ប្រទេសអូស្ត្រាលី ៖ ឧស្ម័នអ៊ីដ្រូសែនជាថាមពលទទួលបានការពេញនិយមខ្លាំងឡើង ប៉ុន្តែបញ្ហាសំខាន់របស់ថាមពលអ៊ីដ្រូសែន គឺនៅត្រង់ការផលិតត្រូវចំណាយថ្លៃដើមខ្ពស់ បើធៀបជាមួយការផលិតឧស្ម័នធម្មជាតិ និងថាមពលអគ្គិសនី ។ ប៉ុន្តែបញ្ហានេះអាចបញ្ចប់ នៅពេលអ្នកវិភាគនៅប្រទេសអូស្ត្រាលីរកឃើញវិធីផលិតឧស្ម័នអ៊ីដ្រូសែនចេញពីទឹកសមុទ្រដោយជោគជ័យ ។

គេបានស្ទង់មតិដោយអភិវឌ្ឍន៍ដំណើរការបំបែកឧស្ម័នចេញពីទឹកដោយអគ្គិសនី ឬហៅថា អេឡិចត្រូនិក ។ វាជាមូលដ្ឋាននៃការបំបែកសមាសធាតុគីមី ប៉ុន្តែការអនុវត្តមុនការស្រាវជ្រាវនេះ Catalyst ជាសមាសធាតុដែកតែងតែមានបញ្ហាផ្នែកប្រសិទ្ធភាព ដោយសារវាឆាប់ចេញច្រែះ ។

ប៉ុន្តែអ្នកវិភាគមកពីមហាវិទ្យាល័យ Adelaide បានកែលម្អវាជាថ្មី ដោយប្រើប្រាស់សមាសធាតុពី Cobalt Oxide ជាសារធាតុមានក្នុងលោហៈធន់នឹងកំដៅ ហើយស្រោបដោយ Chromium Oxide ដែលគេនិយមប្រើសម្រាប់លាបថ្នាំការពារច្រែះ មកបំបែកឧស្ម័នអ៊ីដ្រូសែនចេញពីទឹកសមុទ្រ ។

សាស្ត្រាចារ្យឈ្មោះ Shizhang Qiao ជាអ្នកវិភាគថ្លែងថា ៖ «យើងបានបំបែកទឹកសមុទ្រធម្មជាតិទៅជាឧស្ម័នអុកស៊ីសែន ហើយយើងទទួលបានអ៊ីដ្រូសែនជិត១០០% និងចំណាយដើមទុនផលិតទាបទៀតផង» ។

ហេតុនេះ ការបំបែកឧស្ម័នអ៊ីដ្រូសែនចេញពីទឹកសមុទ្រតាមរយៈឧបករណ៍ថ្មីនេះអាចធ្វើបានពិតប្រាកដ ទាំងការប្រើប្រាស់ Cobalt និង Chromium ដែលវាជាសារធាតុរ៉ែទូទៅមានក្នុងឧស្សាហកម្ម ហើយចំណាយដើមទុនផលិតទាប ។ ដូច្នេះ ការស្រាវជ្រាវនេះអាចជាការបើកផ្លូវសម្រាប់សាងសង់រោងចក្រផលិតឧស្ម័នអ៊ីដ្រូសែនពីទឹកសមុទ្រនាថ្ងៃអនាគត ៕

ប្រភព ៖ TNN Tech

រដ្ឋធានីតេអ៊ីរ៉ង់៖ ស្របពេលមានភាពតានតឹងកាន់តែខ្លាំងឡើង ជាមួយនឹងសហរដ្ឋអាមេរិក និង សម្ពន្ធមិត្ដលោកខាងលិច ជុំវិញកម្មវិធិអភិវឌ្ឍន៍អាវុធមហាប្រល័យលោករបស់អ៊ីរ៉ង់ នោះ រដ្ឋាភិបាលក្រុងតេអ៊ីរ៉ង់ ក៏បានបង្ហាញមូលដ្ឋានកងទ័ពអាកាស នៅក្នុងក្រោមដីជាមួយនឹងមីស៊ីល បាញ់រយៈចម្ងាយឆ្ងាយ ហើយថែមទាំងបានគំរាមឆ្លើយតប ដល់ប្រទេសណាមួយ វាយប្រហារ មកលើទឹកដីរបស់ខ្លួនថែមទៀតផង។

សារព័ត៌មានរបស់ប៉ាគីស្ថាន Dawn បានចេញផ្សាយ កាលពីព្រឹក ថ្ងៃពុធ ទី៨ ខែកុម្ភៈ ថា បណ្ដាញផ្សព្វផ្សាយរបស់រដ្ឋអ៊ីរ៉ង់ បានរាយការណ៍ ថា កងទ័ពអ៊ីរ៉ង់ កាលពីថ្ងៃអង្គារ បានបង្ហាញនូវមូលដ្ឋានកងទ័ពអាកាសក្រោមដី ជាលើកដំបូងរបស់ខ្លួន សម្រាប់ផ្ទុកយន្ដហោះជាច្រើនគ្រឿង។ មូលដ្ឋានកងទ័ពអាកាសក្រោមដីនេះ ឈ្មោះ ឥន្ទ្រី៤៤ ហើយត្រូវបានរចនាឡើង សម្រាប់ទប់ទល់នឹងការវាយប្រហារ ពីគ្រាប់បែករបស់សហរដ្ឋអាមេរិក ដែលអាចនឹងកើតឡើងជាយថាហេតុ។

ទីភ្នាក់ងារសារព័ត៌មានផ្លូវការ គ្រប់គ្រងដោយរដ្ឋអ៊ីរ៉ង់ IRNA បានចេញផ្សាយ ដោយរៀបរាប់ ថា មូលដ្ឋានកងទ័ពអាកាសក្រោមដីនេះ ជាមូលដ្ឋានកងទ័ពដ៏សំខាន់បំផុតមួយ សម្រាប់កងទ័ពអាកាសរបស់អ៊ីរ៉ង់ ដែលបានបំពាក់ ទៅដល់យន្ដហោះចម្បាំងជាច្រើនគ្រឿង ជាមួយនឹងមីស៊ីលគ្រូស បាញ់រយៈចម្ងាយឆ្ងាយ។ ចំណែកលក្ខណៈសម្បតិ្ដដ៏សំខានរបស់មូលដ្ឋានកងទ័ពអាកាសនេះ មានទីតាំងស្ថិតក្នុងតំបន់ភ្នំ ហើយវាចូលជ្រៅទៅក្នុងផែនដី។

ទោះជាយ៉ាងណា កងទ័ពអ៊ីរ៉ង់ មិនបានបង្ហាញ អំពីភូមិសាស្រ្ដ នៃមូលដ្ឋានកងទ័ពអាកាសក្រោមដីរបស់ខ្លួ តាំងនៅតំបន់ណានោះឡើយ។ ការបង្ហាញមូលដ្ឋានកងទ័ពអាកាសក្រោមដីរបស់អ៊ីរ៉ង់ បានកើតឡើង នៅមុនខួបទី៤៤ នៃបដិវត្ដន៍អ៊ិស្លាម ឆ្នាំ១៩៧៩ ហើយក៏ចំពេលមានភាពតានតឹងកាន់តែខ្លាំងឡើង ជាមួយសហរដ្ឋអាមេរិក និង អ៊ីស្រាអែល។

អ៊ីរ៉ង់ ជាសម្ពន្ធមិត្តដ៏ជិតស្និទ្ធបំផុតមួយរបស់រុស្ស៊ី ហើយប្រទេសមជ្ឈិមបូព៌ាមួយនេះ បានរងនូវការស្ដីបន្ទោស និង ទណ្ឌកម្មយ៉ាងធ្ងន់ធ្ងរ ពីបណ្ដាប្រទេសលោកខាងលិច ជុំវិញកម្មវិធីនុយក្លេអ៊ែររបស់ក្រុងតេអ៊ីរ៉ង់ និង ការផ្គត់ផ្គង់ដ្រូនអត្ដឃាត ជួយដល់ក្រុងមូស្គូ សម្រាប់ធ្វើសង្គ្រាម នៅក្នុងប្រទេសអ៊ុយក្រែន។ ជាថ្នូរនឹងការផ្គត់ផ្គង់ដ្រូនពីក្រុងតេអ៊ីរ៉ង់ នោះ រុស្ស៊ី បានសន្យាផ្ដល់យន្ដហោះចម្បាំងដ៏ទំនើបរបស់ខ្លួន មកដល់ប្រទេសអ៊ីរ៉ង់ វិញ។

ជាមួយគ្នានេះ អ៊ីរ៉ង់ ក៏នឹងត្រូវទទួលបានយន្ដហោះចម្បាំងដ៏ទំនើប ប្រភេទ Sukhoi Su-35 (ស៊ូខយ ស៊ូ-៣៥) មួយចំនួន ពីរុស្ស៊ី នៅខែមីនា។ នេះជាផ្នែកមួយ នៃការបញ្ជាទិញរបស់ក្រុងតេអ៊ីរ៉ង់ ដោយរាប់បញ្ចូល ទាំងការទិញប្រព័ន្ធការពារដែនអាកាស មីស៊ីល និង ឧទ្ធម្ភាគចក្ររាប់សិបគ្រឿងផងដែរ៕

ប្រទេសថៃ ៖ បន្ទាប់ពីចិនបានបើកប្រទេសដោយលុបចោលវិធានការឃុំខ្លួនពេលចូលប្រទេស ធ្វើឱ្យភ្ញៀវទេសចរចិនធ្វើដំណើរចូលប្រទេសថៃកើនឡើងយ៉ាងឆាប់រហ័ស ។ ដូច្នេះ អាជ្ញាធរទេសចរណ៍ថៃបានកែតម្រូវគោលដៅភ្ញៀវទេសចរចិន ដែលធ្វើដំណើរមកកាន់ប្រទេសថៃឆ្នាំ២០២៣នេះ ចាប់ពី៥លាននាក់ ទៅចន្លោះពី៧លាន ទៅ៨លាននាក់ ។

អាជ្ញាធរទេសចរណ៍ លោក យុទ្ធសាក់ ស៊ុបផាសន (Yuthasak Supasorn) ថ្លែងថា ចំនួនភ្ញៀវទេសចរចិនក្នុងប្រទេសថៃ នឹងអាស្រ័យលើការងើបឡើងវិញរបស់ជើងហោះហើរចិន-ថៃក្នុងការហោះហើររដូវក្តៅ និងការហោះហើររដូវត្រជាក់ ឆ្នាំ២០២៣ រួមទាំងថៃស្ថិតក្នុងចំណោមប្រទេស២០ដំបូង ដែលរដ្ឋាភិបាលចិនអនុញ្ញាតឱ្យពលរដ្ឋចិនមកកម្សាន្តតាមរយៈក្រុមហ៊ុនទេសចរណ៍ ។

បន្ទាប់ពីរដ្ឋាភិបាលចិនអនុញ្ញាតឱ្យក្រុមហ៊ុនទេសចរណ៍រៀបចំដំណើរកម្សាន្តទេសចរណ៍ជាក្រុមទៅបរទេស ក្រុមហ៊ុនអាកាសចរណ៍ផ្សេងៗបានបង្កើនជើងហោះហើរថៃ-ចិន សម្រាប់ការហោះហើររដូវក្តៅឆ្នាំ២០២៣ ។ អាជ្ញាធរទេសចរណ៍សង្ឃឹមថា ចិននឹងពិចារណាថា នៅពេលបើកឱ្យពលរដ្ឋខ្លួនទៅកម្សាន្តក្រៅប្រទេស នឹងឆ្លងជំងឺកូវីដឬអត់ ។ បើចិនអាចគ្រប់គ្រងកូវីដបាន គួរតែអនុញ្ញាតឱ្យក្រុមហ៊ុនទេសចរណ៍បង្កើនជើងហោះហើរកាន់តែច្រើន ព្រោះការអនុញ្ញាតហោះហើរត្រូវស្នើសុំពីប្រទេសចិន និងថៃ ខណៈចិនតម្រូវឱ្យពិនិត្យរកកូវីដតាម RT-PCR មុនត្រឡប់ចូលប្រទេសចិនវិញ ក្នុងរយៈពេល៤៨ម៉ោង ។

ភ្ញៀវទេសចរអន្តរជាតិធ្វើដំណើរមកកាន់ប្រទេសថៃក្នុងខែមករា ឆ្នាំ២០២៣ រួមមាន ៖
១-ម៉ាឡេស៊ី ២៥៧.៦៨៤នាក់
២-រុស្ស៊ី ២០២.៦៤២នាក់
៣-កូរ៉េខាងត្បូង ១៦៨.៦០៥នាក់
៤-ឥណ្ឌា ១០១.៣៤៣នាក់
៥-ចិន ៩១.០៨០នាក់

ភ្ញៀវទេសចរចិនស្ថិតក្នុងចំណាត់ថ្នាក់ទី៥ បន្ទាប់ពីរដ្ឋាភិបាលចិនសម្រេចចិត្តបើកប្រទេស និងលុបចោលវិធានការឃុំខ្លួនពេលចូលប្រទេស តាំងពីថ្ងៃទី៨ ខែមករា ឆ្នាំ២០២៣ ធ្វើឱ្យភ្ញៀវទេសចរចិនមានសេរីភាពធ្វើដំណើរចូលប្រទេសថៃកាន់តែច្រើន ។

ចំណែកភ្ញៀវទេសចរអន្តរជាតិចំនួន២លាននាក់ក្នុងខែមករា ឆ្នាំ២០២៣ ប្រហាក់ប្រហែលនឹងចំនួន៣លាននាក់/១ខែ នៅឆ្នាំ២០១៩ ។ វាឆ្លុះបញ្ចាំងឱ្យឃើញថា ភ្ញៀវទេសចរអន្តរជាតិ (លើកលែងចិន) បានធ្វើដំណើរមកកាន់ប្រទេសថៃកើនឡើងពី៨០%-៩០% ដូចធម្មតាវិញហើយ ។

អាជ្ញាធរទេសចរណ៍វាយតម្លៃថា បើភ្ញៀវទេសចរចិនធ្វើដំណើរមកកាន់ប្រទេសថៃចំនួន៧លាននាក់ ទៅ៨លាននាក់ក្នុងឆ្នាំនេះ នឹងធ្វើឱ្យចំនួនភ្ញៀវទេសចរអន្តរជាតិសរុបរបស់ថៃ កើនឡើងជិត៣០លាននាក់ ដូចកាលពីឆ្នាំ២០១៩ មុនជំងឺកូវីដរាតត្បាត ៕

ប្រភព ៖ todaybizview

ប្រទេសឡាវ ៖ សារព័ត៌មាន Nikkei រាយការណ៍ថា ធនាគារកណ្តាលរបស់ឡាវបានចាប់ផ្តើមសាកល្បងរូបិយប័ណ្ឌឌីជីថលក្រោមឈ្មោះ «DLak» ឬ «ឡាវគីបឌីជីថល» នៅថ្ងៃទី៧ ខែកុម្ភៈ ក្រោយសិក្សាពីលទ្ធភាពនៅចុងឆ្នាំ២០២១ រួមជាមួយ Soramitsu ជាក្រុមហ៊ុនបច្ចេកវិទ្យារបស់ប្រទេសជប៉ុន ។

ក្រុមហ៊ុន Soramitsu ធ្លាប់មានបទពិសោធន៍ជួយប្រទេសកម្ពុជាបង្កើតការទូទាត់ប្រាក់ឌីជីថលក្រោមឈ្មោះ «Bakong-បាគង» កាលពីខែតុលា ឆ្នាំ២០២០ ។ ក្រុមហ៊ុនសង្ឃឹមថា ធនាគារកណ្តាលរបស់ឡាវនឹងប្រើប្រព័ន្ធដូចគ្នាធ្វើជាមូលដ្ឋាន និងកែលម្អបន្ថែមក្នុងការទូទាត់ប្រាក់ឌីជីថល DLak ដែលនឹងពង្រីកការប្រើប្រាស់ទៅកាន់អតិថិជនតាមរយៈធនាគារពាណិជ្ជកម្ម ដើម្បីសាកល្បងការទូទាត់ប្រាក់តាមហាងលក់ផលិតផលនានា ។

ក្រៅពីការសាកល្បងប្រើប្រាស់ក្នុងប្រទេសហើយ ធនាគារកណ្តាលឡាវមានគម្រោងសាកល្បងការទូទាត់ឆ្លងប្រទេសជាមួយកម្ពុជាផងដែរ ដោយសង្ឃឹមថា វិធីនេះនឹងធ្វើឱ្យការទូទាត់ប្រាក់ឌីជីថល DLak ទទួលបានការពេញនិយមប្រើប្រាស់កាន់តែខ្លាំង ខណៈពេលមុននេះ រូបិយប័ណ្ឌឌីជីថល eNaira របស់ប្រទេសនីហ្សេរីយ៉ាមិនទទួលបានជោគជ័យប៉ុន្មានទេ ។

រូបិយប័ណ្ឌឌីជីថល ឬ CBDC (Central Bank Digital Currency) កំពុងទទួលបានការចាប់អារម្មណ៍ពីធនាគារកណ្តាលក្នុងភូមិភាគអាស៊ី ដោយប្រទេសឡាវ និងកម្ពុជាសម្លឹងឃើញដូចគ្នាថា CBDC គឺជាកូនសោសំខាន់ក្នុងការកសាងស្ថេរភាពសេដ្ឋកិច្ច ។

ធនាគារកណ្តាលឡាវបញ្ជាក់ថា CBDC នឹងជួយឱ្យពលរដ្ឋឈានទៅប្រើប្រាស់សេវាហិរញ្ញវត្ថុកាន់តែច្រើន ខណៈបច្ចុប្បន្ន ៧០% នៃចំនួនពលរដ្ឋឡាវគ្មានបញ្ជីធនាគារ ។ ហេតុនេះ ការប្រើប្រាស់ CBDC នឹងជួយឱ្យពលរដ្ឋអាចទូទាត់ប្រាក់តាមហាង ឬតាមរយៈការស្កេន QR Code នៅលើស្មាតហ្វូន បើទោះជាពួកគេគ្មានបញ្ជីធនាគារក្តី ។

ក្រៅពីនេះ ការទូទាត់ប្រាក់ឆ្លងប្រទេសរបស់ CBDC បានជួយកាត់បន្ថយការចំណាយរបស់ពលរដ្ឋឡាវ ដែលធ្វើការនៅក្រៅប្រទេសផ្ទេរប្រាក់មកប្រទេសរបស់ខ្លួន រួមទាំងការធ្វើពាណិជ្ជកម្មរវាងចិននិងឡាវកំពុងកើនឡើង ។ លើសពីនេះ គេនឹងទទួលបានប្រយោជន៍ពីការប្រើប្រាស់រូបិយប័ណ្ឌឌីជីថល ជាពិសេស ការប្តូរប្រាក់ឡាវ និងចិនមានស្ថិរភាព ។

គោលដៅនៃការសាកល្បងនេះផ្តោតលើ៣ចំណុចគឺ ការបើកឱ្យពលរដ្ឋឈានដល់ការទូទាត់ប្រាក់ បើទោះជាពួកគេគ្មានបញ្ជីធនាគារ, ការកាត់បន្ថយចំណាយក្នុងការផ្ទេរប្រាក់មកប្រទេសរបស់ខ្លួន និងការបង្កើតស្ថេរភាពសេដ្ឋកិច្ច ដោយការកាត់បន្ថយការពឹងផ្អែកលើប្រាក់បរទេស ។ លើសពីនេះ នឹងជួយឱ្យធនាគារកណ្តាលឡាវមានទិន្នន័យគ្រប់គ្រាន់ដើម្បីពិចារណាថា នឹងចាប់ផ្តើមប្រើប្រាស់រូបិយប័ណ្ឌឌីជីថល DLak នាថ្ងៃអនាគតឬអត់ ៕

ប្រភព ៖ beartaiBRIEF

រដ្ឋធានីកៀវ៖ ថ្វីបើអង្គការណាតូ និង សម្ពន្ធមិត្តលោកខាងលិច មិនបានចូលពាក់ព័ន្ធ ដោយផ្ទាល់ នៅក្នុងសង្គ្រាមរបស់ក្រុងមូស្គូ នៅលើទឹកដីរបស់អ៊ុយក្រែន ក៏ពិតមែន ប៉ុន្ដែចាប់តាំងពីប្រធានាធិបតីរុស្ស៊ី លោក វ៉្លាឌីមៀ ពូទីន (Vladimir Putin) បានបញ្ជាឲ្យកម្លាំងទាហានរបស់គាត់ បើកទ្វារព្រំដែន វាយលុកចូលទៅក្នុងប្រទេសជិតខាងរបស់ខ្លួន ដែលធ្លាប់រួមរស់ជាមួយគ្នា ក្រោមឆត្រ នៃអតីតសហភាពសូវៀត រហូតមកដល់ពេលនេះ អង្គការសម្ពន្ធមិត្តយោធាដ៏ខ្លាំងក្លារបស់ពិភពលោក តែងតែផ្ដល់ជំនួយគ្រប់បែបយ៉ាង ជួយដល់ក្រុងកៀវ ទើបធ្វើឲ្យវិមានក្រឹមឡាំង ចោទប្រកាន់ អំពីការគំរាមកំហែង មិនអាចប៉ាន់ស្មាន ទុកជាមុនបាន។

បណ្ដាញទូរទស្សន៍អារ៉ាប់អន្ដរជាតិ Alarabiya News បានចេញផ្សាយ កាលពីថ្ងៃអង្គារ ទី៧ ខែកុម្ភៈ ថា លោក ស៊ើហ្គេ សយហ្គូ (Sergei Shoigu) រដ្ឋមន្រ្ដីក្រសួងការពារជាតិរុស្ស៊ី បានបញ្ជាក់ កាលពីថ្ងៃអង្គារ ថា «ការផ្គត់ផ្គង់គ្រឿងសព្វាវុធរបស់បណ្ដាប្រទេសលោកខាងលិច ជួយដល់អ៊ុយក្រែន កំពុងតែអូសទាញអង្គការណាតូ ឲ្យចូលជ្រៅទៅក្នុងជម្លោះនេះ យ៉ាងពិតប្រាកដ។ ជាមួយគ្នានេះដែរ លោករដ្ឋមន្រ្ដី បានព្រមាន ថា សកម្មភាពរបស់លោកខាងលិច អាចនឹងនាំឱ្យមានការកើនឡើង នៃជម្លោះ មិនអាចទាយ ទុកជាមុនបាន»។

លោករដ្ឋមន្រ្ដីក្រសួងការពារជាតិរុស្ស៊ី បានបញ្ជាក់ នៅក្នុងការហៅសន្និសីទជាមួយនឹងក្រុមមន្រ្ដីយោធារុស្ស៊ី ថា «សហរដ្ឋអាមេរិក និង សម្ពន្ធមិត្តរបស់ក្រុងវ៉ាស៊ីនតោន កំពុងតែព្យាយាមអូសជម្លោះនេះ ឲ្យកាន់តែយូរ តាមតែអាចធ្វើទៅបាន។ ដើម្បីពន្យារពេលសង្គ្រាមឲ្យកាន់តែយូរនោះ បណ្ដាប្រទេសបស្ចិមលោក កំពុងតែចាប់ផ្ដើម ផ្គត់ផ្គង់គ្រឿងសព្វាវុធវាយប្រហារធុនធ្ងន់ ដោយជំរុញជាចំហ ដើម្បីឲ្យអ៊ុយក្រែន វាយដណ្ដើមយកទឹកដីរបស់យើង។ ជាការពិតណាស់ វាជាការបោះជំហានទៅមុខ អូសទាញបណ្ដាប្រទេសជាសម្ពន្ធមិត្តរបស់អង្គការណាតូ ឲ្យធ្លាក់ចូលទៅក្នុងជម្លោះ នៅអ៊ុយក្រែន ហើយវាយអាចជំរុញឲ្យកម្រិត នៃជម្លោះកើនឡើង មិនអាចទស្សន៍ទាយទុកជាមុនបាន»។

ការលើឡើងរបស់លោក ស៊ើហ្គេ សយហ្គូ (Sergei Shoigu) ចំពោះ«ទឹកដីរបស់យើង» ហាក់បីដូចជាសំដៅ ទៅលើតំបន់ចំនួន៤របស់អ៊ុយក្រែន ស្ថិតនៅភាគខាងកើត និង ភាគខាងត្បូងប្រទេស រួមមាន ដូណែតស្ក៍ (Donetsk), លូហានស្ក៍ (Luhansk), ហ្សាប៉ូរីហ្សា (Zaporizhzhia) និង ខើរសុន (Kherson) ដែលក្រុងមូស្គូ បានដាក់ចូលជាឧបសម្ព័ន្ធរបស់រុស្ស៊ី កាលពីខែកញ្ញា ឆ្នាំ២០២២។ ចំណែកការបោះឆ្នោតប្រជាមតិ នៅក្នុងតំបន់ទាំងនេះ ត្រូវបានធ្វើឡើង ក្រោមអាជ្ញាធររបស់រុស្ស៊ី ប៉ុន្ដែត្រូវបានរដ្ឋាភិបាលក្រុងកៀវ និង សម្ពន្ធមិត្ដលោកខាងលិច ចាត់ទុកជាទង្វើខុសច្បាប់ ហើយអង្គការសហប្រជាជាតិ ក៏បានប្រកាស មិនទទួលស្គាល់ផងដែរ។

ទោះជាយ៉ាងណា រហូតមកដល់ពេលនេះ ដែនដីជាច្រើន នៅក្នុងតំបន់ដែលរុស្ស៊ី បានអះអាងជារបស់ខ្លួននោះ នៅតែស្ថិតក្រោមការគ្រប់គ្រងរបស់អ៊ុយក្រែន នៅឡើយ ខណៈការវាយប្រហារគ្នាយ៉ាងខ្លាំង រវាងកងទ័ពការពារទឹកដីរបស់ក្រុងកៀវ និង ទាហានរុស្ស៊ី កំពុងតែបន្ដ ទាំងនៅភាគខាងត្បូង និង ភាគខាងកើត។

រដ្ឋាភិបាលក្រុងមូស្គូ តែងតែចោទប្រកាន់ជាដដែល ដល់បណ្ដាប្រទេសលោកខាងលិច និង សម្ពន្ធមិត្ដយោធារបស់អង្គការណាតូ ចំពោះការដើរតួនាទីដោយផ្ទាល់ នៅក្នុងប្រទេសអ៊ុយក្រែន តាមរយៈការផ្គត់ផ្គង់គ្រឿងយុទ្ធោបករណ៍ទំនើបៗ ជួយដល់ក្រុងកៀវ។ ជាមួយគ្នានឹងការចោទប្រកាន់នោះ រុស្ស៊ី តែងតែព្រមានដល់អង្គការណាតូ ថា គ្រឿងសព្វាវុធរបស់ពួកគេទាំងនោះ ក្លាយជាគោលដៅស្របច្បាប់ សម្រាប់កម្លាំងទាហានរបស់ខ្លួន វាយប្រហារកម្ទេចចោល។

សហរដ្ឋអាមេរិក បានបញ្ជូនគ្រឿងសឹកជាច្រើនប្រភេទ មានតម្លៃសរុប ច្រើនជាង២០ពាន់លានដុល្លារ ជួយដល់ប្រទេសអ៊ុយក្រែន ចាប់តាំងពីរុស្ស៊ី បានចូលឈ្លានពាន នៅក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២។ កាលពីសប្ដាហ៍មុននេះ ក្រុងវ៉ាស៊ីនតោន ក៏បានប្រកាស អំពីកញ្ចប់ជំនួយគ្រឿងសព្វាវុធថ្មីបន្ថែមទៀត មានទំហំទឹកប្រាក់ ប្រហែល២ពាន់លានដុល្លារ ដោយរាប់បញ្ចូលទាំងគ្រាប់រ៉ុក្កែតបាញ់ រយៈចម្ងាយឆ្ងាយផងដែរ។

អ៊ុយក្រែន បានអះអាងថា គ្រឿងសព្វាវុធ ក៏ដូចជា ការផ្គត់ផ្គង់សម្ភារយោធាផ្សេងៗទៀត រួមទាំងរថក្រោះ ផងដែរ ពិតជាមានតម្រូវការជាបន្ទាន់ ដើម្បីទប់ទល់នឹងការវាយប្រហាររបស់រុស្ស៊ី និង បង្កើនកម្លាំងបាញ់ប្រហាររបស់ខ្លួន សម្រាប់ការវាយលុក នៅនិទាឃរដូវ ប្រឆាំងនឹងកងកម្លាំងរបស់ក្រុងម៉ូស្គូ។ ក្រុមមន្ត្រីអ៊ុយក្រែន បានបញ្ជាក់ ថា ក្រុងមូស្គូ កំពុងតែប្រមូលគ្រឿងសព្វាវុធ និង ទ័ពបម្រុង សម្រាប់ការវាយប្រហារជាថ្មី នៅពេលខាងមុខ ៕