឋមន្ត្រីដាណឺម៉ាក លោកស្រី Mette Frederiksen បានបញ្ជាក់ក្នុងសេចក្តីថ្លែងការណ៍ចេញផ្សាយកាលពីថ្ងៃទី៤ ខែមករា កន្លងមក ដោយអំពាវនាវឱ្យរដ្ឋាភិបាលក្រុងវ៉ាស៊ីនតោនឈប់គំរាមកំហែងអធិបតេយ្យភាពរបស់កោះហ្គ្រែនឡែនជាបន្ទាន់ ពីព្រោះវាគ្មានប្រយោជន៍ទេដែលអាមេរិកចង់គ្រប់គ្រងកោះនេះ ។

រដ្ឋាភិបាលដាណឺម៉ាកបានប្រកាសពីគម្រោងបញ្ជូនកងទ័ពទៅប្រចាំការនៅកោះហ្គ្រីនឡែន ព្រមទាំងបង្កើនការហ្វឹកហាត់ជាមួយអង្គការ NATO ដើម្បីការពារសន្តិសុខក្នុងតំបន់អាកទិក ។ រដ្ឋមន្ត្រីក្រសួងការពារជាតិដាណឺម៉ាក លោក Troels Lund Poulsen បាននិយាយកាលពីថ្ងៃទី៧ ខែមករា ថា ៖ «យើងនឹងបញ្ជូនកងទ័ពទៅប្រចាំការនៅកោះហ្គ្រីនឡែន ហើយនឹងធ្វើការហ្វឹកហាត់ឱ្យខ្លាំងជាមួយអង្គការ NATO» ។

ចំណែកក្រសួងការបរទេសដាណឺម៉ាកបានបញ្ជាក់នាពេលកន្លងមកថា គណៈកម្មាធិការគោលនយោបាយការបរទេសរបស់សភានឹងពិភាក្សាអំពីទំនាក់ទំនងរវាងដាណឺម៉ាក និងអាមេរិក ដោយមានរដ្ឋមន្ត្រីក្រសួងការបរទេសដាណឺម៉ាក លោក Lars Lokke Rasmussen ចូលរួមផងដែរ ។

ថ្មីៗនេះ អ្នកស្រី Kathy Miller ភរិយារបស់លោក Stephen Miller ជានាយករងសេតវិមានអាមេរិក បានបង្ហោះរូបភាពកោះហ្គ្រីនឡែនដែលស្ថិតក្រោមការគ្រប់គ្រងរបស់ដាណឺម៉ាកក្នុងបណ្តាញសង្គម X ដោយដាក់ទង់ជាតិអាមេរិក និងសរសេរយ៉ាងខ្លីថា «ឆាប់ៗនេះ» ។ នាយករដ្ឋមន្ត្រីដាណឺម៉ាក លោកស្រី Mette Frederiksen អំពាវនាវឱ្យអាមេរិកគោរពបូរភាពទឹកដីកោះហ្គ្រីនឡែន និងចាត់ទុកជាការបង្ហោះរូបភាពមិនសមរម្យ ។

គួរបញ្ជាក់ថា ពេលឡើងកាន់តំណែងអាណត្តិទី២ លោកប្រធានាធិបតី Trump ស្នើឱ្យដាក់បញ្ចូលកោះហ្គ្រីនឡែនទៅក្នុងទឹកដីរបស់អាមេរិក ហើយបន្ទាប់ពីកងទ័ពអាមេរិកចាប់ខ្លួនប្រធានាធិបតីវេណេស៊ុយអេឡា លោក Nicolas Maduro និងភរិយា លោក Trump ក៏បានបង្ហាញគោលជំហរចង់បានកោះនេះម្តងទៀត ដោយអះអាងថា អាមេរិកអាចនឹងប្រើប្រាស់កម្លាំងកងទ័ពដើម្បីកាន់កាប់កោះ ។

កោះហ្គ្រីនឡែន ស្ថិតនៅចន្លោះតំបន់អឺរ៉ុប និងអាមេរិកខាងជើង ទើបធ្វើឱ្យកោះមានសារៈសំខាន់សម្រាប់ប្រព័ន្ធការពារមីស៊ីលរបស់អាមេរិក ។ ជាមួយគ្នានេះ កោះហ្គ្រីនឡែនសម្បូរធនធានធម្មជាតិរ៉ែផ្សេងៗដែលអាមេរិកត្រូវការដើម្បីកាត់បន្ថយការពឹងផ្អែកនាំចូលរ៉ែពីប្រទេសចិន ។ កោះនេះស្ថិតក្រោមការគ្រប់គ្រងរបស់ដាណឺម៉ាក និងមានសិទ្ធិប្រកាសឯករាជ្យក្រោមកិច្ចព្រមព្រៀងកាលពីឆ្នាំ២០០៩ ប៉ុន្តែត្រូវការប្រាក់ឧបត្ថម្ភយ៉ាងច្រើនពីដាណឺម៉ាក ៕