ស្បែកមុខអាចជាផ្នែកដែលត្រូវការការថែទាំខ្លាំងបំផុតហើយ ហើយមិនគួរតែប្រើប្រាស់កម្លាំងដៃធ្ងន់ ឬ កន្សែងមកត្រដុសជាញឹកញាប់នោះទេ។ ទោះជាមានការណែនាំអោយប្រើប្រាស់ផលិតផលលាងសម្អាតមុខប្រភេទ ស្រ្កាប់ដើម្បីជម្រុះកោសិកាចាស់អោយបានទៀងទាត់ក្ដី បើប្រើប្រាស់មិនបានត្រឹមត្រូវទេនោះស្បែកមុខអ្នកអាចនឹងខូចខាតបាន។ របៀបដែលត្រឹមត្រូវការចាប់ផ្ដើមដ៏ត្រឹមត្រូវបំផុតនោះ គឺការស្វែងយល់ពីប្រភេទស្បែកមុខអ្នកអោយបានច្បាស់លាស់ជាមុនសិន ទើបអាចជ្រើសរើសប្រភេទស្រ្កាប់អោយបានសក្តិសមនឹងស្បែកមុខអ្នកបំផុតនោះ។ មិនថាស្បែកមុខប្រភេទណានោះទេ មិនគួរស្រ្កាប់រៀងរាល់ថ្ងៃពេកនោះទេ ១ ទៅ ២ ដងក្នុង ១ សប្ដាហ៏គឺគ្រប់គ្រាន់ហើយ គួរតែទុកពេលអោយកោសិកាស្បែកអ្នកបានដុះមកថ្មីសិន។ កំហុសដែលគួរតែចៀសវាង
• ប្រើប្រាស់ដោយមិនបន្ថែមទឹក៖ ទោះជាស្រ្កាប់ប្រភេទគ្រីមក្ដី អ្នកគួរតែប្រាកដថាមុខអ្នកសើមជាមុនសិន ជៀសវាងការដាច់រលាត់ស្បែក ហើយប្រើកម្លាំងដៃស្រាលៗបំផុត។
• ចេះតែប្រើតាមអ្វីដែលគេឯងប្រាប់៖ ភាគច្រើនកំហុសដ័ធំបំផុត ហើយចាយលុយទៅមិនបានប្រយោជន៏នោះ គឺចេះតែប្រើប្រាស់តាមសម្ដីគេឯង ដោយមិនបានគិតថា ស្រ្កាប់ដែលប្រើប្រាស់នោះនឹងមានប្រសិទ្ធិភាពបែបណាចំពោះស្បែកមុខខ្លួនឯងនោះ។
ស្ក្រាប់មុនពេលលាងសម្អាតមុខអោយបានស្អាត៖ ចំនុចដែលមិត្តនារីភាគច្រើនតែងតែមើលរំលងនោះ គឺការមិនលាងសម្អាតមុខ មុនពេលស្រ្កាប់ស្បែកមុខជាមុននោះ ព្រោះថាធូលីដី និង ជាតិកង្វក់ដែលមាននៅលើផ្ទៃមុខទាំងប៉ុន្មានអាចនឹងជ្រាបចូលទៅក្នុងរន្ធញើសអ្នកនៅពេលនោះបាន ដែលអាចនឹងធ្វើអោយស្បែកមុខអ្នកងាយកើតមុនឡើងមក ហើយមិនម៉ត់រលោងដូចគេសោះ៕

ប្រទេសចិន ៖ កាលពីថ្ងៃទី១៣ ខែកុម្ភៈ ក្រសួងការបរទេសចិនបានប្រកាសថា ចិនគ្មានទិន្នន័យផ្សេងៗទាក់ទងនឹងវត្ថុចម្លែកហោះលើអាកាសអាមេរិក ហើយត្រូវអាមេរិកបាញ់ធ្លាក់នៅដែនអាកាសរដ្ឋអាឡាស្កា និងប្រទេសកាណាដាទេ ខណៈកាលពីពេលថ្មីៗនេះ យន្តហោះចម្បាំងរបស់អាមេរិកបានបាញ់វត្ថុចម្លែកមានរាង៨ជ្រុងធ្លាក់នៅបរិវេណបឹង Huron ។ វាជាហេតុការណ៍ចុងក្រោយដែលបានកើតឡើងតាំងពីបាឡុងស៊ើបការណ៍របស់ចិនហោះចូលមកដែនអាកាសអាមេរិក ធ្វើឱ្យកងកម្លាំងសន្តិសុខអាមេរិកខាងជើងប្រុងប្រយ័ត្នខ្ពស់ ហើយជាការបាញ់វត្ថុចម្លែកហោះលើអាកាសលើកទី៤ នៅអាមេរិកខាងជើង ។

លោក Wang Weibin អ្នកនាំពាក្យក្រសួងការបរទេសចិន បញ្ជាក់ថា លោកមិនយល់ពីហេតុការណ៍ចុងក្រោយទេ ប៉ុន្តែលោកថា បាឡុងដំបូងដែលអាមេរិកបាញ់ធ្លាក់ គឺជាការប្រើប្រាស់កម្លាំងហួសហេតុពេក ហើយបាឡុងរបស់ចិនបានហោះចូលទៅដែនអាកាសអាមេរិកដោយចៃដន្យប៉ុណ្ណោះ ។ លោក Wang Weibin ថ្លែងថា ៖ «បាឡុងរបស់អាមេរិកក៏ធ្លាប់ហោះចូលមកកាន់ដែនអាកាសរបស់ចិនដោយគ្មានការអនុញ្ញាតជាង១០ដងឯណោះ តាំងពីខែមករា ឆ្នាំ២០២២» ។

ចំណែកលោក Chuck Schumer មេដឹកនាំនៅព្រឹទ្ធសភាអាមេរិក បានផ្តល់បទសម្ភាសន៍ទៅកាន់ស្ថានីយទូរទស្សន៍ ABC ថា មន្ត្រីសន្តិសុខជាតិអាមេរិកជឿជាក់ថា វត្ថុចម្លែកហោះនៅលើអាកាស ដែលគេមិនស្គាល់ម្ចាស់ និងប្រភព (Unidentified flying object) ហើយត្រូវបានអាមេរិកបាញ់ធ្លាក់លើដែនអាកាសរដ្ឋអាឡាស្កា និងកាណាដានោះ វាជាបាឡុង ។ វត្ថុអ្វីក៏ដោយដែលធ្វើឱ្យពលរដ្ឋអាមេរិកប្រឈមនឹងគ្រោះថ្នាក់ មន្ត្រីអាមេរិកនឹងចាត់ការយ៉ាងសមស្រប ។

ជាចុងក្រោយ លោក Chuck Schumer ថ្លែងថា វត្ថុចម្លែកដែលត្រូវគេបាញ់ធ្លាក់ជាបន្តបន្ទាប់នោះ មានទំហំតូចជាងបាឡុងដំបូងដែលបានហោះចូលមកកាន់ដែនអាកាសអាមេរិក និងត្រូវបាញ់ធ្លាក់នៅភាគខាងត្បូងរដ្ឋ Carolina កាលពីថ្ងៃទី៤ ខែកុម្ភៈ កន្លងមក ៕ ប្រភព ៖ tnnthailand

រដ្ឋធានីម៉ានីល៖ ដោយសារតែក្រុងប៉េកាំង កំពុងតែបង្កើននូវសកម្មភាពយោធា នៅក្នុងសមុទ្រចិនខាងត្បូង ដែលជាដែនទឹកមានជម្លោះ ជាមួយនឹងបណ្ដាប្រទេសមួយចំនួន នៅតំបន់អាស៊ាន ទើបហ្វីលីពីន ចោទប្រកាន់ចិន អំពីការធ្វើសមយុទ្ធយោធា ប្រកបដោយគ្រោះថ្នាក់ នៅក្នុងតំបន់។

សារព័ត៌មាន Al Jazeera បានចេញផ្សាយ កាលពីថ្ងៃចន្ទ ទី១៣ ខែកុម្ភៈ ថា ហ្វីលីពិន បានចោទប្រកាន់ចិន អំពីការព្យាយាមរារាំង ដល់ឆ្មាំឆ្នេរសមុទ្ររបស់ខ្លួន អំពីការផ្គត់ផ្គង់អាហារ និង សម្ភារយោធាបន្ថែមដល់កងអនុសេនាធំ ដែលត្រូវបានដាក់ពង្រាយ នៅលើកោះមានជម្លោះ នៅក្នុងសមុទ្រចិនខាងត្បូង ដោយចិនបានប្រើប្រាស់ពន្លឺឡាស៊ែរកម្រិតយោធា ទៅកាន់នាវារបស់ខ្លួន ហើយអនុវត្តសមយុទ្ធ ប្រកបដោយគ្រោះថ្នាក់។

ឆ្មាំឆ្នេរសមុទ្រហ្វីលីពិន (ហៅកាត់ PCG) បានបញ្ជាក់ ថា នាវិករបស់នាវាមួយគ្រឿងរបស់ហ្វីលីពីន ប្រភេទ ម៉ាឡាប៉ាស្គូ (Malapascua) បានជួបប្រទះនឹងនាវាឆ្មាំឆ្នេរសមុទ្ររបស់ចិន កាលពីថ្ងៃទី៦ ខែកុម្ភៈ ខណៈពួកគេស្ថិតនៅចម្ងាយប្រហែលជា១៨,៥គីឡូម៉ែត្រ ពីសមុទ្រ អាយូនហ្គីន ស៊ូល (Ayungin Shoal) ដែលគេស្គាល់ ថា ថូម៉ាស់ ស៊ូលទី២ (Thomas Shoal) នៅអំឡុងដំណើរនាំអាហារ និង សម្ភារទៅផ្គត់ផ្គង់ដល់កងនាវិក ដែលបានឈរជើងនៅទីនោះ។ ចំណែក កោះនោះ មានចម្ងាយ ប្រហែល១០៥គីឡូម៉ែត្រ នាភាគពាយព្យ ខេត្តផាឡាវ៉ាន់ (Palawan) ប្រទេសហ្វីលីពីន ជាកោះប៉ប្រះទឹកស្ព្រាតលី (Spratly) ដែលមានជម្លោះ។

ឆ្មាំសមុទ្រ បានបញ្ជាក់ នៅក្នុងសេចក្តីថ្លែងការណ៍មួយ នៅលើបណ្ដាញសង្គមហ្វេសប៊ុក កាលពីថ្ងៃចន្ទ ថា នាវារបស់ចិន បានបញ្ចេញភ្លើងឡាស៊ែរចំនួន២ដង ទៅកាន់នាវា Malapascua បណ្តាលឱ្យនាវិក នៅក្នុងនាវារបស់ខ្លួន ងងឹតភ្នែក។ នាវារបស់ចិន បានធ្វើសមយុទ្ធ ប្រកបដោយគ្រោះថ្នាក់ ទើបនាវា Malapascua បានផ្លាស់ប្តូរទិសដៅរបស់ខ្លួន ឆ្ពោះទៅកាន់កោះឡាយ៉ាក (Lawak)។

កោះ Ayungin Shoal ជាមូលដ្ឋានរបស់កងទ័ពរបស់ហ្វីលីពិនមួយក្រុមតូច រស់នៅលើនាវាសម័យសង្គ្រាមលោកលើកទី២ ហើយត្រូវគេស្គាល់ថា ជានាវា Sierra Madre ។

សេចក្ដីថ្លែងការណ៍ដដែល បានបញ្ជាក់ទៀត ថា «ការរារាំងដោយចេតនាដល់នាវារបស់រដ្ឋាភិបាលហ្វីលីពិន នៅក្នុងការចែកចាយអាហារ និង ការផ្គត់ផ្គង់សម្ភារ ដល់បុគ្គលិកយោធារបស់យើង នៅលើនាវា BRP SIERRA MADRE គឺជាការមិនយកចិត្តទុកដាក់ និង ជាការរំលោភបំពានយ៉ាងច្បាស់លាស់ មកលើសិទ្ធិអធិបតេយ្យភាពរបស់ហ្វីលីពិន នៅក្នុងសមុទ្រហ្វីលីពិនខាងលិច»។

ភាពតានតឹង បានកើនឡើង នៅជុំវិញកោះ Ayungin Shoal ដែលស្ថិតក្នុងតំបន់សេដ្ឋកិច្ចផ្ដាច់មុខរបស់ហ្វីលីពិន។ ការបង្កើនឥទ្ធិពលរបស់ចិន នៅក្នុងតំបន់ បានជំរុញឲ្យហ្វីលីពិន ចុះកិច្ចព្រមព្រៀងជាចំហ ជាមួយជប៉ុន ដោយផ្ដោតទៅលើវិស័យការពារជាតិ ក្រោយក្រុងម៉ានីល បានចុះកិច្ចព្រមព្រៀង ជាមួយនឹងសហរដ្ឋអាមេរិក។ តាមរយៈកិច្ចព្រមព្រៀង រវាងក្រុងម៉ានីល និង ក្រុងវ៉ាស៊ីនតោន នោះ កងទ័ពសហរដ្ឋអាមេរិក នឹងមានសិទ្ធិប្រើប្រាស់មូលដ្ឋានកងទ័ពមួយចំនួនរបស់ហ្វីលីពិន នៅក្នុងករណីចាំបាច់។

សមុទ្រចិនខាងត្បូង មានទំហំ ប្រហែល៣,៥លានគីឡូម៉ែត្រការ៉េ ហើយសម្បូរទៅដោយធនធានធម្មជាតិ ជីវៈចម្រុះ រ៉ែ និង ឧស្ម័ន…..។ ចំណែកការធ្វើពាណិជ្ជកម្ម ឆ្លងកាត់សមុទ្រចិនខាងត្បូង ទៅកាន់ពិភពលោក មានទំហំទឹកប្រាក់ ប្រហែល៣លានលានដុល្លារ ក្នុងមួយឆ្នាំៗ។ ជាមួយគ្នានេះ ក្រុងប៉េកាំង តែងតែអះអាងដែនទឹកស្ទើរតែទាំងមូល ជាដែនអធិបតេយ្យភាពរបស់ចិន ទើបបង្កឲ្យមានជម្លោះ ជាមួយនឹងប្រទេសផ្សេងៗទៀត នៅក្នុងតំបន់ រួមមាន វៀតណាម ហ្វីលីពិន ប៊្រុយណេ ម៉ាឡេស៊ី និង តៃវ៉ាន់៕

សហរដ្ឋអាមេរិក ៖ ស្ថានទូតអាមេរិកប្រចាំក្រុងមូស្គូបានជូនដំណឹងទៅកាន់ពលរដ្ឋខ្លួនឱ្យប្រញាប់ចាកចេញពីប្រទេសរុស្ស៊ីជាបន្ទាន់ ដោយនិយាយថា សង្គ្រាមនៅអ៊ុយក្រែនធ្វើឱ្យពលរដ្ឋអាមេរិកប្រឈមនឹងគ្រោះថ្នាក់អាចត្រូវគេឃុំខ្លួនតាមអំពើចិត្ត ឬរងការគំរាមកំហែងណាមួយដោយសារការអនុវត្តច្បាប់របស់រុស្ស៊ី ។

កាលពីថ្ងៃទី១២ ខែកុម្ភៈ ស្ថានទូតអាមេរិកបានដាស់តឿនថា ពលរដ្ឋអាមេរិកកំពុងស្នាក់នៅ ឬធ្វើដំណើរនៅរុស្ស៊ី គួរតែប្រញាប់ចាកចេញពីប្រទេសនេះជាបន្ទាន់ ។ លើសពីនេះ ស្ថានទូតអាមេរិកស្នើទៅកាន់ពលរដ្ឋខ្លួនថា ត្រូវប្រុងប្រយ័ត្នដោយខ្លួនឯង ព្រោះអាចត្រូវគេចាប់ខ្លួន ហើយកុំធ្វើដំណើរមកកាន់រុស្ស៊ីឱ្យសោះ ។ អាមេរិកធ្លាប់បានដាស់តឿនពលរដ្ឋក្នុងការធ្វើដំណើរមករុស្ស៊ីជាច្រើនលើក ហើយដាស់តឿនចុងក្រោយកាលពីខែកញ្ញា នៅពេលប្រធានាធិបតីរុស្ស៊ី លោក វ៉្លាឌីមៀ ពូទីន អំពាវនាវប្រមូលកងកម្លាំងទៅធ្វើសង្គ្រាមនៅអ៊ុយក្រែន ។

ស្ថានទូតអាមេរិកប្រកាសថា គេមិនអាចដឹងមុនទេ ដែលពលរដ្ឋអាមេរិកត្រូវប្រឈមក្នុងសង្គ្រាមអ៊ុយក្រែន រួមទាំងការបង្ខំឱ្យធ្វើកងទ័ពសម្រាប់បុគ្គលមានសញ្ជាតិ២ ។ រុស្ស៊ីអាចបដិសេធមិនទទួលស្គាល់ពលរដ្ឋអាមេរិកដែលមានសញ្ជាតិ២ និងមិនអនុញ្ញាតឱ្យពួកគេទទួលបានជំនួយកុងស៊ុល ខណៈហាមឃាត់ការធ្វើដំណើរចេញពីរុស្ស៊ី ។

ស្ថានទូតអាមេរិកបន្ថែមថា កន្លងមក ភ្នាក់ងារសន្តិសុខរុស្ស៊ីធ្លាប់ចាប់ពលរដ្ឋអាមេរិកឃុំខ្លួនដោយចោទប្រកាន់ថា ជាបណ្តាញសម្ងាត់ និងគំរាមកំហែង ។ រុស្ស៊ីមិនប្រព្រឹត្តជាមួយពលរដ្ឋអាមេរិកដោយតម្លាភាព និងយុត្តិធម៌ទេ ពួកគេប្រើវិធីសាស្ត្រស៊ើបអង្កេតសម្ងាត់ដើម្បីចាប់កំហុសពលរដ្ឋអាមេរិកដោយមិនបង្ហាញភស្តុតាងច្បាស់លាស់ ។ លើសពីនេះ រុស្ស៊ីបានយកច្បាប់របស់ខ្លួនមកប្រើប្រាស់ជាមួយពលរដ្ឋអាមេរិកដែលបម្រើការផ្នែកសាសនា និងស៊ើបអង្កេតឧក្រិដ្ឋកម្មលើអ្នកចូលរួមសកម្មភាពសាសនា ។

ដូចគ្នានេះ ក្រសួងការបរទេសអាមេរិកក៏បានដាស់តឿនដែរថា ហាមពលរដ្ឋធ្វើដំណើរក្នុងប្រទេសរុស្ស៊ីដាច់ខាត តាំងពីក្រុងមូស្គូបានបញ្ជូនកងទ័ពទៅឈ្លានពានអ៊ុយក្រែនកាលពីខែកុម្ភៈ ឆ្នាំ២០២២ ៕

ប្រភព ៖ MGRonline

កាលពីឆ្នាំ២០២២ ភ្នាក់ងារបរិស្ថានអង្គការសហប្រជាជាតិ (UNEP) បានដាស់តឿនថា ពិភពលោកកំពុងធ្លាក់ចូលក្នុងវិបត្តិខ្វះខ្សាច់ (Sand Crisis) ខណៈក្នុងរយៈពេល២០ឆ្នាំកន្លងមក មនុស្សបានប្រើប្រាស់ខ្សាច់រហូតដល់៥ម៉ឺនលានតោន/១ឆ្នាំ ឬស្មើប្រមាណ១៧គីឡូក្រាមសម្រាប់មនុស្សម្នាក់/១ថ្ងៃ ដោយសារការពង្រីកទីក្រុង និងចំនួនមនុស្សកើនឡើងជារឿយៗ ។

នៅពេលពិភពលោកមានខ្សាច់ដ៏ច្រើន ប៉ុន្តែហេតុអ្វីបានជាខ្វះខ្សាច់ទៅវិញ ? ការពិត យើងមិនអាចយកខ្សាច់ពីសមុទ្រខ្សាច់មកប្រើប្រាស់បានទេ ព្រោះខ្សាច់ទាំងនេះឆ្លងកាត់ខ្យល់ខ្លាំង រហូតធ្វើឱ្យវាទន់ បើយើងយកវាមកប្រើក្នុងសំណង់ ឬប្រើធ្វើអ្វីផ្សេងៗ វាគ្មានកម្លាំងស្អិតគ្រប់គ្រាន់ទេ បណ្តាលឱ្យសំណង់មិនរឹងមាំ ហើយប្រឈមនឹងការដួលរលំទៀតផង ។ ជាក់ស្តែង ការសាងសង់អគារ Burj Khalifa ដែលមានកម្ពស់ខ្ពស់បំផុតនៅទីក្រុងឌូបៃ សហព័ន្ធអារ៉ាប់រួម បើទោះជាប្រទេសនេះជាប្រទេសសមុទ្រខ្សាច់ក្តី ប៉ុន្តែបែរជានាំចូលខ្សាច់ពីប្រទេសអូស្ត្រាលី ដែលនៅឆ្ងាយពីគ្នាចម្ងាយ១ម៉ឺនគីឡូម៉ែត្រមកប្រើប្រាស់ជំនួសវិញ ។ ដូច្នេះ គេចាំបាច់ត្រូវយកខ្សាច់ពីបាតសមុទ្រ ឆ្នេរសមុទ្រ និងដងទន្លេ ដែលស្អិតមកប្រើប្រាស់ប្រសើរជាង ។តំបន់សម្បូរខ្សាច់កំពុងត្រូវបានបំពានដោយសារការពង្រីកទីក្រុងរបស់មនុស្ស ខណៈការប្រើប្រាស់បានកើនឡើងយ៉ាងខ្លាំង ដោយពួកគេបានជីកខ្សាច់ជាច្រើន ឬប្រើម៉ាស៊ីនបូមខ្សាច់ ។ អង្គការសហប្រជាជាតិ (UN) បារម្ភថា ខ្សាច់កំពុងខ្វះខាត និងអស់ពីក្នុងពិភពលោក ។ ខ្សាច់អាចរក្សាតុល្យភាពរបស់ទឹក បើគេជីកវាអស់ច្រើនពេកបណ្តាលឱ្យតំបន់នោះមានទឹកជំនន់ញឹកញាប់ និងខ្លាំងក្លា ដូចជា ករណីជីកខ្សាច់នៅប្រទេសស្រីលង្ការ បានធ្វើឱ្យក្រសែទឹកផ្លាស់ប្តូរ ហើយទឹកសមុទ្រហូរចូលច្រាំងកាន់តែច្រើន ។

ក្នុងកិច្ចប្រជុំរបស់អង្គការសហប្រជាជាតិកាលពីថ្ងៃទី២៦ ខែមេសា ឆ្នាំ២០២២ នៅទីក្រុងហ្សឺណែវ ប្រទេសស្វីស បង្ហាញថា ដើម្បីចៀសវាងការខ្វះខ្សាច់ រដ្ឋាភិបាលប្រទេសផ្សេងៗគួរតែចេញច្បាប់ហាមឃាត់ការជីកខ្សាច់នៅតាមឆ្នេរសមុទ្រ ។ យើងឃើញថា អ្វីៗនៅជុំវិញខ្លួនយើងដូចជា ការសាងសង់ រហូតដល់ការផលិតទូរស័ព្ទដៃ ក៏ប្រើធាតុផ្សំពីខ្សាច់ដែរ ហេតុនេះ ការរក្សាសមតុល្យការលូតលាស់នៃសេដ្ឋកិច្ច និងបរិស្ថាន ដោយកាត់បន្ថយការប្រើប្រាស់ខ្សាច់ធម្មជាតិ នឹងជួយដោះស្រាយបញ្ហាខ្វះខ្សាច់បាន ៕

ប្រភព ៖ newpapertoday