ប្រទេសថៃ ៖ បច្ចុប្បន្ននេះ អ្នកលេងបណ្តាញសង្គមកម្ពុជា និងថៃ បានជជែកវែកញែកគ្នាឆ្លងប្រទេសជាច្រើនប្រធានបទ មិនថារឿងកីឡា កីឡាករថៃ ប៊ួ ខាវ សង្ក្រាន្ត និងរឿងផ្សេងៗទៀត ។ ការជជែកគ្នានេះ មិនចេះចប់ពីប្រធានបទមួយចូលដល់ប្រធានបទមួយទៀត ។

ដោយឡែក មានប្រធានបទថ្មីមួយទៀតហើយដែលកំពុងមានការជជែកគ្នាក្នុងបណ្តាញសង្គមក្នុងប្រទេសថៃ ក្រោយពីម្ចាស់ហាងមូកៈថៈនៅកម្ពុជា បានប្តូរឈ្មោះហាងរបស់ខ្លួនពី «មូកៈថៈថៃ» ទៅជា «បារប៊ីឃ្យូ ភ្នំភ្លើង» ។ មូលហេតុនៃការប្តូរឈ្មោះនេះ ដោយសារក្នុងហាងមិនបានលក់សាច់ជ្រូកតែមួយមុខទេ ហើយហាងអះអាងថា ការប្តូរឈ្មោះនេះធ្វើឱ្យមានអតិថិជនចូលហាងកាន់តែច្រើនជាងមុន ។

ចំណែកអ្នកលេងបណ្តាញសង្គមនៅកម្ពុជា ក៏បានយល់ស្របនឹងការប្តូរឈ្មោះហាងនេះដែរ ប៉ុន្តែផ្ទុយទៅវិញ អ្នកលេងបណ្តាញសង្គមនៅថៃបែរជាមិនពេញចិត្ត ហើយនិយាយថា ការធ្វើបែបនេះ ត្រូវប្តូរការលក់របស់ខ្លួនល្អជាង ព្រោះបានកាត់ពាក្យ «ថៃ» ចេញ ខណៈហាងនេះនៅតែលក់របស់ដូចដើម ។ ប៉ុន្តែជនជាតិថៃមួយចំនួនទៀតយល់ឃើញថា ការប្តូរឈ្មោះហាងមិនប្លែកអ្វីទេ ព្រោះការពិត ដើមកំណើតមូកៈថៈ ក៏មិនមែនជារបស់ប្រទេសថៃដែរ ប៉ុន្តែសុំកុំឱ្យខ្មែរយកវាទៅធ្វើជាកម្មសិទ្ធិរបស់ខ្លួនទៀត ។

ជុំវិញការជជែកគ្នានៅក្នុងបណ្តាញសង្គមថៃនេះ ដោយយោងតាមវែបសាយថៃមួយឈ្មោះ Travel360 មានមតិមួយចំនួននិយាយថា ខ្មែរបានផ្លាស់ប្តូររបស់ថៃធ្វើជារបស់ខ្លួន ដូចជា ឈុតថៃ រឿងថៃ ភ្លេងថៃ ម្ហូបអាហារថៃ កីឡាថៃ និងវប្បធម៌ថៃ ហើយមានមតិមួយទៀតនិយាយថា ការពិត ប្រទេសថៃ និងកម្ពុជា គឺជាសត្រូវនឹងគ្នាជាយូរមកហើយ ព្រមទាំងបានធ្វើសង្គ្រាមជាមួយគ្នារហូតមក ។ ដូចគ្នានេះដែរ មតិផ្សេងទៀតសរសេរថា នៅក្នុងចិត្តជនជាតិខ្មែរមានតែការច្រណែនប្រទេសថៃ ខណៈអ្នកខ្លះសរសេរថា គ្រាន់តែខ្ទះអាំងសាច់ ក៏ខ្មែរទិញពីថៃទៅប្រើប្រាស់ដែរ ពិតជាអន់មែន ។ ចំណែកមតិបន្ទាប់ថា ថៃប្រញាប់ចុះបញ្ជីមូកៈថៈទៅ ប្រយ័ត្នខ្មែរយកធ្វើជាកម្មសិទ្ធិរបស់ខ្លួន ។

នៅក្នុងការបញ្ចេញមតិនេះដែរ ជនជាតិថៃមួយចំនួននិយាយថា គ្រាន់តែប្តូរឈ្មោះ ឱ្យប្តូរចុះ ព្រោះខ្មែរបានទទួលវប្បធម៌ដោយសារមើលរឿងភាគថៃ ស្របគ្នានឹងមតិមួយទៀតនិយាយថា លើកលែងទៅ អ្នកណាៗក៏មានសិទ្ធិដាក់ឈ្មោះហាងដែរ គេដាក់ឈ្មោះអ្វី ស្រេចតែគេទៅ… ។ ទោះយ៉ាងណា នេះគ្រាន់តែជាមតិលើកឡើងរបស់ជនជាតិថៃនៅក្នុងវែបសាយឈ្មោះ Travel360 ប៉ុណ្ណោះ ៕

ប្រភព ៖ travel360

ប្រទេសចិន ៖ ភ្នាក់ងារលើកកម្ពស់ហេដ្ឋារចនាសម្ព័ន្ធផ្នែកសាករថយន្តអគ្គិសនីប្រទេសចិនបានរាយការណ៍ថា ចំនួនបង្គោលសាកថ្មីសាធារណៈសម្រាប់រថយន្តអគ្គិសនីនៅចិន បានកើនឡើងជាបន្តបន្ទាប់ក្នុងខែមករា ឆ្នាំ២០២៣ កន្លងមក ។

របាយការណ៍បញ្ជាក់ថា ការដាក់បង្គោលសាករថយន្តអគ្គិសនីថ្មីៗជាសាធារណៈនៅចិនកាលពីខែមករា ស្មើប្រមាណ៤ម៉ឺន១ពាន់បង្គោល កើនឡើង៥៦,១% ពីខែមករា ឆ្នាំ២០២២ ។

ភ្នាក់ងារលើកកម្ពស់ហេដ្ឋារចនាសម្ព័ន្ធសាករថយន្តអគ្គិសនីឱ្យដឹងថា ចំនួនការដាក់បង្គោលសាកថ្មីៗជាសាធារណៈ គឺចាប់ពីកុម្ភៈ ឆ្នាំ២០២២ រហូតដល់ខែមករា ឆ្នាំ២០២៣នេះ ជាមធ្យមក្នុង១ខែ ស្មើ៥ម៉ឺន៥ពាន់បង្គោល ។ ការដាក់បង្គោលសាករថយន្តអគ្គិសនីបានរីកចម្រើនយ៉ាងឆាប់រហ័ស និងបង្កលក្ខណៈងាយស្រួលដល់ពលរដ្ឋ ស្របនឹងវិស័យអាជីវកម្មរថយន្តថាមពលថ្មីកំពុងរីកចម្រើននៅចិន ។

គួរបញ្ជាក់ថា ចំនួនការលក់រថយន្តថាមពលថ្មីរបស់ចិននៅឆ្នាំ២០២២ ស្មើប្រមាណ៦,៨៩លានគ្រឿង កើនឡើង៩៣,៤% បើធៀបពីមួយឆ្នាំទៅមួយឆ្នាំ ក្នុងនោះរថយន្តថាមពលថ្មីកាន់កាប់ក្នុងទីផ្សារចិនប្រហែល២៥,៦% នៅឆ្នាំ២០២២ កើនឡើង១២,១% ពីឆ្នាំ២០២១ ៕

ប្រភព ៖ newpapertoday

លោក Bernard Arnault បានក្លាយជាអ្នកមានទ្រព្យច្រើនជាងគេបំផុតនៅលើលោក ដោយឈរពីលើលោក Elon Musk។

មនុស្សភាគច្រើនមិនសូវចាប់អារម្មណ៍លើបុរសវ័យ៧៣ឆ្នាំនេះនោះទេ  ក៏ប៉ុន្តែលោកគឺជាអ្នកនៅពីក្រោយភាពជោគជ័យនៃម៉ាកយីហោល្បីៗជាច្រើននៅលើពិភពលោក។

អមជាមួយទ្រព្យសម្បត្តិដ៏មហាសាល ២២០ពាន់លានដុល្លារ លោកគឺជាស្ថាបនិក និងប្រធានក្រុមហ៊ុន LVHM ដែលមានយីហោ Louis Vuitton (LV), Celine ,Christian Dior, Fendi, Kenzo, Givenchy និងយីហោល្បីៗមួយចំនួនទៀតផងដែរ។

នៅក្នុងចំណោមម៉ាកយីហោទាំងអស់នេះ Louis Vuitton (LV) គឺជាប្រភពចំណូលធំជាងគេបំផុត ដោយឆ្នាំមុនអាចរកចំណូលបានដល់ទៅ២១ពាន់លានដុល្លារ។

មិនតែប៉ុណ្ណោះ បច្ចុប្បន្ននេះ LVHM ក៏ជាក្រុមហ៊ុនដែលថ្លៃជាងគេបំផុតនៅអឺរ៉ុបផងដែរ៕

ប្រទេសចិន ៖ សារព័ត៌មានស៊ីនហួររាយការណ៍ថា PwC China រំពឹងថា ទីផ្សារទំនិញប្រណីតរបស់ចិននឹងលូតលាស់ដល់៨,១៦សែនលានយន់នៅត្រឹមឆ្នាំ២០២៥ ឬស្មើ២៥% នៃការទិញទំនិញប្រណីតទូទាំងពិភពលោក ។

របាយការណ៍វិភាគបញ្ជាក់ថា ឧស្សាហកម្មទំនិញប្រណីតក្នុងប្រទេសចិនដែលមានផ្ទៃដីធំ និងហុងកុង ក៏ដូចជាតំបន់អាស៊ីប៉ាស៊ីហ្វិក បានជំរុញទីផ្សារទំនិញប្រណីតឱ្យលូតលាស់ ជាពិសេស ប្រទេសចិនមានពលរដ្ឋទិញទំនិញប្រណីតកើនឡើងជាបន្តបន្ទាប់ ។

តាមទិន្នន័យឆ្នាំ២០២១ បង្ហាញថា ការទិញទំនិញរួចពន្ធនៅខេត្តហៃណាន មានចំណែកជំរុញទីផ្សារទំនិញប្រណីតដែលកំពុងរីកចម្រើនរបស់ចិន ។ ការទិញទំនិញរួចពន្ធនេះ ស្មើទឹកប្រាក់៤,៩៥ម៉ឺនលានយន់ ឬប្រមាណ១៣% នៃការទិញទំនិញប្រណីតរបស់ជនជាតិចិន ។ ក្រៅពីនេះ របាយការណ៍បញ្ជាក់ថា ការប្រើប្រាស់ទំនិញប្រណីតនៅហុងកុងនឹងកើនឡើងបន្តិចម្តងៗ បន្ទាប់ពីចិនបើកប្រទេសឡើងវិញ ដែលធ្វើឱ្យពលរដ្ឋចិនជាច្រើននាក់ធ្វើដំណើរមកកម្សាន្តនៅហុងកុង និងម៉ាកាវ ។

លោក Stephen Chong ប្រធានដៃគូយុទ្ធសាស្រ្តអាជីវកម្មប្រកបដោយនិរន្តរភាព PWC ថ្លែងថា ទីផ្សារទំនិញប្រណីតរបស់ចិនកំពុងងើបឡើងវិញយ៉ាងឆាប់រហ័ស បន្ទាប់ពីការរាតត្បាតនៃជំងឺកូវីដ-១៩ ហើយទីផ្សារនេះរឹងមាំលើសដើមទៅទៀត ។

ទោះយ៉ាងណា ក្រៅពីទីផ្សារចិន កាលពីពាក់កណ្តាលខែមករាកន្លងមក តាមការស្ទង់មតិរបស់ Morgan & Stanley ជាក្រុមហ៊ុនប្រឹក្សាហិរញ្ញវត្ថុ និងការវិនិយោគបញ្ជាក់ថា កូរ៉េខាងត្បូងជាប្រទេសមានអ្នកទិញទំនិញប្រណីតច្រើនជាងគេក្នុងពិភពលោក និងលើសចិនទៅទៀត ហើយការទិញទំនិញប្រណីតនៅកូរ៉េខាងត្បូងនឹងកើនឡើងជាបន្តបន្ទាប់ ។ Morgan & Stanley បង្ហាញថា នៅឆ្នាំ២០២២ ពលរដ្ឋកូរ៉េខាងត្បូងបានចំណាយលើការទំនិញប្រណីតស្មើទឹកប្រាក់១៦.៨០០លានដុល្លារអាមេរិក កើនលើសឆ្នាំ២០២១ ដល់២៤% ក្នុងនោះពលរដ្ឋកូរ៉េខាងត្បូងម្នាក់បានចំណាយប្រាក់៣២៥ដុល្លារអាមេរិក/១ឆ្នាំ លើការទិញទំនិញទាំងនេះ ។

គួរបញ្ជាក់ថា ការទិញទំនិញរបស់ពលរដ្ឋកូរ៉េខាងត្បូងបណ្តាលមកពីកត្តាជាច្រើនដូចជា យកគំរូតាមសិល្បករល្បីៗដែលនិយមប្រើប្រាស់ទំនិញប្រណីត ហើយកាលពីឆ្នាំ២០២២ ចិនមិនទាន់បើកប្រទេស ដូច្នេះ ធ្វើឱ្យការចំណាយលើទំនិញប្រណីតរបស់ពលរដ្ឋចិនមិនច្រើនដូចកូរ៉េខាងត្បូង ៕

ប្រភព ៖ thebetter

យន្តហោះ AG600 Kunlong គឺជាយន្តហោះដែលមានលទ្ធភាពបើកលើទឹកបាន ធំជាងគេបំផុតនៅលើពិភពលោក ដែលត្រូវបានប្រទេសចិនដាក់ឱ្យប្រើប្រាស់កាលពីឆ្នាំ២០១៧។

យន្តហោះនេះ មានសមត្ថភាពផ្ទុកមនុស្ស​បាន ៥០​នាក់ និង​អាច​ហោះ​លើ​លំហ​អាកាស​ និងលើទឹកបាន​រយៈ​ពេល ១២​ម៉ោង។ ដើម្បី​ផលិត​បាន​យន្ត​ហោះ​នេះ ក្រុមហ៊ុន​ឧស្សាហកម្ម​អាកាសចរណ៍​ដែល​ជា​ក្រុម​ហ៊ុន​រដ្ឋ​របស់​ចិន ចំណាយ​ពេល​ជិត ៥ឆ្នាំ​។

គ្រាដែលបង្កើតដំបូងយន្តហោះនេះ គ្រាន់តែប្រើ​ប្រាស់​ដើម្បី​​ពន្លត់​អគ្គិភ័យ ក៏​ដូច​ជា​ប្រតិបត្តិការ​ជួយ​សង្គ្រោះ​នៅ​តាម​សមុទ្រតែប៉ុណ្ណោះ ក៏ប៉ុន្តែមកទល់បច្ចុប្បន្នវាត្រូវបានចិនយកទៅប្រើប្រាស់ក្នុងវិស័យយោធា។

អ្វី​ដែល​គួរ​ឱ្យ​ចាប់​អារម្មណ៍​នោះ គឺ​យន្ត​ហោះ​ AG600 ចាប់​ផ្ដើម​ការ​ហោះ​ហើរ​លើក​ដំបូង​ខ្លួន​ចេញ​ពី​ព្រលាន​យន្ត​ហោះ Zhuhai ដែល​មាន​ទីតាំង​នៅ​ភាគ​ខាង​ត្បូង​ខេត្ត Guangdong។

ខេត្ត​នេះ​ស្ថិត​នៅ​កៀក​តំបន់​សមុទ្រ​ចិន​ខាង​ត្បូង ដែល​ជា​តំបន់​កំពុង​មាន​ជម្លោះ​ដែន​ទឹក​រវាង​ចិន និង​ប្រទេស​អាស៊ាន​ចំនួន ៤ ដូច​ជា វៀតណាម ម៉ាឡេស៊ី ហ្វីលីពីន និង​ប្រ៊ុយណេ៕

ប្រទេសរូម៉ានី ៖ ក្រសួងការពារជាតិប្រទេសរូម៉ានីបញ្ជាក់ថា កាំជ្រួចរបស់រុស្ស៊ីដែលបានបាញ់ចេញពីនាវាចម្បាំងនៅសមុទ្រខ្មៅ មិនបានបំពានដែនអាកាសរបស់ខ្លួនទេ ។ រូម៉ានីសូមបដិសេធការចោទប្រកាន់របស់អ៊ុយក្រែនថា កាំជ្រួចនេះបានបំពានដែនអាកាសរូម៉ានី មុននឹងហោះទៅកាន់ប្រទេសគោលដៅអ៊ុយក្រែន ។

ក្រសួងការពារជាតិចេញសេចក្តីថ្លែងការណ៍ថា កងទ័ពបានរកឃើញវត្ថុវាយប្រហារតាមអាកាស ខណៈនាវាចម្បាំងមួយរបស់រុស្ស៊ីដែលប្រចាំការនៅសមុទ្រខ្មៅ បានបាញ់ទៅកាន់ប្រទេសគោលដៅអ៊ុយក្រែន កាលពីថ្ងៃ១០ ខែកុម្ភៈ កន្លងមក ប៉ុន្តែវាមិនបានបំពានលើដែនអាកាសរូម៉ានីឡើយ ។

ទីតាំងនៅជិតដែនអាកាសរូម៉ានីបំផុត ដែលប្រព័ន្ធរ៉ាដារបស់កងទ័ពចាប់បាន គឺមានចម្ងាយប្រមាណ៣៥គីឡូម៉ែត្រពីព្រំដែនភាគឦសានប្រទេស ។ ទោះយ៉ាងណា យន្តហោះចម្បាំងប្រភេទ MiG-21 ចំនួន២គ្រឿងរបស់កងទ័ពរូម៉ានី បានហោះទៅកាន់តំបន់នោះដើម្បីត្រួតពិនិត្យមើលសន្តិសុខ ។

ការប្រកាសបដិសេធរបស់នាយកដ្ឋានសន្តិសុខរូម៉ានី គឺបន្ទាប់ពីកងទ័ពអ៊ុយក្រែនរាយការណ៍ថា នាវាចម្បាំងរបស់រុស្ស៊ីបានបាញ់កាំជ្រួច Excalibur 2 ចំនួន២គ្រាប់ចេញពីសមុទ្រខ្មៅ ឆ្លងកាត់ដែនអាកាសរូម៉ានី មុននឹងវាមកដល់អ៊ុយក្រែន ។

រដ្ឋាភិបាលអ៊ុយក្រែនអះអាងថា វាជាលើកដំបូងហើយដែលកាំជ្រួចរុស្ស៊ីបំពានដែនអាកាសរូម៉ានី ចាប់តាំងពីរុស្ស៊ីបើកប្រតិបត្តិការកងទ័ពក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ ហើយរដ្ឋាភិបាលអ៊ុយក្រែនអះអាងថា រូម៉ានីជាប្រទេសមួយក្នុងចំណោមសមាជិករបស់អង្គការសន្ធិសញ្ញាអាត្លង់ទិកខាងជើង (NATO) ។

ទោះយ៉ាងណា រដ្ឋាភិបាលរូម៉ានីបញ្ជាក់ថា កាំជ្រួចរបស់រុស្ស៊ីបានហោះកាត់ដែនអាកាសរូម៉ានីពិតមែន ហើយរដ្ឋាភិបាលរូម៉ានីបានអញ្ជើញអគ្គរាជទូតរុស្ស៊ីចូលជួបដើម្បីបកស្រាយជាផ្លូវការហើយ ។ គួរបញ្ជាក់ថា រូម៉ានី គឺជាប្រទេសមួយស្ថិតនៅតំបន់អឺរ៉ុបភាគអាគ្នេយ៍ ដែលព័ទ្ធជុំវិញទៅដោយភ្នំ Carpathian និងមានព្រំដែនជាប់ជាមួយអ៊ុយក្រែន ៕

ប្រភព ៖ TNN World