ហុងកុង ៖ ការិយាល័យស្ថិតិ និងជំរឿនពលរដ្ឋរបស់រដ្ឋាភិបាលហុងកុង ស្ថិតនៅភាគខាងត្បូងប្រទេសចិន បានរាយការណ៍ជាបណ្តោះអាសន្នពីចំនួនពលរដ្ឋហុងកុងថា នៅចុងឆ្នាំ២០២២ ស្មើប្រមាណ៧.៣៣៣.២០០នាក់ ធ្លាក់ចុះ៦៨.៣០០នាក់ ឬ០,៩% ពីចំនួន៧.៤០១.៥០០នាក់នៅចុងឆ្នាំ២០២១ ។ លើសពីនេះ រដ្ឋាភិបាលក៏បានប្រកាសថា ហុងកុងកំពុងតែខ្វះខាតអ្នកមានជំនាញពីបរទេសមកធ្វើការផងដែរ ។

សេចក្តីរាយការណ៍បញ្ជាក់ថា ការធ្លាក់ចុះចំនួនពលរដ្ឋតាមធម្មជាតិនៅចុងឆ្នាំ២០២១ រហូតដល់ចុងឆ្នាំ២០២២ ស្មើប្រមាណ២៩.៥០០នាក់ និងមានអត្រាកំណើតថ្មីចំនួន៣២.៥០០នាក់ ហើយមានពលរដ្ឋស្លាប់ចំនួន៦២.១០០នាក់ ។

អ្នកនាំពាក្យរដ្ឋាភិបាលហុងកុងបានឱ្យដឹងថា ជំងឺរាតត្បាតបានធ្វើឱ្យប៉ះពាល់ដល់ការមករស់នៅហុងកុងរបស់អ្នកមានទេពកោសល្យ ជាពិសេស អ្នកកាន់ទិដ្ឋាការការងារ ទិដ្ឋាការស្នាក់នៅរយៈពេលខ្លី ខណៈចំនួនពលរដ្ឋបានធ្លាក់ចុះនៅឆមាសទី២ ឆ្នាំ២០២២ គឺតិចជាង បើធៀបនឹងឆមាសទី១ ឆ្នាំ២០២២ ។ វាឆ្លុះបញ្ចាំងឱ្យឃើញពីការផ្លាស់ប្តូរនៃចំនួនពលរដ្ឋហុងកុងត្រឡប់មកសភាពធម្មតាឡើងវិញបន្តិចម្តងៗ ។

គេសង្កេតឃើញថា មានកត្តាជាច្រើនបានជះឥទ្ធិពលដល់លំហូរចូលរបស់អ្នកមានជំនាញកាន់តែតិចទៅៗ នៅពេលសង្គម និងសេដ្ឋកិច្ចរបស់ហុងកុងត្រឡប់មករកសភាពធម្មតាវិញ ខណៈហុងកុងបានបើកឱ្យមានការធ្វើដំណើរជាធម្មតារវាងពលរដ្ឋហុងកុងជាមួយប្រទេសចិន និងប្រទេសនានាទូទាំងពិភពលោក ។

អ្នកនាំពាក្យរដ្ឋាភិបាលហុងកុងបន្ថែមថា រដ្ឋាភិបាលហុងកុងមានគោលដៅទទួលយកអ្នកមានជំនាញយ៉ាងតិចចំនួន៣៥.០០០នាក់ក្នុង១ឆ្នាំ ដោយអនុញ្ញាតឱ្យពួកគេអាចរស់នៅហុងកុងយ៉ាងតិច១២ខែ តាមរយៈផែនការទទួលយកអ្នកមានជំនាញមករស់នៅហុងកុង រវាងឆ្នាំ២០២៣ ដល់ឆ្នាំ២០២៥ ៕

ប្រភព ៖ newpapertoday

លោកស្រី Susan Wojcicki ជា CEO របស់យូធូប (YouTube) បានប្រកាសលាលែងពីតំណែងរបស់ខ្លួន បន្ទាប់ពីលោកស្រីបានបំពេញតួនាទីជា CEO អស់រយៈពេល៩ឆ្នាំ ប៉ុន្តែលោកស្រីនៅតែបំពេញតួនាទីជាទីប្រឹក្សារបស់ YouTube និង Alphabet ជាក្រុមហ៊ុនមេបន្តទៀត ។

លោកស្រីបញ្ជាក់ថា ពេលនេះ ជាពេលសមស្របបំផុតក្នុងការសម្រេចចិត្តលាឈប់ពីការងារ ពីព្រោះយូធូបមាននាយកគ្រប់គ្រងពូកែៗជាច្រើននាក់ទៀត ។ ចំណែកហេតុផលនៃការលាឈប់ពីតំណែង CEO របស់យូធូបនោះ គឺដោយសារតែលោកស្រីត្រូវការចាប់ផ្តើមជីវិតថ្មី ដោយផ្តល់ភាពសំខាន់ដល់ក្រុមគ្រួសារ សុខភាព និងរឿងផ្ទាល់ខ្លួន រួមទាំងគម្រោងនានាដែលលោកស្រីចាប់អារម្មណ៍ផងដែរ ។

ចំណែកអ្នកនឹងបំពេញមុខតំណែងជា CEO ថ្មី គឺ Neal Mohan កាន់តំណែងជា Chief Product Office របស់យូធូប ដែលបានមករួមការងារជាមួយ Google តាំងពីឆ្នាំ២០០៧ រួមទាំងសហការការងារជាមួយលោកស្រី Susan Wojcicki អស់រយៈពេលជាច្រើនឆ្នាំ ។

បច្ចុប្បន្ន លោកស្រី Susan Wojcicki មានអាយុ៥៤ឆ្នាំ ជានាយកគ្រប់គ្រងម្នាក់ក្នុងចំណោមនាយកគ្រប់គ្រងស្ត្រីដ៏សំខាន់លើការងារបច្ចេកវិទ្យា ក្នុងចំណោមនាយកគ្រប់គ្រងជាបុរស ។ លើសពីនេះ លោកស្រីក៏ជាបុគ្គលិកត្រួសត្រាយផ្លូវរបស់ Google តាំងពីឆ្នាំ១៩៩៨ និងជាបុគ្គលិកលំដាប់ទី១៦ របស់ក្រុមហ៊ុនទៀតផង ។

ក្រៅពីនេះ លោកស្រីក៏បានចូលរួមចំណែកជំរុញស្ថាបនិកទាំងពីររបស់ Google ដូចជា Larry Page និង Sergey Brin ដែលបានសម្រេចចិត្តទិញយកអាជីវកម្មយូធូបសម្រាប់វីដេអូកាលពីឆ្នាំ២០០៦ ក្នុងទឹកប្រាក់ជាង១.៦៥០លានដុល្លារអាមេរិក ។ ប៉ុន្តែអ្វីគួរឱ្យចាប់អារម្មណ៍បំផុត ហើយមនុស្សភាគច្រើនមិនទាន់ដឹងនោះ គឺលោកស្រី Susan Wojcicki ត្រូវបានគេចាត់ទុកថា ជា «Landlord» មនុស្សដំបូងរបស់ Google ដោយសារលោកស្រីបានអនុញ្ញាតឱ្យស្ថាបនិក Google ទាំងពីរជួលយានដ្ឋានក្នុងលំនៅឋានរបស់លោកស្រី ក្នុងតម្លៃ១.៧០០ដុល្លារអាមេរិកក្នុង១ខែសម្រាប់ធ្វើជាការិយាល័យដំបូងរបស់ Google មុននឹងផ្លាស់ចេញទៅជួលការិយាល័យថ្មី ៕

ប្រភព ៖ MarketThink

ប្រទេសអាល្លឺម៉ង់ ៖ កាលពីថ្ងៃទី១៧ ខែកុម្ភៈ កន្លងមក បុគ្គលិកបម្រើការនៅអាកាសយានដ្ឋានបានប្រមូលផ្តុំគ្នាធ្វើបាតុកម្មអស់រយៈពេល២៤ម៉ោង នៅអាកាសយានដ្ឋានធំៗចំនួន៧កន្លែងទូទាំងប្រទេសអាល្លឺម៉ង់ ដែលបណ្តាលឱ្យជើងហោះហើរជាច្រើនត្រូវផ្អាក និងប៉ះពាល់ដល់អ្នកដំណើរប្រមាណ៣០ម៉ឺននាក់ ។

សមាគមអាកាសយានដ្ឋានអាល្លឺម៉ង់បង្ហាញថា មានជើងហោះហើរចំនួន២.៣៤០ជើងត្រូវបានលុបចោល ដែលធ្វើឱ្យប៉ះពាល់ដល់អ្នកដំណើរចំនួន២៩ម៉ឺន៥ពាន់នាក់ ដោយសារតែបុគ្គលិកបម្រើការងារក្នុងអាកាសយានដ្ឋានចំនួន៧កន្លែងមិនព្រមបំពេញធ្វើការរបស់ខ្លួន ហើយប្រមូលផ្តុំគ្នាធ្វើបាតុកម្ម ។

អាកាសយានដ្ឋានរងផលប៉ះពាល់រួមមាន អាកាសយានដ្ឋាននៅក្រុង Frankfurt និង Munich ខណៈអាកាសយានដ្ឋានទាំងពីរកន្លែងនេះជាមជ្ឈមណ្ឌលកណ្តាលសម្រាប់ការហោះហើរ និងមានអ្នកដំណើរច្រើនបំផុតរបស់អាល្លឺម៉ង់ បានលុបចោលជើងហោះហើររបស់ខ្លួនទាំងអស់ ។ បុគ្គលិកបម្រើការក្នុងអាកាសយានដ្ឋានដែលរួមគ្នាធ្វើបាតុកម្មភាគច្រើនមកពីក្រុង Bremen, Dortmund, Hamburg, Hannover និង Stuttgart ។ ជើងហោះហើរអន្តរជាតិភាគច្រើនបានផ្លាស់ប្តូរតារាងហោះហើរជាថ្មី ហើយគេបានកក់សំបុត្ររថភ្លើងជំនួសវិញសម្រាប់អ្នកដំណើរក្នុងស្រុក ។

ការរួមគ្នាធ្វើបាតុកម្មរបស់បុគ្គលិកបម្រើការក្នុងអាកាសយានដ្ឋាន គឺជាសមាជិករបស់សហភាពការងារ Verdi ដោយពួកគេអំពាវនាវឱ្យដំឡើងប្រាក់ខែ១០,៥% ឬដំឡើងប្រាក់ខែយ៉ាងតិច៥០០យូរ៉ូក្នុង១ខែ ដើម្បីកាត់បន្ថយផលប៉ះពាល់ដោយសារអតិផរណាកើនឡើង ខណៈតម្លៃថាមពល និងម្ហូបអាហារក៏បានកើនឡើងដូចគ្នា ។

ការធ្វើបាតុកម្មនេះកើតឡើង ស្របពេលមានកិច្ចប្រជុំស្តីពីសន្តិសុខនៅក្រុង Munich ដែលគេសង្ឃឹមថា នឹងមានមេដឹកនាំជាង៤០ប្រទេស និងរដ្ឋមន្ត្រី៦០រូបទៀតមកពីបណ្តាប្រទេសទូទាំងពិភពលោកចូលរួម ។ គេរាយការណ៍ថា ការលុបចោលជើងហោះហើរនានាបានធ្វើឱ្យប៉ះពាល់ដល់រដ្ឋមន្ត្រីក្រសួងការបរទេសប្រទេសរូម៉ានី ដែលនឹងធ្វើដំណើរមកចូលរួមកិច្ចប្រជុំផងដែរ ៕

ប្រភព ៖ NationWorldNews

មន្ត្រីប៉ូលិសជាន់ខ្ពស់ម្នាក់ត្រូវបានសម្លាប់ និងបួននាក់ផ្សេងទៀតបានរងរបួស ក្រោយពេលដែលគ្រាប់បែកមួយបានផ្ទុះឡើង ខណៈពេលដែលពួកគេកំពុងពិនិត្យមើលកន្លែងកើតហេតុឧក្រិដ្ឋកម្មនៅក្នុងខេត្តព្រំដែនភាគខាងត្បូងនៃខេត្តយ៉ាឡា។

មុនពេលកើត​ហេតុ ​នៅ​តាម​បណ្តោយ​ផ្លូវ Bannang Sata ដល់ផ្លូវ Thanto ជា​កន្លែង​ដែល​មាន​គ្រឿងចក្រ ជាច្រើន​របស់​ក្រុមហ៊ុន​សាងសង់​ផ្លូវ Yala Highway ត្រូវ​បាន​ភ្លើង​ឆេះ​ ហើយក៏មានការ​វាយ​ប្រហារ​ដោយ​កាំភ្លើង​បាន​កើត​ឡើង​រវាង​ទាហាន​ឆ័ត្រយោង​ និង​ក្រុម​ជន​សង្ស័យ​បះបោរផងដែរ។

អំពើហឹង្សានៅតែបន្តកើតមាននៅក្នុងតំបន់ជ្រៅភាគនិរតីនៃជនជាតិមូស្លីម ខណៈដែលការបះបោរបំបែកខ្លួនបានបន្លាយពេលអស់រយៈពេល ២០ឆ្នាំ។

ការផ្ទុះគ្រាប់បែកនេះជាលើកដំបូងហើយនៅក្នុងឆ្នាំ២០២៣នេះ ស្របពេលដែលឆ្នាំ២០២២កន្លងទៅ មានការបំផ្ទុះ៦៩កន្លែង ដែលបានសម្លាប់មនុស្ស៣៣នាក់៕

ប្រភព៖ Nation Thailand

ប្រទេសចិន ៖ ប្រទេសចិនបានប្រកាសដាក់ទណ្ឌកម្មក្រុមហ៊ុនអាមេរិកចំនួន២ គឺ Lockheed Martin ជាក្រុមហ៊ុនធំក្នុងពិភពលោក ដែលមានឯកទេសផ្នែកលំហអាកាស និងការពារប្រទេស និងក្រុមហ៊ុន Raytheon Technologies Corp មានឯកទេសផ្នែកប្រព័ន្ធការពារមីស៊ីល និងការពារប្រទេស ។ ចិនបានចុះឈ្មោះក្រុមហ៊ុនទាំងពីរនេះទៅក្នុងបញ្ជី «អង្គការមិនគួរឱ្យទុកចិត្ត» ដោយសារក្រុមហ៊ុនទាំងពីរបានលក់អាវុធទៅឱ្យតៃវ៉ាន់ ។ លើសពីនេះ ចិនបានបញ្ជាមិនឱ្យក្រុមហ៊ុនទាំងពីរនាំចូល ឬនាំចេញផលិតផលផ្សេងៗដែលពាក់ព័ន្ធនឹងចិនផងដែរ ។

ការប្រកាសដាក់ទណ្ឌកម្មនេះ គឺជាសកម្មភាពចម្រូងចម្រាស់ចុងក្រោយបង្អស់រវាងអាមេរិក និងចិន ក្រោយពីអាមេរិកបានបាញ់បាឡុងស៊ើបការណ៍របស់ចិនធ្លាក់កាលពីសប្តាហ៍កន្លងមក ហើយចិនប្រកាសទៅវិញថា នឹងចេញវិធានការប្រឆាំងនឹងអាមេរិក ដែលបានបំផ្លាញអធិបតេយ្យភាព និងសន្តិសុខរបស់ចិន ។

ក្រុមហ៊ុនទាំងពីរដែលត្រូវបានចិនដាក់ទណ្ឌកម្ម មិនបានលក់ផលិតផលយោធាទៅឱ្យប្រទេសចិនទេ ហើយពេលនេះ ក្រុមហ៊ុនទាំងពីរក៏មិនទាន់បញ្ចេញយោបល់អ្វីដែរ ។ ការប្រកាសដាក់ទណ្ឌកម្មរបស់ចិនបានរាលដាលទៅដល់ការហាមឃាត់នាយកគ្រប់គ្រងក្រុមហ៊ុនទាំងពីរចូលមកប្រទេសចិន និងមិនអនុញ្ញាតឱ្យបុគ្គលិកក្រុមហ៊ុនមានសិទ្ធិរស់នៅចិនបន្តទៀត ។ លើសពីនេះ ចិនបានពិន័យជាប្រាក់ទ្វេដងនៃតម្លៃអាវុធដែលក្រុមហ៊ុនទាំងពីរបានចុះកិច្ចសន្យាលក់ឱ្យតៃវ៉ាន់ ប៉ុន្តែគេមិនទាន់ច្បាស់ទេថា តើចិននឹងពិន័យរបៀបណា ហើយត្រូវដាក់លក្ខខណ្ឌថា មានការបង់ប្រាក់ពិន័យត្រឹមរយៈពេល១៥ថ្ងៃ ។ គួរបញ្ជាក់ថា កាលពីឆ្នាំ២០២២ កន្លងមក ចិនក៏ធ្លាប់បានប្រកាសដាក់ទណ្ឌកម្មក្រុមហ៊ុនទាំងពីរផងដែរ រឿងលក់អាវុធឱ្យតៃវ៉ាន់ ក្នុងតម្លៃ១០០លានដុល្លារអាមេរិក ។

ចំណែកអ្នកនាំពាក្យសេតវិមានបានឱ្យដឹងថា ការដាក់ទណ្ឌកម្មរបស់ចិននេះ គ្រាន់តែជាសកម្មភាពនិមិត្តសញ្ញាប៉ុណ្ណោះ ហើយវាមិនចាំបាច់ទេ ។ អ្នកនាំពាក្យរូបនេះបន្ថែមថា ការបញ្ជូនបាឡុងស៊ើបការណ៍របស់ចិនមកបំពានលើដែនអាកាសអាមេរិកដោយគ្មានការអនុញ្ញាតនោះ គឺគ្មានការទទួលខុសត្រូវ ហើយវាអាស្រ័យលើការសម្រេចចិត្តរបស់ចិនថា តើចង់ឱ្យទំនាក់ទំនងរវាងចិន និងអាមេរិកក្លាយទៅជាបែបណា ៕
ប្រភព ៖ NationWorldNews