ប្រទេសវៀតណាម ៖ កាលពីថ្ងៃទី១០ ខែកុម្ភៈ កន្លងមក ភ្នាក់ងារអាកាសចរណ៍ស៊ីវិលវៀតណាមរាយការណ៍ថា វៀតណាមបានកំណត់គោលដៅសាងសង់អាកាសយានដ្ឋានឱ្យបាន៣០កន្លែងនៅត្រឹមឆ្នាំ២០៣០ ។ វាជាការព្យាយាមលើកកម្ពស់វិស័យទេសចរណ៍ និងជំរុញឧស្សាហកម្មអាកាសចរណ៍ ខណៈបច្ចុប្បន្នវៀតណាមមានអាកាសយានដ្ឋានចំនួន២២កន្លែង ។

តាមរបាយការណ៍ពីភ្នាក់ងារអាកាសចរណ៍ស៊ីវិលបញ្ជាក់ថា វៀតណាមនឹងខិតខំសាងសង់អាកាសយានដ្ឋានអន្តរជាតិ១៤កន្លែងនៅក្នុងឆ្នាំ២០៣០ ខណៈបច្ចុប្បន្នវៀតណាមមានអាកាសយានដ្ឋានអន្តរជាតិ១០កន្លែង ដូចជា អាកាសយានដ្ឋាននៅក្រុងហាណូយ ទទួលអ្នកដំណើរបានចំនួន២៥លាននាក់/១ឆ្នាំ និងអាកាសយានដ្ឋាននៅក្រុងហូជីមិញ ទទួលអ្នកដំណើរបានចំនួន២៨លាននាក់/១ឆ្នាំ ។

អាកាសយានដ្ឋានអន្តរជាតិឡុង ថាញ់ នៅខាងក្រៅក្រុងហូជីមិញ ដែលបានសាងសង់តាំងពីឆ្នាំ២០២១ គឺជាការវិនិយោគគម្រោងអាកាសយានដ្ឋានចុងក្រោយបង្អស់របស់វៀតណាម ។ គេរំពឹងថា អាកាសយានដ្ឋាននេះនឹងអាចទទួលអ្នកដំណើររហូតដល់១០០លាននាក់/១ឆ្នាំ ហើយពេលសាងសង់រួចរាល់ វានឹងក្លាយជាមជ្ឈមណ្ឌលកណ្តាលក្នុងការបន្តជើងហោះហើររបស់អ្នកដំណើរទៅក្រៅប្រទេស ។

លើសពីនេះ ប្រទេសវៀតណាមបានដាក់ផែនការពង្រីកការហោះហើរក្នុងប្រទេសផងដែរ តាមរយៈការប្រើប្រាស់អាកាសយានដ្ឋាន Bien Hoa ក្នុងខេត្តដុងណៃ ស្ថិតនៅភាគខាងត្បូង និងអាកាសយានដ្ឋានតាន់សន ក្នុងខេត្តណិញធួន ស្ថិតនៅភាគកណ្តាល ។ ផែនការពង្រីកការហោះហើរនេះ គឺក្នុងបំណងបម្រើការហោះហើរផ្នែកកងទ័ព និងស៊ីវិល ព្រមទាំងពិចារណាលទ្ធភាពបើកអាកាសយានដ្ឋានកងទ័ពមួយចំនួនសម្រាប់ជនស៊ីវិល ដូចជា អាកាសយានដ្ឋានកៀឡែម ។

គេរំពឹងថា ឧស្សាហកម្មអាកាសចរណ៍របស់វៀតណាមនឹងរើបឡើងវិញទាំងស្រុងនៅចុងឆ្នាំ២០២៣នេះ ដោយនឹងមានបរិមាណការដឹកជញ្ជូនអ្នកដំណើរចំនួន៨០លាននាក់ និងទំនិញចំនួន១,៤៤លានតោន ដោយមានកំណើន១% និង១៤,៨% តាមលំដាប់ បើធៀបនឹងឆ្នាំ២០១៩ មុនពេលមានជំងឺកូវីដរាតត្បាត ៕

ប្រភព ៖ newpapertoday

រដ្ឋធានីប៉េកាំង៖ ថ្វីបើការប្រជែងគ្រឿងសព្វាវុធ នៅក្នុងសម័យសង្គ្រាមត្រជាក់ បានផុតរលត់ទៅអស់រយៈពេលជាច្រើនទសវត្សរ៍មកហើយក្ដី ប៉ុន្ដែនៅក្នុងសម័យទំនើប នាពេលបច្ចុប្បន្ន បណ្ដាប្រទេសមហាអំណាចធំៗ ក៏កំពុងតែប្រជែងគ្នា ដណ្ដើមឧត្ដមភាព លើយន្ដហោះគ្មានមនុស្សបើក ឬ ដ្រូន ហើយបច្ចុប្បន្ន ចិនក៏កំពុងតែធ្វើបដិវត្ដន៍ដ្រូនប្រយុទ្ធបំបាំងកាយថ្មីរបស់ខ្លួន។

សារព័ត៌មាន Asia Times បានចេញផ្សាយ កាលពីចុងសប្ដាហ៍មុន ថា ឥឡូវនេះ ចិនកំពុងតែបង្ហោះសាកល្បងយន្ដហោះគ្មានមនុស្សបើកបំបាំងកាយថ្មីរបស់ខ្លួន។ ដ្រូនបំបាំងកាយថ្មីនេះ ក៏នឹងអាចមានឥទ្ធិពល ទៅលើការរចនាយន្តហោះចម្បាំងជំនាន់ទី៦របស់ចិន នាពេលខាងមុខផងដែរ។

សារព័ត៌មាន The South China Morning Post បានរាយការណ៍ នៅសប្ដាហ៍នេះ ថា ក្រុមអ្នកស្រាវជ្រាវ នៃមជ្ឈមណ្ឌលស្រាវជ្រាវ និង អភិវឌ្ឍន៍លំហអាកាសចិន នៅខេត្តស៊ីឈួន បានសាកល្បងយន្តហោះគ្មានមនុស្សបើកថ្មី ឬ ដ្រូន ដែលប្រើបច្ចេកវិទ្យា AFC ។

សារព័ត៌មាន SCMP បានរាយការណ៍ កាលពីថ្ងៃទី១៩ ខែមករា អំពីក្រុមអ្នកស្រាវជ្រាវចិន បានអះអាង ថា នៅក្នុងអំឡុងពេលហោះហើរសាកល្បង ថា យន្តហោះគ្មានមនុស្សបើក បានហោះឡើង ហើយត្រូវធ្វើឲ្យមានលំនឹង ចំពោះអតុល្យភាព នៃការហោះហើរនោះ។ ក្រុមអ្នកស្រាវជ្រាវបានកត់សម្គាល់ថា ដ្រូនរបស់ពួកគេ អាចធ្វើសមយុទ្ធបានយ៉ាងរលូន និង រហ័ស។

លោក ហ្សាង លីវ (Zhang Liu) អ្នកវិទ្យាសាស្រ្ដរបស់ចិនមួយរូប ដែលដឹកនាំក្រុមស្រាវជ្រាវ នៅឯមជ្ឈមណ្ឌលពាក់ព័ន្ធនឹងការរចនាយន្ដហោះបំបាំងកាយជំនាន់ទី៥ J-20 និង អាវុធមានល្បឿនលឿនជាងសំឡេង បានអះអាង ថា រូបរាងរបស់យន្តហោះបំបាំងកាយនេះ ត្រូវបានរចនាឡើងយ៉ាងប្រុងប្រយ័ត្ន សម្រាប់លំហអាកាស។

ប្រភពផ្សេងទៀត បានរាយការណ៍ ថា ក្រុមអ្នកស្រាវជ្រាវរបស់សហរដ្ឋអាមេរិក ក៏បានបាញ់បង្ហោះដ្រូនរបស់ពួកគេ ចេញពីប្រព័ន្ធ UAS នៅក្នុងរដ្ឋអូរេហ្គិន (Oregon) កាលពីខែតុលាឆ្នាំ ២០២២ សម្រាប់ការហោះហើរ រយៈពេល៩នាទី។

ការសាកល្បងយន្ដហោះគ្មានមនុស្សបើកបំបាំងកាយថ្មីរបស់ចិន បានកើតឡើង ក្រោយពេលកងទ័ពសហរដ្ឋអាមេរិក បានបាញ់ទម្លាក់បាឡុងរបស់ចិន ដែលបស្ចិមលោក បានចាត់ទុកជាបាឡុងចារកម្ម។ សកម្មភាពរបស់ក្រុងប៉េកាំង នាពេលពនេះ ក៏បានកើតឡើង ស្របគ្នាជាមួយនឹងភាពតានតឹងរបស់ប្រទេសមហាអំណាចទាំង២ កំពុងតែប្រជែងគ្នាយ៉ាងខ្លាំង ទាំងសេដ្ឋកិច្ច យោធា និង នយោបាយ នៅលើពិភពលោក៕

ប្រទេសថៃ ៖ កាលពីថ្ងៃទី១២ ខែកុម្ភៈ លោក អនុឆា ប៊ូរ៉ាផាឆៃស្រ៊ី អគ្គលេខាធិការរងនាយករដ្ឋមន្ត្រី ទទួលបន្ទុកកិច្ចការនយោបាយ និងជាអ្នកនាំពាក្យទីស្តីការនាយករដ្ឋមន្ត្រី បានថ្លែងថា លោក ប្រាយុទ្ធ ចាន់អូចា នាយករដ្ឋមន្ត្រី និងរដ្ឋមន្ត្រីក្រសួងការពារជាតិ រីករាយណាស់ដែលលោកបានជ្រាបថា វែបសាយទេសចរណ៍ល្បីឈ្មោះ TripAdvisor បានចាត់ចំណាត់ថ្នាក់ «Best Food Destination» របស់ពិភពលោក ប្រចាំឆ្នាំ២០២៣ (Best Food Destinations in the World – Tripadvisor Travelers’ Choice Awards) ថា ទីក្រុងបាងកកបានជាប់ចំណាត់ថ្នាក់ទី១៣ របស់ពិភពលោក ។

លោក អនុឆា ថ្លែងថា ការចាត់ចំណាត់ថ្នាក់លើកនេះ គឺយោងទៅលើគុណភាព បរិមាណការទស្សនា មតិយោបល់ផ្សេងៗរបស់ភ្ញៀវទេសចរ និងអ្នកភ្លក់ម្ហូបអាហារមកពីទូទាំងពិភពលោក ។ ពួកគេបានចូលមកសរសេររៀបរាប់រឿងរ៉ាវផ្ទាល់ខ្លួនក្នុងវែបសាយ TripAdvisor ក្នុងរយៈពេល១២ខែកន្លងមក រួមទាំងការពេញចិត្តនៃការចុះផ្សាយពីប្រទេសថៃផងដែរ ។

ទីក្រុងបាងកក ប្រទេសថៃ ទទួលបានចំណាត់ថ្នាក់ Best Food Destination ទី១៣ របស់ពិភពលោក និងចំណាត់ថ្នាក់ទី២ របស់អាស៊ាន ដោយវែបសាយ Tripadvisor បញ្ជាក់ថា ព្រះបរមរាជវាំងពណ៌មាស ផ្សារទឹក និងរូបចម្លាក់ស្រស់ស្អាតនានាបានធ្វើឱ្យភ្ញៀវទេសចរចាប់អារម្មណ៍ និងចង់មកកម្សាន្ត ។ ជាមួយគ្នានេះ ភ្ញៀវទេសចរក៏អាចទស្សនាកន្លែងលក់ទំនិញនានាដូចជា តំបន់ប្រាទូណាម និង Siam Square ដើម្បីទិញទំនិញផ្សេងៗ រួមទាំងនៅតំបន់ព្រះណាខនជាទីកន្លែងទេសចរណ៍ទាក់ទាញ ដូចជា វត្តអារុណ និងវត្តពោធិ៍ ជាដើម ។ ក្រៅពីនេះ ភ្ញៀវទេសចរអន្តរជាតិ ក៏អាចទទួលទានបាយដំណើបស្វាយទុំ ម្ហូបអាហារ និងបង្អែមនៅតាមផ្លូវនានាក្នុងប្រទេសថៃទៀតផង ។

លោក អនុឆា បន្ថែមថា លោកនាយករដ្ឋមន្ត្រីរីករាយណាស់លើការចាត់ចំណាត់ថ្នាក់ Best Food Destination 2023 របស់វែបសាយ Tripadvisor ដោយលោកបានអរគុណដល់ភ្ញៀវទេសចរអន្តរជាតិទូទាំងពិភពលោក ដែលពួកគេមានអនុស្សាវរីយ៍ល្អៗពេលមកលេងក្រុងបាងកក ។ លោកជឿថា ក្រុងបាងកកមានមន្តស្នេហ៍ទាក់ទាញភ្ញៀវទេសចរ ដោយសារប្រទេសថៃមានភាពសម្បូរបែបច្រើនយ៉ាងដូចជា ទីកន្លែងទេសចរណ៍ និងបេតិកភណ្ឌវប្បធម៌ដ៏ស្រស់ស្អាត រួមទាំងផ្នែកកីឡា សិល្បៈ ម្ហូបអាហារមានរសជាតិត្រូវមាត់ និងទទួលបានការពេញនិយមពីទូទាំងពិភពលោក ។ ហេតុនេះ រដ្ឋាភិបាលថៃនឹងព្យាយាមអភិវឌ្ឍន៍ប្រទេសជាតិដើម្បីបន្ថែមគុណតម្លៃលើអ្វីដែលមានស្រាប់ មិនគ្រាន់តែសម្រាប់ទាក់ទាញភ្ញៀវទេសចរប៉ុណ្ណោះទេ ប៉ុន្តែនឹងជំរុញប្រទេសថៃឱ្យកាន់តែល្បីល្បាញថែមទៀតក្នុងពិភពលោក ៕

ប្រភព ៖ thestatestimes

សម្រាប់នៅប្រទេសជឿនលឿន អាជីពអ្នកនិពន្ធចម្រៀងអាចធ្វើឱ្យពួកគេក្លាយជាអ្នកមានបានមួយរំពេច ប្រសិនបើគេបានជួយឱ្យបទតារាចម្រៀងណាម្នាក់ មានអ្នកទស្សនាលើសពី១០០លានដងនៅក្នុង YouTube ឬក៏អាចលក់អាល់ប៊ុប បានត្រឹម ២លានបន្ទះ ដល់៤លានបន្ទះជាដើម។

កាលដើមឡើយ រាល់​ពេល​ដែល​អាល់ប៊ុម​ចម្រៀង​លក់​ដាច់ អ្នក​និពន្ធ​ចម្រៀង​ទាំង​អស់​អាច​ទទួល​បាន​​ចំណូល ២សេន​ក្នុង​មួយ​អាល់ប៊ុម ក៏ប៉ុន្តែបច្ចុប្បន្នអាចបានដល់៩.១សេនឯណោះ។ ជាក់ស្តែងកាលពីពេលថ្មីៗនេះអាល់ប៊ុប Midnights របស់កំពូលតារាចម្រៀងស្រី Taylor Swift លក់បាន២លានបន្ទះ ហេតុដូចនេះអ្នកនិពន្ធអាចរកបានចំណូល ១.៥លានដុល្លារឯណោះ។ នេះ​គិត​​តែ​ចំនួន​អាល់ប៊ុម​ដែល​លក់​ដាច់​នៅ​អាមេរិក​ប៉ុណ្ណោះ គឺ​មិន​រាប់​បញ្ចូល​ការ​លក់​នៅ​ប្រទេស​ផ្សេង​ៗ​ទូទាំង​ពិភពលោក​ឡើយ។​​

ដោយឡែក ប្រសិន​បើ​បទ​ចម្រៀង​នោះ ត្រូវ​ចាក់​ក្នុង​ខ្សែ​ភាពយន្ត កម្មវិធី​ទូរទស្សន៍ វីដេអូ​ហ្គេម ឬ​ក៏​វីដេអូ​ពាណិជ្ជកម្ម​ផ្សេង​ៗ ​ស្ថាប័ន​ទាំង​នោះ​ត្រូវ​ចុះ​កិច្ចសន្យា​ទិញ​សិទ្ធិ​ពី​ផលិតកម្ម ហើយ​ជា​ទូទៅ​អ្នក​និពន្ធ​អាច​ទទួល​បាន​ចំណូល​មួយ​ផ្នែក​ធំ​ពី​ការ​ទិញ​សិទ្ធិ​នេះ។ នៅក្នុងករណីនេះ អ្នកនេះពន្ធនឹងទទួលបាន៥០ភាគរយនៃចំណូលការលក់សិទ្ធ និង៥០ភាគរយទៀតបានទទៅអ្នកចម្រៀង និងផលិតកម្ម។

ក្រឡេកមកមើលតារាចម្រៀងវិញ ប្រសិនពួកគេស្ថិតនៅក្នុងផលិតកម្មណាមួយ ពួកគេមានប្រាក់ខែជាមធ្យមរបស់៤មុឺនដុល្លារ រហូតដល់ ៤០មុឺនដុល្លារ អាស្រ័យលើប្រជាប្រិយភាពរបស់ពួគេ។ ក៏ប៉ុន្តែនៅក្នុងនោះក៏មានតារាមួយចំនួនទផៀតផងដែរអាចរកបានចំណូលខ្ទងល់លានដុល្លារដូចជា៖

• Taylor Swift ៣៦លានដុល្លារក្នុងមួយខែ
• Ariana Grande ២០លានដុល្លារមួយខែ
• Dua Lipa ៣លានដុល្លារក្នុងមួយខែ
• Drake ៤លានដុល្លារក្នុងមួយខែ

គួរបញ្ជាក់ផងដែរថា លុយដែលរកបានពីការទស្សនានៅលើ YouTube តារាចម្រៀងនៅក្នុងផលិតកម្ម មិនទទួល សូម្បីតែមួយសេន៕

ប្រភព៖ Work.Chron

រដ្ឋធានីតេអ៊ីរ៉ង់៖ កងទ័ពរបស់លោកខាងលិច កំពុងតែឆ្មក់បង្រ្កាបទៅលើទូកនានា រត់ពន្ធអាវុធ ចេញពីប្រទេសអ៊ីរ៉ង់ ឆ្ពោះទៅកាន់ប្រទេសយេមែន ដែលកំពុងតែហែកហួរ ដោយសារសង្គ្រាម ខណៈមេបញ្ជាការកណ្ដាលរបស់សហរដ្ឋអាមេរិក បានបង្ហាញ អំពីការស្ទាក់ចាប់ និង រឹបអូសគ្រឿងសព្វាវុធបានជាបន្ដបន្ទាប់ នៅក្នុងរយៈពេលប៉ុន្មានខែកន្លងទៅថ្មីៗនេះ។

សារព័តមាន Insider បានចេញផ្សាយ កាលពីថ្ងៃអាទិត្យ ទី១២ ខែកុម្ភៈ ថា កម្លាំងទាហានរបស់បស្ចិមលោក កំពុងតែឆ្មក់ចាប់ជាអចិន្ដ្រៃយ៍ ទៅលើទូកនានា មានគោលបំណង រត់ពន្ធអាវុធ ចេញពីអ៊ីរ៉ង់ នាំទៅផ្គត់ផ្គង់ ដល់ក្រុមឧទ្ធាមហ៊ូធី (Houthi) នៅក្នុងប្រទេសយេមែន។ សកម្មភាពរបស់ទាហានលោកខាងលិច បានរឹបអូសគ្រឿងបំផ្ទុះជាច្រើនប្រភេទ រួមមាន កាំភ្លើង និងគ្រាប់រំសេវ។

ក្រុមអ្នកជំនាញកិច្ចការមជ្ឈិមបូព៌ា និង អ៊ីរ៉ង់ បានបញ្ជាក់ ថា ការឆ្មក់បង្ក្រាបរបស់លោកខាងលិច គឺជាកិច្ចខិតខំប្រឹងប្រែង សម្របសម្រួលមួយ រៀបចំឡើង ដើម្បីដាក់សម្ពាធទៅលើប្រទេសអ៊ីរ៉ង់ និង បន្ទុកបង្អាក់ដល់ផែនការដ៏អាក្រក់របស់ក្រុងតេអ៊ីរ៉ង់ នៅក្នុងតំបន់។

ទីបញ្ជាការកណ្ដាលរបស់សហរដ្ឋអាមេរិក កាលពីប៉ុន្មានខែមុននេះ បានបង្ហាញ អំពីការវាយឆ្មក់បង្ក្រាប ទៅលើទូកនេសាទជាបន្តបន្ទាប់ ដែលត្រូវបានធ្វើឡើង ដោយកងកម្លាំងរបស់សហរដ្ឋអាមេរិក ឬ សម្ពន្ធមិត្ត។ ការបង្រ្កាបការរត់ពន្ធអាវុធនេះ ជារឿយៗ បានដកហូតនាវានេសាទ ដែលធ្វើដំណើរតាមផ្លូវទឹក ធ្លាប់មានប្រវត្តិ ធ្វើចរាចរណ៍ដឹកអាវុធខុសច្បាប់ ចេញពីប្រទេសអ៊ីរ៉ង់ នាំទៅឲ្យក្រុមឧទ្ទាម Houthi ដែលកំពុងតែធ្វើសង្គ្រាមស៊ីវិល ប្រឆាំងនឹងរដ្ឋាភិបាលយេមែន ដែលទទួលស្គាល់ ជាលក្ខណៈអន្ដរជាតិ នៅក្នុងប្រទេសចុងខាងត្បូងឧបទ្វីបអារ៉ាប់។

ក្រុមឧទ្ទាមហ៊ូធី គាំទ្រដោយអ៊ីរ៉ង់ បានប្រយុទ្ធ អស់រយៈពេលជាច្រើនឆ្នាំកន្លងមកហើយ ប្រឆាំងនឹងរដ្ឋាភិបាលយេមែន គាំទ្រដោយសម្ពន្ធមិត្ត ដឹកនាំដោយប្រទេសអារ៉ាប៊ីសាអូឌីត។ ការប្រយុទ្ធគ្នាដ៏ឃោរឃៅ នៅក្នុងប្រទេសយេមែន ធ្វើឲ្យក្រុមអ្នកជំនាញ តែងតែចាត់ទុក ជាសង្គ្រាមប្រជែងឥទ្ធិពលគ្នា រវាងគូសត្រូវ នៅក្នុងតំបន់ គឺអ៊ីរ៉ង់ និង អារ៉ាប៊ីសាអូឌីត។ ចំណែកបទឈប់បាញ់ដ៏ផុយស្រួយមួយ បានជំរុញឲ្យមានភាពតានតឹង អូសបន្លាយអស់រយៈពេលជាច្រើនខែមកហើយ ប៉ុន្តែសង្គ្រាមបំផ្លិចបំផ្លាញនេះ បានធ្វើឱ្យមនុស្ស រាប់សែននាក់ស្លាប់ និង រាប់លាននាក់ផ្សេងទៀត ត្រូវការជំនួយមនុស្សធម៌យ៉ាងធ្ងន់ធ្ងរបំផុត។

ទីបញ្ជាការកណ្ដាលសហរដ្ឋអាមេរិក (CENTCOM) បានបញ្ជាក់ នៅខែនេះ ថា កងទ័ពសហរដ្ឋអាមេរិក បានជួយគាំទ្រ ដល់កងកម្លាំងជើងទឹករបស់ប្រទេសជាដៃគូ នៅក្នុងការឆ្មក់បង្ក្រាប កាលពីខែមករា នៅឈូងសមុទ្រអូម៉ង់។ ការស្ទាក់ចាប់ទូករត់ពន្ធអាវុធនេះ បានអនុវត្ដ ដោយកងកម្លាំងពិសេសរបស់បារាំង នៅតាមផ្លូវទឹក ដែលតែងតែរត់ពន្ធអាវុធ រវាងប្រទេសអ៊ីរ៉ង់ និង យេមែន ដោយរឹបអូសបាន គ្រាប់កាំភ្លើង ចំនួន៣០០០គ្រាប់, គ្រាប់រំសេវ ៥៧៨ ០០០គ្រាប់ និង មីស៊ីលនាំផ្លូវប្រឆាំងនឹងរថក្រោះ ចំនួន២៣ដើម។

ទីបញ្ជាការកណ្ដាលរបស់សហរដ្ឋអាមេរិក បានបញ្ជាក់ទៀត ថា ការវាយឆ្មក់បង្ក្រាបនេះ គឺជា ការរារាំង ដល់ទំនិញខុសច្បាប់មួយ នៅក្នុងចំណោមទំនិញខុសច្បាប់ទាំង៤ប្រភេទ នៅក្នុងរយៈពេលប៉ុន្មានខែកន្លងមកនេះ ដោយរឹបអូសបានអាវុធជាង ៥ 000ដើម និង គ្រាប់ចំនួន ១,៦លានគ្រាប់ មុនពេលអាវុធទាំងនោះទៅដល់ប្រទេសយេមែន។ បច្ចុប្បន្ននេះ អង្គការសហប្រជាជាតិ បានដាក់ទណ្ឌកម្ម ទៅលើការបញ្ជូនអាវុធ ទៅឲ្យក្រុមឧទ្ទាមក្រុមហ៊ូធី (Houthis)។

លោក អាឡិច វ៉ាតាន់កា (Alex Vatanka) នាយកកម្មវិធីអ៊ីរ៉ង់ នៃវិទ្យាស្ថានមជ្ឈិមបូព៌ា បានបញ្ជាក់ ថា «សកម្មភាពរបស់កងទ័ពសហរដ្ឋអាមេរិក និង សម្ពន្ធមិត្តអឺរ៉ុប បង្ក្រាបទៅលើការរត់ពន្ធអាវុធ គឺជាការដាក់សម្ពាធទៅលើលើអ៊ីរ៉ង់ ដើម្បីបង្ខំរដ្ឋាភិបាលតេអ៊ីរ៉ង់ ឱ្យចូលរួមក្នុងកិច្ចពិភាក្សាដ៏មានអត្ថន័យ ជុំវិញការស្តារឡើងវិញនូវកិច្ចព្រមព្រៀងនុយក្លេអ៊ែររបស់អ៊ីរ៉ង់ នាឆ្នាំ ២០១៥។ បញ្ហានេះមិនមែនត្រឹមតែការពិភាក្សា ដើម្បីជាប្រយោជន៍ នៃកិច្ចពិភាក្សាប៉ុណ្ណោះទេ ប៉ុន្តែការពិភាក្សាយ៉ាងពិតប្រាកដ រារាំងដល់លើកម្មវិធីនុយក្លេអ៊ែររបស់ក្រុងតេអ៊ីរ៉ង់»។

លោកឧត្តមសេនីយ៍ មីឆែល គូរីលឡា (Michael Kurilla) មេបញ្ជាការ CENTCOM បានបញ្ជាក់ ថា ការផ្ទេរគ្រឿងសព្វាវុធឆ្លងកាត់ដែនទឹកអន្តរជាតិមាន នាំឲ្យមានអស្ថិរភាព នៅក្នុងតំបន់។ រីឯសហរដ្ឋអាមេរិក និង ដៃគូរបស់ខ្លួន នឹងបន្តរឹបអូសយកគ្រឿងសព្វាវុធដ៏សាហាវទាំងនោះ បើទោះជាវាមកពីប្រភពណាក៏ដោយ៕

សហរដ្ឋអាមេរិក ៖ រដ្ឋាភិបាលអាមេរិកបានដាក់ក្រុមហ៊ុនចំនួន៥ និងវិទ្យាស្ថានស្រាវជ្រាវរបស់ចិនចំនួន១ ទៅក្នុងបញ្ជីខ្មៅ ខណៈក្រុមហ៊ុនទាំងនេះពាក់ព័ន្ធនឹងគម្រោងបាឡុងស៊ើបការណ៍ដែលគាំទ្រកងទ័ពចិន ជាពិសេស គម្រោងអវកាស យន្តហោះ និងបាឡុង ។ ក្រុមហ៊ុន និងវិទ្យាស្ថានដែលអាមេរិកបានចុះក្នុងបញ្ជីខ្មៅលើកនេះ រួមមាន ទីក្រុងប៉េកាំង ណានជៀង អែរ៉ូ space បច្ចេកវិទ្យា និងវិទ្យាស្ថានស្រាវជ្រាវលំដាប់ទី៤៨ របស់សាជីវកម្មបច្ចេកវិទ្យាអេឡិចត្រូនិកចិន ។

ក្រៅពីនេះ អាមេរិកក៏បានហាមឃាត់ការនាំចេញផ្នែកបច្ចេកវិទ្យាទៅកាន់ក្រុមហ៊ុនទាំងនេះផងដែរ ។ ប្រធានាធិបតីអាមេរិក លោក ចូ បៃដិន និងអតីតប្រធានាធិបតីអាមេរិក លោក ដូណាល់ ត្រាំ បានប្រើបញ្ជីខ្មៅនេះគ្រប់គ្រងលើក្រុមហ៊ុនចិន និងកងទ័ពចិន ដើម្បីទប់ស្កាត់ការអភិវឌ្ឍនានា ។ មុននេះ អាមេរិកបានបញ្ជាក់យ៉ាងប្រាកដប្រជាថា រោងចក្រដែលផលិតបាឡុងរបស់ចិនមានទំនាក់ទំនងដោយផ្ទាល់ជាមួយកងទ័ពចិន ។

ជាមួយគ្នានេះ អ្នកនាំពាក្យក្រសួងការបរទេសចិន លោកស្រី ម៉ៅ នីង បង្ហាញថា ប្រទេសចិនជំទាស់យ៉ាងខ្លាំងចំពោះករណីសភាតំណាងរាស្ត្រអាមេរិកថ្កោលទោសបាឡុងរបស់ចិន ដែលបានហោះចូលទៅកាន់ដែនអាកាសអាមេរិក ដោយលោកស្រីលើកឡើងថា ការថ្កោលទោសរបស់អាមេរិកនេះជារឿងនយោបាយសុទ្ធសាធ ។ កាលពីថ្ងៃទី៩ ខែកុម្ភៈ កន្លងមក សភាតំណាងរាស្ត្រអាមេរិកបានសម្រេចជាឯកច្ឆ័ន្ទថ្កោលទោសបាឡុងរបស់ចិនថា បានរំលោភលើដែនអាកាសអាមេរិក ។

ទោះយ៉ាងណា ក្រសួងការពារជាតិអាមេរិកជឿជាក់ថា បាឡុងរបស់ចិនបានលួចឃ្លាំមើលទីកន្លែងទុកដាក់អាវុធសំខាន់ៗរបស់ខ្លួន ប៉ុន្តែចិនអះអាងថា បាឡុងនេះមានគោលបំណងស្រាវជ្រាវឧតុនិយមតែប៉ុណ្ណោះ ហើយមិនបានតាំងចិត្តហោះមកកាន់ដែនអាកាសអាមេរិកទេ ៕

ប្រភព ៖ TNN World

ការរលាយ នៃផ្ទាំងទឹកកកហូរទៅចូលបឹងនានា ដែលនៅក្បែរខាងនឹងបង្កើតជាទឹកជំនន់ភ្លាមៗពីបឹងទាំងនោះ ហើយបង្កការគំរាមកំហែងដល់មនុស្ស ១៥លាននាក់នៅទូទាំងពិភពលោក។

ការសិក្សាចុងក្រោយ  របស់ក្រុមអ្នកវិទ្យាសាស្រ្ត សាកលវិទ្យាល័យ Newcastle University បានពិនិត្យមើលឃើញថាអាងទឹក បឹង និងផ្ទាំងទឹកកក ចំនួន ១ ០៨៩ នៅ ទូទាំងពិភពលោក និងចំនួនប្រជាជនដែលរស់ ក្នុងតំបន់ដែលមានចម្ងាយ ៥០គីឡូម៉ែត្រ ពីបឹងក៏ដូចជាកម្រិត នៃការអភិវឌ្ឍន៍នៅក្នុង តំបន់បឹងទាំងនោះ និងសូចនាករសង្គមផ្សេងទៀតដែលជាសញ្ញាសម្គាល់នៃភាពងាយរងគ្រោះពី ទឹកជំនន់បឹង Glacial (GLOF)។

លទ្ធផល បានគូសបញ្ជាក់ថាមនុស្ស ១៥លាននាក់រស់ដែលប្រឈមមុខនឹងGLOF រស់នៅក្នុងចម្ងាយ ៥០គីឡូម៉ែត្រ ពីបឹងផ្ទាំងទឹកកក ហើយអ្នកដែលរស់នៅតំបន់ភ្នំខ្ពស់ នៅអាស៊ី ទាំងខ្ពង់រាបទីបេ និង ខ្ពង់រាប ផ្សេងទៀត ពីកៀហ្ស៊ីស៊ីស្ថាន ទៅចិនមានគ្រោះថ្នាក់ GLOF ខ្ពស់បំផុតដោយមនុស្ស ជាង ៩,៣ លាននាក់ អាចប្រឈមនឹងហានិភ័យ នេះ។

ដោយឡែកឥណ្ឌា និង ប៉ាគីស្ថាន មានអ្នករងផលប៉ះពាល់ប្រហែល៥លាននាក់ដែលស្មើនឹង១/៣ នៃចំនួនមនុស្ស រងហានិភ័យ ដែលការសិក្សារកឃើញ។

គួរបញ្ជាក់ថា នៅពេលធាតុអាកាសកាន់តែក្ដៅ ផ្ទាំងទឹកកករលាយហើយហូរចូលបឹងឬ បង្កើតបានជាបឹង ។ បឹងនោះ អាចផ្ទុះឡើងភ្លាមៗហើយបង្កើតបានជា GLOF ដែលហូរយ៉ាងលឿនទៅចម្ងាយរាប់គីឡូម៉ែត្រ ដោយ ក្នុងករណីខ្លះរហូតដល់១២០គីឡូម៉ែត្រ ។ ការសិក្សាអះអាងថាGLOFsអាចបង្កការបំផ្លិចបំផ្លាញ ទ្រព្យសម្បត្តិ ហេដ្ឋារចនាសម្ព័ន្ធ និង ដីកសិកម្ម យ៉ាងធ្ងន់ធ្ងរហើយអាចនាំឱ្យបាត់បង់អាយុជីវិតយ៉ាងច្រើនទៀតផង៕

ប្រភព៖ Environment Journal