ប្រទេសកូរ៉េខាងជើង ៖ ប្រទេសកូរ៉េខាងជើងបានបន្ទោសលេខាធិការដ្ឋាននៃអង្គការសហប្រជាជាតិ (UN) ថា ជាមនុស្សមុខពីរ ខណៈលេខាធិការដ្ឋាននៃអង្គការសហប្រជាជាតិរូបនេះនិយាយថា គម្រោងនុយក្លេអ៊ែររបស់កូរ៉េខាងជើងមានគ្រោះថ្នាក់ដល់ពិភពលោកក្នុងពេលបច្ចុប្បន្ន ប៉ុន្តែបែរជាមើលរំលងការប្រមូលផ្តុំអាវុធរបស់សហរដ្ឋអាមេរិកទៅវិញ ។

ភ្នាក់ងារព័ត៌មានកណ្តាលកូរ៉េខាងជើង Korean Central News Agency (KCNA) បានបង្ហាញសេចក្តីថ្លែងការណ៍ចេញដោយលោក Joe Chul Soo មន្ត្រីជាន់ខ្ពស់នៃក្រសួងការបរទេសកូរ៉េខាងជើង កាលពីថ្ងៃទី១៤ ខែមករាថា លោក Antonio Guterres លេខាធិការដ្ឋាននៃអង្គការសហប្រជាជាតិ គឺជាមនុស្សមុខពីរ និងមានឥរិយាបថចង់បំផ្លាញទំនុកចិត្តរបស់ពិភពលោកនៅប្រទេសអ៊ុយក្រែន ។ លោក Guterres បានមើលរំលងការប្រមូលផ្តុំអាវុធរបស់សហរដ្ឋអាមេរិក និងធ្វើឱ្យកើតស្ថានការណ៍នុយក្លេអ៊ែរតឹងតែងនៅឧបទ្វីបកូរ៉េ និងក្នុងតំបន់ ហើយកូរ៉េខាងជើងនឹងគ្មានថ្ងៃលើកលែងគម្រោងនុយក្លេអ៊ែរដាច់ខាត ។

សេចក្តីថ្លែងការណ៍របស់លោក Joe Chul Soo ក៏បានចោទប្រទេសជប៉ុនដែរថា គ្មានគុណសម្បត្តិសីលធម៌គ្រប់គ្រាន់ដើម្បីក្លាយជាសមាជិកក្រុមប្រឹក្សាសន្តិសុខអង្គការសហប្រជាជាតិ ខណៈជប៉ុនធ្លាប់ជាប្រទេសបង្កសង្គ្រាមអាណានិគម ។

គួរបញ្ជាក់ថា លោក Guterres បានថ្លែងនៅក្នុងកិច្ចប្រជុំរបស់ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃទី១២ ខែមករា ខណៈប្រទេសជប៉ុនជាប្រធានកិច្ចប្រជុំនេះថា គម្រោងនុយក្លេអ៊ែរខុសច្បាប់របស់កូរ៉េខាងជើងធ្វើឱ្យមានគ្រោះថ្នាក់ និងគំរាមកំហែងដល់ពិភពលោកក្នុងពេលបច្ចុប្បន្ន ។

ក្រៅពីនេះ វាក៏ជាកត្តាជំរុញហានិភ័យផងដែរ និងមានភាពតឹងតែងដល់ភូមិសាស្ត្រនយោបាយកាន់តែខ្លាំងឡើង ហើយកូរ៉េខាងជើងមានតួនាទីចរចាឡើងវិញអំពីគម្រោងនុយក្លេអ៊ែរ ខណៈកាលពីឆ្នាំ២០១៩ ការចរចារវាងលោក គីម ជុងអ៊ុន មេដឹកនាំកូរ៉េខាងជើង និងអតីតប្រធានាធិបតីសហរដ្ឋអាមេរិក លោក ដូណាល់ ត្រាំ បញ្ចប់ដោយគ្មានលទ្ធផលអ្វីឡើយ ៕

ប្រភព ៖ TNN World

ប្រទេសចិន ៖ កាលពីថ្ងៃទី១៤ ខែមករា លោកស្រី Jiao Yahui ប្រធានពេទ្យនៃគណៈកម្មការសុខភាពជាតិចិន បានផ្តល់សម្ភាសន៍ជាមួយក្រុមអ្នកសារព័ត៌មានថា ចំនួនអ្នកស្លាប់ដោយសារជំងឺកូវីដនៅចិន គឺកើនឡើងខ្ពស់ជិតដល់៦ម៉ឺននាក់ (ស្មើ៥៩.៩៣៨នាក់) គិតតាំងពីថ្ងៃទី៨ ខែធ្នូ ឆ្នាំ២០២២ រហូតដល់ថ្ងៃទី១២ ខែមករា ឆ្នាំ២០២៣ ។

ក្នុងចំណោមនោះ ពលរដ្ឋចំនួន៥.៥០៣នាក់ស្លាប់ដោយសារប្រព័ន្ធផ្លូវដង្ហើមខ្សោយ ខណៈពលរដ្ឋ៥៤.៤៣៥នាក់ស្លាប់ដោយសារជំងឺប្រចាំកាយ ដូចជា ជំងឺមហារីក និងជំងឺបេះដូងជាដើម ។ មុននេះ រដ្ឋាភិបាលចិនបានរាយការណ៍ពីចំនួនអ្នកស្លាប់ដោយសារផ្លូវដង្ហើមខ្សោយតែប៉ុណ្ណោះ ជាហេតុធ្វើឱ្យវែបសាយរបស់មជ្ឈមណ្ឌលគ្រប់គ្រង និងបង្ការជំងឺរបស់ចិនរាយការណ៍ថា មានអ្នកស្លាប់ដោយសារកូវីដត្រឹមតែ៣៧នាក់ប៉ុណ្ណោះក្នុងខែធ្នូឆ្នាំមុន ខណៈមន្ទីរពេទ្យ និងកន្លែងដុតសពបានទទួលអ្នកជំងឺកូវីដ និងអ្នកស្លាប់ក្នុងចំនួនច្រើនក្តី ។

អង្គការសុខភាពពិភពលោក (WHO) និងមន្ត្រីអាមេរិកចង្អុលបង្ហាញថា កន្លងមក ប្រទេសចិនបានរាយការណ៍ពីចំនួនអ្នកឆ្លងកូវីតនៅចិនទាបហួសខុសពីការពិត ហើយ WHO ក៏បានអំពាវនាវឱ្យចិនបង្ហាញទិន្នន័យពិតប្រាកដ និងបង្ហាញឱ្យរហ័សជាងមុន ដើម្បីជាប្រយោជន៍ក្នុងការវាយតម្លៃស្ថានភាពការឆ្លងរាលដាលក្នុងសង្គម និងទូទាំងពិភពលោក ។

លោកស្រី Jiao Yahui បន្ថែមថា អ្នកឆ្លងកូវីដដែលធ្វើដំណើរមកសុំការពិគ្រោះយោបល់នៅគ្លីនិកនានា គឺបានឆ្លងផុតចំនួនខ្ពស់ហើយ ពី២,៨៦លាននាក់នៅថ្ងៃទី២៣ ខែធ្នូ មកត្រឹម៤,៧៧សែននាក់នៅថ្ងៃទី១២ ខែមករា ខណៈចំនួនអ្នកឆ្លងកូវីដដែលចូលព្យាបាលនៅមន្ទីរពេទ្យមាននិន្នាការថយចុះ គឺពី១,៦៣លាននាក់នៅថ្ងៃទី៥ ខែមករា មកត្រឹម១,២៧លាននាក់នៅថ្ងៃទី១២ ខែមករា ។

ទោះយ៉ាងណា អ្នកជំនាញផ្នែកសុខាភិបាលជាច្រើនបានអំពាវនាវឱ្យរដ្ឋាភិបាលចិនបង្ហាញទិន្នន័យត្រឹមត្រូវពិតប្រាកដជាបន្តបន្ទាប់ ជាពិសេស ទិន្នន័យការឆ្លងជំងឺកូវីដរបស់ពលរដ្ឋទូទៅនិងពលរដ្ឋអាយុច្រើន ការទទួលការព្យាបាលក្នុងមន្ទីរពេទ្យ និងចំនួនអ្នកស្លាប់ទាំងអស់ ដើម្បីជាប្រយោជន៍ដល់ការដាក់ផែនការទប់ទល់នឹងជំងឺកូវីដនាថ្ងៃអនាគត បន្ទាប់ពីចិនបើកប្រទេសឡើងវិញ ៕

ប្រភព ៖ The Standard

វៀតណាមបានស្នើសុំជប៉ុន ជាលើកទីពីរ សម្រាប់ការគាំទ្រក្នុងការកសាងផ្លូវរថភ្លើងល្បឿនលឿនពីខាងជើងទៅខាងត្បូង។

នាយករដ្ឋមន្ត្រីវៀតណាម Pham Minh Chinh បានធ្វើសំណើនេះ ក្នុងពេលជួបជាមួយរដ្ឋមន្ត្រីក្រសួងហិរញ្ញវត្ថុជប៉ុនលោក Shunichi Suzuki នៅទីក្រុ ហាណូយ កាលពីថ្ងៃសុក្រ។

នេះជាលើកទីពីរហើយដែលនាយករដ្ឋមន្ត្រីវៀតណាមបានធ្វើសំណើទៅកាន់ប្រទេសជប៉ុនទាក់ទងនឹងផ្លូវដែកដ៏ធំ បន្ទាប់ពីបានស្នើឱ្យធនាគារជប៉ុនសម្រាប់កិច្ចសហប្រតិបត្តិការអន្តរជាតិ (JBIC) គាំទ្រគម្រោងនេះ ខណៈដែលលោកបានទទួលជួប ប្រធាន JBIC លោក Maeda Tadashi នៅទីក្រុងហាណូយ កាលពីខែកក្កដា។

ក្រសួងដឹកជញ្ជូនបានស្នើសុំខ្សែរថភ្លើងល្បឿនលឿនពីជើងទៅត្បូងប្រវែង ១.៥៥៩ គីឡូម៉ែត្រ ដែលមានល្បឿនពី ៣២០ ទៅ ៣៥០ គីឡូម៉ែត្រក្នុងមួយម៉ោង។ ផ្លូវរថភ្លើងល្បឿនលឿននេះនឹងត្រូវប្រើប្រាស់សម្រាប់ដឹកជញ្ជូនអ្នកដំណើរ ខណៈដែលផ្លូវរថភ្លើងប្រពៃណី បច្ចុប្បន្ន នឹងត្រូវបានប្រើដើម្បីដឹកជញ្ជូនទំនិញ៕

ប្រភព៖ VN Express

បរទេស៖ ចិនប្រញាប់ប្រញាល់ស្វែងរកជនរងគ្រោះក្រោយការផ្ទុះរោងចក្រគីមីដ៏ធំមួយកន្លែង ខណៈគេនៅមិនទាន់ដឹងពីមូលហេតុនៃអគ្គិភ័យនេះនៅឡើយ។

នាថ្ងៃទី ១៦ ខែមករា ឆ្នាំ២០២៣ មានសេចក្ដីរាយការណ៍ ពីសារព័ត៌មាន China Daily និង Straits Timesបានឱ្យដឹងថា មានករណីនៃអគ្គិភ័យឆាបឆេះយ៉ាងសន្ធោសន្ធៅ ក្រោយមានការផ្ទុះរោងចក្រគីមី Panjin Haoer Chemicalដែលជារោងចក្រគីមីដ៏ធំមួយកន្លែង ស្ថិតនៅក្នុងខេត្ត Liaoning នៅភាគឦសាន ប្រទេសចិន កាលពី រសៀលថ្ងៃអាទិត្យ ទី១៥ ខែមករា ម៉ោងក្នុងស្រុក។

ក្នុងហេតុការណ៍ដ៏អាក្រក់នេះផងដែរអាជ្ញាធរបានធ្វើការយ៉ាងប្រញាប់ប្រញាល់ ក្នុងការនាំយករថយន្តមកសង្គ្រោះជាបន្ទាន់ និងបានបង្កើនល្បឿនក្នុងស្វែងរកជនរងគ្រោះពីការផ្ទុះនេះ។

ជាលទ្ធផលរបាយការណ៍ជាបឋមមន្ត្រីជំនាញកំពុងតែស្រាវជ្រាវរកមូលហេតុនៃការផ្ទុះឆេះរោងចក្រ​នេះ និងបានបញ្ជាក់ថា យ៉ាងហោចណាស់មានមនុស្សស្លាប់ចំនួន ២ នាក់ក្នុងគ្រោះអគ្គិភ័យនេះ។

ប៉ុន្តែទោះជាយ៉ាងណាក៏ដោយ មានមនុស្សជាច្រើន មានការព្រួយបារម្ភ និងជឿថា ចំនួននេះនៅមិនទាន់ប្រាកដនៅឡើយទេ គឺអាចមានជនរងគ្រោះជាច្រើនបានជាប់នៅក្នុងរោងចក្រនៅពេលមានគ្រោះថ្នាក់ ដោយសារតែ Panjin Haoer Chemical ជារោងចក្រធំមួយ ហើយមានបុគ្គលិកជាង ២,៥០០ នាក់ឯណ្ណោះ៕ ប្រភព៖ Khaosod

បរទេស៖ អ្នកវិទ្យាសាស្ត្របានអះអាងថាខ្លួនទទួលបានភាពជោគជ័យ ក្នុងការពិសោធន៍លើសត្វកណ្តុរដើម្បី ផ្លាស់ប្ដូរ កណ្ដុរចាស់ទៅជាកណ្តុរវ័យក្មេង និងមានភាពរឹងមាំជាងមុន ដែលនេះជាក្ដីសង្ឃឹមក្នុងការត្រួសត្រាយផ្លូវសម្រាប់ប្រែក្លាយមនុស្សពីភាពចាស់មកវ័យក្មេងនាពេលអនាគត។

នៅពាក់កណ្តាលឆ្នាំ ២០២២ កន្លងទៅនេះ សហគមន៍វិទ្យាសាស្ត្រ ក្នុងមន្ទីរពិសោធន៍មួយនៅទីក្រុងបូស្តុន សហរដ្ឋអាមេរិកបានធ្វើការពិតសោធន៍ដោយការ “ផ្លាស់ប្តូរភាពចាស់” នៅក្នុងខ្លួនសត្វកណ្តុរ។

ដោយក្នុងដំណើរការពិសោធន៍បែបនេះអ្នកវិទ្យាសាស្ត្របានយកកណ្ដុរចាស់ មានភ្នែកខ្វាក់ និងមានសភាពយ៉ាប់យ៉ឺន ហើយនឹងប្រែក្លាយវាឱ្យត្រឡប់មករកភ្នែកធម្មតាវិញ ខួរក្បាលកាន់តែឆ្លាតវៃ សាច់ដុំក្នុងខ្លួន និង ជាលិកាតម្រងនោម ត្រឡប់ឱ្យមកជារឹងមាំវិញ។

ទន្ទឹមនឹងនោះពួកគេក៏បានធ្វើការពិសោធន៍ដោយផ្តល់ឱ្យសត្វកណ្តុរវ័យក្មេងប្រែក្លាយទៅជាស្ថានភាព ចាស់មុនអាយុផងដែរ។

ជាលទ្ធិផល នៅថ្ងៃទី ១២ ខែមករា ឆ្នាំ២០២៣ លោក David Sinclair អ្នកជំនាញប្រឆាំងភាពចាស់ និងជាសាស្រ្តាចារ្យផ្នែកពន្ធុវិទ្យានៅវិទ្យាស្ថាន Blavatnik នៃសាលាវេជ្ជសាស្ត្រ Harvard និងជាសហនាយកនៃមជ្ឈមណ្ឌល Paul F. Glenn បានបង្ហាញឱ្យដឹងថា ការពិសោធន៍លើសត្វកណ្ដុរគឺទទួលបាននូវភាពជោគជ័យ ដោយពួកគេបាន អះអាងថា ភាពចាស់គឺជាដំណើរការអាចត្រឡប់មករកសភាពដើមវិញបាន ដោយយើងអាច ផ្លាស់ប្ដូរវាទៅមុខ ឬ បញ្ច្រានូវវ័យរបស់វាថយក្រោយតាមដែលយើងចង់បាន។

ដោយក្នុងនោះក្រុមអ្នកស្រាវជ្រាវបាន ប្រើវិធីនៃការបន្សំកោសិកាដើមដែលមានអនុភាពចំនួនបី ហើយលទ្ធផលគឺ បន្ទាប់ពីធ្វើពិសោធន៍លើកែវភ្នែក សត្វកណ្តុរទទួលបាននូវភាពល្អប្រសើជាខ្លាំង បន្ទាប់មក ក្រុមការងារបានធ្វើដូចគ្នាជាមួយនឹងកោសិកាខួរក្បាល សាច់ដុំ និងតម្រងនោម ព្រមទាំងបានស្ដារកោសិកាទាំងនោះឡើងវិញ ហើយទទួលបាននូវកម្រិតមួយដែលក្មេងជាងវ័យ។

យ៉ាងណាមិញ បន្ទាប់ពីការធ្វើពិសោធន៍លើសត្វកណ្ដុរទទួលបាននូវភាពជោគជ័យ បច្ចុប្បន្ននេះក្រុមអ្នកស្រាវជ្រាវកំពុងធ្វើការសាកល្បងឡើងវិញនៅក្នុងខ្លួនសត្វស្វាបន្តទៀត។ ប៉ុន្តែការផ្លាស់ប្ដូរនេះគេរំពឹងថាវានឹងចំណាយពេលច្រើនទសវត្សរ៍បន្តទៀត មុនពេលដែលអាចប្រែក្លាយភាពចាស់របស់មនុស្សនាពេលអនាគតបាន៕ ប្រភព៖ pptvhd36

សហភាពអារ៉ាប់រួម ៖ កាលពីថ្ងៃទី១៥ ខែមករា លោកប្រធានាធិបតីកូរ៉េខាងត្បូងបានធ្វើដំណើរទៅកាន់សហភាពអារ៉ាប់រួម ដើម្បីពិភាក្សាគ្នាពីបញ្ហាថាមពលនុយក្លេអ៊ែរ និងបម្រែបម្រួលអាកាសធាតុ ដោយដំណើរទស្សនកិច្ចនេះមានរយៈពេល៤ថ្ងៃ ។

លោក ឈីក ម៉ូហាម៉េត ប្រធានាធិបតីសហភាពអារ៉ាប់រួម United Arab Emirates (UAE) បានទទួលស្វាគមន៍ប្រធានាធិបតីកូរ៉េខាងត្បូង លោក Yoon Seok Yeol និងភរិយាយ៉ាងកក់ក្តៅ កាលពីថ្ងៃទី១៥ ខែមករា កន្លងមក នៅវិមានប្រធានាធិបតីក្នុងទីក្រុងអាបូតាប៊ី ។

គេរំពឹងថា លោកប្រធានាធិបតីកូរ៉េខាងត្បូងនឹងធ្វើសេចក្តីថ្លែងការណ៍បន្ទាប់ពីកិច្ចប្រជុំនៅសហភាពអារ៉ាប់រួម ។ ក្រៅពីនេះ លោក Yoon នឹងជួបគ្នាជាមួយមន្ត្រីសហភាពអារ៉ាប់រួម ព្រមទាំងធ្វើដំណើរទៅទស្សនាគម្រោងអភិវឌ្ឍន៍នានានៅប្រទេសនេះផងដែរ ។

តាមសារព័ត៌មាន Wam របស់សហភាពអារ៉ាប់រួមរាយការណ៍ថា មេដឹកនាំកូរ៉េខាងត្បូងជាមួយសហភាពអារ៉ាប់រួមនឹងពិភាក្សាគ្នាជាច្រើនប្រធានបទដូចជា បញ្ហាថាមពលនុយក្លេអ៊ែរ បម្រែបម្រួលអាកាសធាតុ សុខភាព អវកាស កសិកម្មឆ្លាតវៃ និងវប្បធម៌ ។

តាមប្រព័ន្ធផ្សព្វផ្សាយយ៉ន់ហាប់រាយការណ៍ថា ការសហការគ្នាផ្នែកកងទ័ព និងស្ថិរភាពរវាងប្រទេសកូរ៉េខាងត្បូង និងអារ៉ាប់រួមកាន់តែល្អប្រសើរឡើង រួមទាំងផ្នែកឧស្សាហកម្ម និងការលក់ដូរអាវុធរវាងប្រទេសទាំងពីរ ។ កាលពីឆ្នាំ២០២២ កូរ៉េខាងត្បូងបានឈានដល់កិច្ចព្រមព្រៀងក្នុងតម្លៃ៣.៥០០លានដុល្លារអាមេរិក ដើម្បីលក់ប្រព័ន្ធការពារដែនអាកាសដ៏ទំនើប M-SAM ទៅឱ្យសហភាពអារ៉ាប់រួម ។

ទោះយ៉ាងណា គម្រោងធំដែលកូរ៉េខាងត្បូងរំពឹងនោះ គឺការកសាងរោងចក្រថាមពលនុយក្លេអ៊ែរ Barakah ក្នុងតម្លៃ២ម៉ឺនលានដុល្លារអាមេរិកនៅសហភាពអារ៉ាប់រួម ។ វាជាគម្រោងថាមពុលនុយក្លេអ៊ែរដំបូងគេ ដែលកូរ៉េខាងត្បូងបានកសាងនៅបរទេស ៕

ប្រភព ៖ TNN World

កត្តានយោបាយ បានធ្វើឱ្យប៉ះពាល់ដល់ការផលិត និងការនាំចូលវត្ថុធាតុដើមនៃការផលិតនោះ ពេលនេះក្រុមហ៊ុនរថយន្តដ៏ធំរបស់ចិន BYD Auto បានឈានដល់ការវិនិយោគ២៥០លានដុល្លារនៅក្នុងវៀតណាម​ ដើម្បីសម្រួលដល់សង្វាក់ផលិតកម្ម។

ក្រុមហ៊ុន BYD Auto បានលើកឡើងថា ខ្លួនត្រូវការដីទំហំ៨០ហិចតា ដើម្បីសាងសង់រោងចក្រ ផលិតគ្រឿងបន្លាស់ ក្នុងការបំពេញតម្រូវការរបស់ខ្លួន។ ដោយការសាងសង់រោងចក្រនេះ ត្រូវបានគេរំពឹងថានៅចាប់ផ្តើមនៅពាក់កណ្តាលឆ្នាំនេះ។

ក្រោយតែពីសាងសង់រួច រោងចក្រនេះនឹងនាំចេញគ្រឿងបន្លាស់ទៅកាន់រោងចក្រដំឡើងនៅក្នុងប្រទេសថៃ ដែលជាទីផ្សារដ៏សំខាន់មួយនៅក្នុងទ្វីបអាសុី។

ជាមួយនឹងការវិនិយោគនៅក្នុងប្រទេសវៀតណាម BYD សង្ឃឹមថានឹងបង្កើនសមត្ថភាពខ្ពស់ និងគ្រប់គ្រងការចំណាយទាប ជាងនៅក្នុងប្រទេសចិន ដែលតម្រូវការមានកម្រិតខ្ពស់៕

ប្រភព៖ Vir.Com