ប្រទេសអង់គ្លេស ៖ សារព័ត៌មាន CNN រាយការណ៍ថា ប្រធានាធិបតីប្រទេសអ៊ុយក្រែន លោក Volodymy Zelensky បានធ្វើដំណើរទៅដល់ទីក្រុងឡុងដ៍ ប្រទេសអង់គ្លេសកាលពីថ្ងៃទី៨ ខែកុម្ភៈ ។ ប្រធានាធិបតីអ៊ុយក្រែនបានអំពាវនាវឱ្យប្រទេសលោកខាងលិចបញ្ជូនអាវុធបន្ថែមទៀតដើម្បីទប់ទល់ជាមួយកងទ័ពរុស្ស៊ី ។

មន្ត្រីអង់គ្លេសបង្ហាញថា លោក Zelensky បានជួបជាមួយនាយករដ្ឋមន្ត្រីអង់គ្លេស លោក Richie Sunak ហើយនឹងថ្លែងសុន្ទរកថានៅក្នុងសភា ។ ជាមួយគ្នានេះ សារព័ត៌មាន BBC រាយការណ៍ថា ព្រះរាជវាំង Buckingham បានជូនដំណឹងថា លោក Zelensky នឹងចូលគាល់ព្រះមហាក្សត្រអង់គ្លេស Charles ទី៣ ផងដែរ ។

កាលពីថ្ងៃទី៨ ខែកុម្ភៈ ប្រទេសអង់គ្លេសបានប្រកាសតាមសេចក្តីថ្លែងការណ៍ថា នឹងបញ្ជូនអាវុធឱ្យអ៊ុយក្រែនបន្ថែមទៀតដើម្បីទប់ទល់នឹងការវាយលុកពីកងទ័ពរុស្ស៊ី ។ នាយករដ្ឋមន្ត្រីអង់គ្លេស លោក Sunak ថ្លែងថា អង់គ្លេសនឹងបណ្តុះបណ្តាលអ្នកបើកយន្តហោះ និងកងម៉ារីនអ៊ុយក្រែន ព្រមទាំងបញ្ជាក់ថា ពាក្យសន្យារបស់អង់គ្លេសជាមួយអ៊ុយក្រែន គឺជាពាក្យសន្យារយៈពេលវែង ។ លើសពីនេះ អង់គ្លេសនឹងស្វែងរកកាំជ្រួចបាញ់បានឆ្ងាយជាងមុនឱ្យអ៊ុយក្រែន ប៉ុន្តែអង់គ្លេសមិនបាននិយាយលម្អិតទាក់ទងនឹងការបញ្ជូនយន្តហោះចម្បាំងតាមការស្នើសុំរបស់អ៊ុយក្រែនទេ ។

ការធ្វើទស្សនកិច្ចមកកាន់អង់គ្លេសរបស់លោក Zelensky លើកនេះចាត់ទុកថា ជាការធ្វើដំណើរចេញក្រៅប្រទេសលើកទី២ តាំងពីរុស្ស៊ីវាយលុកអ៊ុយក្រែនកាលពីថ្ងៃទី២៤ ខែកុម្ភៈ ឆ្នាំ២០២២ ។ កាលពីខែធ្នូ ឆ្នាំ២០២២ លោក Zelensky បានធ្វើដំណើរទៅកាន់អាមេរិក ដើម្បីសុំជំនួយផ្នែកកងទ័ពពីប្រទេសលោកខាងលិច ដោយអ៊ុយក្រែននិយាយថា រុស្ស៊ីកំពុងតែត្រៀមខ្លួនវាយលុកអ៊ុយក្រែនក្នុងរដូវនិទាឃរដូវខាងមុខ ។

សេចក្តីថ្លែងការណ៍បញ្ជាក់ដែរថា អង់គ្លេសនឹងដាក់ទណ្ឌកម្មរុស្ស៊ីបន្ថែមទៀត ដើម្បីឆ្លើយតបនឹងរុស្ស៊ីបានទម្លាក់គ្រាប់បែកជាបន្តបន្ទាប់មកលើអ៊ុយក្រែន រួមទាំងកំណត់គោលដៅបុគ្គលដែលជួយលោក ពូទីន ក៏ដូចជាក្រុមហ៊ុននានាទទួលប្រយោជន៍ពីសង្គ្រាម ។

គួរបញ្ជាក់ថា អង់គ្លេសជាប្រទេសដំបូងបានប្រកាសកាលពីពាក់កណ្តាលខែមករាថា នឹងបញ្ជូនរថក្រោះ Challenger 2 ឱ្យអ៊ុយក្រែន បន្ទាប់ពីនេះមានប្រទេសអាល្លឺម៉ង់ និងអាមេរិកប្រកាសថា នឹងបញ្ជូនរថក្រោះ Leopard 2 និង M1 Abrams ឱ្យអ៊ុយក្រែនដែរ ក្រោយពីរងការដាក់សម្ពាធពីប្រទេសនានាឱ្យបញ្ជូនរថក្រោះជួយអ៊ុយក្រែន ៕

ប្រភព ៖ TNN World

សហរដ្ឋអាមេរិក ៖ អាមេរិកបានផ្សព្វផ្សាយពីរូបភាពការប្រមូលវត្ថុដែលសង្ស័យថាជាបាឡុងចារកម្មរបស់ចិន ដែលអាមេរិកបានបាញ់ធ្លាក់កាលពីថ្ងៃទី៤ ខែកុម្ភៈ កន្លងមក ត្រៀមបញ្ជូនទៅឱ្យអ្នកជំនាញពិនិត្យយ៉ាងលម្អិតបន្តទៀត ។

កងម៉ារីន និងកងទ័ពជើងទឹកអាមេរិកបានបង្ហាញរូបភាពភារកិច្ចរបស់ខ្លួនជាមួយអាជ្ញាធរឆ្នេរសមុទ្រក្នុងការប្រមូលកម្ទេចបាឡុង ដែលយន្តហោះចម្បាំង F-22 របស់អាមេរិកបានបាញ់បំផ្លាញតាមបញ្ជារបស់លោកប្រធានាធិបតី ចូ បៃដេន ខណៈវាហោះនៅលើផ្ទៃសមុទ្រនៅរដ្ឋ Carolina ។ កងទ័ពអាមេរិកបានប្រមូលកម្ទេចបាឡុងយ៉ាងប្រុងប្រយ័ត្នចេញពីផ្ទៃទឹក ដូចជា ក្រណាត់ពណ៌ស គ្រោងឆ្អឹងបាឡុងមានកម្ពស់៦០ម៉ែត្រ និងឧបករណ៍ចាប់សញ្ញានៅផ្នែកខាងក្រោម ។

ក្រៅពីនេះ កងម៉ារីនអាមេរិកបានត្រៀមស្វែងរកកម្ទេចបាឡុងនៅសល់ក្រោមទឹកទាំងអស់ ដើម្បីឱ្យអ្នកវិភាគអាចសិក្សាច្បាស់លាស់ថា ឧបករណ៍ចាប់សញ្ញាប្រភេទអ្វីដែលចិនបំពាក់លើបាឡុងនេះ ហើយបាឡុងអាចផ្លាស់ទីបានដូចម្តេច ។ ក្រុមវិស្វករនៃការិយាល័យស៊ើបអង្កេតកណ្តាលនៃក្រុង Quantico រដ្ឋ Virginia បានពិនិត្យកម្ទេចបាឡុងទាំងអស់ដើម្បីឱ្យដឹងថា វាអាចប្រមូលបានទិន្នន័យអ្វីខ្លះ ហើយរកវិធីតាមដានបាឡុងចារកម្មនាថ្ងៃអនាគត ។

អនុរដ្ឋមន្ត្រីការបរទេសអាមេរិក លោកស្រី Wendy Sherman បានថ្លែងទៅកាន់មន្ត្រីស្ថានទូតចំនួន១៥០នាក់មកពី៤០ប្រទេសថា វាជាបាឡុងចារកម្មកាន់កាប់ដោយកងទ័ពចិន ហើយអាមេរិកនឹងផ្សព្វផ្សាយព័ត៌មាននេះទៅកាន់ពិភពលោក ព្រោះប្រទេសទាំងអស់អាចប្រឈមនឹងការគំរាមកំហែងដូចគ្នា ។

មុននេះ ក្រសួងការបរទេសចិនបញ្ជាក់ថា បាឡុងហោះមកកាន់ដែនអាកាសរបស់អាមេរិកនេះគ្មានចេតនាទេ វាជាបាឡុងប្រមូលទិន្នន័យឧតុនិយមរបស់ជនស៊ីវិលប៉ុណ្ណោះ ។ ចិនទទួលស្គាល់ថា បាឡុងទី២ ដែលគេប្រទះឃើញនៅដែនអាកាសនៃតំបន់អាមេរិកឡាទីនកាលពីសប្តាហ៍មុន ក៏ជារបស់ចិនដែរ ៕

ប្រភព ៖ TNN World

ចាប់ពីដើមឆ្នាំ២០២៣នេះ ផលិតកម្មរបស់ក្រុមហ៊ុនក្នុងបណ្តាប្រទេសអាស៊ានបានងើបឡើងវិញ ។ អាស៊ានមានសុទិដ្ឋិនិយមថា ការបើកប្រទេសឡើងវិញរបស់ចិន នឹងជួយប៉ះប៉ូវផ្នែកសេដ្ឋកិច្ចពិភពលោកដែលបានធ្លាក់ចុះកន្លងមក ។

តាមទិន្នន័យរបស់ S&P Global Manufacturing Purchasing Managers’ Indexes (PMIs) បង្ហាញថា រោងចក្រផ្សេងៗនៅក្នុងភូមិភាគអាស៊ីអាគ្នេយ៍បានបន្ថែមការផលិត និងការទិញនៅខែមករាកន្លងមក បន្ទាប់ពីការបញ្ជាទិញថ្មីបានកើនឡើងខ្លាំង ។ ដូច្នេះ វាបង្ហាញឱ្យឃើញថា តម្លៃកំពុងតែធ្លាក់ចុះ, ការឈប់ដំណើរការនៃខ្សែសង្វាក់ផ្គត់ផ្គង់កាន់តែធូរស្រាល ហើយវាបានបង្កើនទំនុកចិត្តដល់ក្រុមហ៊ុនអាជីវកម្មផងដែរ ក្នុងផ្នែកផលិតកម្មរោងចក្រក្នុងរយៈពេល១ឆ្នាំខាងមុខ ។

គេសង្កេតឃើញថា សន្ទស្សន៍ PMI ក្នុងខែមករារបស់ប្រទេសថៃ ខ្ពស់ជាងគេក្នុងភូមិភាគ គឺស្មើ៥៤,៥ កើនឡើងពី៥២,៥ កាលពីខែធ្នូ ឆ្នាំ២០២២ ។ ចំណែកសន្ទស្សន៍ PMI របស់ប្រទេសហ្វីលីពីន និងឥណ្ឌូណេស៊ី នៅតែស្ថិតក្នុងកម្រិតខ្ពស់លើសពី៥០ ហេតុនេះ ឧស្សាហកម្មនានាមាននិន្នាការកើនឡើង ។

ចំណែកប្រទេសផ្សេងៗនៅភូមិភាគអាស៊ីអាគ្នេយ៍ស្ថិតក្នុងកម្រិតក្រោមនេះកាលពីខែមករា ប៉ុន្តែមានផលិតកម្មល្អប្រសើរ លើកលែងតែម៉ាឡេស៊ី ជាប្រទេសតែមួយក្នុងភូមិភាគ ដែលមានផលិតកម្មកាន់តែធ្លាក់ចុះ ដោយសារសន្ទស្សន៍ PMI ធ្លាក់ចុះមកនៅត្រឹម៤៦,៥ ទាបបំផុតក្នុងរយៈពេល១៧ខែ៕

ប្រភព ៖ AEC Connect

ប្រទេសថៃ ៖ កាលពីថ្ងៃទី៧ ខែកុម្ភៈ កន្លងមក លោក វឌ្ឍនៈស័ក សឿអៀម (Wattanasak Sueaiam) មកពីអគ្គនាយកដ្ឋានពាណិជ្ជកម្មផ្ទៃក្នុង បង្ហាញថា ប្រទេសថៃនឹងឈានចូលដល់រដូវប្រមូលផលដំណាំ ក្នុងនោះទិន្នផលខ្ទឹមបារាំង ខ្ទឹមក្រហម និងខ្ទឹមស បានកើនឡើង១០% ហើយគេអាចប្រមូលទិន្នផលច្រើនក្នុងអំឡុងខែមករា ដល់ខែមីនា ។

អគ្គនាយកដ្ឋានពាណិជ្ជកម្មផ្ទៃក្នុងបានចាត់ភ្នាក់ងារកណ្តាលមកជួយប្រមូលទិញទិន្នផលដំណាំពីកសិករ ។ នៅឆ្នាំ២០២៣នេះ ខាងអគ្គនាយកដ្ឋានបានដាក់គោលដៅដាំដុះខ្ទឹមស្មើ២២.៨០០តោន កើនលើសឆ្នាំមុន១ម៉ឺនតោន ស្មើប្រមាណ១៥០% ។ អគ្គនាយកដ្ឋានបាននាំភ្នាក់ងារកណ្តាលជាច្រើនក្រុមមកជួយទិញទិន្នផលរបស់កសិករ រួមមាន ហាងលក់រាយ ស្ថានីយប្រេងឥន្ធនៈ និងទីផ្សារកណ្តាល ។

លោក វឌ្ឍនៈស័ក បន្តថា ឆ្នាំ២០២៣នេះ ពិសេសជាងឆ្នាំកន្លងមក ព្រោះមានការទទួលទិញខ្ទឹមស និងខ្ទឹមក្រហមយកមកកែច្នៃជាខ្ទឹមក្រហមបំពង និងខ្ទឹមសបំពង លក់បន្តទៅឱ្យហាងថុងហ្វា (Blue Flag) ទូទាំងប្រទេស ដើម្បីកាត់បន្ថយបន្ទុកចំណាយ និងជួយចែកចាយទិន្នផលរបស់បងប្អូនកសិករផងដែរ ។

លោក វឌ្ឍនៈស័ក ថ្លែងថា ៖ «នាយកដ្ឋានពាណិជ្ជកម្មផ្ទៃក្នុងបានបង្កើតក្រុមត្រួតពិនិត្យពិសេសសហការជាមួយភ្នាក់ងាររដ្ឋាភិបាលពិនិត្យទិន្នផល ដើម្បីការពារការលួចនាំចូលខ្ទឹមបារាំង ខ្ទឹមក្រហម និងខ្ទឹមស និងការពារកុំឱ្យប៉ះពាល់ដល់តម្លៃរបស់កសិករថៃ ។ យើងបានបង្កើតប៉ុស្តិ៍ស្ទាក់ចាប់ និងល្បាតតាមទិសដៅផ្សេងៗដែលគិតថា មានការលួចនាំចូល ឬដឹកជញ្ជូន ។ កាលពីឆ្នាំ២០២២ យើងបានស្ទាក់ចាប់មនុស្ស១៥នាក់ដែលបានលួចនាំចូលខ្ទឹមចំនួន៣៨៣.០០០តោន ស្មើទឹកប្រាក់៦លានបាត» ៕

ប្រភព ៖ khaosod

ប្រទេសឡាវ ៖ ការនាំចេញប្រេងឥន្ធនៈរបស់វៀតណាមទៅកាន់ប្រទេសឡាវ បានកើនឡើងដល់៤៣៩% ក្នុងទឹកប្រាក់១២៥,៤លានដុល្លារអាមេរិកកាលពីឆ្នាំ២០២២ កន្លងមក ។

ប្រទេសឡាវបានពឹងផ្អែកការនាំចូលប្រេងឥន្ធនៈពីប្រទេសថៃភាគច្រើន ប៉ុន្តែកាលពីខែឧសភា ឆ្នាំ២០២២ ក្រុមហ៊ុនប្រេងឥន្ធនៈ និងឧស្ម័នដ៏ធំរបស់ថៃ គឺក្រុមហ៊ុន PTT ដែលមានស្ថានីយប្រេងឥន្ធនៈ៥៣កន្លែងនៅប្រទេសឡាវ និយាយថា ក្រុមហ៊ុននឹងផ្គត់ផ្គង់ប្រេងឥន្ធនៈជាធម្មតា ប៉ុន្តែអាចមិនគ្រប់គ្រាន់ ។

សារព័ត៌មានក្នុងប្រទេសឡាវរាយការណ៍ថា ប្រាក់គីបឡាវធ្លាក់ថ្លៃ អត្រាអតិផរណាខ្ពស់ និងទីផ្សារប្រេងក្នុងពិភពលោកមិនច្បាស់លាស់ ធ្វើឱ្យអ្នកនាំចូលប្រេងឥន្ធនៈកាន់តែលំបាកក្នុងការបំពេញតម្រូវការរបស់អតិថិជន ។

ទោះយ៉ាងណា ការនាំចេញសរុបពីវៀតណាមទៅកាន់ឡាវ បានកើនឡើង១០,៤% ស្មើទឹកប្រាក់៦៥៦,៤លានដុល្លារអាមេរិក ខណៈផលិតផលនាំចេញផ្សេងៗ រួមទាំងដែកបានធ្លាក់ចុះ១៥% ស្មើទឹកប្រាក់៦០,១លានដុល្លារអាមេរិក ប៉ុន្តែការនាំចេញជីកសិកម្មកើនឡើង៣១% ស្មើទឹកប្រាក់៣២,៥លានដុល្លារអាមេរិក ។

ចំណែកការនាំចូលផលិតផលពីឡាវមកកាន់វៀតណាមវិញបានកើនឡើង៣៤,៦% ក្នុងនោះមានផលិតផលសំខាន់ដូចជា ឈើនិងផលិតផលពីឈើ ជីកសិកម្ម និងជ័រកៅស៊ូ ។ ផលិតផលភាគច្រើនដែលបានលក់ដូររវាងប្រទេសទាំងពីរ គឺមិនចាំបាច់បង់ពន្ធ ពីព្រោះស្ថិតក្រោមកិច្ចព្រមព្រៀងពាណិជ្ជកម្មទំនិញអាស៊ាន, កិច្ចព្រមព្រៀងពាណិជ្ជកម្មទ្វេភាគីរវាងវៀតណាម និងឡាវ និងកិច្ចព្រមព្រៀងពាណិជ្ជកម្មព្រំដែនវៀតណាម-ឡាវ ។

ក្នុងរយៈពេល៣ឆ្នាំកន្លងមក ឡាវបានក្លាយជាប្រទេសគោលដៅទាក់ទាញការវិនិយោគផ្នែកកសិកម្មគុណភាពខ្ពស់របស់អាជីវកម្មផ្សេងៗនៅវៀតណាម ៕

ប្រភព ៖ AEC Connect