រដ្ឋធានីមូស្គូ៖ នៅក្នុងរយៈពេលប៉ុន្មានថ្ងៃកន្លងទៅថ្មីៗនេះ វត្ថុហោះហើរនៅលើអាកាស ដែលមិនអាចកំណត់អត្ដសញ្ញាណបាន (UFO) បានធ្លាក់នៅក្នុងប្រទេសរុស្ស៊ី បង្ហាញអំពីគ្រោះថ្នាក់មួយចំនួន ចូលខិតជិតដល់រដ្ឋធានីមូស្គូ និង ជាទឹកដីកំណើតរបស់ប្រធានាធិបតី លោក វ៉្លាឌីមៀ ពូទីន ហើយសកម្មភាពបែបនេះ កំពុងតែធ្វើឲ្យប្រទេសមហាអំណាចយោធាមួយនេះ មានការព្រួយបារម្ភយ៉ាងខ្លាំង។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃព្រហស្បតិ៍ ទី២ ខែមីនា ថា ក្រុមមន្ត្រីរុស្ស៊ី និង បណ្ដាញផ្សព្វផ្សាយ កំពុងតែប្រើពាក្យ ថា វត្ថុបរទេសមិនស្គាល់អត្ដសញ្ញាណ មើលទៅហាក់បីដូចជាមិនគួរឲ្យខ្លាច ហើយកំពុងតែចោទប្រកាន់ដល់អ៊ុយក្រែន អំពីការវាយប្រហារ ដោយយន្តហោះគ្មានមនុស្សបើក ឬ ដ្រូន។ ដោយឡែក អ៊ុយក្រែន វិញ កាលពីថ្ងៃពុធ បានច្រានចោល ចំពោះការកំណត់គោលដៅទៅលើរុស្ស៊ី។

លោក មីខៃឡូ ប៉ូដូលយ៉ាក (Mykhailo Podolyak) ទីប្រឹក្សា ប្រធានាធិបតីអ៊ុយក្រែន បានសរសេរនៅលើបណ្ដាញសង្គម Twitter ថា «អារម្មណ៍ភ័យស្លន់ស្លោ និង បរាជ័យ កំពុងកើនឡើង នៅរុស្ស៊ី។ សកម្មភាពបែបនេះ បានបង្ហាញអំពីការបង្កើននូវការវាយប្រហារ នៅក្នុងប្រទេសដោយវត្ថុហោះហើរមិនស្គាល់អត្តសញ្ញាណ ប្រឆាំងនឹងទីតាំងហេដ្ឋារចនាសម្ព័ន្ធ»។

ទោះជាយ៉ាងណាក៏ដោយ នៅក្នុងសង្គ្រាម អស់រយៈពេលជាងមួយឆ្នាំកន្លងមកនេះ មេដឹកនាំអ៊ុយក្រែន តែងតែបដិសេធនូវការទទួលខុសត្រូវ ចំពោះការវាយប្រហារជារឿយៗ នៅលើទឹកដីរបស់រុស្ស៊ី។ បន្ថែមពីលើនេះ ក្រុមមន្រ្ដីរបស់ក្រុងកៀវ តែងតែសើចចំអកឲ្យក្រុងមូស្គូ អំពីអសមត្ថភាពរបស់កម្លាំងទាហានរុស្ស៊ី។

ដោយឡែក លោកឧត្ដមសេនីយ៍ អ៊ីហ័រ រ៉ូម៉ាណែនកូ (Ihor Romanenko) អតីតនាយរងអគ្គសេនាធិការកងទ័ពអ៊ុយក្រែន បានបញ្ជាក់ ថា ថ្វីបើក្រុងកៀវ មានសមត្ថភាពអាច និង គួរតែវាយប្រហារ ទៅលើទឹកដីរបស់រុស្ស៊ី យ៉ាងណាក៏ដោយ ក៏អ៊ុយក្រែន មិនចង់បង្ហាញព័ត៌មានលម្អិត អំពីប្រតិបត្ដិការរបស់ខ្លួននោះដែរ។ បើតាមគោលការណ៍ យើងទទួលបានបទបញ្ជាឲ្យវាយប្រហារតែទៅលើប្រទេសឈ្លានពាន។ ប៉ុន្តែយើងប្រកាន់ខ្ជាប់នូវច្បាប់ ត្រង់ថា ប្រសិនបើ ការវាយប្រហារកើតឡើង គួរតែកំណត់គោលដៅទៅលើទីតាំងយោធា ជាមុនសិន។

ក្រុមអ្នកវិភាគ បានអះអាង ថា អ៊ុយក្រែន កំពុងតែរៀបចំវាយប្រហារបន្ថែមទៀត ដោយការប្រើប្រាស់ដ្រូន។ សកម្មភាពបែបនេះ កំពុងតែធ្វើឲ្យក្រុមមន្រ្ដីកំពូលៗ គាំទ្រដោយវិមានក្រឹមឡាំង ព្រួយបារម្ភកាន់តែខ្លាំងឡើង។ ចំណែក កាលពីថ្ងៃទី២៦ ខែកុម្ភៈ មានការបំផ្ទុះចំនួនពីរគ្រាប់ បានធ្វើឱ្យកក្រើកអាកាសយានដ្ឋានមួយ នៅក្នុងប្រទេសបេឡារុស គាំទ្រដោយប្រធានាធិបតី លោក វ៉្លាឌីមៀ ពូទីន បណ្ដាលឱ្យខូចខាត ដល់យន្តហោះដ៏ទំនើបមួយគ្រឿង នៅក្នុងចំណោមយន្តហោះ A-50 ចំនួន៩គ្រឿង។ ប៉ុន្ដែក្រោមមក ក្រុមប្រឆាំងបេឡារុស បានចេញមុខ អះអាងទទួលខុសត្រូវ អំពីសកម្មភាពបំផ្ទុះនេះ។ ចំណែក កាលពីរាត្រីថ្ងៃចន្ទ ទី២៧ ខែកុម្ភៈ ក៏មានការដ្រូនយ៉ាងតិចចំនួន៤គ្រឿង បានធ្លាក់ក្បែរស្ថានីយថាមពល នាភាគខាងលិច ទីក្រុងបែលហ្គោរ៉ូដ (Belgorod) ប្រទេសរុស្ស៊ី ដែលមានចម្ងាយ៤០គីឡូម៉ែត្រពីព្រំដែន ខណៈកាលពីថ្ងៃអង្គារ មានវត្ថុហោះហើរមួយ បានស្ថិតនៅលើទីក្រុង St Petersburg ជាទីកន្លែងកំណើតរបស់លោក ពូទីន។

កាលពីដើមខែធ្នូ ឆ្នាំ២០២២ ដ្រូនរបស់អ៊ុយក្រែន បានវាយប្រហារទៅលើមូលដ្ឋានទ័ពអាកាសផ្ទុកយន្ដហោះទម្លាក់គ្រាប់បែកយុទ្ធសាស្រ្ដរបស់រុស្ស៊ី ដែលមានចម្ងាយ៦៥០គីឡូម៉ែត្រ ពីព្រំដែនភាគខាងកើតអ៊ុយក្រែន។ ភាគច្រើន ការវាយប្រហារនេះ ទំនងជាប្រើប្រាស់យន្តហោះគ្មានមនុស្សបើក ឬ ដ្រូន Tu-141 ត្រូវបានរចនាឡើង នៅក្នុងសម័យសូវៀត ហើយត្រូវបានកែច្នៃឡើងវិញ នៅទីក្រុងខាកូវ (Kharkov) នាភាគខាងកើត ប្រទេសអ៊ុយក្រែន។

បណ្ដាញផ្សព្វផ្សាយរបស់រុស្ស៊ី បានអះអាង ថា ការវាយប្រហារផ្សេងៗទៀត ត្រូវបានធ្វើឡើង ដោយដ្រូនផលិត ដោយរុស្ស៊ី ប្រភេទ Granat-4 (ហ្កាណាត-៤) ដ្រូនស៊ីវិលរបស់ចិនបំពាក់គ្រឿងបំផ្ទុះផលិតដោយអង់គ្លេស ឬ ដ្រូន UJ-22 ផលិតដោយអ៊ុយក្រែន។ ដោយឡែក ក្រុមហ៊ុនផលិតដ្រូនរបស់អ៊ុយក្រែន Ukrjet ធ្លាប់អះអាង ថា ដ្រូន UJ-22 របស់ខ្លួន មានសមត្ថភាពហោះហើរ រហូតដល់ចម្ងាយ៨០០គីឡូម៉ែត្រ។ ដូច្នេះដ្រូននេះ អាចហោះហើរ ចេញពីប្រទេសអ៊ុយក្រែន សមល្មមនឹងវាយប្រហារ ដល់តំបន់ជាច្រើនរបស់រុស្ស៊ី។

លោក អេនតុន ហ្គេរ៉ាសចេនកូ (Anton Gerashchenko) ទីប្រឹក្សា ក្រសួងមហាផ្ទៃអ៊ុយក្រែន បានបង្ហោះរូបភាពដ្រូន នៅលើបណ្ដាញសង្គម ថា «ដ្រូនUJ-22 នេះ អាចហោះហើរ នៅក្នុងចម្ងាយ ៥០០គីឡូម៉ែត្រ ចេញពីព្រំដែន រវាងប្រទេសរុស្ស៊ី និង អ៊ុយក្រែន។ ដូច្នេះនៅក្នុងរយៈពេលមិនយូរប៉ុន្មាន លោក វ៉្លាឌីមៀ ពូទីន ប្រធានាធិបតីរុស្ស៊ី អាចនឹងភ័យខ្លាច ហើយក៏លែងហ៊ានបង្ហាញខ្លួនឯង ជាសាធារណៈ ដោយសារតែយន្តហោះគ្មានមនុស្សបើក ឬ ដ្រូននេះ អាចមានសមត្ថភាពហោះហើរ នៅក្នុងរយៈចម្ងាយឆ្ងាយ»។

ដោយឡែក ក្រសួងការពារជាតិរុស្ស៊ី បានចោទប្រកាន់ ដល់រដ្ឋាភិបាលអ៊ុយក្រែន អំពីការប៉ុនប៉ង ប្រើប្រាស់ដ្រូន វាយប្រហារ ប្រឆាំងនឹងហេដ្ឋារចនាសម័្ពន្ធស៊ីវិល នៅក្នុងតំបន់ក្រាស្នូដា (Krasnodar) និង សាធារណរដ្ឋអាឌីហ្គា (Adygea) ប្រទេសរុស្ស៊ី៕

ប្រទេសចិន ៖ អ្នកនាំពាក្យក្រសួងការបរទេសចិន លោកស្រី Mao Ning បានបង្ហាញថា ចិននៅតែមានទំនាក់ទំនងជាមួយភាគីពាក់ព័ន្ធទាំងអស់ក្នុងជម្លោះរវាងរុស្ស៊ីជាមួយអ៊ុយក្រែន មិនថាបណ្តាប្រទេសលោកខាងលិច រុស្ស៊ី ហើយចិនក៏មានទំនាក់ទំនងជាមួយរដ្ឋាភិបាលអ៊ុយក្រែនផងដែរ ។ ការអះអាងនេះ គឺជាការឆ្លើយតបទៅកាន់សំណួររបស់ប្រធានាធិបតីអ៊ុយក្រែន លោក Volodymyr Zelensky ដែលនិយាយថា លោករីករាយក្នុងការពិភាក្សាជាមួយចិន ហើយលោកមានផែនការជជែកជាមួយប្រធានាធិបតីចិន លោក ស៊ី ជិនពីង ។

លោកស្រី Mao Ning ថ្លែងថា គោលជំហររបស់ចិនចំពោះវិបត្តិនៅអ៊ុយក្រែន គឺមានភាពច្បាស់លាស់ណាស់ និងមិនផ្លាស់ប្តូរ ដោយចិនគាំទ្រការចរចាសន្តិភាព និងជំរុញការដោះស្រាយបញ្ហានយោបាយ ។ កាលពីថ្ងៃទី២៤ ខែកុម្ភៈ កន្លងមក លោក Zelensky និយាយថា លោកមានផែនការជជែកជាមួយប្រធានាធិបតីចិន លោក ស៊ី ជិនពីង ប៉ុន្តែលោកមិនបានបញ្ជាក់ថា នឹងជជែកនៅពេលណាទេ ។

ជាមួយគ្នានេះ អ្នកនាំពាក្យក្រសួងការបរទេសចិនថ្លែងថា ការដាក់ទណ្ឌកម្មលើបណ្តាក្រុមហ៊ុនរបស់ចិន ករណីបញ្ជូនអាវុធឱ្យរុស្ស៊ីនោះជារឿងខុសច្បាប់ ចំណែកការប្រព្រឹត្តរបស់អាមេរិកមិនស្របច្បាប់អន្តរជាតិទេ ហើយក៏មិនទទួលការអនុញ្ញាតពីក្រុមប្រឹក្សាសន្តិសុខអង្គការសហប្រជាជាតិដែរ ។ ដូច្នេះ ការប្រព្រឹត្តរបស់អាមេរិកបានបង្កការខូចខាតធ្ងន់ធ្ងរដល់ផលប្រយោជន៍របស់ចិន ហើយចិនមិនពេញចិត្តយ៉ាងខ្លាំង និងប្រឆាំងរឿងនេះ ។ អ្នកនាំពាក្យក្រសួងការបរទេសចិនថ្លែងបែបនេះ ក្រោយពីអាមេរិកដាស់តឿនចិនអំពីផលវិបាកធ្ងន់ធ្ងរ បើចិនបញ្ជូនអាវុធឱ្យកងទ័ពរុស្ស៊ីឈ្លានពានអ៊ុយក្រែន ៕

ប្រភព ៖ TNN World

ប្រទេសជប៉ុន ៖ កាលពីថ្ងៃទី២៤ ខែកុម្ភៈ កន្លងមក ក្រុមហ៊ុនផលិតរថយន្តចិន BYD បានប្រគល់រថយន្តក្រុងអគ្គិសនីសម្រាប់ទីក្រុងគីតាហ៊ីរ៉ូ ស៊ីម៉ា ខេត្តហុកកៃដូ របស់ជប៉ុន ខណៈទីក្រុងនេះបានព្យាយាមបង្កើនការប្រើប្រាស់ថាមពលអគ្គិសនី ។ រថយន្តក្រុងអគ្គិសនីមានចំនួន៥គ្រឿងនឹងដឹកជញ្ជូនអ្នកដំណើររវាងខេត្តហុកកៃដូ និង Ballpark F Village ជាមជ្ឈមណ្ឌលកីឡា និងការកម្សាន្តក្នុងស្រុក ជាមួយស្ថានីយរថភ្លើងគីតាហ៊ីរ៉ូ ស៊ីម៉ា ។ គេចាត់ទុកថា ជាការប្រគល់រថយន្តក្រុងអគ្គិសនីដំបូងគេនៅខេត្តហុកកៃដូ របស់ក្រុមហ៊ុន BYD Japan Co., Ltd ។

រថយន្តក្រុងនេះនឹងចាប់ផ្តើមផ្តល់សេវាកម្មនៅថ្ងៃទី១៤ ខែមីនា ដោយវាសមស្របជាមួយអ្នកដំណើរមានអាយុច្រើន និងអាចដឹកអ្នកដំណើរបាន៨០នាក់ ។ វាត្រូវបានគេតុបតែងឡើងដោយមានផ្ទៃភាគច្រើនពណ៌ខ្មៅ ដើម្បីបង្ហាញពីទីលានកីឡា S.Con Field Hokkaido ។

Harunari Nishimura ប្រធានក្រុមហ៊ុន Hokkaido Bus បង្ហាញថា រថយន្តក្រុងអគ្គិសនីចាប់ផ្តើមដំណើរការប្រើប្រាស់ដំបូងមានអត្ថន័យសំខាន់យ៉ាងខ្លាំង ព្រោះហុកកៃដូស្ទើរតែគ្មានបទពិសោធន៍ផ្នែកនេះ ហើយប្រទេសជប៉ុនមានអត្រាការប្រើប្រាស់រថយន្តអគ្គិសនីទាប ។

Maezawa Ken នាយកប្រតិបត្តិ និងជាអ្នកគ្រប់គ្រងទូទៅផ្នែកប្រតិបត្តិការអាជីវកម្មរបស់ Fighters Sports & Entertainment បញ្ជាក់ថា ការជ្រើសរើសប្រើប្រាស់រថយន្តក្រុងនឹងរួមចំណែកដល់ការលើកកម្ពស់ចំណុចកណ្តាលនៃកាបូនក្នុងតំបន់ និងការជម្លៀសបន្ទាន់ផងដែរ ។

នាយកប្រតិបត្តិរូបនេះបានថ្លែងទៅកាន់សារព័ត៌មានស៊ិនហួរក្នុងពិធីប្រគល់រថយន្តក្រុងថា Fighters Sports អាចនឹងប្រើប្រាស់រថយន្តអគ្គិសនីរបស់ក្រុមហ៊ុន BYD បន្ថែមទៀតដើម្បីលើកកម្ពស់ការការពារបរិស្ថាន និងទទួលដឹកអ្នកដំណើរចិនពេលពួកគេមកលេងហុកកៃដូ ។ ម្យ៉ាងទៀត Hokkaido Ballpark F Village ស្ថិតនៅចន្លោះទីក្រុង Sapporo និងអាកាសយានដ្ឋាន New Chitose ។ រថយន្តនេះអាចដឹកអ្នកដំណើរបានពេញមួយឆ្នាំ ព្រមទាំងផ្តល់ជូននូវសកម្មភាពកម្សាន្តផ្សេងៗដល់ភ្ញៀវទេសចរផងដែរ ៕

ប្រភព ៖ newpapertoday

នៅក្នុងធម្មជាតិយើងនេះមានសត្វច្រើនប្រភេទណាស់ក្នុងពិភពលោក ដែលសត្វខ្លះស៊ីសាច់ជាអាហារ ខ្លះទៀតស៊ីរុក្ខជាតិជាអាហារ និងខ្លះទៀតស៊ីកាកសំណល់ផ្សេងៗជាអាហារ…។ ជាបន្តយើងសូមណែនាំសត្វកក្រិចជាងគេក្នុងលោកទាំង៩ប្រភេទ ដើម្បីអោយប្រិយមិត្តទាំងអស់បានដឹងមានដូចជា៖
១.សត្វប្រចៀវ គឺជាសត្វដែលផ្ទុកទៅនឹងសត្វល្អិតតូចៗ នឹងផ្ទុកទៅដោយជំងឺកាចសាហាវជាច្រើនដែលធ្វើអោយប៉ះពាល់ដល់ប្រព័ន្ធការពាររបស់មនុស្សលោកយើងផងដែរ២.សត្វត្មាត គឺជាសត្វដែលស៊ីសាកសព្វនឹងរបស់ស្មោកគ្រោគជាអាហារ ដែលអាចផ្ទុកទៅនឹងវីរុសជាច្រើន អ្វីដែលគួរអោយខ្ពើមនោះគឺវានោមដាក់ខ្លួនឯងនៅពេលេវាក្ដៅ ស្អោះ ៣.សត្វផោម គឺជាសត្វដែលមានរូបរាងស្អាតប៉ុន្តែមានក្លិនស្អុយខ្លាំងណាស់ វាតែងបញ្ចេញផោមដើម្បីការពារខ្លួនរបស់វា
៤.ខ្លាឃ្មុំកូឡា គឺជាសត្វដែលមានផ្ទុកជំងឺកាមរោគ នឹងតែងតែអោយកូនរបស់វាស៊ីលាមកខ្លួនឯងជាអាហារ៥.សត្វរំពេរ គឺជាសត្វដែលចូលចិត្តក្អួត នឹងតែងតែបន្ទោរបង់គ្រប់ទីកន្លែង ដែលអាចចំលងរោគទៅដល់មនុស្សលោកផងដែរ។៦.សត្វកវែង គឺជាសត្វដែលតែងតែស៊ីអាច់ត្រចៀកខ្លួនឯងជាអាហារ។៧.សត្វដំរីទឹក គឺជាសត្វដែលគ្មានអនាម័យ នឹងផ្ទុកវីរុសកាចសាហាវជាច្រើន៨.សត្វកាំប្រមា គឺជាសត្វដែលតែងតែបន្ទោរបង់គ្រប់ពេលវេលា ៩.សត្វរុយ គឺជាសត្វដែលផ្ទុកបាក់តេរីជាច្រើន វាតែងតែទុំលើលាមក នឹងរបស់ស្មោកគ្រោគ ដែលធ្វើអោយប៉ះពាល់ដល់សុខភាពរបស់មនុស្សយើងផងដែរ៕

មកទល់នឹងពេលបច្ចុប្បន្ននេះអ្នកវិទ្យាសាស្រ្តមិនទាន់រកឃើញភពផ្សេងណាក្រៅពីភពផែនដីដែរអាចអោយមនុស្សមានជិវិតរស់នៅ នៅឡើយទេ។ នេះសរបញ្ជាក់អោយឃើញថាភពផែនដីជាភពដល់ពិសេសមួយ នឹងជាភពដែលមានវ័យចំណាស់ផងដែរ។ ដូចច្នេះនៅក្នុងថ្ងៃនេះយើងខ្ញុំនឹងសូមលើកយកលក្ខណះប្លែកៗទាំង៥ចំណុចរបស់ភពផែនដីដើម្បីអោយប្រិយមិត្តបានដឹង ថាតើភពផែនដីមានលក្ខណះពិសេសអ្វីខ្លះ? តោះចូលរួមទស្សនាដូចតទៅ:

១.Earth <Erda(ដី)
តើអ្នកទេហេតុអ្វីបានជាគេដាក់ឈ្មោះភពផែនដីរបស់យើងថាEarthឬErda(ដី)ទៅវិញ? ក៍ប៉ុន្តែអ្វីដែលហួសចិត្តនេះ គឺអ្នកវិទ្យាសាស្រ្តបានរកឃើញថាភពនេះគឺមិនសូវមានដីនោះទេ៧០%នៃផ្ទៃផែនដីគឺជាទឹក។ តើហេតុអ្វីបានជាគេមិនព្រមដាក់ឈ្មោះភពទឹកវិញទៅ?
២.មួយថ្ងៃមិនមែន២៤ម៉ោងគត់នោះទេ
ជាទូទៅមនុស្សគ្រប់គ្នាដឹងថា១ថ្ងៃគឺ២៤ម៉ោង ប៉ុន្តែពេលវេលាពិតប្រាកដនោះគឺវិលជុំផែនដីអាករបស់ខ្លួនគឹត្រឹមតែ២៣ម៉ោង ៥៦នាទី ៤វិនាទី តែប៉ុណ្ណោះ។៣.ផែនដីមិនមែនមូលស្មើរដូចបាល់ទេ
មនុស្សគ្រប់គ្នាតែងតែគិតថាផែនដីមានរាងមូលស្មើរដូចនឹងបាល់ ប៉ុន្តែវាមិនមែនអ្វីដូចនឹងអ្នកគិតទេ បើគេវាស់កាំពីជើងទៅត្បូងនឹងពីកើតទៅលិច គឺមិនស្មើរគ្នានោះទេ។ ជាក់ស្ដែងអង្កត់ផ្ចិតរបស់អេក្វាទ័រនៅលើផែនដីនោះមានចំនួន១២,៧៥៦km ហើយបើវាស់ពីជើងមកត្បូងវិញគឺមានចំនួន១២,៧១៤km។
៤. ភពផែនដីធ្លាប់មានភពភ្លោះ
ផែនដីធ្លាប់មានភពភ្លោះមួយដែលមានទំហំប៉ុនភពអង្គារ ដែលភពនោះបានវិលប៉ះនឹងផែនដីដោយមួយចំនែកធំត្រូវបានផែនដីស្រូបយក នឹងមួយចំនែកតូចទៀតត្រូវរលាយទៅជាព្រះច័ន្ទ។
៥. មនុស្សសិក្សាពីសមុទ្រមិនដល់១០%ទេ
តើប្រិយមិត្តដឹងទេមនុស្សជាង៩០%ទៀតមិនទាន់មាននរណាសិក្សាយល់ដឹងពីសមុទ្រច្បាស់នៅឡើយទេ។ នេះសរបញ្ជាក់អោយឃើញថានៅក្នុងផ្ទៃសមុទ្រមានរឿងចម្លែក នឹងអាថ៍កំបាំងយ៉ាងច្រើនមិនចាញ់នៅលើផ្ទៃមេឃនោះទេ៕

សហរដ្ឋអាមេរិក ៖ រដ្ឋមន្ត្រីក្រសួងការបរទេសអាមេរិកបានដាស់តឿនចិនថា អាមេរិកនឹងមិនរង់ចាំយូរទេក្នុងការដាក់ទោសក្រុមហ៊ុន និងក្រុមបុគ្គលរបស់ចិន បើពួកគេផ្តល់ជំនួយផ្នែកអាវុធដល់រុស្ស៊ីសម្រាប់ធ្វើសង្គ្រាមជាមួយអ៊ុយក្រែន ។

រដ្ឋមន្ត្រីក្រសួងការបរទេសអាមេរិក លោក Anthony Blinken បានថ្លែងកាលពីថ្ងៃទី២៨ ខែកុម្ភៈថា អាមេរិកនឹងមិនស្ទាក់ស្ទើរក្នុងការដាក់ទោសចំពោះក្រុមហ៊ុន និងក្រុមបុគ្គលរបស់ចិន បើរដ្ឋាភិបាលចិនរំលោភវិធានការដាក់ទណ្ឌកម្មលើរុស្ស៊ី ករណីជម្លោះកងទ័ពនៅអ៊ុយក្រែន ។

លោក Anthony Blinken បានថ្លែងទៅកាន់អ្នកសារព័ត៌មានក្នុងអំឡុងពេលលោកមកកាន់ទីក្រុងនៃប្រទេសកាហ្សាក់ស្ថាន និងអ៊ូសបេគីស្ថាន និងជាលើកដំបូងដែលលោកបានមកកាន់ភូមិភាគនេះក្នុងឋានៈរដ្ឋមន្ត្រីក្រសួងការបរទេសរបស់រដ្ឋាភិបាលអាមេរិកថា បើចិនផ្តល់ជំនួយដល់រុស្ស៊ីក្នុងជម្លោះលើកនេះ វានឹងជាការបង្កើតបញ្ហាអាក្រក់សម្រាប់ទំនាក់ទំនងរបស់ចិនជាមួយប្រទេសផ្សេងៗក្នុងពិភពលោក ។

គួរបញ្ជាក់ថា ទំនាក់ទំនងរវាងចិន និងអាមេរិក គឺពោរពេញទៅដោយបញ្ហាតាំងពីអាមេរិកបញ្ជាក់ថា ចិនបានបង្ហោះបាឡុងស៊ើបការណ៍ចូលមកកាន់ដែនអាកាសរបស់ខ្លួន ហើយយន្តហោះចម្បាំងអាមេរិកបានបាញ់ទម្លាក់បាឡុងនោះតាមបទបញ្ជារបស់លោកប្រធានាធិបតី ចូ បៃដិន ។ ករណីជម្លោះនេះបានកើតឡើងស្របពេលបណ្តាប្រទេសលោកខាងលិចកំពុងឃ្លាំមើលយ៉ាងដិតដល់អំពីវិធានការរបស់ចិនចំពោះសង្គ្រាមនៅអ៊ុយក្រែន ៕ ប្រភព ៖ TNN World

កាលពីម្សិលមិញ ស្តេចប្រដាល់ថៃ បួខាវ បាន់ឆាមេឃ (Buakaw Banchamek) បានចូលរួមលោតឆ័ត្រយោងខាងយុទ្ធសាស្រ្តនៅមូលដ្ឋានប្រតិបត្តិការ (SAO-JFEO) ដែលជាការហ្វឹកហ្វឺនក្នុងខេត្តលុបបុរី។

នៅក្នុងការលោតឆ័ត្រយោងរបស់កីឡាករប្រដាល់ បួខាវ បានជួបហេតុការណ៍ដ៏គួរឱ្យរន្ធត់កើតឡើងដោយចៃដន្យ ដោយខ្សែឆ័ត្រយោងបានព័ន្ធគ្នាមកវ័ណ្ឌជើងខ្លួនឯងពេលមកដល់ដីអូសជិត១០០ម៉ែត្រ ដែលបានធ្វើឱ្យរូបគាត់ទទួលរងរបួសបន្តិចបន្តួច។

អ្នកជំនាញលោតឆ័ត្ររបស់ថៃបានលើកឡើងថា៖ “នេះជាសំណាងរបស់ បួខាវ ហើយ ព្រោះថាហេតុការណ៍នេះភាគច្រើនអ្នកបណ្តាលឱ្យមានមនុស្សបាត់បង់ជីវិត ឬក៏អាចរងគ្រោះថ្នាក់ធ្ងន់ធ្ងរជាងនេះ”៕

ប្រភព៖ News Directories3

ប្រទេសកូរ៉េខាងជើង ៖ សារព័ត៌មានកណ្តាលកូរ៉េ (KCNA) បានរាយការណ៍កាលពីថ្ងៃទី២៨ ខែកុម្ភៈថា លោក គឹម ជុងអ៊ុន មេដឹកនាំកំពូលរបស់កូរ៉េខាងជើង បានបញ្ជាទៅកាន់មន្ត្រីរដ្ឋាភិបាលប្រញាប់ធ្វើកំណែទម្រង់ និងកែលម្អការផ្លាស់ប្តូរជាមូលដ្ឋានដើម្បីបង្កើនទិន្នផលកសិកម្ម ស្របពេលកូរ៉េខាងជើងជួបបញ្ហាខ្វះខាតស្បៀងអាហារ ។

លោក គឹម ជុងអ៊ុន បានថ្លែងក្នុងកិច្ចប្រជុំកំពូលលើកទី៧ របស់គណៈកម្មាធិការមជ្ឈិមទី៨ នៃគណបក្សពលករកូរ៉េថា ការបង្កើនទិន្នផលកសិកម្មទៅតាមគោលដៅ គឺមានសារសំខាន់យ៉ាងខ្លាំងក្នុងឆ្នាំ២០២៣នេះ ហើយលោកក៏ផ្តោតទៅលើសារសំខាន់នៃការបង្កើនទិន្នផលកសិកម្មមានស្ថេរភាព ដើម្បីទប់ទល់នឹងការខ្វះខាតអាហារ និងពង្រឹងគំនិតសង្គមនិយមនៅកូរ៉េខាងជើង ។

ជាដំបូង មិនទាន់មានព័ត៌មានលម្អិតថា កូរ៉េខាងជើងនឹងអនុវត្តវិធានការ ឬគោលនយោបាយណាមួយដើម្បីធ្វើកំណែទម្រង់កសិកម្មទេ ប៉ុន្តែលោក គឹម ជុងអ៊ុន ថ្លែងថា ការផ្លាស់ប្តូរចាំបាច់ត្រូវកើតឡើងនៅប៉ុន្មានឆ្នាំខាងមុខទៀត ។ ផ្ទៃដីដាំដុះដំណាំកសិកម្មភាគច្រើនរបស់កូរ៉េខាងជើង គឺជាកសិដ្ឋានដាំដុះរួមគ្នា ដោយម្ចាស់ដីនឹងបើកឱកាសឱ្យកសិករតូចតាចមកដាំដុះដំណាំលើផ្ទៃដីរបស់ខ្លួន ដោយការប្រើកម្លាំងរួមគ្នា ។

កាលពីដើមខែកុម្ភៈ ឆ្នាំ២០២៣ កន្លងមក ក្រសួងបង្រួបបង្រួមជាតិកូរ៉េខាងត្បូងបង្ហាញថា ស្ថានភាពសន្តិសុខស្បៀងនៅកូរ៉េខាងជើងមើលទៅកាន់តែអាក្រក់ ។ វាជារឿងពិបាកនឹងកើតឡើង ដែលមន្ត្រីកូរ៉េខាងជើងនឹងកោះប្រជុំពិសេសដើម្បីដាក់ផែនការយុទ្ធសាស្ត្រកសិកម្ម ។

បច្ចុប្បន្ន កូរ៉េខាងជើងស្ថិតនៅក្រោមការដាក់ទណ្ឌកម្មពីអន្តរជាតិទាក់ទងនឹងគម្រោងអភិវឌ្ឍន៍អាវុធនុយក្លេអ៊ែរ និងមីស៊ីល ខណៈប្រព័ន្ធសេដ្ឋកិច្ចក្នុងប្រទេសក៏តានតឹងខ្លាំង ដោយសារការបិទព្រំដែនប្រទេសរបស់ខ្លួនដើម្បីទប់ស្កាត់ការឆ្លងជំងឺកូវីដ អស់រយៈពេល២-៣ឆ្នាំ ។ លើសពីនេះ បម្រែបម្រួលអាកាសធាតុក្នុងពិភពលោក ក៏ជះឥទ្ធិពលដល់ទិន្នផលកសិកម្មនៅកូរ៉េខាងជើងផងដែរ ។

38 North ជាគម្រោងតាមដានស្ថានការណ៍នៅកូរ៉េខាងជើងពីអាមេរិកលើកឡើងថា ស្ថានភាពសន្តិសុខស្បៀងនៅកូរ៉េខាងជើងអាក្រក់យ៉ាងខ្លាំង ចាប់តាំងពីការខ្វះខាតស្រូវអង្ករនៅឆ្នាំ១៩៩០ ។ គម្រោង 38 North បញ្ជាក់ថា ការដោះស្រាយបញ្ហារយៈពេលយូរ គឺអាស្រ័យលើការដោះស្រាយជម្លោះអាវុធនុយក្លេអ៊ែរ និងការដាក់ទណ្ឌកម្ម រួមទាំងធ្វើកំណែទម្រង់សេដ្ឋកិច្ចក្នុងប្រទេសផងដែរ ។ វានឹងរួមចំណែកដល់ការបង្កើនសមត្ថភាពផលិតរបស់កូរ៉េខាងជើង ព្រមទាំងបើកចំហសម្រាប់ទីផ្សារពិភពលោក ដើម្បីដោះស្រាយបញ្ហាខ្វះស្បៀងក្នុងប្រទេសនេះបានយូរអង្វែង ៕

ប្រភព ៖ thestandard