អ្នកដំណើរ២នាក់ បានរងរបួសនៅលើយន្ដហោះ Scoot Airline ដែលត្រៀមហោះចេញពីអាកាសយានដ្ឋានអន្តរជាតិ Taoyuan កោះតៃវ៉ាន់ ឆ្ពោះទៅកាន់ប្រទេស សិង្ហបុរី កាលពីថ្ងៃអង្គារ ក្រោយមានហេតុការណ៍ផ្ទុះដុំសាកថ្ម Power Bank ស្របពេលដែលត្រៀមនឹងហោះហើរ។ នេះបើយោងតាមការចេញផ្សាយដោយសារព័ត៌មាន The Straits Times នាថ្ងៃពុធ ទី១១ ខែមករា ឆ្នាំ២០២៣។

អ្នកដំណើរ២នាក់ បានរងរបួសនៅលើយន្ដហោះ Scoot Airline ដែលត្រៀមហោះចេញពីអាកាសយានដ្ឋានអន្តរជាតិ Taoyuan កោះតៃវ៉ាន់ ឆ្ពោះទៅកាន់ប្រទេស សិង្ហបុរី កាលពីថ្ងៃអង្គារ ក្រោយមានហេតុការណ៍ផ្ទុះដុំសាកថ្ម Power Bank ស្របពេលដែលត្រៀមនឹងហោះហើរ។ នេះបើយោងតាមការចេញផ្សាយដោយសារព័ត៌មាន The Straits Times នាថ្ងៃពុធ ទី១១ ខែមករា ឆ្នាំ២០២៣។

រថយន្ដពន្លត់អគ្គីភ័យ ត្រូវបានដាក់ពង្រាយទៅកាន់កន្លែងកើតហេតុភ្លាមៗ បន្ទាប់ពីអាជ្ញាធរអាកាសយានដ្ឋានបានទទួលការជូនដំណឹងនៅម៉ោង ៧:៤០នាទីយប់ ហើយយន្ដហោះបានត្រឡប់ទៅកាន់ផ្លូវរត់វិញបន្ទាប់ពីភ្លើងត្រូវបានពន្លត់។

ក្រោយបញ្ចប់បញ្ហា ក្រុមការងារជើងហោះហើរ TR993 បានសូមអភ័យទោសចំពោះឧប្បត្តិហេតុនេះ ហើយបានប្រកាសពីសុវត្ថិភាពរបស់អតិថិជន និងនាវិក គឺជាអាទិភាពចម្បងរបស់ក្រុមហ៊ុន យើងនឹងស៊ើបអង្កេតលើឧប្បត្តិហេតុនេះជាបន្ដទៀត៕

ប្រភព៖ CNA

ប្រទេសម៉ិកស៊ិក ៖ ប្រធានាធិបតីម៉ិកស៊ិក លោក Andres Manuel Lopez Obrador បានបញ្ជាក់ក្នុងសេចក្តីថ្លែងការណ៍ថា លោកបានអំពាវនាវដល់លោក Joe Biden ប្រធានាធិបតីអាមេរិក ជំរុញដល់សភាអាមេរិកធ្វើកំណែទម្រង់ច្បាប់អន្តោប្រវេសន៍ ដើម្បីជួយឱ្យជនជាតិម៉ិកស៊ីកូជាច្រើនលាននាក់ដែលធ្វើអន្តោប្រវេសន៍ទៅអាមេរិក បានរស់នៅលើទឹកដីអាមេរិកដោយស្របច្បាប់ ។

ប្រធានាធិបតីម៉ិកស៊ីកូបានបញ្ជាក់ដែរថា ភាគីទាំងអស់បានឯកភាពគ្នាជំរុញការអភិវឌ្ឍផ្នែកសេដ្ឋកិច្ចដោយបង្កើតគណៈកម្មការត្រួតពិនិត្យការនាំចូលទំនិញ ដើម្បីអនុញ្ញាតឱ្យអាមេរិកខាងជើងមិនសូវពឹងផ្អែកលើទ្វីបផ្សេងទៀត ។ ក្រៅពីនេះ ប្រទេសម៉ិកស៊ិកនឹងជួយអាមេរិកគ្រប់គ្រងការនាំចូលថ្នាំបំបាត់ការឈឺចាប់ (Fentanil) ដែលគេជឿថា គឺជាមូលហេតុនៃការស្លាប់របស់ជនជាតិអាមេរិកជាច្រើននាក់ ។

សេចក្តីថ្លែងការណ៍របស់លោកប្រធានាធិបតីម៉ិកស៊ិក គឺបន្ទាប់ពីការបញ្ចប់កិច្ចប្រជុំមេដឹកនាំអាមេរិកខាងជើង ដែលរៀបចំឡើងនៅទីក្រុងម៉ិកស៊ីកូ ជាមួយលោក Biden ប្រធានាធិបតីអាមេរិក និងនាយករដ្ឋមន្ត្រីកាណាដា លោក Justin Trudeau ។ គោលបំណងសំខាន់នៃកិច្ចប្រជុំនេះ គឺពិភាក្សាពីការសហការគ្នាលើផ្នែកសេដ្ឋកិច្ច និងដោះស្រាយបញ្ហាការលួចនាំចូលថ្នាំញៀន បញ្ហាជនអន្តោប្រវេសន៍ខុសច្បាប់ និងបញ្ហាអាកាសធាតុផ្លាស់ប្តូរ ជាដើម ៕

ប្រភព ៖ TNN World

ប្រទេសថៃ៖ នាវារាជសុខោទ័យ ដែលជានាវារបស់រាជវង្សថៃ ត្រូវបានលិចនៅកណ្តាលឈូងសមុទ្រថៃ បន្ទាប់ពីម៉ាស៊ីនមានបញ្ហា ហើយបានពន្លិចកងទ័ពចំនួន ១០៥នាក់កាលពីថ្ងៃទី ១៨ ខែធ្នូ ឆ្នាំ២០២២កន្លងទៅ ពេលនេះគណៈកម្មាធិការវិធីសាស្រ្ត កំពុងធ្វើកិច្ចប្រជុំ ត្រៀមប្រាក់១០០លានបាត ឬស្មើរនឹង 2,999,400 ដុល្លារ ក្នុងការជួយសង្គ្រោះនាវានេះចេញពីបាតសមុទ្រឡើងមកវិញ។

ក្រឡែកទៅមើលកាលពីថ្ងៃទី ១៨ ខែធ្នូ ឆ្នាំ២០២២  មានសោកនាដកម្ម នៃឧប្បត្តិហេតុនៃការលិចនាវារបស់រាជវង្ស “រាជសុខោទ័យ” បន្ទាប់ពីមានព្យុះ និងខ្យល់បក់ខ្លាំងនៅកណ្តាលឈូងសមុទ្រថៃ ក្នុងស្រុកបាងសាផាន ខេត្ត ប្រាជួបគិរីខាន់។

ជាលទ្ធិផល បណ្តាលឲ្យទាហានចំនួន ១០៥ នាក់បានលិចលងក្នុងសមុទ្រ និងជួយសង្គ្រោះមនុស្សបាន ៧៦ នាក់ប៉ុណ្ណោះ ចំណែកមន្ត្រី ២៤ នាក់បានស្លាប់ និង ៥ នាក់ផ្រេងទៀតបាត់ខ្លួនរកមិនទាន់ឃើញរហូតមកទល់ពេលនេះ។

ទោះជាយ៉ាងណា បន្ទាប់ពីមានសោកនាដកម្មដ៏អាក្រក់ដែលបានកើតឡើងរយៈពេលជិតមួយខែមកហើយនោះ ក៏មានសេចក្ដីរាយការណ៍ពីកងទ័ពជើងទឹកថៃថា គណៈកម្មាធិការសង្គ្រោះកងទ័ពជើងទឹក ដឹកនាំដោយឧត្តមនាវាឯក អាក់ ឌុម ផាន់ អៀម(Adung Phan-iam) អគ្គមេបញ្ជាការនៃកងទ័ពជើងទឹកថៃ បានរៀបចំកិច្ចប្រជុំគណៈកម្មាធិការដើម្បីស្វែងរកសេចក្តីសន្និដ្ឋានស្តីពីការជ្រើសរើសក្រុមហ៊ុនដែលគួរឱ្យទុកចិត្តដើម្បី រកវិធីសាស្រ្តសង្គ្រោះនាវារាជសុខោទ័យ ដែលបានលិចនៅបាតឈូងសមុទ្រថៃកន្លងទៅ។

ជាមួយគ្នានោះគេបានបញ្ជាក់លក្ខខណ្ឌ សម្រាប់ក្រុមហ៊ុនថា នាវាត្រូវតែរក្សាទុកដើម្បីឱ្យវានៅតែអាចបន្តប្រើប្រាស់បាន ដោយមិនរុះរើ ឬកាត់នាវាឱ្យដាច់ពីគ្នា មុននឹងលើកវាឡើងនោះឡើយ។ ហើយការសង្គ្រោះនាវានេះក៏មានជំនួយពីកងទ័ពជើងទឹក ដែលដើរតួយ៉ាងសំខាន់ក្នុងការចុះប្រតិបត្តិការមួយនេះ។

ទោះជាយ៉ាងណាបើតាមការប៉ាន់ប្រមាណគេបានឱ្យដឹងថា ថវិកាក្នុងការចំណាយលើការសង្គ្រោះនាវា រាជសុខោទ័យ នឹងមានចំនួនប្រហែល ១០០ លានបាត ឬស្មើរនឹង 2,999,400 ដុល្លារ។

យ៉ាងមិញបើតាមប្រភពពីក្រុមហ៊ុនឯកជនដែលត្រូវបានគេជ្រើសរើស បាននិយាយថា ពួកគេអាចនាំទូកទាំងមូលឡើងមកលើបាន និងប្រើបច្ចេកទេស ក៏ដូចជាឧបករណ៍ប្រកបដោយប្រសិទ្ធភាពក្នុងការស្ទូច ប៉ុន្តែឧបករណ៍មួយចំនួនត្រូវតែនាំចូលពីបរទេស ដែលវាអាចចំណាយពេលខ្លះដើម្បីដំណើរការទទួលបានជោគជ័យ៕ ប្រភព៖ Thairath

សហរដ្ឋអាមេរិក ៖ ហេតុការណ៍មួយបានកើតឡើងជាមួយរថយន្ត Tesla ម៉ូឌែល S គ្មានមនុស្សបើកនៅអាមេរិកម្តងទៀតហើយ លើកនេះរថយន្ត Tesla ដែលកំពុងតែបើកបរនៅផ្លូវក្រោមដីបានឈប់ភ្លាមៗ ធ្វើឱ្យរថយន្តផ្សេងទៀតដែលបើកបរតាមក្រោយជាន់ហ្វ្រាំងមិនទាន់បុកបន្តគ្នាដល់ទៅ៨គ្រឿង បណ្តាលឱ្យស្ទះចរាចរណ៍ និងមានអ្នករងរបួសយ៉ាងតិច៩នាក់ ក្នុងនោះមានក្មេងអាយុត្រឹម២ឆ្នាំផងដែរ ។

តាមសារព័ត៌មានក្រៅប្រទេសថា អ្នកបើករថយន្តបង្កហេតុបានប្រើប្រាស់ mode បញ្ជាឱ្យរថយន្តនេះបើកបរដោយខ្លួនវា ឬ full self-driving ជា mode ទើបបង្កើតថ្មី ខណៈលោក Elon Musk ទើបប្រកាសពីភាពជោគជ័យក្នុងការប្រើប្រាស់របបនេះតាម Twitter ផ្ទាល់ខ្លួនមិនប៉ុន្មានម៉ោងមុនកើតហេតុ ។ ការប្រើប្រាស់ mode បើកបរដោយខ្លួនឯងនេះទើបតែបង្ហាញខ្លួននៅអាមេរិកកាលពីចុងឆ្នាំមុន ។

ផ្នែកគ្រប់គ្រងសុវត្ថិភាពចរាចរណ៍ផ្លូវជាតិបង្ហាញថា កំពុងតែស៊ើបសួររកមូលហេតុរបស់ហេតុការណ៍គ្រោះថ្នាក់នេះឱ្យបានលម្អិត ។ តាមទិន្នន័យ តាំងពីខែកក្កដា ឆ្នាំ២០២១ រហូតដល់ខែមិថុនា ឆ្នាំ២០២២ រថយន្ត Tesla ដែលប្រើរបបបើកបរដោយស្វ័យប្រវត្តិ (Autopilot) និងប្រព័ន្ធបើកបរដោយស្វ័យប្រវត្តិយ៉ាងពេញលេញ ឬ full self-driving ពាក់ព័ន្ធនឹងគ្រោះថ្នាក់លើផ្លូវចំនួន៣២៩លើកបណ្តាលឱ្យមានអ្នកស្លាប់ និងរបួសធ្ងន់ ។ ក្នុងរយៈពេល៣ខែនេះ មានសេចក្តីរាយការណ៍ថា មានពាក្យបណ្តឹងអំពីការបើកបររបស់ Tesla ជាង១០០បណ្តឹង ៕

ប្រភព ៖ thairath

តៃវ៉ាន់ ៖ កាលពីថ្ងៃទី១១ ខែមករា កន្លងមក កងទ័ពអាកាសរបស់តៃវ៉ាន់បានបង្ហាញការត្រៀមខ្លួនផ្នែកកងទ័ពដើម្បីការពារដែនអាកាសរបស់ខ្លួន ដោយធ្វើការហ្វឹកហាត់ប្រចាំឆ្នាំ មុនឈានដល់ថ្ងៃបុណ្យចូលឆ្នាំចិនដែលឈប់សម្រាប់យូរថ្ងៃ ។

កងទ័ពអាកាសតៃវ៉ាន់បានដឹកនាំកងយន្តហោះចម្បាំង Mirage 2000 ធ្វើការហ្វឹកហាត់ និងរៀនពីបច្ចេកទេសចុះចតទៅកាន់អ្នកសារព័ត៌មាននៅមូលដ្ឋានទ័ពអាកាស Hsinchu នៅភាគខាងត្បូងកោះតៃវ៉ាន់ ។

អ្នកបើកយន្តហោះចម្បាំងបានឱ្យដឹងថា យន្តហោះប្រដេញទាំងអស់របស់តៃវ៉ាន់ស្ថិតនៅក្នុងការប្រយ័ត្នប្រយែង និងត្រៀមខ្លួនទុកជាមុន បើមានយន្តហោះអន្តរជាតិឈ្លានពានចូលដែនអាកាសរបស់តៃវ៉ាន់ ។

ពេលមុននេះ ក្រសួងការពារជាតិតៃវ៉ាន់បង្ហាញថា បានប្រទះឃើញយន្តហោះចំនួន៥៧គ្រឿង និងនាវាចម្បាំង៤គ្រឿងរបស់ប្រទេសចិនចូលមកជិតកោះតៃវ៉ាន់ រួមទាំងយន្តហោះចំនួន២៨គ្រឿងទៀតរបស់ចិនហោះចូលមកក្នុងតំបន់ការពារដែនអាកាសផងដែរ ។

គួរបញ្ជាក់ថា ប្រទេសចិនសម្លឹងមកកាន់តៃវ៉ាន់ គឺជាដែនដីមួយផ្នែករបស់ខ្លួន ដោយចិនបានជំរុញកម្លាំងបន្ថែមផ្នែកសេដ្ឋកិច្ច កងទ័ព និងនយោបាយ ដើម្បីអះអាងភាពជាកម្មសិទ្ធិលើតៃវ៉ាន់ ៕

ប្រភព ៖ TNN World

រដ្ឋធានីកៀវ៖ ក្រោយពេលទាហានរុស្ស៊ី បានបាក់ទ័ពជាបន្ដបន្តាប់ នៅក្នុងការធ្វើសង្គ្រាម ប្រឆាំងនឹងក្រុងកៀវ នោះមក ក្រុងមូស្គូ បានផ្លាស់ប្ដូរតំណែងមេទ័ពកំពូលៗជាញឹកញាប់ ហើយឥឡូវនេះ ប្រធានាធិបតីរុស្ស៊ី លោក វ៉្លាឌីមៀ ពូទីន (Vladimir Putin) បានដកហូតតំណែងរបស់មេទ័ពកំពូលរបស់ខ្លួន និង ដាក់មេទ័ពថ្មី ឲ្យចូលមកដឹកនាំធ្វើសង្គ្រាម នៅក្នុងប្រទេសអ៊ុយក្រែន បន្ដទៀត។

សារព័ត៌មាន BBC បានចេញផ្សាយ កាលពីព្រឹក ថ្ងៃព្រហស្បតិ៍ ទី១២ ខែមករា ថា លោក វ៉្លាឌីមៀ ពូទីន (Vladimir Putin) ប្រធានាធិបតីរុស្ស៊ី បានដកហូតតំណែងមេទ័ពកំពូលទទួលបន្ទុកសង្គ្រាម នៅក្នុងប្រទេសអ៊ុយក្រែន ចេញពីលោកឧត្ដមសេនីយ៍ ស៊ើហ្គេ ស៊ូរ៉ូវីគីន (Sergei Surovikin) ក្រោយពេលកាន់កាប់តំណែងនេះ បានត្រឹមតែរយៈពេល៣ខែ។ មេទ័ពកំពូលរូបនេះ ធ្លាប់មានប្រវត្ដិខាងការប្រព្រឹត្ដយ៉ាងឃោរឃៅ នៅក្នុងការដឹកនាំធ្វើសង្គ្រាម នៅឆេកឆេន និង ស៊ីរី។

ការផ្លាស់ប្ដូរតំណែងមេទ័ពកំពូលជាបន្ដបន្ទាប់នេះ បានកើតឡើង ស្របពេលទាហានរុស្ស៊ី បានអះអាង ថា កម្លាំងប្រដាប់អាវុធរបស់ក្រុងមូស្គូ មានស្ទុះទៅមុខ នៅលើសមរភូមិ នាភាគខាងកើត ប្រទេសអ៊ុយក្រែន ក្រោយការទទួលបរាជ័យ ជាបន្ដបន្ទាប់ នៅក្នុងរយៈពេលប៉ុន្មានខែកន្លងទៅថ្មីៗនេះ។

មេដឹកនាំវិមានក្រឹមឡាំង លោក ពូទីន បានសម្រេចតែងតាំងលោកឧត្ដមសេនីយ៍ វ៉ាឡេរី ហ្គេរ៉ាស៊ីម៉ូវ (Valery Gerasimov) នាយអគ្គសេនាធិការកងទ័ពរុស្ស៊ី ជាអ្នកដឹកនាំធ្វើសង្គ្រាម នៅក្នុងប្រទេសអ៊ុយក្រែន តាមអ្វីដែលគាត់ហៅ ជាប្រតិបត្ដិការយោធាពិសេស។ លោក Sergei Surovikin ជាអ្នកដឹកនាំឲ្យមានការវាយប្រហារយ៉ាងឃោរឃៅ ប្រឆាំងនឹងហេដ្ឋារចនាសម្ព័ន្ធថាមពល នៅក្នុងប្រទេសអ៊ុយក្រែន កាលពីពេលថ្មីៗនេះ នៅក្នុងអំឡុងពេលគាត់ កាន់តំណែងជាមេទ័ព សម្រាប់ធ្វើសង្គ្រាម អស់រយៈពេល៣ខែមកនេះ។

លោកឧត្ដមសេនីយ៍ Gerasimov បានស្ថិតក្នុងតំណែង ជាមេទ័ពកំពូល ចាប់តាំងពីឆ្នាំ២០១២ រហូតមក។ គាត់ក្លាយជានាយអគ្គសេនាធិការកងទ័ពរុស្ស៊ី កាន់តំណែងនេះ បានយូរជាងគេបំផុត ក្រោយសម័យសហភាពសូវៀត។

លោកឧត្ដមសេនីយ៍ Surovikin ដែលបច្ចុប្បន្នជាអនុប្រធានរបស់គាត់ ត្រូវបានគេដាក់ឈ្មោះជា ឧត្ដមសេនីយ៍ Armageddon (អាម៉ាហ្គេដដុន) សម្រាប់កលល្បិចដ៏ឃោរឃៅរបស់គាត់ នៅក្នុងសង្គ្រាមមុនៗ ដោយរួមទាំងប្រតិបត្តិការរបស់រុស្ស៊ី នៅក្នុងប្រទេសស៊ីរី ជាពិសេស ការទម្លាក់គ្រាប់បែកយ៉ាងធ្ងន់ធ្ងរ ទៅលើទីក្រុងអាឡែបប៉ូ (Aleppo)។

នៅក្នុងរយៈពេលដ៏ខ្លី ក្រោយពេលលោកឧត្ដមសេនីយ៍ Sergei Surovikin បានទទួលតំណែង ជាមេទ័ពកំពូល ដឹកនាំប្រតិបត្ដិការ នៅក្នុងខែតុលា ឆ្នាំ២០២២ នោះមក កម្លាំងទាហានរុស្ស៊ី បានចាប់ផ្ដើមបើកយុទ្ធនាការ វាយប្រហារកម្ទេចនូវហេដ្ឋារចនាសម្ព័ន្ធស៊ីវិល នៅទូទាំងប្រទេសអ៊ុយក្រែន ដោយបានធ្វើឲ្យមនុស្សរាប់លាននាក់ គ្មានភ្លើងអគ្គិសនី និង ទឹកស្អាតប្រើប្រាស់ នៅក្នុងអំឡុងរដូវរងាខ្លាំង។ លោកឧត្ដមសេនីយ៍ ក៏បានបញ្ជាឲ្យដកកងទ័ព ចេញពីតំបន់ភាគខាងត្បូង ទីក្រុងខឺរសុន (Kherson) ដែលនាំឲ្យកងទ័ពការពារទឹកដីរបស់អ៊ុយក្រែន ទទួលបានជោគជ័យដ៏ធំធេង។

ក្រសួងការពារជាតិរុស្ស៊ី បានបញ្ជាក់ ថា ការសម្រេចចិត្តតែងតាំងលោកឧត្ដមសេនីយ៍ វ៉ាឡេរី ហ្គេរ៉ាស៊ីម៉ូវ (Valery Gerasimov) នាយអគ្គសេនាធិការកងទ័ពរុស្ស៊ី ដឹកនាំប្រតិបត្ដិការយោធាពិសេស ជំនួសលោកឧត្តមសេនីយ៍ Surovikin មានគោលបំណងរៀបចំ«ទំនាក់ទំនងឲ្យកាន់តែជិតស្និទ្ធ រវាងអង្គភាពកងកម្លាំងប្រដាប់អាវុធផ្សេងៗ ការកែលម្អគុណភាព និងប្រសិទ្ធភាព សម្រាប់ការគ្រប់គ្រងរបស់កងកម្លាំងរុស្ស៊ី»។

ដោយឡែក អ្នកវិភាគយោធា លោក រ៉ូប លី (Rob Lee) បានសរសេរ នៅលើបណ្ដាញសង្គម Twitter ថា «នៅក្នុងឋានៈជាមេបញ្ជាការបង្រួបបង្រួមកម្លាំងរុស្ស៊ី នៅក្នុងប្រទេសអ៊ុយក្រែន លោកឧត្ដមសេនីយ៍ Surovikin បានក្លាយជាអ្នកមានអំណាចខ្លាំង ហើយទំនងជាបានធ្វើការងាររំលងរដ្ឋមន្ត្រីការពារជាតិរុស្ស៊ី លោក ស៊ើហ្គេ ស៊ួយហ្គូ (Sergei Shoigu) និង លោកឧត្ដមសេនីយ៍ Gerasimov ខណៈនិយាយជាមួយនឹងមេដឹកនាំវិមានក្រឹមឡាំង លោក ពូទីន» ៕

លោក Larry Sanger ដែលជាសហស្ថាននិក Wikipedia ធ្លាប់បានព្រមាននៅក្នុងបទសម្ភាសន៍ជាមួយ UnHerd កាលពីឆ្នាំ២០២១ យ៉ាងដូច្នេះថា Wikipedia មិនអាចទុកចិត្តបានថានឹងផ្ដល់ព័ត៌មានពិត ឬស្រុកក្រិតត្រឹមត្រូវទៅឱ្យមនុស្សរហូតនោះទេ។

មូលហេតុដែលយើងមិនអាចទុកចិត្តប្រភពចេញពី Wikipedia បានគ្រប់រឿងនោះ គឺដោយសារតែ Wikipedia មនុស្សគ្រប់គ្នាទូទាំងពិភពលោកអាចចូលទៅបន្ថែមទិន្នន័យ ឬកែប្រែអត្ថបទនៅលើ Wikipedia ដោយសេរី ពោលគឺមិនចាំបាច់ទាល់តែជាម្ចាស់វេបសាយ ឬអ្នកទទួលបានសិទ្ធកែប្រែប៉ុណ្ណោះទើបមានសិទ្ធកែអត្ថបទ ឬធ្វើបច្ចុប្បន្នភាពបន្ថែមទិន្នន័យផ្សេងៗបាននោទេ។ ហើយមូលហេតុដែល Wikipedia បានអនុញ្ញាយឱ្យមនុស្សទូទាំងពិភពលោក អាចចូលទៅបន្ថែមទិន្នន័យព័ត៌មានទាំងអស់បានដូច្នេះ គឺដើម្បីធ្វើឱ្យ Wikipedia ទទួលបានការធ្វើបច្ចុប្បន្នភាពថ្មីជាប្រចាំ ដែលជាហេតុធ្វើឱ្យទិន្នន័យដែលមានក្នុង Wikipedia​ គឺជាទិន្នន័យដែលទាន់សម័យកាលរហូត។

យ៉ាងណាក៏ដោយអ្វីដែលជាបញ្ហានោះ ស្របពេលដែលអត្ថបទជាច្រើននៅលើ Wikipedia អាចកែប្រែបានដោយមនុស្សទូទៅដូច្នេះ គឺវាពិបាកនឹងដឹងណាស់ថា តើចំណេះដឹង និងព័ត៌មាននោះវាត្រឹមត្រូវឬសុក្រិតដល់កម្រិតណា។ ហេតុនេះយើងអាចប្រើ Wikipedia ជាកន្លែងផ្ដល់នូវតម្រុយខ្លះៗ ហើយយើងត្រូវទៅស្រាវជ្រាវរកប្រភពព័ត៌មានបន្ថែមដែលអាចទុកចិត្តបានយកមកបញ្ជាក់ឱ្យបានត្រឹមត្រូវជាមុនសិន មុននឹងកសម្រេចយកចំណេះដឹង ឬព័ត៌មានទាំងនោះទៅប្រើ។

គួរជម្រាបផងដែរថា Wikipedia ត្រូវបានបង្កើតឡើងក្នុងឆ្នាំ២០០១ ដោយលោក Jimmy Wales និងមានលោក Larry Sanger ជាសហស្ថាបនិក។ ហើយការបង្កើត Wikipedia មួយនេះឡើង គឺលោក Jimmy Wales មានក្ដីស្រមៃមួយគឺចង់ធ្វើឱ្យ Wikipedia ក្លាយជាកន្លែងមួយដែលផ្ដល់នូវសេរីភាពដល់អ្នកប្រើប្រាស់ និងអ្នកស្រលាញ់ការសិក្សារៀនសូត្រគ្រប់ៗគ្នាជុំវិញពិភពលោក ឱ្យពួកគេអាច​ចែករំលែកទិន្នន័យ ក៏ដូចជាចំណេះដឹង ដល់គ្នាដោយស្មើភាព​ និងទូលំទូលាយ៕

បរទេស៖ តាមការស្រាវជ្រាវដែលបានចេញផ្សាយនៅក្នុងទិនានុប្បវត្តិវិទ្យាសាស្ត្រកាលពីថ្ងៃព្រហស្បតិ៍បានព្យាករណ៍ថា ៤៩ ភាគរយនៃផ្ទាំងទឹកកកចំនួន ២១៥,០០០ របស់ពិភពលោក ជាពិសេសផ្ទាំងទឹកកកតូចៗនឹងរលាយបាត់នៅឆ្នាំ ២១០០ ដោយសារការឡើងកំដៅផែនដី។

នាពេលថ្មីកន្លងទៅនេះមានសេចក្ដីរាយការណ៍អំពីការសិក្សារបស់ អ្នកនិពន្ធស្រាវជ្រាវ Regine Hawck បានឱ្យដឹងថា  ការសិក្សាបានពិនិត្យមើលផលប៉ះពាល់នៃករណីចំនួន ៤ ចាប់ពី ១.៥, ២, ៣ និង ៤ °C ដោយរំលឹកឡើងវិញថាការកើនឡើងនៃសីតុណ្ហភាពសកលនាំទៅរកការរលាយ និងការបាត់បង់កាន់តែច្រើននៃផ្ទាំងទឹកកក។ នោះមានន័យថាប្រសិនបើអ្នកបន្ថយសីតុណ្ហភាពកើនឡើង អ្នកក៏អាចកាត់បន្ថយការខាតបង់របស់ទឹកកកក្នុងការរលាយដូចគ្នា។

ទោះជាយ៉ាងណាក៏ដោយ សីតុណ្ហភាពសកលជាមធ្យមនាពេលបច្ចុប្បន្ននេះត្រូវបានគេរំពឹងថានឹងកើនឡើង ២.៧ អង្សាសេ ដែលនឹងបណ្តាលឱ្យមានផ្ទាំងទឹកកកនៅអឺរ៉ុបកណ្តាល ប្រទេសកាណាដាភាគខាងលិច អាមេរិក និងនូវែលសេឡង់បានរលាយបាត់ខ្លួនស្ទើរតែទាំងស្រុង។

បន្ថែមពីនោះតួលេខសីតុណ្ហភាពពិភពលោកបច្ចុប្បន្នគឺមិនលើសពី ១.៥ អង្សាសេ ដែលលើសពីកម្រិតមុនបដិវត្តន៍ឧស្សាហកម្មដែលប្រទេសអភិវឌ្ឍន៍លើពិភពលោកធ្លាប់បានសន្យាក្នុងកិច្ចព្រមព្រៀងប៉ារីសកាលពីកន្លងទៅ។

ជាមួយគ្នានោះអ្នកស្រាវជ្រាវបានប៉ាន់ប្រមាណថា ៤៩ ភាគរយនៃផ្ទាំងទឹកកករបស់ពិភពលោកនឹងរលាយបាត់នៅឆ្នាំ ២១០០ខាងមុខ  ដែលវានឹងស្មើនឹងប្រហែល ២៦ ភាគរយនៃដង់ស៊ីតេផ្ទាំងទឹកកករបស់ពិភពលោក។ ហើយចំណុចដំបូងគឺជាផ្ទាំងទឹកកកតូចៗ នឹងត្រូវប៉ះពាល់ជាមុនគេ។

យ៉ាងណាមិញអ្នកស្រាវជ្រាវ បានបន្ថែមថា ការឡើងកំដៅផែនដី ១.៥អង្សាសេ នឹងបង្កើនកម្រិតទឹកសមុទ្រជាមធ្យម ៩ សង់ទីម៉ែត្រ ខណៈដែលការកើនឡើង ៤.០ អង្សាសេនឹងបង្កើនកម្ពស់ទឹកសមុទ្រ ១៥ សង់ទីម៉ែត្រ ដែលនេះនឹងបណ្តាលឱ្យមានព្យុះភាគច្រើនកើតឡើង។ រួមទាំងប៉ះពាល់ដល់ធនធានទឹកសាប ដែលប៉ះពាល់ដល់មនុស្សប្រហែលពីរពាន់លាននាក់នៅទូទាំងពិភពលោក៕ ប្រភព៖ Khaosod

អន្តរជាតិ៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី កាលពីថ្ងៃអង្គារ បានសម្រេចដកហូតសញ្ជាតិពី អ្នកនយោបាយអ៊ុយក្រែនចំនួន៤នាក់ ក្នុងនោះរួមមានម្នាក់ជាមិត្តភក្តិរបស់ប្រធានាធិបតីរុស្ស៉ី លោក វ៉្លាឌីមៀ ពូទីន ទៀតផង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី១១ ខែមករា ឆ្នាំ២០២៣។

លោកប្រធានាធិបតីអ៊ុយក្រែន បានប្រកាសដូច្នេះថា «ខ្ញុំបានសម្រេចចិត្តដកហូតសញ្ជាតិអ៊ុយក្រែន ពីបុគ្គល៤នាក់ រួមមានឈ្មោះ អាន់ឌ្រី ឡេអូនីដអូវិច ដឺកាច់ (Andriy Leonidovych Derkach), តារ៉ាស់ រ៉ូម៉ាណូវិច កូហ្សាក់ (Taras Romanovych Kozak), រេណាត់ រ៉ាវេលីយ៉ូវវិច គូសមីន(Renat Raveliyovych Kuzmin) និងវិចទ័រ វ៉ូឡូឌីមៀរ៉ូវិច ម៉េដវេដឈុក (Viktor Volodymyrovych Medvedchuk)»។ លោក ហ្សេលេនស្គី បានសង្កត់ធ្ងន់ថា «ប្រសិនបើអ្នកនយោបាយអ៊ុយក្រែន ជ្រើសរើសមិនបម្រើប្រជាជនអ៊ុយក្រែន តែបម្រើឃាតកដែលចូលមកអ៊ុយក្រែនទៅវិញ សកម្មភាពយើងក៏នឹងសមស្របតាមនោះដែរ»។

គួរបញ្ជាក់ថា លោក ម៉េដវេដឈុក ដែលជាមិត្តភក្តិរបស់លោក ពូទីន ធ្លាប់បានដឹកនាំគណបក្សនយោបាយមួយនៅអ៊ុយក្រែន ដែលមាននិន្នាការគាំទ្រវិមានក្រឹមឡាំង។ លោកបានរងការប្រកាន់ពីបទក្បត់ជាតិ មុនពេលត្រូវបានបញ្ជូនទៅកាន់ប្រទេសរុស្ស៉ី កាលពីខែកញ្ញា ឆ្នាំ២០២២ ក្រោមក្របខណ្ឌដោះដ្រូរឈ្លើយសឹក។ ចំណែកបុគ្គល៣នាក់ទៀត គឺជាសមាជិកសភាអ៊ុយក្រែន៕