ស្លឹកគ្រៃមិនត្រឹមតែមានក្លិនក្រអូបឈ្ងុយប៉ុណ្ណោះទេ ប៉ុន្តែរសជាតិស្រាលប្រហើរៗរបស់វាអាចព្យាបាលអារម្មណ៍តានតឹងបានយ៉ាងមានប្រសិទ្ធភាព។ ជាមួយគ្នានេះ អ្នកជំនាញជឿថាការផឹកតែស្លឹកគ្រៃអាចព្យាបាលជំងឺជាច្រើន និងថែមទាំងធ្វើឲ្យសុខភាពសរសៃឈាមបេះដូងប្រសើរឡើងទៀតផង។ ខាងក្រោមនេះជាហេតុផលមួយចំនួនដែលអ្នកគួរតែបញ្ចូលតែស្លឹកគ្រៃក្នុងរបបអាហារប្រចាំថ្ងៃរបស់អ្នក៖

១.ការផឹកតែស្លឹកគ្រៃអាចជួយក្នុងការកាត់បន្ថយជំងឺលើសឈាម និងសម្ពាធឈាមស៊ីស្តូលិកខ្ពស់៖ យោងតាមការសិក្សាមួយរបស់ទស្សនាវដ្ដី ResearchGate បង្ហាញថា អ្នកដែលផឹកតែស្លឹកគ្រៃ ជារៀងរាល់ថ្ងៃសង្កេតឃើញមានការធ្លាក់ចុះនៃសម្ពាធឈាមស៊ីស្តូលិក និង កើនឡើងបន្តិចបន្តួចនៃសម្ពាធឈាមឌីអាស្តូលិក ថែមទាំងមានអត្រាចង្វាក់បេះដូងទាបជាងគួរឱ្យកត់សម្គាល់ផងដែរ។

២.ដើរតួជាថ្នាំបញ្ចុះទឹកនោម៖ តែស្លឹកគ្រៃដំណើរការជាថ្នាំបញ្ចុះទឹកនោមធម្មជាតិ ដែលជួយបញ្ចេញជាតិពុល និងសូដ្យូមក្នុងទម្រង់ជាសារធាតុរាវលើស។

៣.កាត់បន្ថយកូឡេស្តេរ៉ុល៖ ការទទួលទានតែស្លឹកគ្រៃអាចជួយក្នុងការបន្ថយកូឡេស្តេរ៉ុលអាក្រក់ ព្រមទាំងហានិភ័យនៃជំងឺបេះដូងផងដែរ។

៤.សារធាតុប្រឆាំងអុកស៊ីតកម្ម៖
ស្លឹកគ្រៃមានសារធាតុប្រឆាំងអុកស៊ីតកម្មដែលល្អចំពោះបេះដូងដូចជា អាស៊ីត chlorogenic, isoorientin និង swertiajaponin ដែលជួយក្នុងការការពារមុខងារមិនប្រក្រតីនៃកោសិកានៅក្នុងសរសៃឈាមបេះដូង។

ជាចុងក្រោយ ស្លឹកគ្រៃមិនត្រឹមតែអាចយកមកធ្វើជាគ្រឿងផ្សុំធ្វើម្ហូប ដែលប្រជាជនខ្មែរនិយមសម្រាប់ដាំស្លប៉ុណ្ណោះទេ តែអ្នកក៏អាចយកវាធ្វើជាតែ ទទួលទានជារៀងរាល់ថ្ងៃបាន ដោយបន្ថែមជាមួយគ្រឿងផ្សុំផ្សេងទៀតដែលអាចមាននៅក្នុងផ្ទះស្រាប់ដូចជា ទឹកឃ្មុំ ឬក្រួចឆ្មាជាដើម តាមចំណូលចិត្ត៕

ប្រទេសថៃ ៖ កូនសិស្សថៃបានរត់ប្រសាចចេញពីសាលារៀនដោយសារការប៉ះទង្គិចគ្នាដោយអាវុ.ធរវាងកងទ័ពមីយ៉ាន់ម៉ា និងកងកម្លាំងប្រឆាំងរដ្ឋាភិបាលនៅព្រំដែនថៃ-មីយ៉ាន់ម៉ា ដែលធ្វើឱ្យគ្រាប់កាំភ្លើ.ង១គ្រាប់ធ្លាក់លើសាលារៀនថៃ ។ ភ្លាមនោះ នាយកសាលានៅស្រុកមេសត ខេត្តតាក បានប្រកាសបិទទ្វារសាលា និងជម្លៀសសិស្សចេញជាបន្ទាន់ដើម្បីសុវត្ថិភាព ។ នេះបើតាមការចុះផ្សាយរបស់សារព័ត៌មាន Amarin News កាលពីថ្ងៃទី២១ ខែវិច្ឆិកា ឆ្នាំ២០២៥ ។

នាវេលាម៉ោង១រសៀលថ្ងៃទី២១ ខែវិច្ឆិកា ស្ថានការណ៍នៅព្រំដែនថៃ-មីយ៉ាន់ម៉ាតានតឹងខ្លាំងក្រោយពីកងទ័ពមីយ៉ាន់ម៉ាមានអាវុធគ្រប់ដៃបានបាញ់កងកម្លាំងប្រឆាំងរដ្ឋាភិបាលនៅភូមិមិនឡាប៉ាន ស្រុកមៀវឌី ខេត្តមៀវឌី ប្រទេសមីយ៉ាន់ម៉ា ទល់មុខភូមិមេគយគែន ឃុំមហាវ៉ាន់ ស្រុកមេសត ខេត្តតាក ប្រទេសថៃ ។ ភាគីទាំងសងខាងបង្កើនកម្លាំងរៀងខ្លួន និងប្រើប្រាស់កាំភ្លើងបាញ់គ្នាទៅវិញទៅមកមិនឈប់ឈរ បន្ទាប់មក កងទ័ពមីយ៉ាន់ម៉ាក៏ប្រើប្រាស់អាវុធធុនធ្ងន់ ខណៈកងកម្លាំងប្រឆាំងរដ្ឋាភិបាល តបតវិញដោយប្រើប្រាស់ដ្រូនទម្លាក់គ្រាប់បែកវាយប្រហារពីលើអាកាស ប៉ុន្តែពុំមានសេចក្តីរាយការណ៍ពីការខូចខាតរបស់ភាគីទាំងពីរទេ ។

ក្នុងអំឡុងពេលប៉ះទង្គិចគ្នារវាងកងទ័ពមីយ៉ាន់ម៉ា និងកងកម្លាំងប្រឆាំងរដ្ឋាភិបាលដែលស្ថិតនៅមិនឆ្ងាយពីព្រំដែនថៃ ស្រាប់តែមានគ្រាប់កាំភ្លើង១គ្រាប់ធ្លាក់មកលើសាលារៀននៅភូមិមេគយគែន ពេលកូនសិស្សថៃកំពុងតែហ្វឹកហាត់កីឡា ។ ហេតុការណ៍នេះធ្វើឱ្យកូនសិស្សថៃនៅទីលានហ្វឹកហាត់កីឡាភ័យតក់ស្លុតយ៉ាងខ្លាំង បន្ទាប់មក នាយកសាលាក៏ផ្អាកការហ្វឹកហាត់កីឡា ព្រមទាំងប្រកាសឱ្យអាណាព្យាបាលមកទទួលកូនសិស្សចំនួន៣៤៥នាក់ ចេញពីសាលាជាបន្ទាន់ ។

សំឡេងគ្រាប់កាំភ្លើង និងផ្ទុះគ្រាប់បែកនៅតែឮសូរខ្លាំងជាបន្តបន្ទាប់ ពេលនេះ នាយកសាលារៀនកំពុងវាយតម្លៃស្ថានការណ៍ជារៀងរាល់ថ្ងៃដើម្បីសុវត្ថិភាពគ្រូបង្រៀន និងកូនសិស្ស ដោយប្រកាសបិទទ្វារសាលាបន្តទៀត ប្រសិនបើស្ថានការណ៍ប៉ះទង្គិចនៅមីយ៉ាន់ម៉ាមិនបញ្ឈប់ ។ តាមសេចក្តីរាយការណ៍ គឺកងទ័ពមីយ៉ាន់ម៉ា និងកងកម្លាំងប្រឆាំងរដ្ឋាភិបាលនៅតែបន្តបាញ់គ្នា និងប្រើប្រាស់អាវុធធុនធ្ងន់ ខណៈពួកគេបានប៉ះទង្គិចគ្នានៅតំបន់នេះរយៈពេលជាង១ខែហើយ ហេតុការណ៍ប៉ះគ្នាលើកចុងក្រោយធ្វើឱ្យពលរដ្ឋមីយ៉ាន់ម៉ាជាង១០០នាក់ រត់ភៀសខ្លួនមកប្រទេសថៃ ។

កងទ័ព និងសមត្ថកិច្ចថៃបំពាក់ដោយអាវុធត្រូវបានបញ្ជូនមកកាន់ព្រំដែនស្រុកមេសត ខេត្តតាក ដើម្បីការពារអធិបតេយ្យ ព្រមទាំងតាមដានការជម្លៀសរបស់ពលដ្ឋមីយ៉ាន់ម៉ា ។ កងកម្លាំងថៃបានហាមឃាត់ពលរដ្ឋចូលក្បែរតំបន់ប៉ះទង្គិចជាដាច់ខាត ពីព្រោះអាចនឹងមានគ្រោះថ្នាក់ដោយសារគ្រាប់កាំភ្លើងធ្លាក់ចូលដីថៃ ។

គួរបញ្ជាក់ថា ភាគីថៃពុំទាន់ប្រតិកម្មជាមួយមីយ៉ាន់ម៉ាទេ អំពីគ្រាប់កាំភ្លើងមីយ៉ាន់ម៉ាធ្លាក់ចូលដីថៃបណ្តាលឱ្យថៃបិទទ្វារសាលារៀន ។ កន្លងមក លំនៅឋានពលរដ្ឋថៃបានរងខូចខាតចំនួន៥ខ្នង ដោយសារការបង្ក្រាបក្រុមឆបោកអនឡាញដោយការបំផ្ទុះគ្រាប់របស់កងទ័ពមីយ៉ាន់ម៉ានៅព្រំដែនធ្វើឱ្យជ្រុលទៅប៉ះលំនៅឋានពលរដ្ឋថៃ ខណៈរដ្ឋាភិបាលថៃមិនហ៊ានឆ្លើយតបដោយហិង្សា ឬថ្កោលទោស គឺបានត្រឹមតែជូនដំណឹងពីការខូចខាត និងស្នើឱ្យកងទ័ពមីយ៉ាន់ម៉ាបន្ធូរដៃក្នុងការបង្ក្រាបប៉ុណ្ណោះ ។ នេះបង្ហាញថា ថៃហាក់ក្រែងរអានឹងមីយ៉ាន់ម៉ា មិនហ៊ានស្រែក ឬប្តឹងទៅអន្តរជាតិឡើយ ៕

ប្រទេសថៃ និង វៀតណា ដែលជាអ្នកជិតខាងធំៗទាំងពីររបស់ប្រទេសកម្ពុជាកំពុងជួបប្រទះនឹងគ្រោះធម្មជាតិដ៏ខ្លាំងក្លាបំផុតមិនធ្លាប់មានក្នុងរយៈរាប់ទសវត្សន៍កន្លងមកនេះ ដោយមានទាំងព្យុះ ទឹកជំនន់ និងការបា.ក់ដី បណ្ដាលឲ្យខូចខាតដល់ទ្រព្យសម្បត្តិ ហេដ្ឋារចនាសម្ព័ន្ធ និងឆក់យកជីវិតមនុស្សអស់ជាច្រើននាក់។

តាមរយៈរបាយការណ៍ចុងក្រោយបង្អស់របស់ប្រទេសថៃ គិតមកត្រឹមថ្ងៃទី២២ ខែវិច្ឆិកា ឆ្នាំ២០២៥ ខេត្ត-ក្រុង រួមទាំងតំបន់ជាច្រើន បានប្រកាសអាសន្នអំពីហានិភ័យនៃគ្រោះទឹកជំនន់និងបំណាក់ដី ខណៈគ្រោះធម្មជាតិ បន្តវាយប្រហារមកលើប្រទេសនេះផ្ទួនៗគ្នា។ ក្នុងនោះខេត្តដែលកំពុងប្រឈមនឹងផលប៉ះពាល់ខ្លាំងជាងគេក្នុងពេលថ្មីនេះ គឺរួមមានខេត្តអាយុធ្យា និង សុងក្លា ដោយប្រជាពលរដ្ឋរាប់មុឺនគ្រួសារកំពុងស្នាក់នៅក្នុងជុំរំតង់លើទីទួលសុវត្ដិភាព។

បើតាមសេចក្ដីរាយការណ៍របស់អាជ្ញាធរថៃ មានប្រជាពលរដ្ឋយ៉ាងហោចណាស់ ២០នាក់ បានស្លា.ប់បាត់បង់ជីវិតដោយសារគ្រោះទឹកជំនន់នៅខេត្ត អយុធ្យា។ជាមួយគ្នានោះ នៅខេត្តសុងក្លាឯណោះវិញ ជំនន់ទឹកភ្លៀងស្រាប់តែហក់ឡើងយ៉ាងឆាប់រហ័សបំផុត ដោយក្នុងរយៈពេលត្រឹមប៉ុន្មានថ្ងៃប៉ុណ្ណោះ វាមានការកើនឡើងរហូតដល់កម្ពស់ ៣ម៉ែត្រ ដែលឈានដល់កម្រិតប្រកាសអាសន្ន។

អាជ្ញាធរអគ្គិសនីខេត្តសុងក្លា បានបញ្ជាឲ្យកាត់ផ្តាច់ចរន្តអគ្គិសនី១៦តំបន់ តាំងពីម៉ោង៩ព្រឹកថ្ងៃទី២២ ខែវិច្ឆិកា ដើម្បីសុវត្ថិភាព ដែលធ្វើឲ្យប្រជាជនពលនៅក្នុងតំបន់ទាំងនោះកាន់តែពិបាកក្នុងការរស់នៅ។

ដោយឡែកនៅប្រទេសវៀតណាម គ្រោះទឹកជំនន់ដ៏សាហាវមិនធ្លាប់មានក្នុងរយៈពេលជាច្រើនទសវត្សន៍មកនេះ កំពុងគ្របដណ្ដប់ពាសពេញភាគកណ្តាល ដែលជាការកើនឡើងយ៉ាងខ្លាំងក្លាបំផុត បណ្ដាលឲ្យជន់លេចតំបន់ និងក្រុងជាច្រើន ក្នុងនោះចំនួនអ្នកស្លា.ប់កើនឡើងដល់ ៤៣ នាក់ និងមានមនុស្សចំនួន ៩ នាក់ផ្សេងទៀតត្រូវបានបាត់ខ្លួន។

យោងតាមការចេញផ្សាយដោយកាសែតវៀតណាម VNExpress ទឹកជំនន់ដែលកើនឡើងយ៉ាងឆាប់រហ័សនេះ បានប៉ះពាល់ដល់ផ្ទះជាង ៦៧.៧០០ ខ្នង ដោយ ១៦៨ ខ្នងទទួលរងការខូចខាតទាំងស្រុង ព្រមទាំងបំផ្លិ.ចបំផ្លា.ញដីស្រែ ចម្ការរបស់ប្រជាជនរាប់មុឺនហិកតាផងដែរ។ អាជ្ញាធរជាតិវៀតណាម បានប៉ាន់ប្រមាណថាការខូចខាតសេដ្ឋកិច្ចបឋមមានចំនួន ៣ ពាន់ពាន់លានដុង (១១៣,៧៦ លានដុល្លារអាមេរិក)។

ជាមួយគ្នានោះ ប្រទេសកម្ពុជាយើង ក៏ទទួលរងផលប៉ះពាល់ខ្លះដែរពីគ្រោះទឹកជំនន់ ដោយក្នុងនោះមានខេត្តពោធិ៍សាត់ បានទទួលរងសម្ពាធទឹកភ្លៀងពីមធ្យមទៅច្រើន ដែលគ្រប់ដណ្តប់ទូទាំងខេត្ត ធ្វើឲ្យកម្រិតទឹកក្នុងស្ទឹងពោធិ៍សាត់បានកើនឡើងខ្ពស់។ តែទោះជាយ៉ាងណា អាជ្ញាធរពាក់ព័ន្ធបាន និងកំពុងយកចិត្តទុកដាក់ជម្លៀសពលរដ្ឋដែលប្រឈមនឹងការប៉ះពាល់ឲ្យទៅកាន់ទីទួលមានសុវត្ថិភាពរួចរាល់ ហើយពុំមានសេចក្ដីរាយការណ៍ណាមួយដែលបញ្ជាក់ពីផលប៉ះពាល់ដល់អាយុជីវិតមនុស្ស និងការខូចខាតដោយសារទឹកជំនន់នៅខេត្តពោធិ៍សាត់ឡើយ៕

ដូចដែលបានរំពឹងទុក ពេលនេះក្រុមជ្រុលនិយមថៃរាប់រយនាក់ បានប្រមូលផ្ដុំគ្នានៅមុខស្ថានទូតម៉ាឡេសុី និងសហរដ្ឋអាមេរិក ប្រចាំនៅទីក្រុងបាងកក ដើម្បីធ្វើការទាមទារឲ្យលោកអាន់វ៉ា អុីប្រាហុីម និងលោក ដូណាល់ ត្រាំ ឈប់លូកដៃចូលកិច្ចការផ្ទៃក្នុងរបស់ថៃលើបញ្ហាព្រំដែនតទៅទៀត ព្រោះមេដឹកនាំប្រទេសទាំងពីរនេះលម្អៀងមកខាងកម្ពុជា។ នេះបើតាមការចុះផ្សាយរបស់សារព័ត៌មាន Khaosod ថ្ងៃទី ២២ ខែវិច្ឆិកា ឆ្នាំ ២០២៥។

ក្រុមសកម្មជនជ្រុលនិយមថៃដែលមានឈ្មោះថា «រណសិរ្សរួបរួមដើម្បីអធិបតេយ្យភាព» បានប្រមូលផ្តុំគ្នាកាន់បដាធំៗដែលមានរូបមុខប្រធានាធិបតីអាមេរិក លោក ដូណាល់ ត្រាំ នាយករដ្ឋមន្ត្រីម៉ាឡេស៊ី និងជាប្រធានអាស៊ាន លោក អាន់វ៉ា អ៊ីប្រាហ៊ីម និងសម្តេច ហ៊ុន សែន ប្រធានព្រឹទ្ធសភាកម្ពុជា ដើរដង្ហែតាមដងផ្លូវនៃទីក្រុងបាងកក ដើម្បីទាមទារឲ្យប្រទេសម៉ាឡេស៊ី និងសហរដ្ឋអាមេរិក ឈប់ចេះដឹងកិច្ចការដោះស្រាយរវាងប្រទេសថៃ និងកម្ពុជា។

លោក Pichit Chaimongkol រួមជាមួយលោក Jatuporn Prompa ដែលជាអ្នកដឹកនាំក្រុមនិងចលនានេះដោយផ្ទាល់ បានថ្លែងទៅកាន់អ្នកយកព័ត៌មានថា ប្រជាជនថៃទទូចឲ្យសហរដ្ឋអាមេរិក និងម៉ាឡេសុី ឈប់ជ្រៀតជ្រែកអធិបតេយ្យភាពរបស់ប្រទេសថៃ ដោយចោ.ទប្រកាន់បន្ថែមទៀតថា ប្រទេសដែលចូលខ្លួនមកធ្វើជាអ្នកសម្របសម្រួលទាំងពីរនេះ មានភាពលម្អៀងមកកាន់កម្ពុជា។

នៅលើផ្ទាំងបដាមួយ ពួកគេបានសរសេរសាររិះគន់ចំពោះសកម្មភាពរបស់ប្រទេសធំៗទាំងពីរថា “គឺជាការគំរាមកំហែងដល់សន្តិសុខជាតិថៃ” និងនាំគ្នាដើរគ្រវីទង់ជាតិថៃបណ្ដើរ ស្រែកតាមផ្លូវបណ្ដើរថា “ឈប់ជ្រៀតជ្រែក។ ប្រទេសថៃ និងប្រធានអាស៊ានត្រូវតែរក្សាអព្យាក្រឹតភាព”។

ជុំវិញសកម្មភាពរបស់ក្រុមជ្រុលនិយមថៃខាងលើ គេមិនឃើញថារដ្ឋាភិបាលថៃ បានចេញសេចក្ដីប្រកាសហាមឃា.ត់ ឬអំពាវនាវកុំឲ្យមានការតវ៉ាទាំងទទឹងទិសបែបនេះនោះទេ ដោយគ្រាន់តែពង្រាយកម្លាំងការពារ ដើម្បីសម្រួលសណ្តាប់ធ្នាប់ចរាចរណ៍តាមដងផ្លូវតែប៉ុណ្ណោះ៕

ប្រទេសថៃ ៖ សារព័ត៌មានថៃរាយការណ៍នៅថ្ងៃទី២២ ខែវិច្ឆិកា ឆ្នាំ២០២៥ ថា ភ្លៀងធ្លាក់ខ្លាំងជាច្រើនថ្ងៃបានធ្វើឱ្យស្រុកជាច្រើននៅខេត្តសុងក្លា ជាពិសេស ស្រុកហាតយៃ មានទឹកជំនន់ហូរមកភ្លាមៗលិចផ្លូវធំ ខណៈលំនៅឋាន សណ្ឋាគារ និងអគារសំខាន់ៗជាច្រើនកន្លែងរងផលប៉ះពាល់យ៉ាងធ្ងន់ធ្ងរ ។ អាជ្ញាធរបានបង្កើនការជម្លៀសពលរដ្ឋទៅកាន់កន្លែងសុវត្ថិភាព ក្រោយពីកម្ពស់ទឹកជំនន់នៅភូមិនានាកើនឡើងខ្លាំង រីឯស្ថាប័នពាក់ព័ន្ធបន្តតាមដានស្ថានការណ៍ទឹកជំនន់យ៉ាងដិតដល់រយៈពេល២៤ម៉ោង ។

ទឹកជំនន់ភ្លាមៗនៅស្រុកហាតយៃ និងស្រុកបាងក្លាំ ខេត្តសុងក្លា បណ្តាលឱ្យផ្លូវធំៗជន់លិចពុំអាចឱ្យរថយន្តធ្វើដំណើរឆ្លងកាត់ ពលរដ្ឋនាំគ្នាយកយានជំនិះទៅចតលើស្ពាន និងទីខ្ពស់គេចពីទឹកជំនន់ ។ អាជ្ញាធរអគ្គិសនីខេត្តសុងក្លា បានផ្តាច់ចរន្តអគ្គិសនី១៦តំបន់ តាំងពីម៉ោង៩ព្រឹកថ្ងៃទី២២ ខែវិច្ឆិកា ដើម្បីសុវត្ថិភាព និងត្រៀមផ្តាច់ចរន្តអគ្គិសនីនៅតំបន់ផ្សេងទៀត បើកម្ពស់ទឹកនៅតែកើនឡើងខ្ពស់ ។ អាជ្ញាធរអគ្គិសនីបានជូនដំណឹងទៅពលរដ្ឋឱ្យបង្កើនការប្រុងប្រយ័ត្ន ដោយហាមបើក-បិទកុងតាក់ភ្លើងពេលកំពុងឈរក្នុងទឹក, ហាមយកដៃចាប់ឧបករណ៍សើម និងទូរស័ព្ទមកកាន់អាជ្ញាធរអគ្គិសនីជាបន្ទាន់ បើមានហេតុការណ៍កើតឡើង ។

តាមសេចក្តីរាយការណ៍ គឺនៅព្រឹកថ្ងៃទី២២ ខែវិច្ឆិកានេះ បរិមាណទឹកបានកើនឡើងខ្ពស់យ៉ាងឆាប់រហ័សធ្វើឱ្យតំបន់ជាច្រើននៅស្រុកហាតយៃ ខេត្តសុងក្លា លិចទឹកយ៉ាងធ្ងន់ធ្ងរឈានដល់កម្រិតប្រកាសអាសន្ន ។ ការធ្វើដំណើរតាមផ្លូវសំខាន់ៗត្រូវបានកាត់ផ្តាច់ដោយសារខ្សែទឹកហូរ ខណៈផ្លូវនៅភូមិហួសាផាន ស្រុកបាងក្លាំ មានទឹកលិចខ្លាំងរហូតរថយន្តពិបាកបើកបរ ចំណែកផ្លូវឆ្ពោះ កាន់ស្រុកហាតយៃ ត្រូវបានទឹកជំនន់ហូរកាត់ផ្តាច់មួយចំនួនធំធ្វើឱ្យពលរដ្ឋយកយានជំនិះទៅចតនៅទីខ្ពស់ៗគេចពីទឹកជំនន់ ។

ដូចគ្នានេះ អាជីវករលក់ដូរទំនិញនៅផ្សារណាត់ និងបរិវេណស្ពានក្បែរផ្លូវរថភ្លើងខេត្តសុងក្លាស ក៏បានប្រមូលអីវ៉ាន់គេចពីទឹកជំនន់ដែរ ដើម្បីការពារការខូចខាតដោយសារកម្ពស់ទឹកកើនឡើងខ្ពស់មិនឈប់ឈរ ។ អាជ្ញាធរស្រុកហាតយៃបានបញ្ជូនភ្នាក់ងារសង្គ្រោះទៅជួយជម្លៀសពលរដ្ឋចេញពីតំបន់គ្រោះថ្នាក់ និងដឹកជញ្ជូនសម្ភារៈទៅកាន់ទីខ្ពស់ ដើម្បីធានាសុវត្ថិភាពនៅតំបន់ទឹកជំនន់ និងកាត់បន្ថយផលប៉ះពាល់ ។

នៅថ្ងៃដដែល ពេលធ្វើដំណើរទៅដល់ខេត្តខនគែន នាយករដ្ឋមន្ត្រីថៃ លោក Anutin Charnvirakul បាននិយាយពីស្ថានការណ៍ទឹកជំនន់នៅខេត្តភាគខាងត្បូងប្រទេសថៃឈានដល់កម្រិតប្រកាសអាសន្នថា លោកមានផែនការជួយសង្គ្រោះ និងបញ្ជូនភ្នាក់ងារសង្គ្រោះមកកាន់ខេត្តសុងក្លារួចហើ ព្រមទាំងផ្តល់ប្រាក់ឧបត្ថម្ភដល់ពលរដ្ឋរងផលប៉ះពាល់ធ្ងន់ធ្ងរដោយសារទឹកជំនន់ ។ លោកបារម្ភយ៉ាងខ្លាំងនឹងទឹកជំនន់នៅខេត្តភាគខាងត្បូង ហើយលោកនឹងពិនិត្យមើលការខូចខាតដោយផ្ទាល់ភ្នែកនារសៀលថ្ងៃទី២២ ខែវិច្ឆិកា ។

គួរបញ្ជាក់ថា ស្រុកហាតយៃមានទឹកជំនន់ខ្លាំងឈានទៅប្រកាសអាសន្ន ដោយសារមានភ្លៀងធ្លាក់ខ្លាំងជាបន្តបន្ទាប់ធ្វើឱ្យតំបន់ជាច្រើន ជាពិសេស តំបន់ទំនាបមានទឹកជំនន់ហូរមកភ្លាមៗ ហើយកម្ពស់ទឹកនឹងកើនឡើងបន្តទៀតបើភ្លៀងនៅតែបន្តធ្លាក់ខ្លាំង និងទឹកហូរចូលប្រឡាយនានាយឺតបំផុត ។ ទឹកជំនន់ធ្ងន់ធ្ងរនៅខេត្តសុងក្លា កើតឡើងស្របពេលគ្នានឹងបណ្តាខេត្តផ្សេងៗរបស់ថៃបានជន់លិចខ្លាំង ដូចជា ខេត្តអយុធ្យាលិចទឹកជាច្រើនខែ ដែលចាត់ទុកជាគ្រោះធម្មជាតិក្រៅពីរញ្ជួយដី បាក់ដី និងខ្យល់ព្យុះ ៕