ប្រទេសវៀតណាម ៖ បន្ទាប់ពីស្ថានការណ៍រាតត្បាតនៃជំងឺកូវីដ-១៩ បានថយចុះ ការងើបឡើងវិញនៃឧស្សាហកម្មនៅវៀតណាមអាចមិនស្មើគ្នាទេ ខណៈឧស្សាហកម្មខ្លះងើបឡើងវិញយ៉ាងឆាប់រហ័ស ប៉ុន្តែឧស្សាហកម្មខ្លះទៀតត្រូវបានគេបោះបង់ចោល ។ ទោះយ៉ាងណា សេដ្ឋកិច្ចវៀតណាមនៅតែរីកចម្រើនជាមួយឧស្សាហកម្ម៤ប្រភេទនៅឆ្នាំ២០២៣នេះ ។

១-ឧស្សាហកម្មថាមពល ៖
វៀតណាមទើបតែបានចុះហត្ថលេខាលើកិច្ចព្រមព្រៀងភាពជាដៃគូផ្លាស់ប្តូរថាមពលដោយស្មើភាព (Just Energy Transition Partnership: JETP) កាលពីខែធ្នូ ឆ្នាំ២០២២ កន្លងមក ។ នៅឆ្នាំ២០២៣នេះ យើងនឹងឃើញថា កិច្ចព្រមព្រៀងនេះត្រូវបានប្រើប្រាស់បែបណា នយោបាយនឹងផ្លាស់ប្តូរបែបណា ហើយការអភិវឌ្ឍឧស្សាហកម្មថាមពលរបស់វៀតណាមនឹងកាន់តែទូលាយផងដែរ ។

២-ឧស្សាហកម្មទេសចរណ៍ ៖
សម្រាប់ឆ្នាំ២០២២ ចាត់ទុកថា ជាឆ្នាំដែលពិបាកក្នុងផ្នែកទេសចរណ៍ គេសង្ឃឹមថា បន្ទាប់ពីវិធានការរឹតបន្តឹងជំងឺកូវីដនៅតាមព្រំដែនបានបញ្ចប់ ឧស្សាហកម្មទេសចរណ៍វៀតណាមនឹងងើបឡើងវិញម្តងទៀត ។ អនុរដ្ឋមន្ត្រីក្រសួងវប្បធម៌ កីឡា និងទេសចរណ៍ លោក Doan Van Viet រំពឹងថា វៀតណាមនឹងទទួលបានភ្ញៀវទេសចរអន្តរជាតិរហូតដល់៥លាននាក់នៅចុងឆ្នាំ២០២៣នេះ ។

៣-ឧស្សាហកម្មបច្ចេកវិទ្យា ៖
ការចាប់ផ្តើមអាជីវកម្មរបស់វៀតណាមបានលេចធ្លោក្នុងអំឡុងជំងឺកូវីដកន្លងមក ហើយវៀតណាមបានក្លាយជាប្រទេសមួយក្នុងចំណោមប្រទេសដែលបានខ្នះខ្នែងខ្លាំងបំផុតក្នុងភូមិភាគអាស៊ីអាគ្នេយ៍ ។ តាមរបាយការណ៍រួមគ្នារបស់ Do Ventures និង NIC បង្ហាញថា ការចាប់ផ្តើមវិនិយោគផ្នែកបច្ចេកវិទ្យា គឺស្មើដល់១,៤ពាន់លានដុល្លារអាមេរិកនៅឆ្នាំ២០២១ វាបានលូតលាស់យ៉ាងខ្លាំង បើធៀបនឹងឆ្នាំ២០១៩ ស្មើតែ៨៧៤លានដុល្លារអាមេរិក ។ ក្រៅពីនេះ ក៏មានតម្រូវការកម្លាំងពលកម្មមានជំនាញខ្ពស់នៅវៀតណាមផងដែរ ។

៤-ឧស្សាហកម្មការផលិត ៖
កាលពីខែវិច្ឆិកា ឆ្នាំ២០២២ សន្ទស្សន៍អ្នកគ្រប់គ្រងការទិញ (Purchasing Managers Index: PMI) បានធ្លាក់ចុះមកនៅត្រឹម៤៧,៤ ពី៥០,៦ នៅខែតុលា ឆ្នាំ២០២២ ។ វាឆ្លុះបញ្ចាំងពីការធ្លាក់ចុះយ៉ាងខ្លាំងក្នុងផ្នែកផលិតកម្មរបស់វៀតណាម ។ រោងចក្រជាច្រើនត្រូវបង្ខំចិត្តបិទទ្វារ ដោយសារការបញ្ជាទិញថយចុះ ដែលត្រូវកាត់បន្ថយកម្លាំងពលកម្ម ។

ទោះយ៉ាងណា វាធ្វើឱ្យមានកម្លាំងពលកម្មលើសលប់ក្នុងទីផ្សារ ដែលអាចបង្កើតឱកាសដល់ក្រុមហ៊ុនផលិតកាន់តែងាយស្រួលពង្រីកអាជីវកម្ម ។ គេចាត់ទុកថា ផ្នែកផលិត គឺជាឆ្អឹងខ្នងនៃសេដ្ឋកិច្ចវៀតណាម ហើយគេព្យាករណ៍ថា សេដ្ឋកិច្ចវៀតណាមនៅឆ្នាំ២០២៣ កាន់តែរីកចម្រើន ៕ ប្រភព ៖ AEC Connect

ប្រទេសរុស្ស៊ី ៖ លោក Dmitry Peskov អ្នកនាំពាក្យវិមានក្រឹមឡាំងរបស់ប្រទេសរុស្ស៊ីនិយាយថា ពលរដ្ឋអ៊ុយក្រែននឹងរងទុក្ខវេទនា បើប្រទេសលោកខាងលិចបញ្ជូនរថក្រោះទៅឱ្យកងទ័ពអ៊ុយក្រែន ខណៈមានសំណួរថា តើប្រទេសអាល្លឺម៉ង់នឹងអនុញ្ញាតឱ្យបញ្ជូនរថក្រោះចម្បាំង Leopard 2 ទៅឱ្យកងទ័ពអ៊ុយក្រែនដែរឬទេ ។

លោក Peskov បន្តថា នៅពេលនេះ មានការជជែកគ្នាពីរឿងការបញ្ជូនរថក្រោះទៅឱ្យអ៊ុយក្រែន ដែលវាបង្ហាញឱ្យឃើញពីការភ័យស្លន់ស្លោនៅក្នុងអង្គការសន្ធិសញ្ញាអាត្លង់ទិកខាងជើងណាតូ (NATO) ។ លោកដាស់តឿនថា គ្រប់ប្រទេសទាំងអស់ដែលមានចំណែករួមក្នុងការបញ្ជូនអាវុធទៅឱ្យអ៊ុយក្រែន គឺត្រូវរួមគ្នាទទួលខុសត្រូវចំពោះផលវិបាកដែលនឹងកើតមានឡើង ។

អ្នកនាំពាក្យវិមានក្រឹមឡាំងបានថ្លែងបែបនេះ បន្ទាប់ពីសហរដ្ឋអាមេរិក និងប្រទេសសម្ព័ន្ធមិត្តមិនបានទទួលជោគជ័យក្នុងកិច្ចប្រជុំនៅប្រទេសអាល្លឺម៉ង់ ដោយសារពួកគេមិនអាចបញ្ចុះបញ្ចូលអាល្លឺម៉ង់ឱ្យយល់ព្រមបញ្ជូនរថក្រោះចម្បាំង Leopard 2 ទៅឱ្យអ៊ុយក្រែន វាជារថក្រោះដែលអ៊ុយក្រែនត្រូវការដើម្បីទប់ទល់នឹងការឈ្លានពានរបស់កងទ័ពរុស្ស៊ីជាថ្មីទៀត ។

ទោះយ៉ាងណា អ្នកវិភាគឱ្យដឹងថា ការដែលអាល្លឺម៉ង់មិនបញ្ជូនរថក្រោះចម្បាំងទៅឱ្យអ៊ុយក្រែននោះ ដោយសារតែអាល្លឺម៉ង់មិនត្រូវការចូលរួមនៅក្នុងសង្គ្រាម ហើយខ្លាចថា រុស្ស៊ីនឹងលួចយកបច្ចេកវិទ្យារថក្រោះចម្បាំងរបស់ខ្លួន បើសិនជាអ៊ុយក្រែនចាញ់សង្គ្រាមជាមួយរុស្ស៊ី ។

គួរបញ្ជាក់ថា រថក្រោះចម្បាំង Leopard 2 ជារថក្រោះសំខាន់របស់កងទ័ពអាល្លឺម៉ង់ និងជារថក្រោះដ៏អស្ចារ្យបំផុតក្នុងពិភពលោក ។ រថក្រោះនេះត្រូវបានដាក់ឱ្យប្រចាំការលើកទី១ កាលពីឆ្នាំ១៩៧៩ ហើយអាវុធសំខាន់ គឺវាមានកាំភ្លើងរថក្រោះទំហំ១២០មីលីម៉ែត្រ និងបាញ់រហូតដល់៤២គ្រាប់ ។ លើសពីនេះ រថក្រោះចម្បាំងនេះប្រើប្រាស់ប្រព័ន្ធឌីជីថលធ្វើឱ្យការវាយប្រហារមានភាពច្បាស់លាស់ ខណៈវាបំពាក់ដោយកាមេរ៉ាបង្វែរពន្លឺ មានប្រព័ន្ធ GPS មានភាពបត់បែនខ្ពស់ និងផ្លាស់ទីបានលឿន បើទោះជារថក្រោះនេះមានទម្ងន់រហូតដល់៧៤តោនក្តី ៕ ប្រភព ៖ TNN World

ប្រទេសជប៉ុន ៖ ជប៉ុនបានប្រឈមមុខនឹងវិបត្តិសង្គមមនុស្សចាស់ ដោយសារអត្រាកំណើតក្នុងប្រទេសនេះថយចុះ ។ នាយករដ្ឋមន្ត្រីជប៉ុន លោក ហ្វូមីអូ គីស៊ីដា (Fumio Kishida) បានជំរុញឱ្យរដ្ឋាភិបាលចាត់វិធានការគាំទ្រការផ្តល់កំណើត បើទោះជាពេលមុននេះ រដ្ឋាភិបាលធ្លាប់បានធ្វើម្តងហើយ ប៉ុន្តែមិនបានសម្រេច ។

លោកនាយករដ្ឋមន្ត្រី ហ្វូមីអូ គីស៊ីដា ថ្លែងថា ប្រទេសជប៉ុនមិនអាចបំពេញមុខងារសង្គមបានទេ ដោយសារអត្រាកំណើតថយចុះ ។ ប្រទេសជប៉ុនមានពលរដ្ឋសរុបចំនួន១២៥លាននាក់ ហើយគេវាយតម្លៃថា អត្រាកំណើតកាលពីឆ្នាំ២០២២ ស្មើមិនដល់៨០ម៉ឺននាក់ទេ ខណៈនៅឆ្នាំ១៩៧០ អត្រាកំណើតស្មើជាង២លាននាក់ឯណោះ ។

ទោះយ៉ាងណា អត្រាកំណើតកំពុងតែថយចុះនៅប្រទេសជាច្រើន រួមទាំងប្រទេសជិតខាងរបស់ជប៉ុនផងដែរ ប៉ុន្តែវាចាត់ទុកជាបញ្ហាធ្ងន់ធ្ងរមួយនៅជប៉ុន ដោយសារអ្នកមានអាយុច្រើនបានកើនឡើងក្នុងរយៈពេលជាច្រើនឆ្នាំចុងក្រោយនេះ ខណៈមនុស្សវ័យធ្វើការដែលត្រូវថែទាំមនុស្សចាស់ បែរជាថយចុះទៅវិញ ។ ជប៉ុនជាប្រទេសដែលមានពលរដ្ឋអាយុ៦៥ឆ្នាំឡើងស្ថិតក្នុងលំដាប់ទី២ របស់ពិភពលោក ឬស្មើប្រមាណ២៨% ។

លោក គីស៊ីដា ថ្លែងទៅកាន់សមាជិករដ្ឋសភាថា ជប៉ុនកំពុងប្រឈមនឹងបញ្ហាសង្គម ដោយការផ្តោតអារម្មណ៍លើនយោបាយទាក់ទងនឹងកុមារ និងការថែទាំកូន គឺយើងមិនអាចរង់ចាំបានទៀតទេ ។ លោកត្រូវការឱ្យរដ្ឋាភិបាលបង្កើនថវិកាចំណាយទ្វេដងលើគម្រោងទាក់ទងនឹងកុមារ ហើយរដ្ឋាភិបាលនឹងបង្កើតភ្នាក់ងារថ្មីមួយដើម្បីដោះស្រាយបញ្ហានៅខែមេសាខាងមុខ ។

ទោះយ៉ាងណា កន្លងមក រដ្ឋាភិបាលជប៉ុនជាច្រើនអាណត្តិហើយបានព្យាយាមជំរុញយុទ្ធសាស្ត្រដូចគ្នានេះ ប៉ុន្តែគ្មានលទ្ធផល ។ កាលពីឆ្នាំ២០២០ បណ្តាអ្នកវិភាគរំពឹងថា ពលរដ្ឋជប៉ុននឹងថយចុះពីចំនួន១២៨លាននាក់នៅឆ្នាំ២០១៧ មកនៅត្រឹម៥៣លាននាក់នៅចុងសតវត្សនេះ ខណៈបច្ចុប្បន្ន ពលរដ្ឋជប៉ុនមានចំនួនមិនដល់១២៥លាននាក់ផង ។

អ្នកជំនាញប្រាប់ថា ជប៉ុនគួរតែយកចិត្តទុកដាក់នឹងសង្គមមនុស្សចាស់ ។ អត្រាកំណើតថយចុះបណ្តាលមកពីកត្តាជាច្រើនដូចជា ការចាយវាយលើជីវភាពប្រចាំថ្ងៃខ្ពស់ ស្ត្រីមានការសិក្សារៀនសូត្រខ្ពស់ និងធ្វើការកាន់តែច្រើន ពួកគេមិនចង់មានកូនទេ គឺពួកគេប្រើមធ្យោបាយពន្យារកំណើត ៕ ប្រភព ៖ TNN World