ប្រទេសតួកគី ៖ ចំនួនអ្នកស្លាប់ដោយសារគ្រោះរញ្ជួយដីដ៏ធ្ងន់ធ្ងរនៅប្រទេសតួកគី និងស៊ីរី បានកើនឡើងដល់៧.៨០០នាក់ហើយ ។ ភ្នាក់ងារជួយសង្គ្រោះបានខ្នះខ្នែងធ្វើការប្រណាំងនឹងពេលវេលា ដើម្បីស្វែងរកអ្នកនៅរស់រានមានជីវិតពីគំនរបែកបាក់នៃអគារ ។

ភ្នាក់ងារជួយសង្គ្រោះបានព្យាយាមស្វែងរក និងសង្គ្រោះជនរងគ្រោះចេញពីគំនរបែកបាក់ជាច្រើនកន្លែង ។ អាកាសធាតុត្រជាក់ខ្លាំងក្នុងរដូវរងា គឺជាឧបសគ្គក្នុងការស្វែងរក និងពិបាកជួយសង្គ្រោះ ។ លើសពីនេះ នៅតំបន់នេះមានភ្លៀងធ្លាក់ខ្លាំង និងមានព្រិលធ្លាក់តាមកន្លែងខ្លះ ហើយនៅតំបន់ខ្លះគ្មានប្រេងឥន្ធនៈ និងអគ្គិសនីប្រើប្រាស់ ។ ពលរដ្ឋជាច្រើនក្លាយជាអ្នកគ្មានផ្ទះសម្បែង ខណៈពួកគេមិនហ៊ានចូលក្នុងផ្ទះរបស់ខ្លួន ព្រោះខ្លាចការរញ្ជួយដី ។

ការិយាល័យគ្រប់គ្រងគ្រោះមហន្តរាយរបស់តួកគី (AFAD) បង្ហើបថា គ្រោះរញ្ជួយដីបានធ្វើឱ្យអគារ និងលំនៅឋានខូចខាតយ៉ាងតិច៤.៧០០ខ្នង ។ មានការរាយការណ៍ថា អាជ្ញាធរបានជួយជនរងគ្រោះចេញពីគំនរបែកបាក់បានជាង៨.០០០នាក់ ខណៈការរញ្ជួយដីកើតឡើងជាបន្តបន្ទាប់ ជាមួយនឹងកម្រិតញ័រ៤-៥ ។

អង្គការសុខភាពពិភពលោក (WHO) ប៉ាន់ស្មានថា អ្នកស្លាប់ដោយសារគ្រោះរញ្ជួយដីដ៏ខ្លាំងក្លានៅប្រទេសតួកគី អាចនឹងឡើងដល់ជាង២ម៉ឺននាក់ឯណោះ ។ បើតួលេខប៉ាន់ស្មានត្រឹមត្រូវនោះ នឹងធ្វើឱ្យហេតុការណ៍រញ្ជួយដីពេលនេះក្លាយជាគ្រោះមហន្តរាយបណ្តាលឱ្យមានអ្នកស្លាប់ច្រើនបំផុត តាំងពីមានហេតុការណ៍រញ្ជួយដី និងរលកយក្សស៊ូណាមិវាយប្រហារប្រទេសជប៉ុនកាលពីឆ្នាំ២០១១ ៕

ប្រភព ៖ TNN EARTH

រដ្ឋធានីមូស្គូ៖ សង្គ្រាមដ៏ឃោរឃៅ នៅក្នុងប្រទេសអ៊ុយក្រែន បាន និង កំពុងតែបង្កនូវមហាវិនាសកម្មយ៉ាងធ្ងន់ធ្ងរ ដោយបាន និង កំពុងតែបំផ្លិចបំផ្លាញហេដ្ឋរចនាសម្ព័ន្ធ អស់រាប់រយពាន់លានដុល្លារអាមេរិក ហើយបន្ដសម្លាប់ជនស៊ីវិល រាប់ម៉ឺននាក់ និង បង្កការខូចខាតទាំងរបួស និង ស្លាប់ ដល់ទាហានទាំងសងខាង ប្រហែលជាជិត៣០ម៉ឺននាក់ ប៉ុន្ដែរហូតមកដល់ពេលនេះ ក៏មានសេចក្ដីរាយការណ៍ អំពីអាជ្ញាធរក្រុងមូស្គូ បានចាប់ទាហានរបស់ខ្លួន មិនទៅប្រយុទ្ធ ដាក់នៅក្នុងពន្ធនាគារ ថែមទៀតផង។

សារព័ត៌មាន Ukrinform បានចេញផ្សាយ កាលពីព្រឹក ថ្ងៃពុធ ទី៨ ខែកុម្ភៈ ថា នៅក្នុងតំបន់សេវ៉ាស្ដូប៉ូល (Sevastopol) ដែលរុស្ស៊ីបានរឹបអូសយក ទៅគ្រប់គ្រងជាបណ្ដោះអាសន្ន មានទាហាន ចំនួន២នាក់ បានមើលងាយនឹងបទបញ្ជា ទៅប្រយុទ្ធប្រឆាំងនឹងអ៊ុយក្រែន ក៏ត្រូវបានតុលាការរុស្ស៊ី គ្រប់គ្រងតំបន់នោះ កាត់ទោសឱ្យជាប់ពន្ធនាគារ។ រឿងរ៉ាវនេះ ត្រូវបានបង្ហោះ ដោយបណ្ដាញតេឡេក្រាម Crimean Wind ហើយត្រូវបាន Ukrinform លើកយកសេចក្ដីរាយការណ៍នោះ យកមកចុះផ្សាយបន្ដ។

បើតាមសេចក្ដីរាយការណ៍នោះ បានឲ្យដឹង ថា «តុលាការ នៅក្នុងតំបន់ Sevastopol បានកាត់ទោសជាលើកដំបូង នៅក្នុងសំណុំរឿងព្រហ្មទណ្ឌ ទាក់ទងនឹងទាហានបដិសេធអនុវត្តដីកា»។ ជាការកត់សម្គាល់ ទៅលើទណ្ឌិតទាំង២នាក់នោះ គឺជាបងប្អូនជីដូនមួយ ហើយពួកគេធ្វើជាទាហាន នៅតំបន់យោធភូមិភាគបែលហ្គោរ៉ូដ (Belgorod) នៃតំបន់អាមូរ (Amur) ប្រទេសរុស្ស៊ី។

ទាហានទាំង២នេះ ត្រូវបានកាត់ទោស ឲ្យជាប់ពន្ធនាគារ ក្រោមមាត្រាព្រហ្មទណ្ឌ «មិនអនុវត្តដីកា»។ ទាហានទាំង២នាក់ ជាបងប្អូនជីដូនមួយនេះ មានម្នាក់ ត្រូវកាត់ទោសដាក់ពន្ធនាគារ រយៈពេល៣ឆ្នាំ និង ៤ខែ ហើយម្នាក់ទៀត ត្រូវជាប់គុក រយៈពេល៣ឆ្នាំ និង ៥ខែ។

លោក រ៉េហ្វាត ជូបារ៉ូវ (Refat Chubarov) ប្រធានចលនាតស៊ូរបស់អ៊ុយក្រែន នៅតំបន់គ្រីមៀ បានបញ្ជាក់ ថា ទាហានរុស្ស៊ី មួយចំនួន ត្រូវបានដាក់ពង្រាក់ពង្រាយ នៅតំបន់គ្រីមៀ (Crimea) ។

បើតាមការិយាល័យរបស់ឧត្ដមស្នងការ ទទួលបន្ទុកសិទ្ធិមនុស្ស របស់អង្គការសហប្រជាជាតិ (OHCHR) បានឲ្យដឹង ថា សង្គ្រាម នៅអ៊ុយក្រែន ចាប់ពីថ្ងៃទី២៤ ខែកុម្ភៈ ឆ្នាំ២០២២ ដល់ ថ្ងៃទី៥ ខែកុម្ភៈ ឆ្នាំ២០២៣ បានធ្វើឲ្យរងគ្រោះ ដល់ជនស៊ីវិល ចំនួន ១៨ ៨១៧នាក់ ហើយក្នុងនោះស្លាប់ ៧ ១៥៥នាក់ និង រងរបួស ចំនួន ១១ ៦៦២នាក់។ ចំណែកអ្នកស្លាប់ និង រងរបួស អាចនឹងនៅតែបន្ដកើនឡើង ព្រោះការប្រយុទ្ធគ្នា កំពុងតែបន្ដជារៀងរាល់ថ្ងៃ។

ដោយឡែក អគ្គសេនាធិការ កងទ័ពអ៊ុយក្រែន បានបញ្ជាក់ ថា សង្គ្រាម ចាប់ពីថ្ងៃទី២៤ ខែកុម្ភៈ ឆ្នាំ២០២២ ដល់ ថ្ងៃទី៧ ខែកុម្ភៈ ឆ្នាំ២០២៣ កងទ័ពអ៊ុយក្រែន បានសម្លាប់ទាហានរុស្ស៊ី ចំនួន ១៣៣ ១៩០នាក់។ ប៉ុន្ដែអ៊ុយក្រែន មិនបានបញ្ជាក់ អំពីចំនួនកងទ័ពរបស់ខ្លួន ស្លាប់ និង របួស នៅក្នុងសង្គ្រាមនេះឡើយ ហើយក៏មិនទាន់មានប្រភពព័ត៌មានឯករាជ្យណាមួយ បញ្ជាក់នោះដែរ ។ ផ្ទុយទៅវិញ សម្រាប់រុស្ស៊ី កាន់តែលាក់បាំងខ្លាំងបំផុត អំពីចំនួនទាហានរបស់ខ្លួនស្លាប់ និង របួស ដោយចាត់ទុក ថា នេះជាកិច្ចការសម្ងាត់ នៃសន្ដិសុខជាតិ ហើយសូម្បីតែប្រជាជនរបស់ខ្លួន ជជែកវែកញែក ពាក់ព័ន្ធនឹងកងទ័ព ក៏អាចត្រូវប្រឈមមុខនឹងការជាប់គុកច្រវាក់ផងដែរ។

បើតាមធនាគារពិភពលោក និង ក្រុមមន្រ្ដីជំនាញរបស់អ៊ុយក្រែន ធ្លាប់លើកឡើង អំពីការវាយតម្លៃរបស់ខ្លួន លើការខូចខាត ដោយសារសង្គ្រាម កាលពីអំឡុងខែតុលា ឆ្នាំ២០២២ ថា សង្គ្រាមរបស់រុស្ស៊ី អស់រយៈពេលជិត១ឆ្នាំកន្លងមកនេះ បានធ្វើឲ្យប្រទេសអ៊ុយក្រែន ខូចខាត មានទំហំទឹកប្រាក់ ចន្លោះពី៣៥០ពាន់លានដុល្លារ ទៅ៧០០ពាន់លានដុល្លារ។ ប៉ុន្ដែចាប់តាំងពីក្រុមជំនាញ បានវាយតម្លៃ នាពេលនោះ រហូតមកដល់ពេលនេះ សង្គ្រាមនៅតែបន្ដវាយប្រយុទ្ធគ្នា កាន់តែខ្លាំងឡើង ដូច្នេះទំហំ នៃការខូចខាត និងការបំផ្លិចបំផ្លាញ អាចនឹងបន្ដកើនឡើងខ្ពស់៕

DELL ជាក្រុមហ៊ុនធំមួយផ្នែកបច្ចេកវិទ្យាកុំព្យូទ័របានប្រកាសកាត់បន្ថយបុគ្គលិកចំនួន៦.៦៥០នាក់ ក្រោយពីក្រុមហ៊ុនប្រឈមនឹងការលក់កុំព្យូទ័រធ្លាក់ចុះ ។ ការកាត់បន្ថយបុគ្គលិករាប់ពាន់នាក់នៅពេលនេះ ស្មើ៥% នៃចំនួនបុគ្គលិកទាំងអស់ ។ ដូច្នេះ ចំនួនបុគ្គលិករបស់ក្រុមហ៊ុននៅសល់ត្រឹមតែ១២៦.៣០០នាក់ប៉ុណ្ណោះ គឺតិចបំផុតក្នុងរយៈពេល៦ឆ្នាំ ។

ក្នុងអំឡុងពេលការរាតត្បាតនៃជំងឺកូវីដ-១៩ ការលក់កុំព្យូទ័ររបស់ក្រុមហ៊ុនបានកើនឡើង ដោយសារមនុស្សភាគច្រើនត្រូវធ្វើការពីផ្ទះទៅ ។ ទោះយ៉ាងណា ក្រោយពីការឆ្លងជំងឺកូវីដចាប់ផ្តើមថយចុះ ធ្វើឱ្យបរិមាណការទិញកុំព្យូទ័រថយចុះតាមដែរ ។ នៅឆ្នាំ២០២២ ចំនួនលក់កុំព្យូទ័ររបស់ក្រុមហ៊ុនបានធ្លាក់ចុះជាង៣៧% បើធៀបនឹងឆ្នាំ២០២១ ដែលក្រុមហ៊ុនមានប្រាក់ចំណូលពីការលក់កុំព្យូទ័រកើនឡើង៥៥% ។

បើទោះជាស្ថិតក្នុងគ្រាលំបាក ប៉ុន្តែក្រុមហ៊ុនបញ្ជាក់ថា ការកាត់បន្ថយបុគ្គលិកនៅពេលនេះ អាចធ្វើឱ្យក្រុមហ៊ុនកាត់បន្ថយការចំណាយប្រាក់ពី៧០០លានដុល្លារ ទៅ១.០០០លានដុល្លារអាមេរិក ហើយអាចជួយរក្សាអត្រាប្រាក់ចំណេញរបស់ក្រុមហ៊ុនបាន ។

នាយកប្រតិបត្តិក្រុមហ៊ុន Jeff Clark លើកឡើងថា មុនពេលកាត់បន្ថយបុគ្គលិក ក្រុមហ៊ុនបានព្យាយាមធ្វើគ្រប់វិធី ដូចជា ការផ្អាកជួលបុគ្គលិកបណ្តោះអាសន្ន និងដាក់កំហិតលើការធ្វើដំណើរជាដើម ប៉ុន្តែនៅតែមិនគ្រប់គ្រាន់ ។

គួរបញ្ជាក់ថា កាលពីខែវិច្ឆិកា ឆ្នាំ២០២២ កន្លងមក HP ជាក្រុមហ៊ុនបច្ចេកវិទ្យាកុំព្យូទ័រធំមួយទៀត ក៏បានប្រកាសកាត់បន្ថយបុគ្គលិកដូចគ្នាដែរ គឺចំនួន៦.០០០នាក់ ហើយក្រុមហ៊ុន Cisco Systems និងក្រុមហ៊ុន IBM ក៏បានកាត់បន្ថយបុគ្គលិកជាង៤.០០០នាក់ក្នុងឆ្នាំ២០២២ ។ ក្រុមហ៊ុនបច្ចេកវិទ្យាទាំងអស់ទូទាំងពិភពលោក បានកាត់បន្ថយបុគ្គលិករួមគ្នាជាង៦៤៩% បើធៀបនឹងឆ្នាំ២០២១ ៕ ប្រភព ៖ TNN Tech

ប្រទេសអូស្ត្រាលី ៖ ឧស្ម័នអ៊ីដ្រូសែនជាថាមពលទទួលបានការពេញនិយមខ្លាំងឡើង ប៉ុន្តែបញ្ហាសំខាន់របស់ថាមពលអ៊ីដ្រូសែន គឺនៅត្រង់ការផលិតត្រូវចំណាយថ្លៃដើមខ្ពស់ បើធៀបជាមួយការផលិតឧស្ម័នធម្មជាតិ និងថាមពលអគ្គិសនី ។ ប៉ុន្តែបញ្ហានេះអាចបញ្ចប់ នៅពេលអ្នកវិភាគនៅប្រទេសអូស្ត្រាលីរកឃើញវិធីផលិតឧស្ម័នអ៊ីដ្រូសែនចេញពីទឹកសមុទ្រដោយជោគជ័យ ។

គេបានស្ទង់មតិដោយអភិវឌ្ឍន៍ដំណើរការបំបែកឧស្ម័នចេញពីទឹកដោយអគ្គិសនី ឬហៅថា អេឡិចត្រូនិក ។ វាជាមូលដ្ឋាននៃការបំបែកសមាសធាតុគីមី ប៉ុន្តែការអនុវត្តមុនការស្រាវជ្រាវនេះ Catalyst ជាសមាសធាតុដែកតែងតែមានបញ្ហាផ្នែកប្រសិទ្ធភាព ដោយសារវាឆាប់ចេញច្រែះ ។

ប៉ុន្តែអ្នកវិភាគមកពីមហាវិទ្យាល័យ Adelaide បានកែលម្អវាជាថ្មី ដោយប្រើប្រាស់សមាសធាតុពី Cobalt Oxide ជាសារធាតុមានក្នុងលោហៈធន់នឹងកំដៅ ហើយស្រោបដោយ Chromium Oxide ដែលគេនិយមប្រើសម្រាប់លាបថ្នាំការពារច្រែះ មកបំបែកឧស្ម័នអ៊ីដ្រូសែនចេញពីទឹកសមុទ្រ ។

សាស្ត្រាចារ្យឈ្មោះ Shizhang Qiao ជាអ្នកវិភាគថ្លែងថា ៖ «យើងបានបំបែកទឹកសមុទ្រធម្មជាតិទៅជាឧស្ម័នអុកស៊ីសែន ហើយយើងទទួលបានអ៊ីដ្រូសែនជិត១០០% និងចំណាយដើមទុនផលិតទាបទៀតផង» ។

ហេតុនេះ ការបំបែកឧស្ម័នអ៊ីដ្រូសែនចេញពីទឹកសមុទ្រតាមរយៈឧបករណ៍ថ្មីនេះអាចធ្វើបានពិតប្រាកដ ទាំងការប្រើប្រាស់ Cobalt និង Chromium ដែលវាជាសារធាតុរ៉ែទូទៅមានក្នុងឧស្សាហកម្ម ហើយចំណាយដើមទុនផលិតទាប ។ ដូច្នេះ ការស្រាវជ្រាវនេះអាចជាការបើកផ្លូវសម្រាប់សាងសង់រោងចក្រផលិតឧស្ម័នអ៊ីដ្រូសែនពីទឹកសមុទ្រនាថ្ងៃអនាគត ៕

ប្រភព ៖ TNN Tech

រដ្ឋធានីតេអ៊ីរ៉ង់៖ ស្របពេលមានភាពតានតឹងកាន់តែខ្លាំងឡើង ជាមួយនឹងសហរដ្ឋអាមេរិក និង សម្ពន្ធមិត្ដលោកខាងលិច ជុំវិញកម្មវិធិអភិវឌ្ឍន៍អាវុធមហាប្រល័យលោករបស់អ៊ីរ៉ង់ នោះ រដ្ឋាភិបាលក្រុងតេអ៊ីរ៉ង់ ក៏បានបង្ហាញមូលដ្ឋានកងទ័ពអាកាស នៅក្នុងក្រោមដីជាមួយនឹងមីស៊ីល បាញ់រយៈចម្ងាយឆ្ងាយ ហើយថែមទាំងបានគំរាមឆ្លើយតប ដល់ប្រទេសណាមួយ វាយប្រហារ មកលើទឹកដីរបស់ខ្លួនថែមទៀតផង។

សារព័ត៌មានរបស់ប៉ាគីស្ថាន Dawn បានចេញផ្សាយ កាលពីព្រឹក ថ្ងៃពុធ ទី៨ ខែកុម្ភៈ ថា បណ្ដាញផ្សព្វផ្សាយរបស់រដ្ឋអ៊ីរ៉ង់ បានរាយការណ៍ ថា កងទ័ពអ៊ីរ៉ង់ កាលពីថ្ងៃអង្គារ បានបង្ហាញនូវមូលដ្ឋានកងទ័ពអាកាសក្រោមដី ជាលើកដំបូងរបស់ខ្លួន សម្រាប់ផ្ទុកយន្ដហោះជាច្រើនគ្រឿង។ មូលដ្ឋានកងទ័ពអាកាសក្រោមដីនេះ ឈ្មោះ ឥន្ទ្រី៤៤ ហើយត្រូវបានរចនាឡើង សម្រាប់ទប់ទល់នឹងការវាយប្រហារ ពីគ្រាប់បែករបស់សហរដ្ឋអាមេរិក ដែលអាចនឹងកើតឡើងជាយថាហេតុ។

ទីភ្នាក់ងារសារព័ត៌មានផ្លូវការ គ្រប់គ្រងដោយរដ្ឋអ៊ីរ៉ង់ IRNA បានចេញផ្សាយ ដោយរៀបរាប់ ថា មូលដ្ឋានកងទ័ពអាកាសក្រោមដីនេះ ជាមូលដ្ឋានកងទ័ពដ៏សំខាន់បំផុតមួយ សម្រាប់កងទ័ពអាកាសរបស់អ៊ីរ៉ង់ ដែលបានបំពាក់ ទៅដល់យន្ដហោះចម្បាំងជាច្រើនគ្រឿង ជាមួយនឹងមីស៊ីលគ្រូស បាញ់រយៈចម្ងាយឆ្ងាយ។ ចំណែកលក្ខណៈសម្បតិ្ដដ៏សំខានរបស់មូលដ្ឋានកងទ័ពអាកាសនេះ មានទីតាំងស្ថិតក្នុងតំបន់ភ្នំ ហើយវាចូលជ្រៅទៅក្នុងផែនដី។

ទោះជាយ៉ាងណា កងទ័ពអ៊ីរ៉ង់ មិនបានបង្ហាញ អំពីភូមិសាស្រ្ដ នៃមូលដ្ឋានកងទ័ពអាកាសក្រោមដីរបស់ខ្លួ តាំងនៅតំបន់ណានោះឡើយ។ ការបង្ហាញមូលដ្ឋានកងទ័ពអាកាសក្រោមដីរបស់អ៊ីរ៉ង់ បានកើតឡើង នៅមុនខួបទី៤៤ នៃបដិវត្ដន៍អ៊ិស្លាម ឆ្នាំ១៩៧៩ ហើយក៏ចំពេលមានភាពតានតឹងកាន់តែខ្លាំងឡើង ជាមួយសហរដ្ឋអាមេរិក និង អ៊ីស្រាអែល។

អ៊ីរ៉ង់ ជាសម្ពន្ធមិត្តដ៏ជិតស្និទ្ធបំផុតមួយរបស់រុស្ស៊ី ហើយប្រទេសមជ្ឈិមបូព៌ាមួយនេះ បានរងនូវការស្ដីបន្ទោស និង ទណ្ឌកម្មយ៉ាងធ្ងន់ធ្ងរ ពីបណ្ដាប្រទេសលោកខាងលិច ជុំវិញកម្មវិធីនុយក្លេអ៊ែររបស់ក្រុងតេអ៊ីរ៉ង់ និង ការផ្គត់ផ្គង់ដ្រូនអត្ដឃាត ជួយដល់ក្រុងមូស្គូ សម្រាប់ធ្វើសង្គ្រាម នៅក្នុងប្រទេសអ៊ុយក្រែន។ ជាថ្នូរនឹងការផ្គត់ផ្គង់ដ្រូនពីក្រុងតេអ៊ីរ៉ង់ នោះ រុស្ស៊ី បានសន្យាផ្ដល់យន្ដហោះចម្បាំងដ៏ទំនើបរបស់ខ្លួន មកដល់ប្រទេសអ៊ីរ៉ង់ វិញ។

ជាមួយគ្នានេះ អ៊ីរ៉ង់ ក៏នឹងត្រូវទទួលបានយន្ដហោះចម្បាំងដ៏ទំនើប ប្រភេទ Sukhoi Su-35 (ស៊ូខយ ស៊ូ-៣៥) មួយចំនួន ពីរុស្ស៊ី នៅខែមីនា។ នេះជាផ្នែកមួយ នៃការបញ្ជាទិញរបស់ក្រុងតេអ៊ីរ៉ង់ ដោយរាប់បញ្ចូល ទាំងការទិញប្រព័ន្ធការពារដែនអាកាស មីស៊ីល និង ឧទ្ធម្ភាគចក្ររាប់សិបគ្រឿងផងដែរ៕

ប្រទេសថៃ ៖ បន្ទាប់ពីចិនបានបើកប្រទេសដោយលុបចោលវិធានការឃុំខ្លួនពេលចូលប្រទេស ធ្វើឱ្យភ្ញៀវទេសចរចិនធ្វើដំណើរចូលប្រទេសថៃកើនឡើងយ៉ាងឆាប់រហ័ស ។ ដូច្នេះ អាជ្ញាធរទេសចរណ៍ថៃបានកែតម្រូវគោលដៅភ្ញៀវទេសចរចិន ដែលធ្វើដំណើរមកកាន់ប្រទេសថៃឆ្នាំ២០២៣នេះ ចាប់ពី៥លាននាក់ ទៅចន្លោះពី៧លាន ទៅ៨លាននាក់ ។

អាជ្ញាធរទេសចរណ៍ លោក យុទ្ធសាក់ ស៊ុបផាសន (Yuthasak Supasorn) ថ្លែងថា ចំនួនភ្ញៀវទេសចរចិនក្នុងប្រទេសថៃ នឹងអាស្រ័យលើការងើបឡើងវិញរបស់ជើងហោះហើរចិន-ថៃក្នុងការហោះហើររដូវក្តៅ និងការហោះហើររដូវត្រជាក់ ឆ្នាំ២០២៣ រួមទាំងថៃស្ថិតក្នុងចំណោមប្រទេស២០ដំបូង ដែលរដ្ឋាភិបាលចិនអនុញ្ញាតឱ្យពលរដ្ឋចិនមកកម្សាន្តតាមរយៈក្រុមហ៊ុនទេសចរណ៍ ។

បន្ទាប់ពីរដ្ឋាភិបាលចិនអនុញ្ញាតឱ្យក្រុមហ៊ុនទេសចរណ៍រៀបចំដំណើរកម្សាន្តទេសចរណ៍ជាក្រុមទៅបរទេស ក្រុមហ៊ុនអាកាសចរណ៍ផ្សេងៗបានបង្កើនជើងហោះហើរថៃ-ចិន សម្រាប់ការហោះហើររដូវក្តៅឆ្នាំ២០២៣ ។ អាជ្ញាធរទេសចរណ៍សង្ឃឹមថា ចិននឹងពិចារណាថា នៅពេលបើកឱ្យពលរដ្ឋខ្លួនទៅកម្សាន្តក្រៅប្រទេស នឹងឆ្លងជំងឺកូវីដឬអត់ ។ បើចិនអាចគ្រប់គ្រងកូវីដបាន គួរតែអនុញ្ញាតឱ្យក្រុមហ៊ុនទេសចរណ៍បង្កើនជើងហោះហើរកាន់តែច្រើន ព្រោះការអនុញ្ញាតហោះហើរត្រូវស្នើសុំពីប្រទេសចិន និងថៃ ខណៈចិនតម្រូវឱ្យពិនិត្យរកកូវីដតាម RT-PCR មុនត្រឡប់ចូលប្រទេសចិនវិញ ក្នុងរយៈពេល៤៨ម៉ោង ។

ភ្ញៀវទេសចរអន្តរជាតិធ្វើដំណើរមកកាន់ប្រទេសថៃក្នុងខែមករា ឆ្នាំ២០២៣ រួមមាន ៖
១-ម៉ាឡេស៊ី ២៥៧.៦៨៤នាក់
២-រុស្ស៊ី ២០២.៦៤២នាក់
៣-កូរ៉េខាងត្បូង ១៦៨.៦០៥នាក់
៤-ឥណ្ឌា ១០១.៣៤៣នាក់
៥-ចិន ៩១.០៨០នាក់

ភ្ញៀវទេសចរចិនស្ថិតក្នុងចំណាត់ថ្នាក់ទី៥ បន្ទាប់ពីរដ្ឋាភិបាលចិនសម្រេចចិត្តបើកប្រទេស និងលុបចោលវិធានការឃុំខ្លួនពេលចូលប្រទេស តាំងពីថ្ងៃទី៨ ខែមករា ឆ្នាំ២០២៣ ធ្វើឱ្យភ្ញៀវទេសចរចិនមានសេរីភាពធ្វើដំណើរចូលប្រទេសថៃកាន់តែច្រើន ។

ចំណែកភ្ញៀវទេសចរអន្តរជាតិចំនួន២លាននាក់ក្នុងខែមករា ឆ្នាំ២០២៣ ប្រហាក់ប្រហែលនឹងចំនួន៣លាននាក់/១ខែ នៅឆ្នាំ២០១៩ ។ វាឆ្លុះបញ្ចាំងឱ្យឃើញថា ភ្ញៀវទេសចរអន្តរជាតិ (លើកលែងចិន) បានធ្វើដំណើរមកកាន់ប្រទេសថៃកើនឡើងពី៨០%-៩០% ដូចធម្មតាវិញហើយ ។

អាជ្ញាធរទេសចរណ៍វាយតម្លៃថា បើភ្ញៀវទេសចរចិនធ្វើដំណើរមកកាន់ប្រទេសថៃចំនួន៧លាននាក់ ទៅ៨លាននាក់ក្នុងឆ្នាំនេះ នឹងធ្វើឱ្យចំនួនភ្ញៀវទេសចរអន្តរជាតិសរុបរបស់ថៃ កើនឡើងជិត៣០លាននាក់ ដូចកាលពីឆ្នាំ២០១៩ មុនជំងឺកូវីដរាតត្បាត ៕

ប្រភព ៖ todaybizview